യുക്മ നഴ്സസ് ഫോറം നോർത്തുവെസ്റ്റ് റീജിയൻ ഇൻ്റർനാഷണൽ നേഴ്സസ് ഡേ സംഘടിപ്പിക്കുന്നു. യുക്മ നോർത്ത് വെസ്റ്റ് റീജിയണിലുള്ള നേഴ്സുമാർക്ക് വേണ്ടി യുക്മ നേഴ്‌സസ് ഫോറം (യു എൻ എഫ് ) നോർത്തുവെസ്റ് റീജിയണും ലിവർപൂൾ മലയാളി കൾച്ചറൽ അസോസിയേഷനും (ലിംക) സംയുക്തമായി മെയ് പത്താം തീയതി നടത്തുന്ന ഇൻ്റർനാഷണൽ നേഴ്സസ് ഡേയിലേക്ക് എല്ലാ നേഴ്‌സുമാരേയും സ്വാഗതം ചെയ്യുന്നു.

യുകെ യിലെ മലയാളി നേഴ്സുമാർക്കുവേണ്ടി യുക്മ 2012ൽ ആരംഭിച്ച സംഘടനയാണ് യുക്മ നേഴ്‌സസ് ഫോറം. യു കെ യിലെ മലയാളി നേഴ്സുമാരുടെ ഉന്നമനത്തിനും. അവരുടെ തൊഴിൽ സംബന്ധമായ കാര്യങ്ങൾക്കും മാർഗ്ഗനിർദ്ദേശം നൽകുന്നതിനും, കൂടാതെ സെമിനാറുകൾ, പരിശീലന ക്ലാസുകൾ, വർക്ക് ഷോപ്പുകൾ തുടങ്ങിയവയിലൂടെ കൂടുതൽ അറിവും വൈദഗ്ദ്യവും നൽകി അവരെ ശാക്തീകരിക്കുക എന്നിവയാണ് യുക്മ നേഴ്‌സസ് ഫോറം കൊണ്ട് ഉദ്ദേശിക്കുന്നത്. നേഴ്‌സുമാർ സമൂഹത്തിനു ചെയ്യുന്ന വിലയേറിയ സേവനങ്ങളെ ഓർമിക്കുവാനാണ് ഇൻ്റർനാഷണൽ നേഴ്സസ് ഡേ ആഘോഷിക്കുന്നത്. ആരോഗ്യ പരിചരണ രംഗത്ത് കടുത്ത പ്രതിസന്ധി സൃഷ്ടിച്ച കോവിഡ് മഹാമാരിയുടെ സമയത്ത് ലോകമെങ്ങുമുള്ള നേഴ്സുമാർ ചെയ്ത സ്തുത്യർഹമായ സേവനമാണ് മഹാമാരിയെ തരണം ചെയ്യാൻ എല്ലാ രാജ്യങ്ങളിലെയും ആരോഗ്യ മേഖലയെ സഹായിച്ചത്.

എല്ലാ വർഷവും ലോക നേഴ്‌സസ് ദിനത്തിൽ നേഴ്സിംഗിൻ്റെ ഒരു പ്രത്യേക വശം ഉയർത്തിക്കാട്ടുന്നതിന് വ്യത്യസ്തമായ തീം ഉണ്ടാകാറുണ്ട്. 2025 ലെ ലോക നഴ്‌സസ് ദിനത്തിലെ തീം ആണ് “നേഴ്‌സുമാരുടെ ശാരീരികവും മാനസികവുമായ ക്ഷേമം” (Physical and Mental Wellbeing of the Nurses).

സെമിനാർ, ഡിബേറ്റ്, ഗ്രൂപ്പ് ഡിസ്കഷൻസ്, കൾച്ചറൽ പ്രോഗ്രാംസ് എന്നിവയെല്ലാം ഉൾപ്പെടുത്തി വിപുലമായ ആഘോഷങ്ങൾ ആണ് യുക്മ നേഴ്‌സസ് ഫോറം നോർത്തുവെസ്റ് റീജിയൺ ഇത്തവണ ഇൻ്റർനാഷണൽ നേഴ്‌സസ് ഡേ ആഘോഷത്തോടനുബന്ധിച്ച് ഒരുക്കിയിരിക്കുന്നത്. ലിവർപൂളിലെ ഔർ ലേഡി ഓഫ് ദി അസംപ്ഷൻ പാരീഷ് സെന്ററിൽ നടക്കുന്ന നേഴ്‌സസ് ഡേ ആഘോഷങ്ങളിൽ മുൻകൂട്ടി രെജിസ്റ്റർ ചെയ്തവർക്കാണ് പങ്കെടുക്കുവാൻ പറ്റുക. രാവിലെ ഒൻപതു മണിക്ക് രജിസ്ട്രേഷനോട് കൂടി ആരംഭിച്ചു വൈകിട്ടു അഞ്ചു മണിയോടെ സമാപിക്കുന്ന രീതിയിൽ ആണ് ക്രമീകരണങ്ങൾ ചെയ്തുവരുന്നത്. താഴെ കൊടുത്തിരിക്കുന്ന ലിങ്കിൽ രജിസ്റ്റർ ചെയ്തു നിങ്ങളുടെ രെജിസ്ട്രേഷൻ ഇന്ന് തന്നെ ഉറപ്പാക്കുക.

വിവിധ നേഴ്സിംഗ് മേഘലകളിൽ നിന്നും പരിചയസമ്പന്നരായ സീനിയർ നഴ്സുമാർ, ട്രേഡ് യൂണിയൻ നേതാക്കൾ, നോർത്ത് വെസ്റ്റിലെ എന്‍എച്ച്എസുകളിൽ ഉന്നത സ്ഥാനം വഹിക്കുന്നവർ തുടങ്ങി പ്രഗത്ഭരായവരുടെ ക്ലാസുകൾ, നഴ്‌സസ് മാരുടേതായ കലാപരിപാടികള്‍ തുടങ്ങിയവ ഉൾപ്പെടുത്തിയാണ് ആഘോഷപരിപാടികൾ നടക്കുന്നത്. ഈ പരിപാടിയുടെ ഭാഗമാകുവാൻ മേഴ്സിസൈഡിലേയും യൂകെയിലെയും എല്ലാ നേഴ്സുമാരെയും സ്വാഗതം ചെയ്യുന്നു.

മുൻകൂട്ടി രജിസ്‌റ്റർ ചെയ്യുന്ന നഴ്സുമാർക്ക് ഭക്ഷണവും ഉണ്ടായിരിക്കുന്നതാണ്.

കൂടുതൽ വിവരങ്ങൾക്ക്
Rani Jacob – +447958311874
Reena Binu – +447944687008
Jilson Joseph – +447459052037

Venue Address:
Our Lady of the Assumption Parish Centre, Hartsbourne Ave,
Liverpool
L25 2RY
https://www.nursingtimes.net/nurse-wellbeing/international-nurses-day-2025-theme-revealed-10-01-2025/

15 ൽ അധികം വർഷങ്ങളായി ബ്രിസ്റ്റോളിലെ മലയാളികളുടെ സാമൂഹ്യ, സാംസ്കാരിക, കലാ, കായിക മണ്ഡലങ്ങളിൽ സമഗ്ര സംഭാവന നല്കി പ്രവർത്തിച്ചുവരുന്ന BrisKA യക്ക് നവനേതൃത്വം.16-03-2025 ൽ St . Gregory Church Hall ൽ നടന്ന BrisKA യുടെ വാർഷിക പൊതുയോഗം ഭരണ പരിചയവും യുവത്വവും ഒത്തിണങ്ങിയ 2025-2027 വർഷത്തേക്കുള്ള ഭരണസമിതിയെ തെരഞ്ഞെടുത്തു.

പ്രസിഡൻറ് ശ്രീ. സാജൻ സെബാസ്റ്റ്യന്റ്റെ അദ്ധ്യക്ഷതയിൽ കൂടിയ പൊതുയോഗത്തിൽ സെക്രട്ടറി ശ്രീ. ഡെന്നിസ് സെബാസ്റ്റ്യൻ 2023- 2025 വർഷത്തെ റിപ്പോർട്ട് അവതരിപ്പിച്ചു, ട്രഷറർ ശ്രീ. ഷാജി സ്കറിയ വരവ്-ചിലവ് കണക്ക് അവതരിപ്പിച്ചു. റിപ്പോർട്ടും, വരവ്-ചിലവ് കണക്കും പാസ്സാക്കിയതിന് ശേഷം, പുതിയ
ഭരണസമിതിയുടെ തെരഞ്ഞെടുപ്പ് നടത്തപ്പെട്ടു.

എക്സിക്യൂട്ടീവ് കമ്മിറ്റി

പ്രസിഡന്റ് : ജെയ്‌മോൻ ജോർജ്ജ്, സെക്രട്ടറി: ടോം ജോസഫ്, ട്രഷറർ: ജോർജ് ജോൺ, വൈസ് പ്രസിഡൻറ്: അപ്പു മണലിത്തറ, ജോയിൻ്റ് സെക്രട്ടറി: മെജോ ചെന്നേലിൽ, കോ-ട്രഷറർ: ജിജോ പാലാട്ടി, പ്രോ: നൈസെൻ്റ് ജേക്കബ്, കായിക-സെക്രട്ടറി: ഫ്രാൻസിസ് ആംബ്രോസ്, കല – സെക്രട്ടറി: ബെല്ല ബേബി രാജ് (ബ്രാഡ്‌ലി സ്റ്റോക്ക്)

ന്യൂസ് ഡെസ്ക്, മലയാളം യുകെ

പുതുമുഖങ്ങളെയും പരിചയസമ്പന്നരെയും ഉൾപ്പെടുത്തി മലയാളി അസോസിയേഷൻ 2025-2027 കാലയളവിലേക്കുള്ള ഭരണസമിതി നിലവിൽ വന്നു. എം.പി പത്മരാജ് പ്രസിഡന്റായും ജിനോയിസ് തോമസ് സെക്രട്ടറിയായും ഷാൽമോൻ പങ്കേത്ത് ട്രഷററുമായുള്ള ഭരണസമിതി ആകും സംഘടനയ്ക്ക് നേതൃത്വം നൽകുക.

മാർച്ച് 22 ശനിയാഴ്ച വൈകുന്നേരം ഏഴു മണിയോടെ മുൻ പ്രസിഡൻറ് ജോബിൻ ജോണിന്റെ അധ്യക്ഷതയിൽ ആരംഭിച്ച പൊതുയോഗത്തിൽ പ്രവർത്തന റിപ്പോർട്ട് സെക്രട്ടറി സുജു ജോസഫും ഫിനാൻഷ്യൽ റിപ്പോർട്ട് ട്രഷറർ ജയിവിൻ ജോർജ്ജും അവതരിപ്പിച്ചു. തുടർന്ന് നടന്ന അധ്യക്ഷ പ്രസംഗത്തിൽ കഴിഞ്ഞ രണ്ട് വർഷം അസോസിയേഷൻ പ്രവർത്തനങ്ങളുമായി സഹകരിച്ച എല്ലാവർക്കും നന്ദി രേഖപ്പെടുത്തി തുടർന്ന് മുൻ രക്ഷാധികാരി ജോസ് കെ ആൻറണി സംഘടന നിലനിൽക്കേണ്ടതിൻറെ ആവശ്യകതയും എല്ലാവരെയും ഒരുമിച്ചു കൊണ്ടുപോകുവാൻ പ്രാപ്തിയുള്ള ഒരു നേതൃത്വം നിലവിൽ വരട്ടെ എന്ന് ആശംസിക്കുകയും ചെയ്തു.

തുടർന്ന് നടന്ന തെരഞ്ഞെടുപ്പ് പ്രക്രിയയിൽ തെരഞ്ഞെടുപ്പ് കമ്മീഷണർമാരായ ഷിബു ജോൺ, മേഴ്സി സജീഷ് എന്നിവർ ലഭിച്ച പാനൽ ജനറൽ ബോഡിക്ക് മുൻപാകെ അവതരിപ്പിച്ചു. എംപി പത്മരാജ്, ജിനോയിസ് തോമസ്, ഷാൽമോൻ പങ്കെത് എന്നിവരോടൊപ്പം വൈസ് പ്രസിഡൻറ് ആയി ലിനി നിനോ, ജോയിൻ സെക്രട്ടറിയായി ആൻമേരി സന്ദീപ്, ജോയിൻ ട്രഷററായി ബിജു ഏലിയാസ് എന്നിവർ തെരഞ്ഞെടുക്കപ്പെട്ടു.

തുടർന്ന് പ്രസിഡൻറ് എംപി പത്മരാജ് മറ്റ് നിർവാഹകസമിതി അംഗങ്ങളെ പ്രഖ്യാപിച്ചു. പ്രോഗ്രാം കോഡിനേറ്റർമാരായി റോഷ്നി വൈശാഖ് (കിഡ്സ്), ജിൻസി അനു (ലേഡീസ്) ബിബിൻ ജോർജ് (മെൻസ്) എന്നിവരെയും സ്പോർട്സ് കോഡിനേറ്റർമാരായി നിശാന്ത് സോമൻ (മെൻസ്), റിയാ ജോസഫ് (ലേഡീസ്) എന്നിവരെയും പ്രഖ്യാപിച്ചു. ഫുഡ് കോർഡിനേറ്ററായി സീനിയർ മെമ്പർ സാബു ജോസഫും ഇവൻറ് ആൻഡ് സ്റ്റേജ് കോഡിനേറ്റനായി അരുൺ കൃഷ്ണനും സോഷ്യൽ മീഡിയ കോഡിനേറ്റർ ആയി പ്രശാന്തും യൂത്ത് കോഡിനേറ്ററായി അഖിൽ ജോസഫും പ്രവർത്തിക്കും. യുക്മ പ്രതിനിധികളായി എംപി പത്മരാജ്, ബിജു മൂന്നാനപ്പിള്ളിൽ, ഡിനു ഡൊമിനിക് ഓലിക്കൽ എന്നിവർ തുടരും. സൗത്ത് വെസ്റ്റ് റീജണൽ കമ്മിറ്റി അംഗവും യുക്മ ന്യൂസ് കോഡിനേറ്ററുമായ ഡിനു ഡൊമിനിക് സാലിസ്ബറി മലയാളി അസോസിയേഷന്റെ പിആർഒ ആയി തെരഞ്ഞെടുക്കപ്പെട്ടു. സംഘടനയ്ക്ക് ഒരു രക്ഷാധികാരി ഉണ്ടാവേണ്ടതിൻറെ ആവശ്യകത പ്രസിഡൻറ് യോഗത്തിന് മുമ്പിൽ പറയുകയും ഷിബു ജോൺ രക്ഷാധികാരിയായി തെരഞ്ഞെടുക്കപ്പെടുകയും ചെയ്തു.

തുടർന്ന് പ്രസിഡൻറ് എംപി പത്മരാജന്റെ നിർദ്ദേശപ്രകാരം സെക്രട്ടറി ജിനോയിസ് വരുന്ന രണ്ടു വർഷത്തെ നയ പ്രഖ്യാപനം നടത്തുകയും നിഷാന്ത് സോമൻ ക്രിക്കറ്റ് ടൂർണമെന്റ് നടത്തിപ്പിനെ കുറിച്ചും സംസാരിച്ചു. ലേഡീസ് ഡേ ഔട്ട്, ചിൽഡ്രൻസ് ഡേ, കിഡ്സ് ഫുട്ബോൾ ട്രെയിനിങ്, ഡ്രാമ ക്ലബ്ബ്, സ്പോർട്സ് ട്രെയിനിങ് എക്സിക്യൂട്ടീവ് കമ്മിറ്റി അംഗങ്ങൾക്കായുള്ള ഫാമിലി ട്രിപ്പ്, വള്ളംകളി, വടംവലി മത്സരങ്ങൾക്കായുള്ള പരിശീലനങ്ങൾ തുടങ്ങിയവയെല്ലാം വരും രണ്ട് വർഷങ്ങളിൽ ഉണ്ടാകുമെന്ന് സെക്രട്ടറി ജിനോയിസ് അറിയിച്ചു. യുക്മ കലാമേള കായികമേളയ്ക്ക് പരമാവധി ആളുകളെ പങ്കെടുപ്പിക്കാനും യോഗത്തിൽ തീരുമാനമായി.

തുടർന്ന് പിആർഒ ഡിനു ഡൊമിനിക് പുതിയ പാനലിന് ആശംസ നേരിയുകയും യോഗത്തിൽ വന്ന എല്ലാവർക്കും നന്ദി രേഖപ്പെടുത്തുകയും ചെയ്തു.

യുകെയിൽ പ്രവർത്തിക്കുന്ന പുരോഗമന കലാസാഹിത്യ സാംസ്കാരിക സംഘടനയാണ് സമീക്ഷ യുകെ. എട്ട് വർഷം മുൻപ് ബ്രിട്ടനിലെ സ്ഥിര താമസക്കാരായ ഒരുപറ്റം മലയാളികളാണ് സമീക്ഷ യുകെ രൂപീകരിച്ചത്. പുരോഗമന സ്വഭാവമുള്ള മലയാളി കൂട്ടായ്മ എന്ന രീതിയിലാണ് പ്രവർത്തനം ആരംഭിച്ചത്. പതിയെ കലാ കായിക സാംസ്കാരിക മേഖലകളിലും സജീവമായി ഇടപെട്ടുതുടങ്ങി. ചെറിയ കാലയളവിൽ അത്ഭുതപ്പെടുത്തും വിധം സമീക്ഷ വളർന്നു. മറുനാട്ടിൽ മലയാളികളെ മാത്രം കൂട്ടുപിടിച്ച് ഒരു സാംസ്കാരിക പ്രസ്ഥാനം പടുത്തുയർത്തുക എന്നത് എളുപ്പമുള്ള കാര്യമല്ല. പിന്നിട്ട വഴികളിൽ പ്രതിബന്ധങ്ങൾ ഏറെയുണ്ടായിരുന്നു. എന്നിട്ടും കരുത്തോടെ മുന്നോട്ടുപോയി. നാട്ടിലെ സംഘടനാ പ്രവർത്തനത്തിൻ്റെ അനുഭവമാണ് ഞങ്ങളുടെ പ്രവർത്തകർക്ക് ഇവിടെ ഊർജ്ജമായത്.

സമയവും കാലവും നോക്കാതെ മനുഷ്യരിലേക്ക് ഇറങ്ങിച്ചെന്നതും ഹൃദയം കൊണ്ട് സംവദിച്ചതുമെല്ലാം സമീക്ഷയുടെ വളർച്ചയുടെ സൂത്രവാക്യങ്ങളാണ്. ഇന്നിപ്പോൾ സമീക്ഷയ്ക്ക് ബ്രിട്ടനിലാകെ നാൽപതോളം യൂണിറ്റുകളുണ്ട്. ഇക്കലാത്തിനിടെ ആരുമില്ലാത്തവർക്കും അന്നമില്ലാത്തവർക്കും ഒപ്പംനിന്നു. പുതിയൊരു ജീവിതം സ്വപ്നം കണ്ട് നാടുവിട്ട് കുടിയേറിയവർക്ക് അത്താണിയായി. ചതിക്കപ്പെട്ടവർക്ക് താങ്ങായി. ആത്മഹത്യാ മുനമ്പിൽ പകച്ചുനിന്നവരെ ചേർത്തുപിടിച്ചു. കലാ-കായിക രംഗത്ത് വലുതും വിപുലവുമായ വേദിയൊരുക്കി. നാട്ടിലിട്ടുപോന്ന സർഗവൈഭവവും കായികശേഷിയും അതോടെ പലരും പൊടി തട്ടിയെടുത്തു. നാടിന് നൊന്തപ്പോഴെല്ലാം തണലൊരുക്കി, ഞങ്ങളുണ്ട് കൂടെയെന്ന് ഉറക്കെപ്പറഞ്ഞു.

ഇനിയുമിനിയും മനുഷ്യരിലേക്ക് പടരണം. ബ്രിട്ടനിലാകെ പ്രവർത്തനം വ്യാപിപ്പിക്കണം. കൂടുതൽ പേർ സമീക്ഷയിലേക്ക് കടന്നുവരണം. സമീക്ഷ യുകെയുടെ മെമ്പർഷിപ്പ് ക്യാമ്പയിൻ ഏപ്രിൽ അഞ്ചിന് ആരംഭിക്കുകയാണ്. സമീക്ഷയുടെ സത്പ്രവർത്തികളിൽ പങ്കാളികളാവാൻ നിങ്ങളെയും സ്വാഗതം ചെയ്യുന്നു. വരൂ, നമുക്കൊന്നിച്ച് പോരാടാം.

ഓവർസീസ് റസിഡൻ്റ് മലയാളീസ് അസോസിയേഷൻ “ഓർമ ഇൻ്റർനാഷനൽ” വിദ്യാർഥികൾക്കായി സംഘടിപ്പിക്കുന്ന അന്താരാഷ്ട്ര പ്രസംഗ മത്സരം മുന്നാം സീസണിലേക്ക്. മൂന്നുഘട്ടങ്ങളിലായി നടക്കുന്ന മത്സരത്തിൽ വിജയികൾക്കായി ഈ സീസണിലും 10 ലക്ഷം രൂപയുടെ കാഷ് അവാർഡുകളുണ്ട്.

ആദ്യഘട്ട മത്സരം ഏപ്രിൽ 15 വരെയാണ്. ആദ്യഘട്ടത്തിൽ മികച്ച പ്രകടനം നടത്തുന്ന ജൂനിയർ, സീനിയർ കാറ്റഗറികളിലെ ഇംഗ്ലീഷ്, മലയാളം വിഭാഗം വിദ്യാർഥികളിൽനിന്നു തിരഞ്ഞെടുക്കപ്പെടുന്ന 25 വീതം പേർക്കു രണ്ടാംഘട്ടത്തിൽ മത്സരിക്കാം. രണ്ടാം റൗണ്ടിൽ വിജയിക്കുന്ന 13 വീതം വിദ്യാർഥികൾ ഫൈനൽ റൗണ്ടിലെത്തും.

റജിസ്‌റ്റർ ചെയ്യുന്ന സമയത്തു പഠിക്കുന്ന ഗ്രേഡ് അനുസരിച്ച്, 7-ാം ക്ലാസ് മുതൽ 10-ാം ക്ലാസ് വരെയുള്ളവർക്കു ജൂനിയറിലും 11-ാം ക്ലാസ് മുതൽ ഡിഗ്രി അവസാനവർഷം വരെയുള്ളവർക്കു സീനിയറിലും മത്സരിക്കാം. ഗ്രാൻഡ് ഫിനാലെ ഓഗസ്റ്റ‌് 8നും 9നും പാലായിൽ.

പ്രസംഗവിഷയം : ലോകസമാധാനം, 3 മിനിറ്റിൽ കവിയാത്ത പ്രസംഗത്തിന്റെ വിഡിയോ, ഗൂഗിൾഫോമിലൂടെ അപ്ലോഡ് ചെയ്യണം.

രജിസ്ട്രേഷൻ ഫോമിനും, കൂടുതൽ വിവരങ്ങൾക്കും www.ormaspeech.org എന്ന വെബ്സൈറ്റ് സന്ദർശിക്കുക.
ഫോൺ: എബി ജെ ജോസ്, 9074177464, ജോസ് തോമസ് +1 412 656 4853.

ഓഗസ്റ്റ‌് 8, 9 തീയതികളിലായി നടക്കുന്ന മത്സരവും രജിസ്ട്രേഷനും തികച്ചും സൗജന്യമായി ആണ് നടക്കുന്നത്.

മത്സരത്തിന്റെ ആദ്യ റൗണ്ടിൽ നിന്നും തിരഞ്ഞെടുക്കപ്പെടുന്ന കുട്ടികൾക്ക് സൗജന്യമായി നിരന്തര പ്രസംഗ പരിശീലനം നൽകിയാണ് മത്സരാർത്ഥികളെ ഫിനാലയിലേക്ക് തയ്യാറാക്കുന്നത്.

മുൻ സീസണുകളിലെ മത്സരാർത്ഥികളും വിജയികളും ഏറെ പ്രതീക്ഷയോടെയാണ് മൂന്നാം സീസൺ ആയി കാത്തിരിക്കുന്നത്.

ടോം ജോസ് തടിയംപാട്

ജീവിക്കാനുള്ള എല്ലാ സാധ്യതകളും അടഞ്ഞപ്പോൾ തന്റെ രണ്ടുപെൺമക്കളെയും കൂട്ടിപ്പിടിച്ചു ഏറ്റുമാനൂരിൽ ട്രെയിനിനു മുൻപിൽ ജീവൻ വെടിഞ്ഞ ചുങ്കം സ്വദേശി ഷൈനി ചുങ്കം ,തട്ടാരത്തട്ട ,പുലരി കുടുംബശ്രീ യൂണിറ്റിൽ നിന്നും കടം എടുത്ത വകയിൽ അടച്ചു തീർക്കാനുള്ള 95,225 രൂപ ,അടച്ചു തീർക്കുന്നതിനുവേണ്ടി ഇടുക്കി ചാരിറ്റി ഗ്രൂപ്പ് യു കെ നടത്തിയ ചാരിറ്റിക്ക് 945 പൗണ്ട് (103399 രൂപ ) ലഭിച്ചു. ചാരിറ്റി അവസാനിച്ചതായി അറിയിക്കുന്നു . ചാരിറ്റിക്കു പണം നൽകിയ മുഴുവൻ ആളുകൾക്കും നന്ദി അറിയിക്കുന്നു ,ബാങ്കിന്റെ ഫുൾ സ്റ്റെമെന്റ്റ് എല്ലാവർക്കും അയച്ചു തരും എന്നറിയിക്കുന്നു .ബാങ്കിന്റെ സമ്മറി സ്റ്റേറ്റ്മെന്റ് ഈ വർത്തയോടൊപ്പം പ്രസിദ്ധീകരിക്കുന്നു .

ചാരിറ്റിയുടെ അധികമായി ലഭിച്ച 8000 രൂപ ഷൈനിയുടെ കരിങ്കുന്നം പഞ്ചായത്തിൽ തന്നെയുള്ള അർഹരായവരെ കണ്ടെത്തി നൽകുമെന്നും അറിയിക്കുന്നു . ഞങ്ങൾ ഈ ചാരിറ്റി ആരംഭിച്ചപ്പോൾ ഞങ്ങൾക്കെതിരെ കടുത്ത വിമർശനമാണ് ഉയർന്നത്. അതിനു അവർക്കു അവരുടേതായ ന്യായങ്ങളും ഉണ്ടാകും. ആ വിമർശനങ്ങളെയും ഞങ്ങൾ ആദരവോടെ കാണുന്നു, പക്ഷെ ഞങ്ങളെ സംബന്ധിച്ചിടത്തോളം കൂലിപ്പണിക്കാരായ ആ 13 കുടുംബശ്രീ കുടുംബങ്ങൾക്ക് ഈ പണം ബാധ്യതയാകാതിരിക്കുക എന്നത് മാത്രമായിരുന്നു ഞങ്ങളുടെ ലക്ഷ്യം ,അതിനെ പിന്തുണച്ച എല്ലാ യു കെ മലയാളികൾക്കും ഞങ്ങളുടെ നന്ദിയും കടപ്പാടും അറിയിക്കുന്നു.

ഞങ്ങളുടെ ഈ സദ് ഉദ്യമത്തിൽ ഞങ്ങളുടെ ഉദ്ദേശശുദ്ധി മനസിലാക്കി തുടക്കം മുതൽ ഞങ്ങളോടൊപ്പം നിന്ന യു കെ യിലെ സൗത്ത് എൻഡിൽ താമസിക്കുന്ന റിട്ടയേർഡ് ഇലക്‌ട്രിസിറ്റി ബോർഡ് എൻജിനീർ ജിമ്മി ചെറിയാൻ ,ലിവർപൂൾ ക്നാനായ കമ്മ്യൂണിറ്റി പ്രസിഡന്റ് ലാലു തോമസ് , ലിവർപൂൾ മലയാളി അസോസിയേഷൻ മുൻ സെക്രട്ടറി ബിജു ജോർജ് എന്നിവരെ നന്ദിയോടെ ഓർക്കുന്നു. ഇടുക്കി ചാരിറ്റി ഗ്രൂപ്പ് യു കെ എന്നത് കേരളത്തിൽ നിന്നും യു കെയിൽ കുടിയേറിയ കഷ്ട്ടപാടും ബുദ്ധിമുട്ടും അറിഞ്ഞവരുടെ ഒരു കൂട്ടായ്‌മയാണ്‌.

ഞങ്ങൾ ‍ ഇതുവരെ സൂതാരൃവും സതൃസന്ധവുമായി ജാതി ,മത ,വർഗ ,വർണ്ണ, സ്ഥല ,കാല ഭേതമെന്യയെ കേരളത്തിലും, യു കെ യിലും , നടത്തിയ ചാരിറ്റി പ്രവർത്തനത്തിലൂടെ ഇതുവരെ ഏകദേശം 1,41, 50000 (ഒരുകോടി നാൽപ്പത്തിഒന്നു ലക്ഷത്തി അൻപതിനായിരം ) രൂപയുടെ സഹായം അർഹിക്കുന്നവർക്കു നൽകുവാൻ കഴിഞ്ഞിട്ടുണ്ട് .

2004 ഉണ്ടായ സുനാമിക്ക് പണം പിരിച്ചു അന്നത്തെ മുഖ്യമന്തി ഉമ്മൻ ചാണ്ടിക്കു നൽകി കൊണ്ടാണ് ഞങ്ങൾ പ്രവർത്തനം ആരംഭിച്ചത്. ഞങ്ങളുടെ ഈ എളിയ പ്രവർത്തനത്തിനു മലയാളം യു കെ പത്രത്തിന്റെ അവാർഡ് ,ലിവർപൂൾ ക്നാനായ കമ്മ്യൂണിറ്റിയുടെ അംഗീകാരം ,പടമുഖം സ്നേഹമന്ദിരത്തിന്റെ അംഗീകാരം , ലിവർപൂൾ മലയാളി അസോസിയേഷൻ (ലിമ)യുടെ അംഗീകാരം എന്നിവ ലഭിച്ചിട്ടുണ്ട് .

ഇടുക്കി ചാരിറ്റിക്കു നേതൃത്വ൦കൊടുക്കുന്നത് സാബു ഫിലിപ്പ് ,ടോം ജോസ് തടിയംപാട് ,സജി തോമസ്‌ എന്നിവരാണ് . ഞങ്ങളുടെ രക്ഷാധികാരി ബഹുമാനപ്പെട്ട തമ്പി ജോസാണ്‌ .

ദാരിദ്രൃം എന്തെന്നറിഞ്ഞവർക്കെ പാരിൽ പരക്ലേശവിവേകമുള്ളു.””

മാത്യു വർഗീസ്

റെഡിച്ച്‌; കല , കായിക, സാമൂഹ്യ മേഖലകളില്‍ മികച്ച ഇടപെടലുകള്‍ നടത്തി, യു.കെ മലയാളി സമൂഹത്തില്‍ ശക്തമായ സ്ഥാനമുറപ്പിച്ച കേരള കള്‍ച്ചറല്‍ അസോസിയേഷന്‍ (കെ.സി.എ) – റെഡ്മിച്ചിന്റെ വാര്‍ഷിക പൊതുയോഗം ഭംഗിയായി സംഘടിപ്പിച്ചു.

2025 മാര്‍ച്ച്‌ 22 ശനിയാഴച വൈകിട്ട് 6 മണിക്ക്‌ ഈസ്മോര്‍ ഹാളില്‍ നടന്ന സമ്മേളനത്തില്‍ നൂറിലധികം വരുന്ന കെ.സി.എ അംഗങ്ങള്‍ പങ്കെടുത്തു. പ്രസിഡന്റ്‌ ജയ്‌ തോമസ്‌ വാര്‍ഷിക പൊതു സമ്മേളനത്തിന്‌ സ്വാഗതം ആശംസിച്ചു. സെക്രട്ടറി ജസ്റ്റിന്‍ മാത്യൂ 2024 വര്‍ഷത്തെ പ്രവര്‍ത്തന റിപ്പോര്‍ട്ടും, ട്രഷറര്‍ ജോബി ജോസഫ്‌ സാമ്പത്തിക കണക്കുകളും അവതരിപ്പിച്ചു.

കെ. സി. എ അംഗങ്ങള്‍ കഴിഞ്ഞ വര്‍ഷം പ്രോഗ്രാമുകള്‍ക്ക്‌ നല്‍കിയ അകമഴിഞ്ഞ പിന്തുണയും സേവനങ്ങളും, കൂടാതെ വളരെ സുതാര്യവും കൃത്യവുമായ വരവ്‌ ചിലവ്‌ കണക്കുകളും ഐകകണ്ഠേനയാണ് സമിതി യോഗം അംഗീകരിച്ചത്‌. തുടര്‍ന്ന്‌ നടന്ന ചര്‍ച്ചകളില്‍ സംഘടനയുടെ ഭാവി പ്രവര്‍ത്തനങ്ങളെ പറ്റിയും ഭരണഘടനാ ഭേദഗതികളും സംബന്ധിച്ച്‌ നിര്‍ദേശങ്ങള്‍ ഉന്നയിച്ച്‌ അംഗീകരിച്ചു. കെ.സി.എ സംഘടനയെ ചാരിറ്റി കമ്മീഷനില്‍ രജിസ്റ്റര്‍ ചെയ്യേണ്ടതിന്റെ അനിവാര്യത ചര്‍ച്ച ചെയ്യുകയും അതിനുള്ള നടപടികള്‍ പുതിയ ഭരണസമിതിക്ക്‌ ചുമതലപ്പെടുത്തുകയും ചെയ്തു.

കഴിഞ്ഞ വര്‍ഷം നടത്തിയ പ്രവര്‍ത്തനങ്ങള്‍ക്ക്‌ മുന്‍ ഭരണസമിതിയ്ക്ക്‌ യോഗം അഭിനന്ദനമര്‍പ്പിച്ചു. അനുസ്മരണീയമായ പ്രവര്‍ത്തനങ്ങള്‍ക്കും, സമൂഹത്തില്‍ എപ്പോഴും കൈത്താങ്ങായ നിലപാടിനുമാണ്‌ അംഗങ്ങള്‍ പ്രത്യേക അഭിനന്ദനം അറിയിച്ചത്‌.

തുടര്‍ന്ന്‌, മുന്‍ പ്രസിഡന്റ്‌ ജയ്‌ തോമസിന്റെ അദ്ധ്യക്ഷതയില്‍ നടന്ന പൊതുതെരഞ്ഞെടുപ്പില്‍ 2025-26 കാലയളവിനുള്ള പൂതിയ ഭരണസമിതിയെ അംഗങ്ങള്‍ ഐകകണ്ഠേന തിരഞ്ഞെടുത്തു. 25 അംഗങ്ങള്‍ ഉള്‍പ്പെട്ട ടീമാണ്‌ പുതിയ ഭരണസമിതിയില്‍ സ്ഥാനമേറ്റത്‌.

പൂതിയ ഭരണസമിതി ഭാരവാഹികളുടെ പേരും അവരുടെ ഉത്തരവാദിത്തങ്ങളും താഴെ കൊടുത്തിരിക്കുന്നു.

പ്രസിഡന്റ്‌. ശ്രീ. ബിഞ്ചു ജേക്കബ്‌
സെക്രട്ടറി: ശ്രീ. അഭിലാഷ്‌ സേവൃര്‍
ട്രഷറര്‍: ശ്രീ. സാബു ഫിലിപ്പ്‌

മറ്റ് ഭാരവാഹികള്‍:

വൈസ്‌ പ്രസിഡന്റ്‌. ശ്രീമതി. ജെന്‍സി പോള്‍
ജോയിന്റ്‌ സെക്രട്ടറിമാര്‍: ശ്രീ. ജസ്റ്റിന്‍ ജോസഫ്‌, ശ്രീ.ജിബിന്‍ സെബാസ്റ്റ്യൻ
ജോയിന്റ്‌ ട്രഷറര്‍: ശ്രീ. ജോബി ജോണ്‍
കലാ കോ ഓര്‍ഡിനേറ്റര്‍മാര്‍.: ശ്രീമതി. ഡെയ്‌സി അഭിലാഷ്‌, ശ്രീ. റോയ്‌ മാത്യു
കായിക കോഓര്‍ഡിനേറ്റര്‍മാര്‍ : ശ്രീ. ജോസഫ്‌ തെക്കേടം (ടിജോ), ശ്രീ. ഷാജി തോമസ്‌
കൗണ്‍സില്‍ പ്രതിനിധികള്‍: ശ്രീ.ജിബു ജേക്കബ്ബ്‌, ശ്രീ. റോബിന്‍ പാലക്കുഴിയില്‍ ജോസഫ്‌,
യുകെ കെഎംഎ പ്രതിനിധികള്‍: ശ്രീ. രാജപ്പന്‍ വര്‍ഗീസ്‌, ശ്രീ. പോള്‍ ജോസഫ്‌, ശ്രീ. ബെന്നി വര്‍ഗീസ്‌
പി.ആര്‍.ഒ. ശ്രീ. മാത്യു വര്‍ഗീസ്‌
എക്ടിക്യൂട്ടീവ്‌ അംഗങ്ങള്‍: ശ്രീ. ജയ്‌ തോമസ്‌, ശ്രീ. ജസ്റ്റിന്‍ മാത്യു, ശ്രീ. സ്റ്റാന്‍ലി വര്‍ഗീസ്‌, ശ്രീ.സോളമന്‍ മാത്യു,
ശ്രീ. സാജോ പാപ്പച്ചന്‍ ശ്രീ. ജോര്‍ജ്‌ ദേവസ്സി, ശ്രീ. ജോമോന്‍ മാത്യു, ശ്രീ. ജൈസണ്‍ മാത്യൂ
ഇന്റേണല്‍ ഓഡിറ്റര്‍: ശ്രീ. ജിജോ വെമ്പിള്ളില്‍

അധികാര കൈമാറ്റ ചടങ്ങിനുശേഷം പുതുതായി തിരഞ്ഞെടുക്കപ്പെട്ട ഭാരവാഹികള്‍ക്ക്‌ ഹൃദയപൂര്‍വമായ ആശംസകള്‍ അറിയിച്ചു. ചടങ്ങിന്‌ ശേഷം വിഭവസമൃദ്ധമായ സദൃയില്‍ പങ്കെടുത്ത്‌ സമ്മേളനം വിജയകരമായി സമാപിച്ചു.

കെ.സി.എ – റെഡിച്ചിന്റെ പുതിയ ഭരണസമിതിയ്ക്ക്‌ എല്ലാ അംഗങ്ങള്‍ക്കും ഹൃദയം നിറഞ്ഞ അഭിനന്ദനങ്ങളും ആശംസകളും.

ലണ്ടൻ: ഒരുമയുടെയും സാഹോദര്യത്തിന്റെയും സന്ദേശവുമായി യുകെയിലെ ഇന്ത്യൻ ഓവർസീസ് കോൺഗ്രസ് (ഐഒസി) സംഘടിപ്പിക്കുന്ന ഇഫ്‌താർ മീറ്റ് മാർച്ച് 23 ന് ക്രോയിഡോണിലെ ലണ്ടൻ റോഡ് തോന്റൻഹീത്ത് കെസിഡബ്ല്യൂഎ ഹാളിൽ (CR76AR) നടക്കും. ഐഒസി നാഷണൽ കമ്മിറ്റിയുടെ വൈസ് പ്രസിഡന്റ് ഗുർമിന്ദർ രൺധാവ മുഖ്യ അഥിതിയായി പങ്കെടുക്കുന്ന ചടങ്ങിൽ കേരള ചാപ്റ്റർ പ്രസിഡന്റ് സുജു കെ. ഡാനിയൽ അധ്യക്ഷനാകും. വൈകിട്ട് 5 മണി മുതൽ നടക്കുന്ന സംഗമത്തിൽ കെ.മുനീർ മൗലവി, റവ. സോജു എം തോമസ് എന്നിവർ ഉൾപ്പടെ യുകെയുടെ സാമൂഹിക, സാംസ്‌കാരിക മേഖലകളിൽ നിന്നുള്ള നിരവധി പ്രമുഖർ പങ്കെടുക്കുമെന്ന്‌ വൈസ് പ്രസിഡന്റ് അശ്വതി നായർ പറഞ്ഞു.

മനുഷ്യ മനസുകളെ കോർത്തിണക്കാനും സമൂഹത്തിൽ സ്‌നേഹവും സൗഹാർദ്ദവും നിലനിർത്താനുമാണ് ഇത്തരം ഇഫ്താർ സംഗമങ്ങൾ സംഘടിപ്പിക്കുന്നതെന്ന് കോഓർഡിനേഷൻ കമ്മിറ്റി ഭാരവാഹികളായ അഷ്‌റഫ് അബ്ദുള്ള, അപ്പ ഗഫൂർ, ജോർജ്ജ് ജോസഫ് എന്നിവർ പറഞ്ഞു.

രജിസ്ട്രേഷനും കൂടുതൽ വിവരങ്ങൾക്കും

സുജു കെ. ഡാനിയേൽ – +447872129697, അശ്വതി നായർ – +447305815070, അഷ്‌റഫ്‌ അബ്ദുള്ള – +447868519721, അപ്പ ഗഫൂർ – +447534499844, ജോർജ് ജോസഫ് – +447954414478 എന്നിവരെ ബന്ധപ്പെടാവുന്നതാണ്.

ഇഫ്താർ മീറ്റ് നടക്കുന്ന ഹാളിന്റെ വിലാസം : KCWA TRUST HALL, 505 LONDON ROAD, THORNTON HEATH, CR7 6AR

ജീവിതത്തിന്റെ എല്ലാവാതിലുകളും അടഞ്ഞപ്പോൾ തന്റെ രണ്ടുപെൺമക്കളെയും കൂട്ടിപ്പിടിച്ചു ഏറ്റുമാനൂരിൽ ട്രെയിനിനു മുൻപിൽ ജീവൻ വെടിഞ്ഞ ചുങ്കം സ്വദേശി ഷൈനിയുടെ തൊടുപുഴ , ചുങ്കം ,തട്ടാരത്തട്ട പുലരി കുടുംബശ്രീ യൂണിറ്റിൽ നിന്നും കടം എടുത്ത തുകയിൽ ബാക്കിയായ 95,225 രൂപ ഇടുക്കി ചാരിറ്റി ഗ്രൂപ്പ് നൽകാമെന്ന് ഞങ്ങൾ അവരെ അറിയിച്ചിരുന്നു. അതിന്റെ അടിസ്ഥാനത്തിൽ കുടുംബശ്രീ യൂണിറ്റിന്റെ പ്രസിഡന്റ് അശ്വതി അജിമോൻ അയച്ചു തന്ന ഷൈനിയുടെ കടവിവരണ ലെറ്റർ താഴെ പ്രസിദ്ധികരിക്കുന്നു ദയവായി സഹായിക്കുക .

ഷൈനി ചുങ്കത്തുനിന്നും ഏറ്റുമാനൂരിലെ വീട്ടിലേക്കു പോകുന്നതിനു മുൻപ് നോബിയുടെ കുടുംബത്തിനു വേണ്ടി വാങ്ങിയ പണം തിരിച്ചടക്കാൻ നോബിയുടെ കുടുംബം തയ്യാറാകാതിരിക്കുകയും അതിനു ശേഷം കുടുംബ ശ്രീ പ്രസിഡന്റ് ഷൈനിയോട് സംസാരിക്കുന്ന വോഡിയോ നിങ്ങൾ കേട്ടിട്ടുണ്ടാകും എന്ന് വിചാരിക്കുന്നു ,ഈ കടവും ഷൈനിയുടെ മരണത്തിനു കാരണമായിട്ടുണ്ട്. അതുകൊണ്ടു പാവപ്പെട്ട കുടുംബശ്രീക്കാരുടെ പണം നഷ്ടപ്പെടാതിരിക്കാനാണ് ഞങ്ങൾ ഇങ്ങനെ ഒരു ഉദ്യമത്തിന് ഇറങ്ങിയത് . ദയവായി സഹായിക്കുക .

നിങ്ങളുടെ സഹായങ്ങൾ താഴെകാണുന്ന ഇടുക്കി ചാരിറ്റി ഗ്രൂപ്പിന്റെ അക്കൗണ്ടിൽ ;നൽകുക .

ഇടുക്കി ചാരിറ്റിക്കു നേതൃത്വ൦കൊടുക്കുന്നത് സാബു ഫിലിപ്പ് 07708181997 ടോം ജോസ് തടിയംപാട് 07859060320 സജി തോമസ്‌ 07803276626.. .എന്നിവരാണ് .ഞങ്ങളുടെ രക്ഷാധികാരി ബഹുമാനപ്പെട്ട തമ്പി ജോസാണ്‌ .

ദാരിദ്രൃം എന്തെന്നറിഞ്ഞവർക്കെ പാരിൽ പരക്ലേശവിവേകമുള്ളു.””,

ACCOUNT NAME , IDUKKI GROUP
ACCOUNT NO 50869805
SORT CODE 20-50.-82
BANK BARCLAYS.

കൈരളി യൂ കെ യുടെ സതാംപ്ടൺ പോർട്സ് മൗത് യൂണിറ്റിന്റെ മൂന്നാമത് സംഗീത നൃത്തസന്ധ്യയുടെ ഒരുക്കങ്ങൾ പൂർത്തിയായി. സതാംപ്ടൺ വിക്ക്ഹാം (Wickham Community Center)കമ്യൂണിറ്റി സെന്റർ ഹാളിൽ വെച്ച് നടക്കുന്ന പരിപാടി കൈരളി യു കെ യുടെ ദേശീയ സെക്രട്ടറി കുര്യൻ ജേക്കബ് ഉദ്ഘാടനം ചെയ്യും പ്രസ്തുത ചടങ്ങിൽ മുഖ്യ അതിഥി ആയി ആർ.സി.എൻ പ്രസിഡന്റ്‌ ബിജോയ്‌ സെബാസ്റ്റ്യൻ പങ്കെടുക്കും. യു കെ യുടെ വിവിധ മേഖലകളിൽ നിന്ന് മലയാളി സമൂഹത്തിന്റെ അകമഴിഞ്ഞ പ്രോത്സാഹനമാണ് ഈ പരിപാടിക്ക് ലഭിച്ചുകൊണ്ടിരിക്കുന്നത്.

യു കെ യുടെ വിവിധ ഭാഗങ്ങളിൽ നിന്ന് എത്തുന്ന 200 ൽ പരം കലാ പ്രതിഭകൾ അണിയിച്ചൊരുക്കുന്ന ദൃശ്യ വിസ്മയങ്ങൾ ആണ് ഈ പരിപാടിയുടെ പ്രധാന ആകർഷണം. വൈകുന്നേരം 2 മണിക്ക് ആരംഭിക്കുന്ന കലാപരിപാടികൾ ഗാനസന്ധ്യയോടെ രാത്രി 10 മണിക്ക് അവസാനിക്കും. പരിപാടിയിൽ യു കെ യുടെ വിവിധ പ്രദേശങ്ങളിൽ നിന്നുള്ള കലാ സാംസ്‌കാരിക പ്രവർത്തകർ പങ്കെടുക്കും. ഈ മനോഹരമായ കലാ വിരുന്ന് ആസ്വദിക്കുന്നതിന് യു കെ യിലെ മുഴുവൻ കലാ ആസ്വാദകരേയും ഹാർദവമായി സ്വാഗതം ചെയ്യുന്നതായി സംഘാടകർ അറിയിച്ചു.