ലണ്ടൻ: കഴുത്തുഞെരിക്കൽ, ശ്വാസംമുട്ടിക്കൽ, അടുത്ത ബന്ധുക്കൾ തമ്മിലുള്ള ലൈംഗികബന്ധം എന്നിവ ചിത്രീകരിക്കുന്ന അശ്ലീല ദൃശ്യങ്ങൾക്ക് യുകെയിൽ നവംബർ 6 മുതൽ നിരോധനം ഏർപ്പെടുത്തും . 16 വയസ്സിൽ താഴെയുള്ള കുട്ടിയാണെന്ന് നടിച്ചുകൊണ്ടുള്ള ലൈംഗിക ദൃശ്യങ്ങളും നിയമവിരുദ്ധമാകും. വിവിധ രാഷ്ട്രീയ പാർട്ടികളിൽ നിന്നുള്ള സമ്മർദത്തെ തുടർന്ന് ഈ വർഷം ആദ്യം സർക്കാർ പുതിയ നിയമനിർമാണം പ്രഖ്യാപിച്ചിരുന്നു. സ്ത്രീകൾക്കെതിരായ അതിക്രമങ്ങളെ ചിത്രീകരിക്കുന്ന ഇത്തരം ഉള്ളടക്കങ്ങൾ സമൂഹത്തിൽ തെറ്റായ സന്ദേശം നൽകുന്നുവെന്ന് സർക്കാർ വിലയിരുത്തി.
അക്രമത്തെ പ്രോത്സാഹിപ്പിക്കുന്ന ഉള്ളടക്കങ്ങൾക്കെതിരെ നടപടി ശക്തമാക്കുന്നതിന്റെ ഭാഗമായാണ് നിരോധനം നടപ്പാക്കുന്നത്. അശ്ലീല ഉള്ളടക്കങ്ങളുടെ നിയന്ത്രണം സംബന്ധിച്ച് കൺസർവേറ്റീവ് പാർട്ടി അംഗം ഗാബി ബെർട്ടിൻ 2025-ൽ സമർപ്പിച്ച റിപ്പോർട്ടിലാണ് ഇതുസംബന്ധിച്ച ശുപാർശകൾ മുന്നോട്ടുവച്ചത്. സ്ത്രീകളെ കഴുത്തുഞെരിക്കുന്ന ദൃശ്യങ്ങൾ യഥാർഥ ജീവിതത്തിൽ ഗുരുതരമായ പ്രത്യാഘാതങ്ങൾ ഉണ്ടാക്കാമെന്നും ബന്ധുക്കൾ തമ്മിലുള്ള ലൈംഗികബന്ധം, കുട്ടികളായി അഭിനയിക്കുന്ന മുതിർന്നവർ എന്നിവ ഉൾപ്പെടുന്ന ദൃശ്യങ്ങൾ ആശങ്കാജനകമാണെന്നും റിപ്പോർട്ട് ചൂണ്ടിക്കാട്ടി. കഴുത്തുഞെരിക്കൽ യഥാർഥ ജീവിതത്തിൽ കുറ്റകൃത്യമാണെങ്കിലും ഇത്തരം പ്രവൃത്തികൾ ഓൺലൈൻ ദൃശ്യങ്ങളിൽ കാണിക്കുന്നത് ഇതുവരെ നിയമവിരുദ്ധമായിരുന്നില്ല.
നിരോധനം ഫലപ്രദമായി നടപ്പാക്കണമെന്ന് വനിതാ സംഘടനകൾ ആവശ്യപ്പെട്ടു . പുതിയ നിയമം പ്രാബല്യത്തിൽ വരുന്നതിനെ സ്വാഗതം ചെയ്ത ഗാബി ബെർട്ടിൻ, അക്രമം പ്രോത്സാഹിപ്പിക്കുന്ന ഉള്ളടക്കങ്ങൾക്കെതിരെ ശക്തമായ നടപടികൾ ആവശ്യമാണെന്ന് പറഞ്ഞു. സ്ത്രീകൾക്കും പെൺകുട്ടികൾക്കുമെതിരായ അതിക്രമങ്ങൾ തടയാൻ പ്രവർത്തിക്കുന്ന എൻഡ് വയലൻസ് എഗെയ്ൻസ്റ്റ് വിമൻ കോയലിഷനും തീരുമാനത്തെ സ്വാഗതം ചെയ്തു. അശ്ലീല ദൃശ്യങ്ങളിലെ ഇത്തരം ചിത്രീകരണങ്ങൾ പ്രത്യേകിച്ച് യുവാക്കൾക്കിടയിൽ അക്രമത്തെ സാധാരണവൽക്കരിക്കാൻ ഇടയാക്കുമെന്ന് സംഘടനയുടെ ഇടക്കാല ഡയറക്ടർ ജനായ വാക്കർ മുന്നറിയിപ്പ് നൽകി. നിരോധനം നടപ്പാക്കുന്നതിനൊപ്പം ഇത്തരം ഉള്ളടക്കങ്ങൾ നീക്കം ചെയ്യാൻ ഓൺലൈൻ പ്ലാറ്റ്‌ഫോമുകൾക്ക് ബാധ്യത ഏർപ്പെടുത്തുന്ന തരത്തിൽ ഓൺലൈൻ സുരക്ഷാ നിയമത്തിലും മാറ്റം വരുത്തണമെന്ന് സംഘടന സർക്കാരിനോട് ആവശ്യപ്പെട്ടു.
Leave a Reply