ന്യൂസ് ഡെസ്ക്, മലയാളം യുകെ
ജൈവഭീഷണികൾ നേരിടാനുള്ള പ്രതിരോധം ശക്തിപ്പെടുത്താൻ നിർമിതബുദ്ധി (എഐ) അധിഷ്ഠിത ദേശീയ ജൈവസുരക്ഷാ ലാബ് സ്ഥാപിക്കാനൊരുങ്ങി ബ്രിട്ടൻ. പദ്ധതിക്കായി 100 മില്യൺ പൗണ്ട് അനുവദിക്കുമെന്ന് സർക്കാർ പ്രഖ്യാപിച്ചു. ലോകത്ത് ഇത്തരത്തിലുള്ള ആദ്യ സ്ഥാപനമെന്ന വിശേഷണത്തോടെയാണ് പദ്ധതി അവതരിപ്പിച്ചിരിക്കുന്നത്. സൈബർ ആക്രമണങ്ങൾ, ജൈവഭീഷണികൾ, എഐ ഉപയോഗിച്ചുള്ള സുരക്ഷാ വെല്ലുവിളികൾ എന്നിവ നേരിടാനുള്ള രാജ്യത്തിന്റെ ശേഷി വർധിപ്പിക്കുന്നതിനായി ബജറ്റിൽ കൂടുതൽ തുക വകയിരുത്താനും സർക്കാർ തീരുമാനിച്ചിട്ടുണ്ട്. പ്രമുഖ എഐ കമ്പനികളുടെ പിന്തുണയോടെയാകും പുതിയ ലാബിന്റെ പ്രവർത്തനം.
പുതിയ സ്ഥാപനത്തിന് ആവശ്യമായ എഐ സാങ്കേതികവിദ്യ ലഭ്യമാക്കുന്നതിനായി ഓപ്പൺഎഐയും ആന്ത്രോപിക്കും ചേർന്ന് 200 മില്യൺ ഡോളറിന്റെ എഐ മോഡൽ ക്രെഡിറ്റുകൾ നൽകും. അതേസമയം, അത്യാധുനിക എഐ മോഡലുകളുടെ അപകടസാധ്യതകൾ വിലയിരുത്തുന്ന യുകെ എഐ സെക്യൂരിറ്റി ഇൻസ്റ്റിറ്റ്യൂട്ടിന് 120 മില്യൺ പൗണ്ട് അധികമായി അനുവദിക്കും. സൈബർ പ്രതിരോധം ശക്തിപ്പെടുത്താൻ എഐ ഏജന്റുകൾ ഉപയോഗിക്കുന്ന നാഷണൽ സൈബർ ഷീൽഡ് പദ്ധതിക്ക് 60 മില്യൺ പൗണ്ടും രാജ്യത്തെ നിർണായക അടിസ്ഥാനസൗകര്യങ്ങളിലെ സുരക്ഷാ വീഴ്ചകൾ കണ്ടെത്തുന്ന നാഷണൽ എക്സ്പോഷർ ആൻഡ് റിയൽ-ടൈം വൾനറബിലിറ്റി (NERV) സെന്ററിന് 70 മില്യൺ പൗണ്ടും അനുവദിക്കാനാണ് തീരുമാനം. ശാസ്ത്രഗവേഷണം, നൂതന ചിപ്പ് സാങ്കേതികവിദ്യ, ബ്രിട്ടീഷ് എഐ കമ്പനികൾ എന്നിവയ്ക്ക് പിന്തുണ നൽകുന്നതിലൂടെ ദേശീയ സുരക്ഷയ്ക്കൊപ്പം തൊഴിലവസരങ്ങളും വർധിപ്പിക്കുകയാണ് ലക്ഷ്യം.
എഐ സാങ്കേതികവിദ്യയുടെ വളർച്ച പുതിയ സുരക്ഷാ വെല്ലുവിളികൾ ഉയർത്തുന്ന സാഹചര്യത്തിലാണ് ബ്രിട്ടന്റെ ഈ നീക്കം. വെബ് വികസനത്തിൽ വ്യാപകമായി ഉപയോഗിക്കുന്ന PHP പ്രോഗ്രാമിങ് ഭാഷയിലെ ഗുരുതരമായ സുരക്ഷാ പിഴവുകൾ പുറത്തുവന്നതിനെ തുടർന്ന് മുൻകരുതലായി ചില വെബ്സൈറ്റുകൾ പ്രവർത്തനരഹിതമാക്കേണ്ട സാഹചര്യം നേരത്തെയുണ്ടായിരുന്നു. ഈ പിഴവുകൾ ഉപയോഗിച്ചുള്ള വിജയകരമായ ആക്രമണങ്ങൾ റിപ്പോർട്ട് ചെയ്തിട്ടില്ലെങ്കിലും, ദീർഘകാലമായി കണ്ടെത്തപ്പെടാതെ കിടക്കുന്ന സോഫ്റ്റ്‌വെയർ പിഴവുകൾ എഐയുടെ സഹായത്തോടെ വേഗത്തിൽ കണ്ടെത്താനും ദുരുപയോഗം ചെയ്യാനും കഴിയുമെന്ന ആശങ്ക വിദഗ്ധർക്കുണ്ട് . പുതിയ ലാബിന്റെ കൃത്യമായ പ്രവർത്തനപരിധി സംബന്ധിച്ച വിശദാംശങ്ങൾ പുറത്തുവന്നിട്ടില്ല.
Leave a Reply