ഷെറിൻ പി യോഹന്നാൻ , മലയാളം യുകെ ന്യൂസ് ടീം
ലണ്ടൻ : രാജ്യം ഒരുമിച്ചു കൊറോണകാലത്തെ നേരിടുകയാണെങ്കിലും പിപിഇ കിറ്റുകളുടെ ക്ഷാമം എൻഎച്ച്എസിനെ വല്ലാതെ വലയ്ക്കുന്നുണ്ട്. എൻ എച്ച് എസ് ജീവനക്കാർക്ക് സംരക്ഷണങ്ങൾ ഇല്ലാതെ രോഗികളെ ചികിത്സിക്കേണ്ടി വരുന്നത് അപകടം ക്ഷണിച്ചുവരുത്തുന്നതിന് തുല്യമാണ്. എന്നാൽ പിപിഇ വാങ്ങുന്നതിനായി യൂറോപ്യൻ യൂണിയൻ പദ്ധതിയിൽ ചേരുന്നതിനുള്ള മൂന്ന് അവസരങ്ങൾ യുകെ നഷ്ടപ്പെടുത്തി എന്ന വാർത്തയാണ് ഇപ്പോൾ പുറത്തുവന്നിരിക്കുന്നത്. എൻ‌എച്ച്‌എസിൽ കുറവുണ്ടായിട്ടും കോവിഡ് -19 നെ പ്രതിരോധിക്കാനുള്ള കിറ്റിനായി 1.5 ബില്യൺ ഡോളർ ഓർഡറിൽ ബ്രിട്ടൻ പങ്കെടുത്തില്ല. മാസ്കുകൾ, ഗൗണുകൾ, കയ്യുറകൾ എന്നിവയ്ക്കുള്ള യൂറോപ്യൻ യൂണിയൻ പദ്ധതിയുടെ ഭാഗമാകാനുള്ള മൂന്ന് അവസരങ്ങൾ ബ്രിട്ടൻ നഷ്ടപ്പെടുത്തി. ഈ പ്രതിസന്ധി ഘട്ടത്തിൽ ഉണ്ടായ ക്ഷാമം മന്ത്രിമാരെയും സമ്മർദ്ദത്തിലാക്കുന്നു. 25 രാജ്യങ്ങളും എട്ട് കമ്പനികളും ഉൾപ്പെടുന്ന സംയുക്ത സംഭരണ പദ്ധതിയിലൂടെ 1.3 ബില്യൺ പൗണ്ട് മൂല്യമുള്ള പേർസണൽ പ്രൊട്ടക്റ്റീവ് എക്വിപ്മെന്റ് (പിപിഇ) ദിവസങ്ങൾക്കുള്ളിൽ യൂറോപ്പിലെ ഡോക്ടർമാരും നഴ്സുമാരും സ്വീകരിക്കാൻ തയ്യാറെടുക്കുന്നുവെന്ന് റിപ്പോർട്ടുകൾ ചൂണ്ടിക്കാട്ടുന്നു. ആവശ്യപ്പെട്ട സംഖ്യയേക്കാൾ അധികമായി മാസ്‌ക്കുകൾ, ഗൗണുകൾ, കണ്ണടകൾ എന്നിവ ഉൾപ്പെടെയുള്ള മെഡിക്കൽ ഉപകരണങ്ങൾ വാഗ്ദാനം ചെയ്യുന്നതായി യൂറോപ്യൻ കമ്മീഷൻ വക്താവ് പറഞ്ഞു. യൂറോപ്യൻ യൂണിയൻ അംഗരാജ്യങ്ങൾക്കുള്ളിൽ പ്രത്യേകമായി സ്റ്റോക്ക്പൈലുകൾ സ്ഥാപിക്കുന്നു. ആദ്യത്തേത് റൊമാനിയയിലാണ് സ്ഥാപിക്കുന്നത്.
യുകെയിലെ പിപിഇ ക്ഷാമം ഇന്നലെ വിദേശകാര്യ സെക്രട്ടറി ഡൊമിനിക് റാബ് അംഗീകരിച്ചു. ചെലവ് ഒരു പ്രശ്നമല്ലെന്നും എന്നാൽ ഒരു മത്സരാധിഷ്ഠിത വിപണി കാരണം പിപിഇ വിതരണത്തിൽ ബുദ്ധിമുട്ടുകൾ ഉണ്ടാകുന്നതായി റാബ് അറിയിച്ചു. ക്ഷണം അയച്ച ഇമെയിൽ ലഭിക്കാത്തതിനാൽ യൂറോപ്യൻ യൂണിയന്റെ സംഭരണ പദ്ധതികളിൽ ചേരാനാവില്ലെന്ന് യുകെ സർക്കാർ മുമ്പ് പറഞ്ഞിരുന്നു. അതോടെ മെഡിക്കൽ വെന്റിലേറ്ററുകളുടെ വൻതോതിലുള്ള സംഭരണം സർക്കാർ നഷ്ടപ്പെടുത്തി. മാർച്ച് 19 ന് നടന്ന സംയുക്ത സംഭരണത്തെക്കുറിച്ചുള്ള ആദ്യ യോഗത്തിൽ മാത്രമാണ് യുകെ പങ്കെടുത്തത്. മാർച്ച് 25ന് നടന്ന ആരോഗ്യ ഉദ്യോഗസ്ഥരുടെ ഒരു പ്രത്യേക യോഗത്തിൽ യുകെ പങ്കെടുത്തില്ല. ലബോറട്ടറി ഉപകരണങ്ങളുടെ സംയുക്ത സംഭരണത്തിലും രാജ്യം ഉൾപ്പെടുന്നില്ല.
സംരക്ഷണ ഉപകരണങ്ങളുടെ കുറവ് എൻ‌എച്ച്എസ് ജീവനക്കാരിലും കെയർ ഹോം സ്റ്റാഫുകളിലും ഭയം ഉളവാക്കുന്നു. ഡോക്ടർമാർക്കും നഴ്സുമാർക്കും ഇടയിൽ മരണസംഖ്യ വർദ്ധിച്ചുകൊണ്ടിരിക്കുകയാണ്, 19 എൻ‌എച്ച്എസ് ജീവനക്കാർ മരിച്ചുവെന്ന് ആരോഗ്യ സെക്രട്ടറി മാറ്റ് ഹാൻ‌കോക്ക് പറഞ്ഞു. “വരും ആഴ്ചകളിലും മാസങ്ങളിലും പിപിഇ വിതരണം ഉറപ്പാക്കുന്നതിന് എൻ‌എച്ച്എസ്, സോഷ്യൽ കെയർ പ്രൊവൈഡർമാർ, സൈന്യം എന്നിവയുമായി ഞങ്ങൾ ചേർന്നു പ്രവർത്തിക്കുന്നു. എൻഎച്ച്എസിന്റെ ശേഷി വർധിപ്പിക്കുന്നതിന് യൂറോപ്യൻ രാജ്യങ്ങളുമായും മറ്റുള്ളവരുമായും ഞങ്ങൾ തുടർന്നും പ്രവർത്തിക്കും. അക്കാലത്ത് പൊതുജനാരോഗ്യ ആവശ്യങ്ങളുടെ അടിസ്ഥാനത്തിൽ ഭാവിയിലെ യൂറോപ്യൻ യൂണിയൻ സംയുക്ത സംഭരണ പദ്ധതികളിൽ പങ്കെടുക്കുന്നത് ഞങ്ങൾ പരിഗണിക്കും” ; ആരോഗ്യ സാമൂഹിക വകുപ്പ് അറിയിച്ചു. രോഗം ബാധിച്ച് 717 പേർ ഇന്നലെ ബ്രിട്ടനിൽ മരിച്ചു. ആകെ മരണസംഖ്യ 11,329 ആയി ഉയർന്നു. ഇന്നലെ പുതുതായി 4342 പേർക്ക് രോഗം സ്ഥിരീകരിച്ചതോടെ ആകെ രോഗബാധിതരുടെ എണ്ണം 88,621 ആയി മാറി.
Leave a Reply