ജോജി തോമസ്

ഒരു ദേശവും ഒരു ജനതയും അതിജീവനത്തിനായി നടത്തുന്ന പോരാട്ടത്തിനെ ഒറ്റപ്പെടുത്താനും പരാജയപ്പെടുത്താനും ഇന്ത്യയിലെ ഏറ്റവും വലിയ കോർപ്പറേറ്റുകളിൽ ഒന്നിന്റെ പണക്കൊഴുപ്പിന്റെ അകമ്പടിയോടെ നടത്തുന്ന ശ്രമങ്ങളാണ് കഴിഞ്ഞ ഏതാനും നാളുകളായി വിഴിഞ്ഞത്തുനിന്ന് കേൾക്കുന്നത്. വിഴിഞ്ഞത്തെ ജനങ്ങളുടെ ഇടയിൽ ഭിന്നിപ്പ് ഉണ്ടാക്കുന്നതിനും, സമരം ഒരു സമുദായത്തിന്റെ മാത്രം ആവശ്യമായി ചിത്രീകരിക്കുന്നതിലും അദാനി സ്പോൺസേർഡ് ഗ്രൂപ്പ് വിജയിച്ചതിന്റെ തെളിവാണ് രാഷ്ട്രീയ പ്രബുദ്ധതയിൽ മുന്നിൽ നിൽക്കുന്ന കേരളത്തിലെ പൊതുപ്രവർത്തകരുടെയും, മാധ്യമങ്ങളുടെയും നിശബ്ദത . വിഴിഞ്ഞത്തെ സമരം അക്രമമായതിനു പിന്നിൽ കേന്ദ്രം ഭരിക്കുന്ന ബിജെപിയുടെ ഇടപെടലിലൂടെ ഉണ്ടായ സംഘടനയുടെയും, ബോധപൂർവ്വം ഉള്ള ചില പോലീസ് നടപടികളും എത്രമാത്രം കാരണമായെന്ന് മാധ്യമങ്ങൾ മറച്ചു വയ്ക്കുന്ന സത്യമാണ്.

സമാധാനപരമായി നടന്ന സമരത്തെ പരാജയപ്പെടുത്താനുള്ള കുത്സിത ശ്രമങ്ങളുടെ ഭാഗമായി വിഴിഞ്ഞം തുറമുഖത്തിന് അനുകൂല നിലപാടുള്ള സംഘടന ഉണ്ടാക്കുകയാണ് ആദ്യം ചെയ്തത്. അദാനിയുടെ പണത്തിന്റെ പിൻബലമുള്ള സംഘടനയെ സഹായിക്കാൻ കേന്ദ്രവും , സംസ്ഥാനവും ഭരിക്കുന്ന രാഷ്ട്രീയ പാർട്ടികൾ തങ്ങളുടെ അഭിപ്രായവ്യത്യാസം മാറ്റിവെച്ച് മത്സരിക്കുന്ന കാഴ്ചയാണ് പിന്നീട് കണ്ടത്. അക്രമത്തിന്റെ തുടക്കം തുറമുഖം വേണമെന്ന് വാദിക്കുന്ന ഈ സംഘടനയിൽ നിന്നായിരുന്നു. ജനങ്ങളെ പ്രകോപിപ്പിക്കാനും അങ്ങനെ ഒരു കലാപ സാഹചര്യത്തിലേയ്ക്ക് കാര്യങ്ങൾ ചെന്നെത്തിക്കാനും പോലീസിന്റെ ഭാഗത്തുനിന്നും ബോധപൂർവ്വമായ ശ്രമങ്ങളുണ്ടായി. ഇത്തരം സത്യങ്ങൾക്ക് നേരെ മാധ്യമങ്ങൾ കണ്ണടയ്ക്കുകയും, രാഷ്ട്രീയ പാർട്ടികൾ നിശബ്ദത പാലിക്കുകയും ചെയ്തപ്പോഴാണ് 2018 -ലെ പ്രളയകാലത്തെ വീരന്മാർ ദേശദ്രോഹികളായത്. ഒരു മന്ത്രി തന്നെ കടലിന്റെ മക്കളെ ദേശദ്രോഹികളായി ചിത്രീകരിച്ചത് 2018 – ൽ ജീവൻ പണയപ്പെടുത്തി വള്ളവുമായി മധ്യതിരുവിതാംകൂറിൽ വരെ രക്ഷാപ്രവർത്തനം നടത്തിയ തീരദേശവാസികളുടെ ചരിത്രം മറന്നാണ്.

തീരദേശവാസികളുടെ സമരം അവരുടെ ജീവിതത്തിനും മണ്ണിനുമായാണ് . തുറമുഖം വന്നാൽ തീര ശോഷണം സംഭവിക്കുകയും കിടപ്പാടം നഷ്ടപ്പെടുകയും, ഉപജീവനമാർഗ്ഗം അടയുകയും ചെയ്യുമെന്നാണ് പ്രധാന പരാതി. വേൾഡ് ബാങ്കിലും ഏഷ്യൻ ഡെവലപ്മെൻറ് ബാങ്കിലും മറ്റും ജോലി ചെയ്തിരുന്ന സ്വതന്ത്ര വിലയിരുത്തൽ വിഭാഗം ഡയറക്ടറായിരുന്ന വിനോ തോമസ് ഉൾപ്പെടെ പരിസ്ഥിതി വിഷയങ്ങളിൽ അവഗാഹം ഉള്ള നിരവധി വിദഗ്ധർ തീരദേശവാസികളുടെ ആശങ്കയോട് ചേർന്നു പോകുന്ന ചിന്തയുള്ളവരാണ്. വിഴിഞ്ഞം തുറമുഖം വന്നാൽ ശ്രീലങ്കയിലെ കൊളംബോ തുറമുഖം പൂട്ടിപ്പോകുമെന്നും വൻ വികസനമുണ്ടാകുമെന്നുമാണ് അവകാശവാദം. ഇതേ അവകാശവാദങ്ങളുമായി 3000 ത്തിലേറെ കോടി ചിലവഴിച്ച് നിർമ്മിച്ച വല്ലാർപാടം കണ്ടയ്നർ തുറമുഖം ഇപ്പോൾ വർഷംതോറും നൂറുകണക്കിന് കോടി രൂപ നഷ്ടത്തിലാണ് പ്രവർത്തിക്കുന്നത്.

7525 കോടി രൂപ മുതൽമുടക്കുള്ള വിഴിഞ്ഞം പദ്ധതിയിൽ കേന്ദ്രസർക്കാർ 1635 കോടിയും , കേരള സർക്കാർ 2454 കോടിയും മുതൽമുടക്കും. അദാനി ഗ്രൂപ്പിൻറെ മുതൽമുടക്ക് 2454 കോടിയുടെതാണ് . 2454 കോടി രൂപ മുതൽമുടക്കുള്ള അദാനി ഗ്രൂപ്പിനാണ് തുറമുഖത്തിന്റെ 40 വർഷത്തെ നടത്തിപ്പ് ചുമതല. 20 വർഷം കൂടി നടത്തിപ്പ് ചുമതലയുടെ കാലാവധി നീട്ടി കൊടുക്കാൻ കരാറിൽ വ്യവസ്ഥകളുണ്ട്. കരടു കരാറിൽ 10 വർഷം മാത്രം നടത്തിപ്പ് ചുമതലയുണ്ടായിരുന്ന അദാനി ഗ്രൂപ്പിന് 40 വർഷത്തെ നടത്തിപ്പ് ചുമതല നൽകിയതിലൂടെ സംസ്ഥാന ഖജനാവിന് 60,000 കോടിയിലേറെ രൂപ നഷ്ടമുണ്ടായതായി കൺട്രോളർ ആന്റ് ഓഡിറ്റർ ജനറലിന്റെ റിപ്പോർട്ടുണ്ട് . ഉമ്മൻചാണ്ടി സർക്കാരിൻറെ കാലത്ത് ആരംഭിച്ച വിഴിഞ്ഞം തുറമുഖ പദ്ധതിയിൽ 600 കോടി രൂപയുടെ അഴിമതി ഇപ്പോഴത്തെ ഭരണകക്ഷിയായ സിപിഎം ആരോപിച്ചിരുന്നു.

വിഴിഞ്ഞത്ത് നടക്കുന്ന സമരം വികസനത്തിനോ, തുറമുഖത്തിനോ എതിരല്ല. കിടപ്പാടവും, തൊഴിലും നഷ്ടപ്പെടുന്ന ഒരു ജനതയുടേതാണ്. അർഹമായ പുനരധിവാസമാണ് അവരുടെ ആവശ്യം. സർക്കാർ വാഗ്ദാനങ്ങളെല്ലാം ജലരേഖയായപ്പോഴാണ് അവരീ സമരത്തിന് തുനിഞ്ഞിറങ്ങിയത്. പുനരധിവാസമെന്ന പേരിൽ സിമൻറ് ഗോഡൗണിലാണ് കുടിയൊഴിപ്പിക്കപ്പെട്ടവർ വർഷങ്ങളായി കഴിയുന്നത്. തീരദേശവാസികളെ ദേശദ്രോഹികളാക്കിയ മന്ത്രിമാരും കുടുംബവും ഒരു ദിവസമെങ്കിലും അവിടെ പോയി താമസിക്കാൻ തയ്യാറാകുമോ എന്നതാണ് പ്രസക്തമായ വിഷയം. കടലിനോട് മല്ലിട്ട് ജീവിതം മുന്നോട്ടു കൊണ്ടുപോകുന്ന തീരദേശവാസികൾ തുഴ പിടിച്ച കൈകളുടെ ശക്തിക്ക് മുന്നിൽ തോറ്റു പോകാതിരിക്കണമെങ്കിൽ സർക്കാരും അദാനിയും മാന്യമായ ഒരു ഒത്തുതീർപ്പിന് തയ്യാറാകണം.

ന്യൂസ് ഡെസ്ക് മലയാളം യുകെ ന്യൂസ്

വീട്ടിലേക്ക് അതിക്രമിച്ചു കടന്ന യുവാക്കളെ പിന്തുടർന്നതിനെ തുടർന്ന് ശിക്ഷ നേരിടേണ്ടിവന്ന രണ്ട് കുട്ടികളുടെ പിതാവായ ആദം വൈറ്റിന്റെ നിയമ യുദ്ധത്തിനു വേണ്ടി രണ്ടു ദിവസം കൊണ്ട് സ്വരൂപിച്ചത് 121,000ത്തിലധികം പൗണ്ട്. 2019 സെപ്റ്റംബറിലാണ് 25 വയസ്സുകാരനായ ടെയ്‌ലർ ബെൻഫോർഡും റയാൻ പോളും ആദം വൈറ്റിന്റെ വീട്ടിൽ അതിക്രമിച്ച് കടക്കാൻ ശ്രമിച്ചത്. ഇരുവരും ക്രോബാറും ബോൾട്ട് കട്ടറുകളും അടങ്ങുന്ന ആയുധങ്ങളുമായി ആയിരുന്നു വന്നത്. സംഭവ സമയം വീട്ടിൽ ആദത്തിന്റെ ഭാര്യ 34കാരിയായ ലിൻഡ്സെയും എട്ടും പത്തും വയസുള്ള മക്കളും ഉണ്ടായിരുന്നു.

മോഷ്ടാക്കൾ ഉടൻതന്നെ മോട്ടോർ ബൈക്കിൽ രക്ഷപ്പെട്ടു. എന്നാൽ ആദം ഉടൻതന്നെ തൻറെ വൈറ്റ് മെഴ്‌സിഡസ് 4X4 ൽ അവരെ പിന്തുടരുകയായിരുന്നു. ഇതിനെ തുടർന്നുള്ള അപകടത്തിൽ യുവാക്കൾക്ക് ഗുരുതരമായ പരിക്കുകൾ സംഭവിച്ചു. അപകടകരമായ രീതിയിൽ വാഹനം ഓടിച്ച് യുവാക്കളെ പരിക്കേൽപ്പിച്ചതിനാണ് 34കാരനായ ആദത്തെ ഫെബ്രുവരിയിൽ 22 മാസം തടവിനായി ശിക്ഷിച്ചത്. അതേസമയം കവർച്ചാശ്രമം നടത്തിയ ബെൻഫോർഡും പോളും കോടതിയിൽ നിന്ന് ശിക്ഷകൾ ഒന്നും ലഭിക്കാതെ മോചിതരായി.

പ്രസ്തുത സംഭവത്തെ ആസ്പദമാക്കി ചാനൽ 4 ഡോക്യുമെൻററി സീരിസ് പ്രക്ഷേപണം ചെയ്തതാണ് വഴിത്തിരിവായത് . ഇതിനെ തുടർന്ന് ഒട്ടേറെ പേരാണ് ആദത്തിനും കുടുംബത്തിനും പിന്തുണയുമായി എത്തിയത്. തൻറെ ജീവിതത്തിലെ ഏറ്റവും മോശമായ അവസ്ഥയിലൂടെയാണ് താനും കുടുംബവും കടന്നുപോയതെന്നും എന്നാൽ തനിക്ക് ലഭിച്ച സന്ദേശങ്ങളും സഹായഹസ്തങ്ങളും തന്നെ ഏറെ അതിശയിപ്പിക്കുന്നതായിരുന്നെന്നും എല്ലാവർക്കും നന്ദി പറയുന്നതായും ആദം പറഞ്ഞു. പൊതുജനങ്ങൾ തന്നെ ഇത്രമാത്രം വിശ്വസിക്കുകയും പിന്തുണിക്കുകയും ചെയ്യുമെന്ന് താൻ ഒരിക്കലും വിശ്വസിച്ചിരുന്നില്ല എന്നും അദ്ദേഹം പറഞ്ഞു. രാജ്യം കടുത്ത സാമ്പത്തിക മാന്ദ്യം നേരിടുന്ന ഈ സാഹചര്യത്തിലും ഇത്രയും പെട്ടെന്ന് പണം സ്വരൂപിക്കാൻ കഴിഞ്ഞതിൻെറ ആവേശത്തിലാണ് സംഘാടകർ.

ന്യൂസ് ഡെസ്ക് മലയാളം യുകെ ന്യൂസ്

ഏറ്റവും കൂടുതൽ ആത്മാർപ്പണം വേണ്ട ജോലിയാണ് നേഴ്സിംഗ് മേഖല. അതുകൊണ്ടു തന്നെയാണ് അവരെ മാലാഖമാർ എന്ന് വിളിക്കുന്നതും. ലോകമെങ്ങുമുള്ള മലയാളി നേഴ്സുമാർ ശ്രദ്ധിക്കപ്പെടുന്നത് അവരുടെ കഴിവിനുപരി രോഗി പരിപാലനത്തിലെ ആത്മാർത്ഥതയും ആത്മസമർപ്പണവും കൊണ്ടു കൂടിയാണ്.

നേഴ്സിംഗ് മേഖലയിലേക്ക് തൻറെ കഴിവിനും ആത്മസമർപ്പണത്തിനും ഒരു മലയാളി നേഴ്സ് അംഗീകരിക്കപ്പെട്ട വാർത്തയാണ് ഇന്ന് മലയാളം യുകെ ന്യൂസ് റിപ്പോർട്ട് ചെയ്യുന്നത്. അയർലണ്ടിലെ പ്രശസ്തമായ ട്രിനിറ്റി യൂണിവേഴ്സിറ്റിയുടെ സ്കൂൾ ഓഫ് നേഴ്സിംഗ് ആൻഡ് മിഡ് വൈഫറി ഏർപ്പെടുത്തിയ ഈ വർഷത്തെ പ്രിസപ്റ്റർ ഓഫ് ദ ഇയർ പുരസ്കാരത്തിന് അർഹയായിരിക്കുന്നത് മൂവാറ്റുപുഴ സ്വദേശിനി ബിൽഷാ ബേബിയാണ്.
നേഴ്സിംഗ് വിദ്യാർഥികൾ മികച്ച രീതിയിലുള്ള ട്രെയിനിങ്ങും മാർഗനിർദ്ദേശവും നൽകുന്ന നേഴ്സിംഗ് ടീച്ചർമാർക്ക് കൊടുക്കുന്ന ബഹുമതിയാണ് പ്രിസപ്റ്റർ ഓഫ് ദ ഇയർ അവാർഡ്.

ഡൽഹിയിലെ ആർ ഏ. കെ നേഴ്സിംഗ് കോളേജിൽ നിന്നാണ് ബിൽഷ നേഴ്സിംഗ് പഠനം പൂർത്തിയാക്കിയത്. തുടർന്ന് മാംഗ്ലൂരിലെ മെഡിക്കൽ കോളേജിലും നോയിഡയിലെ ഫോർട്ടിസിയിലും സേവനം അനുഷ്ഠിച്ചതിന് ശേഷമാണ് ബിൽഷ അയർലൻഡിൽ എത്തിയത് . സനു സെബാസ്റ്റ്യൻ ആണ് ഭർത്താവ്. റിയ, മില, ഇസ എന്നിവരാണ് സനു ബിൽഷ ദമ്പതികളുടെ മക്കൾ.

ന്യൂസ് ഡെസ്ക് മലയാളം യുകെ ന്യൂസ്

ലണ്ടൻ: 2020 ൽ കോവിഡ് രോഗബാധയെ തുടർന്ന് അന്നത്തെ പ്രധാനമന്ത്രി ബോറിസ് ജോൺസൺ മരണപ്പെടുകയായിരുന്നെങ്കിൽ മന്ത്രിസഭയിൽ ഉണ്ടാകുമായിരുന്ന മാറ്റത്തെ കുറിച്ച് നിർണായക വെളിപ്പെടുത്തലുമായി വിവാദനായകനും എം പിയുമായ മാറ്റ് ഹാൻകോക്ക് രംഗത്ത്. ബോറിസ് ജോൺസൺ കോവിഡ് ബാധിതനായി തീവ്രപരിചരണ വിഭാഗത്തിലായിരുന്നു ആ കാലയളവിൽ. വൈറസ് ബാധ തീവ്രമാണെന്നും മരണം സംഭവിക്കാൻ സാധ്യതയുണ്ടെന്നും ജോൺസൺ തന്നെ നേരത്തെ വെളിപ്പെടുത്തിയിരുന്നു. വൈറസ് ശ്വാസകോശത്തെ കാര്യമായി ബാധിക്കുകയും തുടർന്നുണ്ടായ ശ്വാസതടസ്സവും ആയിരുന്നു ബോറിസ് ജോൺസൺ നേരിട്ട പ്രധാന പ്രശ്നം. എന്നാൽ മുൻവിധികളെയെല്ലാം തിരുത്തിയാണ് അദ്ദേഹം ജീവിതത്തിലേക്ക് തിരികെ എത്തിയത്.

അകാലത്തിൽ കോവിഡ് ബാധിച്ച് ബോറിസ് ജോൺസൺ മരണപ്പെടുന്ന സാഹചര്യത്തിൽ കൺസർവേറ്റിവ് പാർട്ടി നേതൃത്വത്തിലേക്കുള്ള തിരഞ്ഞെടുപ്പ് നടക്കുമെന്നായിരുന്നു ഇവരുടെ കണക്കു കൂട്ടൽ. സാധാരണ തിരഞ്ഞെടുപ്പ് രീതി അനുസരിച്ചാണെങ്കിൽ കാലതാമസം നേരിടുമെന്നും, അത് ഭരണത്തെ പ്രതിസന്ധിയിലേക്ക് നയിക്കാൻ സാധ്യതയുണ്ടെന്നും മനസിലാക്കിയ സംഘം എളുപ്പവഴിയേ കുറിച്ച് ചിന്തിച്ചു തുടങ്ങി. അതാണ് ക്യാബിനറ്റിലെ 20 ആളുകൾ ചേർന്ന് നിർണായക തീരുമാനം കൈകൊള്ളുമെന്ന ആലോചനയിലേക്ക് എത്തിയത്. ലണ്ടനിലെ സെന്റ് തോമസ് ഹോസ്പിറ്റലിൽ തീവ്രപരിചരണ വിഭാഗത്തിൽ ജോൺസനെ പ്രവേശിപ്പിച്ചത് സർക്കാരിലെ എല്ലാവരെയും അമ്പരപ്പിച്ചെന്നും മാറ്റ് ഹാൻകോക്ക് നടത്തിയ വെളിപ്പെടുത്തലിൽ പറയുന്നു. കോവിഡ് പോസിറ്റീവായതിനെ തുടർന്ന് ജോൺസൺ ഏറെനാൾ തീവ്രപരിചരണ വിഭാഗത്തിൽ തുടർന്നിരുന്നു. ജീവൻ നിലനിർത്താൻ വെന്റിലേറ്റർ ആവശ്യം വരാൻ 50% സാധ്യത ഉണ്ടെന്നുമുള്ള ഡോക്ടർമാരുടെ വിലയിരുത്തലിൽ ആണ് ഹാൻകോക്കും കൂട്ടരും പ്രതീക്ഷവെച്ചത്. കാരണം രോഗം ബാധിച്ച് വെന്റിലേറ്ററിൽ കഴിഞ്ഞിരുന്ന ഭൂരിപക്ഷമാളുകളും 2020ൽ തന്നെ മരിച്ചിരുന്നു.

പ്രധാനമന്ത്രിയുടെ ആരോഗ്യ നിലയിൽ ജനങ്ങൾ ആശങ്ക പ്രകടിപ്പിച്ചപ്പോൾ, രാജ്യത്തെ പല മരുന്ന് കമ്പനികളും വിവിധ പരീക്ഷണ ഓഫറുകളുമായി രംഗത്ത് വന്നിരുന്നു. എന്നാൽ ആരോഗ്യ സെക്രട്ടറിയായിരുന്ന ഹാൻകോക്ക് അതെല്ലാം തടഞ്ഞെന്നുമാണ് പുറത്തുവരുന്ന നിർണായക വിവരം. 2020 മാർച്ച്‌ 27ന് ബോറിസ് ജോൺസന് കോവിഡ് പോസിറ്റീവ് ആയപ്പോൾ തന്നെയാണ് അണിയറയിൽ ഈ നാടകവും ആരംഭിച്ചത്. രാജ്യം ലോക്ക്ഡൗണിലായിരുന്നത് ഇവർക്ക് കൂടുതൽ സൗകര്യമായി. ലോക നേതാക്കളിൽ വൈറസ് ബാധിതനാണെന്ന് ആദ്യം വെളിപ്പെടുത്തി രംഗത്ത് വന്നതും ബോറിസ് ജോൺസൺ ആയിരുന്നു. മാറ്റ് ഹാൻകോക്കിന്റെ വെളിപ്പെടുത്തൽ പുതിയ രാഷ്ട്രീയ വിവാദത്തിനാണ് തിരി തെളിയിച്ചിരിക്കുന്നത്.

ലിവർപൂൾ/ വിരാൾ: യുകെ മലയാളികൾക്ക് ഇത് ദുഃഖത്തിന്റെ നാളുകൾ. ലിവർപൂളിനടുത്തു ബെർക്കൻ ഹെഡ്‌ ,റോക്ക് ഫെറിയിൽ  താമസിച്ചിരുന്ന വിദ്യാർത്ഥിയായിരുന്ന വിചിൻ വർഗ്ഗീസ്സ് (23) എന്ന യുവാവിനെയാണ്  ദുരൂഹ സാഹചര്യത്തിൽ മരണമടഞ്ഞ നിലയിൽ കാണപ്പെട്ടത്.

സംഭവം ഇങ്ങനെ. ഇന്നലെ വൈകീട്ട് ആണ് സംഭവം ഉണ്ടായിരിക്കുന്നത്. ഒരു ഫ്ലാറ്റിൽ ഒറ്റക്കായിരുന്നു പരേതനായ വിചിൻ വർഗ്ഗീസ്സ് താമസിച്ചിരുന്നത്. ലിവർപൂളിൽ നിന്നും ഏകദേശം അരമണിക്കൂർ യാത്ര ചെയ്തു ചെസ്റ്റർ യൂണിവേഴ്സിറ്റിയിൽ ആയിരുന്നു പഠിച്ചിരുന്നത്.  ഇതേ സമുച്ചയത്തിലെ മറ്റൊരു ഫ്ലാറ്റിൽ വേറെയും മലയാളികൾ ഉണ്ടായിരുന്നു. ഇവർ ഇന്നലെ വൈകീട്ടോടെ ഷോപ്പിങ്ങിനായി പുറത്തുപോയിരുന്നു.

ആറ് മണിയോടെ ആണ് പുറത്തുപോയ മലയാളികൾ തിരിച്ചുവരുന്നത്. കൂട്ടുകാരൻ എന്തെടുക്കുന്നു എന്നറിയാനായി കതകിൽ തട്ടിയത്. എന്നാൽ കതക് അടച്ചിട്ടില്ലായിരുന്നു. കതകു തുറന്നു നോക്കിയ മലയാളി സുഹൃത്തുക്കൾ കണ്ടത് മരിച്ചു കിടക്കുന്ന വിചിൻ വർഗ്ഗീസ്സിനെയാണ്‌ എന്നാണ് അറിയുന്നത്.

ഉടൻ തന്നെ ആംബുലൻസ് സർവീസ്, പോലീസ് എന്നിവർ എത്തി. ഫ്ലാറ്റ് കോർണർ ചെയ്യുകയും ചെയ്തു. പ്രവേശനം നിയന്ത്രിക്കുകയും ചെയ്തു. നടപടികൾ പൂർത്തിയാക്കിയപ്പോൾ മാത്രമാണ് പുറംലോകമറിയുന്നത്.

പുറത്തുവരുന്ന വിവരമനുസരിച്ചു മലയാളി സ്ഥാപനം വഴി കെയറർ ആയായിട്ടാണ് വിചിൻ വർഗ്ഗീസ്സ് ജോലി ചെയ്തിരുന്നത്. ഇതിനിടയിൽ ജോലി ചെയ്തിരുന്ന സ്ഥാപനം സ്ഥിരജോലി വാഗ്‌ദാനം ചെയ്തിരുന്നു എന്നും ആ ജോലി ലഭിക്കുന്നതുമായി ഏജൻസിയുമായി ചില തർക്കങ്ങൾ ഉടലെടുത്തു എന്നും പുറത്തുവരുന്ന സ്ഥിരീകരിക്കാത്ത വിവരം. എന്തായാലും റൂമിൽ നിന്നും ഒരു കുറിപ്പ് കണ്ടെടുത്തിട്ടുണ്ട് എന്ന വിവരം ലഭിച്ചിട്ടുണ്ട്.

എന്നിരുന്നാലും സംഭവം നാട്ടിൽ കുടുംബാംഗങ്ങളെ അറിയിച്ചിട്ടുണ്ട്. വിചിൻ കൊല്ലം, കൊട്ടാരക്കര, കിഴക്കേ തെരുവ് സ്വദേശിയാണ്.

വിചിൻ വർഗ്ഗീസ്സിന്റെ അകാല വേർപാടിൽ ദുഃഖിക്കുന്ന ബന്ധുക്കളെയും സുഹൃത്തുക്കളെയും മലയാളം യുകെ യുടെ അനുശോചനം അറിയിക്കുകയും പരേതന് ആദരാഞ്ജലികൾ അർപ്പിക്കുകയും ചെയ്യുന്നു.

ന്യൂസ് ഡെസ്ക് മലയാളം യുകെ ന്യൂസ്

ബിർമിംഗ്ഹാം . ഗ്രേറ്റ് ബ്രിട്ടൻ സീറോ മലബാർ രൂപതാ വനിതാ ഫോറത്തിന്റെ വാർഷിക സമ്മേളനത്തിന് ബിർമിംഗ്ഹാമിലെ ബെഥേൽ കൺവെൻഷൻ സെന്ററിൽ തിരി തെളിഞ്ഞു . ബിർമിംഗ് ഹാം അതിരൂപത സഹായ മെത്രാൻ റൈറ്റ് റവ ഡേവിഡ് ഇവാൻസ് ആണ് വനിതാ ഫോറത്തിന്റെ ഉത്‌ഘാടനം നിർവഹിച്ചത് .
എട്ട് റീജിയണുകളിൽ നിന്നായി ഇടവക,മിഷൻ, പ്രോപോസ്ഡ് മിഷൻ എന്നിവിടങ്ങളിൽ നിന്നായി നൂറു കണക്കിന് പ്രതിനിധികൾ ആണ് വനിതാ സമ്മേളനത്തിൽ പങ്കെടുക്കുന്നത്. വനിതാ ഫോറം രൂപതയുടെ ചരിത്രത്തിൽ പുതുനാഴികക്കല്ലെന്ന് ഗ്രേറ്റ് ബ്രിട്ടൻ സീറോ മലബാർ രൂപതാ അധ്യക്ഷൻ മാർ ജോസഫ് സ്രാമ്പിക്കൽ പറഞ്ഞു .

രാവിലെ എട്ടരമുതൽ വൈകുന്നേരം നാലരവരെയാണ് സമ്മേളനം നടക്കുന്നത് . ഓസ്‌കോട്ട് സെന്റ് മേരീസ് കോളേജ് പ്രൊഫസർ മേരി മക്കോയിയാണ് സമ്മേളനത്തിൽ മുഖ്യപ്രഭാഷണം നടത്തുന്നത്. രൂപതാ അധ്യക്ഷൻ മാർ ജോസഫ് സ്രാമ്പിക്കലിന്റെ കാർമ്മികത്വത്തിൽ അർപ്പിക്കുന്ന വിശുദ്ധ കുർബാനയാണ് ഇപ്പോൾ നടക്കുന്നത് .

ന്യൂസ് ഡെസ്ക് മലയാളം യുകെ ന്യൂസ്

ലണ്ടൻ: ശമ്പളവർദ്ധനവ് ഉൾപ്പെടെയുള്ള ആവശ്യങ്ങൾ ഉന്നയിച്ച് നേഴ്സുമാർ നടത്താനൊരുങ്ങുന്ന സമരത്തിന് കൂടുതൽ ജനപിന്തുണ. 106 വർഷത്തെ ചരിത്രത്തിലെ ഏറ്റവും നിർണായകമായ സമരമാവും ഇത്. ആർ സി എന്നിന്റെ സമര ആഹ്വാനത്തെ ജനങ്ങൾ ഒന്നടങ്കം പിന്തുണയ്ക്കുന്നുണ്ടെന്നും ഇതിൽ നിന്ന് വ്യക്തമാണ്.

പല ആശുപത്രികളിലും ജോലി ചെയുന്ന നേഴ്സുമാർക്ക് ലഭിക്കുന്ന ശമ്പളം പ്രതിദിന ചിലവുകൾക്ക് പോലും തികയുന്നില്ല. കുടുംബം പോറ്റാൻ കടംമേടിക്കേണ്ട ഗതികേടിലാണ് ആളുകൾ. അഭിനന്ദനങ്ങൾ മാത്രമല്ല ഇവർക്ക് വേണ്ടത്. ജീവിതം മുന്നോട്ട് കൊണ്ടുപോകാൻ അർഹമായ വേതനം നൽകാൻ അധികാരികൾ തയാറാകണം. അതേസമയം, പൊതുമേഖലയിൽ ജോലി ചെയ്യുന്ന തൊഴിലാളികൾക്ക് അർഹമായ വേതന വർധനവ് നൽകാൻ സർക്കാരിന് പണമുണ്ടെന്നും, അതിൽ നിന്ന് ഒഴിഞ്ഞു മാറാൻ അധികാരികൾക്ക് കഴിയില്ലെന്നും മിററിന്റെ സർവേയിൽ പങ്കെടുത്തവരിൽ ഭൂരിഭാഗവും പ്രതികരിച്ചു.

എന്നാൽ നേഴ്സുമാർ ഉന്നയിക്കുന്ന ആവശ്യങ്ങൾ സർക്കാരിന് താങ്ങാനാവാത്തതാണെന്നാണ് പ്രധാനമന്ത്രി ഋഷി സുനക് പറയുന്നത്. ഇതിനെതിരെ കനത്ത പ്രതിഷേധവും വിമർശനവും പല കോണിൽ നിന്നും ഉയരുന്നുണ്ട്. മിനി ബഡ്ജറ്റിലൂടെ സമ്പദ്‌വ്യവസ്ഥ താറുമാറായപ്പോഴും കോവിഡ് വായ്പ പദ്ധതി മുഖേന പണം വെറുതെ കളഞ്ഞപ്പോഴും ഇല്ലാത്ത പ്രതികരണമാണ് സർക്കാർ നേഴ്സുമാരോട് നടത്തുന്നതെന്ന് യൂണിയൻ ആരോപിച്ചു.

ന്യൂസ് ഡെസ്ക് മലയാളം യുകെ ന്യൂസ്

ലണ്ടൻ: കൺസർവേറ്റീവ് പാർട്ടി മുൻ അംഗവും എം പിയുമായ മാറ്റ് ഹാൻകോക്കും, ജീന കൊളാഡൻ‌ജെലോയുമായുള്ള രഹസ്യബന്ധം മാധ്യമങ്ങളിൽ വീണ്ടും നിറയുകയാണ്. ഈ ബന്ധത്തെ കുറിച്ച് ഹാൻകോക്ക് നടത്തിയ വെളിപ്പെടുത്തലുകളാണ് ഇപ്പോൾ വാർത്തകളിൽ ഇടം പിടിച്ചിരിക്കുന്നത്. അയാം എ സെലിബ്രിറ്റി ഷോയുടെ ഭാഗമായി 18 മാസം കാമുകി ജീനയെ വേർപിരിഞ്ഞത് ഏറെ വേദനാജനകമാണെന്ന് ഹാൻകോക്ക് പറഞ്ഞതാണ് ഇപ്പോൾ ബ്രിട്ടീഷ് മാധ്യമങ്ങൾ കൊണ്ടാടുന്നത്.

യൂകെയിൽ കോവിഡ് -19 വ്യാപന സമയത്ത് ഇരുവരും ഓഫീസിൽ വെച്ച് പരസ്പരം ചുംബിക്കുന്ന ദൃശ്യങ്ങൾ പുറത്ത് വന്നിരുന്നു. ഇതിനു പിന്നാലെ ടിവി റിയാലിറ്റി ഷോയ്ക്കു വേണ്ടി വനവാസത്തിനു പോയതിനെ തുടർന്ന് കൺസർവേറ്റീവ് പാർട്ടി അദ്ദേഹത്തെ പുറത്താക്കുകയും ചെയ്തു. ഞങ്ങൾ പരസ്പരം അടുത്തത് കോവിഡ് സമയത്താണെന്ന് ഹാൻകോക്ക് വെളിപ്പെടുത്തിയിരുന്നു. ഒരുമിച്ച് ജീവിക്കണമെന്നാണ് ഇരുവരുടെയും ആഗ്രഹമെന്നും, എന്നാൽ ഈ നിമിഷം വരെ ശാരീരിക ബന്ധത്തിൽ ഏർപ്പെട്ടിട്ടില്ലെന്നും ഹാൻകോക്ക് പറഞ്ഞതായി മാധ്യമങ്ങൾ റിപ്പോർട്ട് ചെയ്തു.

അതേസമയം, ജീനയുമായുള്ള ബന്ധത്തെ കുറിച്ച് കുടുംബത്തോട് കൂടുതൽ കാര്യങ്ങൾ അദ്ദേഹം വെളിപ്പെടുത്തി എന്നും വാർത്തകൾ പുറത്തുവന്നു. സ്നേഹത്തിനു പിന്നാലെ താൻ പോയപ്പോൾ തന്നെ സ്നേഹിച്ചിരുന്ന ആളുകൾക്ക് വേദനയാണ് നൽകാൻ കഴിഞ്ഞതെന്നും അദ്ദേഹം കൂട്ടിച്ചേർത്തു. കുടുംബത്തോടുള്ള ഹാൻകോക്കിന്റെ മനസുതുറക്കൽ വികാര നിർഭരമായിരുന്നെന്നാണ് റിപ്പോർട്ടുകൾ. അയാം എ സെലിബ്രിറ്റി ഷോയിൽ പങ്കെടുത്തതിനെ കുറിച്ചുള്ള മാധ്യമപ്രവർത്തകരുടെ ചോദ്യത്തിന് ആ സമയം വളരെ നല്ലതായിരുന്നു എന്നും, മാന്യമായ ചർച്ചകൾ ഉയർന്നുവന്നത് ഇക്കാലത്താണെന്നുമാണ് ഹാൻകോക്ക് പ്രതികരിച്ചത്.

ന്യൂസ് ഡെസ്ക് മലയാളം യുകെ ന്യൂസ്

യു കെ :- സ്‌ട്രെപ്റ്റോകോക്കസ് എ ബാക്ടീരിയ മൂലമുള്ള ഇൻഫെക്ഷൻ ബാധിച്ച് 6 കുട്ടികൾ സെപ്റ്റംബർ മാസം മുതലുള്ള കാലഘട്ടത്തിൽ ഇംഗ്ലണ്ടിൽ ഉടനീളം മരിച്ചതായി ഹെൽത്ത് സെക്യൂരിറ്റി ഏജൻസി പുതിയ റിപ്പോർട്ട് പുറത്തുവിട്ടു. വെയിൽസിൽ നിന്ന് ഒരു പെൺകുട്ടി മരണപ്പെട്ടതായും റിപ്പോർട്ടിൽ വ്യക്തമാക്കുന്നു. എന്നാൽ സ്കോട്ട്ലൻഡിലും നോർത്തേൺ അയർലണ്ടിലും ഇതുവരെ മരണങ്ങൾ ഒന്നും തന്നെ റിപ്പോർട്ട് ചെയ്യപ്പെട്ടിട്ടില്ല. സ്‌ട്രെപ്റ്റോകോക്കസ് എ ബാക്ടീരിയ മൂലമുള്ള അസുഖങ്ങൾ സാധാരണയായി തീവ്രതയില്ലാത്തവയാണെങ്കിലും ചിലരിൽ ഇത് ഗുരുതരമായ അസുഖങ്ങൾക്ക് കാരണമാകും. കുട്ടികളുടെ ആരോഗ്യ അവസ്ഥയെ സംബന്ധിച്ച് ആശങ്കയുള്ള മാതാപിതാക്കൾ ഉടൻതന്നെ ചികിത്സാസഹായങ്ങൾ തേടണമെന്ന് ആരോഗ്യ ഏജൻസി നിർദ്ദേശം നൽകിയിട്ടുണ്ട്.

മരണപ്പെട്ട കുട്ടികളിൽ ഭൂരിഭാഗവും 10 വയസ്സിന് താഴെയുള്ളവരാണ്. വെസ്റ്റ് ലണ്ടനിലെ ഈലിങ്ങിൽ നിന്നുള്ള ഒരു കുട്ടിയും സറേയിലെ ആഷ്ഫോർഡിൽ നിന്നുള്ള മറ്റൊരു കുട്ടിയും അണുബാധയെ തുടർന്ന് മരിച്ചവരിൽ ഉൾപ്പെടുന്നു. ബക്കിംഗ്ഹാംഷെയറിലെ ഹൈ വൈകോംബ് സ്വദേശിയായ മുഹമ്മദ് ഇബ്രാഹിം അലി എന്ന നാല് വയസ്സുകാരനും കഴിഞ്ഞ മാസം രോഗം ബാധിച്ച് മരണമടഞ്ഞിരുന്നു. ഗ്ലാമോർഗനിലെ പെനാർത്തിൽ നിന്നുള്ള പ്രൈമറി സ്കൂൾ വിദ്യാർത്ഥിനി ഹന്ന റോപ്പും അണുബാധയെ തുടർന്നാണ് മരിച്ചതെന്ന് ആരോഗ്യ ഏജൻസി പുറത്തുവിട്ട റിപ്പോർട്ടിൽ വ്യക്തമാക്കുന്നു. ഗ്രൂപ്പ് എ സ്ട്രെപ്പ് ബാക്ടീരിയ മൂലമുണ്ടാകുന്ന അണുബാധകൾ സാധാരണയായി കടുത്ത തീവ്രത ഇല്ലാത്തതും, തൊണ്ടവേദന, ചർമ്മത്തിലെ അണുബാധ പോലുള്ള ലക്ഷണങ്ങളോട് കൂടിയതുമാണ്. എന്നാൽ ചിലരിൽ ഇത് ഗുരുതരമായ സ്കാർലെറ്റ് ഫീവർ എന്ന രോഗത്തിന് കാരണമാകുന്നുണ്ട്. എന്നാൽ ഈ രോഗവും ഭൂരിഭാഗം സാഹചര്യങ്ങളിലും ആന്റിബയോട്ടിക്കുകൾ ഉപയോഗിച്ച് ചികിത്സിച്ച് ഭേദമാക്കാവുന്നതാണ്.

എന്നാൽ വളരെ കുറച്ച് ആളുകളിൽ, ഗ്രൂപ്പ് എ സ്ട്രെപ്പ് അണുബാധ ശരീരത്തിൽ ആഴത്തിൽ ബാധിക്കും. ചിലപ്പോൾ ശ്വാസകോശത്തിലേക്കും രക്തസ്ട്രീമിലേക്കും ബാധിക്കുന്ന ഈ ബാക്ടീരിയ ഇൻവേസിവ് ഗ്രൂപ്പ് എ സ്ട്രെപ്റ്റോകോക്കസ് എന്ന അസുഖത്തിന് കാരണമാകുന്നു. ഈ രോഗം ചികിത്സിച്ചു ഭേദമാക്കുവാൻ വളരെയധികം പ്രയാസമാണ്. കടുത്ത പനി, വിശപ്പില്ലായ്മ, ഡീഹൈഡ്രേഷൻ, സ്വഭാവത്തിൽ ഉണ്ടാകുന്ന മാറ്റങ്ങൾ, അമിതമായ ഉറക്കം തൂങ്ങുന്ന അവസ്ഥ എന്നിവയൊക്കെ അണുബാധയുടെ ലക്ഷണങ്ങൾ ആകാമെന്ന് യുകെ ഹെൽത്ത് സെക്യൂരിറ്റി ഏജൻസി ഡയറക്ടർ ഡോക്ടർ കോളിൻ ബ്രൗൺ വ്യക്തമാക്കി. ഇത്തരം ലക്ഷണങ്ങളിൽ ഏതെങ്കിലും തങ്ങളുടെ കുട്ടികൾക്ക് ഉണ്ടെങ്കിൽ ഉടൻ തന്നെ മാതാപിതാക്കൾ അവരെ ആശുപത്രിയിൽ എത്തിക്കണമെന്നും അദ്ദേഹം നിർദ്ദേശം നൽകി.

ന്യൂസ് ഡെസ്ക് മലയാളം യുകെ ന്യൂസ്

ബോറിസ് ജോൺസണും ലിസ് ട്രസും പ്രധാനമന്ത്രി പദവി രാജിവച്ചതിന് ശേഷം ആദ്യമായി നടന്ന പൊതു തിരഞ്ഞെടുപ്പിൽ ലേബർ പാർട്ടിക്ക് വിജയം. സാമന്ത ഡിക്സൺ 17,309 വോട്ടുകൾ നേടി 11,000 വോട്ടുകളുടെ ഭൂരിപക്ഷത്തിലാണ് കൺസർവേറ്റീവ് പാർട്ടിക്കെതിരെ വിജയം കൈവരിച്ചത്. നിലവിലെ സർക്കാർ നയങ്ങളെ താരതമ്യപ്പെടുത്തുമ്പോൾ തങ്ങളുടെ പാർട്ടി ബ്രിട്ടനിലെ ജനതയ്ക്ക് നല്ലൊരു ഭാവി വാഗ്ദാനം ചെയ്യുന്ന പദ്ധതികളുമായി മുന്നോട്ടു വരുമെന്ന് ലേബർ പാർട്ടിയുടെ നേതാവ് സർ കെയർ സ്റ്റാർമർ പറഞ്ഞു.പൊതു തെരഞ്ഞെടുപ്പിലെ ഫലം പ്രധാനമന്ത്രി ഋഷി സുനകിനുള്ള വ്യക്തമായ സന്ദേശമാണെന്നും തിരഞ്ഞെടുപ്പിലെ ഫലം ജനങ്ങൾ എത്രമാത്രം മാറ്റത്തെ ആഗ്രഹിക്കുന്നുവെന്നുള്ളതിൻെറ വ്യക്തമായ തെളിവായി താൻ കരുതുന്നതായും അദ്ദേഹം കൂട്ടിച്ചേർത്തു.

ഈ തെരഞ്ഞെടുപ്പിൽ ലേബർ പാർട്ടി വിജയിക്കുമെന്ന് നേരത്തെ പ്രവചനം ഉണ്ടായിരുന്നെങ്കിലും 2019ലെ 664 വോട്ടുകളുടെ ഭൂരിപക്ഷത്തേക്കാൾ വളരെ ഉയർന്ന ഭൂരിപക്ഷമാണ് ഈ വർഷം ലഭിച്ചിരിക്കുന്നത്. ഉപതിരഞ്ഞെടുപ്പിലെ വിജയം ടോറി ഗവൺമെന്റിൽ നിന്ന് ലേബർ പാർട്ടിയിലേക്കുള്ള ചായ്‌വിനെയാണ് സൂചിപ്പിക്കുന്നതെന്നാണ് രാഷ്ട്രീയ നിരീക്ഷകരുടെ അഭിപ്രായം. 1832നു ശേഷം ചെസ്റ്ററിലെ കൺസർവേറ്റീവ് പാർട്ടി നേരിടുന്ന ഏറ്റവും മോശം ഫലമാണ് ഈ തെരഞ്ഞെടുപ്പിൽ നേരിട്ടത്. കൺസർവേറ്റീവ് പാർട്ടിയെ പ്രതിനിധീകരിച്ച ലിസ് വാർഡ്‌ലോയ്ക്ക് 6,335 വോട്ടുകൾ മാത്രമാണ് ലഭിച്ചത്. അതേസമയം തൻറെ വിജയപ്രഖ്യാപനത്തിനു ശേഷമുള്ള പ്രസംഗത്തിൽ ആളുകൾ മാറ്റത്തിനായി ആഗ്രഹിക്കുന്നുവെന്നും ചെസ്റ്ററിലെ ഈ വിജയം അതിനെയാണ് സൂചിപ്പിക്കുന്നതെന്നും രാജ്യത്തുടനീളമുള്ള ജനങ്ങൾ ശരിക്കും ആശങ്കാകുലരാണെന്നും അവർ പറഞ്ഞു.