ജയൻ എടപ്പാൾ

ലണ്ടൻ : മൂന്നാം ലോക കേരളസഭ തീരുമാനത്തിന്റെ ഭാഗമായി യുകെ യൂറോപ്പ് മേഖല സമ്മേളനം ഒക്ടോബർ 9 ഞായറാഴ്ച ലണ്ടനിൽ നടക്കും. ബഹു. കേരള മുഖ്യ മന്ത്രി ശ്രീ പിണറായി വിജയൻ മേഖല സമ്മേളനം ഉദ്ഘാടനം ചെയ്യും. മേഖല സമ്മേളനത്തിന്റെ ഭാഗമായി യുകെ യിലെയും യൂറോപ്പിലെ വിവിധ രാജ്യങ്ങളിലെ ലോക കേരളസഭ അംഗങ്ങളും യുകെയിലെ വിവിധ സംഘടനകളെയും വിവിധ തൊഴിൽ മേഖലകളെയും പ്രതിനിധീകരിച്ചു തിരഞ്ഞെടുക്കപ്പെട്ട അംഗങ്ങൾ ഉൾപ്പെട്ട ഉള്ള ലോക കേരളസഭ മേഖല പ്രതിനിധി സമ്മേളനം ഒക്ടോബർ 9 നു കാലത്തു ഇന്ത്യൻ ഹൈ കമ്മീഷൻ ഹാളിൽ ചേരും. യുകെയിലെയും യൂറോപ്പിലേയും മലയാളീ സമൂഹംനേരിടുന്ന വിവിധ പ്രേശ്നങ്ങൾ വിവിധ വിഷയ ഗ്രൂപ്പുകൾ ആയി ചർച്ച ചെയുകയും കേരള സർക്കാരിന്റെയും ഇന്ത്യൻ ഗവണ്മെന്റിന്റെയും ശ്രദ്ധയിൽപ്പെടുത്തുന്നതിനുള്ള നടപടി ക്രമങ്ങൾ സ്വീകരിക്കുകയും ചെയ്യും.

ഉച്ചക്ക് ശേഷം ലണ്ടനിൽ ചേരുന്ന പൊതു സമ്മേളനത്തിൽ കേരളത്തിന്റെ ബഹു. മുഖ്യമന്ത്രി ശ്രീ. പിണറായി വിജയൻ യുകെയിലെയും യൂറോപ്പിലേയും പൊതു സമൂഹത്തെ അഭിസംബോധന ചെയ്യും. കേരള സർക്കാരിന്റെ നോർക്ക് വകുപ്പിന്റെ ആഭിമുഖ്യത്തിൽ ലോക കേരള സഭ സെക്രട്ടറിയേറ്റ് തീരുമാന പ്രകാരം ഓഗസ്റ്റ് അവസാന വാരം ഈ പരിപാടിയുടെ വമ്പിച്ച വിജയത്തിനായി കോർഡിനേഷൻ കമ്മിറ്റി രൂപീകരിച്ചു വിവിധ സബ് കമ്മിറ്റികളായി വിവിധ പ്രവർത്തനങ്ങൾ നടത്തി വരുന്നു.

രണ്ടാം പിണറായി സർക്കാരിന്റെ കാലഘട്ടത്ത് ആദ്യമായി യു കെയിലെത്തുന്ന കേരളത്തിന്റെ പ്രിയ മുഖ്യമന്ത്രി, കേരളത്തിന്റെ വികസന നായകൻ ശ്രീ പിണറായി വിജയനെ സ്വീകരിക്കാൻ ഉള്ള വിവിധ പ്രവർത്തനങ്ങളിൽ ആണ് വിവിധ സബ് കമ്മിറ്റികൾ പ്രവർത്തിച്ചു വരുന്നത്.

ലോക കേരളസഭ മേഖല കോൺഫറൻസും മുഖ്യമന്ത്രിയുടെ പൊതുപരിപാടിയും വൻ വിജയമാക്കാൻ ശ്രീ എസ് ശ്രീകുമാർ ചീഫ് കോർഡിനേറ്റർ ആയും ശ്രീ സി എ ജോസഫ് ജോയിന്റ് കോർഡിനേറ്റർ ആയും ഡോ. ബിജു പെരിങ്ങത്തറ (നാഷണൽ പ്രസിഡന്റ്‌, യുക്മ, യു. കെ.) ഓർഗനൈസിങ് കമ്മിറ്റി ചെയർമാൻ ആയും ; ഓർഗനൈസിങ് കമ്മിറ്റിയിൽ ലോക കേരളസഭ പ്രതിനിധികൾ ആയി ആയി ശ്രീ ആഷിക് മുഹമ്മദ്‌ നാസറിനെയും ശ്രീ സുനിൽ മലയിൽനെയും , പി.ആർ.ഒ. ആയി ശ്രീ ജയൻ എടപ്പാളിനെയും മറ്റു വിവിധ സബ് കമ്മിറ്റി കൺവീനർമാരെയും തിരഞ്ഞെടുത്തു.

യുകെയിലെ മറ്റു ലോകകേരള സഭ അംഗങ്ങൾ വിവിധ സബ് കമ്മിറ്റികളിൽ കൺവീനർമാരുമൊത്തു പ്രവർത്തിക്കുന്നു.

വിവിധ സബ് കമ്മിറ്റികളും കൺവീനർമാരും ലോക കേരളസഭ അംഗങ്ങളും

(1)വെന്യൂ – റിഫ്രഷ്മെന്റ് : ശ്രീ കുര്യൻ ജേക്കബ് (നാഷണൽ സെക്രട്ടറി കൈരളി യു കെ ), അഡൊക്കേറ്റ്. ദിലീപ് കുമാർ (എൽ.കെ.എസ്)

(2) റിസപ്ഷൻ കമ്മിറ്റി : ശ്രീ സഫിർ എൻ കെ (ജനറൽ സെക്രട്ടറി, കെ.എം.സി.സി ) ; ശ്രീ ലജീവ് കെ രാജൻ (എൽ.കെ. എസ്)

(3) പബ്ലിസിറ്റി കമ്മിറ്റി :ശ്രീ കെ കെ മോഹൻദാസ് (പ്രസിഡന്റ്‌, ഒഐസിസി ); ശ്രീ ജയൻ എടപ്പാൾ (എൽ.കെ.എസ്)

(4)പ്രോഗ്രാം കമ്മിറ്റി :ശ്രീ ദിനേശ് വെള്ളാപ്പിള്ളി (നാഷണൽ സെക്രട്ടറി, സമീക്ഷ യു കെ ); ശ്രീ ഷാഫി റഹ്മാൻ(എൽ.കെ.എസ്)

(5) ഫിനാൻസ് കമ്മിറ്റി :ശ്രീ. എസ് ജയപ്രകാശ് (എൽ.കെ.എസ്)

(6) കൾച്ചറൽ കമ്മിറ്റി : ശ്രീ ശ്രീജിത്ത്‌ ശ്രീധരൻ (ഡയറക്ടർ, എം എ യൂ കെ ); ശ്രീമതി നിധിൻ ചന്ദ്(എൽ.കെ.എസ്)

ലണ്ടനിൽ ഒക്ടോബർ 9ന് നടക്കുന്ന ലോക കേരള സഭ മേഖല സമ്മേളനവും കേരള മുഖ്യമന്ത്രിയുടെ പബ്ലിക് കോൺഫറസും ഒരു വൻ വിജയമാക്കി മാറ്റുവാൻ യു കെയിലെ മലയാളീ പൊതുസമൂഹത്തിന്റ എല്ലാവിധ പിന്തുണയും സഹകരണങ്ങളും ഉണ്ടാകണമെന്ന് ചീഫ് കോർഡിനേറ്റർ ശ്രീ എസ് ശ്രീകുമാർ അഭ്യർത്ഥിച്ചു.

യൂ കെ യിലെ വിവിധ രാഷ്ട്രീയ, സാമൂഹ്യ സാംസ്‌ക്കരിക സംഘടന പ്രതിനിധികളെ എല്ലാവരെയും ഈ വിവിധ സബ് കമ്മിറ്റി പ്രവർത്തനങ്ങളിൽ ഉൾപ്പെടുത്തി ബഹു. മുഖ്യമന്ത്രിയുടെ യുകെ സന്നർശനവും ലോക കേരള സഭയുടെ യുകെ & യൂറോപ്പ് റീജിയണൽ കോൺഫെറെൻസും വൻ വിജയമാക്കാൻ എല്ലാവരും ഒരുമിച്ചു പ്രവർത്തിക്കണമെന്ന് സംഘാടക സമിതി ഓർഗനൈസിങ് കമ്മിറ്റി ചെയർമാൻ ഡോ. ബിജു പെരിങ്ങത്തറ; ജോയിന്റ് കോർഡിനേറ്റർ ശ്രീ സി. എ. ജോസഫ് എന്നിവർ എല്ലാവരോടും അഭ്യർത്ഥിച്ചു.

ടോം ജോസ് തടിയംപാട്

ക്യാൻസർ ബാധിച്ച ഇടുക്കി നെടുങ്കണ്ടം സ്വദേശി ഓട്ടോ ഡ്രൈവർ ഷാജി പി ൻ നു വേണ്ടി ഇടുക്കി ചാരിറ്റി ഗ്രൂപ്പ് യു കെ നടത്തിയ ഓണം ചാരിറ്റിയിലൂടെ ലഭിച്ചത് 1820 പൗണ്ട്. ചാരിറ്റി അവസാനിച്ചതായി അറിയിക്കുന്നു . ഇനി ദയവായി ആരും പണം ഇടരുത് എന്ന് അറിയിക്കുന്നു . ബാങ്കിൻെറ സമ്മറി സ്റ്റേറ്റ് മെന്റ് പ്രസിദ്ധീകരിക്കുന്നു. ലഭിച്ച പണം ഏറ്റവും അടുത്ത ദിവസം സാമൂഹികപ്രവർത്തകരുടെ സാന്നിധ്യത്തിൽ ഷാജിക്ക് കൈമാറും എന്നറിയിക്കുന്നു.

പണം തന്നു സഹായിച്ച ആർക്കെങ്കിലും ബാങ്കിന്റെ ഫുൾ സ്റ്റേറ്റ്മെൻറ് ലഭിച്ചിട്ടില്ലെങ്കിൽ ഞങ്ങളുടെ താഴെ കാണുന്ന നമ്പറിൽ ദയവായി വിളിക്കുക . ഷാജിയുടെ വേദനനിറഞ്ഞ ജീവിതം ഇടുക്കി ചാരിറ്റി ഗ്രൂപ്പ് യു കെ യെ അറിയിച്ചത് യു കെ യിലെ കിങ്‌സ്‌ലിൻലിൽ താമസിക്കുന്ന നെടുക്കണ്ടം പാലാർ സ്വദേശി തോമസ് പുത്തൻപുരക്കലാണ്. ഇടുക്കി ചാരിറ്റി ഗ്രൂപ്പ് യു കെ എന്നത് കേരളത്തിൽ നിന്നും യു കെയിൽ കുടിയേറിയ കഷ്ട്പാടും ബുദ്ധിമുട്ടും അറിഞ്ഞവരുടെ ഒരു കൂട്ടായ്‌മയാണ്‌.

ഞങ്ങൾ ‍ ഇതുവരെ സൂതാരൃവും സതൃസന്ധവുമായി ജാതി ,മത ,വർഗ ,വർണ്ണ, സ്ഥല ,കാല ഭേതമെന്യയെ കേരളത്തിലും, യു കെ യിലും , നടത്തിയ ചാരിറ്റി പ്രവർത്തനത്തിലൂടെ ഇതുവരെ 1,11 00,000 (ഒരുകോടി പതിനൊന്നു ലക്ഷം ) രൂപയുടെ സഹായം അർഹിക്കുന്നവർക്കു നൽകുവാൻ കഴിഞ്ഞിട്ടുണ്ട് . 2004 ഉണ്ടായ സുനാമിക്ക് പണം പിരിച്ചു അന്നത്തെ മുഖ്യമന്തി ഉമ്മൻ ചാണ്ടിക്കു നൽകിക്കൊണ്ടാണ് ഞങ്ങൾ പ്രവർത്തനം ആരംഭിച്ചത്.

ഞങ്ങളുടെ ഈ എളിയ പ്രവർത്തനത്തിനു മലയാളം യു കെ പത്രത്തിന്റെ അവാർഡ് ,ലിവർപൂൾ ക്നാനായ കമ്മ്യൂണിറ്റിയുടെ അംഗീകാരം ,പടമുഖം സ്നേഹമന്ദിരത്തിന്റെ അംഗീകാരം എന്നിവ ലഭിച്ചിട്ടുണ്ട് .
ഇടുക്കി ചാരിറ്റിക്കു നേതൃത്വ൦കൊടുക്കുന്നത് സാബു ഫിലിപ്പ് 07708181997 ടോം ജോസ് തടിയംപാട് 07859060320 സജി തോമസ്‌ 07803276626.. .എന്നിവരാണ് .

“ദാരിദ്രൃം എന്തെന്നറിഞ്ഞവർക്കെ പാരിൽ പരക്ലേശവിവേകമുള്ളു.””,

ജോൺസൺ കളപ്പുരയ്ക്കൽ

ഫ്രണ്ട്സ് ഓഫ് പ്രസ്റ്റൺ മലയാളി അസോസിയേഷൻ ഗംഭീര ഓണാഘോഷ പരിപാടികൾക്കായി ഒരുങ്ങുന്നു. സെപ്റ്റം ബർ 10 -ന് ലോങ്ങ് ഗ്രിഡ് ജ് സിവിക് ഹാളിൽ. സീരിയിൽ ആർട്ടിസ്റ്റ് ഭാഗ്യലക്ഷ്മി പ്രഭു (മീനാക്ഷി തട്ടിം മൂട്ടിം ) ‘സാന്നിധ്യം ‘കൂടുതൽ ‘ ‘വർണ്ണാഭമാക്കും . ഇന്നലെകളുടെ ഉണർത്തുപാട്ടുമായി ഓണസദ്യയും, F O P ചെണ്ടമേളവും, പുലികളിയും , കോൽക്കളിയും, തിരുവാതിരയും, വടംവലിയും ദൃശ്യവിരുന്നാകുന്ന ഒട്ടനവധി കലാപരിപാടികളുമായി F O P വിപുലമായ ഓണാഘോഷത്തിന് തയ്യാറെടുക്കുകയാണ്.

കഴിഞ്ഞ വർഷം അഞ്ഞൂറിലധികം പേർക്ക് സദ്യയൊരുക്കിയ തൻ്റെ അനുഭവസമ്പത്തുമായി ഭാരവാഹികൾ അരയും തലയും മുറുക്കി രംഗത്തുണ്ട്. പ്രസ്റ്റൺ അൽഫോൺസാ പള്ളി വികാരി ഫാദർ ബാബു പുത്തൻപുരയ്ക്കൽ യുക്മ ദേശീയ ജനറൽ സെക്രട്ടറി കുര്യൻ ജോർജ്ജ് മീനാക്ഷി പ്രഭു എന്നിവർ മുഖ്യാതിഥികൾ ആവും. കോർഡിനേറ്റർ സിന്നി ജേക്കബിന്റെ നേതൃത്വത്തിൽ വിവിധ കമ്മറ്റികൾ സജീവമായി രംഗത്തുണ്ട്. ഓണം പൊന്നോണം 2022 ലേക്ക് ഏവരെയും സഹർഷം സ്വാഗതം ചെയ്യുന്നതായി ഭാരവാഹികൾ അറിയിച്ചു.

ബിനോയി ജോസഫ്

ലിങ്കൺഷയർ കൗണ്ടിയിലുള്ള സ്കൻതോർപ്പും ഗെയിൻസ്ബറോയുമായുള്ള ദൂരം 15 മൈൽ. എന്നാൽ ക്രിക്കറ്റ് പ്രേമികളായ മലയാളികൾ ക്രിക്കറ്റ് പിച്ചിലെത്തിയപ്പോൾ രണ്ടു ടൗണുകൾ ഒന്നായി. സ്പോർട്സ്മാൻ സ്പിരിറ്റോടെ അവർ ഒരു വലിയ മലയാളി കുടുംബമായി. ബ്ളു കളർ ജേഴ്സിയിൽ ഇറങ്ങിയ സ്കൻതോർപ്പ് ഇലവനെ ക്യാപ്റ്റൻ ജോബിൻ നയിച്ചപ്പോൾ ജെറി ക്യാപ്റ്റനായുള്ള ഗെയിൻസ്ബറോ ടീം യെല്ലോ കളർ ജേഴ്സിയിൽ പിച്ചിലിറങ്ങി. ഗെയിൻസ്ബറോയിലെ മലയാളികൾ ആതിഥേയത്വമൊരുക്കിയ മാച്ച് മോർട്ടൻ ടെൻ്റ് സൈഡ് സ്കൂൾ ഗ്രൗണ്ടിലാണ് അരങ്ങേറിയത്.

സ്കൻതോർപ്പിലും ഗെയിൻസ്ബറോയിലും മലയാളികൾ ഒരുമിച്ച് ചേർന്ന് ക്രിക്കറ്റ് കളിക്കാറുണ്ടെങ്കിലും ഇരു ടീമുകളും ഫ്രണ്ട്ലി മാച്ചിനെത്തിയത് അവിസ്മരണീയമായ അനുഭവമായി. ഇരുപ്രദേശങ്ങളിലെയും മലയാളികളെ ഒരുമിപ്പിക്കാൻ ക്രിക്കറ്റിന് സാധിച്ചതിൽ ഇരു ടീമംഗങ്ങളും സന്തോഷം പ്രകടിപ്പിച്ചു. ലോക്കൽ ക്രിക്കറ്റ് ടീമുകൾ വൈറ്റ് കളർ ജേഴ്സിയിൽ ക്രിക്കറ്റ് പ്രാക്ടീസ് നടത്തുന്ന പിച്ചിൽ ബ്ളു, യെല്ലോ ജേഴ്സികൾ അണിനിരന്ന മത്സരം ഇന്ത്യാ- ഓസ്ട്രേലിയ മാച്ചിനെ അനുസ്മരിപ്പിക്കുന്നതായി എന്ന് കാണികൾ പറഞ്ഞു.

ബൗൾ ചെയ്തും ബാറ്റു വീശിയും ടീമുകൾ പിച്ചിൽ മുന്നേറിയപ്പോൾ കൈയടിച്ച് പ്രോത്സാഹിപ്പിക്കാൻ നിരവധി മലയാളി കുടുംബങ്ങൾ എത്തിച്ചേർന്നിരുന്നു. വാശിയേറിയ ഫ്രണ്ട്‌ലി മാച്ചിനൊടുവിൽ ഇരു ടീമുകളും കൈ കൊടുത്തു പിരിഞ്ഞു… വളരെയധികം അച്ചടക്കത്തോടെയും പ്രഫഷണലിസത്തോടെയും നടന്ന മത്സരം അടുത്ത സീസണിലും തുടരണമെന്ന ആഗ്രഹവും പങ്കുവെച്ച്.

അയർക്കുന്നം മറ്റക്കരക്കാരുടെ അഞ്ചാമത് സംഗമ വേദിയാകാൻ ചെൽട്ടൻഹാം ഒരുങ്ങി. ഓണക്കളികളും വടംവലിയും കിലുക്കി കുത്തും അന്താക്ഷരിയും ഒക്കെയായി അഞ്ചാമത് അയർക്കുന്നം മറ്റക്കര സംഗമ വേദിയാകാൻ ചെൽട്ടൻഹാം ഒരുങ്ങി. ഈ വരുന്ന ശനിയാഴ്ച സെപ്റ്റംബർ മൂന്നിന് രാവിലെ 9 മണിക്ക് കേരളത്തനിമയാർന്ന പ്രഭാതഭക്ഷണത്തോടുകൂടി ചെൽട്ടൻഹാമിലേ സ്വിൻഡൻ വില്ലേജ് ഹാളിൽ സംഗമത്തിന് തുടക്കം കുറിക്കും.

കോട്ടയം ജില്ലയിലെ പുരാതനമായ രണ്ട് വൻകരകളിലെ അയർക്കുന്നവും മറ്റക്കരയും ഉൾപ്പെടുന്ന സ്ഥലത്തുനിന്നും യുകെയിലേക്ക് കുടിയേറിയ മലയാളികൾ ഒത്തു കൂടുമ്പോൾ, സഹപാഠികളും നാട്ടുകാരും വീട്ടുകാരുമായി ഒരു വർഷത്തെ പല കഥകളും വിശേഷങ്ങളുമായി സല്ലപിക്കാൻ ഇത്തവണ പാലാപ്പള്ളിയുടെ ഈരടികൾ ബാഗ്രൗണ്ടിൽ മുഴങ്ങുന്നുണ്ടാകും. യുകെയിലെ സംഗമങ്ങളിൽ അയർക്കുന്നം മറ്റക്കര സംഗമം എക്കാലവും മികവുറ്റതായിരുന്നു. പ്രവർത്തന മികവുകൊണ്ടും ജനപങ്കാളിത്തം കൊണ്ടും ഇത്തവണയും വേറിട്ടു നിൽക്കും എന്നതിൽ സംശയമില്ലെന്ന് പ്രസിഡന്റ് ശ്രീ ഫെലിക്സ് ജോൺ ഉള്ളാട്ടിൽ പറഞ്ഞു.

യുകെയിലെ നാനാ ദിക്കുകളിൽ നിന്നും വണ്ടിയോടിച്ചും ട്രെയിനിലും എത്തുന്ന ഏവരെയും സ്വാഗതം ചെയ്യാൻ എല്ലാ തയ്യാറെടുപ്പുകളും പൂർത്തിയായതായി സ്വാഗത കമ്മിറ്റി ചെയർമാനും സംഗമത്തിന്റെ സെക്രട്ടറിയും കൂടിയായ ശ്രീ തോമസ് ഒഴുങ്ങാലില്‍ അറിയിച്ചു. പത്തുമണിക്ക് നടക്കുന്ന പൊതുയോഗം, സംഗമത്തിൽ സംബന്ധിക്കാൻ നാട്ടിൽ നിന്നും എത്തിയിരിക്കുന്ന രക്ഷകർത്താക്കളുടെ പ്രതിനിധികൾ തിരിതെളിച്ച് ഉദ്ഘാടനം ചെയ്യുമെന്ന് സംഗമം വൈസ് പ്രസിഡന്റ് ശ്രീമതി മേഴ്സി ബിജു അറിയിച്ചു. സംഗമത്തിന് എത്തുന്ന എല്ലാവർക്കും സ്വാദേറിയ വിഭവങ്ങൾ ബ്രിസ്റ്റോളിൽ നിന്നുള്ള അറിയപ്പെടുന്ന കേറ്ററിംഗ് കാരുടെ നേതൃത്വത്തിൽ കേരളത്തനിമയോടുകൂടി വിളമ്പുന്നതിന് വേണ്ടിയുള്ള ക്രമീകരണങ്ങൾ പൂർത്തിയായതായി ഫിനാൻസ് കമ്മിറ്റി ചെയർമാൻ റോബി ജെയിംസ് പറഞ്ഞു. സംഗമം നടക്കുന്ന വേദിയുടെ അഡ്രസ്സ് താഴെ കൊടുക്കുന്നു.

Swindon village hall, Church road, Swindon village, Cheltenham. GL51 9QP

കെന്റിലെ പ്രമുഖ മലയാളി അസോസിയേഷനായ സഹൃദയ ദി കെന്റ് കേരളൈറ്റ്സ് അണിയിച്ചൊരുക്കുന്ന മൂന്നാമത്തെ ഓൾ യു.കെ ഹാർഡ് ബോൾ ക്രിക്കറ്റ് ടൂർണ്ണമെന്റ് സെപ്റ്റംബർ പതിനൊന്ന് ഞായറാഴ്ച്ച ഇന്ത്യൻ ക്രിക്കറ്റ് ചരിത്രം കോറിയിട്ടിരിക്കുന്ന പ്രശസ്തമായ നെവിൽ ക്രിക്കറ്റ് ഗ്രൗണ്ടിൽ വെച്ച് നടത്തപ്പെടും.

ക്രിക്കറ്റിനെ പ്രണയിക്കുന്ന ഏതൊരു മലയാളിയും ഒരു പക്ഷേ ഇന്ത്യയുടെ ആദ്യ ലോകകപ്പ് ക്രിക്കറ്റ് വിജയത്തിൻ്റെ സുവർണ നിമിഷങ്ങളെ പറ്റി ഒരിക്കൽ എങ്കിലും കേട്ടിട്ടുണ്ടാകും. 1983 ജൂൺ18 ന് ഇന്ത്യ ആദ്യമായി ലോകകപ്പ്​ കിരീടത്തിൽ മുത്തമിടുന്നതിനു കൃത്യം ഒരാഴ്​ച മുമ്പായിരുന്നു ടൺബ്രിഡ്​ജ്​വെൽസിലെ നെവിൽ മൈതാനത്ത്​ സിംബാബ്​വേയും ഇന്ത്യയും തമ്മിലുള്ള മത്സരം. ക്യാപ്​റ്റൻ പദവി ഏറ്റെടുത്തിട്ട്​ കേവലം നാലു മാസം മാത്രം പ്രായമുള്ള കപിൽദേവ്​ എന്ന 24കാരൻ ടൺ ബ്രിഡ്ജ് വെൽസിലെ നെവിൽ ഗ്രൗണ്ടിൽ അന്ന് നടത്തിയത് ഒരു ബാറ്റിംഗ് വെടിക്കെട്ട് തന്നെയായിരുന്നു.

ഒരൊറ്റ ഇന്ത്യക്കാരൻ പോലും ഏകദിനത്തിൽ സെഞ്ച്വറി നേടിയിട്ടില്ലാത്ത ആ കാലത്ത്​ ആദ്യമായി ഇന്ത്യക്കു വേണ്ടി കപിൽ ഏകദിനത്തിൽ സെഞ്ച്വറി കുറിച്ചു. കളി അവസാനിക്കുമ്പോൾ ഇന്ത്യൻ സ്​കോർ എട്ടിന്​ 266. കപിൽദേവ്​ പുറത്താകാതെ നേടിയത് 175 റൺസ്​. അതും വെറും 138 പന്തിൽ. മൈതാനത്തി​​​​​ന്റെ അതിരുകൾ അളന്ന 16 ഫോറുകൾ. ആകാശം ഭേദിച്ച ആറ്​ സിക്​സറുകൾ.

ക്രിക്കറ്റ് ലോകം കണ്ട ഏറ്റവും മികച്ച ഓൾ‌ റൌണ്ടർമാരിലൊരാളായിരുന്ന മുൻ ഇന്ത്യൻ ടീം ക്യാപ്റ്റൻ കപിൽ ദേവിന്റെ ബാറ്റിംഗ് വിസ്ഫോടനം നടന്ന ഗ്രൗണ്ട് കാണുവാനും, അവിടെ കളിക്കുവാനുമുള്ള ഒരു സുവർണാവസരം ആണ് സഹൃദയ ഈ തവണ ഒരുക്കിയിരിക്കുന്നത്

സഹൃദയയുടെ ഹോം ടീമായ റോയൽസ് ക്രിക്കറ്റ് ക്ലബ്ബിനോടൊപ്പം യു. കെയുടെ വിവിധ ഭാഗങ്ങളിൽ നിന്നുള്ള 7 ടീമുകൾക്ക് ആണ് മത്സരിക്കാൻ അവസരം ലഭിച്ചിരിക്കുന്നത്.
സഹൃദയയുടെ മൂന്നാമത് അഖില യു.കെ ക്രിക്കറ്റ് ടൂർണമെന്റിൽ മാറ്റുരക്കുന്ന ടീമുകൾ ഇവരാണ്. റോയൽ സ്ട്രൈക്കേഴ്സ് മെയ്ഡ് സ്റ്റോൺ, റെഡ്ഹിൽ വാരിയേഴ്സ്, പ്രസ്റ്റൺ ടസ്കേഴ്സ്, മല്ലു ക്രിക്കറ്റ് ക്ലബ് ബ്രോംലി, ജില്ലിംഹാം വാരിയേഴ്സ്, ഗള്ളി ക്രിക്കറ്റേഴ്സ് ഓക്സ്ഫോർഡ്, മെയ്ഡ് സ്‌റ്റോൺ സൂപ്പർ കിംഗ്സ്.

രാവിലെ 8 മണി മുതൽ ആരംഭിക്കുന്ന മത്സരങ്ങൾ നെവിൽ ക്രിക്കറ്റ് ഗ്രൗണ്ടിലെ രണ്ടു മൈതാനത്തായി ആണ് നടക്കുന്നത്. ഗ്രൂപ്പ് സ്റ്റേജിൽ നിന്നും വിജയിച്ചു വരുന്ന നാലു ടീമുകൾ സെമിഫൈനലിൽ പ്രവേശിക്കും. വിജയികൾക്ക് ക്യാഷ് അവാർഡുകളും ട്രോഫികളും ആണ് സമ്മാനം. ഒന്നാം സമ്മാനർഹരെ കാത്തിരിക്കുന്നത് 701 പൗണ്ടിന്റെ ക്യാഷ് അവാർഡും ട്രോഫിയും ആണ്. രണ്ടാം സ്ഥാനത്തെത്തുന്നവർക്ക് 351 പൗണ്ടും, മൂന്നാം സ്ഥാനാർഹർക്ക് 151 പൗണ്ടും ട്രോഫിയും ലഭിക്കും. കൂടാതെ ബെസ്ററ് ബാറ്റ്സ്മാൻ, ബെസ്ററ് ബൗളർ, എന്നിവർക്ക് പ്രത്യേക ക്യാഷ് അവാർഡുകളും ട്രോഫിയും ലഭിക്കും.

മുൻ വർഷങ്ങളിലെ പോലെ തന്നെ ഈ വർഷവും മികച്ച രീതിയിൽ ടൂർണ്ണമെന്റ് സംഘടിപ്പിക്കുവാനാണ് സഹൃദയ ലക്ഷ്യമിടുന്നത്. മത്സരത്തോടനുബന്ധിച്ച് മിതമായ നിരക്കിൽ ഫുഡ് സ്റ്റാളുകളും ക്രമീകരിക്കുന്നുണ്ട്. ഗ്രൗണ്ടിനോടനുബന്ധമായി തന്നെ പാർക്കിംഗ് സൗകര്യവും ഉണ്ടായിരിക്കുന്നതാണ്.

ഈ ക്രിക്കറ്റ് ടൂർണമെന്റ് ഒരു വൻ വിജയമാക്കി മാറ്റുവാനും, ക്രിക്കറ്റ് ചരിത്രമുറങ്ങുന്ന നെവിൽ ഗ്രൗണ്ട് കാണുവാനും, മത്സരങ്ങൾ കാണുവാനുമായി എല്ലാ ക്രിക്കറ്റ് പ്രേമികളേയും ടീം സഹൃദയ കെന്റിലെ ടൺ ബ്രിഡ്‌ജ് വെൽസിലേക്ക് ഹൃദ്യമായി സ്വാഗതം ചെയ്യുകയാണ്.

കൂടുതൽ വിവരങ്ങൾക്കായി ബന്ധപ്പെടുക :-
അജിത്ത് വെൺമണി 07957 100426
ബിബിൻ എബ്രഹാം 07534893125
മനോജ് കോത്തൂർ 07767 008991
വിജു വറുഗീസ് 07984 534481

സ്പോട്സ് ഡെസ്ക്. മലയാളം യുകെ

മലയാളി അസ്സോസിയേഷൻ സണ്ടർലാൻ്റ് ആതിഥേയത്വം വഹിച്ച ദേശീയ വടം വലി മൽസരവും കായിക മേളയും 2022 ഓഗസ്റ്റ് 13 ശനിയാഴ്ച സണ്ടർലാൻഡിലെ സിൽക്‌സ്‌വർത്ത് സ്‌പോർട്‌സ് കോംപ്ലക്‌സിൽ വിജയകരമായി നടന്നു.

മാസ് പ്രസിഡൻ്റ് റജി തോമസ് , സെക്രട്ടറി വിപിൻ വർഗ്ഗീസ്, ട്രഷറർ അരുൺ ജോളി, സ്പോർട്സ് കോർഡിനേറ്റർ ഷാജി ജോസ് തുടങ്ങിയവരുടെ നേതൃത്വത്തിലുള്ള മാസിൻ്റെ വലിയൊരു കൂട്ടായ്മയാണ് ഈ മേളയെ വൻവിജയത്തിലേക്കെത്തിച്ചത്.

വാശിയേറിയ വടംവലി മൽസരങ്ങളിൽ മികവും കരുത്തുറ്റതുമായ പ്രകടനത്തോടെ കാണികളെ കോരിത്തരിപ്പിച്ചു കൊണ്ട് എക്സിറ്റർ മലയാളി അസോസിയേഷൻ (ഇമ) നാഷണൽ വടംവലി ചാമ്പ്യൻ പട്ടം മാസ്സിന്റെ പ്രസിഡൻറ് ശ്രീ. റജി തോമസിൽ നിന്നും ഏറ്റുവാങ്ങി. ഇമയുടെ വിജയത്തിൽ മുഖ്യ പങ്കുവഹിച്ചത്
ജെഫ്രി തോമസ് – കോച്ച്, ജോബി തോമസ് – ക്യാപ്റ്റ്യൻ, റോബി വർഗീസ് – ടീം മാനേജർ എന്നിവരുടെ കൂട്ടായ പ്രവർത്തനമാണ്.

ജിജോ ജോയിയുടെ പരിശീലനത്തിലും ക്യാപ്റ്റൻസിയിലുമുള്ള ന്യൂ സ്റ്റാർ ന്യൂകാസിൽ റണ്ണർ അപ്പ് ആയി. മൂന്നാം സ്ഥാനം ഇൻഡോ യുകെ ദുർഹം നേടിയപ്പോൾ നാലാം സ്ഥാനം മലയാളി അസോസിയേഷൻ സണ്ടർലാൻണ്ടും കരസ്ഥമാക്കി.

വടംവലിയിൽ കേരള ചാമ്പ്യൻമാരായ പറവൂരിൻ്റെ സ്വന്തം ഡിയോൾ റജിനും, മാസിൻ്റെ തോമസ് മാത്യു, ഫെലിക്സ് തറപ്പേൽ, ജെയ്സ് മാത്യു തുടങ്ങിവയരും ചേർന്നാണ് വടം വലി മൽസരങ്ങൾ നിയന്ത്രിച്ചത്.

ദേശീയ കായികമേളയിൽ മലയാളി അസോസിയേഷൻ സണ്ടർലാൻറ് ട്രാക്ക് & ഫീൽഡ് ഇനങ്ങളിൽ ഏറ്റവുമധിയം പോയിൻറുകൾ കരസ്ഥമാക്കികൊണ്ട് ഓവറോൾ ചാമ്പ്യൻ പട്ടമണിഞ്ഞു.

വിവിധ ഗ്രൂപ്പിനങ്ങളിൽ ആവേശകരമായ മൽസരങ്ങൾ കാഴ്ചവെച്ചു കൊണ്ട് ഡേവിഡ് ജോൺ ഡിയോൾ – ഹാരോ ഗേറ്റ് (സബ് ജൂനിയർ ബോയ്സ്), ജൊവാന സെബി – മാസ് (സബ് ജൂനിയർ ഗേൾസ്), സിയോൺ ജസ്റ്റിൻ – മാസ് (ജൂനിയർ ബോയ്സ്), ക്രിസ്റ്റൽ മരിയ തോമസ് – മാസ് (ജൂനിയർ ഗേൾസ്), സ്റ്റീവ് ജസ്റ്റിൻ – മാസ് (സബ് സീനിയർ ബോയ്സ്), ജോസ് മാനുവൽ – മാസ് (സീനിയർ ബോയ്സ്), രോഷിനി റജി – മാസ് (സീനിയർ ഗേൾസ്), ഡിയോൾ റജിൻ – ഹാരോഗേറ്റ് (അഡൾട്ട് മെൻ), ജുണ ബിജു – മാസ് (അഡൾട്ട് വുമൺ), ബിജു വർഗ്ഗീസ് – മാസ് ( സൂപ്പർ സീനിയർ മെൻ), ഡോ. സിസിലിയ മാത്യൂ – മാസ് ( സൂപ്പർ സീനിയർ വുമൺ) എന്നിവർ വ്യക്തിഗത ചാമ്പ്യൻ പട്ടമണിഞ്ഞു കായിക മേളയിൽ കരുത്തു തെളിയിച്ചു.

രജിസ്ട്രേഷൻ കൗണ്ടർ നൂതന സാങ്കേതിക വിദ്യകളുടെ മികവോടെ വിദഗ്ദമായി കൈകാര്യം ചെയ്തു. ഫുഡ് കൗണ്ടർ മേളയുടെ ശ്രദ്ദ്ധാകേന്ദ്രമായിരുന്നു. രുചിയൂറും നാടൻ വിഭവങ്ങൾ തത്സമയം പാചകം ചെയ്ത് മൽസരാർഥികൾക്കും, കാണികൾക്കും നൽകിക്കൊണ്ട് മാസ് തട്ടുകട മേളക്ക് വേറിട്ടൊരനുഭൂതിയാണ് സമ്മാനിച്ചത്

രാവിലെ 400 മീറ്റർ ഓട്ടമൽസരത്തോടു കൂടി മാസ് പ്രസിഡൻ്റ് ശ്രീ. റജി തോമസ് കായിയമേള ഉദ്‌ഘാടനം ചെയ്തു. തുടർന്ന് ഉച്ചയോടു കൂടി വടം വലി മൽസങ്ങൾ ആരംഭിച്ചിച്ച് വൈകുന്നേരം മൽസര വിജയികൾക്ക് സമ്മാനദാന ചടങ്ങുകളോടു കൂടി മേള സമാപിച്ചു. മേളയിൽ സിഗ്ന കെയർ ഗ്രൂപ്പിൻ്റെ സാരഥികളായ ബൈജു ഫ്രാൻസിസും, ടെസ്സി ബൈജുവും മുഖ്യ അതിധികളായിരുന്നു. ഈ മേളയുടെ മുഖ്യ സാമ്പത്തിക സഹായി സിഗ്‌ന കെയർ ഗ്രൂപ്പും, സഹ സഹായികൾ ബിഗ് ഹോൺ (യുകെ) ലിമിറ്റഡിന്റെ ഉടമസ്ഥതയിലുള്ള ലഷ്കിറ്റൻ ബ്രാൻഡ്, എവരിവൺ ആക്ടീവ് ക്ലബ്ബ്, ജോൺ എൻ്റർ പ്രൈസസുമായിരുന്നു.

മെയ്ഡ്സ്റ്റോൺ: കെന്റിലെ പ്രമുഖ മലയാളി സംഘടനയായ മെയ്ഡ്സ്റ്റോൺ മലയാളി അസോസിയേഷൻ സംഘടിപ്പിക്കുന്ന ഓൾ യുകെ യൂത്ത് ഫുട്ബോൾ ടൂർണ്ണമെന്റ് ആഗസ്റ്റ് 27 ശനിയാഴ്ച മെയ്ഡ്സ്റ്റോണിൽ അരങ്ങേറും. നിരവധി മികച്ച പരിപാടികൾ വിജയകരമായി നടപ്പിലാക്കിവരുന്ന എംഎംഎയുടെ ഏറ്റവും നൂതനമായ ആശയമാണ് കൗമാരക്കാരെ അണിനിരത്തിക്കൊണ്ടുള്ള യൂത്ത് ഫുട്‍ബോൾ ടൂർണ്ണമെന്റ്. എംഎംഎയുടെ യൂത്ത് വിംഗായ എംഎംഎ യൂത്ത് ക്ലബാണ് ടൂർണമെന്റിന് നേതൃത്വം നൽകുന്നത്.

വളർന്നുവരുന്ന കായിക പ്രതിഭകളെ മുഖ്യധാരയിൽ എത്തിക്കുവാനുള്ള ശ്രമത്തിന്റെ ഭാഗമായി സംഘടിപ്പിക്കുന്ന ഈ ടൂർണ്ണമെന്റിൽ യുകെയുടെ വിവിധ ഭാഗങ്ങളിൽ നിന്നുമായി 8 ടീമുകൾ പങ്കെടുക്കും. മെയ്ഡ്സ്റ്റോൺ സെന്റ് അഗസ്റ്റിൻ ഫുട്‍ബോൾ ഗ്രൗണ്ടിൽ ആഗസ്റ്റ് 27 ശനിയാഴ്ച രാവിലെ 8 മണിക്ക് ആരംഭിക്കുന്ന ടൂർണ്ണമെന്റിൽ ആതിഥേയരായ എംഎംഎ യൂത്ത് ഫുട്ബോൾ ക്ലബും കെന്റിലെ മറ്റു അസോസിയേഷനുകളിൽ നിന്നുമുള്ള ഫുട്ബോൾ ക്ലബുകളും മാറ്റുരയ്ക്കും. വിജയികളെ കാത്തിരിക്കുന്നത് അത്യാകർഷകങ്ങളായ സമ്മാനങ്ങളും ട്രോഫികളുമാണ്. ചാംപ്യൻമാരാകുന്ന ടീമിന് 301 പൗണ്ടും എംഎംഎ എവർ റോളിങ്ങ് ‌ ട്രോഫിയും ലഭിക്കും. റണ്ണേഴ്‌സ് അപ്പിന് 201 പൗണ്ടും ട്രോഫിയും, മൂന്നാം സ്ഥാനത്തെത്തുന്നവർക്ക് 101 പൗണ്ടും ട്രോഫിയും ലഭിക്കും.

മത്സരം കാണാനെത്തുന്നവർക്കും ടീമംഗങ്ങൾക്കുമായി വിശാലമായ പാർക്കിങ് സൗകര്യവും, മിതമായ നിരക്കിൽ പ്രവർത്തിക്കുന്ന ഭക്ഷണശാലകളും ക്രമീകരിച്ചിട്ടുണ്ട്. യുവതലമുറയുടെ വീറും വാശിയും നിറഞ്ഞ പോരാട്ടവീര്യം കണ്ടാസ്വദിക്കുവാനും പ്രതിഭകളെ പ്രോത്സാഹിപ്പിക്കുവാനും എല്ലാ കായികപ്രേമികളെയും മെയ്ഡ്സ്റ്റോൺ സെന്റ് അഗസ്റ്റിൻസ് ഫുട്ബോൾ മൈതാനത്തേക്ക് സ്നേഹപൂർവ്വം ക്ഷണിക്കുന്നതായി എംഎംഎ സ്പോർട്സ് കോ-ഓർഡിനേറ്റർ അജിത്ത് പീതാംബരൻ അറിയിച്ചു.

 കുര്യൻ ജോർജ്ജ്

വാൽസാളിൽ ചേർന്ന യുക്മ ദേശീയ സമിതിയുടെ ആദ്യ യോഗം യുക്മ ദേശീയ പി.ആർ.ഒ. യും മീഡിയ കോർഡിനേറ്ററുമായി യുക്മ മുൻ ദേശീയ ജനറൽ സെക്രട്ടറി അലക്‌സ് വർഗീസിനെ ഐക്യകണ്ഠേന തിരഞ്ഞെടുത്തു. യുക്മയുടെ ആരംഭകാലം മുതൽ യുക്‌മയുടെ ഏറ്റവും അടുത്ത സഹകാരിയായി അറിയപ്പെടുന്ന അലക്‌സ് വർഗീസ് യു കെ മലയാളികൾക്കിടയിൽ മുഖവുര ആവശ്യമില്ലാത്ത സംഘാടകനാണ്.

യുക്മയുടെ പ്രഥമ ദേശീയ കലാമേളയിൽ ഏറ്റവുമധികം പോയിൻറ് നേടി ചാമ്പ്യൻമാരായ മാഞ്ചസ്റ്റർ മലയാളി കൾച്ചറൽ അസ്സോസ്സിയേഷൻ (എം.എം.സി.എ) പ്രസിഡൻറ് പദം മുതൽ നിരവധി പദവികൾ വഹിച്ചിട്ടുളള അലക്‌സ് വർഗീസ് യുക്മ നേതൃനിരയിലെ ഏറ്റവും പരിചയ സമ്പന്നനാണ്. വിനയവും സൗമ്യതയും മുഖമുദ്രയാക്കി ഏത് പ്രതിസന്ധിയും അനായാസേന കൈകാര്യം ചെയ്യുന്ന അലക്‌സ് യുക്‌മയ്ക്ക് ഒരു മുതൽക്കൂട്ടാണ്. യുക്‌മ ദേശീയ സമിതിയംഗം, ജോയിൻറ് ട്രഷറർ, ജോയിൻറ് സെക്രട്ടറി, ട്രഷറർ, ജനറൽ സെക്രട്ടറി എന്നീ പദവികൾ വഹിച്ചിട്ടുള്ള അലക്‌സ് യുക്മ പി.ആർ.ഒ യുടെ ചുമതലയും മുൻപ് ഒരു ടേം നിർവ്വഹിച്ചിട്ടുണ്ട്. യുക്മയുടെ മുഖപത്രമായ യുക്മ ന്യൂസിന്റെ മാനേജിങ് എഡിറ്ററുമാണ് അലക്‌സ് വർഗീസ്. മാഞ്ചസ്റ്റർ സെൻറ്. തോമസ് സീറോ മലബാർ ചർച്ചിന്റെ ട്രസ്റ്റിയായി മുൻപ് പ്രവർത്തിച്ചിട്ടുള്ള അലക്‌സ് നിലവിൽ മാഞ്ചസ്റ്റർ സെൻറ്. തോമസ്‌ ദി അപ്പോസ്റ്റൽ മിഷന്റെ ട്രസ്റ്റിയായും പ്രവർത്തിച്ചു വരുന്നു.

മാഞ്ചസ്റ്റർ എം.എം.സി.എ, യുക്മ റീജിയണൽ, ദേശീയ കലാമേളകൾ ഉൾപ്പടെ നിരവധി പരിപാടികൾ വിജയകരമായി സംഘടിപ്പിച്ചിട്ടുള്ള അലക്‌സിന്റെ സംഘാടക പാടവത്തിന്റെ മകുടോദാഹരണങ്ങളാണ് മാഞ്ചസ്റ്റർ ഫോറം സെന്ററിൽ വെച്ച് നടത്തിയ യുക്മ ഫാമിലി ഫെസ്റ്റ്, 2019 ലെ മാഞ്ചസ്റ്റർ യുക്മ ദേശീയ കലാമേള എന്നിവ. ഡിജിറ്റൽ സാങ്കേതിക വിദ്യയുടെ സഹായത്തോടെ സംഘടിപ്പിച്ച, അതിമനോഹരങ്ങളായ ആ പരിപാടികളിലൂടെ യുക്‌മയുടെ ചരിത്രത്തിലെ ഏറ്റവും പ്രൗഢഗംഭീരമായ പരിപാടികൾക്കാണ് യു കെ മലയാളികൾ സാക്ഷ്യം വഹിച്ചത്.

യു കെയിലെ ഏറ്റവും വലിയ സൂപ്പർ മാർക്കറ്റ് ശ്രുംഖലയായ ടെസ്‌കോയുടെ ഓൾട്രിംങ്ങ്ഹാം എക്സ്ട്രായിലാണ് അലക്‌സ് ജോലി ചെയ്യുന്നത്. കേരള പോലീസ് ഉദ്യോഗസ്ഥനായ അലക്‌സ്, പോലീസ്‌ അസ്സോസ്സിയേഷൻ ജില്ലാ കമ്മിറ്റി അംഗമായും പ്രവർത്തിച്ചിട്ടുണ്ട്.

യുക്മ ദേശീയ പി.ആർ.ഒ, മീഡിയ കോർഡിനേറ്റർ എന്നീ നിലകളിൽ അലക്‌സ് വർഗീസിന്റെ സേവനം യുക്മയ്ക്കും യു കെ മലയാളി സമൂഹത്തിനും കൂടുതൽ പ്രയോജനപ്രദമായി തീരട്ടേയെന്ന് യുക്മ പ്രസിഡൻറ് ഡോ. ബിജു പെരിങ്ങത്തറ, ജനറൽ സെക്രട്ടറി കുര്യൻ ജോർജ്ജ് എന്നിവർ ആശംസിച്ചു.

യുക്മയുടെ ഔദ്യോഗീക വാർത്തകൾ നേരിട്ട് ലഭിക്കാത്ത മാധ്യമങ്ങൾ [email protected] എന്ന ഇ – മെയിൽ വിലാസത്തിൽ ബന്ധപ്പെടുവാൻ അഭ്യർത്ഥിക്കുന്നു. അതോടൊപ്പം തന്നെ യുക്മ നാഷണൽ പി.ആർ.ഒ യുമായി 07985641921 എന്ന നമ്പറിലും വാർത്തകളുമായി ബന്ധപ്പെട്ട കാര്യങ്ങൾക്കായി വിളിക്കാവുന്നതാണ്.