Association

ഇടുക്കി ജില്ലാ സംഗമം യുകെക്ക് ഇത് അഭിമാന മുഹൂർത്തം. അകാലത്തിൽ മരണമടഞ്ഞ കുഞ്ഞ് അശ്വിന്റയും, കുടുംബാഗങ്ങളുടെയും സ്വപ്നം യാഥാർത്ഥമാക്കി ഇടുക്കി ജില്ലാ സംഗമം. 2018 ൽ ക്രിസ്തുമസിനോട് അനുബന്ധിച്ച് നടത്തിയ ഇടുക്കി ജില്ലാ സംഗമത്തിന്റെ ഇരുപത്തി ഒന്നാമത്തെ ചാരിറ്റിയിൽ മേരികുളം, തോണിത്തടിയിൽ ഉള്ള മൂന്ന് വയസുകാരൻ അശ്വിന് ഒരു സ്നേഹ വീട് പണിത് നല്കുവാൻ നിങ്ങൾ ഏവരുടെയും സഹായം ഇടുക്കി ജില്ലാ സംഗമം അഭ്യർത്ഥിക്കുകയും, 2018ലെ ക്രിസ്മസ് ചാരിറ്റിക്ക് 6005 പൗണ്ട് ലഭിക്കുകയും ചെയ്തു, 2019 ൽ അശ്വിനും കുടുംബത്തിനുമായി വീട് പണി തുടങ്ങുകയും ഈ ക്രിസ്മസിന് മുൻമ്പ് വീടിന്റെ പണി പൂർത്തിയാക്കി അശ്വിന്റ കുടുംബത്തിന് ക്രിസ്മസ് ഗിഫ്റ്റായി അവരുടെ സ്വപ്നമായ ഈ ഭവനം KC രാജൻ കിഴക്കേതലക്കൽ, ജോഷി മണിമല ( ഫ്രൺസ് ഓഫ് കട്ടപ്പന പ്രസിഡൻറ്), സിജോ എവറസ്റ്റ്, ( ഫ്രൺസ് ഓഫ് കട്ടപ്പന വൈസ് പ്രസിഡൻറ് ) ബ്ലോക്ക് റീസോഴ്സസ് കോർഡിനേറ്റേഴ്സ് ആയ ശ്യാമ, സ്വപ്ന എന്നിവരുടെ സാന്നിധ്യത്തിൽ എബ്രഹാം തോമസ് കളപ്പുരക്കൽ വീടിന്റെ കീ അശ്വിന്റ പിതാവിന് കൈമാറി…

ഇടുക്കി ജില്ലാ സംഗമത്തിന്റെ നേത്യത്തിൽ ഇപ്പോൾ മറ്റ് മൂന്ന് വീടുകളുടെ പണി കൂടി പുരോഗമിച്ചു കൊണ്ട് ഇരിക്കുന്നു. ഇടുക്കി ജില്ലാ സംഗമം യുകെയുടെ നേത്യത്തിൽ 95 ലക്ഷം രൂപാ നാട്ടിലും, യുകെയിലുമായി ഇതുവരെ കൊടുത്തു കഴിഞ്ഞു. ഈ ചാരിറ്റി കളക്ഷനികളിൽ പങ്കാളികളായ മുഴുവൻ മനുഷ്യ സ്നേഹികളെയും, ഇടുക്കി ജില്ലാ സംഗമത്തിന്റെ 2018ലെ ചാരിറ്റി പ്രവർത്തനങ്ങൾക്ക് നേത്യത്തം വഹിച്ച മുൻ കൺവീനർ ബാബു തോമസ്, ഫീനിക്സ് നോർത്താംബറ്റൺ ക്രിക്കറ്റ് ക്ലബ്, ഇടുക്കി ജില്ലാ സംഗമം കമ്മറ്റികാരെയും, എല്ലാ
പ്രവർത്തവകരെയും ഇടുക്കിജില്ലാ സംഗമം ഈ അവസരത്തിൽ നന്ദിയോടെ ഓർക്കുന്നൂ.

2019 ക്രിസ്മസ് / ന്യൂ ഇയ്യർ ചാരിറ്റി ഇപ്പോൾ പുരോഗമിച്ചു കൊണ്ട് ഇരിക്കുന്നു 2020ൽ കട്ടപ്പനയുള്ള ജോയി ചേട്ടനും, കുടുബത്തിനും, കുമാരമംഗലത്തുള്ള ലീല എന്ന സഹോദരിക്കും, മക്കൾക്കും ഇവരുടെ സ്വപ്നമായ ഒരു ഭവനം നിർമ്മിച്ച് നൽകുക എന്ന ഉത്തരവാദിത്വം ഇടുക്കി ജില്ലാ സംഗമം യുകെ ഏറ്റടുത്തിരിക്കുയാണ്..
ഈ രണ്ട് കുടുംബങ്ങളുടെയും സ്വപ്നമായ ഭവനങ്ങൾ നിർമ്മിച്ച് നല്കുവാൻ
നിങ്ങൾ ഒരോരുത്തരുടെയും അത്മാർത്ഥമായ സഹായ സഹകരണങ്ങൾ
പ്രതീക്ഷിച്ചു കൊള്ളുന്നു.
നിങ്ങൾ നൽകുന്ന തുകയുടെ വലിപ്പത്തിൽ അല്ല നിങ്ങളുടെ സഹകരണമാണ് നമ്മുടെ വിജയം.

ഇടുക്കിജില്ലാ സംഗമത്തിന്റ അക്കൗണ്ട് വിവരങ്ങൾ ചുവടെ ചേർക്കുന്നു.

BANK – BARCLAYS

ACCOUNT NAME – IDUKKI JILLA SANGAMAM .

ACCOUNT NO — 93633802.
SORT CODE — 20 76 92.

സ്നേഹത്തോടെ,
ഇടുക്കി ജില്ലാ സംഗമം
കമ്മറ്റിക്ക് വേണ്ടി,
കൺവീനർ,
ജിമ്മി ജേക്കബ്.

കഴിഞ്ഞ 17വർഷക്കാലം സ്വിറ്റ്സർലാൻഡിലെ മലയാളി മനസുകളിൽപ്രവർത്തനമികവുകൊണ്ടും, സംഘാടന ശേഷികൊണ്ടും ചിരപ്രതിഷ്ട നേടിയ Be Friends Switzerland, 2020-21വർഷത്തേക്കുള്ള സംഘടനാഭാരവാഹികളെ തിരഞ്ഞെടുക്കുന്നതിലേക്കുള്ള പ്രത്യേഗ യോഗം ഡിസംബർ 7ന് സൂറിച്ചിലെ അഫൊൽട്ടണിൽ ചേരുകയുണ്ടായി.

പ്രസിഡന്റ്‌ ബിന്നി വെങ്ങപള്ളിയുടെ അധ്യക്ഷതയിൽ ചേർന്ന യോഗത്തിൽ സെക്രട്ടറി ടോമി വിരുതീയിൽ കഴിഞ്ഞ 2 വർഷത്തെ പ്രവർത്തനറിപ്പോർട്ടും, ഓഡിറ്റ് ചെയ്ത കണക്ക് ട്രഷറർ ജോയ് തടത്തിലും അവതരിപ്പിച്ചു.

പ്രസിഡന്റ്‌ ബിന്നി വെങ്ങപ്പള്ളിൽ തന്റെ കാലയളവിലെ പ്രവർത്തനങ്ങളിൽ കൂടെ സഹകരിച്ച എല്ലാവർക്കും നന്ദി പ്രകാശിപ്പിക്കുകയും പുതിയതായി തിരഞ്ഞെടുക്കുവാൻ പോകുന്ന കമ്മിറ്റിക്ക് എല്ലാവിധ ആശംസകൾ അർപ്പിക്കുകയും ചെയ്തു സംസാരിച്ചു.

ശ്രീ ബിജു പാറത്തലക്കലും, ശ്രീമതി പുഷ്പി പോളും യഥാക്രമം റിട്ടേണിങ്ഓഫിസറും, സെക്രട്ടറിയും ആയി നടന്ന സംഘടനാ തെരഞ്ഞെടുപ്പിൽ പുതിയ ഭാരവാഹികളെ തിരഞ്ഞെടുക്കുകയുണ്ടായി:

പ്രസിഡന്റ്‌ – പ്രിൻസ് കാട്രൂകുടിയിൽ
വൈസ്പ്രസിഡന്റ്‌ – ജോസ് പല്ലിശ്ശേരി
സെക്രട്ടറി – ബേബി തടത്തിൽ
ജോ.സെക്രട്ടറി – ജോമോൻ പത്തുപറയിൽ
ട്രെഷറർ – അഗസ്റ്റിൻ മാളിയേക്കൽ
ആർട്സ് കൺവീനർ – ലിജിമോൻ മനയിൽ
സ്പോർട്സ് കൺവീനർ – റെജി പോൾ
PRO –അനിൽ ചക്കാലക്കൽ
Ex-officio –ബിന്നി വെങ്ങപ്പള്ളിൽ
Ex-officio –ടോമി വിരുതിയേൽ
എക്സിക്യൂട്ടീവ്ര് മെംബേർസ്:
ശ്രീമതി ജൂബി അലാനിക്കൽ,
ജോയ് തടത്തിൽ,
സെബാസ്റ്റ്യൻ കാവുങ്കൽ,
ജെസ്വിൻ പുതുമന,
ഡേവിസ് വടക്കുംചേരി,
ലാൻസ് മാപ്ലകയിൽ,
ജോൺ വെളിയൻ,
വർഗീസ് കരുമാത്തി,
അൽഫിൻ തെനംകുഴിയിൽ

ഓഡിറ്ററായി ടോമി തൊണ്ടാംകുഴിയേയും യോഗം തിരഞ്ഞെടുത്തു.

ശ്രീമതി ജൂബി അലാനിക്കൽ വനിതാ ഫോറത്തിന്റെ കോഓർഡിനേറ്റർ ആയും തിരഞ്ഞെടുക്കപ്പെട്ടു.

പുതിയ പ്രസിഡന്റ്‌ പ്രിൻസ് കാട്രുകുടിയിൽ, തന്നെ രണ്ടാം പ്രാവശ്യവും പ്രസിഡന്റായി തെരഞ്ഞെടുത്തതിലൂടെ തന്നിൽ അർപ്പിച്ച വിശ്വാസത്തിനും, സ്നേഹത്തിനും നന്ദി പ്രകടിപ്പിച്ചു, അടുത്ത വർഷങ്ങളിൽ സംഘടന ഒന്നിച്ചു ചേർന്ന് പ്രവർത്തിക്കുവാൻ ഉതകുന്ന രീതിയിൽ, സംഘടനയിലെ അംഗങ്ങളേയും, സംഘടനയുമായി കാലാകാലങ്ങളിൽ സഹകരിച്ചുവരുന്നവരെയും ഉൾപ്പെടുത്തി, കലാമൂല്യമുള്ള പ്രോഗ്രാമുകൾ തയ്യാറാക്കുന്നതിന് പ്രഥമ പരിഗണന നൽകുമെന്ന് പ്രസിഡന്റ്‌ അറിയിച്ചു.

സംഘടനയിലേക്കും, സംഘടന നടത്തുന്ന കലാ കായിക സാംസ്‌കാരിക പരിപാടികളിലേക്കും, ചാരിറ്റി പ്രവർത്തനങ്ങളിലും ഇനിയും കൂടുതൽ ജനപങ്കാളിത്തം ഉണ്ടാകേണ്ടതിനെക്കുറിച്ചു യോഗം ചർച്ച ചെയ്തു, സംഘടനയിലെ അംഗങ്ങൾ പങ്കെടുക്കുന്ന കലാപരിപാടികൾ ഭാവിയിൽ കൂടുതൽ അവതരിപ്പിക്കാൻ തീരുമാനിച്ചു. സംഘടനയുടെ നെടുംതൂണുകളായ വനിതകളുടെ പുതിയ കാഴ്ചപ്പാടുകളിലൂടെ പ്രവർത്തങ്ങൾ സംഘടനക്ക് കൂടുതൽ ശക്തി പകരുവാൻ സഹായിക്കുന്നതാണ് എന്ന് യോഗം വിലയിരുത്തി. ഭാവി വാഗ്‌ദങ്ങളായ ചുണക്കുട്ടികളായ യൂത്ത് അംഗങ്ങൾ സംഘടനയുടെ പ്രവർത്തങ്ങളിൽ ക്രിയാത്മകമായി ചെയ്യുന്ന കാര്യങ്ങളെ യോഗം പ്രത്യേകം അഭിനന്ദിച്ചു. സെക്രട്ടറി ബേബി തടത്തിലും, ട്രെഷറർ അഗസ്റ്റിൻ മാളിയേക്കലും യോഗത്തെ അഭിസംബോധന ചെയ്തു.

സൗഹ്രദത്തിന്റെ പച്ചമേലാപ്പിൻ കീഴിൽ തളിരിട്ട ബി ഫ്രണ്ട്സിന്റെ ഭാവി യാത്രയിൽ സൗഹ്രദത്തിന്റെ സ്നേഹമർമരങ്ങൾ തന്നെ ഇനിയും കേൾക്കുമാറാകട്ടെ എന്ന് അംഗങ്ങൾ പരസ്പരം ആശംസിച്ചു യോഗം പിരിഞ്ഞു.

സജീഷ് ടോം
(യുക്മ നാഷണൽ പി ആർ ഒ & മീഡിയ കോർഡിനേറ്റർ)

ലോകത്തിലെ ഏറ്റവും വലിയ പ്രവാസി മലയാളി കൂട്ടായ്മയായ യൂണിയന്‍ ഓഫ് യു കെ മലയാളി അസോസിയേഷൻസിന്റെ (യുക്മ) ദേശീയ ഭരണസമിതിയുടെ നേതൃത്വത്തില്‍ ലണ്ടനില്‍ വച്ച് “യുക്മ ആദരസന്ധ്യ 2020” എന്നപേരിൽ വിപുലമായ സാംസ്ക്കാരിക സംഗമം സംഘടിപ്പിക്കുന്നു. നോര്‍ത്ത് ലണ്ടനിലെ എന്‍ഫീല്‍ഡില്‍ വച്ച് 2020 ഫെബ്രുവരി ഒന്നാം തീയതി ശനിയാഴ്ച്ച ഒരു മുഴുദിന പരിപാടി എന്നനിലയിലാണ് പ്രോഗ്രാം വിഭാവനം ചെയ്തിരിക്കുന്നത്. യുക്മയുടെ മെഗാ സമ്മാനപദ്ധതിയായ യു-ഗ്രാന്റ് ലോട്ടറിയുടെ നറുക്കെടുപ്പും “ആദരസന്ധ്യ 2020″നോടനുബന്ധിച്ച് നടത്തപ്പെടുന്നതായിരിക്കും.

സംഗീത-നൃത്ത ഇനങ്ങള്‍ക്കൊപ്പം വൈവിധ്യമാര്‍ന്ന നിരവധി പരിപാടികളും കോര്‍ത്തിണക്കി, യുക്മ ലണ്ടനില്‍ സംഘടിപ്പിക്കുന്ന ഏറ്റവും മനോഹരവും ആകര്‍ഷകവുമായ ഒന്നായിട്ടാവും “ആദരസന്ധ്യ 2020” നടത്തപ്പെടുന്നത്. നിലവിലുള്ള ഭരണസമിതി അധികാരമേറ്റത് മുതല്‍ കഴിഞ്ഞ ഒരു വര്‍ഷക്കാലം സംഘടിപ്പിക്കപ്പെട്ട എല്ലാ പരിപാടികളും ജനപങ്കാളിത്തം കൊണ്ടും സംഘാടകമികവു കൊണ്ടും ശ്രദ്ധേയമായപ്പോൾ, ലണ്ടൻ പ്രോഗ്രാം എല്ലാറ്റിലും മികച്ചതാക്കുവാനുള്ള തയ്യാറെടുപ്പിലാണ് സംഘാടകർ.

യുക്മയുടെ യശ്ശസ്സ് ആഗോളതലത്തില്‍ ഉയര്‍ത്തിയ യുക്മ ദേശീയ കലാമേളകളുടെ ചരിത്രത്തില്‍ ആദ്യമായി കലാതിലകം-കലാപ്രതിഭ പട്ടങ്ങള്‍ ഒരേ റീജിയണില്‍ നിന്നുള്ളവര്‍ നേടിയെടുത്തുകൊണ്ട് മാഞ്ചസ്റ്ററില്‍ നടന്ന പത്താമത് ദേശീയ കലാമേള ശ്രദ്ധേയമായിരുന്നു. എന്‍ഫീല്‍ഡ് മലയാളി അസോസിയേഷനില്‍ നിന്നുള്ള ദേവപ്രിയ ബിബിരാജ് കലാതിലകപ്പട്ടം സ്വന്തമാക്കിയപ്പോള്‍ ലൂട്ടണ്‍ കേരളൈറ്റ്സില്‍ നിന്നുള്ള ടോണി അലോഷ്യസ് കലാപ്രതിഭയായി തിളങ്ങി. യുക്മയുടെ ഈ രണ്ടു അപൂർവ്വ താരങ്ങളെയും ആദരിക്കുന്ന ഒരു ചടങ്ങ് ലണ്ടനില്‍ സംഘടിപ്പിക്കുമെന്ന്, യുക്മ ദേശീയ കലാമേളയുടെ അവലോകനത്തോടനുബന്ധിച്ച് പ്രസിഡന്റ് മനോജ്കുമാര്‍ പിള്ളയും ജനറല്‍ സെക്രട്ടറി അലക്സ് വര്‍ഗ്ഗീസും പ്രഖ്യാപിച്ചിരുന്നു. “ആദരസന്ധ്യ 2020” ലണ്ടനില്‍ സംഘടിപ്പിക്കപ്പെടുമ്പോൾ അത് യാഥാർഥ്യമാകുകയാണ്.

ഇവര്‍ക്കൊപ്പം ലോകമെമ്പാടുമുള്ള മലയാളി സമൂഹത്തില്‍ നിന്നും വിവിധ മേഖലകളില്‍ നേട്ടങ്ങള്‍ കൈവരിച്ചിട്ടുള്ളതും, പ്രവാസി മലയാളികള്‍ക്കായി വിവിധ സഹായങ്ങള്‍ നല്‍കിയിട്ടുള്ളതുമായ ഏതാനും വ്യക്തികളെയും കൂടി ആദരിക്കുന്നതിന് യുക്മ ലക്ഷ്യമിടുന്നുണ്ട്. യുക്മയുടെ അംഗ അസോസിയേഷന്‍ ഭാരവാഹികള്‍, യുക്മ പ്രതിനിധികള്‍, യുക്മയുടെ വിവിധ പോഷക സംഘടനാ ഭാരവാഹികള്‍ തുടങ്ങിയവര്‍ക്ക്, അത്തരത്തിൽ ആദരിക്കപ്പെടുന്നതിന് അര്‍ഹതയുണ്ടെന്ന് ബോധ്യമുള്ളവരുടെ വിശദവിവരങ്ങള്‍ നല്‍കാവുന്നതാണ്. യുക്മ പ്രസിഡന്റിന്റെ അധ്യക്ഷതയിലുള്ള സബ് കമ്മറ്റി ഇത് സംബന്ധിച്ച അന്തിമമായ തീരുമാനം കൈക്കൊള്ളുന്നതായിരിക്കും. ആദരിക്കപ്പെടേണ്ടവരുടെ വിവരങ്ങള്‍ secretary.ukma@gmail.com എന്ന ഇ-മെയിൽ വിലാസത്തിലേക്ക് ഡിസംബര്‍ 30 വൈകുന്നേരം 5 മണിക്ക് മുൻപായി അയക്കേണ്ടതാണ്.

ലണ്ടൻ: ഗിൽഫോർഡ് അയൽക്കൂട്ടം കൾച്ചറൽ അസ്സോസിയേഷന്റെ ക്രിസ്മസ്-ന്യൂഇയർ ആഘോഷം ഡിസംബർ 28 ശനിയാഴ്ച്ച വിപുലമായ പരിപാടികളോടെ നടത്തുന്നു. ഫെയർലാൻഡ്സ് കമ്മ്യൂണിറ്റി സെന്ററിൽ സംഘടിപ്പിക്കുന്ന ആഘോഷപരിപാടികളിൽ യുക്മ ദേശീയ പ്രസിഡണ്ട് മനോജ് കുമാർ പിള്ളയും
ഗിൽഫോർഡ് മേയർ കൗൺസിലർ റിച്ചാർഡ് ബില്ലിംഗ്ടനും മുഖ്യഅതിഥികളായി പങ്കെടുക്കും. കലാവിരുന്നിന് ശോഭയേകുവാനായി യുക്മ ദേശീയ കലാപ്രതിഭ ടോണി അലോഷ്യസും പങ്കെടുക്കുന്നു.

ജി എ സി എ യുടെ കുരുന്നു പ്രതിഭകളും യുവ പ്രതിഭകളും ചേർന്ന് അവതരിപ്പിക്കുന്ന നവ്യാനുഭവം സമ്മാനിക്കുന്ന നേറ്റിവിറ്റി ഷോയോടെയാണ് ആഘോഷപരിപാടികൾക്ക് തുടക്കം കുറിക്കുന്നത് . തുടർന്നു നടക്കുന്ന സമ്മേളനത്തിൽ ജി എ സി എ പ്രസിഡണ്ട് ശ്രീ നിക്സൺ ആന്റണി അധ്യക്ഷത വഹിക്കും. യുക്മ ദേശീയ പ്രസിഡണ്ട് മനോജ് കുമാർ പിള്ള ക്രിസ്മസ് ന്യൂ ഇയർ ആഘോഷ പരിപാടികൾ ഉദ്ഘാടനം ചെയ്ത് സംസാരിക്കും. ഗിൽഫോർഡിൽ പ്രവർത്തിച്ചിരുന്ന അയൽക്കൂട്ടം എന്ന കൂട്ടായ്മ പുനഃസംഘടിപ്പിച്ച് രൂപീകൃതമായ അയൽക്കൂട്ടം കൾച്ചറൽ അസോസിയേഷന്റെ ഔദ്യോഗികമായ ഉദ്ഘാടനവും ബഹു: ഗിൽഫോർഡ് മേയർ കൗൺസിലർ റിച്ചാർഡ് ബില്ലിംഗ് ടൺ നിർവഹിക്കുന്നതുമാണ് .

സ്വാദിഷ്ടമായ വിഭവങ്ങൾ അടങ്ങിയ ക്രിസ്മസ് ലഞ്ചിന് ശേഷം വൈവിധ്യമാർന്ന പരിപാടികളാണ് കൾച്ചറൽ കോർഡിനേറ്റർസ് ആയ മോളി ക്ളീറ്റ്‌സും ഫാൻസി നിക്‌സനും ചേർന്ന് ക്രമീകരിച്ചിരിക്കുന്നത് . ജി എ സി എ യുടെ കലാകാരന്മാരും കലാകാരികളും ചേർന്ന് അവതരിപ്പിക്കുന്ന പുതുമയാർന്ന കലാപരിപാടികളോടൊപ്പം ഇക്കഴിഞ്ഞ യുക്മ നാഷണൽ കലാമേളയിൽ പങ്കെടുത്ത മുഴുവൻ ഇനങ്ങളിലും ഒന്നാം സമ്മാനം കരസ്ഥമാക്കി യുക്മ ദേശീയ കലാപ്രതിഭയായി തിരഞ്ഞെടുക്കപ്പെട്ട ടോണി അലോഷ്യസ് ആരെയും വിസ്മയിപ്പിക്കുന്ന മാസ്മരിക കലാപ്രകടനങ്ങളുമായി ആഘോഷപരിപാടികളെ വർണ്ണാഭമാക്കുവാനായി എത്തുന്നു. ടോണിയുടെ സഹോദരിയും യുക്മ ഈസ്റ്റ് ആംഗ്ലിയ റീജിയണൽ കലോൽത്സവത്തിൽ രണ്ടുതവണ കലാതിലകവും, പ്രശസ്ത ഗായകരായ ശ്രീ ജി വേണുഗോപാൽ, ശ്രീ സ്റ്റീഫൻ ദേവസി എന്നിവരോടൊപ്പം ഗാനങ്ങളും ആലപിച്ചിട്ടുള്ള യുകെയിലെ അറിയപ്പെടുന്ന ഗായികയും നർത്തകിയുമായ ആനി അലോഷ്യസും ജി എ സി എ യുടെ ആഘോഷപരിപാടികളെ സംഗീത സാന്ദ്രമാക്കുവാനായി പങ്കെടുക്കുന്നു. എല്ലാവർക്കും പുതുമയാർന്നതും ഹൃദ്യവുമായ കലാ വിരുന്ന് സമ്മാനിക്കുന്ന ജി എ സി എ യുടെ ക്രിസ്മസ് ന്യുഇയർ ആഘോഷ പരിപാടിയിൽ സഹൃദയരായ മുഴുവൻ ആളുകളും പങ്കെടുത്ത് വിജയിപ്പിക്കണമെന്ന് പ്രസിഡണ്ട് നിക്സൺ ആന്റണി, സെക്രട്ടറി സനു ബേബി ട്രഷറർ ഷിജു മത്തായി എന്നിവർ അഭ്യർത്ഥിച്ചു.

സ്ഥലത്തിന്റെ വിലാസം:
FAIRLANDS COMMUNITY CENTRE, GUILDFORD, GU3 3NA

ഗ്രെയ്റ്റ് യാർമൗത് (Great Yarmouth) ഗോള്‍സ്റ്റന്‍ ഹിന്ദു കമ്മ്യൂണിറ്റിയുടെ നേതൃത്വത്തില്‍ ഐസിലേ ഹിന്ദുക്ഷേത്രത്തിൽ വച്ച് ഡിസംബര്‍ 14 ശനിയാഴ്ച പ്രസാദ് തന്ത്രിയുടെ കാര്‍മികത്വത്തില്‍ അയ്യപ്പപൂജ ഭക്തി ആദരവുകളോടെ നടത്തി. നോർവിച്ച്, ആറ്റിൽബ്രറോ എന്നീ സ്ഥലങ്ങളിൽ നിന്നും സമീപപ്രദേശങ്ങളിലെ ഭക്തജനങ്ങളുള്‍പ്പെടെ നൂറില്‍ പരം പേര്‍ പൂജയില്‍ പങ്കെടുത്തു.

ഗോള്‍സ്റ്റന്‍ ഹിന്ദു കമ്മ്യൂണിറ്റിയുടെ നേതൃത്വത്തില്‍ നടത്തിയ ഭജന ഭക്തര്‍ക്ക് പ്രതേക അനുഭവമായിരുന്നു. പടിപൂജ, വിളക്ക് പൂജ, അര്‍ച്ചന എന്നീ ചടങ്ങുകള്‍ ഭക്തിപൂര്‍വ്വം നടത്തി. പൂജക്ക് ശേഷം പ്രസാദം, അപ്പം, അരവണ വിതരണവും ഉണ്ടായിരുന്നു. ശബരിമലയിലെ പോലുള്ള ഭക്തി സാന്ദ്രമായ ഒരു അനുഭവം ഉളവാക്കി എന്ന് പങ്കെടുത്ത വിശ്വാസികൾ പങ്കുവെച്ചു.

[ot-video][/ot-video]

ബെഡ്ഫോർഡ് : ക്രിസ്തീയ സംഗീത ലോകത്തു സമാനതകളില്ലാതെ 1500 ൽ അധികം ആൽബങ്ങൾക്കു ഈണം പകർന്ന പ്രശസ്ത ക്രിസ്തീയ സംഗീത സംവിധായകൻ ശ്രീ പീറ്റർ ചേരാനല്ലൂർ തൻറെ സംഗീത ജീവിതത്തിന്റെ സിൽവർ ജൂബിലി ആൽബം “ദി ഗ്ലോറി ടു ഗോഡിന്റെ” വിജയത്തിനു ശേഷം സംഗീതം നൽകുന്ന ഈ വർഷത്തെ ഏറ്റവും പുതിയ ക്രിസ്ത്മസ് റിലീസ് ക്രിസ്തീയ സംഗീത ആൽബം “ഗോഡ്സ് ഗ്രേസ്” ബെഡ്ഫോർഡ് മലയാളിയും,ഡിവൈൻ മേഴ്‌സി പ്രയർ ഗ്രൂപ്പ് ലീഡും,ബെഡ്ഫോർഡ് ഹോസ്പിറ്റൽ സ്റ്റാഫ് നേഴ്സും പത്തനംതിട്ട സ്വദേശിയുമായ ശ്രീമതി മേബിൾ രാജൻ ,പ്രശസ്ത വചന പ്രഘോഷകനും സംഗീത രചയിതാവുമായ ശ്രീ ബേബി ജോൺ കലയന്താനി, ശ്രീ രാജേഷ് അത്തിക്കയം,ഫാ. വർഗീസ് സാമുവേൽ എന്നിവരുടെ മനോഹരമായ വരികൾ ഈണങ്ങളാകുന്ന ഈ വർഷത്തെ ഏറ്റവും പുതിയ ആൽബം “ ഗോഡ്സ് ഗ്രേസ്” ശ്രീ രാജൻ കോശി നിർമിച്ചു , RR ക്രീയേഷൻസ് നിങ്ങളിലേക്കെത്തിക്കുന്നു.


ക്രിസ്തീയ സംഗീത രംഗത്തെ പ്രശസ്ത ഗായകരായ കെസ്റ്റർ,മധു ബാലകൃഷ്ണൻ,അഭിജിത് കൊല്ലം,മനോജ് ക്രിസ്റ്റി,നിക്സൺ,രാജൻ കോശി (ബെഡ്ഫോർഡ്),പീറ്റർ ചേരാനല്ലൂർ,മിഥില മൈക്കിൾ,നൈഡിൻ പീറ്റർ എന്നിവർക്കൊപ്പം യു.കെയിലെ വളർന്നു വരുന്ന ഗായികയും നിരവധി സംഗീത ആൽബങ്ങളിൽ ഇതിനോടകം ഗാനങ്ങൾ ആലപിക്കുകയും ഈ വർഷത്തെ ബ്രിട്ടീഷ് മലയാളി യങ് ടാലെന്റ് അവാർഡ് വിന്നറുമായ ഡെന്ന ആൻ ജോമോൻ(ബെഡ്ഫോർഡ്),അപർണ ജെയിംസ്,എയ്ഞ്ചലീനാ സിബി എന്നിവർ ഈ ആൽബത്തിൽ ഗാനങ്ങൾ ആലപിച്ചിരിക്കുന്നു.
ഈ ആൽബത്തിന്റെ ഔദ്യോഗിക പ്രകാശനകർമ്മം ഇന്ന്(14 .12 .19) ബെർമിങ്ഹാമിൽ നടന്ന സെഹിയോൻ രണ്ടാം ശനി കൺവെൻഷനിൽ വെച്ച് സീറോ മലബാർ ഗ്രേറ്റ് ബ്രിട്ടൺ മെത്രാൻ അഭിവന്ദ്യ ജോസഫ് സ്രാമ്പിക്കൽ പിതാവും സെഹിയോൻ യുകെ ഡയറക്ടർ ഫാ.സോജി ഓലിക്കലും ചേർന്ന് നിർവഹിക്കുകയുണ്ടായി നിർവഹിക്കുകയുണ്ടായി. തുടർന്ന് ഡെന്ന ജോമോൻ ഈ ആൽബത്തിൽ ആലപിച്ചിരിക്കുന്നു ഗാനം സെഹിയോൻ വേദിയിൽ ആലപിക്കുകയുണ്ടായി.ഈ ആൽബം നിങ്ങൾക്ക് ലഭിക്കുന്നതിനും കൂടുതൽ വിവരങ്ങൾക്കുമായി ബന്ധപ്പെടുക. രാജൻ കോശി (ബെഡ്ഫോർഡ് ):07877027439

കേരളത്തിന്റെ മണ്ണിലേക്ക് ആറാമത് ജ്ഞാനപീഠം പുരസ്‌കാരം എത്തിച്ച മലയാളത്തിന്റെ മഹാകവി അക്കിത്തം അച്യുതൻ നമ്പൂതിരിക്ക്  ആശംസകൾ നേർന്ന്കൊണ്ട് യുക്മ സാംസ്കാരികവേദി പ്രസിദ്ധീകരിക്കുന്ന ഓൺലൈൻ സാഹിത്യപ്രസിദ്ധീകരണമായ ജ്വാല ഇ-മാഗസിന്റെ ഡിസംബർ ലക്കം പുറത്തിറങ്ങി. ഉള്ളടക്കത്തിലെ മനോഹാരിതയും ആധികാരികതയും, ഒപ്പം അവതരണത്തിലെ പ്രൊഫഷണലിസവും  ജ്വാലയെ ലോക മലയാളികൾക്ക് പ്രിയങ്കരവും, യുക്മക്ക് അഭിമാനകരവും ആക്കുന്നു.
ഭാഷയെക്കുറിച്ചും കവിതയെക്കുറിച്ചും മലയാളത്തിലെ ആധികാരിക ശബ്ദങ്ങളിൽ ഒന്നായ അക്കിത്തിത്തിന് ജ്ഞാനപീഠം നൽകിയത് വഴി ജ്ഞാനപീഠം പുരസ്‌കാരം കൂടുതൽ മിഴിവാർന്നതും മികവാർന്നതുമായി മാറി എന്ന്  എഡിറ്റോറിയലിൽ ചീഫ് എഡിറ്റർ റജി നന്തികാട്ട് പ്രസ്താവിക്കുന്നു. “വെളിച്ചം ദുഃഖമാണുണ്ണി, തമസ്സല്ലോ സുഖപ്രദം” എന്ന് മലയാളിയെ പാടി പഠിപ്പിച്ച കവിയെ തേടി പുരസ്‌കാരം എത്തിയത് കൂടുതൽ സന്തോഷപ്രദമെന്ന് എഡിറ്റോറിയൽ തുടരുന്നു.
ആമോസ് ഓസ് എന്ന ഇസ്രായേലി എഴുത്തുകാരന്റെ ജീവിതത്തിലേക്ക് ഒരു എത്തിനോട്ടമാണ്  സോണിയ റഫീക് എഴുതിയ “ആമോസ് ഓസ് എന്ന ഇസ്രായേലി എഴുത്തുകാരൻ” എന്ന ലേഖനം. ജ്വാല ഇ-മാഗസിന്റെ വായനക്കാരുടെ ഇഷ്ട പംക്തിയായ സ്മരണകളിലേക്ക് ഒരു മടക്കയാത്രയിൽ” തന്റെ വിദ്യാഭാസകാലത്തെ ഒരു രസകരമായ അനുഭവുമായി എത്തുകയാണ് ബീഥോവൻ എന്ന തലക്കെട്ടിൽ ജോർജ്ജ് അറങ്ങാശ്ശേരി. വിശുദ്ധ സഖിമാർ എന്ന നോവൽ എഴുതിയ സഹീറ തങ്ങൾ തന്റെ നോവലെഴുത്ത് അനുഭവങ്ങൾ വിവരിക്കുന്ന എഴുത്തനുഭവങ്ങൾ നല്ലൊരു രചനയാണ്. വിഖ്യാതനായ  ഇറ്റാലിയൻ ചലച്ചിത്ര സംവിധായകൻ ബെർണാർഡോ ബെർട്ടലൂച്ചിയെ കുറിച്ച് ആർ. ഗോപാലകൃഷ്ണൻ എഴുതിയ ലേഖനം ഈ ലക്കത്തിലെ മറ്റൊരു പ്രൗഢ രചനയിൽപ്പെടുന്നു.
“പൂവല്ല പൂന്തളിരല്ല” എന്ന സൂപ്പർ ഹിറ്റ് ചലച്ചിത്ര ഗാനത്തിന്റെ പിറവിയെക്കുറിച്ചു വളരെ രസകരമായി വിവരിക്കുകയാണ് രവി മേനോൻ തന്റെ ലേഖനത്തിൽ. ജ്വാല എഡിറ്റോറിയൽ അംഗവും ചിത്രകാരനുമായ സി ജെ റോയിയുടെ ചിത്രങ്ങളുടെ അകമ്പടിയോടെ എത്തുന്ന കഥകൾ ഓരോന്നും വളരെ ഉന്നത നിലവാരം പുലർത്തുന്നു. കവിതകളിൽ യു കെയിലെ മലയാളി എഴുത്തുകാരി മഞ്ജു ജേക്കബ് എഴുതിയ രണ്ടു കവിതകളും ഉൾപ്പെടുന്നു.
യുക്മയുടെ കലാ-സാംസ്ക്കാരിക വിഭാഗമായ ‘യുക്മ സാംസ്ക്കാരികവേദി’ ആണ് “ജ്വാല” അണിയിച്ചൊരുക്കുന്നത്. ജ്വാല ഇ-മാഗസിന്റെ വായനക്കാർക്ക് ക്രിസ്മസ്-പുതുവർഷാശംസകൾ നേരുന്നു. ഡിസംബർ ലക്കം വായിക്കുവാൻ താഴെ കൊടുത്തിരിക്കുന്ന ലിങ്കിൽ പ്രസ് ചെയ്യുക.

സ്വന്തം ലേഖകൻ

ബെർമിംഗ്ഹാം : സ്വർഗീയ സംഗീതത്തിന്റെ അവിസ്മരണീയ നിമിഷങ്ങൾ സമ്മാനിച്ച് കഴിഞ്ഞ ശനിയാഴ്ച്ച ബെർമിംഗ്ഹാമിലെ കിംഗ് എഡ്വേർഡ് സ്കൂളിൽ ഗർഷോം ടിവിയും , ലണ്ടൻ അസഫിയൻസും ഒന്നിച്ച് ഒരുക്കിയ ജോയ് റ്റു ദി വേൾഡ് കരോൾ ഗാന മത്സരത്തിൽ പങ്കെടുത്തത് യുകെയിലെ ഏറ്റവും കഴിവുറ്റ പതിനഞ്ചോളം ഗായകസംഘങ്ങൾ . കഴിഞ്ഞ വർഷങ്ങളെക്കാൾ മനോഹരമായി ഒരുക്കിയ ഈ സംഗീത വിരുന്നിൽ വൻ ജനപങ്കാളിത്തമാണ് ഇപ്രാവശ്യം ഉണ്ടായിരുന്നത് . ജോയ് റ്റു ദി വേൾഡ് മൂന്നാമത് ഓൾ യുകെ കരോൾ ഗാന മത്സരത്തിൽ മിഡ്ലാൻഡ്സ് ഹെർമോൻ മാർത്തോമാ പള്ളി ഗായക സംഘം അലൈഡ് മോർട് ഗേജ് സർവീസ് സ്പോൺസർ ചെയ്ത ആയിരം പൗണ്ട് കാഷ് അവാർഡിന് അർഹരായി .

യുകെയുടെ വിവിധ ഭാഗങ്ങളിൽ നിന്നുള്ള വിവിധ പള്ളികളെയും , സംഘടനകളെയും പ്രതിനിധീകരിച്ചു പങ്കെടുത്ത പതിനഞ്ചു ഗായകസംഘങ്ങൾ പങ്കെടുത്ത ഇഞ്ചോടിഞ്ചു പോരാട്ടത്തിൽ ബ്രിസ്റ്റോൾ ക്നാനായ കത്തോലിക്ക അസോസിയേഷൻ ഗായക സംഘം , ഹെവൻലി വോയിസ് സ്റ്റോക്ക് ഓൺ ട്രെൻഡ് , ലെസ്റ്റർ മദർ ഓഫ് ഗോഡ് ചർച്ച്‌ ഗായകസംഘം, എയിൽസ്‌ഫോർഡ് സെന്റ് പാദ്രെ പിയോ മിഷൻ ഗായകസംഘം എന്നിവർ യഥാക്രമം രണ്ടും , മൂന്നും , നാലും അഞ്ചും സ്ഥാനങ്ങൾ നേടി .

രണ്ടാം സ്ഥാനം നേടിയ ബ്രിസ്റ്റോൾ ടീമിന് ലോ ആൻഡ് ലോയേഴ്സ് സ്പോൺസർ ചെയ്ത അഞ്ഞൂറ് പൗണ്ടും ട്രോഫിയും , മൂന്നാം സമ്മാനം നേടിയ ഹെവൻലി വോയിസ് ടീമിന് പ്രൈം കെയർ സ്പോൺസർ ചെയ്ത  ഇരുനൂറ്റി അമ്പതു പൗണ്ടും ട്രോഫിയും , നാലും അഞ്ചും ടീമുകൾക്കു ട്രോഫിയും സമ്മാനിച്ചു . കഴിഞ്ഞ മൂന്നു വർഷങ്ങളായി തുടർച്ചയായി നടക്കുന്ന ജോയ് റ്റു ദി വേൾഡ് കരോൾ മത്സരവും , സംഗീത നിശയും ഓരോ വർഷം കഴിയുന്തോറും പങ്കെടുക്കുന്ന ടീമുകളുടെ എണ്ണവും , ആളുകളും വർധിച്ചു വരുന്നതായാണ് കാണുന്നത് .

ബ്രിസ്റ്റോൾ ബ്രാഡ്‌ലി സ്റ്റോക് മേയർ ടോം ആദിത്യ പരിപാടിയിൽ മുഖ്യാഥിതി ആയി പങ്കെടുക്കുകയും സമ്മേളനം ഉത്‌ഘാടനം ചെയ്യുകയും ചെയ്തു . യുകെ ക്രോസ്സ് കൾച്ചർ മിനിസ്ട്രീസ് ഡയറക്ടർ ജോ കുര്യൻ , ഗ്രേറ്റ് ബ്രിട്ടൻ സീറോ മലബാർ രൂപത മീഡിയ കമ്മീഷൻ ചെയർമാൻ റവ . ഫാ. ടോമി എടാട്ട് , എന്നിവർ ക്രിസ്മസ് സന്ദേശം നൽകി .

മത്സരങ്ങൾക്ക് ശേഷം നടന്ന സമാപന സമ്മേളനത്തിൽ വിജയികൾക്ക് ഗ്രേറ്റ് ബ്രിട്ടൻ സീറോ മലബാർ രൂപതാ വികാരി ജനറാൾ വെരി . റെവ . ഫാ. ജോർജ് ചേലക്കൽ , അലൈഡ് മോർട്ട്‌ ഗേജ് മാനേജിങ് പാർട്ണർ ബിജോ ടോം ചൊവ്വേലിക്കുടി , മേയർ ടോം ആദിത്യ , റോജി മോൻ വർഗീസ്, ഗർഷോം ടി വി ഡിറക്ടര്മാരായ ജോമോൻ കുന്നേൽ , ബിനു ജോർജ് ലണ്ടൻ അസാഫിയൻസ് സെക്രട്ടറി സുനീഷ് ജോർജ് എന്നിവർ സമ്മാനങ്ങൾ വിതരണം ചെയ്തു.

ടെക്ക് ബാങ്ക് യുകെയും , പോൾ ജോൺ ആൻറ് കമ്പനിയും , ഗണിത വെൽത്തും , ടോംടൺ ട്രാവൽസും , ഡയറക്ട് ആക്സിഡന്റ് ക്ലൈം അസിസ്റ്റന്റ് ലിമിറ്റഡ് ,  ടൂർ ഡിസൈനേഴ്സും ഈ പരിപാടിയുടെ സ്‌പോൺസർമാർ ആയിരുന്നു .

യുകെ മലയാളികൾക്കിടയിൽ സംഗീത രംഗത്ത് മിന്നുന്ന പ്രകടനങ്ങൾ കാഴ്ച വച്ച് മുന്നേറുന്ന ടെസ്സ സൂസൻ ജോൺ , ടീന ജിജി എന്നിവർക്ക് പ്രത്യേക പുരസ്കാരങ്ങൾ നൽകി ചടങ്ങിൽ ആദരിച്ചു. കരോൾ മത്സരത്തോടനുബന്ധിച്ച് യുകെയിലെ വിവിധ ഗായകരെ അണിനിരത്തി ലണ്ടൻ അസാഫിയൻസ് അവതരിപ്പിച്ച ലൈവ് മ്യൂസിക്കൽ നൈറ്റ് ഏറെ ശ്രദ്ധേയമായി.

സൂറിക്ക് : സ്വിറ്റ്സർലഡിലെ പ്രമുഖ സാമൂഹ്യ സാംസ്‌കാരിക സംഘടനയായ കേളിക്ക് പുതിയ ഭാരവാഹികൾ ചുമതലയേറ്റു. നവംബർ 30 ന് സൂറിക്കിൽ വച്ച് നടന്ന പൊതുയോഗമാണ് പുതിയ സാരഥികളെ തിരഞ്ഞെടുത്തത്.

മികച്ച പ്രവർത്തനം കാഴ്ച വെച്ച്‌ സ്ഥാനമൊഴിയുന്ന കമ്മിറ്റിയെ പുതിയ പ്രസിഡന്റ് ജോസ് വെളിയത്ത് അഭിനന്ദിച്ചു.

പുതിയ കമ്മിറ്റിയോടൊപ്പം തോളോട് തോൾ ചേർന്ന് കേളിയുടെ എല്ലാ പ്രവർത്തനങ്ങളിലും സഹായികളായിരിക്കുമെന്ന് ബെന്നി പുളിക്കലിന്റെ നേതൃത്വത്തിൽ സ്ഥാനമൊഴിഞ്ഞ കമ്മിറ്റിയംഗങ്ങളും പറഞ്ഞു.

കേളിയുടെ പുതിയ സാരഥികൾ :
പ്രസിഡന്റ് : ജോസ് വെളിയത്ത്,
വൈസ് പ്രസിഡന്റ്: ഷാജി ചങ്ങേത്ത്.
സെക്രട്ടറി: ബിനു വാളിപ്ലാക്കൽ ,
ജോയിന്റ് സെക്രട്ടറി : സജി പുളിക്കക്കുന്നേൽ,
ട്രെഷറർ :ഷാജി കൊട്ടാരത്തിൽ,
പി.ആർ.ഓ : ലൂക്കോസ് പുതുപ്പറമ്പിൽ,
പ്രോഗ്രാം ഓർഗനൈസർ : ബിനു കാരക്കാട്ടിൽ ,
ആർട് സ് സെക്രട്ടറി : ഷോളി വെട്ടിമൂട്ടിൽ ,
സോഷ്യൽ സർവീസ് കോ ഓർഡിനേറ്റർ :ജോയ് വെള്ളൂക്കുന്നേൽ,
ഓഡിറ്റർ :പയസ് പാലാത്രക്കടവിൽ
കൂടാതെ കമ്മിറ്റി അംഗങ്ങളായി ജെയിംസ് ചാത്തംകണ്ടം , തോമസുകുട്ടി കൊട്ടാരത്തിൽ , വിശാൽ ഇല്ലിക്കാട്ടിൽ , ബിജു ഊക്കൻ, ജോമോൻ പണിക്കപ്പറമ്പിൽ എന്നിവരെയും തിരഞ്ഞെടുത്തു.

കഴിഞ്ഞ രണ്ട് വർഷത്തെ കാലയളവിൽ ഒരു ലക്ഷത്തിമുപ്പത്തിനായിരത്തിൽ പരം (CHF 1,33,000.-) സ്വിസ് ഫ്രാങ്കിന്റെ കാരുണ്യ പ്രവർത്തനമാണ് കേളി കേരളത്തിൽ ചെയ്‌തത്‌. ഇന്ത്യൻ കലകളുടെ മത്സരവേദിയായ കേളി കലാമേള , പ്രവാസി മലയാളിയുടെ ഗൃഹാതുരത്വം ഉണർത്തുന്ന ഉത്സവമായ ഓണാഘോഷം കൂടാതെ രണ്ടാം തലമുറയുടെ കാരുണ്യ പദ്ധതി ആയ കിൻഡർ ഫോർ കിൻഡർ ചാരിറ്റി ഇവൻറ് എന്നിവ എല്ലാ വർഷവും നടത്തി വരുന്ന പ്രസ്ഥാനമാണ് കേളി.സുമനസ്സുകളായ നിരവധി പേരുടെ വോളന്റീയർ സേവനങ്ങളാണ് കേളിയുടെ അടിത്തറ.

1998 ൽ പ്രവർത്തനം ആരംഭിച്ച കേളി കഴിഞ്ഞ ഇരുപത് വർഷങ്ങളിൽ ആയി സ്‌തുത്യർഹമായ സേവനങ്ങളാണ് കാഴ്ച വച്ചത്.

ലിസ മാത്യു, മലയാളം യു കെ ന്യൂസ്‌ ടീം

ബ്രിട്ടൻ :- ബ്രിട്ടണിലെ ഏറ്റവും പ്രായം കുറഞ്ഞ എംപി മറ്റുള്ളവർക്ക് മാതൃകയാവുന്നു. 75000 പൗണ്ട് ഉള്ള തന്റെ ശമ്പളത്തിൽ നിന്നും 35,000 പൗണ്ട് മാത്രം തനിക്കുവേണ്ടി നീക്കിവച്ച് ബാക്കിയുള്ളത് ചാരിറ്റി പ്രവർത്തനങ്ങൾക്കായി ദാനം ചെയ്യാനുള്ള തീരുമാനത്തിൽ ആണ് ഇവർ. ലേബർ പാർട്ടി എംപി, ഇരുപത്തിമൂന്നുകാരിയായ നാദിയ വിറ്റൊമ് ആണ് പ്രശംസനീയമായ ഈ തീരുമാനം കൈക്കൊണ്ടത്. നോട്ടിങ്ഹാം ചാരിറ്റിയുടെ പ്രവർത്തനങ്ങൾക്കായാണ് തന്റെ പണം ഇവർ നൽകാൻ തീരുമാനിച്ചിരിക്കുന്നത്.

ഒരു എംപിയുടെ അടിസ്ഥാന വാർഷിക ശമ്പളം 79468 പൗണ്ടാണ്. ഇതു കൂടാതെ തന്നെ ഓഫീസിലെ പ്രവർത്തനങ്ങൾക്കായും, ഭവനത്തിനായും, ട്രാവലിംഗ് അലവൻസുകളായും അധിക പണം ലഭിക്കാറുണ്ട്. എംപിമാരുടെ സാലറി അധികം ആയതു കൊണ്ടല്ല, മറിച്ച്, അതു പോലെതന്നെ അധ്യാപകരും, അഗ്നിശമന സേനാംഗങ്ങളും, നേഴ്സുമാരും ഉയർന്ന സാലറിക്ക് അർഹരാണ്. അവർക്ക് ലഭിക്കാത്തത് തനിക്ക് ആവശ്യമില്ലെന്നാണ് നാദിയയുടെ തീരുമാനം. ഒരു എംപി ആയി തിരഞ്ഞെടുക്കപ്പെട്ടതിൽ താൻ അഭിമാനിക്കുന്നുവെന്നും നാദിയ വാർത്താസമ്മേളനത്തിൽ പറഞ്ഞു.

ലേബർ പാർട്ടിക്കേറ്റ പരാജയത്തെ സംബന്ധിച്ച് സംസാരിച്ച നാദിയ, പരാജയത്തിൽ നിന്ന് പാഠങ്ങൾ ഉൾക്കൊണ്ട് ശക്തമായി പാർട്ടി മുന്നോട്ടു പോകും എന്ന് അഭിപ്രായപ്പെട്ടു. ഇലക്ഷനിൽ ബ്രെക്സിറ്റിനാണ് മുൻഗണന ലഭിച്ചത്. തനിക്കു വോട്ട് ചെയ്ത് തന്നെ ജയിപ്പിച്ചവർക്കായി നന്ദിയും അവർ അറിയിച്ചു.

Copyright © . All rights reserved