അലോഷ്യസ് ഗബ്രിയേൽ

ലണ്ടൻ: യുകെയിലെ ലൂട്ടൻ കേരളൈറ്റ്‌സ് അസോസിയേഷന്റെ (LUKA) നേതൃത്വത്തിൽ ആരംഭിച്ച ലൂക്കാമലയാളം സ്കൂളിന്റെ ഔപചാരികമായ ഉദ്ഘാടനവും ആദ്യത്തെ മലയാളം ക്ലാസും വർണ്ണാഭമായി നടന്നു. ആദ്യക്ലാസിൽ തന്നെ അധ്യാപികമാർ മലയാളഭാഷയിലെ ആദ്യാക്ഷരങ്ങൾ കോർത്തിണക്കി ആലപിച്ച ഗാനമാലകുട്ടികളും ഏറ്റുപാടി മലയാളത്തിന്റെ ആദ്യാക്ഷരങ്ങൾ മനപ്പാഠമാക്കിയ മുഴുവൻ കുരുന്നുകൾക്കും മലയാളംമധുരമായി മാറി.

പ്രോജക്ടറിന്റെ സഹായത്താൽ വലിയ സ്ക്രീനിൽ ചിത്രങ്ങൾ കാണിച്ച് അധ്യാപികമാർ എല്ലാ കുട്ടികളുമായിസംവദിച്ചും രസകരമായ കഥകൾ പറഞ്ഞും മലയാളഭാഷയിലെ ആദ്യാക്ഷരങ്ങളും വാക്കുകളുംപറഞ്ഞുകൊടുത്തപ്പോൾ മലയാള ഭാഷാ പഠനം എല്ലാ കുട്ടികൾക്കും നവ്യാനുഭവമാണ് സമ്മാനിച്ചത്.

മാതാപിതാക്കളും അധ്യാപകരും കുട്ടികളും ഉൾപ്പെടെയുള്ള സദസ്സിനെ സാക്ഷി നിർത്തി ലൂക്കാ മലയാളംസ്കൂളിന്റെ ഔപചാരികമായ ഉദ്ഘാടനം മലയാളം മിഷൻ യു കെ ചാപ്റ്റർ പ്രസിഡന്റും ലോകകേരളസഭാംഗവുമായ സി എ ജോസഫ് നിർവഹിച്ചു. ലൂട്ടൻ കേരളൈറ്റ്സ് അസോസിയേഷൻ മാതൃകാപരമായനിരവധി കാര്യങ്ങൾ സമൂഹത്തിലെ വളർന്നുവരുന്ന തലമുറയുടെ സർഗാത്മകമായ കഴിവുകളെപ്രോത്സാഹിപ്പിക്കുന്നതിനുവേണ്ടി ചെയ്തിട്ടുണ്ടെങ്കിലും വളർന്നുവരുന്ന കുട്ടികൾക്ക് വേണ്ടി സാമൂഹികപ്രതിബദ്ധതയോടെ ആരംഭിക്കുന്ന ലൂക്കാ മലയാളം സ്കൂൾ അസോസിയേഷന്റെ പ്രവർത്തനങ്ങളിലെ ഏറ്റവുംവലിയ അടയാളപ്പെടുത്തലായി മാറുമെന്ന് സിഎ ജോസഫ് അഭിപ്രായപ്പെട്ടു.

പുതിയതായി ചുമതലയേറ്റ അസ്സോസിയേഷൻ പ്രസിഡന്റ് അലോഷ്യസ് ഗബ്രിയേൽ ചടങ്ങിൽ അധ്യക്ഷതവഹിച്ചു. എല്ലാ വെള്ളിയാഴ്ചകളിലും വൈകുന്നേരമാണ് മലയാളം ക്ലാസ് നടത്തുന്നതെന്നും വ്യത്യസ്തസമയങ്ങളിലായി കുട്ടികൾക്ക് വേണ്ടി സംഗീത ക്ലാസും, ഡാൻസ് ക്ലാസും ഇതോടൊപ്പം തന്നെഅസോസിയേഷന്റെ ആഭിമുഖ്യത്തിൽ അന്നേ ദിവസം വൈകുന്നേരം സംഘടിപ്പിച്ചിട്ടുണ്ടെന്നും കുട്ടികൾ ഈഅവസരം വിനിയോഗിക്കണമെന്നും മാതാപിതാക്കളുടെ പരിപൂർണ്ണ പിന്തുണ ഉണ്ടാവണമെന്നും അദ്ദേഹംഅഭ്യർത്ഥിച്ചു.

ലൂക്കാ മലയാളം സ്കൂളിന്റെ പ്രവർത്തനം സുഗമമായി മുന്നോട്ടു കൊണ്ടുപോകണമെന്ന ലക്ഷ്യത്തോടെഅസോസിയേഷൻ പ്രസിഡന്റ് അലോഷ്യസ് ഗബ്രിയേൽ, സെക്രട്ടറി ജോർജ് കുര്യൻ, ട്രഷറർ അമിത് മാത്യുഎന്നിവരുടെ നേതൃത്വത്തിൽ മാത്യു വർക്കി, ബെറ്റ്സി ജോഷ്വാ, ജിജി അലോഷ്യസ്, ബെയ്ബി കുര്യൻ, ബോബൻ ജോസ്, പ്രിയ അരുൺ, ടോം ജോസ്, റോസമ്മ ജോസ് എന്നിവർ അടങ്ങിയ അധ്യാപകരുടെ പാനലുംരൂപീകരിച്ചിട്ടുണ്ട്. മുൻ പ്രസിഡന്റ്കൂടിയായ ബെറ്റ്സി ജോഷ്വാ ആശംസ അർപ്പിച്ചു. ചടങ്ങിൽ പങ്കെടുത്തമുഴുവൻ ആളുകൾക്കും സെക്രട്ടറി ജോർജ് കുര്യൻ സ്വാഗതവും മുൻ പ്രസിഡന്റ് ബെയ്‌ബി കുര്യൻ നന്ദിയുംപറഞ്ഞു.

രാജേഷ് നടേപ്പിള്ളി

വിൽഷെയർ മലയാളി അസോസിയേഷന്റെ 2023 വർഷത്തെ കായികമേള ഏറെ പ്രൗഢഗംഭീരമായി. സ്വിൻഡൻ, വാൽകോട് മൈതാനത്തു കഴിഞ്ഞ ഞായറാഴ്ച, മെയ് 7ന് നടന്ന കായികമേള ഏറെ വ്യത്യസ്തവും മികച്ച നിലവാരം പുലർത്തുന്നതുമായിരുന്നു. കോവിഡ് മൂലം മുടങ്ങിപ്പോയ കായികമാമാങ്കം നാലുവർഷങ്ങൾക്കുശേഷമാണിപ്പോൾ നടക്കുന്നത്. 69 വ്യക്തിഗത മത്സര ഇനങ്ങളും 4 ഗ്രൂപ്പ് ഐറ്റംസിലുമായി 250 ഓളം മത്സാരാർത്ഥികൾ പങ്കെടുക്കുകയുണ്ടായി.

ഞായറാഴ്ച രാവിലെ 10 മണിക്ക് ഫൂട്ബൊൾ മത്സരത്തോടെ ആരംഭിച്ച കായികമേളയുടെ ഔപചാരിക പൊതുസമ്മേളനവും ഉത്ഘാടനവും 12 മണിക്ക് വിപുലമായ പരിപാടികളോടെ നടക്കുകയുണ്ടായി.

കായികമേള മത്സരാർത്ഥികളുടെ പൊതുസമ്മേളനവും മാർച്ച്പാസ്റ്റും ഏറെ വർണാഭമായി.
വിൽഷെയർ മലയാളി അസോസിയേഷന്റെ 5 ഏരിയയിൽ നിന്നുള്ള മത്സരാർത്ഥികൾ അതാത് ഏരിയ പ്രതിനിധിയുടെ കീഴിൽ അനിനിരന്നു. മാർച്ചു പാസ്റ്റിന്റെ ഏറ്റവും മുന്നിലായി അസോസിയേഷന്റെ പതാകയും ഇരുവശങ്ങളിലായി ഇന്ത്യയുടെയും ഇംഗ്ലണ്ടിന്റെയും ദേശീയ പതാകകൾ അതിന്റെ പിന്നിലായി പർപ്പിൾ നിറത്തിൽ ഡിവൈസസ്, മഞ്ഞ നിറത്തിൽ നോർത്ത് സ്വിൻഡൻ, പച്ച നിറത്തിൽ വെസ്റ്റ് സ്വിൻഡൻ, ചുവപ്പു നിറത്തിൽ ടൗൺ സെന്റർ ഏറ്റവും ഒടുവിലായി കായിക മത്സരങ്ങൾക്ക് ആഥിത്യമരുളിയ ഈസ്റ്റ് സ്വിൻഡൻ നീല നിറത്തിൽ, ഈ ക്രെമത്തിൽ നടന്ന മാർച്ച്പാസ്റ് വിൽഷെയറിലെ മലയാളികൾക്ക് ഏറെ അഭിമാനകരായിരുന്നു.

കായികമേളയുടെ ഉൽഘാടനത്തോടനുബന്ധിച്ചു നടന്ന പൊതുസമ്മേളനം അസോസിയേഷൻ സ്പോർട്സ് ലീഡ് ശ്രീ ജോർജ് കുര്യാക്കോസ് അധ്യക്ഷത വഹിച്ചു. ആരോഗ്യകരവും സജീവവുമായ ഒരു ജീവിതശൈലി പ്രോത്സാഹിപ്പിച്ച് സന്തോഷവും സമാധാനവും ആരോഗ്യപൂർണവുമായ ഒരു ജീവിത ക്രമത്തിന് രൂപം കൊടുക്കുകയും അങ്ങനെ ആരോഗ്യമുള്ള ഒരു ജനതയെ വാർത്തെടുക്കുന്നതിനും ആരോഗ്യകരമായ മത്സരത്തിലൂടെ വിജയം കരസ്ഥമാക്കുന്നതോടൊപ്പം ആരോഗ്യമുള്ള ഒരു സമൂഹത്തെ വാർത്തെടുക്കുവാനുള്ള പ്രവർത്തനത്തിൽ നമുക്ക് ഒത്തൊരുമിച്ച് പ്രവർത്തിക്കാം എന്ന് സ്വാഗത പ്രസംഗത്തിൽ സെക്രട്ടറി പ്രദീഷ് ഫിലിപ്പ് ആഹ്വാനം ചെയ്തു.

വിൽഷെയർ മലയാളി അസോസിയേഷൻ എക്കാലവും സമസ്ത മേഖളകിലും തിളക്കമാർന്ന പ്രവർത്തനങ്ങൾ കാഴ്ചവെക്കുന്ന യുകെയിലെ തന്നെ മികച്ച അസ്സോസിയേഷനുകളിൽ ഒന്നാണെന്നും ശരീരവും മനസ്സും ആരോഗ്യകരമായിരിക്കേണ്ടത് നാം ഓരോരുത്തരുടെയും കടമയാണെന്നും അതിനാൽ നിത്യ ജീവിതത്തിൽ കായികാഭ്യാസം നമുക്കോരോരുത്തർക്കും അത്യന്താപേക്ഷിതമാണെന്നും അതിനാൽ ഇത്തരം കായികമേളകളിൽ വിജയിക്കുക എന്നതിലുപരി പങ്കെടുക്കുക എന്നതാണെന്ന് അസോസിയേഷൻ പ്രസിഡന്റ് പ്രിൻസ്മോൻ മാത്യു ഉത്ഘാടനപ്രസംഗത്തിൽ അഭിപ്രായപ്പെട്ടു. വിൽഷെയർ മലയാളി ആസോസിയേഷന്റെ അടുത്ത ഒരുവർഷത്തെ പ്രവർത്തനവും വിവിധ കായികമേളയെക്കുറിച്ചും അതിന്റെ പരിശീലനത്തെക്കുറിച്ചും അടുത്തുവരുന്ന യുക്മ റീജിയണൽ കായികമേളയും അതിൽ പങ്കെടുക്കുവാനും യോഗാധ്യക്ഷൻ ജോർജ് കുര്യാക്കോസ് ആവശ്യപ്പെട്ടു.

മത്സരാർത്ഥികളുടെ രജിസ്ട്രേഷനും റാഫിൾ ടിക്കറ്റ് ഏകോപനവും സമ്മാനദാനവും ട്രെഷറർ സജി മാത്യു നിർവഹിച്ചു. കായികമാമാങ്ക വേദിയിലെ എല്ലാവിധ സജീകരണ ചുമതലയും ജോയിന്റ് ട്രെഷറർ ജെയ്മോൻ ചാക്കോ നിർവഹിക്കുകയുണ്ടായി.

വിവിധ വേദികളിലായി വിവിധ ഇനങ്ങൾ ഒരേ സമയത്തു നടത്തിയതിലൂടെ ഓരോ കമ്മറ്റി അംഗങ്ങളും കൂടാതെ സ്പോർട്സ് കോർഡിനേറ്റർമാരായ ജിൻസ് ജോസഫ്, ജോബി ജോസഫ് എന്നിവരുടെയും കൂട്ടായ പ്രയക്ത്നമാണ് കായികമേള വൻ വിജയമായതിനു പിന്നിൽ പ്രവർത്തിച്ച മുഖ്യ ഘടകം .

കായികമേളയോടനുബന്ധിച്ചു അസോസിയേഷൻ വനിതാ ഫോറത്തിന്റെ ഫുഡ് ഫെസ്റ്റിവലും ഉണ്ടായിരുന്നു. വിവിധ സ്റ്റാളുകളിലായി വിവിധയിനം ഭക്ഷണവും സജ്ജമായിരുന്നു.

കായികമേളയിൽ പങ്കെടുത്ത മുഴുവൻ ആളുകൾക്കും അസോസിയേഷൻ ഉച്ച ഭക്ഷണം നൽകുകയുണ്ടായി. ഉച്ച ഭക്ഷണം ക്രമീകരിച്ചത് പ്രദീഷ് ജോസെഫിന്റെ നേതൃത്വത്തില് വുമൺ ഫോറത്തിലെ അംഗങ്ങളും ചേർന്നാണ്.

ഏതു തരത്തിലുള്ള മെഡിക്കൽ സാഹചര്യത്തെയും നേരിടാൻ തയ്യാറായി 6 അംഗങ്ങളുള്ള മെഡിക്കൽ ടീം സർവ സജ്ജമായിരുന്നു.

കൂട്ടായ പ്രയത്നത്തിന്റെയും കഠിനാധ്വാനത്തിന്റെയും അർപ്പണബോധത്തിന്റെയും ഒത്തൊരുമയുടെയും ഫലമാണ് സ്പോർട്സ് ഡേ യുടെ ഈ വൻ വിജയമെന്നും ഇനിയുള്ള ഓരോ പരിപാടികളും ഏറെ മനോഹരമാക്കുവാൻ അസോസിയേഷനിലെ എല്ലാ അംഗങ്ങളുടെയും നിസ്സീമമായ സഹകരണം ഉണ്ടാകണമെന്നും നന്ദി പ്രസംഗത്തിൽ അസോസിയേഷൻ ജോയിന്റ് സെക്രട്ടറി ശ്രീ സോണി കാച്ചപ്പിള്ളി അഭിപ്രായപ്പെട്ടു.

സുജു ജോസഫ്

സാലിസ്ബറി: സാലിസ്ബറി മലയാളി അസ്സോസിയേഷൻ(എസ് എം എ) സംഘടിപ്പിക്കുന്ന സീന മെമ്മോറിയൽ എവർ റോളിങ്ങ് ട്രോഫിക്കായുള്ള സീസൺ 3 T12 ക്രിക്കറ്റ് ടൂർണ്ണമെന്റ് മേയ് 29ന്. യുകെയിലെ മികച്ച ടീമുകൾ മാറ്റുരയ്ക്കുന്ന ടൂർണമെന്റിലെ വിജയികൾക്ക് ക്യാഷ് പ്രൈസായി ആയിരം പൗണ്ടും സീന മെമ്മോറിയൽ എവർ റോളിങ് ട്രോഫിയും സമ്മാനമായി ലഭിക്കും. രണ്ടാം സ്ഥാനക്കാർക്ക് അറുന്നൂറ് പൗണ്ട് ക്യാഷ് പ്രൈസും ട്രോഫിയുമാണ് സമ്മാനമായി ലഭിക്കുക. ടീമുകൾക്കായുള്ള രജിസ്‌ട്രേഷൻ ആരംഭിച്ചതായി സംഘാടകർ അറിയിച്ചു. രജിസ്‌ട്രേഷനും കൂടുതൽ വിവരങ്ങൾക്കുമായി സ്പോർട്സ് കോർഡിനേറ്റർ നിഷാന്ത് സോമൻ(07383924042), പ്രസിഡന്റ് റ്റിജി മമ്മു(07715601257) എന്നിവരെ ബന്ധപ്പെടേണ്ടതാണ്.

തുടർച്ചയായി മൂന്നാം തവണയും സംഘടിപ്പിക്കുന്ന ക്രിക്കറ്റ് ടൂർണ്ണമെന്റ് ഡിവൈസിസിലെ വിശാലമായ ഡിവൈസസ് ക്രിക്കറ്റ് ക്ലബ് ഗ്രൗണ്ടിലാകും നടക്കുക. പന്ത്രണ്ട് വീതം ഓവറുകളിലായി രണ്ടു പിച്ചുകളിലായി നടക്കുന്ന മത്സരങ്ങൾ രാവിലെ ഒൻപത് മണിയോടെ തന്നെ ആരംഭിക്കും. ഇൻഫിനിറ്റി മോർട്ട്ഗേജ് ലിമിറ്റഡ്, ഏബിൾഡെയ്ൽ കെയർ, ടെസ്‌കോ എക്ട്രാ സാലിസ്ബറി തുടങ്ങിയ പ്രമുഖരാണ് ടൂർണമെന്റിന്റെ സ്‌പോൺസർമാർ. മിതമായ നിരക്കിൽ നാടൻ വിഭവങ്ങളോട് കൂടിയ ഭക്ഷണവും സംഘാടകർ ഒരുക്കുന്നുണ്ട്.

പ്രസിഡന്റ് റ്റിജി മമ്മു, സെക്രട്ടറി സിൽവി ജോസ്, ട്രഷറർ ജയ്‌വിൻ ജോർജ്ജ്, സ്പോർട്ട്സ് കോർഡിനേറ്റർ നിഷാന്ത് സോമൻ, അരുൺ കൃഷ്ണൻ തുടങ്ങിയവരുടെ നേതൃത്വത്തിലാണ് ടൂർണ്ണമെന്റിനായുള്ള മുന്നൊരുക്കങ്ങൾ നടക്കുന്നത്. സാലിസ്ബറി മലയാളി അസ്സോസിയേഷന്റെ സ്വന്തം ടീമായ എസ് എം എ ചലഞ്ചേഴ്‌സ്(സ്മാക്) ഇക്കുറിയും ടൂർണ്ണമെന്റിൽ മാറ്റുരയ്ക്കും. ക്യാപ്റ്റൻ സൂരജ് ജോണിന്റെ നേതൃത്വത്തിലാണ് സ്മാക് കളത്തിലിറങ്ങുന്നത്. അകാലത്തിൽ വിട്ടുപിരിഞ്ഞ എസ് എം എ മുൻ സെക്രട്ടറിയും അംഗവുമായിരുന്ന സീന ഷിബുവിന്റെ സ്മരണാർത്ഥമാണ് തുടർച്ചയായി മൂന്നാം തവണയും ടൂർണ്ണമെന്റ് സംഘടിപ്പിച്ചിരിക്കുന്നത്.

സമീക്ഷ യു കെ യുടെ ആറാം ദേശീയ സമ്മേളനത്തിന് ആഴ്ചകൾ മാത്രം ബാക്കി നിൽക്കെ സംഘടനയിലേക്കുളള യുവാക്കളുടെ പ്രവാഹം ചെംസ്ഫോ൪ഡിൽ സമീക്ഷ യു കെ യുടെ ബ്രാഞ്ച് രൂപീകരണത്തിന് വഴിവച്ചിരിക്കയാണ്. ഒരുകൂട്ടം പുരോഗമനവാദികളായ ചെറുപ്പക്കാരുടെ നിശ്ചയദാർഢ്യം യു കെ യിലെ ഏറ്റവും വലിയ കലാ സാംസ്കാരിക സംഘടനയായ സമീക്ഷ യു കെ യുടെ ഭാഗമായി പ്രവർത്തിക്കാൻ തീരുമാനിച്ചതിൻറെ ഫലമായാണ് ചെംസ്ഫോ൪ഡിൽ ബ്രാഞ്ച് നിലവിൽവന്നത്.  ദേശീയ കമ്മിറ്റി അംഗം ശ്രീ ജോമിൻ ജോസ് അദ്ധ്യക്ഷത വഹിച്ച യോഗത്തിൽ സംഘടനയുടെ ദേശീയ സെക്രട്ടറി ശ്രീ ദിനേശ് വെള്ളാപ്പള്ളി നവബ്രാഞ്ചിൻെറ ഉദ്ഘാടനം നിർവഹിച്ചു. രൂപീകരണ സമ്മേളനത്തിൽ സംഘടനയുടെ ഭൂതകാല പ്രവർത്തനങ്ങളെക്കുറിച്ച് സമഗ്രമായി വിശദീകരിക്കുകയും ദേശീയ സമ്മേളനത്തിൻെറ പ്രധാന്യത്തെപ്പറ്റി വിവരിക്കുകയും ചെയ്തത് അക്ഷരാർത്ഥത്തിൽ പ്രവർത്തകരിൽ ആവേശം ജനിപ്പിച്ചു.

സമീക്ഷ യു കെ യുടെ ദേശീയ കമ്മിറ്റി അംഗങ്ങളായ അഡ്വ. ദിലീപ് കുമാറും, ശ്രീ ശ്രീകാന്ത് കൃഷ്ണനും യഥാക്രമം സംഘടനയുടെ മീഡിയ പ്രവർത്തനങ്ങളെപ്പറ്റിയും ഐ ടി ഘടകത്തിന്റെ പ്രവ൪ത്തന രീതികളും വിശദീകരിക്കുകയും രൂപീകരണ യോഗത്തിന് ആശംസകള൪പ്പിച്ച് സംസാരിക്കുകയും ചെയ്തു.
ശ്രീ ആൻറണി ജോസഫിനെ പ്രസിഡന്റായും ശ്രീ അഭിലാഷ് വെഞ്ഞാറമൂടിനെ വൈസ് പ്രസിഡന്റായും തിരഞ്ഞെടുത്ത യോഗത്തിൽ ആൻഗ്ലിയ റസ്കിൻ യൂണിവേഴ്സിറ്റി കോളേജ് വിദ്യാ൪ത്ഥി യൂണിയൻ പ്രതിനിധിയായ അ൪ജുൻ മുരളിയെ സെക്രട്ടറിയായും ജോയിന്റ് സെക്രട്ടറിയായി ശ്രീ വിപിൻ ധർമ്മരാജനെയും ട്രഷററായി ശ്രീ റനീഷിനെയും യോഗം ഐക്യകണ്ഠേന തിരഞ്ഞെടുത്തു. ആറാമത് ദേശീയ സമ്മേളനത്തിന് പൂർണ്ണ പിന്തുണ പ്രഖ്യാപിച്ച സമ്മേളനം, യുവത്വത്തിന് പ്രാധാന്യം നൽകുന്നത് വഴി കൂടുതൽ യുവജനങ്ങളിലേക്കും വിദ്യാ൪ത്ഥികളിലേക്കും ശക്തമായി സംഘടനയുടെ പ്രവർത്തനം എത്തിക്കാൻ ലക്ഷ്യമിടുന്നതായും പുതിയ ഭാരവാഹികൾ അറിയിച്ചു.

2009ൽ യു കെയിലെ ലിവർപൂളിൽ തുടക്കം കുറിച്ച യു കെയിൽ താമസിക്കുന്ന അങ്കമാലി പ്രദേശവാസികളുടെ കൂട്ടായ്മയായ അങ്കമാലി സല്ലാപം ഇത്തവണ ഈ മെയ്‌ 6നു ശനിയാഴ്ച ( നാളെ) വാറിംഗ്ടണിൽ വച്ച് നടത്തപ്പെടുകയാണ് . ഓരോ വർഷവും വിവിധ പ്രദേശങ്ങളിൽ വച്ച് പ്രദേശവാസികളുടെ നേതൃത്വത്തിൽ നടത്തുന്ന ഒരു രീതിയാണ് അങ്കമാലി സല്ലാപത്തിനുള്ളത്. അതുകൊണ്ടുതന്നെ ഇന്നും പരാതികളോ പരിഭവങ്ങളോ ഇല്ലാതെ വരുന്നവരെല്ലാം വളരെ സന്തോഷമായിട്ടാണ് സല്ലപിച്ചു മടങ്ങാറ്.

നാടുവിട്ട് മറുനാട്ടിൽ ജന്മനാട്ടുകാരൊത്ത് നാട്ടുവിശേഷം പറയാൻ കിട്ടുന്ന അവസരം ആഘോഷമാക്കുവാൻ ഒരുങ്ങിയിരിക്കുവാണ് അങ്കമാലിക്കാർ…

റിഥം ഓഫ് വാറിംഗ്ടൺ ഒരുക്കുന്ന ശിങ്കാരിമേളത്തോടെ സ്വാഗതം ചെയ്ത് ആരംഭിക്കുന്ന ആഘോഷം,, വിവിധ നൃത്തങ്ങളും, അങ്കമാലി അങ്കിൾസിൻ്റെ ശ്രീരാമലക്ഷമണ കൈകൊട്ടികളിയും, അങ്കമാലി വോയ്‌സിൻ്റെ ഗാനമേളയും പിന്നെ ഡി ജെയും കഴിഞ്ഞ് വൈകിട്ട് 7 മണിയ്ക്ക് തിരശീല വീഴും.

അതി രുചികരമായ അങ്കമാലി മാങ്ങാക്കറിയും അങ്കമാലി പോർക്ക് വരട്ടിയതുമാണ് അങ്കമാലി സല്ലാപത്തിന്റെ പ്രധാന വിഭവം. തനതായ വിഭവങ്ങളുമായി തദ്ദേശീയരായ ആളുകൾ പരിചയപ്പെട്ടും പരിചയം പുതുക്കിയും ഒരുമിച്ചുകൂടി കണ്ട് ഭക്ഷണവും കഴിച്ചുല്ലസിച്ചു മടങ്ങാൻ വാറിംഗ്ടണിലേക്ക് ഏവരെയും ക്ഷണിച്ചുകൊള്ളുന്നു.

ഇത്തവണ സല്ലാപത്തിന്റെ ചീഫ് കോ ഓർഡിനേറ്റർ വാറിംഗ്ടണിൽത്തന്നെയുള്ള ശ്രീ. ഷീജോ വർഗ്ഗീസ് ആണ്. യുക്മയുടെ വൈസ് പ്രസിഡന്റകൂടിയായ അദ്ദേഹത്തിനൊപ്പം സല്ലാപത്തിന്റെ വിജയത്തിനായി സ്കോട്ലൻഡിൽ നിന്നുള്ള ശ്രീ. ഷൈജൻ തോട്ടക്കരയും ബർമിംഗ്ഹാമിൽ നിന്നുള്ള മോനി ഷീജോയും , ജോയ് ആഗസ്തിയും, സാജു കാവുങ്ങയുമൊക്കെ ഉണ്ട്.

വിശദ വിവരങ്ങൾക്ക് ബന്ധപ്പെടുക:-

ഷീജോ വർഗ്ഗീസ്:-07852 931287
ഷൈജൻ തോട്ടക്കര:-07453262221

സുജു ജോസഫ്

സാലിസ്ബറി: അതിജീവനത്തിന്റെയും പ്രത്യാശയുടെയും പൊൻകിരണങ്ങൾ വിതറികൊണ്ട് ഈസ്റ്ററും, സമ്പന്നമായ കാർഷിക സംസ്കാരത്തിന്റെ ഓർമ്മ പുതുക്കി വിഷുവും സാലിസ്ബറി മലയാളി അസോസിയേഷൻ സമുചിതമായി ആഘോഷിച്ചു. പുതുതായി തിരഞ്ഞെടുക്കപ്പെട്ട ഭരണസമിതിയുടെ പരിചയപ്പെടുത്തലോടെയാണ് ആഘോഷങ്ങൾക്ക് തുടക്കമിട്ടത്.

പ്രസിഡന്റ് റ്റിജി മമ്മു അധ്യക്ഷനായ പൊതുയോഗത്തിൽ മുഖ്യാതിഥിയായെത്തിയ യുക്മ ദേശീയ ജനറൽ സെക്രട്ടറി ശ്രീ കുര്യൻ ജോർജ്ജ് ഭദ്രദീപം തെളിച്ച് ആഘോഷപരിപാടി ഉദ്‌ഘാടനം ചെയ്തു. ഏവർക്കും ഈസ്റ്റർ, വിഷു, ഈദ് ആശംസകൾ നേർന്ന അദ്ദേഹം യുക്മയുടെ പ്രവർത്തനങ്ങൾക്ക് സംഘടന നൽകുന്ന പിന്തുണയ്ക്ക് നന്ദി പറഞ്ഞു. ഇടവകവികാരി ഫാ. സജി മാത്യു, രക്ഷാധികാരി ജോസ് കെ ആന്റണി, സൗത്ത് വെസ്റ്റ് റീജിയണൽ പ്രസിഡന്റ് സുജു ജോസഫ് തുടങ്ങിയവർ ആശംസകൾ നേർന്നു. നാട്ടിൽ നിന്നെത്തിയ മാതാപിതാക്കളും ചടങ്ങിൽ വിശിഷ്ടാതിഥികളായിരുന്നു. നിധി ജയ്‌വിൻ, ജോഷ്‌ന പ്രശാന്ത് തുടങ്ങിയവർ അവതാരകരായ പൊതുയോഗത്തിന് വൈസ് പ്രസിഡന്റ് ജോബിൻ ജോൺ സ്വാഗതം ആശംസിച്ചു. സെക്രട്ടറി സിൽവി ജോസ് പ്രവർത്തന റിപ്പോർട്ട് അവതരിപ്പിച്ചു.

ചടങ്ങിൽ സാലിസ്ബറി മലയാളി അസ്സോസിയേഷൻ സംഘടിപ്പിക്കുന്ന സീന മെമ്മോറിയൽ ക്രിക്കറ്റ് ടൂർണ്ണമെന്റ് സീസൺ 3 യുടെ ആദ്യ ഫ്ലയർ ശ്രീ കുര്യൻ ജോർജ്ജ് പ്രകാശനം ചെയ്തു. നിരവധി വർഷങ്ങളായി പൊതുരംഗങ്ങളിലും സാംസ്‌കാരിക രംഗങ്ങളിലും സജീവ സാന്നിധ്യമായ ശ്രീ കുര്യൻ ജോർജ്ജിനെ പ്രസിഡന്റ് റ്റിജി മമ്മു, രക്ഷാധികാരി ജോസ് കെ ആന്റണി എന്നിവർ ചേർന്ന് പൊന്നാടയണിയിച്ച് ആദരിച്ചു. ട്രഷറർ ജയ്‌വിൻ ജോർജ്ജ് പൊതുയോഗത്തിന് നന്ദിയറിയിച്ചു.

ഉദ്‌ഘാടന ചടങ്ങുകൾക്ക് ശേഷം ആസ്വാദ്യകരമായ രുചികരമായ ഭക്ഷണമാണ് വിളമ്പിയത്. എക്സിക്യൂട്ടീവ് കമ്മിറ്റിയംഗം പ്രശാന്ത് ബാലകൃഷ്‌ണന്റെ നേതൃത്വത്തിൽ അംഗങ്ങൾ തയ്യാറാക്കിയ നാടൻ വിഭവങ്ങളടങ്ങിയ രുചികരമായ ഭക്ഷണം ഏവരുടെയും പ്രശംസ പിടിച്ചുപറ്റി. തുടർന്ന് പ്രോഗ്രാം കോർഡിനേറ്റർ പിങ്കി റ്റിജിയുടെ നേതൃത്വത്തിൽ കുട്ടികളും മുതിർന്നവരും ചേർന്നൊരുക്കിയ കലാപരിപാടികളും പ്രോഗ്രാം കമ്മിറ്റിയംഗങ്ങളായ ജിനോയെസ് , ജോഷ്‌ന തുടങ്ങിയവരൊരുക്കിയ ഈസ്റ്റർ വിഷു തീം പ്രോഗ്രാമുകളും ആഘോഷങ്ങൾക്ക് മാറ്റുകൂട്ടി. വൈകുന്നേരം ആറു മണിയോടെ ആഘോഷങ്ങൾക്ക് പരിസമാപ്തിയായി.

കൂടുതൽ ചിത്രങ്ങൾക്ക് ഈ ലിങ്കിൽ ക്ലിക്ക് ചെയ്യുക.
https://m.facebook.com/

യുകെയിലെ തന്നെ ആദ്യത്തെ വോളിബോൾ ക്ലബുകളിൽ ഒന്നായ ലിവർപൂളിലെ ലയൺസ്‌ വോളീബോൾ ക്ലബ് (LVC) സംഘടിപ്പിക്കുന്ന പള്ളിക്കാട്ടിൽ മെമ്മോറിയൽ ഓൾ യൂറോപ്പ് വോളീബോൾ മത്സരം . മെയ് 7 ഞായറാഴ്ച 9 മുതൽ 7 വരെ ലിവർപൂൾ ബിർക്കെൻഹെഡ് വുഡ്ചർച്ച്‌ സ്കൂൾ ഹാളിൽ വെച്ച് നടത്തപ്പെടുന്നു . യുകെയിലെ പ്രമുഖ ടീമുകൾ ആയ

കേംബ്രിഡ്ജ്
കാർഡിഫ്
മാഞ്ചസ്റ്റർ
ഷെഫീൽഡ്
പ്രെസ്റ്റൺ
ലിവർപൂൾ

എന്ന ടീമുകൾക്ക് പുറമെ അയർലൻഡ് ടീമും പങ്കെടുക്കുന്ന ആവേശകരമായ ഈ മത്സരം കാണുവാൻ എല്ലാ കായിക പ്രേമികളെയും 7-ാം തീയതി മത്സര വേദിയിലേക്ക് സ്വാഗതം ചെയ്യുന്നതായി ടൂർണമെന്റ് കമ്മറ്റി അറിയിച്ചു കൊള്ളുന്നു. മത്സരദിവസം സമ്മാന കൂപ്പണുകൾ വഴി സ്മാർട്ട് വാച്ച്,പട്ടുസാരികൾ തുടങ്ങിയ അനവധി സമ്മാനങ്ങൾ നറുക്കെടുപ്പ് വഴി നൽകുന്നു . കൂടാതെ വിവിധ തരം രുചിഭേദങ്ങളുടെ കാലവറകൂട്ടുമായി ലിവർപൂൾ ഇന്ത്യൻ ധാബ ഒരുക്കുന്ന ഭക്ഷണ സ്റ്റാളും മത്സരത്തിന് മാറ്റുകൂട്ടും.

അഡ്രസ്സ്

Wood church High school
Birkenhead
CH49 7NG
Contact Number-07463441725

ഉണ്ണികൃഷ്ണൻ ബാലൻ

സമീക്ഷ യുകെയുടെ ആറാം ദേശീയ സമ്മേളനം ലണ്ടനിലെ ഹൈഗേറ്റ് സെമിട്രിയിലെ കാൾ മാർക്സിന്റെ ശവകുടീരത്തിൽ നിന്നും ആരംഭംകുറിക്കും. സമ്മേളനത്തിൽ പങ്കെടുക്കാൻ എത്തുന്ന ശ്രീ. എം വി ഗോവിന്ദൻ മാസ്റ്റർ മെയ് 19 ന് കാൾ മാർക്സിന്റെ ശവകുടീരത്തിൽ പുഷ്പാർച്ചനടത്തും. യുകെയുടെ വിവിധ ഭാഗങ്ങളിൽ നിന്നുമായി നൂറുകണക്കിനു പ്രവർത്തകർ ചടങ്ങിൽ പങ്കെടുക്കും. ഇതോടെ സമ്മേളന വേദി സജീവമാകും. 20,21 തീയതികളിൽ പിറ്റർബോറോയിൽ ആണ് സമ്മേളനം നടക്കുക.

മെയ് 20 നടക്കുന്ന പ്രതിനിധി സമ്മേളനത്തിലും തുടർന്ന് 21നു നടക്കുന്ന പൊതു സമ്മേളനത്തിലും ശ്രീ ഗോവിന്ദൻ മാസ്റ്റർ പങ്കെടുക്കും. 21 നു നടക്കുന്ന പൊതു സമ്മേളനത്തിൽ അദ്ദേഹത്തോടൊപ്പം കലാ സാംസ്കാരിക രംഗത്തുനിന്നും സംവിധായകൻ കൂടിയായ ശ്രീ ആഷിഖ് അബു പങ്കെടുക്കും. ആറാം ദേശീയ സമ്മേളനം ഒരു വൻ വിജയമാക്കാനുള്ള പ്രവർത്തനങ്ങൾ നടന്നു വരുന്നതായി സംഘാടകർ അറിയിച്ചു.

സ്റ്റീവനേജ്: സാമൂഹ്യ, സാംസ്കാരിക, കായിക തലങ്ങളിൽ രണ്ടു പതിറ്റാണ്ടിലേറെയായി ശ്രദ്ധേയമായി മുന്നേറുന്ന സർഗ്ഗം സ്റ്റീവനേജ് മലയാളി അസോസിയേഷൻ സംഘടിപ്പിച്ച ഈസ്റ്റർ വിഷു ആഘോഷം പ്രൗഢഗംഭീരമായി.

അനുഷ്‌ഠാനശോഭയാർന്ന വിഷുക്കണിയും, യേശുവിന്റെ ഉത്ഥാനവും അനുഭവേദ്യമാക്കിയ ദൃശ്യാവിഷ്ക്കാരവും, സംഗീത-നൃത്ത്യ-നടന വിസ്മയമൊരുക്കിയ കലാവസന്തവും, വിഭവ സമൃദ്ധമായ ഗ്രാൻഡ് ഈസ്റ്റർ ഡിന്നറും സർഗ്ഗം സ്റ്റീവനേജിന്റെ ആഘോഷത്തെ അവിസ്മരണീയമാക്കി.

കാരണവന്മാർ കണി കാണിച്ചു കൈനീട്ടം നൽകുന്ന പതിവു തനിമ ‘സർഗ്ഗം തറവാട്ടിൽ’ ജോണി കല്ലടാന്തിയിൽ, ലൈസാമ്മ ജോണി എന്നിവർ നൽകിയ കൈനീട്ടം, വിഷുക്കണി ദർശനത്തിനു ശേഷം ശിവകുമാർ-സിമി കുടുംബം ഏറ്റുവാങ്ങിയത് പ്രതികാല്മകമായി.

നൂറുകണക്കിന് മലയാളികുടുംബങ്ങൾ തിങ്ങി നിറഞ്ഞ ബാൺവെൽ അപ്പർ സ്‌കൂൾ ഓഡിറ്റോറിയത്തിൽ പ്രസിഡണ്ട് ബോസ് ലൂക്കോസ്, ഓൾഡ് ടൌൺ കൗൺസിലറും മുഖ്യാതിഥിയുമായ ജോൺ ഡങ്കൺ, സാമൂഹ്യ പ്രവർത്തകനും, കൗൺസിലറുമായ ഡോ.ജി ശിവകുമാർ, സെക്രട്ടറി ആദർശ് പീതാംബരൻ, ട്രഷറർ തേജിൻ തോമസ്, കമ്മിറ്റി ഭാരവാഹികൾ എന്നിവർ സംയുക്തമായി ഭദ്രദീപം കൊളുത്തിക്കൊണ്ട് സ്റ്റീവനേജ് ഈസ്റ്റർ വിഷു ആഘോഷത്തിന് നാന്ദി കുറിച്ചു. ഉദ്ഘാടനകർമ്മത്തിനു ശേഷം ജോൺ ഡങ്കൺ, ഡോ.ജി ശിവകുമാർ എന്നിവർ ഈസ്റ്റർ-വിഷു സന്ദേശങ്ങൾ നൽകി.

സർഗ്ഗം കമ്മിറ്റി അംഗങ്ങൾ ഒത്തുചേർന്ന് അവതരിപ്പിച്ച യേശുവിന്റെ പീഡാനുഭവവും, കുരിശു മരണവും, ഉത്ഥാനവും പുനരാവിഷ്ക്കാരത്തിലൂടെ അനുഭവവേദ്യമാക്കിയ ഈസ്റ്റർ സ്കിറ്റ് ആഘോഷത്തിലെ ഹൈലൈറ്റായി.

വിഷുദിന അനുഭൂതി പകർന്ന സംഗീത-നൃത്താവതരണത്തിൽ ഇഷ നായർ,ആൻഡ്രിയ ജെയിംസ്, അസിൻ ജോർജ്ജ്, ജോസ്ലിൻ ജോബി എന്നിവർ പങ്കുചേർന്നു.

ജോസ് ചാക്കോയുടെ ഭക്തിഗാനാലാപനത്തോടെ കലാ സന്ധ്യക്ക്‌ തുടക്കമായി. മാളവിക നായർ, ബെല്ലാ ജോർജ്ജ്, ടിന തോംപ്സൺ, എസ്തർ മെൽവിൻ, ജെന്നിഫർ വിജോ, അന്നാ അനൂബ്, സാറാ സുനിൽ, മെറീസ്സാ ജോസഫ്, റീത്താ, ഇഷൻവി, ആദ്യ ആദർശ്, അനു സെലിൻ, ഹൃദയാ ജിബി, ഹന്നാ ബെന്നി, ഡേവിഡ് വിജോ, ആന്റോ അനൂബ് , ഹെബിൻ ജിബി, മെറീസ്സാ ജിമ്മി, ബ്ലസി സെബാസ്റ്റ്യൻ, എമ്മ സോയിമോൻ, ജെസീക്ക മനോജ്, ആദർശ്‌ പീതാംബരൻ അടക്കം കലാകാരുടെ നൃത്യനൃത്തങ്ങൾ സദസ്സിൽ മാസ്മരികതവിരിയിച്ചു.

നിയ ലൈജോൺ, നിന ലൈജോൺ, എയ്ഡൻ പാറപ്പുറം, വിധു നന്ദൻ, ക്രിസ് ബോസ്, ഇവാ അന്നാ ടോം, ജിന്റോ മാവറ, ജോജി സഖറിയാസ്, റെജിമോൾ, നിസ്സി ജിബി,ജോർജ്ജ് തോമസ്,ഗോവർദ്ധൻ മനോജ്, നോഹ ലൈജോൺ, ബോബൻ സെബാസ്റ്റ്യൻ,അഞ്ജു മരിയാ ടോം, തേജിൻ തോമസ് തുടങ്ങിയവർ തങ്ങളുടെ ഗാനാലാപനത്തോടെ വേദിയെ സംഗീതസാന്ദ്രമാക്കി.

സർഗ്ഗം മലയാളി അസോസിയേഷനു വേണ്ടി പ്രസിഡണ്ട് ബോസ് ലൂക്കോസ് സ്വാഗതം അരുളുകയും, സെക്രട്ടറി ആദർശ് പീതാംബരൻ നന്ദി പ്രകാശനവും നിർവ്വഹിച്ചു. വൈവിധ്യങ്ങളായ മികവുറ്റ കലാവിഭവങ്ങൾ കോർത്തിണക്കി വേദി കയ്യടക്കിയ കലാ സന്ധ്യയിൽ ടെസ്സി ജെയിംസും, ജിൻറ്റു ജിമ്മിയും അവതാരകരായിരുന്നു.

സർഗ്ഗം ഈസ്റ്റർ-വിഷു ആഘോഷത്തിന്റെ കൊട്ടിക്കലാശമായി ക്രമീകരിച്ച ‘ഡീ ജെ’ യും ‘ഡാൻസ് ഫെസ്റ്റും’ പകർന്ന സംഗീത സാന്ദ്രതയിൽ, ആഹ്ളാദാരവങ്ങൾ മുഴക്കിയും,നൃത്ത ചുവടുകൾ വെച്ചും , സദസ്സൊന്നാകെ പങ്കുചേർന്നു.

വിഭവ സമൃദ്ധമായ ഈസ്റ്റർ ഗ്രാൻഡ് ഡിന്നറിനു ശേഷം സ്റ്റീവനേജ് ഈസ്റ്റർ വിഷു ഘോഷത്തിന് സമാപനമായി.

ജോസ്‌ന സാബു സെബാസ്റ്റ്യൻ

മലയാളികൾ എവിടെയും ഒരു സംഭവം തന്നെയാണ് . അത് ഏതു തിരക്കിനിടയിലായാലും മക്കളെയും കൂട്ടി കൂട്ടുകാരുമായൊരു സൗഹൃദ സന്ധ്യ, മനുഷ്യമനസ്സിൽ അതുണ്ടാക്കുന്ന ഒരു സന്തോഷവും പിന്നീട് അതുണ്ടാക്കുന്ന ഒരു ഓർമ്മക്കനലും അതൊരിക്കലും വിലമതിക്കാനാവാത്തതാണ് .

അങ്ങനെ സമ്മറിനെ വരവേൽക്കാനായി , പ്രസിഡന്റ് സൂരജ് സുധാകരൻ, വൈസ് പ്രസിഡന്റ് സാബു സെബാസ്റ്റ്യൻ , സെക്രട്ടറി ജെയ്‌സൺ ചാക്കോച്ചൻ , ജോയിന്റ് സെക്രട്ടറി ബോണി വർഗ്ഗീസ്‌ ,ട്രെഷറർ ജോബിൻ ഉതുപ്പും പിന്നെ എന്തിനും കട്ടക്ക് കൂടെ നിന്ന് സഹായിക്കുന്ന ട്രസ്റ്റി ബോർഡ് അംഗങ്ങളും കൂടി സൗത്തെൻഡ് മലയാളി അസ്സോസിയേഷൻ സംഘടിപ്പിച്ച la-fête വളരെ കളർഫുള്ളാക്കി കടന്നുപോയി . ഈ കൂട്ടായ്മക്ക് കൂടുതൽ ഉണർവ്വേകാൻ പ്രശസ്ത സംഗീത സംവിധയകൻ രവീന്ദ്രൻ മാഷിന്റെ മകനും തമിഴിൽ ഒട്ടനേകം പാട്ടുകൾ ഹിറ്റാക്കിയ നവീൻ മാധവും , റെക്സ് ടീമും നടത്തിയ സംഗീത വിരുന്ന് കൂട്ടായ്മക്ക് കൂടുതൽ ഊർജ്ജം നൽകി .

ഒട്ടും പിന്നോട്ട് നിൽക്കാതെ സൗത്തെന്റിലെ മിക്ക വീട്ടമ്മമാരും, ഭർത്താക്കന്മാരും കുട്ടികളും എല്ലാരും കൂടി വിവിധയിനം കലാപരിപാടികൾ സംഘടിപ്പിച്ചു നല്ലൊരോർമ ഒട്ടനേകം മലയാളി മനസുകളിലേക്ക് തറപ്പിച്ചു വെച്ചു .