നോബി ജെയിംസ്

1 കിലോ വെളുത്തുള്ളി 1/2 ടീസ്പൂൺ മഞ്ഞൾ പൊടിയും ഉപ്പും ഇട്ട് പാനിൽ വീഡിയോയിൽ കാണുന്നതുപോലെ പകുതി വേവിച്ചെടുക്കുക.
2 ടേബിൾസ്പൂൺ കടുക്
കറിവേപ്പില ആവശ്യത്തിന്
6 വറ്റൽ മുളക്
200 ഗ്രാം ഇഞ്ചി
2 ടേബിൾസ്പൂൺ ഉലുവ
12 പച്ചമുളക്
5 ടേബിൾസ്പൂൺ മുളകുപൊടി
2 ടേബിൾസ്പൂൺ മഞ്ഞൾ പൊടി
1 ടീസ്പൂൺ ഉലുവപ്പൊടി
1 ടീസ്പൂൺ കായം
3 ടേബിൾസ്പൂൺ ശർക്കര
പിന്നെ ആവശ്യത്തിന് വിനാഗിരിയും ഉപ്പും എണ്ണയും

ഒരു പാനിൽ എണ്ണ ചൂടാക്കി കടുകു ഇട്ടു പൊട്ടിവരുമ്പോൾ ഉലുവ ഇട്ടു മൂക്കുമ്പോൾ കറിവേപ്പില വറ്റൽമുളക് ഇവ ഇട്ടു മൂത്തു വരുമ്പോൾ ഇഞ്ചി ചേർക്കുക കൂടെ പച്ചമുളകും ചേർത്ത് ഇവയുടെ പച്ചമണം മാറി വരുമ്പോൾ മഞ്ഞൾ പൊടിയും മുളകുപൊടിയും ആവശത്തിന് ഉപ്പും ചേർത്ത് ഇളക്കി മൂത്തു വരുമ്പോൾ വിനാഗിരി ചേർത്ത് കൊടുക്കുക. അതിൽ ആവശ്യത്തിന് തിളച്ച വെള്ളം ചേർത്ത് നന്നായി തിളച്ചു വരുമ്പോൾ പകുതി വേവിച്ച വെളുത്തുള്ളിയും ഒപ്പം 3 ടേബിൾ സ്പൂൺ ശർക്കര വെള്ളത്തിൽ ചാലിച്ചു അരിച്ചു ചേർക്കുക. 5 മിനിട്ടു ചെറുതീയിൽ കുക്ക് ചെയ്തു ഉലുവാപ്പൊടിയും കായവും ചേർത്ത് എടുത്താൽ കൊതിയൂറും വെളുത്തുള്ളി അച്ചാർ റെഡി. തണുത്തു കഴിഞ്ഞാൽ എത്ര ദിവസം കഴിഞ്ഞാൽ അതിനനുസരിച്ചു രുചിയും കൂടും എല്ലാവരും ഒന്ന് ചെയ്തു നോക്കൂ

മറ്റുപല നാടൻ വിഭവങ്ങളുടെയും വീഡിയോ ഉള്ള നോബിസ് കിച്ചൻ എന്ന എൻറെ യൂട്യൂബ് ചാനലിൽ നിങ്ങളുടെ അഭിപ്രായങ്ങൾ രേഖപ്പെടുത്താനും ഷെയറുചെയ്യാനും മറക്കരുതേ……

ഈസി കുക്കിങ്ങിൽ പുതിയ ഒരു വിഭവുമായി അടുത്ത ആഴ്ച വീണ്ടും കാണാം .

    നോബി ജെയിംസ്

യുകെ മലയാളികൾക്ക് സുപരിചിതനായ പ്രമുഖ ഷെഫായ നോബി ജെയിംസാണ് മലയാളം യുകെയിൽ എല്ലാ ശനിയാഴ്ചകളിലും പ്രസിദ്ധീകരിക്കുന്ന ഈസി കുക്കിംഗ് എന്ന പാചക പംക്തിയുടെ റെസിപ്പി തയ്യാറാക്കുന്നത്. ഇന്ത്യയിലും, ഗൾഫ് രാജ്യങ്ങളിലും, പല മുൻനിര സ്ഥാപനങ്ങളിലും ചീഫ് ഷെഫായി പ്രവർത്തിച്ചിട്ടുള്ള നോബി ഇപ്പോൾ യുകെയിൽ സ്വകാര്യമേഖലയിലുള്ള പ്രമുഖ റസിഡൻഷ്യൽ സ്കൂളായ നോർത്ത് യോർക്ക്ഷെയറിലെ  ഐസഗാർത്തിൽ കേറ്ററിംഗ് മാനേജരായിസേവനമനുഷ്ഠിക്കുന്നു.