മനുഷ്യസുബോധത്തെക്കുറിച്ചും ആത്മാക്കളെക്കുറിച്ചുമെല്ലാം കൂടുതല് കണ്ടെത്തല് നടത്താന് കഴിയുന്ന പരീക്ഷണവുമായി ചൈനീസ് ഗവേഷകര്. ഇതിനായി ലോകത്ത് ഇതു വരെ നിര്മ്മിക്കപ്പെട്ടിട്ടുള്ളതില് വെച്ച് ഏറ്റവും ശക്തിയേറിയ ബ്രയിന് സ്കാനറാണ് ചൈന നിര്മ്മിക്കുന്നത്. പദ്ധതിയുടെ ആദ്യ ഘട്ടത്തിന് ചൈനീസ് സര്ക്കാരില് നിന്നും ഔദ്യോഗിക അനുമതി ലഭിച്ചതായാണ് വിവരം. ചൈനയിലെ പ്രമുഖ ഭൗതികശാസ്ത്രജ്ഞനായ സാഹോ സോങ്സിയാനാണ് പദ്ധതിയുടെ മേല്നോട്ടചുമതല.
നൂറു കോടി യുവാന് ചിലവു വരുന്ന പദ്ധതിയെക്കുറിച്ച് കൂടുതല് വിശദാംശങ്ങള് ചൈന ഔദ്യോഗികമായി പുറത്തുവിട്ടിട്ടില്ല. ഗുവാങ്ടോങ് പ്രവിശ്യയിലെ ഷെന്ചെനിലാണ് പദ്ധതിയുമായി ബന്ധപ്പെട്ട പ്രവര്ത്തികള് നടക്കുന്നത്.
മനുഷ്യന്റെ തലച്ചോറിലെ ഓരോ ന്യൂറോണിന്റെയും ചലനങ്ങളും പ്രവര്ത്തികളും രേഖപ്പെടുത്താന് മാത്രം ശേഷിയുള്ളതായിരിക്കും ഈ സ്കാനര്. ഈ അദ്ഭുത ഉപകരണം പുതിയ പല അറിവുകളും മനുഷ്യര്ക്ക് സമ്മാനിക്കുമെന്നാണ് പ്രതീക്ഷിക്കപ്പെടുന്നത്. മനുഷ്യന്റെ സുബോധത്തെക്കുറിച്ചും പാര്ക്കിന്സന് പോലുള്ള രോഗങ്ങള്ക്കുള്ള ചികിത്സയെക്കുറിച്ചും കൂടുതല് വെളിച്ചം വീശാന് ഈ പദ്ധതിക്കാകും. മനുഷ്യന് ഇന്നേവരെ തിരിച്ചറിഞ്ഞിട്ടില്ലാത്ത തലച്ചോറിലെ പ്രവര്ത്തികളെക്കുറിച്ച് നിരവധി അറിവുകള് നല്കാന് ഇതിലൂടെ സാധിക്കുമെന്നും കരുതുന്നു.
ആത്മാവും മനുഷ്യന്റെ സുബോധവുമെല്ലാം കാലങ്ങളായി തര്ക്കവിഷയങ്ങളാണ്. വിവിധ മതവിശ്വാസങ്ങള്ക്ക് ആത്മാവിനെചൊല്ലി വ്യത്യസ്ഥ അഭിപ്രായങ്ങളുണ്ട്. ചിന്തകര് തുടങ്ങി സാധാരണക്കാരുടെ വരെ ചര്ച്ചകളിലും ആത്മാവ് ഇടംപിടിക്കാറുണ്ട്. അപ്പോഴും ഇതു സംബന്ധിച്ച് ആത്മാവിനെക്കുറിച്ച് ശാസ്ത്ര സമൂഹത്തിന് കൃത്യമായ തെളിവുകള് ഇപ്പോഴും ലഭിച്ചിട്ടില്ല.
സാധാരണ എംആര്ഐ സ്കാനറുകള്ക്ക് 1.5 മുതല് 3 ടെസ്ല വരെയാണ് ശേഷി. വിദ്യുത് ചാലിക ബലത്തിന്റെ അളവാണ് ടെസ്ലയില് രേഖപ്പെടുത്തുന്നത്. സെര്ബിയന് അമേരിക്കന് ഭൗതികശാസ്ത്രജ്ഞന് നികോള ടെസ്ലയുടെ ബഹുമാനാര്ഥമാണ് ഈ പേര് ലഭിച്ചത്. യുഎസിലും യൂറോപിലുമുള്ള ചില സ്കാനറുകള്ക്ക് 11 ടെസ്ല വരെ ശേഷിയുണ്ട്. ചൈന നിര്മിക്കാനിരിക്കുന്ന ഉപകരണത്തിന് 14 ടെസ്ലയാണ് ശേഷി. ഇതുപയോഗിച്ച് തലച്ചോറിലെ ചെറു ചലനങ്ങള് പോലും ഒപ്പിയെടുക്കാനാകും.
മായം കലര്ത്തിയ വെളിച്ചെണ്ണ മാര്ക്കറ്റില് സുലഭമാകുമ്പോഴും സാധാരണക്കാര് അറിയാതെ പോകുന്നു ഒന്നുണ്ട്. സര്ക്കാര് നിരോധിച്ച വെളിച്ചെണ്ണ ബ്രാന്ഡുകളാണ് നമ്മള് കൂടിയ കാശു കൊടുത്ത് വാങ്ങിക്കുന്നതെന്ന്. സംസ്ഥാന ഭക്ഷ്യസുരക്ഷാ വകുപ്പ് ഇക്കാര്യം നോട്ടീസ് മൂലം അറിയിച്ചിട്ടുണ്ടെങ്കിലും സാധാരണക്കാരിലേക്ക് എത്തിയിട്ടില്ല എന്നുവേണം കരുതാന്. ഇതുകൂടാതെ വ്യാജന്മാര് പുതിയ പേരില്, ബ്രാന്ഡില് മായം കലര്ത്തിയ വെളിച്ചെണ്ണ വില്പ്പനയ്ക്ക് എത്തിക്കുന്നതും ഭക്ഷ്യസുരക്ഷാ ഉദ്യോഗസ്ഥര്ക്ക് വിനയാകുന്നു. താഴെ കൊടുത്തിരിക്കുന്നത് സംസ്ഥാനത്ത് നിരോധിക്കപ്പെട്ട വെളിച്ചെണ്ണ ബ്രാന്ഡുകളുടെ പേരുകളാണ്. ഇനിയെങ്കിലും ഇതൊന്ന് മനസ്സില് കുറിച്ചു വച്ചോളൂ…
അത്ര പെട്ടെന്നൊന്നും ആര്ക്കും കണ്ടുപിടിക്കാനാവാത്ത വിധമാണ് ഭക്ഷ്യ എണ്ണകളിലെ മായം ചേര്ക്കല്. റിഫൈന്ഡ് ഓയിലിനെ വെളിച്ചെണ്ണയും നല്ലെണ്ണയുമാക്കി മാറ്റുന്ന തട്ടിപ്പ് തുടങ്ങിയിട്ട് ഏറെ നാളുകളായി. സാധാരണക്കാര് ഇപ്പോഴും ഈ ചതിയെക്കുറിച്ച് ബോധവാന്മാരല്ല. എന്നാല് അല്പ്പം ശ്രദ്ധിച്ചാല് ഈ തട്ടിപ്പ് കണ്ടെത്താനാകുമെന്ന് പാചക രംഗത്തെ വിദഗ്ധര് സാക്ഷ്യപ്പെടുത്തുന്നു. പാചക വിദഗ്ധന് പഴയിടം മോഹനന് നമ്പൂതിരിയുടെ വിഡിയോ കാണാം
[ot-video][/ot-video]
പാചകവൈവിധ്യത്തിന്റെ രുചിക്കൂട്ട് കൊണ്ട് യൂട്യൂബിലൂടെ ലോകമെങ്ങും തിളങ്ങിയ പാചക മുത്തശ്ശി മസ്താനി അന്തരിച്ചു.107-ാം വയസിലായിരുന്നു മസ്താനമ്മ മുത്തശ്ശിയുടെ അന്ത്യം. കഴിഞ്ഞ വര്ഷം ഏറ്റവും കൂടുതല് ആളുകള് യൂട്യൂബിലൂടെ കണ്ടവിഡിയോ ചാനല് കണ്ട്രി ഫുഡ്സില് മസ്താന മുത്തശ്ശിയുടെ പാചകമായിരുന്നു ഫീച്ചര് ചെയ്തിരുന്നത്.
പാചകത്തിലും രുചിക്കൂട്ട് തയാറാക്കുന്നതിലും മസ്താനമ്മയ്ക്ക് പ്രത്യേക കഴിവായിരുന്നു. തണ്ണിമത്തനുള്ളില് ചിക്കന് വെച്ച് പാകം ചെയ്യുക, തക്കാളിക്കുള്ളില് കോഴിമുട്ട വച്ച് ഓംലറ്റ് ഉണ്ടാക്കുക തുടങ്ങി മുത്തശ്ശിക്ക് തന്റേതായ വെറൈറ്റി ശൈലിയിലാണ് ഭക്ഷണം ഉണ്ടാക്കുന്നത്. ബന്ധുക്കള് സുഹൃത്തുക്കള് എന്നതിലുപരി എല്ലാവര്ക്കും ഭക്ഷണം ഉണ്ടാക്കാന് മുത്തശ്ശിക്കിഷ്ടമാണ്.
2016 ല് ചെറുമകന് ലക്ഷ്മണിനും കൂട്ടുകാര്ക്കും വഴുതനങ്ങാ കറി തയാറാക്കുന്നതിന്റെ വിഡിയോ സമൂഹമാധ്യമങ്ങളില് വൈറലായതോടെയാണ് മുത്തശ്ശി ലോകത്തിന്റെ ശ്രദ്ധ നേടുന്നത്. 75 ലക്ഷത്തോളം ആള്ക്കാരാണ് മുത്തശ്ശിയുടെ വീഡിയോ കണ്ടത്. തുടര്ന്ന് മുത്തശ്ശിയുടെ രുചിക്കൂട്ടുകളുടെ പല വീഡിയോകളും സോഷ്യല് മീഡിയയിലെത്തി. എല്ലാം ഒന്നിനൊന്ന് ഹിറ്റുമായിരുന്നു.
ആന്ദ്രപ്രദേശിലെ ഗുഡിവാഡയിലായിരുന്നു മുത്തശ്ശിയുടെ താമസം. അഞ്ച് മക്കളായിരുന്നു. ഇരുപത്തിരണ്ടാം വയസില് ഭര്ത്താവ് മരിച്ചതോടെ അഞ്ച് മക്കളെയും ഈ അമ്മ കഷ്ടപ്പെട്ട് വളര്ത്തി. 107ാമത്തെ വയസില് ഇനിയും നാവറിയാത്ത ഒട്ടേറെ രുചിക്കൂട്ടുകള് ബാക്കി വച്ചാണ് മുത്തശ്ശിയുടെ വിടവാങ്ങല്.
അന്തരീക്ഷ മലിനീകരണവും കാലാവസ്ഥ വ്യതിയാനവും പ്രതിരോധിച്ചില്ലെങ്കില് പ്രശ്നങ്ങള് സങ്കീര്ണമാകുമെന്ന മുന്നറിയിപ്പുമായാണ് പുതിയ റിപ്പോര്ട്ടുകള് പുറത്ത് വന്നിരിക്കുന്നത്. കാലാവസ്ഥ വ്യതിയാനം ഏറ്റവും കൂടുതല് ബാധിക്കാന് പോകുന്നത് യൂറോപ്പിനെയായിരിക്കുമെന്നും പഠനങ്ങള് പറയുന്നു.
ഭക്ഷ്യ വസ്തുക്കളുടെ ലഭ്യതയെയും ആരോഗ്യത്തെയും കാലാവസ്ഥാ വ്യതിയാനം സാരമായി ബാധിക്കും. ലോകത്തിന്റെ വിവിധ ഭാഗങ്ങളില് നിന്നുള്ള 27 സ്ഥാപനങ്ങളിലെ വിദഗ്ധര് നടത്തിയ പഠനത്തിലാണ് കാലാവസ്ഥാ വ്യതിയാനം സംബന്ധിച്ച ഗൌരവകരമായ കണ്ടെത്തലുകള് ഉള്ളത്. ആഗോള താപനിലയിലുണ്ടാകുന്ന വര്ധനവ് പിടിച്ചുനിര്ത്താന് കഴിഞ്ഞില്ലെങ്കില് അത് സാരമായി ബാധിക്കുക യൂറോപ്യന് വന്കരയെയാകും. കൂടിയ തോതിലുള്ള നഗരവത്കരണമാണ് ഇതിന് പ്രധാനകാരണം.
കാലാവസ്ഥയിലുണ്ടാകുന്ന വ്യതിയാനം പെട്ടെന്ന് ബാധിക്കുന്നത് പ്രായമേറിയവരെയാണ്. ആയുര്ദൈര്ഘ്യം കൂടുതലുള്ള യൂറോപ്പില് 42 ശതമാനം വൃദ്ധരും കാലാവസ്ഥാ വ്യതിയാനത്തിന്റെ കെടുതികള് അനുഭവിക്കുന്നു. ഏഷ്യയില് ഇത് 34 ശതമാനമാണ്. ഗര്ഭസ്ഥ ശിശുക്കളും കാലാവസ്ഥാ മാറ്റത്തിന്റെ ഇരകളാണ്. യൂറോപ്പാണ് ഇക്കാര്യത്തിലും കൂടുതല് ദുരിതം അനുഭവിക്കുന്നത്. പൊതുജനാരോഗ്യത്തെയും ഉദ്പാദന ക്ഷമതയെയും ചൂടുകൂടുന്നത് സാരമായി ബാധിക്കുന്നുണ്ട്.
തൊഴില് ക്ഷമത ഗണ്യമായി കുറയുന്നു. 153 ബില്യണ് മണിക്കൂര് തൊഴില് സമയമാണ് കഴിഞ്ഞ വര്ഷം മാത്രം ലോകത്താകെ നഷ്ടമായത്. കാര്ഷിക ഉദ്പാദനത്തിലും സാരമായ കുറവുണ്ട്. പകര്ച്ചവ്യാധികള്ക്കും കാലാവസ്ഥയിലുണ്ടാകുന്ന മാറ്റം ഒരു പ്രധാന കാരണമാണ്. ഉദാഹരണത്തിന് 1950 കളേതിനേക്കാള് ഡങ്കി വൈറസിന് എട്ട് ശതമാനത്തോളം കരുത്ത് കൂടി. സിക, ഡെങ്കി, ചിക്കുന്ഗുനിയ തുടങ്ങിയ വൈറസുകള് പരത്തുന്ന ഈഡിസ് കൊതുകള് വ്യാപകമായി പെരുകി. ചരിത്രത്തില് ഏറ്റവും കൂടുതല് ഡങ്കി പടര്ന്നുപിടിച്ചത് 2016 ല് ആയിരുന്നു. ഇതും ഈ റിപ്പോര്ട്ടിനോട് ചേര്ത്ത് വായിക്കണം.
ജെറിൻ തോമസ്, ഗെയിന്സ്ബറോ
ലോകശക്തികളില് മികവുറ്റ സാമ്രാജ്യ ശക്തിയായി വളര്ന്നു വന്ന്, വലുപ്പത്തില് ചെറുതാണെങ്കിലും ശക്തിയിലും ബുദ്ധിയിലും ഇന്നും വന് ശക്തികളായി തന്നെ വിരാജിക്കുന്ന, സാംസ്കാരിക വിദ്യാഭ്യാസ സംരംഭങ്ങളുടെ കേന്ദ്രമായ ബ്രിട്ടന് എവിടെയാണ് തെറ്റുപറ്റിയത്? നിയമത്തെ അനുസരിക്കുന്നതിലും ബഹുമാനിക്കുന്നതിലും എല്ലായ്പ്പോഴും മുന്നിരയില് ഒന്നാമതായുള്ള രാജ്യമെന്ന നിലയിലും തെറ്റ് പറ്റിയാല് അതിനെ അംഗീകരിക്കുകയും ‘സോറി’ എന്ന പദം കാഷ്വല് ഭാഷാപ്രയോഗത്തില്പ്പോലും ഉള്പ്പെടുത്തികൊണ്ട് തെറ്റുകള് നഷ്ടപരിഹാരത്തോടെ എപ്പോഴും തിരുത്തുകയും ചെയ്യുന്ന ഏക ലോകശക്തി എന്ന പദവി അര്ഹിക്കുന്ന ഈ രാജ്യത്തില് ഇനിയും നിലനില്ക്കുന്ന ഒരു തെറ്റ് കാണാനാവുന്നില്ലെയോ?
2006ലെ നിയമപ്രകാരം ഓവറോള് 6 സ്കോര് ഉള്ളവരും 3 വര്ഷത്തില് കുറയാത്ത പ്രവൃത്തി പരിചയമുള്ളവരുമായ എഷ്യന് നഴ്സസ് അഡാപ്റ്റേഷന് ട്രെയിനിംഗ് വഴി ഇവിടെ PIN number നേടാമായിരുന്നു. ഈ നിയമപ്രകാരം ഇവിടെ ഓവറോള് 6 നേടിയ എഷ്യന് നഴ്സുമാര് ഇവിടെയെത്തിയെങ്കിലും സ്ഥിരതയില്ലാതെ മാറിവന്ന നിയമങ്ങള് 6 എന്നത് 6.5 പിന്നീട് 7 വീണ്ടും ഓരോ വിഷയത്തിനും 7 സ്കോര് എന്നിങ്ങനെ എത്തിപ്പെടാനാകാത്ത ലെവലായി ഉയര്ത്തിയതിനാല്, അന്ന് എത്തിച്ചേര്ന്നവര് പിന് നമ്പര് ലഭിക്കാതെ കെയര് അസിറ്റന്റ് പോലുള്ള ഒരു ജോലിയിലേക്ക് മാറേണ്ടി വരികയും അനുദിനം IELTS നുംOET പോലുള്ള മറ്റ് ട്രെയിനിംഗുകള്ക്കും വേണ്ടി താങ്ങാനാവാത്തവിധം പണം ചെലവഴിച്ച് ഇന്നും മൂകമായി ജീവിക്കുന്നു.
ഇതില് പ്രാധാന്യം അര്ഹിക്കുന്ന വസ്തുത 10 വര്ഷങ്ങള്ക്കുപരി ഈ രാജ്യത്ത് സേവനം ചെയ്തിട്ടും ബ്രിട്ടീഷ് പൗരത്വം നേടിയിട്ട് പോലും എഷ്യന് രാജ്യത്ത് നിന്നും വന്നുവെന്ന കാരണത്താല് ഇവര് ഇന്നും IELTS നിബന്ധനകള്ക്ക് വിധേയരായി പിന് നമ്പര് ലഭിക്കാതെ മാറ്റി നിര്ത്തപ്പെടുന്നു. എന്നാല് യൂറോപ്യന് രാജ്യങ്ങളില് നിന്നും വന്ന് ഇംഗ്ലീഷ് ഭാഷ സംസാരിക്കാനോ എഴുതാനോ പോലും പ്രാവീണ്യമില്ലാത്തവര് ഈ IELTS കടമ്പകള് ബാധകമല്ലാതെ തങ്ങളുടെ പിന് നമ്പര് നേടിയെടുക്കുമ്പോള് ഭാഷാ പ്രാവീണ്യമുള്ള ഏഷ്യന് നഴ്സുമാര് അവഗണിക്കപ്പെടുന്നത് ഇനിയും കാണാനാവുന്നില്ലയോ?
ഏഷ്യന് രാജ്യങ്ങളില് നിന്നും വന്ന് ബ്രിട്ടീഷ് പൗരത്വം നേടിയ എഷ്യന് നഴ്സിന് നീതിയും തുല്യതയും നിഷേധിക്കപ്പെടുന്നത് കാണാന് നല്ല മനസുള്ള ഈ രാജ്യത്തിന് തെറ്റുപറ്റിയോ? മള്ട്ടി സ്പെഷ്യാലിറ്റി ഹോസ്പിറ്റലുകളില് ജോലി ചെയ്തിരുന്ന ഇവര് തങ്ങളുടെ ജോലി ഉപേക്ഷിച്ച് ഈ രാജ്യത്തെ നിയമ മാനദണ്ഡങ്ങള് വിശ്വസിച്ച് കുടിയേറിയപ്പോള് വന്നതിന് ശേഷം മാറിയ മാനദണ്ഡങ്ങള് മൂലം സ്വന്തം പ്രൊഫഷന് നഷ്ടമായ ഇവര്ക്ക് ഈ മാറിയ മാനദണ്ഡങ്ങള് ബാധകമല്ലെന്ന് അംഗീകരിക്കുന്നതെല്ലേ നീതിയെന്ന് ചിന്തിക്കുന്നതില് തെറ്റുണ്ടോ?
Discrimination എന്നാല് unjust treatment of different categories of people especially on the ground of race,age and sex. അപ്പോള് ബ്രിട്ടീഷ് പൗരന്മാര് ആയിട്ട് പോലും ഏഷ്യയില് നിന്നും വന്നു എന്ന കാരണത്താല് യൂറോപ്യന് യൂണിയന് രാജ്യത്ത് നിന്ന് വന്ന പൗരന്മാര്ക്ക് നല്കുന്ന ആനുകൂല്യം പോലും നല്കാത്തത് വംശീയ വിവേചനമാണ് എന്ന് ചിന്തിക്കുന്നതില് തെറ്റുണ്ടോ? ഇതില് ഒരു വംശീയ വിവേചനം ഒളിഞ്ഞു കിടപ്പില്ലേ?
ഈ രാജ്യത്ത് ജനിച്ചു വളര്ന്ന ഒരു നഴ്സ് മാനേജര് ആയി ജോലി ചെയ്യുന്ന എന്.എച്ച്.എസ് പ്രൊഫഷണലുകള്ക്ക് ഈ IELTS or OET Exam നല്കിയാല് എത്രപേര് ഓരോ വിഷയത്തിനും 7 സ്കോര് വാങ്ങി പാസാകുമെന്ന് ആരെങ്കിലും ചിന്തിച്ചിട്ടുണ്ടോ? എത്തിപ്പിടിക്കാനാവാത്ത രീതിയില് സ്കോര് ഉയര്ത്തികൊണ്ട് ഇവരെ പിന് നമ്പര് നേടാനാവാത്തവിധം മാറ്റി നിര്ത്തുന്നത് നീതി ആണോ?
നഴ്സ് എന്ന പ്രത്യേക പദവിയുടെ പ്രത്യേകതകള് പരിഗണിച്ച് അവര്ക്ക് ജോലിയില് ആവശ്യമായ പരിജ്ഞാനം അളന്നു നോക്കുന്ന പരീക്ഷകള്ക്ക് പകരം എത്തിപിടിക്കാനാവാത്ത ഭാഷാ പരീക്ഷകള് മാത്രം മാനദണ്ഡമായി പരിഗണിക്കുന്നത് ശരിയാണോ?
മനുഷ്യാവകാശങ്ങള്ക്കും നീതി ന്യായ വ്യവസ്ഥകള്ക്കും അങ്ങേയറ്റം മൂല്യം കല്പ്പിക്കുന്ന, മനുഷ്യരുടെ വളര്ച്ചയ്ക്കും നന്മയ്ക്കും വേണ്ടി നിലകൊള്ളുന്ന രാജ്യമെന്ന നിലയിലും Equality, non- discrimination എന്ന വലിയ പുണ്യങ്ങളെ എന്നും കൃത്യമായി പാലിക്കുകയും ചെയ്യുന്ന ഈ രാജ്യത്തിന് ഇനിയും തിരിച്ചറിയിനാകാത്ത ഒരു Blindspot mistake ആണോ ഇത്?
സ്വന്തം തെറ്റുകള് തിരുത്തുവാനും അതിന്റെ കാരണത്താല് ഉണ്ടായ കുറവുകള്ക്ക് എന്നും പരിഹാരം നിര്ദേശിച്ച് നീതിയും തുല്യതയ്ക്കും വേണ്ടി വര്ത്തിക്കുന്ന ഏക രാജ്യമെന്ന നിലയിലും ലോക പ്രശസ്തമായ ബ്രിട്ടന് ഈ തെറ്റ് എങ്ങനെ ബ്രിട്ടീഷ് പാര്ലമെന്റില് ഇനിയും ശ്രദ്ധിക്കപ്പെടുന്നില്ല എന്നത് വളരെ നിരാശാജനകമാണ്.
മൂകമായി ഉള്ളിലൊതുക്കുന്ന വിതുമ്പലുകളുമായി ആയിരങ്ങള് തങ്ങളുടെ പ്രൊഫഷനുകളില് ഇങ്ങനെ മാറ്റി നിര്ത്തപ്പെട്ട വിഭാഗം എന്ന ഒറ്റ കാരണം മുഖേന നീതി നിഷേധിക്കപ്പെടുവാന് ഈ രാജ്യം ഒരിക്കലും അനുവദിക്കില്ല എന്ന ശുഭാപ്തിവിശ്വാസം മാത്രമാണ് ഇനിയവര്ക്കാശ്വാസം.
ഒരു ചെറിയ കാലയളവില് ഓണ് ദി ജോബ് ട്രെയിനിംഗ് നല്കി ഇവരെ ബാന്ഡ് 5 ടോപ്പ് ഗ്രേഡില് എടുത്താലും ഈ കുറവുകള് വരുത്തിയ മുറിവുകൾ മറക്കാനാവും വിധം തിരുത്താനാകുമോ?
ഒരു അലിഖിത ഭരണഘടയുള്ള ഉള്ള സൂപ്പര് പവര് ആയി വര്ത്തിക്കുന്ന ലോകശക്തികളില് മുന്നിരയിലുള്ള ഈ രാജ്യത്ത് പുതിയ നിയമങ്ങള് നിര്മ്മിക്കുവാനുള്ള അധികാരം പാര്ലമെന്റിനാണ്. ഇനിയും എത്രകാലം കാത്തിരിക്കണം ഈ കുറവുകള് നികത്തപ്പെടുവാന്?
ന്യൂസ് ഡെസ്ക്
ഓവർസീസ് നഴ്സുമാർക്ക് യുകെയിൽ എൻഎംസി രജിസ്ട്രേഷനുള്ള ഇംഗ്ലീഷ് ലാംഗ്വേജ് ടെസ്റ്റിനുള്ള മാനദണ്ഡങ്ങളിൽ ഇളവ് പ്രഖ്യാപിച്ചു. പുതിയ നയമനുസരിച്ച് ഐഇഎൽടിഎസിന്റെ റൈറ്റിംഗ് മൊഡ്യൂളിന് ക്വാളിഫൈയിംഗ് സ്കോർ 6.5 മതിയാവും. എന്നാൽ റീഡിംഗ്, ലിസണിംഗ്, സ്പീക്കിംഗ് മൊഡ്യൂളുകൾക്ക് സ്കോർ 7 നിർബന്ധമായും വേണമെന്ന നിലവിലെ രീതി തുടരും. എൻഎംസി നടത്തിയ കൺസൾഷേട്ടന്റെ ഫലമായാണ് ഇളവുകൾ പ്രഖ്യാപിച്ചത്. വളരെ നല്ല രീതിയിൽ ഇംഗ്ലീഷിൽ ആശയ വിനിമയം നടത്തുന്ന നിരവധി നഴ്സുമാരും മിഡ് വൈഫുമാരും ഐഇഎൽ ടിഎസ് ടെസ്റ്റിൽ യോഗ്യത നേടാനാവാതെ വരുന്നു എന്ന യഥാർത്ഥ്യം എൻഎംസി മനസിലാക്കിയതിന്റെ തുടർച്ചയായാണ് ഓവർസീസ് നഴ്സുമാർക്ക് ഗുണകരമായ മാറ്റം നടപ്പാക്കുന്നത്.
ഇന്റർനാഷണൽ രജിസ്ട്രേഷൻ റിവ്യൂ പ്രൊപോസൽ നവംബർ 28ന് നടക്കുന്ന എൻഎംസി കൗൺസിൽ മീറ്റിംഗ് പരിഗണിക്കും. ഓവർഓൾ സ്കോർ 7 നിന്ന് കുറയ്ക്കണമെന്ന ആവശ്യം എൻഎംസി തള്ളിക്കളഞ്ഞു. മോഡേൺ വർക്ക് എൺവയേൺമെൻറിൽ സുരക്ഷിതമായ രോഗികളുമായി ആശയവിനിമയം നടത്തുന്നതിന് റൈറ്റിംഗിൽ സ്കോർ 7 എന്ന ലെവൽ ആവശ്യമില്ലെന്ന വാദം എൻഎംസി അംഗീകരിച്ചു. യൂറോപ്യൻ യൂണിയനിൽ നിന്നുമുള്ള ഹെൽത്ത് കെയർ പ്രൊഫഷണലുകൾക്കും മറ്റ് രാജ്യങ്ങളിൽ നിന്നുള്ള വർക്കും ഇനി മുതൽ ഒരേ മാനദണ്ഡമാണ് എൻഎംസി നടപ്പാക്കുന്നത്.
സ്റ്റാഫ് ഷോർട്ടേജും നിലവിലെ എൻഎച്ച് എസിലെ നഴ്സുമാരുടെ കൊഴിഞ്ഞുപോകലും എൻഎംസിയുടെ തീരുമാനത്തെ സ്വാധീനിച്ചിട്ടുണ്ട്. ഇംഗ്ലണ്ടിൽ മാത്രം 42,000 നഴ്സിംഗ് വേക്കൻസികൾ നിലവിലുണ്ട്. കഴിഞ്ഞ വർഷത്തെ ഒ ഇ ടി അടക്കമുള്ള ഇംഗ്ലീഷ് ലാംഗ്വേജ് പരിഷ്കാരത്തിനുശേഷം യൂറോപ്യൻ യൂണിയനിൽ നിന്ന് പുറത്തുള്ള രാജ്യങ്ങളിൽ നിന്നും യുകെ രജിസ്ട്രേഷന് അപേക്ഷിക്കുന്നവരുടെ എണ്ണത്തിൽ 80 ശതമാനം വർദ്ധനവുണ്ടായി.
ഹൊറര് സിനിമകള് എന്ന് കേള്ക്കുമ്പോള് തന്നെ ചിലര്ക്ക് ഭയമാണ്. എന്നാല് മറ്റു ചിലര്ക്ക് ഹൊറര് സിനിമകള് ഒരു ഹരമാണ്. ലോകമെമ്പാടും പ്രേതസിനിമകള്ക്ക് എണ്ണിയാല് ഒടുങ്ങാത്തത്ര ആരാധകരുണ്ട്. വല്ലാത്തൊരു ത്രില് ആണ് ഈ സിനിമകള് നല്കുന്നത്. ഓരോ നിമിഷവും കാണികളെ ഉദ്വേഗഭരിതരാക്കാന് എന്തെങ്കിലുമൊന്നു പ്രേതസിനിമകളില് ഉണ്ടാകും. ഹോളിവുഡിലായാലും ഇങ്ങു നമ്മുടെ നാട്ടിലായാലും അതുകൊണ്ട് തന്നെ പ്രേതസിനിമകള്ക്ക് ആരാധകരുണ്ട്. എന്നാല് ഹൊറര് സിനിമകള് കാണുന്നത് കൊണ്ട് ചില ആരോഗ്യഗുണങ്ങള് കൂടിയുണ്ട് എന്ന് പറഞ്ഞാല് വിശ്വസിക്കുമോ ? എങ്കില് കേട്ടോളൂ സംഗതി സത്യമാണ്. ഹൊറര് സിനിമകളുടെ ആരോഗ്യഗുണങ്ങള് എന്തൊക്കെയാണ് എന്നൊന്ന് നോക്കാം.
കലോറി കത്തിച്ചു കളയുന്നു
എന്തിനാണ് നമ്മള് എല്ലാവരും ജിമ്മിലും മറ്റും പോയും ആഹാരം നിയന്ത്രിച്ചും കഷ്ടപ്പെടുന്നത്. ശരീരത്തിലെ അമിത കലോറിയെ എരിച്ചു കളയാനല്ലേ. എങ്കില് കേട്ടോളൂ. കലോറി കത്തിക്കാന് ഏറ്റവും നല്ല മാര്ഗ്ഗങ്ങളില് ഒന്നാണ് പ്രേതസിനിമകള് കാണുക എന്നത്. 2012 ല് യുകെയില് നടത്തിയൊരു പഠനത്തിലാണ് ഇത് കണ്ടെത്തിയത്. പത്തു പേരില് നടത്തിയ ഈ പഠനത്തില് ഏറ്റവും ഭയപ്പെടുത്തുന്ന പ്രേതസിനിമ കണ്ട ആളുടെ ശരീരത്തില് നിന്നാണ് ഏറ്റവുമധികം കലോറി നഷ്ടമായത്. ഈ സമയം ഇയാളുടെ ഹൃദയമിടിപ്പ്, ശ്വാസോച്ഛാസം എന്നിവ പതിവിലും കൂടുതലായിരുന്നു. ടെന്ഷന് ഉണ്ടാകുന്ന സമയത്ത് പുറപ്പെടുവിക്കുന്ന അഡ്രനെലിന് ഹോര്മോണ് ഉത്പാദനം ഈ സമയം ഇവര്ക്ക് അമിതമായിരുന്നു എന്നും കണ്ടെത്തിയിട്ടുണ്ട്.
പ്രതിരോധശേഷി കൂട്ടും
പ്രേതസിനിമകള് കാണുമ്പോള് ശരീരത്തിലെ രക്തയോട്ടം വര്ദ്ധിക്കും . ഒപ്പം വൈറ്റ് ബ്ലഡ് സെല്ലുകളുടെ ഉത്പാദനം വര്ദ്ധിക്കും. ഇത് ശരീരത്തിന്റെ പ്രതിരോധശേഷി കൂട്ടും.
മൂഡ് മാറ്റങ്ങള്
പ്രേതസിനിമകള് കാണുമ്പോള് നമ്മളില് നെഗറ്റീവ് വികാരമാണ് ഉണ്ടാകുന്നതെങ്കിലും സിനിമ വിട്ടിറങ്ങുന്നതോടെ മനസ് റിലാക്സ് ആകുകയും കൂടുതല് സന്തോഷം തോന്നുകയും ചെയ്യുമെന്ന് മനശാസ്ത്രവിദഗ്ധര് വ്യക്തമാക്കിയിട്ടുണ്ട്.
എന്നാല് കൊച്ചുകുട്ടികളെ ഇത്തരം ഹൊറര് സിനിമകള് കാണിക്കുന്നതിനോട് മനശാസ്ത്രവിദഗ്ധര് അനുകൂലിക്കുന്നില്ല. ചെറിയ പ്രായത്തിലുള്ള കുഞ്ഞുങ്ങളില് ഇത് മാനസികപിരിമുറുക്കവും സമ്മര്ദ്ദവും വര്ദ്ധിപ്പിക്കുമെന്ന് അവര് പറയുന്നു. മാത്രമല്ല ഇത് അവരുടെ മാനസികനിലയെ ബാധിക്കാനും സാധ്യതയുണ്ട്.
ലണ്ടന്: രാജ്യത്ത് വര്ദ്ധിച്ചുവരുന്ന പൊണ്ണത്തടി നിയന്ത്രിക്കാനുള്ള പദ്ധതിയുമായി പബ്ലിക്ക് ഹെല്ത്ത് ഇംഗ്ലണ്ട്. കലോറി കുറഞ്ഞ അളവില് ഭക്ഷണ പദാര്ത്ഥങ്ങള് ലഭ്യമാക്കാനുള്ള റസ്റ്റോറന്റുകളോട് നിര്ദേശിക്കുകയാവും ആദ്യഘട്ടത്തില് ചെയ്യുക. സാധാരണഗതിയില് 1000ത്തിലേറെ കലോറിയില് വിപണിയിലുള്ള പിസ്സ തുടങ്ങിയ ഭക്ഷണങ്ങള് 928 കലോറിയിലേറെ വര്ദ്ധിക്കാന് പാടില്ലെന്ന് നിര്ദേശത്തില് പറയുന്നു. പൊണ്ണത്തടിയന്മാരായ പൗരന്മാരുടെ എണ്ണത്തില് സമീപകാലത്തുണ്ടായ ക്രമാതീതമായ വളര്ച്ച നിയന്ത്രിക്കുക ലക്ഷ്യം വെച്ചാണ് പുതിയ നീക്കം. പൊണ്ണത്തടി വലിയ ആരോഗ്യ പ്രശ്നങ്ങള്ക്കും അകാല മരണത്തിനും കാരണമാകുന്നതായി നേരത്തെ ആരോഗ്യ രംഗത്തെ വിദഗ്ദ്ധര് കണ്ടെത്തിയിരുന്നു.
കലോറി കുറയ്ക്കുന്നതുമായ ഗെയിഡ് ലൈന്സ് ‘റെഡി മീല്സ്, സാന്ഡ്വിച്ച്, കുക്കിംഗ് സോസ്, സൂപ്പ്, ബര്ഗര്, പ്രോസസ്ഡ് മീല്സ്’ തുടങ്ങിയവയ്ക്കും ബാധകമാവും. ഇത് സംബന്ധിച്ച നിര്ദേശങ്ങള് ഉടന് തന്നെ റസ്റ്റോറന്റുകളെ അറിയിക്കാനാണ് തീരുമാനം. 2024 ഓടെ രാജ്യത്ത് ഒരാള് ഉപയോഗിക്കുന്ന കലോറിയില് 20 ശതമാനം കുറവ് വരുത്താനാണ് പബ്ലിക്ക് ഹെല്ത്ത് ഇംഗ്ലണ്ട് ലക്ഷ്യമിടുന്നത്. നേരത്തെ യു.കെയിലെ ആളുകള്ക്ക് ഭക്ഷണ ക്രമീകരണം സംബന്ധിച്ച് കൃത്യമായ നിയന്ത്രണങ്ങള് അത്യാവശ്യമാണെന്ന് റിപ്പോര്ട്ടുകള് പുറത്തുവന്നിരുന്നു. ഇതിന് പിന്നാലെയാണ് കലോറിയില് നിയന്ത്രണം കൊണ്ടുവന്നിരിക്കുന്നത്.
പൊണ്ണത്തടിയുള്ള കുട്ടികളുടെ എണ്ണത്തില് റെക്കോര്ഡ് വര്ദ്ധനവുണ്ടായ സാഹചര്യത്തിലാണ് പുതിയ പദ്ധതി നടപ്പിലാക്കാന് തീരുമാനിച്ചിരിക്കുന്നത്. 10 മുതല് 11 വയസുവരെയുള്ള പ്രായത്തില് ഏതാണ്ട് 24,000 പേര്ക്ക് പൊണ്ണത്തടിയുണ്ട്. മിക്ക കുട്ടികളും ഫാസ്റ്റ് ഫുഡ് ഇനത്തില്പ്പെട്ട ഭക്ഷണ പദാര്ത്ഥങ്ങള്ക്ക് അടിമകളാകുന്നതായും റിപ്പോര്ട്ടുകള് പറയുന്നു. ഇത് അപകടരമായ അവസ്ഥയാണെന്ന് നേരത്തെ തന്നെ വിദഗ്ദ്ധര് ചൂണ്ടിക്കാണിച്ചിരുന്നു. ‘ഡൊമിനോസ് പിസ്സ, മക്ഡൊണാള്ഡ്സ്, ജസ്റ്റ് ഈറ്റ്, ഡെലിവെറോ, കെ.എഫ്സി’ തുടങ്ങിയ യു.കെയിലെ പ്രധാന റസ്റ്റോറന്റുകളുമായി ഭക്ഷണ പദാര്ത്ഥങ്ങളില് കലോറി കുറയ്ക്കുന്നതുമായി ബന്ധപ്പെട്ട് ചര്ച്ചകള് നടത്തിയിട്ടുണ്ട്.
ആഴ്ചയില് കുറഞ്ഞത് രണ്ടു കപ്പ് കാപ്പിയെങ്കിലും കുടിക്കുന്ന പുരുഷന്മാര്ക്ക് പ്രത്യുദ്പാദന ശേഷി വര്ദ്ധിക്കുമെന്ന് പഠനം. കാപ്പി കുടിക്കുന്ന പുരുഷന്മാര്ക്ക് തങ്ങളുടെ പങ്കാളികളെ ഗര്ഭം ധരിപ്പിക്കാനുള്ള ശേഷി ഇരട്ടിയാണെന്ന് അമേരിക്കന് സൊസൈറ്റി ഫോര് റീപ്രൊഡക്ടീവ് മെഡിസിന് വാര്ഷിക കോണ്ഫറന്സില് അവതരിപ്പിച്ച പഠനം പറയുന്നു. കുട്ടികള്ക്കു വേണ്ടി ശ്രമിക്കുന്ന 500 ദമ്പതികളില് നടത്തിയ പഠനത്തിലാണ് കാപ്പിയുടെ ഈ സവിശേഷത വ്യക്തമായത്. കാപ്പിയില് അടങ്ങിയിരിക്കുന്ന കഫീന് ആണ് പുരുഷന്മാരുടെ പ്രത്യുദ്പാദന ശേഷിയെ ഇരട്ടിയാക്കുന്നത്. അതുപോലെ തന്നെ ഓവുലേഷന് മുമ്പോ അതിനു ശേഷമോ മദ്യം കഴിക്കുന്ന സ്ത്രീകളില് ഗര്ഭധാരണത്തിനുള്ള സാധ്യത കുറയുന്നതായും കണ്ടെത്തി.
കഫീന് പുരുഷന്റെ പ്രത്യുദ്പാദന ശേഷിയെ സ്വാധീനിക്കാന് കഴിയുമെന്ന കണ്ടെത്തല് വളരെ അതിശയകരമാണെന്ന് പഠനത്തിന് നേതൃത്വം നല്കിയ യുഎസ് നാഷണല് ഇന്സ്റ്റിറ്റ്യൂട്ട്സ് ഓഫ് ഹെല്ത്തിലെ ഡോ.സണ്ണി മംഫോര്ഡ് പറഞ്ഞു. കുട്ടികള്ക്കു വേണ്ടി ശ്രമിക്കുന്നവര് ജീവിതശൈലി പരിപാലിക്കേണ്ടതിന്റെ പ്രാധാന്യമാണ് ഈ പഠനം വ്യക്തമാക്കുന്നത്. കാപ്പിയും ചായയും കുട്ടികള്ക്കു വേണ്ടി ശ്രമിക്കുന്ന പുരുഷന്മാര്ക്ക് ഗുണകരമല്ലെന്നായിരുന്നു നേരത്തേ നടത്തിയ പഠനങ്ങള് പറഞ്ഞിരുന്നത്. ജേര്ണല് ഓഫ് ന്യൂട്രീഷനില് കഴിഞ്ഞ വര്ഷം പ്രസിദ്ധീകരിച്ച ഒരു റിപ്പോര്ട്ട് പറഞ്ഞിരുന്നത് ബീജങ്ങളുടെ ഡിഎന്എയെ കഫീന് തകരാറിലാക്കുമെന്നായിരുന്നു.
കഫീനുമായി ബന്ധപ്പെട്ട് തയ്യാറാക്കിയ 28 പേപ്പറുകള് വിശകലനം ചെയ്യുന്ന പഠനമായിരുന്നു അത്. ശരീരത്തിലുള്ള അഡിനോസിന് ട്രൈഫോസ്ഫേറ്റ്, ഗ്വാനോസിന് ട്രൈഫോസ്ഫേറ്റ് എന്നീ രാസഘടകങ്ങളുമായി ബന്ധപ്പെട്ടാണ് കഫീന് പ്രത്യുദ്പാദന ശേഷി വര്ദ്ധിപ്പിക്കുന്നതെന്നാണ കരുതുന്നതെന്ന് ബെല്ഫാസ്റ്റിലെ ക്വീന്സ് യൂണിവേഴ്സിറ്റിയിലെ വിദഗ്ദ്ധയായ പ്രൊഫ. ഷീന ലൂയിസ് പറയുന്നു. കഫീന് ഈ രാസഘടകങ്ങളെ വിഘടിപ്പിക്കുകയും അതില് നിന്ന് ലഭിക്കുന്ന ഊര്ജ്ജം ബീജങ്ങളുടെ ചലനശേഷി വര്ദ്ധിപ്പിക്കുകയും ചെയ്യുമെന്ന് അവര് വ്യക്തമാക്കി. ചലനശേഷി കുറഞ്ഞ ബീജങ്ങളാണ് പുരുഷ വന്ധ്യതയ്ക്ക് പ്രധാന കാരണം. എന്നാല് പ്രത്യുല്പാദന ശേഷി കൂട്ടുമെന്ന് പറഞ്ഞ് കഫീന് ധാരാളമടങ്ങിയ പാനീയങ്ങള് അമിതമായി കഴിക്കരുതെന്നും വിദഗ്ദ്ധര് മുന്നറിയിപ്പ് നല്കുന്നു.
വൈവാഹിക ജീവിതത്തില് ഒഴിച്ചുകൂടാനാവാത്ത ഒന്നാണ് പരസ്പര സമ്മതത്തോടെയുള്ള ആരോഗ്യപരമായ ലൈംഗിക ബന്ധം. പലപ്പോഴും ഇക്കാര്യങ്ങളെക്കുറിച്ച് തുറന്ന് സംസാരിക്കാന് തയ്യാറാകാത്ത മലയാളി സമൂഹം ലൈംഗികതയെപ്പറ്റി പലവിധ തെറ്റിദ്ധാരണകളും പുലര്ത്തിപ്പോരുന്നു. ഒരു പ്രായമെത്തുമ്പോള് സ്ത്രീകളില് ലൈംഗികത നശിക്കുമെന്നും തന്നേക്കാള് പ്രായത്തില് കുറവുള്ള സ്ത്രീകളെ വിവാഹം കഴിക്കണമെന്നും സമൂഹം പുരുഷന്മാരോട് നിര്ദ്ദേശിക്കുന്നത് ഈ തെറ്റിദ്ധാരണയുടെ പേരിലാണ്. ഇക്കാര്യത്തില് എഴുത്തുകാരിയും യുവഡോക്ടറുമായ വീണ ജെ.എസ് എഴുതിയ കുറിപ്പ് പുതിയ ചര്ച്ചകള്ക്ക് വഴിവച്ചു. ചുരിദാര് ഇടാന് പോലും സമ്മതിക്കാത്ത മക്കളുടെ ഇടയില് 45കാരിയായ അമ്മ എങ്ങനെയാണ് ലൈംഗികത നിലനിര്ത്താന് ചികിത്സയ്ക്ക് പോകുന്നതെന്ന കാലികപ്രസക്തമായ ചോദ്യവും ഡോക്ടര് ഉന്നയിക്കുന്നു.
കുറിപ്പിന്റെ പൂര്ണരൂപം…
heterosexual വിവാഹങ്ങളില് പെണ്ണിന്റെ വയസ്സ് ആണിനേക്കാള് കൂടുമ്പോള് പലര്ക്കും സഹിക്കാന് കഴിയാതെ പൊട്ടുന്ന അശ്ലീലകുരുവിന്റെ പേരാണ് സംസ്കാരം. 45 വയസായാല് നശിക്കുന്ന സ്ത്രീത്വം എന്താണാവോ. എല്ലാത്തിലുമുപരി ഈ സ്ത്രീത്വം എന്നത് എന്താണ്? ഹാരിയുടെ പോസ്റ്റില് ഉള്ള അയാളുടെ അഭിപ്രായം വെച്ച്, പുരുഷന് ആഗ്രഹിക്കുന്ന എന്തൊക്കെയോ കാര്യങ്ങള് ഒരു പ്രത്യേകപ്രായത്തില് സ്ത്രീക്ക് നിന്നു പോകും, അതാണ് സ്ത്രീത്വം. ഇത്രയും കാലത്തെ ജീവിതത്തില് നിന്നും ആ നഷ്ട്ടമാകല് ലൈംഗികതയെന്നു നമ്മളില് പലരും ഊഹിക്കുകയും ചെയ്യും. എന്നാല് ഈ ലൈംഗികത എങ്ങനെയൊക്കെയാണ് നഷ്ടമാകുന്നത് എന്നറിയാമോ? എണ്ണമിട്ട് തന്നെ പറയാം.
1 ലൈംഗികത പാപമാണെന്നുള്ള തരത്തില് കുട്ടികളെ വളര്ത്തല്. കുട്ടികള് സ്വാഭാവികമായി തങ്ങളുടെ ലൈംഗികഅവയവങ്ങള് നീരിക്ഷിച്ചു തൊട്ടുകളിക്കുമ്പോള് ‘ഇച്ഛിച്ചി’ എന്നും പറഞ്ഞ് ഇടപെടുന്നത് വളര്ച്ചാകാലഘട്ടത്തിലെ ആദ്യം മോറല് പോലീസ് അറസ്റ്റ് ! അവിടെ തുടങ്ങുന്നതാണ് ‘അമര്ച്ച ചെയ്യപ്പെടുന്ന ലൈംഗികത’.മറ്റൊരു തരത്തില് പറഞ്ഞാല് അവിടെ ഉരുവാകുന്നതാണ് ‘വികലമായ ലൈംഗികത’. ഇതേ കാരണം തന്നെയാണ് സൈക്കോളജിക്കല് vaginismusന്റെ (മാനസിക കാരണങ്ങളാല് ഉണ്ടാകുന്ന യോനീ സങ്കോചം. മാനസികകാരണങ്ങള് ആണ് ഏറ്റവും കൂടുതല് ഉള്ളത്.) പലകാരണങ്ങളില് ഒന്ന്.
ഭാവിയില് ഒരുപാട് നാളുകളിലേക്ക് ലൈംഗികബന്ധം വെറുക്കപ്പെട്ടതാവാന്, എന്തിന് ഒരു ഗൈനെക്കോളജി പരിശോധനയ്ക്ക് ശാന്തമായി കിടക്കാന് പോലും സ്ത്രീകള് വിമുഖരാവാന് ഇതുമാവാം കാരണം. പലരും ആദ്യപ്രസവത്തിനു ശേഷം മാത്രം ലൈംഗിക കാര്യങ്ങളില് താല്പര്യമെടുക്കുന്നതും ഇത്തരത്തില് പലവിധം സങ്കീര്ണമാനസികവ്യാപാരങ്ങളിലൂടെ കടന്ന് പോയശേഷം മാത്രമാവും.
എന്നാല് ഈ അമര്ച്ച അല്ലെങ്കില് വികലതയെ പുരുഷനു കുറേക്കൂടെ മറികടക്കാന് പറ്റുമെന്നു തോന്നിയിട്ടുണ്ട്. ലൈംഗികകാര്യങ്ങളില് താനാണ് മുന്കൈ എടുക്കേണ്ടത് എന്നൊരു ബോധം അല്ലെങ്കില് ആത്മവിശ്വാസം പുരുഷനു സമൂഹം പ്രത്യക്ഷമായും പരോക്ഷമായും കൊടുക്കുന്നുണ്ട്. ‘ചേട്ടന് എനിക്കൊട്ടും സുഖം തരുന്നില്ല’ എന്ന് പറയുന്നിടത്തുവെച്ചു ഇണയായ പെണ്ണ് സമൂഹസങ്കല്പ്പത്തിലെ ‘വേശ്യ’ ആണെന്ന് ചേട്ടന്മാര് വിചാരിക്കുന്നതിന്റെ കാരണം മറ്റൊന്നുമല്ല. പെണ്ണ് മുന്കൈ എടുത്തു ചെയ്യുന്ന, പെണ്ണ് മുകളില് കയറിയിരുന്നു അവള്ക്കിഷ്ടമുള്ള രീതിയില് ലൈംഗികത നിയന്ത്രിക്കുന്ന രീതിയില് എത്ര ആണ്ജീവിതങ്ങള് പിടഞ്ഞു ചാവുമെന്നു വരെ കണ്ടറിയണം. പക്ഷെ അത്തരമൊരു പരീക്ഷണം നമ്മുടെ സമൂഹത്തില് നടക്കില്ലല്ലോ 😉
2 വ്യക്തിശുചിത്വം.
പ്ലസ് ടു കഴിഞ്ഞയുടന്/ പതിനെട്ടു പൂര്ത്തിയായ ഉടനെ ഷമയുടെ(സങ്കല്പികനാമം) വിവാഹം കഴിഞ്ഞു. ഞാന് MBBS രണ്ടാം വര്ഷം എത്തുമ്പോഴാണ് ഒരു ദിവസം കരഞ്ഞുകൊണ്ട് അവള് ഫോണ് ചെയ്യുന്നത്. തന്നേക്കാള് പതിനഞ്ചു വയസ്സ് മൂത്ത ഭര്ത്താവ് മിക്കവാറും രാത്രികളില് ഓറല് സെക്സ് ചെയ്യിക്കും. ‘മൂത്രത്തിന്റെയും മറ്റും ദുര്ഗന്ധം സഹിക്കാന് വയ്യെടി’ എന്നും പറഞ്ഞാണ് അവള് കരഞ്ഞത്.
ഒട്ടും അതിശയോക്തിയില്ലാതെ ഇക്കാര്യങ്ങള് വായിക്കണം. (പോസ്റ്റിനു റീച് കൂട്ടാന് സെക്സ് മാത്രം എഴുതുന്നു എന്ന് ഒരു ഡോക്ടര് തന്നെ മെസ്സേജ് അയച്ചത് കൊണ്ടാണ് ഇങ്ങനെ പറഞ്ഞത്). ഒടുക്കം അവള് എത്തിയ രീതി ഇതാണ്, ശ്വാസം എടുക്കാതെ പെട്ടെന്ന് പെട്ടെന്ന് ഘട്ടംഘട്ടമായി ചെയ്യുക, വായയില് വൃത്തികെട്ട ടേസ്റ്റ് വരാതിരിക്കാന് നാരങ്ങാവെള്ളം കുടിച്ചു വെള്ളമിറക്കാതെതന്നെ ഓറല് സെക്സ് ചെയ്യുക. കുറച്ചെങ്കിലും എളുപ്പമായിത്രേ 🙁 . വൃത്തിയുടെ കാര്യം പറഞ്ഞ ശേഷം അയാള് അവള്ക്കു അടിവസ്ത്രം പോലും വാങ്ങാന് കാശുകൊടുക്കാത്ത ലെവെലിലേക്കു വളര്ന്നു. ജീവിതസാഹചര്യങ്ങള് കൊണ്ട് അവളിന്നും ഇതേ അവസ്ഥയില് തുടരുന്നു. ഇത്തരം ലൈംഗികജീവിതങ്ങളില് എങ്ങനെയാണു ഒരുദിവസത്തിനപ്പുറത്തേക്ക് സ്ത്രീലൈംഗികത വളരുക? മൂത്രവും വിയര്പ്പും മാത്രമല്ല വായ്നാറ്റം പോലും ദാമ്പത്യജീവിതങ്ങളില് അറപ്പുണ്ടാക്കുന്നുണ്ട്. സ്ത്രീകള്ക്ക് അഭിപ്രായപ്രകടനത്തിനുപോലും സാധ്യതയില്ലാത്തിടത്തു എന്ത് ചെയ്യാന് കഴിയും? ഉഭയകക്ഷിസമ്മതപ്രകാരമല്ലാത്ത ഓറല് anal സെക്സ് ഇന്നും നിയമവിരുദ്ധമാണെന്ന് മറക്കരുത്. വിവാഹത്തില് റേപ്പ് നടന്നാല് ഇന്ത്യന് നിയമം ഇടപെടില്ലെങ്കിലും സമ്മതപ്രകാരം അല്ലാതെ oral anal സെക്സ് ചെയ്യുന്നത് കുറ്റകരമായി തുടരുന്നു.
3 കുഞ്ഞുങ്ങളെ ഉണ്ടാക്കാന് വേണ്ടി മാത്രം സെക്സ് ചെയ്യണം എന്ന മതംവിശ്വാസങ്ങള് മുറുകെ പിടിക്കുന്നത് സ്ത്രീകളാണ് . ആണ്കുട്ടികള് ഫുട്ബോളും ക്രിക്കറ്റുമായി ലോകത്തേക്കിറങ്ങുമ്പോള് കൊന്തയും വിളക്കും നിസ്കാരങ്ങളും മാത്രമാകുന്ന സ്ത്രീജീവിതങ്ങള് ലൈംഗികതയെ സന്താനോല്പാദനത്തിനു മാത്രമായി കാണുന്നു. ഇതില്നിന്നൊരല്പം മാറി സഞ്ചരിക്കുന്നവളുമാരെ ‘പരപൂരവെടികള്’ ആയി സമൂഹം വിലയിരുത്തുന്നു.
4 ഹോര്മോണല് പ്രശ്നങ്ങള്.
ആര്ത്തവവിരാമത്തോടെ ലൈംഗികത നില്ക്കും എന്നാണ് പലരും വിചാരിക്കുന്നത്. നാല്പത്തഞ്ചു വയസ്സില് ഗര്ഭപാത്രം നീക്കം ചെയ്യുമ്പോള് വളരെ സ്വാഭാവികമായി അണ്ഡാശയങ്ങളും നീക്കം ചെയ്തേക്കൂ, ഭാവിയില് അഥവാ പ്രശ്നം വന്നാല് ഇനി വീണ്ടും ഓപ്പറേഷന് വേണ്ടല്ലോ എന്ന രീതിയിലേക്ക് ആളുകളുടെ ബോധം പോയിരിക്കുന്നു ! അപകടമാണിത്. സ്വാഭാവികചോദനയായ ലൈംഗികത നിലനിര്ത്തുക തന്നെ വേണം.അതില് പ്രധാനമാണ് അണ്ഡാശയങ്ങള്. ആര്ത്തവവിരാമത്തോടെ ലൈംഗികവിരക്തിയുണ്ടെന്നു പറയുന്നതിലും സത്യം എന്താണെന്നറിയാമോ? ആര്ത്തവവിരാമത്തോടെ ലൈംഗികഅവയവങ്ങളില് ലൂബ്രിക്കേഷന് ഉണ്ടാവുന്നില്ല, അതിനാല് ബന്ധം വേദനയുണ്ടാക്കുന്നു. പലതരം ചികിത്സാരീതികള് ഉണ്ടെങ്കിലും ഇക്കാര്യം തുറന്നു പറഞ്ഞ് കടന്നുവരാന് സ്ത്രീകള് തയ്യാറല്ല, ചികിത്സകര് ബോധവല്ക്കരണം നടത്തുന്നുമില്ല. കാരണം ഇവിടെ വിഷയം ലൈംഗികതയാണ്. തൊട്ടാല് പൊട്ടുന്ന വിഷയമാണ്. അമ്മമാര് ചുരിദാര് ഇടുന്നതുപോലും സമ്മതിക്കാത്ത ആണ്മക്കളെ ഞാന് നേരിട്ട് കണ്ടിട്ടുണ്ട്. അപ്പോഴാണ് ലൈംഗികത നിലനിര്ത്താന് ചികിത്സക്ക് പോകുന്ന അമ്മ ! എപ്പോ താഴെ തള്ളിയിട്ടു എന്ന് ചോദിച്ചാല് മതി.
5 ലൈംഗികരീതികള് പൊസിഷനുകള്.
എല്ലാ ദിവസവും മിഷനറി പൊസിഷന് മാത്രം ചെയ്തു ചേട്ടന്റെ മുട്ടിനു തഴമ്പ് വരും, ഒരേ രീതി മടുപ്പുളവാക്കും എന്നല്ലാതെ വേറെ ഗുണമൊന്നുമില്ല. ആശയവിനിമയത്തില് രണ്ടുപേരുടെയും പരസ്പരസ്നേഹവും ബഹുമാനവും ഉണ്ടെങ്കില് എല്ലാം ഓക്കെ ആവും.
6 ലൈംഗികത മാത്രമല്ല ഒന്നിച്ചുള്ള ജീവിതം എന്നത് അവസാനമായി ചേര്ക്കുന്നു. നിയമപരമായി ലൈംഗികതയില് മാത്രം അധിഷ്ടിതമാണ് വിവാഹം. എന്നാല് ഇണകളുടെ മാനസികസ്നേഹം ബഹുമാനം എന്നിവയില്ലാതെ ജീവിതം മുന്നോട്ടു പോകില്ല. ആണിന് പെണ്ണിനേക്കാള് എത്ര പ്രായം കൂടിയിട്ടും, നേരെ തിരിച്ചായാലും പരസ്പരം സ്നേഹവും ബഹുമാനവും ഇല്ലെങ്കില് കാര്യമില്ല. ഫലം? നിങ്ങളും കുടുംബവും സമൂഹവും പരാജയപ്പെട്ടുകൊണ്ടേയിരിക്കും.
മറ്റൊരുകാര്യം ചേര്ത്ത് പറയാനുള്ളത് ഇതാണ്. വനിതകള്ക്കാണ് പുരുഷന്മാരേക്കാള് കൂടുതല് ജീവിതദൈര്ഘ്യം. അപ്പോള് വയസ്സില് മൂത്ത സ്ത്രീകളെ വിവാഹം ചെയ്താല് ഒന്നിച്ചു ചാവുകയും ചെയ്യാം. ഭര്ത്താവ് മരിക്കുമ്പോള് വിധവ അന്യപുരുഷനെ തേടിപ്പോകുമോ, മാറ്റൊരാള് സംരക്ഷിക്കേണ്ടിവരില്ലേ എന്ന ചോദ്യങ്ങളെല്ലാം ഒഴിവാക്കാം 😉
കൂടുതല് അലങ്കാരമില്ലാതെ പറഞ്ഞാല് as dr Dev Raj says സ്ത്രീ അടങ്ങിയൊതുങ്ങി കഴിയണമെങ്കില്, വരച്ച വരയില് നില്ക്കണമെങ്കില്, പ്രായത്തില് ഇളയതാവണം. ഒരു 5 6 വയസ്സെങ്കിലും. അതുപോലെ നല്ല പ്രായവ്യതസമുണ്ടെങ്കില് പുരുഷന്റെ അന്പതുകളിലും സ്ത്രീയുടെ ശരീരം ഏറെക്കുറെ ചെറുപ്പമായി തന്നെ ഇരിക്കും. അത്രയേ ഉള്ളൂ
Harry Haris writes
പ്രായം തന്നെക്കാള് മുതിര്ന്ന യുവതിയെ പ്രണയിച്ച യുവാവ് വിവാഹത്തിനായി രജിസ്റ്റര് ഓഫീസില് സമീപിച്ചപ്പോള് അവിടെ ഉള്ള സബ് രജിസ്റ്റര് ഓഫീസര് ന്റെ ഒരു ഉപദേശം ‘ മോനെ നിനക്ക് ഇപ്പോള് ഇങ്ങനെ ഒക്കെ തോന്നും ഈ പെണ്ണുങ്ങള്ക്ക് ഒരു 45 വയസ്സ് കഴിഞ്ഞാല് അവരുടെ സ്ത്രീത്വം നശിക്കും.. പിന്നെ നീ ദുഖിക്കേണ്ടി വരും… ‘ അല്ല അദ്ദേഹം ഉദ്ദേശിച്ചത് എന്തു സ്ത്രീത്വത്തെയാണ്?? അങ്ങനെങ്കില് 45 കഴിഞ്ഞ സ്ത്രീകളൊക്കെ പാഴ് വസ്തുക്കള് ആണോ?? അവരുടെ മാനസിക വൈകാര്യതകള്ക്കു ഈ സമൂഹത്തില് സ്ഥാനമില്ല എന്നാണോ?? ഈ സ്ത്രീകള് എന്നത് കൊണ്ട് അദ്ദേഹം ഉദ്ദേശിക്കുന്നത് sex ചെയ്യാനും കുഞ്ഞുങ്ങളെ ഉത്പാദിപ്പിക്കാനും വേണ്ടിയുള്ള ഉപകരണങ്ങള് മാത്രമാണ് എന്നാണോ?? എന്തായാലും ഒന്നുറപ്പാണ് അയാള് അങ്ങനെ പറയുമ്പോള് അതെ കാഴ്ചപ്പാടിലുള്ള ഒരു സുഹൃത്ത് വലയം അയാള്ക്കുണ്ടാകും അപ്പോള് പുറമെ മാന്യത നടിക്കുന്ന പല ആണുങ്ങളുടെയും കാഴചപ്പാട് ഇപ്പോഴും നൂറ്റാണ്ടുകള്ക്കു പിന്നിലാണെന്ന് സാരം…