ഏബ്രഹാം കുര്യൻ
കേരള ഗവൺമെൻറിന്റെ മലയാളം മിഷൻ യുകെ ചാപ്റ്റർ പ്രസിഡന്റായി സി എ ജോസഫിനെ നിയമിച്ചു. സെക്രട്ടറിയായി പ്രവർത്തിക്കുന്ന ഏബ്രഹാം കുര്യനും മറ്റു ഭാരവാഹികളും പ്രവർത്തക സമിതി അംഗങ്ങളും മാറ്റമില്ലാതെ തുടരുന്നതാണ് . പ്രമുഖ സാംസ്കാരിക പ്രവർത്തകരെയും ഭാഷാ സ്നേഹികളെയും ഉൾപ്പെടുത്തി എസ് എസ് ജയപ്രകാശ് ചെയർമാനായി വിദഗ്ധ സമിതിയും ഡോ. അരുൺ തങ്കത്തിന്റെ നേതൃത്വത്തിലുള്ള പത്തംഗ ഉപദേശക സമിതിയും പ്രവർത്തിച്ചു വരുന്നു. യു കെയിൽ സാമൂഹിക സാംസ്കാരിക മേഖലകളിലും മാതൃഭാഷാ ഉന്നമനത്തിനായും പ്രവർത്തിക്കുന്ന ജിമ്മി ജോസഫ്, ബിന്ദു കുര്യൻ, ബിൻസി എൽദോ എന്നിവരെയും ഉൾപ്പെടുത്തി നിലവിൽ 16 അംഗ പ്രവർത്തകസമിതിയായി വിപുലീകരിച്ചു.
2017 സെപ്റ്റംബർ 22 ന് ബഹു.കേരള സാംസ്കാരിക വകുപ്പ് മന്ത്രി എ കെ ബാലനാണ് ലണ്ടനിൽ വച്ച് മലയാളം മിഷൻ യുകെ ചാപ്റ്ററിന്റെ ഉദ്ഘാടനം നിർവഹിച്ചത്. മലയാളം മിഷന്റെ യുകെയിലെ പ്രവർത്തനങ്ങൾക്കായി പത്തംഗ അഡ്ഹോക്ക് കമ്മിറ്റിയെയും അദ്ദേഹം പ്രഖ്യാപിച്ചിരുന്നു. അഡ്ഹോക്ക് കമ്മറ്റി കൺവീനറായും മലയാളം മിഷൻ യുകെ ചാപ്റ്റർ പ്രസിഡണ്ട് ആയും സേവനം അനുഷ്ഠിച്ചിരുന്ന മുരളി വെട്ടത്ത് വ്യക്തിപരമായ കാരണങ്ങളാൽ പ്രസിഡൻറ് സ്ഥാനം അടുത്ത നാളിൽ രാജിവെച്ചിരുന്നു. അദ്ദേഹത്തിൻറെ രാജി സ്വീകരിച്ച മലയാളം മിഷൻ ഡയറക്റ്ററാണ് പ്രവർത്തക സമിതി അംഗവും ജോയിന്റ് സെക്രട്ടറിയുമായ സി എ ജോസഫിനെ മലയാളം മിഷൻ യുകെ ചാപ്റ്റർ പ്രസിഡണ്ട് ആയി നിയമിച്ചത്.
യുകെയിലെ കലാ സാംസ്കാരിക രംഗത്ത് സജീവ സാന്നിദ്ധ്യമായ സി എ ജോസഫ് യുക്മ സാംസ്കാരിക വേദിയുടെ രക്ഷാധികാരിയുമാണ് . ഇക്കഴിഞ്ഞ ലോക് ഡൗൺ കാലയളവിൽ ലോകമെമ്പാടുമുള്ള ആരോഗ്യപ്രവർത്തകർക്ക് ആദരവർപ്പിച്ച് യുക്മ സാംസ്കാരിക വേദി സംഘടിപ്പിച്ച ‘Let’s Break It Together’ എന്ന സംഗീത പരിപാടിയുടെ മുഖ്യ ചുമതലയും വഹിച്ച സി എ ജോസഫ് ഉജ്ജ്വല വാഗ്മിയും മികച്ച സംഘാടകനുമാണ്. യുക്മയുടെ നേതൃത്വത്തിൽ എല്ലാ മാസവും പ്രസിദ്ധീകരിക്കുന്ന ജ്വാല ഇമാഗസിന്റെ എഡിറ്റോറിയൽ ബോർഡ് അംഗമായും സാംസ്കാരിക വേദിയുടെ കലാവിഭാഗം കൺവീനർ, ജനറൽ കൺവീനർ, വൈസ് ചെയർമാൻ എന്നീ നിലകളിലും പ്രവർത്തിച്ചിട്ടുള്ള സി എ ജോസഫ് ലണ്ടൻ മലയാള സാഹിത്യ വേദിയുടെ പ്രോഗ്രാം കോഡിനേറ്ററുമാണ്.
പ്രവാസി മലയാളികളുടെ ഇടയിൽ ഏറെ ശ്രദ്ധിക്കപ്പെട്ട ‘സമ്മർ ഇൻ ബ്രിട്ടൻ’ ‘ഓർമ്മകളിൽ സെലിൻ’ ‘ഒരു ബിലാത്തി പ്രണയം’ എന്നീ ചിത്രങ്ങളിലും അഭിനയിച്ചിട്ടുള്ള സി എ ജോസഫ് യുകെ മലയാളികളുടെ പ്രശംസ പിടിച്ചുപറ്റിയ ‘ഓർമയിൽ ഒരു ഓണം’എന്ന ആൽബത്തിനും അയർക്കുന്നം-മറ്റക്കര സംഗമത്തിന്റെ തീംസോങ്ങിനും ഗാനരചനയും നിർവഹിച്ചിട്ടുണ്ട്. കേരള യൂണിവേഴ്സിറ്റിയിൽ നിന്ന് ധനതത്വശാസ്ത്രത്തിൽ ബിരുദാനന്തര ബിരുദവും കേരള സ്റ്റേറ്റ് കോപ്പറേറ്റീവ് യൂണിയന്റെ ഹയർ ഡിപ്ലോമ കോഴ്സായ എച്ച് ഡി സിയും കരസ്ഥമാക്കിയിട്ടുള്ള സി എ ജോസഫ് നാട്ടിൽ അധ്യാപകൻ, പത്രപ്രവർത്തകൻ, സഹകരണ ബാങ്ക് ഉദ്യോഗസ്ഥൻ എന്നീ നിലകളിലും പ്രവർത്തിച്ചിരുന്നു. സഹകരണ ബാങ്ക് ഉദ്യോഗസ്ഥൻ ആയിരിക്കെ ലീവെടുത്ത് സൗദി അറേബ്യയിലെ അബഹയിൽ എത്തിയ ജോസഫ് 15 വർഷം അവിടെ ജോലി ചെയ്തിരുന്നു. സൗദിയിലും കലാ സാംസ്കാരിക മേഖലകളിൽ സജീവമായിരുന്ന സി എ ജോസഫ് കമ്മീസ്മുഷയത്തിൽ പ്രവർത്തിച്ചിരുന്ന കമ്മീസ് ഇൻറർനാഷണൽ സ്കൂളിന്റെ ഡയറക്ടറായും സേവനമനുഷ്ഠിച്ചിരുന്നു. 2006 ൽ യുകെയിലെത്തി. ലണ്ടനടുത്ത് ഗിൽഫോർഡിൽ കുടുംബസമേതം താമസിക്കുന്നു.
മലയാളം മിഷൻ യുകെ ചാപ്റ്റർ സെക്രട്ടറിയായി പ്രവർത്തിക്കുന്ന ഏബ്രഹാം കുര്യൻ 15 വർഷമായി കുടുംബസമേതം യുകെയിലെ കവൻട്രിയിൽ ആണ് താമസിക്കുന്നത്. കവൻട്രി മലയാളി അസോസിയേഷൻ മുൻ പ്രസിഡണ്ടും കേരള സ്ക്കൂൾ കവൻട്രിയുടെ മുൻ പ്രധാനാദ്ധ്യാപകനും ആയിരുന്ന ഏബ്രഹാം കുര്യൻ പുരോഗമന കലാ സാംസ്കാരിക സംഘടനയായ സമീക്ഷയുടെ കവൻട്രി ബ്രാഞ്ച് പ്രസിഡണ്ട് ആയും കവൻട്രി കേരളാ സ്കൂൾ ഡയറക്ടർ ബോർഡ് അംഗമായും ആയും ബെർമിങ്ഹാം സെന്റ് സ്റ്റീഫൻസ് ഓർത്തഡോക്സ് ചർച്ച് സെക്രട്ടറിയായും പ്രവർത്തിക്കുന്നു. യുക്മ കലാമേളയിൽ ഈസ്റ്റ് ആൻഡ് വെസ്ററ് മിഡ്ലാൻഡ്സ് കലാപ്രതിഭയായി തിരഞ്ഞെടുക്കപ്പെട്ടിട്ടുള്ള ഏബ്രഹാം കുര്യൻ മികച്ച സംഘാടകനും വാഗ്മിയുമാണ് . യു കെയിൽ എത്തുന്നതിനു മുൻപ് കേരള വനം വകുപ്പിൽ ഉദ്യോഗസ്ഥനായിരുന്നു.
മലയാളം മിഷൻ യുകെ ചാപ്റ്ററിന്റെ ക്രീയാത്മകമായ പ്രവർത്തനങ്ങൾക്കു വേണ്ട മാർഗ്ഗ നിർദ്ദേശങ്ങൾ സമർപ്പിക്കുന്നതിനായി രൂപീകരിച്ച നാലംഗ വിദഗ്ധ സമിതിയുടെ ചെയർമാൻ ആയി പ്രവർത്തിക്കുന്നത് നോർത്തേൺ അയർലൻഡ് കോർഡിനേറ്റർ കൂടിയായ ശ്രീ എസ് എസ് ജയപ്രകാശാണ്. നോർത്തേൺ അയർലണ്ടിൽ പ്രവർത്തിക്കുന്ന പ്രമുഖ കലാ സാംസ്കാരിക പ്രസ്ഥാനമായ കർമ്മ കലാകേന്ദ്രത്തിന്റെ ഡയറക്ടറായി പ്രവർത്തിക്കുന്ന എസ് എസ് ജയപ്രകാശ് അറിയപ്പെടുന്ന കലാ സാംസ്കാരിക പ്രവർത്തകനുമാണ് . സമീക്ഷ മുൻ ദേശീയ ജനറൽ സെക്രട്ടറിയായും കോട്ടയം ബസേലിയസ് കോളേജ് മുൻ യൂണിയൻ ചെയർമാനായും ജയപ്രകാശ് പ്രവർത്തിച്ചിട്ടുണ്ട്. വിദഗ്ധ സമിതി അംഗങ്ങൾ ആയി തെരഞ്ഞെടുത്തിരിക്കുന്നത് പ്രമുഖ സാംസ്ക്കാരിക പ്രവർത്തകരും എഴുത്തുകാരുമായ പ്രൊഫ.മീരാ കമല, ലിൻസ് അയ്യന്നേത്ത്, റെജീന വർഗീസ് എന്നിവരെയാണ്. റെജിത ഷിബു വിദഗ്ദ്ധ സമിതിയിൽ പ്രത്യേക ക്ഷണിതാവാണ്.
മലയാളം മിഷൻ യു കെ ചാപ്റ്റർ പ്രവർത്തക സമിതിയുടെ സുഗമമായ പ്രവർത്തനങ്ങൾക്ക് വേണ്ട നിർദ്ദേശങ്ങൾ നൽകുന്നതിനായി വിവിധ മേഖലകളിൽ പ്രവർത്തിക്കുന്ന പ്രതിഭാസമ്പന്നരായ ആളുകളെ ഉൾപ്പെടുത്തി രൂപീകൃതമായ അഡ്വൈസറി കമ്മിറ്റിയുടെ ചെയർമാൻ സസ്സെക്സ് യൂണിവേഴ്സിറ്റിയിലെ എക്കണോമിക്സ് ആൻഡ് ഗ്ലോബൽ ഡെവലപ്മെൻറ് വകുപ്പ് മേധാവിയായ ഡോ.അരുൺ തങ്കമാണ് . ഉപദേശക സമിതിയിലെ അംഗങ്ങളായി പ്രവർത്തിക്കുന്നത് പ്രൊഫ.മുഹമ്മദ് ബഷീർ,ഡോ.അജയ് ചന്ദ്രൻ, മണമ്പൂർ സുരേഷ് , ജയശ്രീ ശ്യാംലാൽ, റോബി മേക്കര, മധു ഷൺമുഖം, ശ്രീകാന്ത് എൻ നമ്പൂതിരി, മിനി രാഘവൻ, ഐവി ഗൊഡാർഡ് എന്നിവരാണ്.
പ്രവർത്തക സമിതി കൺവീനർ ആയി ഇന്ദുലാൽ സോമൻ പ്രവർത്തിക്കുന്നു. നൂറു ശതമാനം സാക്ഷരത നേടിയ കോട്ടയം ജില്ലയിലെ പ്രമുഖ സാക്ഷരത പ്രവർത്തകനായി സേവനമനുഷ്ഠിച്ചിരുന്ന ഇന്ദുലാൽ സോമൻ സമീക്ഷയുടെ മുൻ ദേശീയ സമിതി അംഗവും ആയിരുന്നു. അറിയപ്പെടുന്ന സാംസ്കാരിക പ്രവർത്തകനും മലയാളഭാഷാ പ്രചാരകനുമായ ഇന്ദുലാൽ സോമൻ ലണ്ടനടുത്ത് വോക്കിങ്ങിലാണ് കുടുംബസമേതം താമസിക്കുന്നത് . ഷെഫീൽഡ് എൻ എച്ച് എസ് ഹോസ്പിറ്റലിൽ കുട്ടികളുടെ മനശ്ശാസ്ത്രജ്ഞയായി സേവനമനുഷ്ഠിക്കുന്ന ഡോ.സീന ദേവകിയാണ് യു കെ ചാപ്റ്ററിന്റെ വൈസ് പ്രസിഡൻറ്. ജോയിന്റ് സെക്രട്ടറിയായി പ്രവർത്തിക്കുന്നത് പുരോഗമന സാംസ്കാരിക സംഘടനയായ സമീക്ഷയുടെ ദേശീയ പ്രസിഡൻറും മുൻ സീരിയൽ നടിയും സാഹിത്യകാരിയുമായ സ്വപ്ന പ്രവീൺ ആണ് . മലയാള ഭാഷാ പ്രചാരകരായി പ്രവർത്തിക്കുന്നവരും വിവിധ സാമൂഹിക സാംസ്കാരിക സംഘടനാ മേഖലകളിൽ വ്യക്തിമുദ്ര പതിപ്പിച്ചിട്ടുള്ളവരുമായ മുരളി വെട്ടത്ത്, ശ്രീജിത്ത് ശ്രീധരൻ, സുജു ജോസഫ് , ബേസിൽ ജോൺ, ആഷിക്ക് മുഹമ്മദ് നാസർ, ജനേഷ് നായർ രഞ്ജു പിള്ള, എന്നിവരും പ്രവർത്തക സമിതി അംഗങ്ങളാണ്.
മലയാളം മിഷൻ യുകെ ചാപ്റ്റർ കേരളപ്പിറവി ദിനത്തിൽ മലയാളഭാഷാ പ്രചാരണത്തിനായി തുടക്കം കുറിച്ച മലയാളം ഡ്രൈവിന്റെ ഭാഗമായി നൂറുദിന കർമ്മ പരിപാടികൾ ആണ് സംഘാടകർ വിഭാവനം ചെയ്തിരിക്കുന്നത് . മലയാളം മിഷൻ യുകെ ചാപ്റ്ററിന്റെ ഫേസ്ബുക്ക് പേജിലൂടെ നടത്തുന്ന പരിപാടികൾക്ക് ഭാഷാ സ്നേഹികളായ ആളുകളിൽ നിന്നും മികച്ച പിന്തുണയാണ് ലഭിച്ചുകൊണ്ടിരിക്കുന്നത് . ഇക്കഴിഞ്ഞ നവംബർ 8 ഞായറാഴ്ച മലയാളം മിഷൻ രജിസ്ട്രാർ എം സേതുമാധവൻ ‘മലയാളം- മലയാളി-മലയാളം മിഷൻ’ എന്ന വിഷയത്തെ ആസ്പദമാക്കി നടത്തിയ പ്രഭാഷണം യു കെ ചാപ്റ്ററിനു കീഴിലുള്ള മുഴുവൻ സ്കൂളുകളിലും പഠിക്കുന്ന വിദ്യാർത്ഥികൾക്കും അധ്യാപകർക്കും രക്ഷകർത്താക്കൾക്കും വളരെ ഉപകാരപ്രദമായിരുന്നു. മലയാളം ഡ്രൈവിന്റെ പ്രവർത്തനങ്ങൾക്ക് നേതൃത്വം നൽകുന്നത് പ്രവർത്തക സമിതി അംഗങ്ങളായ ആഷിക് മുഹമ്മദ് നാസർ, ജനേഷ് നായർ, ബേസിൽ ജോൺ എന്നിവരാണ്.
മലയാളം മിഷൻ യു കെ ചാപ്റ്റർ ആരംഭിച്ച മലയാളം ഡ്രൈവിന്റെ ഭാഗമായി നവംബർ 14 ശനിയാഴ്ച വൈകുന്നേരം 4 പി എം ന് (ഇന്ത്യൻ സമയം 9.30 പി എം) പ്രമുഖ കവയിത്രിയും ദളിത് ആക്ടിവിസ്റ്റും പാഠഭേദം മാസികയുടെ എഡിറ്ററുമായ എസ് മൃദുല ദേവി ‘പാളുവ (പറയ) ഭാഷയ്ക്ക് മലയാളത്തിലെ പ്രസക്തി’ എന്ന വിഷയത്തിൽ പ്രഭാഷണം നടത്തുന്നു.
‘പാളുവ’ ഭാഷയിൽ നിരവധി കവിതകളും രചിച്ചിട്ടുളള എസ് മൃദുലദേവി അറിയപ്പെടുന്ന സാമൂഹിക പ്രവർത്തകയുമാണ് . മലയാളം മിഷൻ യുകെ ചാപ്റ്ററിന്റെ ഫേസ്ബുക്ക് പേജിലൂടെ നടത്തുന്ന നവ്യമായ അറിവുകൾ പ്രദാനം ചെയ്യുന്ന ഈ ലൈവ് പ്രഭാഷണം എല്ലാ ഭാഷാസ്നേഹികളും ശ്രവിക്കണമെന്നും താഴെക്കൊടുത്തിരിക്കുന്ന മലയാളം മിഷൻ യുകെ ചാപ്റ്റന്റെ ഫേസ്ബുക്ക് പേജ് ലൈക്ക് ചെയ്തും പരിപാടികൾ ഷെയർ ചെയ്തും യുകെ ചാപ്റ്റർ ഭാഷാ ഉന്നമനത്തിനായി നടത്തുന്ന എല്ലാ പ്രവർത്തനങ്ങളെയും പ്രോത്സാഹിപ്പിക്കണമെന്നും പ്രവർത്തകസമിതി അഭ്യർത്ഥിക്കുന്നു.
https://www.facebook.com/MAMIUKCHAPTER/live/
പ്രവാസികളുടെ പുതുതലമുറയെ കേരളത്തിന്റെ സംസ്കാരവും ഭാഷയും ആയി അടുപ്പിക്കുക എന്ന ലക്ഷ്യത്തോടെയാണ് കേരള ഗവൺമെൻറ് സാംസ്കാരിക വകുപ്പിന്റെ കീഴിൽ പ്രവർത്തിക്കുന്ന മലയാളം മിഷൻ, ഇന്ത്യയ്ക്ക് പുറത്ത് 42 രാജ്യങ്ങളിലും കേരളത്തിന് വെളിയിൽ 24 സംസ്ഥാനങ്ങളിലുമായി വ്യാപിച്ചു കിടക്കുന്നു. ലോകമെമ്പാടുമുള്ള പ്രവാസി മലയാളി സംഘടനകളുമായി സഹകരിച്ചുകൊണ്ടാണ് മലയാളം മിഷൻ ചാപ്റ്ററുകളുടെ പ്രവർത്തനങ്ങൾ മുന്നോട്ടു പോകുന്നത്.
നാല് ഘട്ടങ്ങളിലുള്ള കോഴ്സുകളാണ് മലയാളം മിഷൻ നടത്തുന്നത്. കണിക്കൊന്ന, സൂര്യകാന്തി, ആമ്പൽ, നീലക്കുറിഞ്ഞി എന്നീ പൂക്കളുടെ പേരുകൾ ആണ് ഈ കോഴ്സുകൾക്ക് നൽകിയിരിക്കുന്നത് . നാലാമത്തെ കോഴ്സ് ആയ നീലക്കുറിഞ്ഞി പൂർത്തിയാക്കുമ്പോൾ പഠിതാവ് നാട്ടിലെ പത്താം ക്ലാസിന് തുല്യതയിലെത്തും. കേരളത്തിലെ ഭരണ ഭാഷ മലയാളം ആയതുകൊണ്ട് കേരളത്തിൽ ജോലി ചെയ്യുന്നതിനായി പിഎസ് സി നടത്തുന്ന എഴുത്തുപരീക്ഷകൾക്ക് മലയാളം മിഷൻ കോഴ്സ് പൂർത്തിയാക്കുന്നവർക്കും അപേക്ഷിക്കാവുന്നതാണ് . മാതൃഭാഷ പഠിക്കേണ്ടതിന്റെയും സംസാരിക്കേണ്ടതിന്റെയും ആവശ്യകത ഇന്ന് പ്രവാസി മലയാളികൾ തിരിച്ചറിഞ്ഞിട്ടുണ്ട്.
അറിയപ്പെടുന്ന എഴുത്തുകാരിയും പ്രഭാഷകയും കോട്ടയം മണർകാട് സെന്റ് മേരിസ് കോളേജ് മലയാളം വിഭാഗം അധ്യാപികയും ആയിരുന്ന പ്രൊഫ. സുജ സൂസൻ ജോർജ് ആണ് മലയാളം മിഷന്റെ ഡയറക്ടർ. മലയാളം മിഷൻ ഡയറക്റ്ററായി ചുമതലയേറ്റതിന് ശേഷം ‘എവിടെയെല്ലാം മലയാളി അവിടെയെല്ലാം മലയാളം’ എന്ന ലക്ഷ്യത്തിനടുത്തെത്തുവാൻ പ്രൊഫ. സുജ സൂസൻ ജോർജിന്റെ നേതൃത്വത്തിലുള്ള മലയാളം മിഷന് ഇതിനോടകം കഴിഞ്ഞിട്ടുണ്ട്.
മലയാളം മിഷന്റെ രജിസ്ട്രാർ ആയി ഇപ്പോൾ സേവനമനുഷ്ഠിക്കുന്നത് കേരളത്തിലെ സ്കൂൾ അധ്യാപകർക്ക് പരിശീലനം നൽകുന്ന ഡയറ്റിന്റെ മേധാവിയായിരുന്ന എം സേതുമാധവനാണ്. കേന്ദ്ര ഗവൺമെന്റിന്റെ മാനവവിഭവശേഷി വകുപ്പിന് കീഴിൽ പ്രവർത്തിക്കുന്ന നാഷണൽ യൂണിവേഴ്സിറ്റി ഓഫ് എഡ്യൂക്കേഷണൽ പ്ലാനിങ് ആൻഡ് അഡ്മിനിസ്ട്രേഷനിൽ (NUEPA) നിന്നും എ പ്ലസ് ഡിപ്ലോമ കരസ്ഥമാക്കിയിട്ടുള്ള എം സേതുമാധവൻ കേരളത്തിലെ പുതിയ പാഠ്യപദ്ധതി യുമായി ബന്ധപ്പെട്ട പാഠപുസ്തക രചന ശില്പശാല കൾക്കും നേതൃത്വം നൽകുന്നു. സ്റ്റേറ്റ് കൗൺസിൽ ഓഫ് എഡ്യൂക്കേഷണൽ റിസർച്ച് ആൻഡ് ട്രെയിനിംഗ് (SCERT) കേന്ദ്രത്തിന്റെ സംസ്ഥാനതല റിസോഴ്സ് പേഴ്സനുമാണ്. അധ്യാപക പരിശീലന രംഗത്ത് ദീർഘകാല പരിചയസമ്പത്തുള്ള പ്രമുഖ പ്രഭാഷകനായും അറിയപ്പെടുന്ന എം സേതുമാധവൻ അധ്യാപക ട്രെയിനിങ്ങിലൂടെ മലയാളം മിഷൻ ചാപ്റ്ററുകളിലെ മുഴുവൻ അധ്യാപകർക്കും സുപരിചിതനുമാണ്.
യുകെയിൽ നല്ല രീതിയിൽ നടന്നുകൊണ്ടിരിക്കുന്ന സ്കൂളുകളിൽ മൂല്യനിർണയ പദ്ധതിയായ പഠനോത്സവം 2021 ഏപ്രിൽ മാസം നടത്തുവാനുള്ള പ്രവർത്തനങ്ങൾ പ്രവർത്തകസമിതി നടത്തിക്കൊണ്ടിരിക്കുകയാണ് . ജാതി മത വർഗ്ഗ രാഷ്ട്രീയ ചിന്തകൾക്കതീതമായി നമ്മുടെ മാതൃഭാഷയും സാംസ്കാരിക പൈതൃകവും പുതുതലമുറയിലേക്ക് എത്തിക്കുന്നതിനുള്ള മലയാളം മിഷൻ യുകെ ചാപ്റ്ററിന്റെ എല്ലാ പ്രവർത്തനങ്ങൾക്കും മുഴുവൻ യുകെ മലയാളികളുടെയും പിന്തുണ ഉണ്ടാവണമെന്ന് പ്രവർത്തകസമിതി അപേക്ഷിക്കുന്നു. മലയാളം മിഷൻ യുകെ ചാപ്റ്ററിന്റെ കീഴിൽ രജിസ്റ്റർ ചെയ്ത് ക്ലാസുകൾ ആരംഭിക്കണമെന്ന് ആഗ്രഹിക്കുന്ന എല്ലാവരും താഴെകൊടുത്തിരിക്കുന്ന ഈ മെയിൽ വിലാസത്തിലോ പ്രവർത്തക സമിതി അംഗങ്ങളെയോ മേഖലാ കോർഡിനേറ്റർമാരുടെ ഫോൺ നമ്പറുകളിലോ ബന്ധപ്പെടണമെന്ന് മലയാളം മിഷൻ യുകെ ചാപ്റ്റർ പ്രസിഡന്റ് സി എ ജോസഫും സെക്രട്ടറി ഏബ്രഹാം കുര്യനും അഭ്യർത്ഥിക്കുന്നു.
1. ബേസിൽ ജോൺ (സൗത്ത് മേഖല കോർഡിനേറ്റർ 07710021788)
2. ആഷിക് മുഹമ്മദ് നാസർ (മിഡ്ലാൻഡ്സ് മേഖല കോർഡിനേറ്റർ- 07415984534 )
3. ജനേഷ് നായർ (നോർത്ത് മേഖല കോർഡിനേറ്റർ- 07960432577 )
4. രഞ്ജു പിള്ള (സ്കോട്ട്ലൻഡ് മേഖല കോർഡിനേറ്റർ- 07727192181)
5. ജിമ്മി ജോസഫ് (യോർക്ക്ഷെയർ ആൻഡ് ഹംബർ മേഖല കോഡിനേറ്റർ- 07869400005 )
6. എസ് എസ് ജയപ്രകാശ് (നോർത്തേൺ അയർലൻഡ് മേഖല കോഓർഡിനേറ്റർ-07702686022)
മലയാളം മിഷൻ യുകെ ചാപ്റ്ററിനെ ബന്ധപ്പെടേണ്ട ഇമെയിൽ വിലാസം: [email protected]
സമീക്ഷ യുകെയുടെ അച്ചടക്ക നടപടിയെ തുടർന്നുണ്ടായ സംഘടനയിലെ പ്രശ്നങ്ങൾ പരിഹരിക്കാൻ അസോസിയേഷൻ ഓഫ് ഇന്ത്യൻ കമ്യൂണിസ്റ്റ് (എഐസി) ഇടപെടുന്നു. ഇതിനോടനുബന്ധിച്ച് എഐസി വിശദമായ പത്രക്കുറിപ്പ് ഇറക്കി. സമീക്ഷ യുകെ യുമായി ബന്ധപ്പെട്ട എഐസിയുടെ പത്രക്കുറിപ്പിൽ നിന്ന്. വളരെ വിജയകരമായി നടത്തിയ ദേശീയ സമ്മേളനത്തിനു ശേഷം കഴിഞ്ഞ കുറച്ചു നാളുകളായി ദൗർഭാഗ്യകരമായ സംഭവവികാസങ്ങളാണ് സമീക്ഷയിൽ നടന്നുവരുന്നത് . സമീക്ഷ സെക്രട്ടേറിയറ്റിലെ ഒൻപതിൽ അഞ്ച് അംഗങ്ങൾക്കെതിരെയുണ്ടായ അച്ചടക്ക നടപടിയിലേക്ക് നയിച്ച കാരണങ്ങളുടെ സാധുത എഐസി എക്സിക്യൂട്ടിവ് കമ്മിറ്റി വിലയിരുത്തി .
സമീക്ഷയ്ക്ക് മാർഗനിർദേശം നൽകിവരുന്ന എഐസി യ്ക്കു പരാതി നൽകുന്നത് അച്ചടക്ക നടപടിയെടുക്കുന്നതിന് പര്യാപ്തമായ കാരണം അല്ല എന്നാണ് എഐസി- എക്സിക്യൂട്ടീവ് കമ്മിറ്റിയുടെ ഏകകണ്ഡമായ വിലയിരുത്തൽ. അതിനാൽ അച്ചടക്കനടപടികൾ പുനഃപരിശോധിക്കണമെന്നും എന്തെങ്കിലും തെറ്റിദ്ധാരണകൾ ഉണ്ടെങ്കിൽ തിരുത്താനും എഐസി എക്സിക്യൂട്ടീവ് കമ്മിറ്റിയുമായി സൗഹാർദ്ദപരമായി സഹകരിച്ചു പ്രവർത്തിക്കുവാനും എഐസി സമീക്ഷ യുകെയോട് അഭ്യർത്ഥിച്ചിട്ടുണ്ട് .
പ്രശ്നങ്ങൾ പരിഹരിച്ച് സമീക്ഷ യുകെയെ ഒറ്റക്കെട്ടായി മുന്നോട്ട് കൊണ്ടുപോകുവാനുള്ള പ്രവർത്തനങ്ങൾ എഐസി എക്സിക്യൂട്ടീവ് കമ്മിറ്റി അടിയന്തര പ്രാധാന്യത്തോടെ ഏറ്റെടുത്ത് ചർച്ചകൾ നടത്തിവരികയാണ്. പ്രശ്നങ്ങൾക്ക് രമ്യമായ പരിഹാരം ഉടൻ ഉണ്ടാവുമെന്നും അതുവരെ തുടർനടപടികളിൽ നിന്ന് എല്ലാവരും വിട്ടുനിൽക്കണമെന്ന് എഐസി സെക്രട്ടറി സ. ഹർസെവ് ബെയ്ൻസ് പത്രക്കുറിപ്പിലൂടെ അഭ്യർത്ഥിച്ചു
ആഗോള തലത്തിൽ വ്യാപിച്ചു കിടക്കുന്ന മലയാളികളെ ഒരു കുടക്കീഴിൽ അണിനിരത്തുക എന്ന ലക്ഷ്യത്തോടെ സ്ഥാപിതമായ വേൾഡ് മലയാളി കൗൺസിലേന്റെ യുകെ പ്രൊവിൻസിന് ഊഷ്മളമായ സാമാരംഭം കുറിച്ചു. കഴിഞ്ഞ ഞായറാഴ്ച 08-11-2020 യിൽ യുകെ സമയം ഉച്ചക്ക് ശേഷം 3മണിക്ക് കോവിഡ് മാനദന്ധങ്ങൾ പാലിച്ചു ഗൂഗിൾ സൂം മീറ്റിംങ്ങിലൂടെ വിവിധ രാജ്യങ്ങളിൽ നിന്നുള്ള പ്രതിനിധികൾ പരിപാടിയിൽ പങ്കെടുത്തു. വേൾഡ് മലയാളി കൗൺസിൽ ജർമൻ പ്രൊവിൻസ് പ്രസിഡന്റ് മി. ജോളി എം പടയാറ്റിൽ, അദ്ധ്യക്ഷതയിൽ കൂടിയ യോഗത്തിൽ യുകെ പ്രൊവിൻസ് പ്രസിഡന്റ് മി . സാൽബിൻ പാലാട്ടി സ്വാഗതം ആശംസിക്കുകയും, ചെയർമാൻ ഡോ. ജിമ്മി ലോനപ്പൻ മൊയലൻ , വേൾഡ് കൗൺസിലിന്റെ വരുംകാലപ്രവർത്തനത്തെ അവലോകനം ചെയ്തു സംസാരിക്കുകയുണ്ടായി. പുതിയ ഭാരവാഹികൾക്ക് ഓത്ത് ടേക്കിങ് സെറിമണി,മി . ഗ്രിഗറി മേടയിലിൻെറ (ഡബ്ല്യൂ എം സി യൂറോപ്പ് റീജിയൻ പ്രസിഡന്റ് & ഗ്ലോബൽ ജനറൽ സെക്രട്ടറി) സാന്നിധ്യത്തിൽ നിർവഹിച്ചു.
യുകെ പ്രൊവിൻസ് സാമാരംഭം കുറിച്ചുകൊണ്ട് ഡോ. പി. ഇബ്രാഹിം ഹാജി (ഡബ്ല്യൂ എം സി ഗ്ലോബൽ ചെയർമാൻ, യുഎഇ ) സംസാരിക്കുകയുണ്ടായി.
ആശംസകൾ അർപ്പിച്ചുകൊണ്ട് സംസാരിച്ചവർ.മിസ്റ്റർ ഗോപാല പിള്ള (ഡബ്ല്യൂ എം സി ഗ്ലോബൽ പ്രസിഡന്റ്, യുഎസ്എ), ഡോ. ശ്രീമതി വിജയലക്ഷ്മി (ഡബ്ല്യുഎംസി ഗ്ലോബൽ വൈസ് ചെയർ പേഴ്സൺ, ഇന്ത്യ), മിസ്റ്റർ ജോൺ മത്തായി (ഡബ്ല്യുഎംസി ഗ്ലോബൽ വൈസ് പ്രസിഡന്റ്, യുഎഇ ),മിസ്റ്റർ ജോസ് കുമ്പുലിവേലിൽ (ഡബ്ല്യൂ എം സി ജർമ്മൻ പ്രൊവിൻസ് ,ചെയർമാൻ), മിസ്റ്റർ പി മാത്യു (ഡബ്ല്യൂ എം സി ഗ്ലോബൽ വൈസ് പ്രസിഡന്റും ഓർഗനൈസേഷൻ , ജർമ്മനി) ,മിസ്റ്റർ തോമസ് അറബൻകുടി (ഡബ്ല്യൂ എം സി ഗ്ലോബൽ ട്രെഷറർ, ജർമ്മനി), മിസ്റ്റർ രാധാകൃഷ്ണൻ തിരുവത്തു (ഡബ്ല്യൂ എം സി മിഡിൽ ഈസ്റ്റ് പ്രസിഡന്റ്),മിസ്റ്റർ സുധീർ നമ്പ്യാർ (ഡബ്ല്യുഎംസി യുഎസ്എ റീജിയൻ പ്രസിഡന്റ്), മിസ്റ്റർ റോണ തോമസ് (ഡബ്ല്യുഎംസി ഗ്ലോബൽ ജോയിന്റ് സെക്രട്ടറി മിഡിൽ ഈസ്റ്റ്).
മിസ്സിസ് ടാൻസി പാലാറ്റിഎല്ലാവർക്കും നന്ദി പറഞ്ഞു. നോർക്കയുടെ സഹകരണത്തോടെ മുന്നേറുന്ന ഈ പ്രസ്ഥാനത്തിൽ ചേരാൻ താല്പര്യമുള്ളവർ ഭാരവാഹികൾ ആയി ബന്ധപ്പെണമെന്നു താല്പര്യപ്പെടുന്നു.
സിൽവർ ജൂബിലിയുടെ നിറവിൽ എത്തിനിൽക്കുന്ന സ്വിറ്റ്സർലാൻഡിലെ ഏറ്റവും പ്രമുഖ പ്രവാസി സംഘടനയായ ഡബ്ല്യുഎം സി പ്രൊവിൻസ് സംഘടിപ്പിച്ച 2020ലെ ജനറൽബോഡി യോഗവും കേരളപ്പിറവി ദിനാഘോഷവും വർണാഭമായ ചടങ്ങുകളോടെ ആഘോഷിക്കുകയുണ്ടായി. നവംബർ ഏഴാം തീയതി ശനിയാഴ്ച വൈകുന്നേരം 5 മണിക്ക് ആരംഭിച്ച് മൂന്ന് മണിക്കൂർ നീണ്ടുനിന്ന ചടങ്ങിൽ ആവേശഭരിതരായാണ് അംഗങ്ങൾ പങ്കെടുത്തത്. പ്രോവിൻസ് പ്രസിഡണ്ട് സുനിൽ ജോസഫ് അധ്യക്ഷത വഹിച്ച ചടങ്ങിൽ ചെയർമാൻ ജോണി ചിറ്റക്കാട്ട് സെക്രട്ടറി മിനി ബോസ് ട്രഷറർ ജിജി ആന്റണി എന്നിവർ ചടങ്ങുകൾക്ക് നേതൃത്വം നൽകി. റോഷിണി കാശാങ്കാട്ടിലിന്റെ പ്രാർത്ഥനാഗാനത്തോടെ ആരംഭിച്ച ചടങ്ങിൽ പ്രസിഡന്റ് സുനിൽ ജോസഫ് സ്വാഗതമാശംസിച്ചു. ചെയർമാൻ ജോണി ചിറ്റക്കാട്ടിന്റ ആശംസപ്രസംഗത്തിന് ശേഷം പ്രസിഡന്റ് വിശദമായ വർക്കിംഗ് റിപ്പോർട്ട് അവതരിപ്പിച്ചു. സെക്രട്ടറി മിനി ബോസ് 2019ലെ ജനറൽബോഡി യോഗത്തിന്റെ റിപ്പോർട്ട് അവതരിപ്പിക്കുകയും ട്രഷറർ ജിജി ആന്റണി 2020 ലെ വരവ് ചെലവ് കണക്കുകൾ അവതരിപ്പിക്കുകയും ചെയ്തു.
വനിതാ ഫോറത്തെ പ്രതിനിധീകരിച്ച് പ്രസിഡണ്ട് റോസിലി ചാത്തംകണ്ടം സംസാരിക്കുകയും സെക്രട്ടറി റോസിലി നമ്പുശേരിയിൽ പ്രവർത്തന റിപ്പോർട്ട് അവതരിപ്പിക്കുകയും ചെയ്തു. യൂത്ത് ഫോറത്തിന്റെ പ്രവർത്തനങ്ങൾ ബേസിൽ ആന്റണി വിശദീകരിക്കുകയുണ്ടായി. യൂറോപ്യ ൻ വനിതാ ഫോറം പ്രസിഡണ്ട് മോളി പറമ്പേട്ട്, റീജിയൻ വൈസ് പ്രസിഡണ്ട് വിൽസൺ ചാത്തംകണ്ടം റീജിയൻ പ്രവർത്തനങ്ങളെപ്പറ്റി വിശദീകരിച്ചു.
കേരളപ്പിറവി ദിനാഘോഷത്തിന് ആശംസകൾ അറിയിച്ചുകൊണ്ട് ബഹുമാന്യനായ കേന്ദ്ര വിദേശകാര്യ സഹമന്ത്രി മന്ത്രി വി മുരളീധരൻ 25 വർഷം പൂർത്തിയാക്കിയ WMC സ്വിസ്സ് പ്രൊവിൻസിനു അഭിനന്ദനങ്ങൾ അറിയിച്ചു. ലോകമലയാളീ സമൂഹത്തെ ഒരു കുടകീഴിൽ അണിനിരത്തുവാൻ WMC നടത്തുന്ന പ്രവർത്തനങ്ങളെ ആദരണീയനായ മന്ത്രി പ്രത്യേകം എടുത്തുപറഞ്ഞു. കോവിഡ് പ്രതിരോധ പ്രവർത്തനങ്ങളുമായി ബന്ധപ്പെട്ട് പ്രവർത്തിക്കുന്ന ആരോഗ്യ പ്രവർത്തകരോട് ഉള്ള നന്ദിയും ഐക്യദാർഢ്യവും അദ്ദേഹം പ്രകടിപ്പിച്ചു. ഗ്ലോബൽ ചെയർമാൻ ഡോക്ടർ എ വി അനൂപ് നൽകിയ ആശംസ സന്ദേശത്തിൽ ഡബ്ല്യു എം സി സ്വിസ് പ്രൊവിൻസിനെ സിൽവർ ജൂബിലിയുടെ അനുമോദനം അറിയിക്കുകയും അദ്ദേഹം 2004 ൽ നടന്ന കേരള പിറവി ചടങ്ങിൽ നേരിട്ട് പങ്കെടുത്ത ഓർമ്മകൾ പങ്കുവയ്ക്കുകയും ചെയ്തു. തുടർന്ന് ഗ്ലോബൽ പ്രസിഡണ്ട് ശ്രീ ജോണി കുരുവിള നടത്തിയ ആശംസാ പ്രസംഗത്തിൽ സ്വിസ്സ് പ്രൊവീൻസിനെ യൂറോപ്പിൻ റീജിയൻറെ തിലകകുറി എന്നാണ് വിശേഷിപ്പിച്ചത്. ഗ്ലോബൽ വൈസ് പ്രസിഡണ്ട് ശ്രീ ഡേവിസ് തെക്കുംതല തന്റെ ആശംസയിൽ ഡബ്ല്യുഎം സി സ്വിസ്സ് പ്രൊവീൻസിന്റെ കെട്ടുറപ്പുള്ള പ്രവർത്തനശൈലിയെ പറ്റി എടുത്തുപറയുകയുണ്ടായി,
ഇത്തവണത്തെ കേരള പിറവി ആഘോഷങ്ങളുടെ ഏറ്റവും വലിയ സവിശേഷത സ്വിസ് പ്രൊവിൻസിലെ കലാകാരന്മാരും കലാകാരികളും ചേർന്ന് മലയാളത്തിന്റെ മനോഹാരിതയും സ്വിറ്റ്സർലാൻഡിന്റെ പ്രകൃതി ചാരുതയും ഒത്തുചേർത്ത് തയ്യാറാക്കിയ മ്യൂസിക് വീഡിയോ ആൽബം ആയിരുന്നു. ഈ സംഗീത വീഡിയോ വിസ്മയത്തിൽ പങ്കുചേർന്ന എല്ലാവരും പ്രേക്ഷകരുടെ ഹൃദയം നിറഞ്ഞ അഭിനന്ദനങ്ങൾ ഏറ്റുവാങ്ങി. ഈ മ്യൂസിക് വീഡിയോ ആൽബം തയ്യാറാക്കുവാൻ നേതൃത്വം നൽകിയ സെക്രട്ടറി മിനി ബോസിനെ യോഗത്തിൽ പങ്കെടുത്ത എല്ലാ അംഗങ്ങളും മുക്തകണ്ഠം പ്രശംസിച്ചു.
യോഗ സമാപനത്തോടനുബന്ധിച്ച് കൊറിയോഗ്രാഫറും കലാകാരിയും ആയ റോസ് മേരി തയ്യാറാക്കി അവതരിപ്പിച്ച ഗാനോപഹാരം ഹൃദ്യമായ അനുഭവമായി. കോവിഡ് സാഹചര്യത്തിൽ സൂമിൽ നടത്തിയ മീറ്റിംഗിനു സാങ്കേതിക സഹായം നൽകിയ ജിസ്സു പുറവക്കാട്ടിനു യോഗം പ്രത്യേകം നന്ദി പറഞ്ഞു. സെക്രട്ടറി മിനി ബോസിന്റ നന്ദി പ്രകടത്തിനു ശേഷം യോഗം സമംഗളം പര്യവസാനിച്ചു.
സ്വന്തം ലേഖകൻ
ബ്രിസ്റ്റോൾ : ബ്രിസ്റ്റോളിൽ ഭാര്യയ്ക്കും രണ്ടു മക്കൾക്കുമൊപ്പം താമസിക്കുന്ന ഫ്രാൻസിസ് സേവ്യറിന് അടുത്ത ദിവസങ്ങളിലാണ് രക്താർബുദം പിടിപ്പെട്ടുവെന്ന് സ്ഥിരീകരിച്ചത്. തമിഴ് നാട്ടിൽ നിന്നുള്ള ഫ്രാൻസിസ് സേവ്യർ ഇപ്പോൾ ബ്രിസ്റ്റോളിലെ ആശുപത്രിയിൽ ചികിത്സയിലാണ്.
ചികിത്സയുടെ ഭാഗമായി ഫ്രാൻസിസിന് കീമോതെറാപ്പി നടത്തിയെങ്കിലും ഫലം കാണാതെ വന്നപ്പോൾ ആരോഗ്യമുള്ള സ്റ്റെം സെൽ മറ്റൊരു വ്യക്തിയിൽ നിന്ന് സ്വീകരിച്ചുള്ള ചികിത്സയിലൂടെ മാത്രമേ അദ്ദേഹത്തിന്റെ ജീവൻ നിലനിർത്താൻ കഴിയുകയുള്ളു എന്ന് ഡോക്ടർമാർ വിലയിരുത്തുകയായിരുന്നു . അതിന്റെ ഭാഗമായി അനേകം ബന്ധുക്കൾ വഴിയും , സുഹൃത്തുക്കൾ വഴിയും ഫ്രാൻസിസിന് യോജിച്ച ഒരു സ്റ്റെം സെൽ ദാതാവിനെ കണ്ടെത്താൻ ശ്രമം നടത്തിയെങ്കിലും ഇതുവരെ ആ ശ്രമം വിജയിച്ചിട്ടില്ല.
പ്രിയ സുഹൃത്തുക്കളെ ഡി കെ എം എസ് ഡാറ്റാബേസിൽ ഒരു ദാതാവായി നിങ്ങൾ രജിസ്റ്റർ ചെയ്യുകയാണെങ്കിൽ നമ്മൾക്ക് ഒരുപക്ഷേ ഫ്രാൻസിസിൻെറ ജീവൻ രക്ഷിക്കാൻ സാധിച്ചേക്കും. ഒരു ജീവൻ രക്ഷിക്കാനുള്ള ഈ ജീവകാരുണ്യ പ്രവർത്തിയിലേക്ക് നിങ്ങളുടെ സഹായം അഭ്യർത്ഥിക്കുകയാണ്. നമ്മൾ ചെയ്യേണ്ടത് ഇത്രമാത്രമാണ്. ഒരു ദാതാവായി ഡി കെ എം എസ് ഡേറ്റാബേസിൽ പേര് രജിസ്റ്റർ ചെയ്യുക. പിന്നീട് നിങ്ങളുടെ ടിഷ്യൂ ടൈപ്പ് രോഗിയുടെ ടിഷ്യൂ ടൈപ്പുമായി മാച്ച് ചെയ്യുകയാണെങ്കിൽ സ്റ്റെം സെല്ലുകൾ ദാനം ചെയ്യാൻ നിങ്ങൾക്ക് കഴിയും. സന്നദ്ധരായവരുടെ വിവരങ്ങൾ ലോകത്തെല്ലായിടത്തുമുള്ള രക്താർബുദ രോഗികളിൽ ആരുടെയെങ്കിലും ജീവൻ നിലനിർത്താൻ ഉപകാരപ്പെടാം. ഓർക്കുക ഡി കെ എം എസ് ഡേറ്റാബേസിൽ പേര് രജിസ്റ്റർ ചെയ്യുന്നതിനുള്ള പ്രായപരിധി 17 വയസ്സു മുതൽ 55 വയസ്സ് വരെയാണ്.
നിങ്ങൾ ഒരു ദാതാവായി രജിസ്റ്റർ ചെയ്ത് അദ്ദേഹത്തിന്റെ ജീവൻ നിലനിർത്താൻ ആഗ്രഹിക്കുന്നുവെങ്കിൽ, താഴെയുള്ള വാട്ട്സ്ആപ്പ് ഗ്രൂപ്പിലോ , ഫേസ്ബുക്ക് ഗ്രൂപ്പിലോ ചേർന്ന് ഞങ്ങളുടെ പരിശ്രമത്തിനോട് സഹകരിക്കണമെന്ന് അഭ്യർത്ഥിക്കുന്നു.
https://chat.whatsapp.com/GL2HbzryQSQKE67Ugrdm8s
https://www.facebook.com/stemcarebristol/
തപാൽ മുഖേന ഉപയോഗിക്കാൻ എളുപ്പമുള്ള ഓറൽ സ്വാബ് കിറ്റ് ഡി കെ എം എസ് നിങ്ങൾക്ക് അയയ്ച്ചു നൽകുന്നതായിരിക്കും . അതിലെ നിങ്ങൾ നിർദ്ദേശങ്ങൾ പാലിച്ച് സ്വാബ് എടുത്തതിനുശേഷം കിറ്റ് തിരികെ നൽകേണ്ടതുണ്ട്. അങ്ങനെ നിങ്ങൾ രജിസ്ട്രിയിൽ എത്തിക്കഴിഞ്ഞാൽ, തപാൽ വഴി നിങ്ങൾക്ക് ഒരു ദാതാവിന്റെ കാർഡ് ലഭിക്കും. നിങ്ങളുടെ ടിഷ്യു രോഗിയുടെ ടിഷ്യുവുമായി പൊരുത്തപ്പെടുന്നുണ്ടെങ്കിൽ എപ്പോൾ വേണമെങ്കിലും നിങ്ങളുടെ സ്റ്റെം സെല്ലുകൾ ആ രോഗിക്ക് ദാനം ചെയ്യാവുന്നതാണ്. ഇങ്ങനെ ചെയ്യുന്നതുകൊണ്ട് നിങ്ങൾക്ക് യാതൊരു വിധ ആരോഗ്യ പ്രശ്നങ്ങളും ഉണ്ടാവുന്നുമില്ല മറിച്ച് ഒരു ജീവൻ നിലനിർത്താൻ നിങ്ങൾ കാരണമാവുകയും ചെയ്യുന്നു.
സ്റ്റെം സെൽ ദാന പ്രക്രിയയെക്കുറിച്ച് നിങ്ങൾക്ക് എന്തെങ്കിലും സംശയങ്ങളോ, ചോദ്യങ്ങളോ ഉണ്ടെങ്കിൽ ദയവായി താഴെയുള്ള നമ്പറിൽ ബന്ധപ്പെടുക . നിങ്ങൾക്ക് വിദഗ്ദ്ധരായ ആരോഗ്യ പ്രവർത്തകരിൽ നിന്ന് വേണ്ട നിർദ്ദേശങ്ങൾ ലഭിക്കുന്നതായിരിക്കും.
യുകെയിലുള്ള ഒരാൾക്ക് സ്വാബ് കിറ്റിനായി അഭ്യർത്ഥിക്കാൻ താഴെപ്പറയുന്ന വെബ്സൈറ്റ് സന്ദർശിക്കുക
ഇന്ത്യയിലോ യുണൈറ്റഡ് സ്റ്റേറ്റ്സിലോ ഉള്ളവർ സ്വാബ് കിറ്റിനായി അഭ്യർത്ഥിക്കാൻ താഴെപ്പറയുന്ന വെബ് സൈറ്റ് സന്ദർശിക്കുക
അതോടൊപ്പം ദക്ഷിണേന്ത്യയിൽ നിന്നുള്ള നിങ്ങളുടെ സുഹൃത്തുക്കൾക്കും ഈ ലിങ്കുകൾ അയച്ച് കൊടുത്ത് ഫ്രാൻസിസിന്റെ ജീവൻ നിലനിർത്താൻ നടത്തുന്ന ദൗത്യത്തിൽ പങ്കാളിയാക്കണമെന്ന് അഭ്യർത്ഥിക്കുന്നു.
കൂടുതൽ വിവരങ്ങൾ അറിയുവാൻ ആഗ്രഹിക്കുന്നവർ താഴെയുള്ള നമ്പറിൽ ബന്ധപ്പെടുക.
ലോറൻസ് പെല്ലിശ്ശേരി : 0044 7762224421
ഏബ്രഹാം കുര്യൻ
കേരള പിറവിയോടനുബന്ധിച്ച് മലയാളം മിഷൻ യുകെ ചാപ്റ്റർ സംഘടിപ്പിച്ച നൂറു ദിന വെർച്ച്വൽ ആഘോഷ പരിപാടിയായ മലയാളം ഡ്രൈവിന്റെയും യു കെ ചാപ്റ്ററിന്റെ ഫേസ്ബുക്ക് പേജിന്റെയും ഉദ്ഘാടനം വെർച്യുൽ പ്ലാറ്റ് ഫോമിലൂടെ മലയാളം മിഷൻ ഡയറക്ടർ പ്രൊഫ.സുജ സൂസൻ ജോർജ് നിർവ്വഹിച്ചു. നവോദ്ധാന പ്രസ്ഥാനം പോലെ തന്നെ ഐക്യ കേരള പ്രസ്ഥാനത്തെയും പ്രാധാന്യത്തോടെ വിലയിരുത്തേണ്ടതാണെന്ന് അഭിപ്രായപ്പെട്ട പ്രൊഫ. സുജ സൂസൻ ജോർജ് മലയാളികൾ കേരളത്തിന്റെ അതിർ വരമ്പുകൾക്കപ്പുറം ലോക മലയാളികളായി വളർന്നതിൽ ഐക്യ കേരള പ്രസ്ഥാനവും പ്രവാസി മലയാളികളും വഹിച്ച പങ്കും അനുസ്മരിച്ചു.
ഇൻഡ്യയിലും വിദേശത്തുമായി നിരവധി ചിത്രകലാ പ്രദർശനങ്ങൾ നടത്തിയിട്ടുള്ള കേരള ലളിതകലാ അക്കാഡമി അവാർഡ് ഉൾപ്പെടെ നിരവധി അവാർഡുകൾ നേടുകയും, ലോകോത്തര മാസികയായ ആർട്ട് റിവ്യൂ എന്ന മാഗസിനിലെ ഏറ്റവും സ്വാധീനം ചെലുത്തുന്ന 100 കലാകാരൻമാരുടെ പട്ടികയിൽ 2015 മുതൽ 2019 വരെ സ്ഥാനം പിടിക്കുകയും, കൊച്ചി ബിനാലെ ഫൗണ്ടേഷന്റെ ഫൗണ്ടർ പ്രസിഡന്റും കൊച്ചി മുസിരിസ് ബിനാലെ എക്സിബിഷന്റെ ഡയറക്ടറുമായി പ്രവർത്തിക്കുന്ന ശ്രീ ബോസ് കൃഷ്ണമാചാരി ആശംസകൾ നേർന്ന് സംസാരിച്ചു. മലയാളം മിഷൻ യുകെ ചാപ്റ്ററിന്റെ ഭാഷാ പ്രചരണ പരിപാടിയായ മലയാളം ഡ്രൈവ് യു കെയിൽ മലയാള ഭാഷയുടെ വളർച്ചക്കും കേരള സംസ്കാരം നിലനിർത്തുന്നതിനും സഹായകമാകട്ടെയെന്നും ആശംസിച്ച അദ്ദേഹം ഏപ്രിൽ മാസത്തിൽ മലയാളം മിഷൻ യുകെ ചാപ്റ്റർ നടത്തുന്ന പഠനോത്സവത്തിന് വിജയാശംസകളും നേർന്നു.
മലയാളം മിഷൻ യുകെ ചാപ്റ്ററിന്റെ കഴിഞ്ഞകാല പ്രവർത്തനങ്ങൾ വിവരിച്ച മലയാളം മിഷൻ യുകെ ചാപ്റ്റർ സെക്രട്ടറി ഏബ്രഹാം കുര്യൻ വിശിഷ്ടാതിഥികൾക്ക് സ്വാഗതം ആശംസിച്ചു. മലയാളം മിഷൻ യുകെ ചാപ്റ്റർ ജോയിന്റ് സെക്രട്ടറി സി. എ ജോസഫ് വിശിഷ്ടാതിഥികൾക്ക് നന്ദി പറഞ്ഞതോടൊപ്പം മലയാളം ഡ്രൈവിന്റെയും ഫേസ് ബുക്ക് പേജിന്റെയും രൂപകൽപ്പന നിർവ്വഹിക്കുന്ന പ്രവർത്തക സമിതി അംഗങ്ങളായ ആഷിക് മുഹമ്മദ് നാസറിനെയും ബേസിൽ ജോണിനെയും ജനേഷ് നായരെയും മലയാളം മിഷൻ യു കെ ചാപ്റ്ററിന്റെ കൃതജ്ഞത അറിയിച്ചു. മലയാളം മിഷൻ യുകെ ചാപ്റ്റർ പ്രസിഡന്റ് മുരളി വെട്ടത്ത് യോഗത്തിൽ അദ്ധ്യക്ഷത വഹിച്ചു.
കോവിഡ് 19 വ്യാപനത്തിന്റെ ഫലമായി ലോകം മുഴുവൻ ഡിജിറ്റൽ യുഗത്തിലൂടെ കടന്നു പോകുമ്പോൾ മലയാളം മിഷനും നൂതന സാങ്കേതിക വിദ്യയിലൂടെ അതിജീവനത്തിന്റെ പാതയിലൂടെ തന്നെ മുന്നേറുകയാണ്. മലയാളം മിഷൻ യുകെ ചാപ്റ്ററിനു കീഴിലുള്ള വിവിധ മേഘലകൾക്കും അവയ്ക്കു കീഴിലുള്ള വിവിധ സ്ക്കൂളുകൾക്കും ഫേസ് ബുക്ക് പേജ് ഉണ്ടായിരുന്നുവെങ്കിലും മലയാളം മിഷൻ യുകെ ചാപ്റ്ററിനു കീഴിലുള്ള എല്ലാ സ്ക്കൂളുകളെയും ഒരു കുടക്കീഴിൽ കൊണ്ടുവരികയും റിസോഴ്സുകൾ പങ്കുവയ്ക്കുകയും ചെയ്യുക എന്ന ലക്ഷ്യവുമായാണ് മലയാളം മിഷൻ യുകെ ചാപ്റ്റർ ഫേസ് ബുക്ക് പേജ് ആരംഭിച്ചത്. കൂടാതെ ലോക് ഡൗണിന്റെയും സാമൂഹ്യ അകലം പാലിക്കേണ്ടതുമായ സമയത്തുള്ള കേരള പിറവി ആഘോഷത്തിനും മലയാള ഭാഷാ പ്രചരണത്തിനും നേതൃത്വം നൽകുവാൻ വെർച്ച്വൽ പ്ലാറ്റ്ഫോമിലുള്ള നൂറു ദിന കർമ്മ പരിപാടിയായ മലയാളം ഡ്രൈവും നടന്നു കൊണ്ടിരിക്കുന്നു. അതിൻ്റെ ഭാഗമായി നവംബർ 8 ഞായറാഴ്ച യു കെ സമയം വൈകുന്നേരം നാലുമണിക്ക് മലയാളം മിഷൻ റജിസ്ട്രാർ എം സേതുമാധവൻ “മലയാളം മലയാളി മലയാളം മിഷൻ” എന്ന വിഷയത്തെ അടിസ്ഥാനമാക്കി ഫേസ് ബുക്ക് ലൈവിലൂടെ പ്രഭാഷണം നടത്തുന്നതാണ്. അദ്ധ്യാപക ട്രെയ്നിംഗിലൂടെ മലയാളം മിഷൻ അദ്ധ്യാപകർക്ക് സുപരിചിതനായ എം സേതു മാധവൻ കേരളത്തിലെ സ്ക്കൂൾ അദ്ധ്യാപകർക്ക് പരിശീലനം നൽകുന്ന ഡയറ്റിന്റെ മേധാവിയും ആയിരുന്നു..
മലയാളം മിഷന്റെ യു കെയിലെ പ്രവർത്തനങ്ങൾക്ക് പതിമൂന്നംഗ പ്രവർത്തക സമിതി നേതൃത്വം നൽകുന്നു. ആ പ്രവർത്തക സമിതിയെ സഹായിക്കാൻ അരുൺ തങ്കത്തിന്റെ നേതൃത്വത്തിൽ ഒരു ഒൻപതംഗ ഉപദേശക സമിതിയും ജയപ്രകാശ് സുകുമാരന്റെ നേതൃത്വത്തിൽ നാലംഗ വിദഗ്ദ്ധ സമിതിയും പ്രവർത്തിച്ചു കൊണ്ടിരിക്കുന്നു.
വിവിധ സാംസ്കാരിക പരിപാടികൾ ഉൾപ്പെടുത്തിയുള്ള വരുംദിനങ്ങളിലേക്കുള്ള ഫേസ് ബുക്ക് ലൈവിന്റെ പ്രവർത്തനങ്ങൾ പുരോഗമിക്കുന്നതായും സംഘാടകർ അറിയിച്ചു. തുടർന്നു നടക്കുന്ന എല്ലാ ലൈവ് പ്രോഗ്രാമുകളിലും എല്ലാ മലയാള ഭാഷാ സ്നേഹികളുടെയും സാന്നിധ്യവും സഹകരണവും ഉണ്ടാവണമെന്ന് മലയാളം മിഷൻ യുകെ ചാപ്റ്റർ പ്രവർത്തക സമിതി അഭ്യർത്ഥിക്കുന്നു.
കേരളപ്പിറവി ദിനത്തോട് അനുബന്ധിച്ച് നടന്ന മലയാളം ഡ്രൈവിന്റേയും ഫേസ്ബുക്ക് പേജിന്റെയും ഉദ്ഘാടന പരിപാടി കാണുവാൻ താഴെകൊടുത്തിരിക്കുന്ന ലിങ്ക് ക്ലിക്ക് ചെയ്യുക
https://www.facebook.com/MAMIUKCHAPTER/videos/1595003764040986/
മലയാളം മിഷൻ യുകെ ചാപ്റ്റർ നടത്തുന്ന എല്ലാ പരിപാടികളും കാണുവാൻ താഴെകൊടുത്തിരിക്കുന്ന ലിങ്ക് ക്ലിക്ക് ചെയ്യേണ്ടതാണ്. മലയാളം മിഷൻ യുകെ ചാപ്റ്ററിന്റെ ഈ ഒഫീഷ്യൽ പേജ് എല്ലാ ഭാഷാസ്നേഹികളും ലൈക്ക് ചെയ്തും സബ്സ്ക്രൈബ് ചെയ്തും പരിപാടികൾ ഷെയർ ചെയ്തും പ്രോത്സാഹിപ്പിക്കണമെന്നും അഭ്യർത്ഥിക്കുന്നു.
https://www.facebook.com/MAMIUKCHAPTER/live/
ഏബ്രഹാം കുര്യൻ
കേരള ഗവൺമെന്റിന്റെ മലയാളം മിഷൻ യുകെ ചാപ്റ്റർ ഫേസ്ബുക്ക് ലോഞ്ചിങ്ങും കേരള പിറവിയോടനുബന്ധിച്ച് മലയാളം മിഷൻ യുകെ ചാപ്റ്റർ സംഘടിപ്പിക്കുന്ന നൂറു ദിന വെർച്വൽ ആഘോഷ പരിപാടിയായ മലയാളം ഡ്രൈവ് ഉദ്ഘാടനവും മലയാളം മിഷൻ ഡയറക്ടർ പ്രൊഫ. സുജ സൂസൻ ജോർജ് നവംബർ 1 വൈകുന്നേരം 5 മണിക്ക് വെർച്വൽ പ്ലാറ്റ്ഫോമിലൂടെ നിർവഹിക്കും. അപ്രതീക്ഷിതമായി കടന്നുവന്ന കോവിഡ് 19 എന്ന മഹാമാരി വിതച്ച വിഷമതകളെ അതിജീവിച്ച് മനുഷ്യരാശി മുന്നേറുന്ന ഈ അവസരത്തിൽ, മലയാളനാടിന് 64 വയസ്സ് തികയുന്ന നവംബർ ഒന്നിന് മലയാള ഭാഷയുടെ ഉന്നമനത്തിനായി മലയാളം മിഷൻ യുകെ ചാപ്റ്റർ സംഘടിപ്പിക്കുന്ന ഈ ചടങ്ങിൽ, ഇന്ത്യയിലും പുറത്തുമായി നിരവധി ചിത്രകലാ പ്രദർശനങ്ങൾ നടത്തിയിട്ടുള്ള ഇന്ത്യൻ ചിത്രകലയിലെ മലയാളി സാന്നിധ്യവും കേരള ലളിത ലളിതകലാ അക്കാദമി അവാർഡ് ഉൾപ്പെടെ നിരവധി പുരസ്കാരങ്ങളുടെ ജേതാവും കൊച്ചി ബിനാലെ ഫൗണ്ടേഷന്റെ ഫൗണ്ടർ പ്രസിഡന്റും കൊച്ചി മുസിരിസ് ബിനാലെ എക്സിബിഷന്റെ ഡയറക്ടറുമായി പ്രവർത്തിക്കുന്ന ലോകപ്രശസ്ത ചിത്രകാരൻ ബോസ് കൃഷ്ണമാചാരി ആശംസകൾ നേർന്ന് സംസാരിക്കും. മലയാളം മിഷൻ യു കെ ചാപ്റ്റർ പ്രസിഡൻറ് മുരളി വെട്ടത്ത് അധ്യക്ഷതവഹിക്കും. സെക്രട്ടറി എബ്രഹാം കുര്യൻ സ്വാഗതവും ജോയിന്റ് സെക്രട്ടറി സി എ ജോസഫ് കൃതജ്ഞതയും രേഖപ്പെടുത്തും.
മലയാളം മിഷൻ യുകെ ചാപ്റ്റർ ആരംഭിക്കുന്ന വെർച്വൽ ആഘോഷമായ മലയാളം ഡ്രൈവിലൂടെ മലയാള ഭാഷയുടെ വളർച്ചക്കും പ്രത്യേകിച്ച് മലയാള നാടിന്റെ സംസ്കാരവും പൈതൃകവും പുതു തലമുറകളിലേക്ക് എത്തിക്കുന്നതിന്നും വേണ്ടി, വരും നാളുകളിൽ പ്രമുഖ പ്രതിഭകളുടെ കലാ-സാഹിത്യ-സാംസ്കാരിക പരിപാടികൾ ഉൾപ്പെടെയുള്ള ശത ദിന കർമ്മ പദ്ധതികൾ ആവിഷ്കരിച്ച് നടപ്പിലാക്കുവാനും മലയാളം മിഷൻ യുകെ ചാപ്റ്റർ പ്രവർത്തക സമിതി തീരുമാനിച്ചിട്ടുണ്ട്.
യുകെയിൽ പല സ്ഥലങ്ങളിലായി നടന്നുകൊണ്ടിരിക്കുന്ന മലയാളം സ്കൂളുകളെ ഒരു കുടക്കീഴിൽ കൊണ്ടു വന്ന് മലയാള പഠനത്തിന് ആവശ്യമായ റിസോഴ്സുകൾ ഷെയർ ചെയ്യുക എന്ന മഹത്തായ ലക്ഷ്യം മുന്നിൽ കണ്ടു കൊണ്ടാണ് മലയാളം മിഷൻ യുകെ ചാപ്റ്റർ ഫേസ്ബുക്ക് പേജ് ആരംഭിക്കുന്നത്. പ്രവർത്തക സമിതി അംഗം ആഷിക് മുഹമ്മദ് നാസറിന്റെ നേതൃത്വത്തിൽ പ്രവർത്തക സമിതി അംഗങ്ങളായ ബേസിൽ ജോണും ജനേഷ് നായരും ചേർന്നാണ് ഫെയ്സ്ബൂക്ക് പേജിനും ഫേസ് ബുക്കിലൂടെ മലയാളം ഡ്രൈവിനും രൂപകൽപ്പന നൽകുന്നത്. ഈ ഫേസ്ബുക്ക് പേജ് സബ്സ്ക്രൈബ് ചെയ്യുകയും, നമ്മുടെ ഭാഷയെയും സംസ്കാരത്തെയും പരിപോഷിപ്പിക്കുന്നതിനുവേണ്ടി മലയാളം മിഷൻ യുകെ ചാപ്റ്റർ നടത്തുന്ന എല്ലാ ഉദ്യമങ്ങളെയും പ്രോത്സാഹിപ്പിക്കുകയും ചെയ്യണമെന്ന് എല്ലാ മലയാളികളോടും അഭ്യർത്ഥിക്കുന്നു.
യുകെയിലെ വിവിധ റീജിയനുകളിൽ സുഗമമായി നടക്കുന്ന മലയാളം സ്കൂളുകളിൽ പഠിപ്പിക്കുന്ന അധ്യാപകർക്കു വേണ്ടി മലയാളം മിഷൻ ഡയറക്ടർ പ്രൊഫ സുജ സൂസൻ ജോർജിൻ്റെ നേതൃത്വത്തിൽ രജിസ്ട്രാർ എം സേതുമാധവൻ, ഭാഷ അധ്യാപകൻ ഡോ എം ടി ശശി എന്നിവരെ പങ്കെടുപ്പിച്ച് നടത്തിയ ഓൺലൈൻ പരിശീലന ക്ലാസുകളിൽ നൂറോളം അദ്ധ്യാപകർക്ക് ആദ്യ ഘട്ട പരിശീലനം നൽകി കഴിഞ്ഞു. കൂടുതൽ പരിശീലനങ്ങൾക്കായി വിവിധ മേഖലകൾ തയ്യാറാകുന്നതോടൊപ്പം, മലയാളം മിഷൻ യുകെ ചാപ്റ്റർ യുകെയിലെ പല സ്കൂളുകളിലും ഏപ്രിൽ മാസത്തിൽ മലയാളം മിഷൻ്റെ ആദ്യ മൂല്യനിർണ്ണയ ഉത്സവമായ കണിക്കൊന്ന പഠനോത്സവം സംഘടിപ്പിക്കാനുള്ള തയാറെടുപ്പിലുമാണ്. കണിക്കൊന്ന, സൂര്യകാന്തി, ആമ്പൽ നീലക്കുറിഞ്ഞി എന്നീ നാലു കോഴ്സുകളാണ് മലയാളം മിഷൻ നടത്തുന്നത്.
കേരള സർക്കാരിന്റെ സാംസ്കാരിക വകുപ്പിന് കീഴിൽ “എവിടെയെല്ലാം മലയാളി അവിടെയെല്ലാം മലയാളം ” എന്ന മുദ്രാവാക്യത്തിലൂന്നി പ്രവാസികളുടെ പുതുതലമുറയെ നമ്മുടെ ഭാഷയും സംസ്കാരവും ആയി അടുപ്പിക്കുക എന്ന ലക്ഷ്യവുമായി പ്രവർത്തിക്കുന്ന മലയാളം മിഷൻ യു കെ ചാപ്റ്ററിന്റെ എല്ലാ പ്രവർത്തനങ്ങൾക്കും യുകെയിലെ മലയാളി സമൂഹത്തിന്റെ സഹകരണം ഉണ്ടാവണമെന്നും മലയാളം മിഷൻ യു കെ ചാപ്റ്റർ അഭ്യർത്ഥിക്കുന്നു.
സംഘടനയുടെ ദേശീയ കമ്മിറ്റിയിൽ ഇക്കഴിഞ്ഞ രണ്ടാഴ്ചകളിൽ നടന്ന സംഘടനയുടെ ദേശീയ സമ്മേളനത്തിന്റെ വിശദമായ വിലയിരുത്തലുകൾ നടത്തുകയുണ്ടായി . സമ്മേളനത്തിന്റെ നേട്ടവും കോട്ടവും , സംഘടനാപരമായി ഉയർന്നുവരുന്ന വെല്ലുവിളികളും വിഭാഗീയതയും നീണ്ട 9 മണിക്കൂർ നടന്ന വിശദമായ ചർച്ചയിൽ ദേശീയ കമ്മിറ്റി അംഗങ്ങൾ വിലയിരുത്തലുകൾ നടത്തി
കഴിഞ്ഞ ഒരു ദശകമായി സംഘടന വളർത്തുവാനായി നടത്തിയ ശ്രമങ്ങളും അതിനേറ്റ പരാജയ കാരണങ്ങളും പരിശോധിക്കുകയുണ്ടായി. അതോടൊപ്പം കഴിഞ്ഞ രണ്ടു വർഷത്തിൽ സംഘടന നടത്തിയ വൻ മുന്നേറ്റത്തെയും ലണ്ടനിലിനെ ചരിത്ര വിജയമായ മനുഷ്യ മതിൽ ഉൾപ്പടെയുള്ള നേട്ടവും അതിനായി നേതൃത്വപരമായ പങ്കു വഹിച്ച ദേശീയ ഭാരവാഹികളെയും യോഗം അഭിനന്ദിച്ചു. അതോടൊപ്പം സംഘടനാവിരുദ്ധ പ്രവർത്തനം നടത്തിയ 4 സെക്രട്ടറിയേറ്റ് അംഗങ്ങളെ അതാതു ബ്രാഞ്ചുകളിലേക്കു തരംതാഴ്ത്തുകയും ചെയ്തു. ജയൻ എടപ്പാൾ , അബ്ദുൽ മജീദ് , ആഷിക് മുഹമ്മദ്, പ്രസാദ് ഓഴക്കൽ എന്നിവരെയാണ് അതാതു ബ്രാഞ്ചുകളിലേക്ക് തരം താഴ്ത്തിയിരുക്കുന്നത്. ഹീത്രു ബ്രാഞ്ച് അംഗം ബിനോജ് ജോണിനെ സംഘടനയുടെ പ്രാഥമിക അംഗത്വത്തിൽ നിന്നും പുറത്തുക്കകയും ചെയ്തു. ഇവർ സംഘടനയിൽ ഗ്രൂപ്പിസം കൊണ്ടുവരുകയും, സംഘടനാ വിരുദ്ധ പ്രവർത്തനം നടത്തുകയും ചെയ്തുവെന്ന് പ്രഥമ ദൃഷ്ടിയാൽ തെളിഞ്ഞതിൻറെ ഭാഗമായിട്ടാണ് നടപടി. വിശദമായ റിപ്പോർട്ട് ബ്രാഞ്ച് പ്രതിനിധികളെ പിന്നാലെ അറിയിക്കുന്നതാണ്. സംഘടയുടെ പ്രവർത്തനങ്ങളിൽ അചഞ്ചലമായി കൂടെ നിൽക്കുന്ന എല്ലാവർക്കും ഒരിക്കൽകൂടി നന്ദി അറിയിക്കട്ടെ.
ടോം ജോസ് തടിയംപാട്
കിഡ്നി രോഗം ബാധിച്ച മൂവാറ്റുപുഴ സ്വദേശി പ്രവീൺ രാജപ്പനെ സഹായിക്കാൻ ഇടുക്കി ചാരിറ്റി ഗ്രൂപ്പ് യു കെ നടത്തിയ ചാരിറ്റിയിലൂടെ ലഭിച്ച 1455 പൗണ്ട് (137450 രൂപയുടെ ചെക്ക് } പ്രവീണിന്റെ വീട്ടിലെത്തി സാമൂഹിക പ്രവർത്തകരുടെ സാന്നിധ്യത്തിൽ ഇടുക്കി എം പി ഡീൻ കുര്യാക്കോസ് ഇന്നു വൈകുന്നേരം പ്രവീണിന് കൈമാറി .
കൊറോണയുടെ മാരകമായ പിടിയിൽ അമർന്നിരിക്കുന്ന കഷ്ട്ടകാരമായ സമയത്തും യു കെ മലയാളികളുടെ നല്ലമനസുകൊണ്ടാണ് ഇത്രയും പണം ലഭിച്ചത് . ഇടുക്കി എം പി ഡീൻ കുര്യാക്കോസിന്റെ അഭ്യർത്ഥന മാനിച്ചാണ് ഞങ്ങൾ ചാരിറ്റി നടത്തിയത്. ഞങ്ങളുടെ എളിയ പ്രവർത്തനത്തിൽ വാർത്ത ഷെയർ ചെയ്തും പണം നൽകിയും ഞങ്ങളെ സഹായിച്ച എല്ലവരോടും ഞങ്ങൾക്കുള്ള നന്ദിയും കടപ്പാടും അറിയിക്കുന്നു .
2004 ഉണ്ടായ സുനാമിക്ക് പണം പിരിച്ചുകൊണ്ടാണ് ഞങ്ങൾ പ്രവർത്തനം ആരംഭിച്ചത്. ഇടുക്കി ചാരിറ്റി ഗ്രൂപ്പ് യു കെ എന്നത് കേരളത്തിൽ നിന്നും യു കെയിൽ കുടിയേറിയ കഷ്ട്ടപാടും ബുദ്ധിമുട്ടും അറിഞ്ഞവരുടെ ഒരു കൂട്ടായ്മയാണ്. ഞങ്ങൾ ഇതുവരെ സുതാരൃവും സതൃസന്ധവുമായി ജാതി ,മത ,വർഗ ,വർണ്ണ, സ്ഥലകാല ഭേതമന്യയെ കേരളത്തിലും, യു കെ യിലും , നടത്തിയ ചാരിറ്റി പ്രവർത്തനത്തിന് യു കെ മലയാളികൾ നല്കിയ വലിയ പിന്തുണയെ നന്ദിയോടെ സ്മരിക്കുന്നു. നിങ്ങളുടെ സഹായം കൊണ്ട് ഇതുവരെ 86.5 ലക്ഷം രൂപയുടെ സഹായം പാവങ്ങൾക്ക് നൽകുവാൻ ഞങ്ങൾക്ക് കഴിഞ്ഞിട്ടുണ്ട് .
ഇടുക്കി ചാരിറ്റിക്കു നേതൃത്വ൦കൊടുക്കുന്നത് സാബു ഫിലിപ്പ് 07708181997 ടോം ജോസ് തടിയംപാട് 07859060320 സജി തോമസ് 07803276626..എന്നിവരാണ്
ലണ്ടനിൽ ഒരു ഗുരുവായൂരപ്പക്ഷേത്ര സാക്ഷാത്കാരം ലക്ഷ്യമാക്കി പ്രവർത്തിക്കുന്ന ലണ്ടൻ ഹിന്ദു ഐക്യവേദിയുടെ ആഭിമുഖ്യത്തിൽ ഈ വർഷത്തെ മഹാനവമി വിജയദശമി ആഘോഷങ്ങൾ ഐക്യവേദിയുടെ ഫേസ്ബുക്ക് പേജ് വഴി വിപുലമായി നടത്തുവാൻ നിശ്ചയിച്ചിരിക്കുന്ന വിവരം സസന്തോഷം അറിയിച്ചുകൊള്ളൂന്നു. വിജയത്തിന്റേയും ധര്മ്മ സംരക്ഷണത്തിന്റേയും സന്ദേശമാണ് നവരാത്രി നല്കുന്നത്. നവരാത്രി ദിവസങ്ങളിലെ ആദ്യ മൂന്ന് നാള് ദേവിയെ പാര്വ്വതിയായും അടുത്ത മൂന്ന് നാള് ലക്ഷിമിയായും അവസാന മൂന്ന് നാള് സരസ്വതിയായും സങ്കല്പ്പിച്ചാണ് പൂജ നടത്തുന്നത്. കേരളത്തില് അഷ്ടമി, നവമി, ദശമി എന്നീ ദിവസങ്ങള്ക്കാണ് നവരാത്രി ആഘോഷത്തില് പ്രാധാന്യം. കോവിഡ് മാനദണ്ഡങ്ങൾ പാലിക്കേണ്ടതിനാൽ പ്രതിവർഷം ഐക്യവേദിയുടെ ആഭിമുഖ്യത്തിൽ നടത്തിവരാറുള്ള കുരുന്നുകളുടെ വിദ്യാരംഭം ഈ വർഷം നടത്തുവാൻ സാധിക്കുന്നതല്ലെന്നു സംഘടകർ അറിയിച്ചു.
നവരാത്രി ആഘോഷങ്ങളുടെ ഭാഗമായി ഒന്നാം ദിവസം – ഒക്ടോബർ 24 ശനിയാഴ്ച, കേരളത്തിന്റെ തനതു ശാസ്ത്രീയ കലകളിൽ ഒന്നായ നങ്ങ്യാർക്കൂത്ത് ഫേസ്ബുക്ക് ലൈവ് ആയി അവതരിപ്പിക്കുന്നു. കൂടിയാട്ടത്തിന്റെ ഒരു ഭാഗമായും, കൂടിയാട്ടത്തിൽനിന്നു വേറിട്ട് ക്ഷേത്രങ്ങളിൽ ഒരു ഏകാംഗാഭിനയ ശൈലിയായിട്ടും ചെയ്തുവരുന്ന ഒരു കലാരൂപമാണ് നങ്ങ്യാർക്കൂത്ത്.
പ്രശസ്ത നങ്ങ്യാർക്കൂത്ത് കലാകാരി കലാമണ്ഡലം കൃഷ്ണേന്ദു അവതരിപ്പിക്കുന്ന കൂത്തിന് അകമ്പടിയേകുന്നത് പ്രശസ്ത മിഴാവ് കലാകാരൻ കലാമണ്ഡലം ധനരാജനാണ്. കേരള കലാമണ്ഡലം കല്പിതസർവ്വകലാശാലയിൽ നിന്ന് 10 വർഷത്തെ കൂടിയാട്ട പഠനം ബിരുദാനന്തര ബിരുദത്തോടെ പൂർത്തിയാക്കിയ കലാമണ്ഡലം കൃഷ്ണേന്ദുവിന്, സി. അച്ചുതക്കുറുപ്പ് സ്മാരക എൻഡോവ്മെൻ്റ്, കേന്ദ്ര മാനവ വിഭവശേഷി വകുപ്പ് സ്കോളർഷിപ്പ്, കെ.പി.നാരായണപ്പിഷാരോടി സ്മാരക സുവർണ്ണ മുദ്ര, ഉസ്താദ് ബിസ്മില്ലാ ഖാൻ യുവ പുരസ്കാരം എന്നിവ ലഭിച്ചിട്ടുണ്ട് . കേരള കലാമണ്ഡലം കല്പിത സർവ്വകലാശാലയിൽ കൂടിയാട്ടത്തിൽ ഗവേഷണം പൂർത്തിയാക്കി. ഇപ്പോൾ അവിടെ താല്ക്കാലിക അദ്ധ്യാപികയാണ് കലാമണ്ഡലം കൃഷ്ണേന്ദു.
കേരള കലാമണ്ഡലത്തിൽ നിന്ന് പോസ്റ്റുഡിപ്ലോമയോടു കൂടി മിഴാവ് പഠനം പൂർത്തിയാക്കിയ കലാമണ്ഡലം ധനരാജന് കേന്ദ്ര മാനവ വിഭവശേഷി വകുപ്പ് സ്കോളർഷിപ്പ്, കേരള സംഗീത നാടക അക്കാദമി യുവപ്രതിഭാ പുരസ്ക്കാരം എന്നിവ ലഭിച്ചിട്ടുണ്ട്. ഇന്ത്യയ്ക്കകത്തും പുറത്തുമായി നിരവധി വേദികളിൽ ചാക്യാർകൂത്ത്, നങ്ങ്യാർ കൂത്ത്, കൂടിയാട്ടം എന്നിവയ്ക്ക് പശ്ചാത്തല വാദകനായി പ്രവർത്തിച്ചിട്ടുള്ളതിനു പുറമെ മിഴാവ് മേളം, മിഴാവിൽ തായമ്പക എന്നിവയും സമകാലിക നാടകാവതരണങ്ങൾക്ക് പിന്നണിയിലും പ്രവർത്തിച്ചിട്ടുണ്ട്.നരസിംഹാവതാരം കഥയെ ആസ്പദമാക്കിയുള്ള സോദാഹരണ പ്രഭാഷണം ഒക്ടോബർ 24 ശനിയാഴ്ച, യുകെ സമയം വൈകിട്ട് 5 മണിക്ക് (ഇന്ത്യൻ സമയം വൈകിട്ട് 9:30) ലണ്ടൻ ഹിന്ദു ഐക്യവേദിയുടെ ഫേസ്ബുക് പേജ് വഴി തത്സമയമായി സംപ്രേക്ഷണം ചെയ്യും.
രണ്ടാം ദിവസം – ഒക്ടോബർ 25 ന്, യുകെ സമയം വൈകിട്ട് 4 മണിക്ക് (ഇന്ത്യൻ സമയം വൈകിട്ട് 8 :30) താനവട്ടത്തിന്റെ തമ്പുരാൻ എന്നറിയപ്പെടുന്ന പ്രശസ്ത കുത്തിയോട്ട സംഗീത സാമ്രാട്ട് ശ്രീ വി വിജയരാഘവകുറുപ്പ് അവതരിപ്പിക്കുന്ന ലളിതാമൃതം സംഗീത സന്ധ്യ തത്സമയം സംപ്രേക്ഷണം ചെയ്യുന്നു.
പേള ശ്രീ ജി ശങ്കരകുറുപ്പില് നിന്നും നാല്പ്പതു വര്ഷം മുന്പ് ശിഷ്യത്വം സ്വീകരിച്ച വിജയരാഘവകുറുപ്പ് ആദ്യകാലത്ത് കുത്തിയോട്ട ചുവടുകലനക്കിയെങ്കിലും പിന്നീട് അദ്ദേഹം കാലത്തിന്റെ അനിവാര്യതയെന്നപോലെ കുത്തിയോട്ട കമ്മികൾ രചിച്ചു സംഗീതം നൽകി ഭഗവതികളങ്ങളില് ആലപിച്ചു ഒരു നാടിന്റെ തന്നെ ആത്മാവിലേയ്ക്ക് നിസ്തൂല പ്രകാശം നല്കി വിളങ്ങി കൊണ്ടിരിക്കുന്നു.ഉത്തുംഗമായ രചനാപാടവം, ഉദാത്തമായ സംഗീതസന്നിവേശം, ഉജ്വലവും അനുഗ്രഹീതവുമായ ആലാപനനൈര്മല്ല്യത ഇതെല്ലാം ഒത്തൊരുമിച്ച അതുല്യ പ്രതിഭയായ ശ്രീ വി വിജയരാഘവകുറുപ്പ് അനവധി ദേശീയ-വിദേശ പുരസ്കാരങ്ങൾക്കും ഫെല്ലോഷിപ്പുകൾക്കും അർഹനായിട്ടുണ്ട്.
ലോകൈശ്വര്യത്തിനും രോഗമുക്തിക്കും ജഗദീശ്വരനോട് പ്രാർത്ഥിക്കുന്നതിനോടൊപ്പം എല്ലാ സഹൃദയരെയും മഹാനവമി-വിജയദശമി ആഘോഷങ്ങളിലേക്ക് ഭഗവത് നാമത്തിൽ സ്വാഗതം ചെയ്യുന്നതായി ലണ്ടൻ ഹിന്ദു ഐക്യവേദിയെ പ്രതിനിധീകരിച്ച് ശ്രീ തെക്കുമുറി ഹരിദാസും, ശ്രീ തേമ്പലത്ത് രാമചന്ദ്രനും അറിയിച്ചു.
