ന്യൂസ് ഡെസ്ക്, മലയാളം യുകെ
ലണ്ടനിലെ നാഷണൽ ഹോസ്പിറ്റൽ ഫോർ ന്യൂറോളജി ആൻഡ് ന്യൂറോസർജറിയിൽ (NHNN) എഐ (കൃത്രിമ ബുദ്ധി) സഹായത്തോടെ മസ്തിഷ്ക ട്യൂമർ നീക്കം ചെയ്യുന്ന ലോകത്തിലെ ആദ്യ വിജയകരമായ ശസ്ത്രക്രിയ നടത്തി. 48-കാരനായ റീസ് ഹിബർട്ടിന്റെ കാഴ്ചശക്തി സംരക്ഷിക്കാൻ സഹായിച്ച ഈ ശസ്ത്രക്രിയ മേയ് മാസത്തിലാണ് നടന്നത്. രോഗിയുടെ ആരോഗ്യനില പൂർണമായും മെച്ചപ്പെട്ടതിനെത്തുടർന്നാണ് വിവരം ഇപ്പോൾ പുറത്തുവിട്ടത്.
ശസ്ത്രക്രിയയ്ക്കിടെ ഡോക്ടർമാർ പൂർണ നിയന്ത്രണം നിലനിർത്തിയിരുന്നെങ്കിലും എഐ സംവിധാനം തത്സമയ ക്യാമറ ദൃശ്യങ്ങൾ വിശകലനം ചെയ്ത് പ്രധാന രക്തക്കുഴലുകൾ, നാഡികൾ തുടങ്ങിയ നിർണായക ഭാഗങ്ങൾ തിരിച്ചറിയാൻ സഹായിച്ചു. ഹിബർട്ടിന്റെ പിറ്റ്യൂട്ടറി ഗ്രന്ഥിയിലെ 11 മില്ലിമീറ്റർ വലിപ്പമുള്ള ട്യൂമർ നീക്കം ചെയ്യുന്നതിനിടയിൽ കാഴ്ച നിയന്ത്രിക്കുന്ന നാഡികൾക്ക് കേടുപാടുകൾ സംഭവിക്കാതിരിക്കാൻ ഈ സാങ്കേതികവിദ്യ നിർണായക പങ്കുവഹിച്ചു. ഒരു മില്ലിമീറ്ററിന്റെ പിഴവ് പോലും അന്ധതയ്ക്കോ സ്ട്രോക്കിനോ മരണത്തിനോ കാരണമാകാവുന്ന ശസ്ത്രക്രിയയാണിതെന്ന് ആരോഗ്യവിദഗ്ധർ വ്യക്തമാക്കി.
2024-ൽ രോഗനിർണയം നടത്തിയ ഹിബർട്ടിന് ഹോർമോൺ അസന്തുലിതാവസ്ഥയും കാഴ്ചപ്രശ്നങ്ങളും രൂക്ഷമായിരുന്നു. ശസ്ത്രക്രിയയ്ക്കുശേഷം ഒരാഴ്ചയ്ക്കുള്ളിൽ കണ്ണടയോ സഹായോപകരണങ്ങളോ ഇല്ലാതെ നടക്കാൻ അദ്ദേഹത്തിന് സാധിച്ചു. ഇപ്പോൾ ജോലിയിൽ തിരിച്ചെത്തിയ ഹിബർട്ട്, ചുറ്റുപാടുകളെ കൂടുതൽ വ്യക്തമായി കാണാൻ കഴിയുന്നുവെന്ന് പറഞ്ഞു. നൂറുകണക്കിന് ശസ്ത്രക്രിയാ ദൃശ്യങ്ങൾ പഠിച്ചാണ് എഐ സംവിധാനം വികസിപ്പിച്ചതെന്നും സങ്കീർണമായ ശസ്ത്രക്രിയകളിൽ ഇത് ഡോക്ടർമാർക്ക് കൂടുതൽ സുരക്ഷിതമായ സഹായമാകുമെന്നും ഗവേഷകർ അറിയിച്ചു.
Leave a Reply