കരിങ്കുന്നം സിക്‌സ് എന്ന സിനിമയ്ക്കുവേണ്ടിയുള്ള തയ്യാറെടുപ്പിനായാണ് മഞ്ജുവാര്യര്‍ ജിമ്മിജോര്‍ജ് സ്റ്റേഡിയത്തില്‍ എത്തിയത്. ബുധനാഴ്ച സായാഹ്നശോഭയില്‍ വെള്ളയമ്പലം ജിമ്മിജോര്‍ജ് സ്റ്റേഡിയം. വോളിബോള്‍ കോര്‍ട്ടിലേക്ക് മലയാളത്തിന്റെ പ്രിയ നടി മഞ്ജു വാര്യരെത്തി. നിറയെ ചിരിയും കായികതാരമാകാന്‍ പോകുന്നതിന്റെ ആത്മവിശ്വാസവും മുഖത്ത്.
ചിത്രീകരണം തുടങ്ങാന്‍ പോകുന്ന കരിങ്കുന്നം സിക്‌സ് എന്ന സിനിമയ്ക്കുവേണ്ടിയുള്ള തയ്യാറെടുപ്പിനായാണ് മഞ്ജുവാര്യര്‍ ജിമ്മിജോര്‍ജ് സ്റ്റേഡിയത്തിലെത്തിയത്.
താരം കോര്‍ട്ടിലിറങ്ങിയതോടെ പരിശീലകനും സിനിമയുടെ അണിയറ പ്രവര്‍ത്തകരും കളിയുടെ സ്പിരിറ്റിലായി. സെര്‍വ് ചെയ്ത ബോള്‍ അണ്ടര്‍ഹാന്‍ഡിലൂടെ ലിഫ്റ്റ് ചെയ്യാന്‍ നിമിഷനേരത്തിനുള്ളില്‍ മഞ്ജു പഠിച്ചു. അസെന്റ് ചെയ്തും സ്മാഷ് ചെയ്തും വോളിബോളിന്റെ ആദ്യപാഠങ്ങള്‍.
കളിയുടെ സാങ്കേതികതകള്‍ പെട്ടെന്ന് പഠിച്ചെടുത്തത് പ്രതിഭയുടെ തിളക്കം കൊണ്ടാണെന്ന് പരിശീലകന്റെ അനുമോദനവുമെത്തി.
അരമണിക്കൂറിലേറെ നീണ്ട പരിശീലനത്തിനിടയില്‍ പരിശീലകയുടെ റോളിനെക്കുറിച്ച് സംസാരിക്കാനും മഞ്ജു സമയം കണ്ടെത്തി.
‘കഥ കേട്ടപ്പോള്‍ത്തന്നെ ഇഷ്ടമായി. ആദ്യമായാണ് സ്‌പോര്‍ട്‌സ് വിഷയമായ സിനിമയില്‍ അഭിനയിക്കുന്നത്. ഫുട്‌ബോളും ക്രിക്കറ്റുമൊക്കെ ടി.വി.യില്‍ കാണാറുണ്ട്. കോര്‍ട്ടിലിറങ്ങുന്നത് പക്ഷേ ഇതാദ്യം’…
സിനിമയില്‍ വോളിബോള്‍ പരിശീലകയുടെ റോളാണ് മഞ്ജുവിന്. പരിശീലകയുടെ റോള്‍ അഭിനയിക്കും മുന്‍പ് വോളിബോളിന്റെ കളിനിയമങ്ങള്‍ മനസ്സിലാക്കാനായിരുന്നു പരിശീലനം.
സ്‌പോര്‍ട്‌സ് മുഖ്യവിഷയമാക്കിയ പണംവാരി ചിത്രങ്ങള്‍ ബോളിവുഡിലുണ്ട്. ലഗാന്‍, ചക്‌ദേ ഇന്ത്യ എന്നിവ ഉദാഹരണം. ചക്‌ദേ ഇന്ത്യയില്‍ ഷാരൂഖ് ഖാന്‍ ഹോക്കി ടീമിനെ പരിശീലിപ്പിച്ച് കപ്പ് നേടിയെടുക്കുന്നുണ്ട്. ഇവിടെ മഞ്ജു പരിശീലിപ്പിക്കുന്നത് ജയില്‍പ്പുള്ളികളെയാണ്.
ദീപുകരുണാകരനാണ് സംവിധായകന്‍. മഞ്ജുവാര്യര്‍ക്ക് വോളിബോളില്‍ പരിശീലനം നല്‍കിയത് ഇന്ത്യന്‍ ടീമിന്റെ പരിശീലകനായിരുന്ന എസ്.ടി.ഹരിലാലാണ്.
