ന്യൂസ് ഡെസ്ക്, മലയാളം യുകെ
സൈപ്രസ്: കുടുംബത്തോടൊപ്പം അവധിക്കാലം ചെലവഴിക്കാനെത്തിയപ്പോൾ രണ്ടുവയസ്സുകാരനായ മകൻ ഹോട്ടലിന്റെ നാലാം നിലയിലെ ജനാലയിൽനിന്ന് വീണു മരിച്ച സംഭവത്തിൽ പിതാവിന് പിഴ. ഇംഗ്ലണ്ടിലെ എസെക്സിൽ നിന്നുള്ള ജോഷ്വ ഫോസ്റ്ററിനാണ് (37) സൈപ്രസിലെ കോടതി 3,000 യൂറോ (ഏകദേശം 2.5 ലക്ഷം രൂപ) പിഴ വിധിച്ചത്. അപകടകരമായ പ്രവൃത്തിയിലൂടെ മരണത്തിന് കാരണമായെന്ന കുറ്റം ഫോസ്റ്റർ സമ്മതിച്ചിരുന്നു. ജൂലൈ 12ന് കുടുംബത്തിന്റെ അവധിക്കാലത്തിന്റെ ആദ്യദിവസമായിരുന്നു ദാരുണമായ സംഭവം.
സൈപ്രസിലെ ക്ലോറാക്കസിലുള്ള ഫൈവ് സ്റ്റാർ കിങ് എവെൽത്തൺ ബീച്ച് ഹോട്ടൽ ആൻഡ് റിസോർട്ടിൽ വൈകിട്ട് ആറുമണിയോടെയായിരുന്നു അപകടം. പുറത്തുള്ള വാട്ടർ പാർക്ക് കണ്ട കുട്ടിയെ കാഴ്ച കാണിക്കാനായി ജനാലയുടെ അരികിൽ ഇരുത്തുകയായിരുന്നു പിതാവ്. ജനാല അടച്ചിരിക്കുകയാണെന്നാണ് അദ്ദേഹം കരുതിയത്. എന്നാൽ ജനാലയുടെ ഒരു ഭാഗം തുറന്നുകിടക്കുകയായിരുന്നു. ഏകദേശം 12 മീറ്റർ ഉയരത്തിൽനിന്ന് താഴേക്കു വീണ കുട്ടിയെ പാഫോസ് ജനറൽ ആശുപത്രിയിലെത്തിച്ചെങ്കിലും രക്ഷിക്കാനായില്ല. ജനാല തുറന്നു കിടക്കുന്നതായി തിരിച്ചറിയാൻ സഹായിക്കുന്ന വ്യക്തമായ അടയാളങ്ങൾ ഉണ്ടായിരുന്നില്ലെന്ന് കോടതി നിരീക്ഷിച്ചു. കുട്ടിയെ മനഃപൂർവം അപകടത്തിലാക്കിയതിന് തെളിവില്ലെന്നും ജഡ്ജി വ്യക്തമാക്കി.
സംഭവത്തിൽ തനിക്ക് സംഭവിച്ചത് ഒരു നിമിഷത്തെ പിഴവാണെന്നും മകനെ പിടിക്കുന്നതിനുമുമ്പ് അവൻ താഴേക്കു വീണുപോയെന്നും ഫോസ്റ്റർ പൊലീസിന് നൽകിയ മൊഴിയിൽ പറഞ്ഞു. മകന്റെ നഷ്ടം കുടുംബത്തിന് ഒരിക്കലും മായാത്ത വേദനയാണെന്ന് കുടുംബം പ്രസ്താവനയിൽ അറിയിച്ചു. കോടതി നടപടികൾ അവസാനിച്ചതിൽ ആശ്വാസമുണ്ടെങ്കിലും മകന്റെ വേർപാടിന്റെ വേദന എന്നും ഒപ്പമുണ്ടാകുമെന്നും അവർ പറഞ്ഞു. ഫോസ്റ്ററിന്റെ പശ്ചാത്താപം വ്യക്തമാണെന്ന് അഭിഭാഷകൻ അലക്സാണ്ട്രോസ് അലക്സാണ്ട്രു പ്രതികരിച്ചു. സംഭവത്തിനു പിന്നാലെ എട്ടുദിവസം കസ്റ്റഡിയിൽ കഴിഞ്ഞ ഫോസ്റ്ററിന് കുടുംബത്തോടൊപ്പം ദുഃഖം പങ്കിടാനുള്ള അവസരം നഷ്ടമായെന്നും അഭിഭാഷകൻ പറഞ്ഞു.
Leave a Reply