ന്യൂസ് ഡെസ്ക്, മലയാളം യുകെ
ലണ്ടൻ: വിമാനത്താവളങ്ങളിൽ യാത്രക്കാരെ ഇറക്കിവിടുന്നതിനുള്ള ഡ്രോപ്പ് ഓഫ് നിരക്കുകൾ കുത്തനെ ഉയർന്നതിനെ തുടർന്ന് നിരക്കുകൾ പുനഃപരിശോധിക്കാൻ സർക്കാർ തീരുമാനിച്ചു. 2025 വേനൽക്കാലം മുതൽ പ്രധാന വിമാനത്താവളങ്ങളിലെ നിരക്കുകൾ ശരാശരി മൂന്നിലൊന്ന് വർധിച്ചതായാണ് പഠനത്തിൽ കണ്ടെത്തിയത്. ഗാറ്റ്‌വിക്, സ്റ്റാൻസ്റ്റഡ് വിമാനത്താവളങ്ങളിൽ നിരക്ക് ഏഴ് പൗണ്ടിൽനിന്ന് പത്ത് പൗണ്ടായി ഉയർന്നു. എഡിൻബറോ വിമാനത്താവളത്തിൽ ആറ് പൗണ്ടായിരുന്ന നിരക്ക് 8.50 പൗണ്ടായും ബോൺമൗത്തിൽ അഞ്ച് പൗണ്ടായിരുന്നത് എട്ട് പൗണ്ടായും വർധിച്ചു. ലണ്ടൻ സിറ്റി, ലീഡ്സ് ബ്രാഡ്‌ഫോർഡ് വിമാനത്താവളങ്ങളിലും എട്ട് പൗണ്ടാണ് നിരക്ക്.
നിരക്കുകൾ പുനഃപരിശോധിക്കാനുള്ള സർക്കാർ തീരുമാനത്തെ സ്വാഗതം ചെയ്ത് റോഡ് യാത്രക്കാരുടെ സംഘടനയായ ആർഎസി രംഗത്തെത്തി. തങ്ങൾ നടത്തിയ സർവേയിൽ പങ്കെടുത്ത അഞ്ച് ഡ്രൈവർമാരിൽ നാലുപേരും ഈ നിരക്കുകൾ അന്യായമാണെന്ന് അഭിപ്രായപ്പെട്ടതായി സംഘടനയുടെ നയവിഭാഗം മേധാവി റോഡ് ഡെന്നിസ് പറഞ്ഞു. 2026ൽ നിരക്ക് ഏർപ്പെടുത്തിയ ലണ്ടൻ സിറ്റി വിമാനത്താവളമാണ് മിനിറ്റിന് ഏറ്റവും ഉയർന്ന തുക ഈടാക്കുന്നത്. അഞ്ച് മിനിറ്റ് വാഹനമെടുക്കുന്നതിനായി എട്ട് പൗണ്ട് നൽകണം. അതായത് മിനിറ്റിന് 1.60 പൗണ്ട്. ബെൽഫാസ്റ്റ് ഇന്റർനാഷനൽ വിമാനത്താവളത്തിൽ പത്ത് മിനിറ്റിന് അഞ്ച് പൗണ്ടാണ് നിരക്ക്. കഴിഞ്ഞ വർഷത്തേക്കാൾ രണ്ട് പൗണ്ടിന്റെ വർധനയാണിത്. യൂറോപ്യൻ യൂണിയനിലെ ഏറ്റവും തിരക്കേറിയ പത്ത് വിമാനത്താവളങ്ങളിൽ യാത്രക്കാരെ ഇറക്കിവിടുന്നതിന് ഫീസ് ഈടാക്കുന്നില്ലെന്നും ആർഎസി ചൂണ്ടിക്കാട്ടി.
അതേസമയം, വിമാനത്താവളങ്ങളുടെ പ്രവർത്തനത്തിന് ഇത്തരം നിരക്കുകൾ അനിവാര്യമാണെന്നാണ് വ്യവസായ മേഖലയിലെ നിലപാട്. സ്വകാര്യ ഉടമസ്ഥതയിലുള്ള ബ്രിട്ടീഷ് വിമാനത്താവളങ്ങൾ വാണിജ്യാടിസ്ഥാനത്തിലുള്ള നികുതികളും മറ്റ് ചെലവുകളും വഹിക്കുന്നുണ്ടെന്ന് എയർപോർട്സ് യുകെ മേധാവി കാരൻ ഡീ പറഞ്ഞു. സൗജന്യമായി യാത്രക്കാരെ ഇറക്കിവിടാവുന്ന ഇടങ്ങൾ ഉൾപ്പെടെ വിവിധ സൗകര്യങ്ങൾ വിമാനത്താവളങ്ങൾ ഒരുക്കുന്നുണ്ടെന്നും അവർ വ്യക്തമാക്കി. ഗതാഗതക്കുരുക്കും വായുമലിനീകരണവും കുറയ്ക്കാൻ ഇത്തരം നിരക്കുകൾ സഹായിക്കുമെന്നാണ് അനുകൂലിക്കുന്നവരുടെ വാദം. പൊതുഗതാഗത സൗകര്യങ്ങൾ കുറവുള്ള സ്ഥലങ്ങളിൽ നിരക്ക് വർധന നിയന്ത്രിക്കണമെന്ന് സർക്കാർ വിമാനത്താവളങ്ങളോട് ആവശ്യപ്പെട്ടിട്ടുണ്ട്. ജീവിതച്ചെലവിലെ സമ്മർദം കുറയ്ക്കുന്നതിന്റെ ഭാഗമായി അടുത്ത വർഷത്തെ വേനൽക്കാല അവധിക്കാലത്തോടെ കുട്ടികൾക്കൊപ്പം വിമാനത്തിൽ ഇരിക്കുന്നതിന് മാതാപിതാക്കളിൽനിന്ന് അധിക ഫീസ് ഈടാക്കുന്ന രീതിയും അവസാനിപ്പിക്കുമെന്ന് സർക്കാർ നേരത്തെ പ്രഖ്യാപിച്ചിരുന്നു.
Leave a Reply