ന്യൂസ് ഡെസ്ക്, മലയാളം യുകെ
അഭയാർഥികളെ പാർപ്പിക്കുന്നതിനായി മൂന്ന് മുൻ സൈനിക താവളങ്ങൾ കൂടി ഉപയോഗിക്കാനുള്ള ബ്രിട്ടീഷ് സർക്കാരിന്റെ നീക്കം പുതിയ രാഷ്ട്രീയ വിവാദത്തിന് വഴിവെച്ചു. ഓക്സ്ഫോർഡ്ഷയറിലെ ബൈസ്റ്റർ, സഫോക്കിലെ ആർഎഎഫ് ബാർനം, നോർത്ത് യോർക്ക്ഷയറിലെ ആർഎഎഫ് ലിന്റൺ-ഓൺ-ഔസ് എന്നീ കേന്ദ്രങ്ങളിൽ 3,750 വരെ അഭയാർഥികളെ പാർപ്പിക്കാനാണ് പദ്ധതി. അഭയാർഥി ഹോട്ടലുകളുടെ ഉപയോഗം കുറയ്ക്കുകയെന്ന ലക്ഷ്യത്തോടെയാണ് നടപടി.
എന്നാൽ പദ്ധതി മനുഷ്യാവകാശ സംഘടനകളുടെയും പ്രാദേശിക ജനപ്രതിനിധികളുടെയും ശക്തമായ എതിർപ്പിന് ഇടയാക്കി. സൈനിക താവളങ്ങൾ പലപ്പോഴും ഒറ്റപ്പെട്ട പ്രദേശങ്ങളിലായതിനാൽ ആരോഗ്യ, വിദ്യാഭ്യാസ, നിയമസഹായ സേവനങ്ങളിലേക്കുള്ള പ്രവേശനം പരിമിതപ്പെടുമെന്നും ഹോട്ടലുകളേക്കാൾ ചെലവ് കൂടാനിടയുണ്ടെന്നും വിമർശകർ ചൂണ്ടിക്കാട്ടുന്നു. ചില കേന്ദ്രങ്ങൾക്കെതിരെ മുമ്പും ശക്തമായ ജനവിരോധം ഉയർന്നിരുന്നു.
ഇതിനിടെ, വിദേശ കെയർ വർക്കർമാർക്കുള്ള സ്ഥിരതാമസ വ്യവസ്ഥകളിൽ ഇളവ് വേണമെന്ന് ആവശ്യപ്പെട്ട് കുടിയേറ്റ മന്ത്രി മൈക്ക് ടാപ്പ് നടത്തിയ പരസ്യ പ്രസ്താവനയും സർക്കാരിനുള്ളിൽ ഭിന്നത സൃഷ്ടിച്ചു. പുതിയ കുടിയേറ്റ-അഭയാർഥി നിയമഭേദഗതികൾ അടുത്തയാഴ്ച പാർലമെന്റിൽ അവതരിപ്പിക്കാനിരിക്കെ, കുടിയേറ്റ നയം ബ്രിട്ടനിലെ പ്രധാന രാഷ്ട്രീയ ചർച്ചാവിഷയമായി മാറിയിരിക്കുകയാണ്.
Leave a Reply