പേരാമ്പ്ര: വീട് ജപ്തി ചെയ്യുന്നതിനായി ബാങ്ക് അധികൃതരും പൊലീസും അഭിഭാഷക കമ്മിഷനും എത്തിയതിനിടെ വീട്ടമ്മ ആത്മഹത്യ ചെയ്തു. കോഴിക്കോട് പേരാമ്പ്ര കൂത്താളി കുഞ്ഞോത്ത് കുയ്യോടൻകണ്ടി കവിത (42) ആണ് മരിച്ചത്. വെള്ളിയാഴ്ച രാവിലെ 11 മണിയോടെ ജപ്തി നടപടികൾക്കായി ഉദ്യോഗസ്ഥർ വീട്ടിലെത്തിയപ്പോഴാണ് കവിതയെ കാണാതായത്. തുടർന്ന് നടത്തിയ തിരച്ചിലിൽ താമസിക്കുന്ന വീടിന് പിന്നിലുള്ള പഴയ വീട്ടിൽ തൂങ്ങിമരിച്ച നിലയിൽ കണ്ടെത്തുകയായിരുന്നു. മൃതദേഹം പേരാമ്പ്ര താലൂക്ക് ആശുപത്രിയിലേക്ക് മാറ്റി.

വീട് നിർമാണത്തിനായി സൗത്ത് ഇന്ത്യൻ ബാങ്കിന്റെ നടുവണ്ണൂർ ശാഖയിൽനിന്ന് കുടുംബം 26 ലക്ഷം രൂപ വായ്പ എടുത്തിരുന്നു. തിരിച്ചടവ് മുടങ്ങിയതോടെ പലിശയടക്കം വായ്പാബാധ്യത ഏകദേശം 50 ലക്ഷമായി ഉയർന്നിരുന്നു. ജപ്തി നടപടികൾക്കായി വെള്ളിയാഴ്ച എത്തുമെന്ന് ബാങ്ക് അധികൃതർ നേരത്തെ അറിയിച്ചിരുന്നു. ഇതിന് പിന്നാലെയാണ് ദാരുണമായ സംഭവം ഉണ്ടായത്.

പയ്യോളി സ്വദേശിനിയായ കവിത, വടകര കൈനാട്ടിയിലെ പെയിന്റ് കടയിൽ ജീവനക്കാരനായ ബാബുവിന്റെ ഭാര്യയാണ്. ദമ്പതികൾക്ക് രണ്ട് മക്കളുണ്ട്. സംഭവത്തിൽ കൂടുതൽ വിവരങ്ങൾ ലഭ്യമായിട്ടില്ല.

കൊച്ചി: ശത്രുക്കളെ നശിപ്പിക്കാനുള്ള തന്റെ വിദ്യ അവരെ മിത്രങ്ങളാക്കുകയാണെന്ന് നടൻ മമ്മൂട്ടി. അന്തരിച്ച ശ്രേഷ്ഠ കാതോലിക്കാ ബസേലിയോസ് തോമസ് പ്രഥമൻ ബാവയുടെ സ്മരണാർഥം ഏർപ്പെടുത്തിയ ശ്രേഷ്ഠ ബാവാ പുരസ്കാരം ഏറ്റുവാങ്ങി സംസാരിക്കുകയായിരുന്നു അദ്ദേഹം. തന്റെ അഭിനയത്തെക്കുറിച്ച് പലർക്കും തൃപ്തിയും അതൃപ്തിയുമുണ്ടാകാമെന്നും ഇത്തരമൊരു പുരസ്കാരം നൽകാൻ തീരുമാനിച്ചതിൽ ഏറെ അർഥങ്ങളുണ്ടെന്നും മമ്മൂട്ടി പറഞ്ഞു. ജീവകാരുണ്യ പ്രവർത്തനങ്ങളിൽ തനിക്കൊപ്പം ഏറെ സഹകരിച്ച വ്യക്തിയായിരുന്നു ബാവാ തിരുമേനിയെന്നും അദ്ദേഹത്തിന്റെ വിയോഗം വലിയ നഷ്ടമാണെന്നും അദ്ദേഹം കൂട്ടിച്ചേർത്തു.

പരസ്പരം വെറുപ്പും വിദ്വേഷവും വളർത്തുന്ന നിരവധി കാര്യങ്ങളാണ് ഓരോ ദിവസവും നാം കാണുകയും കേൾക്കുകയും ചെയ്യുന്നത്. പലരും പരസ്പരം ശത്രുക്കളായാണ് കാണുന്നത്. എന്നാൽ നമ്മുടെ യഥാർഥ ശത്രു തിന്മയാണ്, നന്മയല്ല. തിന്മയെ പല പേരുകളിൽ വിളിച്ചാലും അത് തിന്മ തന്നെയാണ്. വെറുപ്പ് എന്നത് തിന്മയുടെ മറ്റൊരു പേരാണെന്നും മമ്മൂട്ടി അഭിപ്രായപ്പെട്ടു.

ശത്രുക്കളെ ഇല്ലാതാക്കാൻ ബോംബിട്ടോ ആളെവിട്ട് തല്ലിച്ചോ വെടിവെച്ചോ അല്ല താൻ ശ്രമിക്കാറുള്ളതെന്ന് മമ്മൂട്ടി പറഞ്ഞു. തനിക്കറിയാവുന്ന ശത്രുക്കളെയെല്ലാം മിത്രങ്ങളാക്കി മാറ്റുകയാണ് ചെയ്യുന്നത്. എല്ലാ ശത്രുക്കളെയും സുഹൃത്തുക്കളാക്കാൻ കഴിയുമെന്നും അതിന് അവർ മുൻകൈയെടുക്കുന്നതുവരെ കാത്തുനിൽക്കാതെ നമ്മൾ തന്നെ ശ്രമിക്കണമെന്നും അദ്ദേഹം പറഞ്ഞു.

ലണ്ടൻ: ഫുട്ബോൾ കരിയറിന് വിരാമമിട്ടശേഷം ക്രിസ്റ്റ്യാനോ റൊണാൾഡോ മാഞ്ചസ്റ്റർ യുണൈറ്റഡിലേക്ക് മറ്റൊരു റോളിൽ തിരിച്ചെത്തിയേക്കുമെന്ന് മുൻ ഫിറ്റ്നസ് കോച്ച് മിക് ക്ലെഗ്. ക്ലബ്ബിന്റെ പരിശീലകനായോ ഉടമയായോ റൊണാൾഡോ എത്താനുള്ള സാധ്യതയുണ്ടെന്നാണ് അദ്ദേഹത്തിന്റെ വിലയിരുത്തൽ. മാഞ്ചസ്റ്റർ യുണൈറ്റഡിൽ 11 വർഷത്തോളം സ്ട്രെങ്ത് ആൻഡ് കണ്ടീഷനിങ് കോച്ചായി പ്രവർത്തിച്ച ക്ലെഗിന് റൊണാൾഡോയുമായി അടുത്ത ബന്ധമുണ്ടായിരുന്നു. 18-ാം വയസ്സിൽ യുണൈറ്റഡിലെത്തിയപ്പോൾ തന്നെ ലോകത്തിലെ ഏറ്റവും മികച്ച താരമാകണമെന്ന ആഗ്രഹം റൊണാൾഡോ പ്രകടിപ്പിച്ചിരുന്നതായും ക്ലെഗ് ഓർമിച്ചു.

പരിശീലകനാകാനുള്ള കഴിവ് റൊണാൾഡോയ്ക്കുണ്ടെന്നാണ് ക്ലെഗിന്റെ അഭിപ്രായം. കരിയറിൽ നിരവധി പ്രമുഖ പരിശീലകർക്കു കീഴിൽ കളിച്ച അനുഭവം അദ്ദേഹത്തിനുണ്ട്. മികച്ച പരിശീലകരുടെയും മോശം പരിശീലകരുടെയും പ്രവർത്തനരീതികൾ അടുത്തറിയാൻ കഴിഞ്ഞതും മറ്റുള്ളവരുടെ അഭിപ്രായങ്ങൾ കേൾക്കാനും പഠിക്കാനുമുള്ള മനോഭാവവും പരിശീലകസ്ഥാനത്ത് സഹായിക്കുമെന്നാണ് ക്ലെഗ് പറയുന്നത്. റൊണാൾഡോ തന്റെ ഭാവി നേരത്തേ ആസൂത്രണം ചെയ്യുന്ന വ്യക്തിയാണെന്നും വിരമിക്കലിനുശേഷമുള്ള ജീവിതത്തെക്കുറിച്ച് ഇതിനകം ചിന്തിച്ചിട്ടുണ്ടാകുമെന്നും അദ്ദേഹം കൂട്ടിച്ചേർത്തു.

എന്നാൽ പരിശീലകനാകുന്നതിനേക്കാൾ ഫുട്ബോൾ ക്ലബ്ബിന്റെ ഉടമയാകാനാണ് റൊണാൾഡോയ്ക്ക് താൽപര്യം. പരിശീലകസ്ഥാനത്തേക്ക് വരാൻ ആഗ്രഹിക്കുന്നില്ലെന്നും ക്ലബ്ബ് ഉടമസ്ഥതയാണ് കൂടുതൽ ആകർഷിക്കുന്നതെന്നും താരം നേരത്തേ വ്യക്തമാക്കിയിട്ടുണ്ട്. 2024ലെ ദുബായ് ഗ്ലോബ് സോക്കർ അവാർഡ് വേദിയിൽ മാഞ്ചസ്റ്റർ യുണൈറ്റഡിന്റെ പ്രശ്നങ്ങൾ പരിഹരിക്കാൻ ഉടമയായിരുന്നെങ്കിൽ ചില കാര്യങ്ങൾ മാറ്റുമായിരുന്നുവെന്നും റൊണാൾഡോ പറഞ്ഞിരുന്നു. സ്പാനിഷ് ക്ലബ്ബായ അൽമേരിയയിൽ നിക്ഷേപം നടത്തിയതും ഫുട്ബോൾ മേഖലയിലെ ബിസിനസ് താൽപര്യങ്ങളുടെ സൂചനയാണ്. അതേസമയം, മാഞ്ചസ്റ്റർ യുണൈറ്റഡിലേക്ക് തിരിച്ചുവരുമെന്നോ ഉടമസ്ഥത ഏറ്റെടുക്കുമെന്നോ ഔദ്യോഗിക പ്രഖ്യാപനങ്ങളൊന്നും ഉണ്ടായിട്ടില്ല.

ലണ്ടൻ: ലോകത്തെ പ്രമുഖ ചിപ്പ് നിർമാണ കമ്പനിയായ എൻവിഡിയയുടെ സഹസ്ഥാപകനും മുൻ സി.ഇ.ഒയുമായ ജെൻസൻ ഹുവാങ്ങിനെതിരെ മൂന്നാമത്തെ വിവാഹേതര ബന്ധം സംബന്ധിച്ച ആരോപണം. കമ്പനിയിലെ മറ്റൊരു ജീവനക്കാരിയുമായി ഹുവാങ്ങിന് അടുത്ത ബന്ധമുണ്ടായിരുന്നുവെന്നാണ് റോയിട്ടേഴ്‌സിന്റെ പുതിയ റിപ്പോർട്ട്. നേരത്തേ ചൈനീസ് ചാരസംഘടനയുമായി ബന്ധമുണ്ടെന്ന് അമേരിക്കൻ രഹസ്യാന്വേഷണ വിഭാഗം സംശയിക്കുന്ന ആലിസ് ഹുവാങ്ങുമായും കമ്പനിയുടെ ഹെൽത്ത്‌കെയർ വിഭാഗം വൈസ് പ്രസിഡന്റ് കിംബർലി പവലുമായും ബന്ധമുണ്ടായിരുന്നുവെന്ന റിപ്പോർട്ടുകൾ പുറത്തുവന്നിരുന്നു. എന്നാൽ പുതിയ ആരോപണത്തിൽ ഉൾപ്പെട്ട ജീവനക്കാരിയുടെ പേര് റോയിട്ടേഴ്‌സ് വെളിപ്പെടുത്തിയിട്ടില്ല. ഇക്കാര്യത്തിൽ ബന്ധപ്പെട്ടവരിൽനിന്ന് ഔദ്യോഗിക സ്ഥിരീകരണവും ലഭിച്ചിട്ടില്ല.

63കാരനായ ഹുവാങ് നവംബർ എട്ടിന് എൻവിഡിയ ജീവനക്കാർക്ക് അയച്ച സന്ദേശത്തിൽ ഭാര്യയോട് അവിശ്വസ്തത കാട്ടിയതായി സമ്മതിക്കുകയും കുടുംബത്തോടും ജീവനക്കാരോടും മാപ്പുപറയുകയും ചെയ്തിരുന്നു. ആലിസ് ഹുവാങ് ചൈനീസ് രഹസ്യാന്വേഷണ വിഭാഗത്തിന്റെ ഏജന്റായിരുന്നുവെന്ന അമേരിക്കൻ ഉദ്യോഗസ്ഥരുടെ സംശയമാണ് വിവാദത്തിന് ദേശീയസുരക്ഷാ മാനം നൽകിയത്. എന്നാൽ ചാരപ്രവർത്തനം സംബന്ധിച്ച ആരോപണങ്ങൾ ചൈന നിഷേധിച്ചിട്ടുണ്ട്. ആലിസും ഹുവാങ്ങും തമ്മിലുള്ള ബന്ധത്തിന്റെ കാലയളവോ അതിലൂടെ കമ്പനിയുടെ രഹസ്യവിവരങ്ങൾ ചോർന്നിട്ടുണ്ടോയെന്നോ ഇതുവരെ സ്ഥിരീകരിച്ചിട്ടില്ല.

വിവാദം കമ്പനിയുടെ നേതൃത്വത്തിലും വലിയ പ്രത്യാഘാതങ്ങളുണ്ടാക്കി. ഹുവാങ്ങിന്റെ ബന്ധങ്ങളെക്കുറിച്ചും ദേശീയസുരക്ഷാ ആശങ്കകളെക്കുറിച്ചും എൻവിഡിയ ഡയറക്ടർ ബോർഡ് സ്വതന്ത്ര അന്വേഷണം ആരംഭിച്ചിരുന്നു. നവംബർ 12ന് ഹുവാങ് സി.ഇ.ഒ സ്ഥാനവും ബോർഡ് അംഗത്വവും രാജിവച്ചതായി റിപ്പോർട്ടുകളുണ്ട്. ചീഫ് ഫിനാൻഷ്യൽ ഓഫീസർ കൊളെറ്റ് ക്രെസ് ഇടക്കാല സി.ഇ.ഒ ചുമതല ഏറ്റെടുത്തു. ലോകത്തിലെ ഏറ്റവും ശക്തമായ എ.ഐ ചിപ്പ് നിർമാതാക്കളിലൊന്നായ എൻവിഡിയയുടെ ഭാവി നേതൃത്വത്തെക്കുറിച്ചും നിക്ഷേപകരുടെ വിശ്വാസത്തെക്കുറിച്ചും പുതിയ വിവാദം ആശങ്ക ഉയർത്തിയിട്ടുണ്ട്.

തിരുവനന്തപുരം: എൽപിഎസ്ടി റാങ്ക് ഹോൾഡേഴ്സ് സമരനേതാവ് എസ്. വളർമതിയുടെ ആരോഗ്യനില വീണ്ടും മോശമായതിനെത്തുടർന്ന് ആശുപത്രിയിൽ പ്രവേശിപ്പിച്ചു. സെക്രട്ടേറിയറ്റിന് മുന്നിൽ അനിശ്ചിതകാല നിരാഹാര സമരം നടത്തിവരികയായിരുന്ന വളർമതിയെ നവംബർ 11ന് രാത്രി പൊലീസ് ബലംപ്രയോഗിച്ച് സമരവേദിയിൽനിന്ന് മാറ്റി ജനറൽ ആശുപത്രിയിലെത്തിച്ചിരുന്നു. 16 ദിവസമായി നിരാഹാരത്തിലായിരുന്ന ഇവരുടെ ആരോഗ്യനില അപകടത്തിലാകാമെന്ന് ഡോക്ടർമാർ മുന്നറിയിപ്പ് നൽകിയതിനെത്തുടർന്നായിരുന്നു നടപടി. എന്നാൽ ആശുപത്രിയിൽനിന്ന് ഡിസ്ചാർജ് നേടിയ വളർമതി നവംബർ 12ന് വീണ്ടും സമരപ്പന്തലിലെത്തി നിരാഹാരം പുനരാരംഭിച്ചു. തുടർന്നാണ് ആരോഗ്യനില വീണ്ടും വഷളായതായുള്ള റിപ്പോർട്ടുകൾ പുറത്തുവന്നത്.

എൽപി സ്കൂൾ ടീച്ചർ (എൽപിഎസ്ടി) റാങ്ക് പട്ടികയിൽ ഉൾപ്പെട്ട ഉദ്യോഗാർഥികൾക്ക് നിയമനം നൽകണമെന്നാവശ്യപ്പെട്ട് 129 ദിവസത്തിലേറെയായി സെക്രട്ടേറിയറ്റിന് മുന്നിൽ സമരം തുടരുകയാണ്. 2025 മേയിൽ പ്രസിദ്ധീകരിച്ച പി.എസ്.സി റാങ്ക് പട്ടിക കാലാവധി അവസാനിക്കുന്നതിന് മുമ്പ് അർഹരായ എല്ലാവർക്കും നിയമന ഉത്തരവ് നൽകുക, എയ്ഡഡ് സ്കൂളുകളിലെ അധ്യാപക നിയമനങ്ങൾ പി.എസ്.സി വഴിയാക്കുക, നിയമനങ്ങളിലെ പണം വാങ്ങിയുള്ള ക്രമക്കേടുകൾ അവസാനിപ്പിക്കുക, അധ്യാപക-വിദ്യാർഥി അനുപാതം 1:30ൽനിന്ന് 1:25 ആക്കുക എന്നിവയാണ് പ്രധാന ആവശ്യങ്ങൾ. സമരപ്പന്തൽ നീക്കം ചെയ്യാൻ ഹൈക്കോടതി ഉത്തരവുണ്ടെന്ന് ചൂണ്ടിക്കാട്ടിയാണ് പൊലീസ് നടപടി സ്വീകരിച്ചത്. വളർമതിയെ ആശുപത്രിയിലേക്ക് മാറ്റിയതിനു പിന്നാലെ എം. ജയകൃഷ്ണൻ നിരാഹാര സമരം ഏറ്റെടുക്കുകയും ചെയ്തു.

അതേസമയം, പൊലീസ് നടപടിക്കെതിരെ വിവിധ രാഷ്ട്രീയ സംഘടനകളും പ്രതിപക്ഷ നേതാക്കളും രംഗത്തെത്തി. പൊളിച്ചുമാറ്റിയ സമരപ്പന്തൽ ഡി.വൈ.എഫ്.ഐ പ്രവർത്തകർ പുനഃസ്ഥാപിച്ചതോടെ സെക്രട്ടേറിയറ്റിന് മുന്നിൽ പ്രതിഷേധം ശക്തമായി. പൊലീസ് നടപടി കോടതിയലക്ഷ്യ നടപടികൾ ഒഴിവാക്കാനായിരുന്നുവെന്ന് ആഭ്യന്തരമന്ത്രി രമേശ് ചെന്നിത്തല വിശദീകരിച്ചു. റാങ്ക് ഹോൾഡർമാർ ഉന്നയിച്ച അഞ്ചു ആവശ്യങ്ങളിൽ നാലെണ്ണം സർക്കാർ അംഗീകരിച്ചിട്ടുണ്ടെന്നും ശേഷിക്കുന്ന ആവശ്യം പ്രായോഗികമല്ലെന്നും അദ്ദേഹം വ്യക്തമാക്കി. ജനാധിപത്യപരമായ പ്രതിഷേധങ്ങൾക്ക് സർക്കാർ എതിരല്ലെന്നും ആരോഗ്യസ്ഥിതി പരിഗണിച്ചാണ് വളർമതിയെ ആശുപത്രിയിലേക്ക് മാറ്റിയതെന്നും വിദ്യാഭ്യാസമന്ത്രി എൻ. ഷംസുദ്ദീനും അറിയിച്ചു.

ചെന്നൈ: തമിഴ്‌നാട്ടിലെ മധുരയിൽ തനിഷ്ക് ജൂവലറി ഷോറൂമിൽ വൻ കവർച്ച. ഏകദേശം 500 പവനോളം സ്വർണാഭരണങ്ങൾ മോഷണം പോയതായാണ് പ്രാഥമിക വിവരം. കവർച്ച നടന്ന ഷോറൂം 15 ദിവസം മുമ്പ് മാത്രമാണ് പ്രവർത്തനം ആരംഭിച്ചത്. ഔദ്യോഗിക ഉദ്ഘാടനം നടക്കാനിരിക്കെയാണ് മോഷണം നടന്നത്.

വ്യാഴാഴ്ച പുലർച്ചെ മൂന്നുമണിയോടെയാണ് സംഭവം. മുഖംമൂടി ധരിച്ചെത്തിയ അജ്ഞാതൻ ഷോറൂമിന്റെ പിൻവാതിലിലൂടെ അകത്തുകടന്ന് സ്വർണാഭരണങ്ങളുമായി കടന്നുകളയുകയായിരുന്നുവെന്നാണ് പ്രാഥമിക നിഗമനം. മോഷണം ശ്രദ്ധയിൽപ്പെട്ടതിനെ തുടർന്ന് പോലീസും ഫോറൻസിക് വിദഗ്ധരും സ്ഥലത്തെത്തി പരിശോധന നടത്തി.

ഷോറൂമിൽ സൂക്ഷിച്ചിരുന്ന ആകെ സ്വർണാഭരണങ്ങളുടെ ഏകദേശം 30 ശതമാനവും മോഷണം പോയതായി മധുര സിറ്റി പോലീസ് കമ്മിഷണർ രാജേന്ദ്രൻ അറിയിച്ചു. മോഷ്ടിക്കപ്പെട്ട ആഭരണങ്ങളുടെ കൃത്യമായ അളവും മൂല്യവും കണ്ടെത്താൻ പരിശോധന തുടരുകയാണ്. പ്രതിയെ കണ്ടെത്തുന്നതിനും മോഷണം പോയ സ്വർണം വീണ്ടെടുക്കുന്നതിനുമായി മൂന്ന് പ്രത്യേക അന്വേഷണ സംഘങ്ങളെ പോലീസ് നിയോഗിച്ചിട്ടുണ്ട്.

കൊച്ചി: അനധികൃത സ്വത്ത് സമ്പാദനക്കേസിൽ ജാമ്യത്തിൽ കഴിയുന്ന മുൻ ഡിജിപി ടോമിൻ ജെ. തച്ചങ്കരിക്കെതിരെ രൂക്ഷവിമർശനവുമായി ഹൈക്കോടതി. വിദേശയാത്ര നടത്താൻ ജാമ്യവ്യവസ്ഥയിൽ ഇളവ് തേടിയുള്ള ഹർജി പരിഗണിക്കവെയാണ് കോടതിയുടെ വിമർശനം. ശ്വാസംമുട്ടൽ അനുഭവപ്പെടുന്ന ഒരാൾ ദുബായിൽ പോയിട്ട് എന്താണ് ചെയ്യാനെന്നും കോടതി ചോദിച്ചു.

തച്ചങ്കരിയെ ആശുപത്രിയിൽ പ്രവേശിപ്പിച്ചതിന് പിന്നിൽ ഗൂഢാലോചനയുണ്ടോയെന്ന് പരിശോധിക്കേണ്ടതുണ്ടെന്ന് ജസ്റ്റിസ് എ. ബദറുദ്ദീൻ നിരീക്ഷിച്ചു. അദ്ദേഹത്തിന്റെ അസുഖത്തെക്കുറിച്ച് പരിശോധിക്കാൻ മെഡിക്കൽ ബോർഡ് രൂപീകരിക്കാൻ ഹർജി പിൻവലിച്ചാലും സ്വമേധയാ ഉത്തരവിടുമെന്നും കോടതി വ്യക്തമാക്കി. ഇത് കോടതിയുടെ മാത്രം ചോദ്യമല്ലെന്നും ഇന്ത്യയിലെ ഒരു സാധാരണ പൗരൻ പോലും ചോദിക്കുന്ന കാര്യമാണെന്നും ജസ്റ്റിസ് പറഞ്ഞു.

കോടതിയുടെ രൂക്ഷമായ നിലപാടിന് പിന്നാലെ ജാമ്യവ്യവസ്ഥയിൽ ഇളവ് തേടിയുള്ള അപേക്ഷ പിൻവലിക്കാൻ തച്ചങ്കരി അനുമതി തേടി. എന്നാൽ ഹർജി പിൻവലിച്ചാലും തന്നെ ഈ വിഷയത്തിൽ നിന്ന് ഒഴിവാക്കാനാകില്ലെന്ന് കോടതി മുന്നറിയിപ്പ് നൽകി. അനധികൃത സ്വത്ത് സമ്പാദനക്കേസിൽ കോട്ടയം വിജിലൻസ് കോടതി തച്ചങ്കരിക്ക് നാല് വർഷം തടവും പിഴയും വിധിച്ചിരുന്നു. പിന്നീട് ഹൈക്കോടതി ശിക്ഷ താൽക്കാലികമായി മരവിപ്പിക്കുകയും ജാമ്യം അനുവദിക്കുകയും ചെയ്തിരുന്നു.

ടോം ജോസ് തടിയംപാട് , ജോസ് മാത്യു .

ഞങ്ങൾ കോർദോബ മോസ്കും കത്തീഡ്രലും കണ്ടതിനു ശേഷം പഴയ പട്ടണത്തിലൂടെ നടന്നു. ജറുസലേം പട്ടണം പോലെയാണ് കോർദോബയും; വാഹനങ്ങൾക്ക് സഞ്ചരിക്കാൻ കഴിയുന്ന വഴികൾ വളരെ വിരളമാണ്. ചരിത്രത്തെ വിളിച്ചറിയിക്കുന്ന പഴയ കെട്ടിടങ്ങൾ അവിടെ കാണാം. പട്ടണത്തിലെ ജൂത ക്വാർട്ടറിൽ ഒരുകാലത്ത് ധാരാളം ജൂതന്മാർ താമസിച്ചിരുന്നു. അന്തലൂസിയൻ കാലഘട്ടത്തിൽ മുസ്ലിങ്ങളും, പിന്നീട് ക്രിസ്ത്യൻ ഭരണകാലത്ത് ക്രിസ്ത്യാനികളും അവരെ വേട്ടയാടുകയും നിർബന്ധിത മതപരിവർത്തനത്തിന് വിധേയമാക്കുകയും ചെയ്തിട്ടുണ്ട്.

ബി.സി. 218 മുതൽ എ.ഡി. 476 വരെ റോമാക്കാരാണ് സ്പെയിൻ ഭരിച്ചിരുന്നത്. ബി.സി. രണ്ടാം നൂറ്റാണ്ട് മുതൽ എ.ഡി. മൂന്നാം നൂറ്റാണ്ട് വരെ കോർദോബ റോമൻ തലസ്ഥാനമായി പ്രവർത്തിച്ചിരുന്നു. മാർക്കസ് ക്ലോഡിയസ് മർസെല്ലസ് ആണ് ബി.സി. 169-ൽ കോർദോബ പട്ടണം സ്ഥാപിച്ചത്. ഞങ്ങൾ നഗരത്തിലൂടെ നടന്ന് റോമൻ കവാടം വഴി പുറത്തുകടന്നു. നഗരസംരക്ഷണത്തിനായി റോമാക്കാർ നിർമിച്ച കോട്ടയുടെ അവശിഷ്ടങ്ങൾ കണ്ട ശേഷം, മറ്റൊരു ചരിത്രശേഷിപ്പായ റോമൻ പാലം കാണാൻ പോയി. ഗ്വാഡൽക്വിവിർ നദിക്കു കുറുകെ ബി.സി. ഒന്നാം നൂറ്റാണ്ടിൽ അഗസ്റ്റസ് ചക്രവർത്തിയുടെ കാലത്താണ് ഈ പാലം നിർമ്മിച്ചത് എന്ന് കരുതപ്പെടുന്നു. 16 ആർച്ചുകളോടെ പണിതുയർത്തിയ ഈ പാലം പല കാലഘട്ടങ്ങളിൽ പുനരുദ്ധരിച്ചിട്ടുണ്ടെങ്കിലും, റോമൻ ശൈലിയിലുള്ള ആർച്ചുകൾ അതേപടി നിലനിൽക്കുന്നു. ലോകമെമ്പാടുമുള്ള സഞ്ചാരികൾ ഈ പാലം കാണാൻ എത്താറുണ്ട്. 1984-ൽ പാലത്തിലൂടെയുള്ള വാഹനഗതാഗതം നിരോധിച്ചു. പാലത്തിന്റെ മറുഭാഗത്ത് ഇസ്ലാമിക കാലഘട്ടത്തിൽ പണിത വലിയൊരു കവാടവുമുണ്ട്. ഈ കാഴ്ചകളെല്ലാം കണ്ട്, ജൂത ക്വാർട്ടറിലെ ഒരു പഴയ ഭക്ഷണശാലയിൽനിന്ന് ഭക്ഷണവും കഴിച്ച് ഞങ്ങൾ കോർദോബയോട് വിടപറഞ്ഞു.

അവിടെനിന്ന് ട്രെയിനിൽ 345 കിലോമീറ്റർ അകലെയുള്ള സ്പെയിനിന്റെ തലസ്ഥാനമായ മാഡ്രിഡിലേക്ക് യാത്ര തിരിച്ചു. വഴിനീളെ ഇടുക്കിയിലൂടെ സഞ്ചരിക്കുമ്പോൾ കാണുന്നതുപോലെയുള്ള മലനിരകളായിരുന്നു. ആയിരക്കണക്കിന് ഏക്കർ സ്ഥലത്ത് ഒലിവ് മരങ്ങൾ പടർന്നുനിൽക്കുന്നു; മൂന്നാറിലെ തേയിലത്തോട്ടങ്ങൾ പോലെയാണ് അകലെനിന്നു നോക്കുമ്പോൾ അവ കാണപ്പെടുന്നത്. ഇവിടുത്തെ ക്രിസ്ത്യൻ കർഷകരെ മതം മാറ്റാനും അമിത നികുതി ചുമത്താനും ശ്രമിച്ചപ്പോഴാണ്, പിന്നീട് സ്പെയിൻ മുസ്ലിങ്ങളിൽനിന്ന് തിരിച്ചുപിടിക്കാനുള്ള ‘റീകോൺക്വിസ്റ്റ’ (Reconquista of Spain) എന്ന ചരിത്രപ്രസിദ്ധമായ പോരാട്ടം ആരംഭിച്ചത്.

345 കിലോമീറ്റർ ദൂരമുണ്ടെങ്കിലും അതിവേഗ ട്രെയിനിൽ ഒന്നര മണിക്കൂർ കൊണ്ട് ഞങ്ങൾ മാഡ്രിഡിലെത്തി. പിറ്റേദിവസം ചരിത്രപ്രസിദ്ധമായ റോയൽ പാലസ് (രാജകൊട്ടാരം) കാണാനാണ് പോയത്. ഇസ്ലാമിക ഭരണകാലത്ത്, എ.ഡി. ഒമ്പതാം നൂറ്റാണ്ടിൽ ഉമയ്യദ് ഭരണാധികാരി മുഹമ്മദ് ഒന്നാമൻ നിർമിച്ച സൈനികക്കോട്ടയായിരുന്നു ഈ കൊട്ടാരം സ്ഥിതിചെയ്യുന്ന സ്ഥലം. പിന്നീട് 1085-ൽ റീകോൺക്വിസ്റ്റയിലൂടെ ക്രിസ്ത്യൻ സൈന്യം മാഡ്രിഡ് പിടിച്ചെടുത്തു. 1492-ൽ സ്പെയിൻ പൂർണ്ണമായും ക്രിസ്ത്യൻ ഭരണത്തിൻ കീഴിലായതോടെ രാജാക്കന്മാർ ഈ കോട്ടയിൽ താമസം തുടങ്ങി. 1734-ൽ ക്രിസ്മസ് തലേന്നുണ്ടായ തീപിടുത്തത്തിൽ കൊട്ടാരം പൂർണമായി കത്തിനശിച്ചു. തുടർന്ന് 1738-ൽ പണി ആരംഭിച്ച് 1764-ലാണ് ഇന്നു കാണുന്ന കൊട്ടാരം പൂർത്തിയാക്കിയത്. 1,35,000 ചതുരശ്ര മീറ്ററിൽ 3,418 മുറികളുള്ള ഈ കൊട്ടാരം യൂറോപ്പിലെ തന്നെ ഏറ്റവും വലിയ കൊട്ടാരങ്ങളിൽ ഒന്നാണ് (ഇംഗ്ലണ്ടിലെ ബക്കിംഗ്ഹാം പാലസിന് ഇതിന്റെ പകുതി വലിപ്പം പോലുമില്ല). സ്പാനിഷ് നവോത്ഥാന-ബറോക്ക് വാസ്തുവിദ്യയുടെ ജീവിക്കുന്ന ഉദാഹരണവും ചരിത്രവും കലയും ഒത്തുചേരുന്ന അതുല്യമായ സ്മാരകവുമാണിത്.

വിദേശ രാഷ്ട്രത്തലവന്മാരെ സ്വീകരിക്കുന്ന മുറികൾ, ചാപ്പൽ, പതിനഞ്ചാം നൂറ്റാണ്ട് മുതൽ ഉപയോഗിച്ചിരുന്ന വയലിൻ ഉൾപ്പെടെയുള്ള സംഗീതോപകരണങ്ങൾ, രാജകീയ പാത്രങ്ങൾ എന്നിവയെല്ലാം കൊട്ടാരത്തിനുള്ളിൽ ഭംഗിയായി സൂക്ഷിച്ചിരിക്കുന്നു. പ്രശസ്തരായ ചിത്രകാരന്മാരുടെ ചിത്രങ്ങളാണ് രാജാവിന്റെ കിടപ്പുമുറിയെ അലങ്കരിക്കുന്നത്. പഴയകാല ആയുധങ്ങൾ, അമ്പും വില്ലും, പഴയ തോക്കുകൾ, പടച്ചട്ടകൾ എന്നിവയും ഇവിടെ പ്രദർശിപ്പിച്ചിട്ടുണ്ട്. നിലവിലെ രാജാവായ ഫിലിപ്പ് ആറാമൻ താമസിക്കുന്നത് മാഡ്രിഡിന് പുറത്തുള്ള സർസുവേല കൊട്ടാരത്തിലാണ്; ഔദ്യോഗിക ചടങ്ങുകൾക്ക് മാത്രമാണ് അദ്ദേഹം ഇവിടേക്ക് വരുന്നത്.

1603-ൽ ഇംഗ്ലണ്ടിൽ കത്തോലിക്കാ ഭരണം തിരിച്ചുകൊണ്ടുവരുന്നതിനായി ബ്രിട്ടീഷ് പാർലമെന്റ് ബോംബ് വച്ച് തകർക്കാൻ ശ്രമിച്ച ഗൈ ഫോക്സ് (Guy Fawkes), സഹായത്തിനായി സ്പെയിനിലെത്തി ഫിലിപ്പ് മൂന്നാമൻ രാജാവിനെ സന്ദർശിച്ചിരുന്നു (വല്ലാഡോലിഡിലെ കൊട്ടാരത്തിൽ വച്ചായിരുന്നു കൂടിക്കാഴ്ച). എന്നാൽ കത്തോലിക്കാ വിശ്വാസിയായിരുന്നിട്ടും ഇംഗ്ലണ്ടിനെതിരെ യുദ്ധം പ്രഖ്യാപിക്കാൻ ഫിലിപ്പ് മൂന്നാമൻ തയ്യാറായില്ല. തുടർന്നാണ് 1605 നവംബർ 5-ന് പാർലമെന്റും രാജാവിനെയും ഒരുമിച്ച് സ്ഫോടനത്തിൽ തകർക്കാൻ ഗൈ ഫോക്സ് ശ്രമിച്ചതും പിടിക്കപ്പെട്ടതും. ഈ സംഭവത്തിന്റെ ഓർമ്മയ്ക്കായിട്ടാണ് നവംബർ 5 ഇംഗ്ലണ്ടിൽ ‘ബോൺഫയർ നൈറ്റ്’ (Bonfire Night) ആയി ആചരിക്കുന്നത്.

തുടർന്ന് ഞങ്ങൾ മാഡ്രിഡിലെ പ്രശസ്തമായ ഈജിപ്ഷ്യൻ ക്ഷേത്രമായ ‘ടെംപിൾ ഓഫ് ദെബോദ്’ (Temple of Debod) കാണാൻ പോയി. ഈജിപ്തിന് പുറത്ത് ഇത്തരമൊരു സ്മാരകം കാണാൻ കഴിയുന്നത് അപൂർവ്വമാണ്. ബി.സി. രണ്ടാം നൂറ്റാണ്ടിൽ ഈജിപ്റ്റിലെ നൈൽ നദീതീരത്ത് നൂബിയൻ പ്രദേശത്താണ് ഇത് നിർമ്മിക്കപ്പെട്ടത്. പിന്നീട് ഉപേക്ഷിക്കപ്പെട്ട ഈ ക്ഷേത്രം, അസ്വാൻ അണക്കെട്ട് നിർമ്മാണവേളയിൽ സ്പെയിൻ നൽകിയ സഹായങ്ങൾക്കുള്ള നന്ദിസൂചകമായി 1968-ൽ ഈജിപ്ത് സ്പെയിനിന് സമ്മാനിക്കുകയാണുണ്ടായത്. 1970–1972 കാലഘട്ടത്തിൽ അതിന്റെ തനിമ ഒട്ടും നഷ്ടപ്പെടാതെ പുനർനിർമ്മിച്ച് 1972-ൽ പൊതുജനങ്ങൾക്കായി തുറന്നുകൊടുത്തു.

അവിടെനിന്നും റോമൻ മാതൃകയിൽ നിർമ്മിച്ച പാർലമെന്റ് മന്ദിരവും സിറ്റി സ്ക്വയറുമെല്ലാം കണ്ടതിനു ശേഷം ഞങ്ങൾ ഇംഗ്ലണ്ടിലേക്ക് മടങ്ങി. യാത്രയിലുടനീളം നാട്ടുകാരോട് വഴി ചോദിക്കുമ്പോൾ പലർക്കും ഇംഗ്ലീഷ് മനസ്സിലാകാത്തത് ഞങ്ങൾക്ക് ചെറിയ തോതിൽ ബുദ്ധിമുട്ടുണ്ടാക്കി.

ഇസ്ലാം തകർന്നടിഞ്ഞ ക്രിസ്റ്റ്യൻ ക്രൂരത നിറഞ്ഞാടിയ ,കാളപ്പോരിന്റെ നാട്ടിലൂടെ ഒരു യാത്ര  …ടോംജോസ് തടിയംപാട് എഴുതുന്നു. ഭാഗം – 1

മലയാളി യുവതാരം അനശ്വര രാജൻ തെലുങ്ക് സിനിമാലോകത്തും ആരാധകരുടെ പ്രിയതാരമായി മാറുന്നു. അനശ്വര നായികയായെത്തുന്ന പുതിയ തെലുങ്ക് ചിത്രം ‘ഇട്‌ലു അർജുന’യുടെ പ്രമോഷൻ ചിത്രങ്ങളാണ് ഇപ്പോൾ സമൂഹമാധ്യമങ്ങളിൽ തരംഗമാകുന്നത്. താരത്തിന്റെ ഓരോ പുതിയ ലുക്കും ആരാധകർ ഏറ്റെടുക്കുകയാണ്. ‘ഈശ്വരാ, പരമേശ്വരാ, അനശ്വരാ’ എന്ന ടാഗ്‌ലൈനോടെയാണ് ആരാധകർ താരത്തെ വാഴ്ത്തുന്നത്. 24കാരിയായ അനശ്വര ദക്ഷിണേന്ത്യയുടെ പുതിയ ക്രഷായി മാറിയെന്നാണ് സമൂഹമാധ്യമങ്ങളിലെ പ്രതികരണം.

സാരിയിലും ആധുനിക വസ്ത്രങ്ങളിലുമുള്ള അനശ്വരയുടെ വ്യത്യസ്ത ലുക്കുകൾ തെലുങ്ക് പ്രേക്ഷകരുടെ ശ്രദ്ധ നേടുന്നുണ്ട്. ഈ വർഷം അനശ്വരയുടേതായി മലയാള സിനിമകളൊന്നും തിയറ്ററുകളിലെത്തിയില്ലെങ്കിലും തമിഴ്, തെലുങ്ക് സിനിമകളിലൂടെ താരം ശ്രദ്ധേയമായ നേട്ടമാണ് സ്വന്തമാക്കിയത്. അബിഷൻ ജീവിന്ത് നായകനായ തമിഴ് ചിത്രം ‘വിത്ത് ലവ്’ എന്ന സിനിമയിൽ മോനിഷ എന്ന കഥാപാത്രത്തെയാണ് അനശ്വര അവതരിപ്പിച്ചത്. ഈ ചിത്രത്തിലൂടെ തമിഴ്‌നാട്ടിലും വലിയ ആരാധകപിന്തുണ നേടാൻ താരത്തിന് കഴിഞ്ഞു.

2025ൽ പുറത്തിറങ്ങിയ ‘ചാമ്പ്യൻ’ എന്ന ചിത്രത്തിലൂടെയാണ് അനശ്വര തെലുങ്കിൽ അരങ്ങേറ്റം കുറിച്ചത്. തുടർന്ന് ‘വിത്ത് ലവ്’, ‘7/G റെയിൻബോ കോളനി 2’, ‘അന്ത രാമുലൊരു ചൂസ്‌കുണ്ടാരു’ തുടങ്ങിയ ചിത്രങ്ങളിലും അഭിനയിച്ചു. ‘ചാമ്പ്യൻ’ ബോക്സ് ഓഫിസിൽ പ്രതീക്ഷിച്ച വിജയം നേടിയില്ലെങ്കിലും അനശ്വരയുടെ പ്രകടനം ശ്രദ്ധിക്കപ്പെട്ടു. ഇനി ചിരഞ്ജീവിക്കൊപ്പമുള്ള ‘കാക്ക’ ഉൾപ്പെടെ ശ്രദ്ധേയമായ പ്രോജക്ടുകളാണ് താരത്തെ കാത്തിരിക്കുന്നത്. മമിത ബൈജുവിന് പിന്നാലെ മലയാളത്തിൽനിന്ന് തെന്നിന്ത്യൻ സിനിമാലോകത്ത് കൂടുതൽ ശ്രദ്ധ നേടുന്ന യുവതാരമായി അനശ്വര രാജനും മാറുകയാണ്.

തിരുവനന്തപുരം: എൽപിഎസ്ടി ഉദ്യോഗാർഥികളുടെ സമരപ്പന്തൽ പൊലീസ് പൊളിച്ചുനീക്കിയതിനു പിന്നാലെ അതേ സ്ഥലത്ത് പുതിയ പന്തൽ സ്ഥാപിച്ച് ഡിവൈഎഫ്ഐ. നേരത്തെ സമരപ്പന്തൽ ഉണ്ടായിരുന്ന സ്ഥലത്ത് രണ്ട് കമ്പുകൾ നാട്ടി ടാർപോളിൻ വലിച്ചുകെട്ടിയാണ് താൽക്കാലിക പന്തൽ പുനഃസ്ഥാപിച്ചത്. പന്തൽ വീണ്ടും സ്ഥാപിക്കാനുള്ള ശ്രമം പൊലീസ് തടഞ്ഞത് സ്ഥലത്ത് സംഘർഷാവസ്ഥ സൃഷ്ടിച്ചു. പിന്നീട് മുതിർന്ന പൊലീസ് ഉദ്യോഗസ്ഥർ ഇടപെട്ടതോടെ പൊലീസ് പിൻവാങ്ങി. നിലവിൽ സെക്രട്ടേറിയറ്റിലെ സമരഗേറ്റിന് സമീപം പൊലീസ് നിലയുറപ്പിച്ചിട്ടുണ്ട്.

പുനഃസ്ഥാപിച്ച സമരപ്പന്തലിൽ റാങ്ക് ഹോൾഡർമാർ വീണ്ടും നിരാഹാരസമരം ആരംഭിച്ചു. സമരത്തിന് നേതൃത്വം നൽകിയ വളർമതിയെ പൊലീസ് അറസ്റ്റ് ചെയ്തതിനു പിന്നാലെ ഉദ്യോഗാർഥിയായ ജയകൃഷ്ണന്റെ നേതൃത്വത്തിലാണ് സമരം തുടരുന്നത്. റാങ്ക് പട്ടികയിൽ 10 മുതൽ 15 വരെ സ്ഥാനങ്ങളിലുള്ള ഉദ്യോഗാർഥികളാണ് സമരത്തിൽ പങ്കെടുക്കുന്നത്. സമരത്തിന് പിന്തുണ പ്രഖ്യാപിച്ച് നിരവധി ഡിവൈഎഫ്ഐ പ്രവർത്തകരും സ്ഥലത്തെത്തി. നേതാക്കളായ സി.എസ്. സുജാത, പി.കെ. ബിജു എന്നിവരും സമരപ്പന്തലിലെത്തി ഐക്യദാർഢ്യം അറിയിച്ചു.

അതേസമയം, സമാധാനപരമായി സമരം ചെയ്യുന്നവരെ പൊലീസിനെ ഉപയോഗിച്ച് ബലപ്രയോഗത്തിലൂടെ നേരിടുന്ന സമീപനമാണ് സർക്കാർ സ്വീകരിക്കുന്നതെന്ന് പ്രതിപക്ഷ നേതാവ് വിമർശിച്ചു. സമരപ്പന്തൽ പൊളിച്ചുനീക്കിയതും സമരനേതാവിനെ അറസ്റ്റ് ചെയ്തതും ഉദ്യോഗാർഥികൾക്കിടയിൽ പ്രതിഷേധം ശക്തമാക്കിയിട്ടുണ്ട്. സെക്രട്ടേറിയറ്റിന് മുന്നിലെ സമരസ്ഥലത്ത് സംഘർഷസാധ്യത നിലനിൽക്കുന്നതിനാൽ പൊലീസ് നിരീക്ഷണവും തുടരുകയാണ്.