ന്യൂസ് ഡെസ്ക്, മലയാളം യുകെ
ലണ്ടൻ: കടുവയുടെ ആക്രമണത്തിൽ ഒരാൾ കൊല്ലപ്പെട്ട സംഭവത്തിനു പിന്നാലെ ബ്രിട്ടനിലെ യോർക്ക്ഷയർ വന്യജീവി പാർക്ക് അടച്ചിട്ടു. സംഭവത്തിൽ ആക്രമണം നടത്തിയ കടുവയെ കൊല്ലില്ലെന്ന് പാർക്ക് അധികൃതർ വ്യക്തമാക്കി. കടുവയ്ക്ക് പരിക്കേറ്റിട്ടില്ലെന്നും സുരക്ഷിതമാണെന്നും അധികൃതർ അറിയിച്ചു. സംഭവത്തിൽ മരിച്ചയാളുടെ കുടുംബത്തിന് പൊലീസ് പ്രത്യേക പിന്തുണ നൽകി വരികയാണ്. പാർക്കിലെ ജീവനക്കാർക്കും സംഭവത്തിന്റെ ആഘാതം മറികടക്കാൻ വിദഗ്ധ സഹായം നൽകുമെന്ന് അധികൃതർ അറിയിച്ചു. ആക്രമണത്തിന്റെ ദൃശ്യങ്ങൾ സമൂഹമാധ്യമങ്ങളിൽ പങ്കുവയ്ക്കരുതെന്ന് സൗത്ത് യോർക്ക്ഷയർ പൊലീസ് അഭ്യർഥിച്ചു.
സംഭവത്തിൽ കടുവയെ കുറ്റപ്പെടുത്താനാവില്ലെന്ന നിലപാടിലാണ് പാർക്ക് അധികൃതർ. സന്ദർശകർക്കായി ഒരുക്കിയ നടപ്പാതയിൽനിന്ന് കടുവയുടെ മേഖലയിലേക്ക് ഇറങ്ങിച്ചെന്നയാളാണ് ആക്രമണത്തിനിരയായത്. കടുവയുടെ സാന്നിധ്യമുള്ള മേഖലയിൽ സുരക്ഷാ ക്രമീകരണങ്ങൾ ഉണ്ടായിരുന്നെങ്കിലും ഇയാൾ വേലികൾ കടന്ന് അകത്തേക്കു പ്രവേശിക്കുകയായിരുന്നു. സംഭവത്തെക്കുറിച്ച് അധികൃതർ അന്വേഷണം തുടരുകയാണ്. പാർക്കിലെ സന്ദർശകരെ ഉടൻ ഒഴിപ്പിക്കുകയും അടിയന്തര രക്ഷാപ്രവർത്തകരെ സ്ഥലത്തെത്തിക്കുകയും ചെയ്തിരുന്നു.
സംഭവത്തിൽ ബ്രിട്ടീഷ് വിദേശകാര്യ സെക്രട്ടറി എഡ് മിലിബാൻഡ് ഉൾപ്പെടെയുള്ള ജനപ്രതിനിധികൾ അനുശോചനം രേഖപ്പെടുത്തി. മരിച്ചയാളുടെ കുടുംബത്തിന് പിന്തുണ അറിയിച്ച മിലിബാൻഡ്, രക്ഷാപ്രവർത്തകർക്കും പാർക്ക് ജീവനക്കാർക്കും നന്ദി പറഞ്ഞു. 2009-ൽ പ്രവർത്തനം ആരംഭിച്ച പാർക്കിലെ ‘ലാൻഡ് ഓഫ് ദ ടൈഗേഴ്സ്’ മേഖല 2011-ലാണ് തുറന്നത്. വംശനാശഭീഷണി നേരിടുന്ന അമുർ കടുവകളിൽ ഏകദേശം 500 എണ്ണം മാത്രമാണ് ലോകത്ത് കാട്ടിൽ അവശേഷിക്കുന്നത്.
Leave a Reply