തിരുവനന്തപുരം: കൂടത്തായി കൊലപാതക പരമ്പരയ്ക്ക് സമാനമായി ചർച്ചയായ കരമന കൂടത്തിൽ കുടുംബത്തിലെ ദുരൂഹമരണക്കേസിൽ ഒൻപതു വർഷത്തിനു ശേഷം അറസ്റ്റ്. കുടുംബത്തിന്റെ കോടിക്കണക്കിന് രൂപയുടെ സ്വത്ത് കൈക്കലാക്കാൻ ശ്രമിച്ചെന്ന ആരോപണത്തിൽ മുൻ കാര്യസ്ഥൻ രവീന്ദ്രൻ നായരെയാണ് ജില്ലാ ക്രൈംബ്രാഞ്ച് അറസ്റ്റ് ചെയ്തത്. കുടുംബത്തിലെ അവസാന അവകാശിയായിരുന്ന ജയമാധവൻ നായരുടെ മരണം കൊലപാതകമാണെന്നും അതിനു പിന്നിൽ രവീന്ദ്രൻ നായരാണെന്നുമാണ് അന്വേഷണ സംഘത്തിന്റെ കണ്ടെത്തൽ. നൂറു കോടിയോളം രൂപയുടെ സ്വത്തുക്കളുമായി ബന്ധപ്പെട്ട തർക്കമാണ് കേസിന്റെ പ്രധാന പശ്ചാത്തലം.
2017 ഏപ്രിൽ രണ്ടിനാണ് ജയമാധവൻ നായരെ വീട്ടിൽ അവശനിലയിൽ കണ്ടെത്തിയതിനെത്തുടർന്ന് ആശുപത്രിയിലെത്തിച്ചത്. ആദ്യം അസ്വാഭാവിക മരണത്തിന് കേസെടുത്തെങ്കിലും പിന്നീട് അന്വേഷണം നിലച്ചിരുന്നു. നാട്ടുകാരനായ പൊതുപ്രവർത്തകൻ അനിലും കുടുംബാംഗമായ പ്രസന്നകുമാരിയും നൽകിയ പരാതിയെ തുടർന്നാണ് ക്രൈംബ്രാഞ്ച് വീണ്ടും അന്വേഷണം ആരംഭിച്ചത്. ജയമാധവൻ നായരുടെ മരണത്തിൽ സംശയങ്ങൾ ഉയർന്നതോടെ സ്വത്ത് കൈമാറ്റവുമായി ബന്ധപ്പെട്ട രേഖകളും മൊഴികളും പരിശോധിച്ചു. വിൽപത്രത്തിൽ ക്രമക്കേടുണ്ടായിരുന്നുവെന്നും സംഭവവുമായി ബന്ധപ്പെട്ട ചില മൊഴികളിൽ വൈരുധ്യമുണ്ടെന്നും അന്വേഷണത്തിൽ കണ്ടെത്തിയതായി റിപ്പോർട്ടുകൾ പറയുന്നു.
1995നുശേഷം കൂടത്തിൽ കുടുംബത്തിലെ ഏഴുപേരാണ് വിവിധ കാലയളവുകളിലായി മരിച്ചത്. ഗോപിനാഥൻ നായർ, ഭാര്യ സുമതിയമ്മ, മക്കളായ ജയബാലകൃഷ്ണൻ നായർ, ജയപ്രകാശ്, ജയശ്രീ, വേലുപ്പിള്ളയുടെ മകൻ ഉണ്ണികൃഷ്ണൻ നായർ, നാരായണൻ നായരുടെ മകൻ ജയമാധവൻ നായർ എന്നിവരുടെ മരണങ്ങളാണ് സംശയത്തിന്റെ നിഴലിലായത്. കുടുംബത്തിന്റെ പേരിൽ തിരുവനന്തപുരത്തിന്റെ വിവിധ ഭാഗങ്ങളിലും കാലടിയിലുമായി കോടികൾ വിലമതിക്കുന്ന ഭൂമിയും വീടുകളുമുണ്ടെന്നാണ് കണക്ക്. സ്വത്തുക്കൾ കൈമാറിയതുമായി ബന്ധപ്പെട്ട രേഖകളിലെ ക്രമക്കേടുകളും ജയമാധവൻ നായരുടെ മരണത്തിലെ സാഹചര്യങ്ങളും കേന്ദ്രീകരിച്ചാണ് അന്വേഷണം മുന്നോട്ടു പോയത്.
Leave a Reply