ന്യൂസ് ഡെസ്ക്, മലയാളം യുകെ
ലണ്ടൻ: നിരോധിത സംഘടനയായ പലസ്തീൻ ആക്ഷനെ പിന്തുണച്ചു കൊണ്ടുള്ള ഭാര്യയും എഴുത്തുകാരിയുമായ സാറ ഹെൽമിന്റെ പരാമർശത്തെ തുടർന്ന് ബ്രിട്ടീഷ് ദേശീയ സുരക്ഷാ ഉപദേഷ്ടാവ് ജോനാഥൻ പവൽ സമ്മർദത്തിൽ ആയതായുള്ള റിപ്പോർട്ടുകൾ പുറത്തുവന്നു . ഐറിഷ് നോവലിസ്റ്റ് സാലി റൂണിയുടെ നിലപാടിനെ പിന്തുണച്ചുകൊണ്ടാണ് ഹെൽം സാമൂഹികമാധ്യമമായ എക്സിൽ പ്രതികരിച്ചത്. പാലസ്തീൻ ആക്ഷന് വിൽപ്പന വരുമാനത്തിന്റെ ഒരു ഭാഗം നൽകുമെന്ന് പ്രഖ്യാപിച്ചതിനെ തുടർന്ന് ബ്രിട്ടനിൽ തന്റെ പുസ്തകങ്ങൾ വിൽക്കാനാകാത്ത സാഹചര്യമുണ്ടായെന്ന് റൂണി വ്യക്തമാക്കിയിരുന്നു. നിരോധിത സംഘടനയെ പിന്തുണയ്ക്കുന്നത് ഭീകരവിരുദ്ധ നിയമപ്രകാരം കുറ്റകരമായേക്കാമെന്നും പരമാവധി 14 വർഷം വരെ തടവുശിക്ഷ ലഭിക്കാമെന്നും റിപ്പോർട്ടുകൾ ചൂണ്ടിക്കാട്ടുന്നു.
പ്രക്ഷേപകനായ ആദം ബോൾട്ടൺ റൂണിയുടെ പലസ്തീൻ അനുകൂല നിലപാടിനെ ജൂതവിരുദ്ധമെന്ന് വിശേഷിപ്പിച്ചതിന് മറുപടിയായാണ് ഹെൽം പ്രതികരിച്ചത്. പാലസ്തീനെയും പാലസ്തീൻ ആക്ഷനെയും പിന്തുണയ്ക്കുന്ന എഴുത്തുകാരുടെ പുസ്തകങ്ങളും അലമാരകളിൽനിന്ന് നീക്കം ചെയ്യുമോയെന്നായിരുന്നു അവരുടെ ചോദ്യം. സംഭവത്തിൽ എക്സിലെ പോസ്റ്റ് പരിശോധിച്ചു വരികയാണെന്നും തുടർ പൊലീസ് അന്വേഷണം ആവശ്യമാണോയെന്ന് തീരുമാനിക്കുമെന്നും ലണ്ടൻ മെട്രോപൊളിറ്റൻ പൊലീസ് അറിയിച്ചു. ഹെൽമിന്റെ പരാമർശങ്ങൾ സർക്കാരിനെ പ്രതിനിധീകരിക്കുന്നതല്ലെന്ന് ഡൗണിങ് സ്ട്രീറ്റും വ്യക്തമാക്കി. അതേസമയം, ദേശീയ സുരക്ഷാ ഉപദേഷ്ടാവിന്റെ ഭാര്യ നിരോധിത സംഘടനയുമായി ബന്ധപ്പെട്ട് പരാമർശം നടത്തിയ സാഹചര്യത്തിൽ പവൽ പരസ്യമായി നിലപാട് വ്യക്തമാക്കണമെന്ന് ജൂതവിരുദ്ധതയ്ക്കെതിരായ ക്യാംപെയ്ൻ എഗെയിൻസ്റ്റ് ആന്റിസെമിറ്റിസം ആവശ്യപ്പെട്ടു.
അതിനിടെ, റൂണിക്ക് പിന്തുണയുമായി 419 എഴുത്തുകാരും കവികളും എഡിറ്റർമാരും ചിത്രകാരന്മാരും ഒപ്പിട്ട തുറന്ന കത്ത് പുറത്തുവന്നു. അഭിപ്രായപ്രകടനത്തിന്റെ പേരിൽ എഴുത്തുകാരെ വിലക്കുന്ന രാജ്യം സ്വതന്ത്ര രാജ്യമല്ലെന്ന് കത്തിൽ ചൂണ്ടിക്കാട്ടി. റൂണിയുടെ പുസ്തകങ്ങളുടെ ബ്രിട്ടനിലെ വിൽപ്പനയിൽ നിന്നുള്ള വരുമാനം കൈപ്പറ്റുന്നത് ഗുരുതരമായ ക്രിമിനൽ കുറ്റമായേക്കാമെന്ന് മനസ്സിലാക്കിയതിനെത്തുടർന്നാണ് പ്രസാധകരായ ഫേബറുമായി ചേർന്ന് ബ്രിട്ടീഷ് വിപണിയിൽനിന്ന് പുസ്തകങ്ങൾ പിൻവലിക്കാൻ തീരുമാനിച്ചതെന്ന് റൂണി വ്യക്തമാക്കി. എന്നാൽ മറ്റു രാജ്യങ്ങളിൽ പുസ്തകങ്ങളുടെ വിൽപ്പന തുടരും. സമാധാനപരമായ പ്രതിഷേധത്തിനും അഭിപ്രായ സ്വാതന്ത്ര്യത്തിനുമുള്ള അവകാശത്തെച്ചൊല്ലി ബ്രിട്ടനിൽ നടക്കുന്ന ചർച്ചകൾക്കിടയിലാണ് സംഭവം പുതിയ വിവാദത്തിന് വഴിവെച്ചിരിക്കുന്നത്.
Leave a Reply