ചേരാനല്ലൂർ: കണ്ടെയ്നർ റോഡിൽ 17-കാരൻ ഓടിച്ച കാറിടിച്ച് ജയബാലകൃഷ്ണൻ മരിച്ചതിനെ തുടർന്ന് 23 ദിവസമായി അടഞ്ഞുകിടന്ന ചിറ്റൂരിലെ തട്ടുകട വീണ്ടും തുറന്നു. ജയബാലകൃഷ്ണന്റെ അഭാവത്തിൽ ഭാര്യ ബിന്ദുവും മക്കളായ ഭദ്രകീർത്തി, ഭരത് ശങ്കർ, ഭാഗ്യദർശൻ എന്നിവരും ചേർന്നാണ് ഇനി കട നടത്തുക. 25 വർഷമായി ഭർത്താവിനൊപ്പം തട്ടുകടയുടെ പ്രവർത്തനങ്ങളിൽ സജീവമായിരുന്ന ബിന്ദുവിന് കടയുടെ നടത്തിപ്പിനെക്കുറിച്ച് വ്യക്തമായ ധാരണയുണ്ട്. കുടുംബത്തിന്റെ ജീവിതം മുന്നോട്ടുകൊണ്ടുപോയതും മൂന്ന് മക്കളെ പഠിപ്പിച്ചതും സ്വന്തമായി വീട് നിർമിച്ചതുമെല്ലാം ഈ തട്ടുകടയിൽ നിന്നുള്ള വരുമാനം കൊണ്ടായിരുന്നു.
ജയബാലകൃഷ്ണന്റെ വിയോഗം വലിയ ആഘാതമാണെങ്കിലും ജീവിതം മുന്നോട്ടുകൊണ്ടുപോകാൻ കട വീണ്ടും തുറക്കുകയല്ലാതെ മറ്റ് മാർഗമില്ലെന്ന് ബിന്ദു പറയുന്നു. കടയിലേക്ക് ആവശ്യമായ സാധനങ്ങൾ വാങ്ങുന്നതുൾപ്പെടെ എല്ലാ കാര്യങ്ങളിലും ഭർത്താവ് തന്നെ ഒപ്പം കൂട്ടിയിരുന്നതിനാൽ കച്ചവടം മുന്നോട്ടുകൊണ്ടുപോകാൻ ബുദ്ധിമുട്ടുണ്ടാകില്ലെന്നാണ് പ്രതീക്ഷ. വൈകിട്ട് ആറിന് ആരംഭിക്കുന്ന കടയിലെ കച്ചവടം പലപ്പോഴും അർധരാത്രി വരെ നീളാറുണ്ട്. ഭക്ഷണം തേടിയെത്തുന്ന അവസാനത്തെ ആൾക്കും ഭക്ഷണം നൽകണമെന്നത് ജയബാലകൃഷ്ണന്റെ നിർബന്ധമായിരുന്നു. മകൾ ഭദ്രകീർത്തി ഹൈദരാബാദിലെ ജോലി ഉപേക്ഷിച്ച് സഹോദരങ്ങളായ ഭരത് ശങ്കറിനും ഭാഗ്യദർശനുമൊപ്പം കടയുടെ പ്രവർത്തനങ്ങളിൽ സഹായിക്കാനായി എത്തി. പുതിയ ജോലി ലഭിക്കുന്നതുവരെ കുടുംബത്തോടൊപ്പം തുടരാനാണ് തീരുമാനം.
ജയബാലകൃഷ്ണന്റെ മരണശേഷം കുടുംബം താമസം ചിറ്റൂരിലെ തറവാട്ടുവീട്ടിലേക്ക് മാറ്റാനും തീരുമാനിച്ചിട്ടുണ്ട്. തറവാട്ടുവിഹിതമായി ലഭിച്ച രണ്ട് സെന്റ് സ്ഥലത്തെ വീട്ടിലായിരിക്കും ഇനി താമസം. നേരത്തെ മാഞ്ഞാലിയിലെ വീട്ടിലായിരുന്നു കുടുംബം താമസിച്ചിരുന്നത്. രാത്രിയിൽ കടയടച്ച് ഏറെ വൈകി വീട്ടിലെത്തേണ്ടിവന്നിരുന്നതിനാൽ ഇനി അവിടെ താമസിക്കുന്നത് പ്രയാസകരമാണെന്ന് ബിന്ദു പറയുന്നു. അതേസമയം, കണ്ടെയ്നർ റോഡിലുണ്ടായ അപകടത്തിൽ ജയബാലകൃഷ്ണന്റെ മരണത്തിന് ഉത്തരവാദികളായവരെ നിയമത്തിനു മുന്നിൽ കൊണ്ടുവരാനും അവർക്ക് പരമാവധി ശിക്ഷ ഉറപ്പാക്കാനും നിയമപോരാട്ടം തുടരുമെന്നും കുടുംബം വ്യക്തമാക്കി.











Leave a Reply