ന്യൂസ് ഡെസ്ക്, മലയാളം യുകെ
യൂറോപ്യൻ യൂണിയനിൽ നിന്ന് ബ്രിട്ടൻ പിന്മാറിയ ബ്രെക്സിറ്റിന്റെ ആഘാതം യുകെ സമ്പദ്വ്യവസ്ഥയെ ഗണ്യമായി ബാധിച്ചതായി പുതിയ പഠനങ്ങൾ സൂചിപ്പിക്കുന്നു. ബാങ്ക് ഓഫ് ഇംഗ്ലണ്ടിന്റെ സർവേ ഡേറ്റാ ഉൾപ്പെടെ ഏകദേശം ഒരു ദശാബ്ദത്തെ സാമ്പത്തിക വിവരങ്ങൾ വിശകലനം ചെയ്ത ഗവേഷകർ, 2025ഓടെ ബ്രെക്സിറ്റ് യുകെയുടെ ജിഡിപിയെ 6 മുതൽ 8 ശതമാനം വരെ കുറച്ചിരിക്കാമെന്നാണ് വിലയിരുത്തുന്നത്.
നിക്ഷേപ മേഖലയും തൊഴിൽ വിപണിയും ഉൽപാദനക്ഷമതയും ബ്രെക്സിറ്റിന്റെ ആഘാതം ഏറ്റുവാങ്ങിയ പ്രധാന മേഖലകളാണെന്ന് പഠനം ചൂണ്ടിക്കാട്ടുന്നു. നിക്ഷേപം 12 മുതൽ 18 ശതമാനം വരെ കുറഞ്ഞതായും തൊഴിൽ 3 മുതൽ 4 ശതമാനം വരെയും ഉൽപാദനക്ഷമത 3 മുതൽ 4 ശതമാനം വരെയും ഇടിഞ്ഞതായും ഗവേഷകർ കണക്കാക്കുന്നു. യൂറോപ്യൻ വിപണികളിലേക്കുള്ള പ്രവേശനത്തിലെ തടസ്സങ്ങളും വർധിച്ച അനിശ്ചിതത്വവും ഇതിന് കാരണമായതായി റിപ്പോർട്ടിൽ പറയുന്നു.
അതേസമയം, ബ്രെക്സിറ്റിന്റെ കൃത്യമായ സാമ്പത്തിക ആഘാതം അളക്കുന്നത് ഇപ്പോഴും സങ്കീർണമായ കാര്യമാണെന്ന് സാമ്പത്തിക വിദഗ്ധർ ചൂണ്ടിക്കാണിക്കുന്നു. കോവിഡ് മഹാമാരിയും ആഗോള സാമ്പത്തിക പ്രതിസന്ധികളും ഒരേ കാലഘട്ടത്തിൽ സംഭവിച്ചതിനാൽ ബ്രെക്സിറ്റിന്റെ സ്വാധീനം മാത്രം വേർതിരിച്ച് വിലയിരുത്തുന്നത് എളുപ്പമല്ല. എന്നിരുന്നാലും, ബ്രെക്സിറ്റ് യുകെയുടെ വളർച്ചാ സാധ്യതകളെ ദുർബലമാക്കിയെന്നതാണ് മിക്ക പഠനങ്ങളുടെയും പൊതുവായ നിഗമനം.
Leave a Reply