ന്യൂസ് ഡെസ്ക്, മലയാളം യുകെ
ബ്രിട്ടനിലെ എൻ.എച്ച്.എസ് ഫിസിയോതെറാപ്പി സേവനങ്ങളിൽ ജീവനക്കാരുടെ കുറവും പുനരധിവാസ സൗകര്യങ്ങളുടെ അഭാവവും ഗുരുതര പ്രതിസന്ധി സൃഷ്ടിക്കുന്നതായി ചാർട്ടേഡ് സൊസൈറ്റി ഓഫ് ഫിസിയോതെറാപ്പി (CSP) മുന്നറിയിപ്പ് നൽകി. സേവനങ്ങളിൽ നിയമനങ്ങൾ മരവിപ്പിക്കുകയും പുനരധിവാസത്തിനുള്ള സ്ഥലങ്ങൾ കുറയ്ക്കുകയും ചെയ്യുന്നതിനാൽ രോഗികൾക്ക് ചികിത്സ വൈകുന്നതും ആവശ്യമായ പരിചരണം ലഭിക്കാത്തതുമൂലം ഒഴിവാക്കാനാകുന്ന വൈകല്യങ്ങളുമായി ജീവിക്കേണ്ട സാഹചര്യമാണെന്ന് സംഘടന ചൂണ്ടിക്കാട്ടി.
കഴിഞ്ഞ വർഷം സ്ട്രോക്ക് ബാധിച്ച വെസ്റ്റ് യോർക്ക്ഷെയറിലെ 63-കാരനായ ഡേവ് ഡക്സ്ബറി, ആശുപത്രിയിൽ ആവശ്യമായ സൗകര്യങ്ങളില്ലാത്തതിനാൽ പൊതുഇടത്തെ ഇടനാഴിയിലാണ് വീണ്ടും നടക്കാൻ പരിശീലിക്കേണ്ടി വന്നതെന്ന് വെളിപ്പെടുത്തി. വലതുകൈക്കും കാലിനും ചലനശേഷി നഷ്ടപ്പെട്ട അദ്ദേഹത്തിന് എൻ.എച്ച്.എസ് ചികിത്സ അവസാനിപ്പിച്ചതിനെ തുടർന്ന് ഇപ്പോൾ സ്വകാര്യ ഫിസിയോതെറാപ്പിക്കായി സ്വന്തം പണം ചെലവഴിക്കേണ്ടി വരികയാണ്. ഫിസിയോ തെറാപ്പിസ്റ്റുകൾ മികച്ച സേവനം നൽകിയെങ്കിലും സംവിധാനത്തിന് ആവശ്യമായ സൗകര്യങ്ങൾ ഇല്ലായിരുന്നുവെന്ന് അദ്ദേഹം പറഞ്ഞു.
ഇംഗ്ലണ്ടിലെ 550 ഫിസിയോതെറാപ്പിസ്റ്റുകൾക്കിടയിൽ നടത്തിയ സർവേയിൽ 79 ശതമാനം പേരും നിലവിലെ ജീവനക്കാരുടെ എണ്ണം രോഗികളുടെ ആവശ്യങ്ങൾ നിറവേറ്റാൻ പര്യാപ്തമല്ലെന്ന് അഭിപ്രായപ്പെട്ടു. 72 ശതമാനം പേർ നിയമനങ്ങൾ മരവിപ്പിച്ചതായി അറിയിച്ചപ്പോൾ, മൂന്നിലൊന്ന് പേർ പുനരധിവാസത്തിനുള്ള പ്രത്യേക ഇടങ്ങൾ നഷ്ടപ്പെട്ടതായി പറഞ്ഞു. സമൂഹാടിസ്ഥാനത്തിലുള്ള ആരോഗ്യസേവനങ്ങൾ ശക്തിപ്പെടുത്തുമെന്ന് സർക്കാർ ആവർത്തിച്ചെങ്കിലും ജീവനക്കാരുടെയും സൗകര്യങ്ങളുടെയും കുറവ് പരിഹരിക്കാതെ ലക്ഷ്യങ്ങൾ കൈവരിക്കാനാകില്ലെന്നാണ് വിദഗ്ധരുടെ മുന്നറിയിപ്പ്.
Leave a Reply