ന്യൂസ് ഡെസ്ക്, മലയാളം യുകെ
യൂറോപ്യൻ യൂണിയന്റെ ‘മെയ്ഡ് ഇൻ യൂറോപ്പ്’ നിയമത്തിൽ ബ്രിട്ടനെ ഉൾപ്പെടുത്തുന്നതിനെതിരായ നിലപാടിൽനിന്ന് ഫ്രാൻസ് പിന്മാറി. ചൈനയിൽനിന്നുള്ള കുറഞ്ഞ വിലയിലുള്ള ഉൽപ്പന്നങ്ങളുടെ മത്സരത്തെ നേരിടാനും യൂറോപ്യൻ വ്യവസായങ്ങളെ സംരക്ഷിക്കാനും ലക്ഷ്യമിട്ടുള്ള നിയമത്തിൽ ബ്രിട്ടീഷ് വാഹനനിർമാണ മേഖലയ്ക്കും ഇടം ലഭിക്കാനുള്ള സാധ്യതയാണ് ഇതോടെ തെളിയുന്നത്. നേരത്തെ, യൂറോപ്യൻ യൂണിയന്റെ ആഭ്യന്തര വിപണിയിൽ അംഗമല്ലാത്ത ബ്രിട്ടന് സമാനമായ സംരക്ഷണം നൽകുന്നതിനെ ഫ്രാൻസ് എതിർത്തിരുന്നു. എന്നാൽ ജർമനിയുമായി നടത്തിയ ചർച്ചകൾക്കുശേഷം നിലപാടിൽ മാറ്റം വരുത്തുകയായിരുന്നു.
ബ്രിട്ടനെ പദ്ധതിയിൽ ഉൾപ്പെടുത്തുന്നതിന് പ്രധാന നിബന്ധനയായി യൂറോപ്യൻ യൂണിയന്റെ വ്യാപാര സംരക്ഷണ നടപടികളുമായി ബ്രിട്ടൻ സഹകരിക്കണമെന്നാണ് ഫ്രാൻസിന്റെയും ജർമനിയുടെയും നിർദേശം. ചൈനയിൽ നിന്നുള്ള ഇലക്ട്രിക് വാഹനങ്ങൾക്ക് യൂറോപ്യൻ യൂണിയൻ ഏർപ്പെടുത്തിയ ഉയർന്ന ഇറക്കുമതി തീരുവ ഉൾപ്പെടെയുള്ള നടപടികളുമായി ബ്രിട്ടൻ പൊരുത്തപ്പെടേണ്ടിവരും. നിലവിൽ ചൈനീസ് ഇലക്ട്രിക് വാഹനങ്ങൾക്ക് ബ്രിട്ടൻ 10 ശതമാനം തീരുവയാണ് ഈടാക്കുന്നത്. യൂറോപ്യൻ യൂണിയൻ 2024ൽ ഏർപ്പെടുത്തിയ തീരുവ 45 ശതമാനം വരെയാണ്. ഇത്തരം വ്യവസ്ഥകൾ അംഗീകരിച്ചാൽ ബ്രിട്ടീഷ് വാഹനനിർമാതാക്കൾക്ക് യൂറോപ്യൻ വിപണിയിലെ സർക്കാർ കരാറുകളിലും സബ്‌സിഡികളിലും കൂടുതൽ അവസരങ്ങൾ ലഭിച്ചേക്കും.
യൂറോപ്യൻ വ്യവസായങ്ങളെ ശക്തിപ്പെടുത്തുന്നതിനും ചൈനയെപ്പോലുള്ള രാജ്യങ്ങളിൽനിന്നുള്ള മത്സരത്തിന്റെ ആഘാതം കുറയ്ക്കുന്നതിനുമായി കൊണ്ടുവരുന്ന ഇൻഡസ്ട്രിയൽ ആക്സിലറേറ്റർ ആക്ടിന്റെ ഭാഗമായാണ് ‘മെയ്ഡ് ഇൻ യൂറോപ്പ്’ വ്യവസ്ഥകൾ പരിഗണിക്കുന്നത്. ബ്രിട്ടനെ ഒഴിവാക്കുന്നത് ഇരു രാജ്യങ്ങളിലെയും വാഹനനിർമാണ മേഖലയെയും നിക്ഷേപത്തെയും ബാധിക്കുമെന്ന ആശങ്ക വ്യവസായരംഗത്തും ഉയർന്നിരുന്നു. അതേസമയം, ഫ്രാൻസും ജർമനിയും തമ്മിലുള്ള ധാരണ അന്തിമ നിയമമായി മാറിയിട്ടില്ല. യൂറോപ്യൻ യൂണിയൻ അംഗരാജ്യങ്ങളുടെയും യൂറോപ്യൻ പാർലമെന്റിന്റെയും അംഗീകാരം ഉൾപ്പെടെയുള്ള നടപടികൾ ഇനിയും പൂർത്തിയാകേണ്ടതുണ്ട്.
Leave a Reply