ന്യൂസ് ഡെസ്ക്, മലയാളം യുകെ
മില്ട്ടണ് കെയ്ൻസിലെ മലയാളി സമൂഹത്തെ നടുക്കി പ്രമുഖ മലയാളി ഡോക്ടര് ഡോ. അച്ചാമ്മ ജോൺ കൊല്ലപ്പെട്ടു . തിരുവനന്തപുരം മെഡിക്കല് കോളേജിലെ മികവുറ്റ മുന് വിദ്യാര്ഥിനിയായിരുന്ന അച്ചാമ്മ, യുകെയിലെ ആരോഗ്യരംഗത്ത് ശ്രദ്ധേയ ഹിസ്റ്റോപതോളജിസ്റ്റായി പേരെടുത്ത ഡോക്ടറായിരുന്നു. സ്കിന് ക്യാന്സര് രംഗത്തെ വിദഗ്ധയായിരുന്ന അവര് എന്എച്ച്എസിലെ സഹപ്രവര്ത്തകരുടെയും രോഗികളുടെയും ഇടയിൽ അറിയപ്പെടുന്ന ഡോക്ടർ ആയിരുന്നു. എന്നാല് കുടുംബജീവിതത്തിലെ അസ്വാരസ്യങ്ങളാണ് ഒടുവില് ദുരന്തത്തിലേക്ക് നയിച്ചതെന്നാണ് പുറത്തുവരുന്ന വിവരം. ഞായറാഴ്ച വൈകുന്നേരം മില്ട്ടണ് കെയ്ൻസിലെ വൂള്വര്ട്ടണിലെ വസതിയില് ദമ്പതികള്ക്കിടയില് ഉണ്ടായ കടുത്ത വാക്കേറ്റത്തിന് പിന്നാലെയായിരുന്നു സംഭവം.
വീട്ടില്നിന്ന് അടിയന്തിര സഹായം തേടിയുള്ള സന്ദേശം ലഭിച്ചതിനെ തുടര്ന്ന് പോലീസ് സ്ഥലത്തെത്തിയപ്പോഴേക്കും അച്ചാമ്മ മരിച്ചിരുന്നു. സംഭവസമയത്ത് വീട്ടിലുണ്ടായിരുന്ന 58 കാരനായ ഭര്ത്താവിനെ പോലീസ് കസ്റ്റഡിയിലെടുക്കുകയായിരുന്നു. വിശദമായ ചോദ്യംചെയ്യല് തുടരുകയാണെന്നും പോസ്റ്റ്മോര്ട്ടം ഉള്പ്പെടെയുള്ള നടപടികള് പുരോഗമിക്കുകയാണെന്നും പോലീസ് അറിയിച്ചു. കേസുമായി ബന്ധപ്പെട്ട കൂടുതല് വിവരങ്ങള് നടപടിക്രമങ്ങൾക്ക് ശേഷമേ പുറത്തുവിടുകയുള്ളുവെന്നും അധികൃതര് വ്യക്തമാക്കി.
മില്ട്ടണ് കെയ്ൻസിലെ പ്രാദേശിക ദേവാലയ പ്രവര്ത്തനങ്ങളില് സജീവ സാന്നിധ്യമായിരുന്നുവെങ്കിലും ദമ്പതികള് പൊതുവേ മലയാളി സമൂഹത്തില്നിന്ന് അകന്നായിരുന്നു ജീവിച്ചിരുന്നതെന്നാണ് അറിയാൻ സാധിച്ചത് . അതുകൊണ്ടുതന്നെ ഞായറാഴ്ച വൈകുന്നേരം നടന്ന സംഭവം പുറംലോകം അറിയാന് വൈകി.
Leave a Reply