ന്യൂസ് ഡെസ്ക്, മലയാളം യുകെ
ലണ്ടൻ: 2023-ൽ നോട്ടിങ്ഹാമിലുണ്ടായ ആക്രമണത്തിലെ ഇരകളുടെ മെഡിക്കൽ രേഖകൾ അനധികൃതമായി പരിശോധിച്ച സംഭവത്തിൽ ഇതുവരെ 15 ജീവനക്കാരെ പിരിച്ചുവിട്ടതായി എൻഎച്ച്എസ് ട്രസ്റ്റ് അറിയിച്ചു. നോട്ടിങ്ഹാം യൂണിവേഴ്സിറ്റി ഹോസ്പിറ്റൽസ് എൻഎച്ച്എസ് ട്രസ്റ്റാണ് നടപടി സ്വീകരിച്ചത്. സംഭവത്തിൽ ഉൾപ്പെട്ട 15 പേർക്ക് അന്തിമ മുന്നറിയിപ്പും രണ്ടുപേർക്ക് ആദ്യഘട്ട രേഖാമൂലമുള്ള മുന്നറിയിപ്പും നൽകിയിട്ടുണ്ട്. ഡോക്ടർമാർ, നേഴ്സുമാർ, മറ്റ് ആരോഗ്യപ്രവർത്തകർ എന്നിവരും അന്വേഷണപരിധിയിലുണ്ട്. ഏറ്റവും പുതിയ നടപടികൾ സംബന്ധിച്ചുള്ള വിവരങ്ങൾ ഇരകളുടെ കുടുംബങ്ങളെ അധികൃതർ അറിയിച്ചിട്ടുണ്ട്.
2023 ജൂണിൽ വാൽഡോ കലോക്കെയ്ൻ നടത്തിയ ആക്രമണത്തിൽ 19 വയസ്സുകാരായ വിദ്യാർഥികൾ ബർണബി വെബറും ഗ്രേസ് ഒമാലി-കുമാറും 65 വയസ്സുകാരനായ കെയർടേക്കർ ഇയാൻ കോട്സും കൊല്ലപ്പെട്ടിരുന്നു. മൂന്നുപേരെക്കൂടി കൊലപ്പെടുത്താൻ ശ്രമിച്ച കലോക്കെയ്നെ 2024 ജനുവരിയിൽ ഉത്തരവാദിത്തബോധം കുറവായിരുന്ന സാഹചര്യത്തിൽ നരഹത്യയും കൊലപാതകശ്രമവും നടത്തിയതായി സമ്മതിച്ചതിനെത്തുടർന്ന് അനിശ്ചിതകാല ആശുപത്രി ചികിത്സയ്ക്ക് വിധിച്ചിരുന്നു. ഇരകളുടെ മെഡിക്കൽ രേഖകൾ അനധികൃതമായി പരിശോധിച്ച ജീവനക്കാർക്കെതിരായ നടപടികൾ മേയിൽ 11 പേരുടെ പിരിച്ചുവിടലോടെ ആരംഭിച്ചിരുന്നു. പുതിയ നടപടികളോടെ ആകെ പുറത്താക്കപ്പെട്ടവരുടെ എണ്ണം 15 ആയി.
രോഗിയുടെ രേഖകൾക്ക് അനധികൃതമായി പ്രവേശനം നേടുന്നതിന് ന്യായീകരണമില്ലെന്നും ഇത്തരം നടപടികൾക്കെതിരെ കർശന നടപടി തുടരുമെന്നും ട്രസ്റ്റിന്റെ മെഡിക്കൽ ഡയറക്ടർ ഡോ. മഞ്ജീത് ഷെഹ്മർ വ്യക്തമാക്കി. ജീവനക്കാരുടെ അനധികൃത ഇടപെടലുകൾ കുടുംബങ്ങളുടെ ദുഃഖം വർധിപ്പിച്ചതിൽ അദ്ദേഹം ഖേദം പ്രകടിപ്പിച്ചു. രോഗികളുടെ വിവരങ്ങൾ സുരക്ഷിതമാക്കുന്നതിനായി ജീവനക്കാർക്ക് കൂടുതൽ പരിശീലനം നൽകുന്നതിനൊപ്പം വിവരചോർച്ച കണ്ടെത്താൻ പുതിയ സംവിധാനവും ഏർപ്പെടുത്തുമെന്ന് ട്രസ്റ്റ് അറിയിച്ചു. രോഗികളുടെ രേഖകൾ അനധികൃതമായി പരിശോധിക്കുന്നതായി സംശയിക്കുന്ന എൻഎച്ച്എസ് ജീവനക്കാരെ ഉടൻ സസ്പെൻഡ് ചെയ്യുകയും ആരോഗ്യസേവനത്തിന്റെ കമ്പ്യൂട്ടർ സംവിധാനങ്ങളിലേക്കുള്ള പ്രവേശനം തടയുകയും ചെയ്യുമെന്ന് എൻഎച്ച്എസ് ഇംഗ്ലണ്ട് മേധാവി സർ ജിം മക്കിയും കഴിഞ്ഞ മാസം പ്രഖ്യാപിച്ചിരുന്നു.
Leave a Reply