ന്യൂസ് ഡെസ്ക് മലയാളം യുകെ

കേരളത്തിൽ ആയിരുന്നപ്പോൾ ഉള്ള പുൽക്കൂട് നിർമ്മാണവും വീട് വീടാന്തരം കയറിയുള്ള കരോളും ഒക്കെ ക്രിസ്മസ് ദിനങ്ങളിൽ പല യു കെ മലയാളികളുടെയും മനസ്സിൽ ഗൃഹാതുരത്വം നിറഞ്ഞുനിൽക്കുന്ന ഓർമ്മകളാണ്. പണ്ടൊക്കെ ക്രിസ്മസ് അവധിക്കാലത്ത് പ്രധാന പരിപാടി പനയോലയും തെങ്ങോലയും വൈക്കോലും മേഞ്ഞുണ്ടാക്കുന്ന പുൽക്കൂടുകളായിരുന്നു. ഇന്ന് കടകളിലും ഓൺലൈൻ ആയിട്ടും മേടിക്കുന്ന പുൽക്കൂടുകൾ ആണ് ഭൂരിഭാഗവും ഉപയോഗിക്കുന്നത്. തനതായ രീതിയിൽ ക്രിയാത്മകമായി ഓരോ വീടുകളിലും കുടുംബാംഗങ്ങൾ ഒരുമിച്ച് ഉണ്ടാക്കുന്ന ക്രിസ്മസ് പുൽക്കൂടിന്റെ മനോഹാരിത ഒന്നു വേറെ തന്നെയായിരുന്നു.

എൻഎച്ച്എസിലെ ജോലിത്തിരക്കിനിടയിലും മനോഹരമായ പുൽക്കൂട് ഉണ്ടാക്കി ശ്രദ്ധ നേടിയിരിക്കുകയാണ്. ലീഡ്സിൽ നിന്നുള്ള ബിനോയി ജേക്കബും ഭാര്യ ക്ലിന്റ് സെബാസ്റ്റ്യനും . നാട്ടിലായിരുന്നപ്പോൾ വീട്ടിലും തൻ്റെ ഇടവകയായ അറുമാനൂർ മംഗള വാർത്ത പള്ളിയിലും ക്രിസ്മസ് കാലത്ത് പുൽക്കൂടുകൾ ഉണ്ടാക്കുന്ന പതിവ് യുകെയിലെത്തിയിട്ടും തുടർന്നതിന്റെ സന്തോഷത്തിലാണ് ബിനോയി . രണ്ടര വർഷം മുമ്പ് യുകെയിലെത്തിയ ബിനോയി വാടക വീട്ടിലായിരുന്നു താമസിച്ചിരുന്നത്. സ്ഥലപരുമിതി കൊണ്ട് ചെറിയ പുൽക്കൂട് കഴിഞ്ഞവർഷം ബിനോയി നിർമ്മിച്ചിരുന്നു. എന്നാൽ ഈ വർഷം സ്വന്തം വീട് വാങ്ങിച്ച് താമസം തുടങ്ങിയ ബിനോയി വീടിന്റെ ഒരു മുറി മുഴുവനായും തൻറെ മനസിനിണങ്ങിയ രീതിയിലുള്ള പുൽക്കൂട് സജ്ജീകരിച്ചിരിക്കുകയാണ്.

തദ്ദേശീയമായി ലഭിച്ച വസ്തുക്കളാണ് പുൽക്കൂടിന്റെ നിർമ്മിതിക്കായി ഉപയോഗിച്ചിരിക്കുന്നത്. പ്രധാനമായും കാർഡ്ബോർഡ് ആണ് നിർമ്മാണ വസ്തു . കൂടാതെ മെറ്റലും ചരലും മുളയും ബിനോയിയുടെ കരവിരുതും കൂടി ചേർന്നപ്പോൾ യുകെയിലെ തന്നെ ഏറ്റവും മനോഹരമായ പുൽക്കൂടായി ഈ ലീഡ്സ് മലയാളിയുടേത്.

ഇയർ ത്രീയിൽ പഠിക്കുന്ന എയിഡനും എട്ട് മാസം മാത്രം പ്രായമുള്ള ഡാനിയേലുമാണ് ബിനോയ് ക്ലിൻറ് ദമ്പതികൾക്ക് ഉള്ളത്. തന്നെ പുൽക്കൂട് നിർമ്മിതിയിൽ ഏറ്റവും കൂടുതൽ സഹായിച്ചത് ഭാര്യ ക്ലിൻറും മകൻ എയ്ഡനും ആണെന്ന് ബിനോയി മലയാളം യുകെ ന്യൂസിനോട് പറഞ്ഞു.

കേരളത്തിൽ കോട്ടയത്തിനടുത്തുള്ള അറുമാനൂർ ആണ് ബിനോയിയുടെ സ്വദേശം . ബിനോയിയും ക്ലിന്റും ചാപ്പൽ അലർട്ടൺ ഹോസ്പിറ്റലിലാണ് ജോലി ചെയ്യുന്നത്. പലപ്പോഴും ജോലികഴിഞ്ഞ് രാത്രി 2:00 മണി വരെ നീണ്ടുനിൽക്കുന്നതായിരുന്നു ബിനോയിയുടെ പുൽക്കൂട് നിർമ്മാണം .

ലീഡ്‌സിലെ LS -9 – ൽ താമസിക്കുന്ന ബിനോയിയും കുടുംബവും സെന്റ് മേരീസ് ആന്റ് . സെന്റ് വിൽഫ്രഡ് ഇടവകാംഗങ്ങളാണ്. പള്ളിയിലെ മെൻഫോറം പ്രസിഡന്റ്, ലീഡ്സ് മലയാളി അസോസിയേഷൻ സെക്രട്ടറി എന്നീ നിലകളിലും സാമൂഹ്യ സാംസ്കാരിക മേഖലകളിൽ സജീവമായി ഇടപെടുന്ന വ്യക്തിയാണ് ബിനോയി. ഒട്ടേറെ മലയാളികളും ഇംഗ്ലീഷുകാരുമുൾപ്പെടെയുള്ള സുഹൃത്തുക്കളാണ് ബിനോയിയുടെ കരവിരുതിൽ തീർത്ത പുൽക്കൂടു കാണാനായി എത്തിക്കൊണ്ടിരിക്കുന്നത്.

ന്യൂസ് ഡെസ്ക് മലയാളം യുകെ

ക്രിസ്ത്യൻ മത വിശ്വാസികളുടെ എണ്ണം ബ്രിട്ടനിൽ കുറഞ്ഞു കൊണ്ടിരിക്കുകയാണ്. എന്നാൽ കേരളത്തിൽ നിന്നുള്ള ക്രിസ്ത്യൻ മത വിശ്വാസികളുടെ എണ്ണം യുകെയിൽ കൂടി വരികയും ചെയ്യുന്നു . കേരള നസ്രാണി ക്രിസ്ത്യാനികളുടെ യുകെയിലെ വളർച്ചയെക്കുറിച്ച് വൻ പ്രാധാന്യത്തോടെ വാർത്ത നൽകിയിരിക്കുകയാണ് ബ്രിട്ടനിലെ പ്രമുഖ മാധ്യമമായ ദി ഗാർഡിയൻ പത്രം. യുകെയിലെ കേരള ക്രൈസ്തവരെ കുറിച്ച് വാർത്ത പ്രസിദ്ധീകരിക്കുമ്പോൾ ഇത് മലയാളം ന്യൂസിനും അഭിമാനത്തിന്റെ നിമിഷങ്ങളാണ്. ഗാർഡിയൻ പത്രത്തിന്റെ വാർത്തയിൽ ഉടനീളം നിറഞ്ഞു നിൽക്കുന്ന ഫാ. ഹാപ്പി ജേക്കബ്ബ് മലയാളം യുകെ ന്യൂസിന്റെ സ്പിരിച്വൽ വിഭാഗത്തിൽ പ്രസിദ്ധീകരിച്ച നിരവധി ലേഖനങ്ങളിലൂടെ ലോകമെങ്ങുമുള്ള വായനക്കാരുടെ ഹൃദയത്തിലേയ്ക്ക് ദൈവപരിപാലനയുടെ നെയ്ത്തിരികൾ തെളിയിച്ച അനുഗ്രഹീത എഴുത്തുകാരൻ ആണ് . യോർക്ക്‌ഷെയറിലെ ഹാരോഗേറ്റിൽ താമസിക്കുന്ന അച്ചൻ സെന്റ് തോമസ് ഇന്ത്യൻ ഓർത്തഡോക്സ് ചർച്ച് ലിവർപൂളിൻെറ വികാരിയും 2022 -ലെ സ്പിരിച്വൽ റൈറ്ററിനുള്ള മലയാളം യുകെ ന്യൂസിന്റെ അവാർഡ് ജേതാവും ആണ് .

2022 – ൽ ലിവർപൂളിൽ സെൻറ് തോമസ് ഇന്ത്യൻ ഓർത്തഡോക്സ് ചർച്ച് ആരംഭിച്ചപ്പോൾ 60 കുടുംബങ്ങൾ മാത്രമാണ് ഉണ്ടായിരുന്നതെന്ന് വികാരിയായ ഫാ. ഹാപ്പി ജേക്കബനെ ഉദ്ധരിച്ച് ഗാർഡിയൻ റിപ്പോർട്ട് ചെയ്യുന്നു. എന്നാൽ വർഷങ്ങൾ കഴിഞ്ഞപ്പോൾ പള്ളിയിൽ വരുന്ന കുടുംബാംഗങ്ങളുടെ എണ്ണത്തിൽ വൻ വർദ്ധനവ് ആണ് ഉണ്ടായിരിക്കുന്നത്. നിലവിൽ ഇവിടെ മാത്രം 110 കുടുംബങ്ങൾ ഉണ്ട് . പ്രധാനമായും എൻഎച്ച്എസിലെ ജീവനക്കാരും അവരുടെ കുടുംബാംഗങ്ങളും കേരളത്തിൽ നിന്നുള്ള വിദ്യാർത്ഥികളും ഉൾപ്പെടുന്നതാണ് ഇടവക സമൂഹം .

ബ്രിട്ടനിൽ ഉടനീളം ഇതാണ് സ്ഥിതി. ലിവർപൂൾ മുതൽ ലണ്ടൻ വരെയും , പ്രെസ്റ്റൺ മുതൽ ബ്രിസ്റ്റോൾ വരെയും ഒട്ടേറെ പുതിയ പള്ളികളാണ് മലയാളികളുടെ നേതൃത്വത്തിൽ പുതിയതായി സ്ഥാപിക്കപ്പെട്ടത്. എന്നാൽ ക്രിസ്തുമതത്തിന്റെ യുകെയിലെ പൊതുവായ സ്ഥിതി ഇതല്ല . ഏറ്റവും പുതിയ സെൻസസ് അനുസരിച്ച് ഇംഗ്ലണ്ടിലും വെയിൽസിലും ക്രിസ്തുമത അനുയായികളുടെ എണ്ണത്തിൽ വൻ കുറവാണ് വന്നിരിക്കുന്നത്. തദ്ദേശീയരായ ക്രിസ്ത്യാനികളുടെ എണ്ണം 2011 -ൽ 59.3% ആയിരുന്നെങ്കിൽ 2021 – ൽ അത് 46.2% ആയി കുറഞ്ഞു. എന്നാൽ ഇതേ കാലയളവിൽ ഇന്ത്യൻ ക്രിസ്ത്യാനികളുടെ എണ്ണം യുകെയിൽ കുതിച്ചുയർന്നതായി കണക്കുകൾ കാണിക്കുന്നു.

ഇന്ത്യൻ ക്രിസ്ത്യാനികളുടെ എണ്ണം 2011 -ൽ 135,988 ആയിരുന്നത് 2021-ൽ 225,935 ആയി ഉയർന്നു. സീറോ മലബാർ സഭയുടെ കീഴിൽ ഗ്രേറ്റ് ബ്രിട്ടൻ രൂപത സ്ഥാപിച്ചത് യുകെയിലെ നസ്രാണി സഭയുടെ വളർച്ചയ്ക്ക് നിർണ്ണായക സ്ഥാനമാണ് വഹിച്ചത് . ലീഡ്സിലെ സെന്റ് മേരീസ് ആൻഡ് സെൻറ് വിൽഫ്രഡ് ചർച്ച് ഉൾപ്പെടെ നിരവധി പള്ളികളാണ് മലയാളികളുടെ പ്രയത്നത്തിന്റെ ഫലമായി യുകെയിൽ നിലവിൽ വന്നത് . തങ്ങളുടെ കുട്ടികളെ കേരളത്തിലെ ആരാധനാ പാരമ്പര്യത്തിലും വേദപാഠ ക്ലാസുകളിലും പങ്കെടുപ്പിക്കുന്നതിനും മലയാളികൾ കടുത്ത നിഷ്കർഷ ആണ് പുലർത്തുന്നത്.

കേരളത്തിൽനിന്ന് സ്റ്റുഡൻറ് വിസയിൽ എത്തുന്ന വിദ്യാർത്ഥികളിൽ ഭൂരിപക്ഷവും ക്രിസ്ത്യൻ മതവിശ്വാസത്തിൽ പെട്ടവരാണെന്നതും യുകെയിലെ മലയാളി ക്രിസ്ത്യൻ വിഭാഗത്തിന്റെ എണ്ണം വർധിക്കുന്നതിന് കാരണമായി ചൂണ്ടിക്കാണിക്കപ്പെടുന്നുണ്ട്.

ക്രിസ്തുമസിനോടും ഈസ്റ്ററിനോടും അനുബന്ധിച്ചുള്ള നോയമ്പുകാലത്ത് ഫാ. ഹാപ്പി ജേക്കബ് അച്ചൻ മലയാളം യുകെ ന്യൂസിൽ വർഷങ്ങളായി എഴുതുന്ന പ്രതിവാര ചിന്തകൾ വായനക്കാരുടെ പ്രിയ
പംക്തിയാണ്.

ഈ വർഷത്തെ മികച്ച നേഴ്സിനുള്ള മലയാളം യുകെയുടെ അവാർഡ് ജേതാവ് റ്റിൻസി ജോസിന്റെ ജീവിതവും സേവനങ്ങളെയും കുറിച്ച് ബിബിസി വാർത്ത പ്രസിദ്ധീകരിചിരുന്നു. മലയാളം യുകെയുടെ അവാർഡ് ജേതാവ് എന്ന് എടുത്തു പറയുന്ന വാർത്തയിൽ കേരളത്തെക്കുറിച്ചും മലയാളത്തെക്കുറിച്ചും പരാമർശമുണ്ടായിരുന്നു

ന്യൂസ് ഡെസ്ക് മലയാളം യുകെ

കാർ പാർക്കിങ് ഫീസ് ഇനത്തിൽ മാത്രം യുകെയിലെ വിവിധ എൻഎച്ച്എസ് ട്രസ്റ്റുകൾ രോഗികളിൽ നിന്നും സന്ദർശകരിൽ നിന്നും നേടിയത് 146 മില്യൺ പൗണ്ട്. 2022–23 -ലെ മാത്രം കണക്കുകൾ അനുസരിച്ചാണ് 146 മില്യൺ പൗണ്ട് നൽകിയതായി കണ്ടെത്തിയത്. കോവിഡ് കാലത്ത് പാർക്കിങ് ഫീസുകൾ എട്ട് ഇരട്ടിയോളം കൂട്ടിയിരുന്നു. ഇതിന് ശേഷമാണ് ഇത്രത്തോളം തുക പാര്‍ക്കിങ് ഫീസ് ഇനത്തിൽ ട്രസ്റ്റുകൾക്ക് ലഭ്യമാകാൻ തുടങ്ങിയത്. മുൻവർഷത്തെ അപേക്ഷിച്ച് ഈ വർഷം ഏകദേശം 96.7 മില്യൺ പൗണ്ടാണ് ഈ ഇനത്തിൽ അധിക വരുമാനമായി വന്നിരിക്കുന്നത്.

യൂണിവേഴ്‌സിറ്റി ഹോസ്പിറ്റല്‍ കവന്ററിയും വാര്‍വിക്ക്ഷയര്‍ എന്‍എച്ച്എസ് ട്രസ്റ്റുമാണ് രോഗികളുടെയും സന്ദര്‍ശകരുടെയും പാര്‍ക്കിങ് ഫീസ് ഇനത്തില്‍ ഏറ്റവും ഉയര്‍ന്ന വരുമാനം നേടിയത്. തൊട്ട് പിന്നിൽ തന്നെ ഡെര്‍ബി യൂണിവേഴ്‌സിറ്റി ഹോസ്പിറ്റല്‍സ്, ബര്‍ടണ്‍ എന്‍എച്ച്എസ് ഫൗണ്ടേഷന്‍ ട്രസ്റ്റ് തുടങ്ങിയവയും ഉണ്ട്. കണക്കുകളിൽ നിന്ന് ആശുപത്രി ജീവനക്കാര്‍ക്കും കാര്‍ പാര്‍ക്കിങ് ഫീസില്‍ നിന്ന് ഇളവുകളില്ലെന്ന് മനസിലാക്കാം.

2021–22 -ൽ 5.6 മില്യൺ പൗണ്ടായിരുന്ന പാര്‍ക്കിങ് ഫീസ് 2022–23 ആയതോടെ 46.7 മില്യൺ പൗണ്ടിലേയ്ക്കാണ് കുതിച്ചു ചാടിയിരിക്കുന്നത്. കോവിഡിൻെറ കാലയളവിൽ ജീവനക്കാരുടെ പാർക്കിംഗ് ഫീസുകൾ റദ്ധാക്കിയെങ്കിലും 2023 മാര്‍ച്ചില്‍ ഇവ പുനരാരംഭിച്ചിരുന്നു. നിലവിലെ എന്‍എച്ച്എസ് നിയമങ്ങൾ പ്രകാരം അംഗവൈകല്യമുള്ളവര്‍, രാത്രിയില്‍ തങ്ങാനായി എത്തുന്ന രോഗം ബാധിച്ച കുട്ടികളുടെ മാതാപിതാക്കള്‍, രാത്രി ഷിഫ്റ്റില്‍ പ്രവേശിക്കുമ്പോള്‍ എത്തുന്ന ജീവനക്കാർ എന്നിവർക്കാണ് പാര്‍ക്കിങ് സൗജന്യം. അതേസമയം എല്ലാവർക്കും പാർക്കിങ് ഫീസ് സൗജന്യം ആക്കണം എന്ന ആവശ്യം ഉയർന്നു വരുന്നുണ്ട്. ഫീസ് റദ്ദാക്കുമെന്ന് കൺസർവേറ്റീവ് പാർട്ടിയുടെ പ്രകടനപത്രികയില്‍ വാഗ്ദാനം ചെയ്‌തെങ്കിലും ഇത് പാലിക്കാന്‍ സർക്കാരിന് ഇതുവരെ സാധിച്ചിട്ടില്ല.

ന്യൂസ് ഡെസ്ക് മലയാളം യുകെ

കവന്‍ട്രിയിൽ മലയാളികളുടെ വീടുകളെ ലക്ഷ്യം വച്ച് വൻ മോഷണം നടന്നു. ക്രിസ്‌തുമസ്‌ അനുബന്ധമായ ചടങ്ങുകൾക്കായി വീട്ടുകാർ ഒന്നടങ്കം പള്ളിയിൽ ആയിരിക്കുന്ന സമയമാണ് മോഷണം അരങ്ങേറിയത്. ചില വീടുകളിലെ താക്കോൽ കൈവശമാക്കിയാണ് മോഷണം നടത്തിയത്. മോഷ്ടാക്കൾക്ക് എടുക്കാൻ പാകത്തിൽ താക്കോൽ സൂക്ഷിച്ചത് കള്ളന്മാരുടെ ജോലി എളുപ്പമാക്കി. എന്നാൽ താക്കോൽ എടുക്കാൻ പറ്റാതിരുന്ന വീടുകളുടെ ചില്ലുകൾ തകർത്താണ് മോഷണം നടത്തിയത്. വീടുകളെ കുറിച്ചും താമസക്കാരെ കുറിച്ചും വ്യക്‌തമായ ധാരണ ഉള്ളവരാണ് മോഷണം നടത്തിയത് എന്ന അനുമാനമാണ് പോലീസ് പങ്കുവയ്ക്കുന്നത്.

ഏഷ്യൻ വംശജരുടെ വീടുകളിൽ സ്വർണവും പണവും വ്യാപകമായി സൂക്ഷിച്ചിട്ടുണ്ടാകാമെന്ന ധാരണയുടെ പുറത്താണ് മലയാളികൾ ഉൾപ്പെടെയുള്ളവരുടെ വീടുകളിൽ മോഷണം പതിവാകുന്നതിൻെറ കാരണമായി ചൂണ്ടിക്കാണിക്കപ്പെടുന്നത്. സമാനമായ രീതിയിലുള്ള മുന്നറിയിപ്പ് പോലീസ് നേരത്തെ നൽകിയിരുന്നു. കവന്‍ട്രിയിൽ കഴിഞ്ഞ ദിവസം മലയാളികളെ കൂടാതെ ഒരു പഞ്ചാബിയുടെ വീട്ടിലും മോഷണം നടന്നിരുന്നു. മോഷണ ശ്രമത്തിനിടയ്ക്ക് വ്യാപകമായ രീതിയിൽ മറ്റു സാധനങ്ങൾ നശിപ്പിക്കാനും മോഷ്ടാക്കൾ ശ്രമിച്ചിട്ടുണ്ട്. വില കുറഞ്ഞ വീട്ടുസാധങ്ങൾ വരെ മോഷ്ടിച്ചതോടെ പ്രാദേശിക തലത്തിലുള്ളവരാണ് മോഷണത്തിന് പിന്നിൽ എന്നാണ് അനുമാനിക്കപ്പെടുന്നത്.

മലയാളികളെ കേന്ദ്രികരിച്ചുള്ള മോഷണ ശ്രമത്തിൻെറ ഒട്ടേറെ വാർത്തകൾ മലയാളം യുകെ ന്യൂസ് നേരത്തെ പ്രസിദ്ധീകരിച്ചിരുന്നു. വാഹനങ്ങളുടെ മുൻഭാഗം അഴിച്ചെടുത്ത് മോഷ്ടിക്കുന്ന സംഘങ്ങളും ഇപ്പോൾ സജീവമാണ്. വിലകൂടിയ കാറുകളുടെ മുൻഭാഗവും, ബമ്പർ എന്നിങ്ങനെ വിവിധ പാർട്സുകൾ മോഷ്ടിച്ച് 4000 പൗണ്ടിനു വരെ മറിച്ചു വിൽക്കലാണ് ഇത്തരം മോഷ്ടാക്കൾ ചെയ്യുന്നത് . ബർമിംഗ്ഹാമിൽ മലയാളികളുടെ നിരവധി വാഹനങ്ങൾ സമാനമായ സാഹചര്യത്തിൽ മോഷണം പോയിരുന്നു. പേര് വെളിപ്പെടുത്താൻ ആഗ്രഹിക്കാത്ത ഒരു യുകെ മലയാളിയുടെ വാഹനത്തിന്റെ കീ മോഷണം പോയ വാർത്ത നേരത്തെ മലയാളം യുകെ പ്രസിദ്ധീകരിച്ചിരുന്നു . വാഹനത്തിൻറെ കീയ്ക്ക് ഇൻഷുറൻസ് ഇല്ലാത്തതിനാൽ ഡ്യൂപ്ലിക്കേറ്റ് കീയ്ക്ക് വേണ്ടി 1500 പൗണ്ട് ചിലവഴിക്കേണ്ടതായി വന്നുവെന്ന് അദ്ദേഹം മലയാളം യുകെ ന്യൂസിനോട് പറഞ്ഞു. ഇൻഷുറൻസ് പരിരക്ഷ കിട്ടാത്ത സാഹചര്യങ്ങളിൽ വൻ നഷ്ടങ്ങളാണ് ഓരോ മോഷണത്തിലൂടെയും സംഭവിക്കുന്നത്.

വാഹനത്തിന് പുറമെ, സ്വർണ്ണം, വിലപിടിപ്പുള്ള മറ്റ് വസ്തുക്കൾ എന്നിവയെ സംബന്ധിച്ചും അധികൃതർ മുന്നറിയിപ്പ് നൽകിയിട്ടുണ്ട്. ഏത് സാധനം മോഷ്ടിക്കപ്പെട്ടാലും ഇൻഷുറൻസ് ഇല്ലെങ്കിൽ ക്ലെയിം തുക ലഭിക്കില്ല. അതിനാൽ, എല്ലാ വസ്തുക്കളും ഇൻഷുറൻസ് രജിസ്റ്റർ ചെയ്യുകയും, നിർബന്ധമായും ഇതിന്റെ എല്ലാം ഫോട്ടോകളും സൂക്ഷിക്കുകയും വേണം. പോലീസ് അന്വേഷണം നടത്തുമ്പോൾ ഫോട്ടോകൾ ഇല്ലെങ്കിൽ മതിയായ ഇൻഷുറൻസ് പരിരക്ഷ കിട്ടാൻ ബുദ്ധിമുട്ടാണ്. ബ്രെക്സിറ്റിന് ശേഷം ജീവിത ചിലവ് ഉയരുകയും, ജോലി നഷ്ടപ്പെടുന്ന ആളുകളുടെ എണ്ണം കൂടുകയും ചെയ്തതാണ് മോഷണത്തിലേയ്ക്ക് കൂടുതൽ ആളുകളെ നയിക്കുന്നതിന്റെ പ്രധാന കാരണമെന്നാണ് പൊതുവെ വിലയിരുത്തപ്പെടുന്നത്. ക്രിസ്തുമസ് ദിനങ്ങൾ ആയതിനാൽ മലയാളികളുടെ വീടുകളിൽ ആളുകൾ ഇല്ലെന്ന കാരണത്താൽ ഈ ദിവസങ്ങളിൽ മോഷണകേസുകൾ റിപ്പോർട്ട്‌ ചെയ്യുന്നത് വർദ്ധിക്കാൻ സാധ്യതയുണ്ട്.

ന്യൂസ് ഡെസ്ക് മലയാളം യുകെ

2024 -ൽ വീടുകളുടെ വില വീണ്ടും കുറയുമെന്ന റിപ്പോർട്ടുകൾ പുറത്തുവന്നു. വീടുകളുടെ വില 5 % കുറയാനുള്ള സാധ്യതയാണ് ഈ രംഗത്തെ വിദഗ്ധർ പ്രവചിക്കുന്നത്. എന്നാൽ വാടക ചിലവുകളിൽ 5 മുതൽ 6 ശതമാനം വർദ്ധനവാണ് പ്രതീക്ഷിക്കുന്നത്.

കടുത്ത സാമ്പത്തിക മാന്ദ്യം മൂലം വീട് മേടിക്കാനാഗ്രഹിക്കുന്നവരുടെ സാമ്പത്തിക ഭദ്രതയിൽ കനത്ത ഇടിവ് നേരിട്ടതാണ് വീടുകളുടെ വില കുറയുവാനുള്ള പ്രധാന കാരണമായി ചൂണ്ടിക്കാണിക്കപ്പെടുന്നത് . സുരക്ഷിതമല്ലാത്ത സമ്പദ് വ്യവസ്ഥ വീട് വാങ്ങാനോ മാറാനോ ആഗ്രഹിക്കുന്ന ആളുകളുടെ ആത്മവിശ്വാസം കുറച്ചേക്കാനുള്ള സാധ്യതയുണ്ട്. ഇതിന് പുറമെയാണ് ഉയർന്ന മോർട്ട് ഗേജ് നിരക്കുകൾ . അടുത്ത 12 മാസത്തിനുള്ളിൽ 1.6 ദശലക്ഷം വീട്ടുടമസ്ഥർക്ക് അവരുടെ നിലവിലെ ഫിക്സഡ് റേറ്റ് ഡീലുകൾ മാറുന്നത് മൂലം പ്രതിമാസം തിരിച്ചടവ് കുത്തനെ ഉയരും .

വില കുറയുന്നത് വീട് മേടിക്കാൻ ആഗ്രഹിക്കുന്ന യുകെ മലയാളികൾക്ക് സഹായകരമാണെന്നാണ് പ്രത്യക്ഷത്തിൽ വിലയിരുത്തുന്നത്. എന്നാൽ മാറിയ കുടിയേറ്റ നയത്തിന്റെ പശ്ചാത്തലത്തിൽ നേഴ്സുമാർ ഒഴികെയുള്ള മലയാളികൾക്ക് യുകെ യോടുള്ള അഭിനിവേശം കുറഞ്ഞിട്ടുണ്ട്. കെയർ വിസയിൽ എത്തിയവർക്ക് ആശ്രിത വിസയിൽ കുടുംബാംഗങ്ങളെ കൊണ്ടുവരാൻ സാധിക്കാത്തതും വിദ്യാർത്ഥി വിസയിൽ എത്തുന്നവർക്കുള്ള കടുത്ത നിയന്ത്രണങ്ങളും യുകെയിൽ വീട് മേടിക്കുന്നതിൽ നിന്ന് ഒട്ടുമിക്ക മലയാളികളെയും പിന്തിരിപ്പിക്കുമെന്നാണ് പലരും മലയാളം യുകെ ന്യൂസിനോട് അഭിപ്രായപ്പെട്ടത്.

ന്യൂസ് ഡെസ്ക് മലയാളം യുകെ

ഇന്ന് രാജ്യത്ത് ഗെറിറ്റ് കൊടുങ്കാറ്റ് വീശിയടിക്കുമെന്ന് കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നൽകി . യുകെയിൽ ഉടനീളം കൊടുങ്കാറ്റ് വീശാൻ സാധ്യതയുണ്ടെന്നാണ് റിപ്പോർട്ടുകൾ . അതുകൊണ്ട് തന്നെ വാഹനം ഓടിക്കുന്നവർ കരുതിയിരിക്കണമെന്ന മുന്നറിയിപ്പ് രാജ്യത്തുടനീളം നൽകപ്പെട്ടിട്ടുണ്ട്.

കൊടുങ്കാറ്റിനോട് അനുബന്ധിച്ച് കനത്ത മഴയും മഞ്ഞും ഉണ്ടാകാനുള്ള സാധ്യതയും ഉണ്ട് . അപകടകരമായ സാഹചര്യം നിലനിർത്തി യാത്രകൾക്ക് സാധാരണ എടുക്കുന്നതിലധികം സമയം എടുക്കുന്നതിനുള്ള സാഹചര്യം നിലവിലുണ്ടെന്ന് എ എ മുന്നറിയിപ്പ് നൽകിയിട്ടുണ്ട് . ഉയർന്ന പ്രദേശങ്ങളിൽ മണിക്കൂറിൽ 70 മൈൽ വേഗതയിൽ കാറ്റ് വീശിയേക്കാമെന്നാണ് കാലാവസ്ഥ നിരീക്ഷണ കേന്ദ്രം അറിയിച്ചിരിക്കുന്നത്.

ഇംഗ്ലണ്ടിന്റെ തെക്കൻ തീരങ്ങളിലും വടക്ക് പടിഞ്ഞാറൻ ഇംഗ്ലണ്ടിലും വെയിൽസിലും സ്കോട്ട് ലൻഡിന്റെ ഭൂരിഭാഗം പ്രദേശങ്ങളിലും വടക്കൻ അയർലണ്ടിലും യെല്ലോ അലർട്ട് പ്രഖ്യാപിച്ചിട്ടുണ്ട്. പല പ്രദേശങ്ങളിലും കനത്ത മഴയും പ്രതീക്ഷിക്കുന്നുണ്ട്. വടക്കൻ അയർലണ്ടിലെ ചില ഭാഗങ്ങളിൽ 60 മില്ലി മീറ്ററും വെയിൽസിലെ ഉയർന്ന പ്രദേശങ്ങളിൽ 90 മീറ്റർ വരെയും മഴ പെയ്തേക്കും . സെപ്റ്റംബറിൽ ആരംഭിച്ച് അടുത്തവർഷം ഓഗസ്റ്റിൽ അവസാനിക്കുന്ന കാലാവസ്ഥാ സീസണിലെ ഏഴാമത്തെ കൊടുങ്കാറ്റ് ആണ് ഗെറിറ്റ് കൊടുങ്കാറ്റ് .

ന്യൂസ് ഡെസ്ക് മലയാളം യുകെ

ഈ ക്രിസ്‌തുമസ്‌ കാലത്ത് യുകെ സാക്ഷ്യം വഹിച്ചത് നിരവധി കൊലപാതകങ്ങളെ. ക്രിസ്തുമസ് കാർനേജ് എന്ന പൊതു വിശേഷണം ലഭിച്ച ഈ കൊലപാതകങ്ങളുടെ അന്വേഷണങ്ങൾക്ക് പിന്നാലെയാണ് പോലീസ് ഉദ്യോഗസ്ഥർ ഇപ്പോൾ. ഡിസംബർ 26, ബോക്സിങ് ഡേയിൽ അതിരാവിലെ 49 കാരനായ ഒരാൾ കൊല്ലപ്പെട്ടതിന് പിന്നാലെ നിരവധി ആളുകളാണ് ഹാക്ക്‌നിയിലെ ക്രാൻവുഡ് സ്ട്രീറ്റിൽ ഒത്തുചേർന്നത്. ഈസ്റ്റ് ലണ്ടനിൽ നടന്ന കൊലപതകത്തിന് പിന്നാലെ ണ്ട് പുരുഷന്മാരെയും രണ്ട് സ്ത്രീകളെയും മെട്രോപൊളിറ്റൻ പോലീസ് അറസ്റ്റ് ചെയ്‌തു.

49 ഉം 42 ഉം വയസുള്ള രണ്ട് പുരുഷന്മാരെയും 44 ഉം 35 ഉം വയസുള്ള രണ്ട് സ്ത്രീകളെയും കൊലപതകത്തിന് പിന്നിൽ പ്രവർത്തിച്ചെന്ന സംശയത്തോടെ അറസ്റ്റ് ചെയ്‌തെന്നും ഇവർ കസ്റ്റഡിയിൽ തുടരുകയാണെന്നും പോലീസ് അറിയിച്ചു. ഡിസംബെർ 26 ന് അതിരാവിലെയാണ് ആക്രമണം ഉണ്ടായത്. അക്രമണത്തിൽ ജീവൻ നഷ്ടമായ ആളുടെ ബന്ധുക്കളെ കണ്ടെത്താൻ പോലീസ് അന്വേഷണം നടത്തിവരികയാണ്. പുലർച്ചെ 3.10 ന് ക്രാൻവുഡ് സ്ട്രീറ്റിൽ ഒരാൾക്ക് കുത്തേറ്റതായി വിവരം ലഭിച്ചതിന് പിന്നാലെ പോലീസ് സംഭവ സ്ഥലത്ത് എത്തിയപ്പോഴേക്കും ഇര മരിച്ചിരുന്നു.

ക്രിസ്‌തുമസ്‌ ദിനത്തിൽ 22 വയസ്സുകാരിയുടെ കൊലപതാകം മലയാളം യുകെ നേരത്തെ റിപ്പോർട്ട് ചെയ്‌തിരുന്നു. കൊലപതാകം നടത്തിയതായി സംശയിച്ച് 16 വയസ്സുകാരനെ പോലീസ് അറസ്റ്റ് ചെയ്തു. പ്രതി നിലവിൽ പോലീസ് കസ്റ്റഡിയിൽ തുടരുകയാണ്. ക്രിസ്മസ് ദിനത്തിൽ വൊളട്ടണിൽ 29 കാരനായ യുവാവിൻെറ കൊലപാതകത്തിൽ പോലീസ് അന്വേഷണം നടത്തി വരികയാണ്. ഇരയെ ഉടനെ തന്നെ ആശുപത്രിയിൽ എത്തിച്ചെങ്കിലും മരിക്കുകയായിരുന്നു .

ന്യൂസ് ഡെസ്ക് മലയാളം യുകെ

യു കെ :- ക്രിസ്മസ് ദിനത്തിൽ ബ്രിസ്റ്റോളിലെ ജനങ്ങളെ ദുരിതത്തിലാഴ്ത്തി ജലവിതരണം തടസ്സപ്പെട്ടു. ജലവിതരണ പൈപ്പിൽ ഉണ്ടായ ചോർച്ച സൗത്ത് ഗ്ലോസെസ്റ്റർ ഷെയറിലെ 3000 ത്തോളം വീടുകളെ 12 മണിക്കൂറോളമാണ് ക്രിസ്മസ് ദിനത്തിൽ ബുദ്ധിമുട്ടിലാക്കിയത്. ചോർച്ച പുനഃസ്ഥാപിച്ചതിനു ശേഷവും വെള്ളത്തിന് കുറെയധികം നേരം തവിട്ട് കലർന്ന നിറമായിരുന്നു എന്നും ജനങ്ങൾ പറയുന്നു. തന്റെ ക്രിസ്മസ് ഡിന്നർ മുഴുവൻ നശിച്ചതായി സ്ത്രീകളിൽ ഒരാൾ മാധ്യമങ്ങളോട് പറഞ്ഞു. ജലത്തിന്റെ നിറവ്യത്യാസം മാറുവാനായി ജനങ്ങൾ പൈപ്പുകൾ കുറെയധികം നേരം തുറന്നിടണമെന്ന നിർദ്ദേശം ബ്രിസ്റ്റോൾ വാട്ടർ കമ്പനി നൽകി. വിന്റർബോൺ, സ്റ്റോക്ക് ഗിഫോർഡ്, ബ്രാഡ്‌ലി സ്റ്റോക്ക് ഏരിയകളിലേക്ക് ജലം നൽകുന്ന ഈ കമ്പനി പ്രശ്നം പൂർണമായും പരിഹരിച്ചതായി അറിയിച്ചു. ജനങ്ങൾക്കുണ്ടായ ബുദ്ധിമുട്ടിന് ക്ഷമ ചോദിക്കുന്നതായും അവർ വ്യക്തമാക്കി. വിന്റർബോൺ റോഡിലെ താമസക്കാർക്ക് ഇന്നലെ വൈകുന്നേരം മുതൽ കുപ്പിവെള്ളം വിതരണം ചെയ്തതായും അവർ അറിയിച്ചു.

എന്നാൽ ക്രിസ്മസ് ദിനത്തിൽ തങ്ങൾ വളരെയധികം ബുദ്ധിമുട്ട് അനുഭവിച്ചതായി ജനങ്ങൾ പരാതിപ്പെട്ടു. വർഷത്തിൽ ഒരിക്കൽ ആഘോഷിക്കുന്ന ക്രിസ്മസ് ദിനം വളരെയധികം മോശമായിരുന്നു എന്ന് നിരവധിപേർ വ്യക്തമാക്കി. ഭക്ഷണം ഉണ്ടാക്കാനും മറ്റ് അത്യാവശ്യ കാര്യങ്ങൾക്കുമുള്ള വെള്ളം പോലും ഇല്ലായിരുന്നുവെന്ന് മറ്റുചിലർ പറഞ്ഞു. പൈപ്പിൽ ഉണ്ടായ ചോർച്ച എത്രയും വേഗം പരിഹരിക്കാൻ ശ്രമിച്ചുവെന്ന് കമ്പനി അധികൃതർ അറിയിച്ചു.

ന്യൂസ് ഡെസ്ക് മലയാളം യുകെ

ക്രിസ്മസ് രാവിൽ യുകെ തണുത്ത് വിറച്ചില്ല. പല സ്ഥലങ്ങളിലും താപനില 15.3 സെൽഷ്യസ് വരെയെത്തി. ക്രിസ്മസിന്‍റെ ചടങ്ങുകളിൽ പള്ളിയിൽ പോകാൻ കാലാവസ്ഥ വളരെ അനുകൂലമായിരുന്നു എന്നാണ് പലരും മലയാളം യുകെ ന്യൂസിനോട് ഇതേ കുറിച്ച് പ്രതികരിച്ചത്.

യുകെയിൽ എത്തിയ ആദ്യകാല മലയാളികളുടെ ഓർമ്മയിൽ പോലും ഇത്രയും തണുപ്പ് കുറഞ്ഞ ഒരു ക്രിസ്മസ് രാവ് അനുഭവപ്പെട്ടിട്ടില്ല. മക്കളുടെയും കൊച്ചു മക്കളുടെയും കൂടെ ക്രിസ്മസ് ആഘോഷിക്കാൻ നാട്ടിൽ നിന്നെത്തിയ മാതാപിതാക്കളും സന്തോഷത്തിലായിരുന്നു. 1997 – ന് ശേഷമുള്ള ഏറ്റവും ചൂട് കൂടിയ ഡിസംബർ 24 -നാണ് രാജ്യം സാക്ഷ്യം വഹിച്ചത്. സാധാരണ ഡിസംബറിലെ താപനില 7 സെൽഷ്യസ് ആണ് . എന്നാൽ ഈ വർഷം താപനില ശരാശരിയെക്കാൾ വളരെ കൂടുതലാണ്. ഹീത്രുവിലും ബെർക്ക്‌ഷെയറിലെ സിപ്പൻഹാമിലുമാണ് ഏറ്റവും ഉയർന്ന താപനില രേഖപ്പെടുത്തിയത്.

1920 -ലെ ക്രിസ്മസ് ദിനത്തിലാണ് യുകെയിൽ ചരിത്രത്തിലെ ഏറ്റവും ചൂട് രേഖപ്പെടുത്തിയത്. അന്ന് താപനില 15 .6 സെൽഷ്യസ് വരെ വന്നിരുന്നു. അന്നത്തെ റെക്കോർഡ് മറികടക്കാനുള്ള സാധ്യതയില്ലെന്നാണ് കാലാവസ്ഥാ നിരീക്ഷകർ അഭിപ്രായപ്പെടുന്നത്. അന്തരീക്ഷം തണുപ്പ് കുറഞ്ഞാണെങ്കിലും ഇംഗ്ലണ്ടിലെ പലസ്ഥലങ്ങളിലും ശക്തമായ കാറ്റ് വീശാൻ സാധ്യതയുണ്ടെന്ന മുന്നറിയിപ്പ് കാലാവസ്ഥാ നിരീക്ഷണ കേന്ദ്രം നൽകിയിട്ടുണ്ട്.

ന്യൂസ് ഡെസ്ക് മലയാളം യുകെ

സൗത്ത് ലണ്ടനിൽ ക്രിസ്തുമസ് രാവിൽ ഇരുപത്തിരണ്ടുകാരിയായ സ്ത്രീ മരിച്ച സംഭവത്തിൽ പതിനാറുകാരനെ അറസ്റ്റ് ചെയ്‌ത്‌ പോലീസ്. ഞായറാഴ്ച രാത്രി 10.03 നാണ് ബെർമോണ്ട്‌സിയിലെ സ്‌പെൻലോ ഹൗസിലുള്ള റെസിഡൻഷ്യൽ പ്രോപ്പർട്ടിയിൽ 22 കാരിക്ക് കുത്തേറ്റതായി പൊലീസിന് വിവരം ലഭിച്ചത്. സംഭവസ്ഥലത്ത് ഉടനെ തന്നെ പാരാമെഡിക്കുകൾ എത്തിയെങ്കിലും യുവതി മരിക്കുകയായിരുന്നു.

കൊലപതകത്തിന് പിന്നാലെ ക്രിസ്തുമസ് ദിനത്തിൽ പതിനാറുകാരനെ പോലീസ് അറസ്റ്റ് ചെയ്യുകയായിരുന്നു. കൊലപാതകത്തിന് അറസ്റ്റ് ചെയ്‌ത കൗമാരക്കാരനും ഇരയും തമ്മിൽ പരിചയം ഉണ്ടെന്ന് പോലീസ് പറഞ്ഞു. പ്രതി സൗത്ത് ലണ്ടൻ പോലീസ് സ്റ്റേഷനിൽ കസ്റ്റഡിയിൽ തുടരുകയാണ്. സംഭവത്തിൽ ഒരാളെ അറസ്റ്റ് ചെയ്തിട്ടുണ്ടെങ്കിലും സംഭവത്തെ കുറിച്ച് ഏതെങ്കിലും തരത്തിലുള്ള വിവരങ്ങൾ ഉള്ളവർ പോലീസുമായി ബന്ധപ്പെടണമെന്ന് ഡിറ്റക്റ്റീവ് ചീഫ് ഇൻസ്പെക്ടർ ബ്രയാൻ ഹോവി പറഞ്ഞു.