തിരുവനന്തപുരം: കോവളത്തെ സ്പാ കേന്ദ്രത്തിൽ പ്രായപൂർത്തിയാകാത്ത പെൺകുട്ടിയെ ലൈംഗിക ചൂഷണത്തിനിരയാക്കിയ സംഭവത്തിൽ രണ്ട് പേർ അറസ്റ്റിൽ. ആന്ധ്രപ്രദേശ് സ്വദേശിനിയായ 16 വയസ്സുകാരിയാണ് ചൂഷണത്തിനിരയായത്. കുട്ടിയെ മാതൃസഹോദരിയും ഭർത്താവും ചേർന്ന് ലൈംഗിക ചൂഷണത്തിനായി വിറ്റതായാണ് വിവരം. സംഭവത്തിൽ പൂവാർ സ്വദേശിയെയും ആലപ്പുഴ സ്വദേശിയെയുമാണ് കോവളം പൊലീസ് അറസ്റ്റ് ചെയ്തത്. കുട്ടിയുടെ മാതാപിതാക്കൾ മരിച്ചതിനെ തുടർന്ന് സംരക്ഷണച്ചുമതല ഏറ്റെടുത്തിരുന്ന ബന്ധുക്കളാണ് കുട്ടിയെ തിരുവനന്തപുരത്ത് എത്തിച്ചതെന്നാണ് റിപ്പോർട്ട്.
കഴിഞ്ഞ ജൂലൈയിലാണ് പെൺകുട്ടിയെ കോവളത്ത് എത്തിച്ചത്. തുടർന്ന് വിവിധ സ്പാകളിൽ ജോലി ചെയ്യിപ്പിച്ചുവെന്നാണ് വിവരം. കുട്ടിക്ക് 20 വയസ്സുണ്ടെന്ന് തെളിയിക്കുന്ന വ്യാജ ആധാർ കാർഡും നൽകിയിരുന്നു. യഥാർഥത്തിൽ 16 വയസ്സുള്ള പെൺകുട്ടി സ്പാ കേന്ദ്രങ്ങളിൽ ലൈംഗിക ചൂഷണത്തിന് ഇരയായതായി പൊലീസ് കണ്ടെത്തി. ഒരു സ്പായിൽ ജോലി ചെയ്തിരുന്ന യുവാവുമായി അടുപ്പത്തിലായ പെൺകുട്ടി അവിടെനിന്ന് രക്ഷപ്പെടാൻ ശ്രമിച്ചതോടെയാണ് സംഭവം പുറത്തറിയുന്നത്. കുട്ടിയെ വിറ്റശേഷം ആന്ധ്രപ്രദേശിലേക്ക് മടങ്ങിയ ബന്ധുക്കൾക്കായി പൊലീസ് അന്വേഷണം ആരംഭിച്ചിട്ടുണ്ട്.
സംഭവത്തിൽ മനുഷ്യക്കടത്ത് ഉൾപ്പെടെയുള്ള കുറ്റകൃത്യങ്ങളുടെ സാധ്യതയും പൊലീസ് പരിശോധിക്കുന്നുണ്ട്. കോവളം പൊലീസ് ഇൻസ്പെക്ടർ ശ്രീകുമാറിന്റെ നേതൃത്വത്തിലാണ് അന്വേഷണം പുരോഗമിക്കുന്നത്. കുട്ടിക്ക് വ്യാജ തിരിച്ചറിയൽ രേഖ ലഭിച്ചതിന്റെ ഉറവിടം, സ്പാ കേന്ദ്രങ്ങളിലെ മറ്റ് ഇടപാടുകൾ, സംഭവത്തിൽ കൂടുതൽ പേർക്ക് പങ്കുണ്ടോ തുടങ്ങിയ കാര്യങ്ങളും അന്വേഷണപരിധിയിലുണ്ട്. പ്രായപൂർത്തിയാകാത്ത കുട്ടികളെ തൊഴിൽ വാഗ്ദാനങ്ങളിലൂടെയോ മറ്റ് മാർഗങ്ങളിലൂടെയോ ചൂഷണത്തിനിരയാക്കുന്ന സംഭവങ്ങൾക്കെതിരെ കർശന നടപടി സ്വീകരിക്കേണ്ടതിന്റെ ആവശ്യകതയും സംഭവം ഉയർത്തുന്നു.
Leave a Reply