ന്യൂസ് ഡെസ്ക്, മലയാളം യുകെ

വടക്ക് കിഴക്കൻ ലണ്ടനിലെ ഒരു റസ്റ്റോറൻ്റിന് സമീപം ഉണ്ടായ വെടിവെയ്പ്പിൽ 3 മുതിർന്നവർക്കും ഒരു കുട്ടിക്കും പരുക്കു പറ്റി. ഇതിൽ കുട്ടിയുടെ നില അതീവ ഗുരുതരമാണെന്ന റിപ്പോർട്ടുകൾ ആണ് പുറത്ത് വന്നിരിക്കുന്നത്. ബുധനാഴ്ച രാത്രി 9 മണി കഴിഞ്ഞാണ് ദാരുണ സംഭവം അരങ്ങേറിയത്. വെടിയേറ്റ നാലു പേരെയും ഈസ്റ്റ് ലണ്ടനിലെ ആശുപത്രിയിൽ പ്രവേശിപ്പിച്ചിരിക്കുകയാണ്.

സംഭവം റിപ്പോർട്ട് ചെയ്ത ഉടനെ തന്നെ ആംബുലൻസ് സർവീസ് ഉൾപ്പെടെയുള്ള അടിയന്തിര സർവീസുകൾ സംഭവ സ്ഥലത്ത് എത്തിയതായി മെട്രോപോളിറ്റൻ പോലീസ് അറിയിച്ചു. വെടിവെയ്പ്പിൽ ഇതുവരെ ആരെയും അറസ്റ്റ് ചെയ്തിട്ടില്ല . സംഭവത്തെ കുറിച്ച് എന്തെങ്കിലും വിവരം അറിയുന്നവർ ബന്ധപ്പെടണമെന്ന് പോലീസ് അറിയിച്ചിട്ടുണ്ട്.