കൊല്ലം: സ്വത്തുതർക്കത്തെ തുടർന്ന് അമ്മയുടെ ദേഹത്ത് തിളച്ച വെള്ളമൊഴിച്ച് ഗുരുതരമായി പൊള്ളലേൽപ്പിച്ചെന്ന കേസിൽ ഒളിവിലായിരുന്ന അശ്വതി അച്ചു (37) അറസ്റ്റിൽ. തിരുവനന്തപുരത്തെ ഫ്ലാറ്റിൽ നിന്നാണ് ചടയമംഗലം പൊലീസ് ഇവരെ പിടികൂടിയത്. കേസിലെ ഒന്നാം പ്രതിയും അശ്വതിയുടെ മകളുമായ അമൃത (18) നേരത്തെ അറസ്റ്റിലായിരുന്നു. അശ്വതിയുടെ മുൻകൂർ ജാമ്യാപേക്ഷ കോടതി തള്ളിയതിനു പിന്നാലെയാണ് അറസ്റ്റ്.
കഴിഞ്ഞ സെപ്റ്റംബർ 26നാണ് കൊല്ലം ആയൂർ ഇടമുളയ്ക്കൽ സ്വദേശിനിയായ രാധാമണി (61)യ്ക്ക് പൊള്ളലേറ്റത്. വീടും സ്ഥലവും തങ്ങളുടെ പേരിൽനിന്ന് അശ്വതിയുടെ പേരിലേക്ക് മാറ്റണമെന്ന ആവശ്യത്തെച്ചൊല്ലി തർക്കമുണ്ടായിരുന്നുവെന്നാണ് പരാതി. സംഭവദിവസം മാതാപിതാക്കളെ വീട്ടിൽനിന്ന് പുറത്താക്കിയശേഷം രാധാമണിയുടെ ദേഹത്ത് തിളച്ച വെള്ളമൊഴിച്ചെന്നാണ് ആരോപണം. വീട്ടിലെ സിറ്റൗട്ടിലിരിക്കുകയായിരുന്ന രാധാമണിയുടെ മുഖത്തും കഴുത്തിലും ഗുരുതരമായി പൊള്ളലേറ്റിരുന്നു. ദിവസങ്ങളോളം ആശുപത്രിയിൽ ചികിത്സ തേടേണ്ടിവന്നു.
അശ്വതി വെള്ളം തിളപ്പിച്ച് പാത്രത്തിലാക്കി നൽകിയശേഷം രാധാമണിയുടെ ദേഹത്ത് ഒഴിക്കാൻ ആവശ്യപ്പെട്ടെന്നാണ് അമൃത പൊലീസിന് മൊഴി നൽകിയിരിക്കുന്നത്. സംഭവത്തിനു പിന്നാലെ അശ്വതി ഒളിവിൽ പോയിരുന്നു. ഹണിട്രാപ്പ് ഉൾപ്പെടെ നിരവധി കേസുകളിൽ പ്രതിയാണ് അശ്വതി അച്ചു എന്നറിയപ്പെടുന്ന അശ്വതി. വ്യാജ സമൂഹമാധ്യമ അക്കൗണ്ടുകൾ ഉപയോഗിച്ച് തട്ടിപ്പ് നടത്തിയെന്ന ആരോപണങ്ങളും ഇവർക്കെതിരെ നേരത്തെയുണ്ടായിരുന്നു.
Leave a Reply