ബലാത്സംഗക്കേസില്‍ നടന്‍ സിദ്ദിഖിന്‍റെ മുന്‍കൂര്‍ ജാമ്യാപേക്ഷ സുപ്രീം കോടതി ഇന്ന് പരിഗണിക്കും. ജസ്റ്റിസുമാരായ ബേല എം ത്രിവേദി, സതീഷ് ചന്ദ്ര ശര്‍മ്മ എന്നിവരുടെ ബെഞ്ചാണ് ജാമ്യാപേക്ഷ പരിഗണിക്കുക. കഴിഞ്ഞ ആഴ്ച ആരോഗ്യകാരണങ്ങള്‍ ചൂണ്ടിക്കാട്ടി സിദ്ദിഖിന്‍റെ അഭിഭാഷകന്‍ മുകുള്‍ റോഹ്തഗിയുടെ ആവശ്യപ്രകാരമാണ് കേസ് ഇന്നത്തേക്ക് മാറ്റിയത്.

സിദ്ദിഖ് അന്വേഷണവുമായി സഹകരിക്കുന്നില്ലെന്ന സര്‍ക്കാര്‍ വാദത്തിന് അഭിഭാഷകന്‍ ഇന്ന് കോടതിയില്‍ മറുപടി നല്‍കും. സിദ്ദിഖിനെതിരെ തെളിവുണ്ടെന്നും ജാമ്യം നല്‍കരുതെന്നുമാണ് സര്‍ക്കാര്‍ വാദം. കേസിലെ പരാതിക്കാരിയും ജാമ്യാപേക്ഷയെ എതിര്‍ക്കും. നിലവില്‍ ഇടക്കാല മുന്‍കൂര്‍ ജാമ്യത്തിലാണ് സിദ്ദിഖ്.

നേരത്തെ, ബലാത്സംഗ കേസിൽ സംസ്ഥാന സർക്കാരിന്‍റെ റിപ്പോർട്ടിന് സുപ്രീം കോടതിയിൽ സിദ്ദിഖ് മറുപടി സത്യവാങ്മൂലം സമർപ്പിച്ചിരുന്നു. യാഥാർത്ഥ്യങ്ങൾ വളച്ചൊടിച്ചാണ് സംസ്ഥാനത്തിന്റെ റിപ്പോർട്ടെന്നും പരാതിക്കാരി ഉന്നയിക്കാത്ത കാര്യങ്ങൾ പോലും പൊലീസ് പറയുന്നുവെന്നും തനിക്കെതിരെ ഇല്ലാ കഥകൾ മെനയുകയാണെന്നും സിദ്ദിഖ് മറുപടി വാദത്തിൽ വിമർശിച്ചു.

തനിക്ക് ജാമ്യം ലഭിച്ചാൽ ഇരയ്ക്ക് നീതി ലഭിക്കില്ലെന്ന വാദം നിലനിൽക്കില്ല. കേസെടുക്കാൻ ഉണ്ടായ കാലതാമസത്തെക്കുറിച്ചുള്ള വിശദീകരണവും നിലനിൽക്കില്ല. ഡബ്ല്യുസിസി അംഗമായിട്ടും ഹേമ കമ്മിറ്റിക്ക് മുന്നിൽ പരാതിക്കാരി ഈ വിഷയം ഉന്നയിച്ചിട്ടില്ല. തനിക്കെതിരെ മാധ്യമ വിചാരണയ്ക്ക് പൊലീസ് അവസരം ഒരുക്കുകയാണെന്നും സിദ്ദിഖ് ആരോപിച്ചു.

തന്റെ പ്രണയത്തേക്കുറിച്ചും വിവാഹത്തേക്കുറിച്ചുമെല്ലാം പറയുന്ന ഡോക്യുമെന്ററിയിൽ നാനും റൗഡി താൻ എന്ന ചിത്രത്തിലെ മൂന്ന് സെക്കൻഡ് ദൈർഘ്യമുള്ള ദൃശ്യം ആവശ്യപ്പെട്ടതിന് നടൻ ധനുഷ് 10 കോടി രൂപ കോപ്പി റൈറ്റ് ഇനത്തിൽ ചോദിച്ചെന്ന നയൻതാരയുടെ തുറന്നുപറച്ചിൽ വലിയ ചർച്ചകൾക്കാണ് വഴിയൊരുക്കിയിരിക്കുന്നത്. ധനുഷ് തന്നോട് പകപോക്കുകയാണെന്നും അവർ പറഞ്ഞിരുന്നു. സാമൂഹിക മാധ്യമങ്ങളിൽ പോസ്റ്റ് ചെയ്ത പ്രസ്താവനയിലൂടെ പറഞ്ഞ ഇക്കാര്യത്തിന് ഇപ്പോൾ ധനുഷിന്റെ അഭിഭാഷകൻ മറുപടി നൽകിയിരിക്കുകയാണ്. അതും ഒരു വക്കീൽ നോട്ടീസിന്റെ രൂപത്തിൽ.

തിങ്കളാഴ്ചയാണ് നെറ്റ്ഫ്ളിക്സിലൂടെ ‘നയൻതാര: ബിയോണ്ട് ദ ഫെയറി ടെയ്ൽ’ എന്ന ഡോക്യുമെന്ററി സീരീസ് പുറത്തുവന്നത്. ഇതിന് മുന്നോടിയായാണ് നയൻതാര ധനുഷിനെതിരെ തുറന്നടിച്ചുകൊണ്ടുള്ള കത്ത് പുറത്തുവിട്ടത്. ഇതിന് തൊട്ടുപിന്നാലെയാണ് ധനുഷിന്റെ അഭിഭാഷകൻ നയൻതാരയ്ക്കെതിരെ നോട്ടീസയച്ചത്. നെറ്റ്ഫ്ളിക്സ് ഡോക്യുമെന്ററിയിൽ ഉപയോ​ഗിച്ച ‘നാനും റൗഡി താൻ’ എന്ന ചിത്രത്തിലെ മൂന്ന് സെക്കൻഡ് ദൃശ്യം 24 മണിക്കൂറിനകം പിൻവലിക്കണമെന്നാണ് അദ്ദേഹം നോട്ടീസിൽ ആവശ്യപ്പെട്ടിരിക്കുന്നത്. ഇല്ലെങ്കിൽ പ്രത്യാഘാതം 10 കോടി രൂപയിൽ ഒതുങ്ങില്ലെന്നും ​ഗുരുതരമായ നിയമനടപടി നേരിടേണ്ടിവരുമെന്നും അദ്ദേഹം വ്യക്തമാക്കി.

ഡോക്യുമെന്ററിൽ ഉൾപ്പെടുത്താനായി ധനുഷിനോട് അനുവാദം ചോദിച്ച പിന്നണി ദൃശ്യം ചിത്രീകരിച്ചത് തന്റെ ഫോണിലാണെന്ന നയൻതാരയുടെ വാദത്തിനും ധനുഷിന്റെ അഭിഭാഷകൻ മറുപടി പറയുന്നുണ്ട്. “എൻ്റെ കക്ഷി ഈ സിനിമയുടെ നിര്‍മാതാവാണ്, സിനിമയുടെ നിര്‍മാണത്തിനായി ഓരോ തുകയും എവിടെയാണ് ചെലവഴിച്ചതെന്ന് അദ്ദേഹത്തിനറിയാം. ബിഹൈൻഡ് ദ സീൻ ദൃശ്യങ്ങൾ ചിത്രീകരിക്കാൻ എൻ്റെ കക്ഷി ആരെയും ചുമതലപ്പെടുത്തിയിട്ടില്ല.” അഭിഭാഷകൻ പറഞ്ഞു. ഈ നോട്ടീസിന്റെ പേജുകൾ ഇപ്പോൾ സോഷ്യൽ മീഡിയയിൽ പ്രചരിക്കുന്നുണ്ട്.

നയൻതാരയുടെ പിറന്നാളിനോടനുബന്ധിച്ചാണ് ഡോക്യുമെന്ററി പുറത്തിറങ്ങിയിരിക്കുന്നത്. നയൻതാരയെ നായികയാക്കി വിഘ്നേഷ് ശിവൻ സംവിധാനം ചെയ്ത ‘നാനും റൗഡി താൻ’ എന്ന സിനിമ നിർമിച്ചത് ധനുഷ് ആയിരുന്നു. ആ സിനിമയുടെ സെറ്റിൽ വച്ചാണ് നയൻതാരയും വിഘ്നേഷും പ്രണയത്തിലാകുന്നത്.

സീരിയല്‍ രംഗത്ത് സെന്‍സറിങ് അനിവാര്യമാണെന്ന് വനിതാ കമ്മീഷന്‍ അധ്യക്ഷ പി. സതീദേവി. ചില സീരിയലുകള്‍ സമൂഹത്തില്‍ നല്ല സന്ദേശങ്ങളല്ല നല്‍കുന്നത്. കുട്ടികളില്‍ അടക്കം തെറ്റായ സന്ദേശം കൊടുക്കാന്‍ ഇട വരുത്തുന്ന ദൃശ്യങ്ങളും കഥാപാത്രങ്ങളുമാണ് കാണുന്നത്.

അതുകൊണ്ടു തന്നെ സീരിയലുകള്‍ക്ക് സെന്‍സറിങ് അനിവാര്യമാണ്. അത് സമൂഹത്തിന് നല്ല സന്ദേശം നല്‍കും. അന്ധവിശ്വാസങ്ങളും അനാചാരങ്ങളും വലിയ തോതില്‍ ചിത്രീകരിക്കുന്ന അവസ്ഥ സമൂഹത്തിന് ഗുണകരമാണോ എന്നതും പരിശോധിക്കണമെന്ന് സതീദേവി പറഞ്ഞു.

മെഗാ സീരിയല്‍ നിരോധിക്കണമെന്ന വനിതാ കമ്മീഷന്റ റിപ്പോര്‍ട്ടിനെ കുറിച്ച് അറിയില്ല. 2017-18 കാലത്താണ് അത്തരമൊരു റിപ്പോര്‍ട്ട് നല്‍കിയത്. സീരിയലുകളിലെ സ്ത്രീകള്‍ നേരിടുന്ന പ്രശ്നങ്ങളെ കുറിച്ച് വനിതാ കമ്മീഷന് നിരവധി പരാതികള്‍ ലഭിച്ചതായും അവര്‍ പറഞ്ഞു.

മലയാള ടെലിവിഷന്‍ സീരിയല്‍ കഥകള്‍, എപ്പിസോഡുകള്‍ എന്നിവ സംപ്രേഷണം ചെയ്യും മുന്‍പ് സെന്‍സര്‍ ബോര്‍ഡിന്റെ പരിശോധന ആവശ്യമാണെന്നായിരുന്നു വനിതാ കമ്മിഷന്‍ 2017-18 ല്‍ നടത്തിയ പഠനത്തിന്റെ റിപ്പോര്‍ട്ട്.

മെഗാപരമ്പരകള്‍ നിരോധിച്ച്, എപ്പിസോഡുകള്‍ 20 മുതല്‍ 30 വരെയായി കുറയ്ക്കണമെന്നും ഒരുദിവസം ഒരു ചാനലില്‍ രണ്ട് സീരിയല്‍ മതിയെന്നും പുനസംപ്രേഷണം അനുവദിക്കരുതെന്നും റിപ്പോര്‍ട്ടില്‍ പറയുന്നു

സീരിയലുകളുടെ സെന്‍സറിങ് നിലവിലെ സിനിമാ സെന്‍സര്‍ ബോര്‍ഡിനെ ഏല്‍പ്പിക്കുകയോ പ്രത്യേക ബോര്‍ഡ് രൂപവത്കരിക്കുകയോ വേണമെന്നും വനിതാ കമ്മിഷന്റെ പഠന റിപ്പോര്‍ട്ട് ആവശ്യപ്പെടുന്നു. മലപ്പുറം, കോട്ടയം, തിരുവനന്തപുരം ജില്ലകളിലെ 13-19 പ്രായക്കാരായ 400 പേരുടെ അഭിപ്രായങ്ങള്‍ വിലയിരുത്തിയാണ് കമ്മിഷന്‍ ഇതേക്കുറിച്ച് പഠിച്ചത്.

വര്‍ഷം തോറും മൂന്ന് പ്രധാന റിപ്പോര്‍ട്ടുകള്‍ വനിത കമ്മീഷന്‍ സര്‍ക്കാരിന് നല്‍കാറുണ്ട്. ഇപ്പോള്‍ പുറത്തുവന്ന റിപ്പോര്‍ട്ട് താന്‍ അധ്യക്ഷയായ കാലത്തുളളതല്ല. സീരിയലുകളുടെ പിന്നില്‍ പ്രവര്‍ത്തിക്കുന്ന നടിമാര്‍ ഉള്‍പ്പടെ നിരവധി പേരുടെ പരാതികള്‍ വനിത കമ്മീഷന് മുന്‍പില്‍ വന്നിട്ടുണ്ട്.

ഇത് സംബന്ധിച്ച് കഴിഞ്ഞ വര്‍ഷം ഒരു പബ്ലിക് ഹിയറിങ് വനിതാ കമ്മീഷന്‍ നടത്തിയിരുന്നു. തൊഴില്‍ സാഹചര്യങ്ങള്‍, തൊഴില്‍ മേഖലയിലെ സുരക്ഷിതത്വം, സേവന വേതന വ്യവസ്ഥകള്‍ എല്ലാം അവിടെ ചര്‍ച്ച ചെയ്തിരുന്നു. അതിന്റെ റിപ്പോര്‍ട്ട് സര്‍ക്കാരിന് കൊടുത്തതായും സതീദേവി പറഞ്ഞു.

മുനമ്പത്തെ വഖഫ് ഭൂമി തർക്കത്തിൽ സമവായശ്രമവുമായി മുസ്ലിം ലീഗ് നേതാക്കൾ വരാപ്പുഴ അ‌തിരൂപത ആസ്ഥാനത്തെത്തി. ലീഗ് സംസ്ഥാന പ്രസിഡന്റ് സാദിഖലി തങ്ങളും ദേശീയ ജനറൽ സെക്രട്ടറി പി.കെ.കുഞ്ഞാലിക്കുട്ടി എംഎൽഎയും ഉൾപ്പെടെയുള്ളവർ അ‌തിരൂപത അ‌ധ്യക്ഷൻ ബിഷപ്പ് മാർ ജോസഫ് കളത്തിപ്പറമ്പിലുമായി ചർച്ച നടത്തി. അ‌തിരൂപതയിലെ മറ്റ് ബിഷപ്പുമാരും മുനമ്പം സമരസമിതി അംഗങ്ങളും ചർച്ചയ്ക്കെത്തി.

പാലക്കാട് ഉപതിരഞ്ഞെടുപ്പിന് രണ്ടു ദിവസം മാത്രം ശേഷിക്കെയാണ് ലീഗിന്റെ പുതിയ നീക്കം. മുനമ്പം ഭൂമി വിഷയത്തിൽ സർക്കാർ പരിഹാരം കാണാൻ മുന്നോട്ടുവന്നില്ലെങ്കിൽ മുസ്ലിം ലീഗ് അ‌ത്തരം ചർച്ചകളിലേക്ക് കടക്കുമെന്ന് പാർട്ടി നേതാക്കൾ നേരത്തേ പറഞ്ഞിരുന്നു. ഇതിന്റെ തുടർച്ചയായാണ് ലീഗ് നേതാക്കൾ വരാപ്പുഴ അ‌തിരൂപത ആസ്ഥാനത്ത് നേരിട്ടെത്തിയത്. അ‌തിരൂപതയുടെ കീഴിലാണ് മുനമ്പം പ്രദേശം. മുനമ്പത്തെ പള്ളിയങ്കണത്തിലാണ് സമരപ്പന്തലും.

അ‌തേസമയം, പാലക്കാട് ഉപതിരഞ്ഞെടുപ്പിനു ശേഷം 22നാണ് സംസ്ഥാന സർക്കാർ മുനമ്പം വിഷയം ചർച്ചചെയ്യുന്നതിനുള്ള ഉന്നതതല യോഗം വിളിച്ചിരിക്കുന്നത്. വിഷയത്തിലെ എല്ലാ വശങ്ങളും പരിശോധിക്കുമെന്നും സർക്കാർ പ്രായോഗിക പരിഹാരത്തിനാണ് ശ്രമിക്കുന്നതെന്നും മന്ത്രി പി.രാജീവ് ഇന്ന് കൊച്ചിയിൽ മാധ്യമങ്ങളോട് പ്രതികരിച്ചിരുന്നു.

സൗഹൃദ അന്തരീക്ഷത്തിലുള്ള ചര്‍ച്ചയാണ് നടന്നതെന്ന് കൂടിക്കാഴ്ചയ്ക്ക് ശേഷം പി.കെ. കുഞ്ഞാലിക്കുട്ടി പറഞ്ഞു. മാനുഷിക പ്രശ്‌നമാണ്. മതമൈത്രി സംരക്ഷിച്ച് മുന്നോട്ട് പോകണം. മുനമ്പം പ്രശ്‌നം വളരെ വേഗം പരിഹരിക്കാന്‍ കഴിയും. ചില സാങ്കേതിക പ്രശ്‌നങ്ങളുണ്ട്. അതിനാലാണ്, സര്‍ക്കാര്‍ യോഗം വിളിക്കണമെന്ന് ആവശ്യപ്പെടുന്നത്. രമ്യമായി വിഷയം പരിഹരിക്കാന്‍ ഫാറൂഖ് കോളേജും ആവശ്യപ്പെട്ടിട്ടുണ്ട്. തിരഞ്ഞെടുപ്പ് കഴിഞ്ഞാല്‍ ഈ കാര്യങ്ങള്‍ സര്‍ക്കാരുമായി സംസാരിക്കും. മുഖ്യമന്ത്രിക്കും പ്രതിപക്ഷ നേതാവിനുമൊക്കെ ഇക്കാര്യത്തില്‍ യോജിപ്പാണെന്നും അദ്ദേഹം വ്യക്തമാക്കി.

മെത്രാന്‍ സമിതിയിലെ 16 മെത്രാന്മാരും ചര്‍ച്ചയില്‍ പങ്കെടുത്തതായി ആർച്ച് ബിഷപ്പ് ജോസഫ് കളത്തിപ്പറമ്പിൽ അറിയിച്ചു. സാദിഖലി തങ്ങളും കുഞ്ഞാലിക്കുട്ടിയും മുനമ്പം പ്രശ്‌നം പരിഹരിക്കുന്നതിന് വേണ്ടി പ്രവര്‍ത്തിക്കുന്നുണ്ട്. അതിനുവേണ്ടി സര്‍ക്കാരിന്റെയടുത്ത് കാര്യങ്ങള്‍ പറയാമെന്ന് ഇവര്‍ വ്യക്തമാക്കി. ഇക്കാര്യം പരിഹരിക്കാമെന്ന് ഇരുവര്‍ക്കും വിശ്വാസമുണ്ട്. ഇരുവരും വന്നതില്‍ ഒരുപാട് സന്തോഷമുണ്ട്. മതമൈത്രിയാണ് ഇവിടെ നിലനിര്‍ത്തിപോകേണ്ടത്. 600-ലധികം കുടുംബങ്ങള്‍ നേരിടുന്ന പ്രശ്‌നം പരിഹരിക്കപ്പെടണമെന്നും അദ്ദേഹം കൂട്ടിച്ചേർത്തു.

ജോർജ്‌ മാത്യു

ദൈവഭയമുള്ള, ആത്മീയതയിൽ ഊന്നിയ തലമുറ വളർന്നുവരേണ്ടത് കാലഘട്ടത്തിന്റെ അനിവാര്യതയാണെന്ന് ഡോ:യൂഹാനോൻ മാർ ക്രിസോസ്സ്‌റ്റമോസ്‌ .ബിർമിങ്ഹാം സെന്റ് സ്റ്റീഫൻസ് ഇന്ത്യൻ ഓർത്തഡോക്സ്‌ പള്ളിയിൽ വിശുദ്ധ കുർബാന അർപ്പിച്ചു അനുഗ്രഹ പ്രഭാഷണം നടത്തുകയായിരുന്നു, സഭയുടെ സിനഡ് സെക്രട്ടറിയും, നിരണം ഭദ്രാസനാധിപനുമായ തിരുമേനി.

ദൈവഹിതത്തോട് ചേർന്ന്‌ പോവുക എന്നത് നമ്മുടെ കടമയാണെന്നും അദ്ദേഹം ചൂണ്ടികാട്ടി. വിശുദ്ധ കുർബാനക്ക്‌ തിരുമേനി മുഖ്യ കാർമ്മികത്വം വഹിച്ചു. ഇടവക വികാരി ഫാ: മാത്യു എബ്രഹാം, ഫാ:ടിജോ വർഗീസ് എന്നിവർ സഹകാർമികരായിരുന്നു. പ്രഭാത നമസ്കാരം, വി.കുർബാന, പ്രസംഗം , ധൂപപ്രാർത്ഥന എന്നിവ നടന്നു. ഇടവക വികാരി ഫാ: മാത്യൂ എബ്രഹാം, ട്രസ്റ്റി ഡെനിൻ തോമസ് , സെക്രട്ടറി പ്രവീൺ തോമസ് , ആധ്യാത്മിക സംഘടന ഭാരവാഹികൾ എന്നിവർ ചടങ്ങുകൾക്ക് നേതൃത്വം നൽകി.

വളരെ അപകടകാരികളാണ് കുറുവ സംഘം! കഴിഞ്ഞ കുറച്ചു ദിവസങ്ങളായി വാര്‍ത്തകളില്‍ നിറയുന്നത് കുറുവ മോഷണ സംഘമാണ്.ആലപ്പുഴയിലെ മോഷണകേസില്‍ പ്രതികളായ കുറുവ സംഘത്തെ തേടി എറണാകുളത്തെത്തിയ പൊലീസിനെ കുറുവ സംഘം ആക്രമിക്കുന്ന സാഹചര്യം വരെ ഉണ്ടായിട്ടുണ്ട്. കൈവിലങ്ങോടെ നഗ്‌നനായി കുറ്റികാട്ടിലൊളിച്ച കുറുവ സംഘാംഗത്തെ മണിക്കൂറുകള്‍ നീണ്ട തിരച്ചിലിനൊടുവിലാണ് പൊലീസ് കണ്ടെത്തിയത്.

ഈ സാഹചര്യത്തില്‍ എല്ലാവരും തിരയുന്ന ഒരു ചോദ്യമുണ്ട്. ആരാണ് കുറുവ…. ആയുധധാരികളായ മോഷ്ടാക്കളുടെ സംഘമെന്ന അര്‍ഥത്തില്‍ തമിഴ്‌നാട് ഇന്റലിജന്‍സ് ആണ് കുറുവ സംഘമെന്ന പേരിട്ടത്.തമിഴ്‌നാട് തിരുച്ചിറപ്പള്ളിക്കടുത്ത റാംജി നഗറാണ് പണ്ട് തിരുട്ടുഗ്രാമമായി അറിയപ്പെട്ടിരുന്നത്. ഈ ഗ്രാമവാസികളെ കുറുവ സംഘമെന്ന് വിളിച്ചു. എന്നാല്‍ ഇപ്പോഴത്തെ കുറുവ സംഘത്തിലുള്ളവര്‍ ഒരേ ഗ്രാമക്കാരല്ല. തമിഴ്‌നാട്ടില്‍ തന്നെ ഒട്ടേറെ കുപ്രസിദ്ധ തിരുട്ടുഗ്രാമങ്ങള്‍ ഉണ്ട്. അവിടെ നിന്നുള്ളവരെല്ലാം ഈ സംഘത്തിലുണ്ട്.

ഏത് ഇരുട്ടിലും ഒളിച്ചിരിക്കും,വീടുകളില്‍ കയറി സ്വര്‍ണവും പണവും മോഷ്ടിക്കും. എതിര്‍ക്കാന്‍ ശ്രമിക്കുന്നവരെ ആക്രമിക്കും. ചിലപ്പോള്‍ ജീവനെടുക്കും. വെറും മോഷ്ടാക്കളല്ല, അക്രമകാരികളായ മോഷ്ടാക്കളാണ് കുറുവ സംഘം. അര്‍ധനഗ്‌നരായി, മുഖം മറച്ച്, ശരീരമാസകലം എണ്ണ തേച്ചെത്തുന്ന സംഘം മലയാളിക്ക് എന്നും പേടിസ്വപ്നമാണ്.

ഒന്നോ രണ്ടോ പേരല്ല, നൂറോളം പേരുള്ള കവര്‍ച്ചക്കാരുടെ വലിയ കൂട്ടമാണിത്. പക്ഷേ ഒരു സ്ഥലത്ത് മോഷ്ടിക്കാന്‍ പോകുന്നത് പലപ്പോഴും മൂന്ന് പേര്‍ ഒരുമിച്ചായിരിക്കും.പതിനെട്ടുവയസുമുതല്‍ 60 വയസ് വരെയുള്ളവര്‍ ഈ സംഘത്തിലുണ്ട്. ഇവര്‍ക്ക് മോഷണം കുലത്തൊഴിലാണ്. അവര്‍ക്കത് ഒരു തെറ്റല്ല. മോഷണത്തില്‍ നിന്നവരെ പിന്തിരിപ്പിക്കാന്‍ തമിഴ്‌നാട് സര്‍ക്കാര്‍ വീടുകള്‍ ഉള്‍പ്പെടെ കൊടുത്തിട്ടും കാര്യമുണ്ടായില്ല.പാരമ്പര്യമായി കൈമാറി കിട്ടിയ മോഷണ തന്ത്രങ്ങളും മെയ്ക്കരുത്തും ആധുനിക സാങ്കേതിക വിദ്യയുടെ സൂക്ഷ്മമായ ഉപയോഗവുമെല്ലാമാണ് ഇവരെ ശക്തരാക്കുന്നത്.

പകല്‍ ആക്രിപെറുക്കല്‍, തുണി വില്‍ക്കല്‍ പോലെ ചെറിയ ജോലിയൊക്കെ ചെയ്ത് നടക്കും. അപ്പോഴാണ് മോഷ്ടിക്കേണ്ട വീടുകള്‍ നിരീക്ഷിച്ച് കണ്ടെത്തുന്നത്. രാത്രിയാണ് മോഷണം. ഏത് ഇരുട്ടും ഇവര്‍ക്ക് പ്രശ്‌നമല്ല. മോഷ്ടിക്കാന്‍ പോകുന്നതിനും ചില രീതികളുണ്ട്.കണ്ണുകള്‍ മാത്രം പുറത്ത് കാണുന്ന രീതിയില്‍ തോര്‍ത്തുകൊണ്ട് മുഖം മറയ്ക്കും.ഷര്‍ട്ടും ലുങ്കിയും അരയില്‍ ചുരുട്ടിവച്ച് ഒരു നിക്കറിടും. പിടികൂടിയാല്‍ വഴുതി രക്ഷപ്പെടാനായി ശരീരം മുഴുവന്‍ എണ്ണയും പിന്നെ കരിയും തേയ്ക്കും.ഇതിനെല്ലാം പുറമെ കമ്പും വടിയും വാളും അടക്കമുള്ള ആയുധങ്ങളും കരുതിയിട്ടുണ്ടാവും.മോഷണശ്രമത്തിനിടെ പിടിക്കപ്പെടുമെന്നുറപ്പായാല്‍ ആക്രമണം ഉറപ്പാണ്. മോഷ്ടിക്കാനായി കൊല്ലാന്‍ പോലും മടിക്കില്ല. തമിഴ്‌നാടന്‍ തിരുട്ടു ഗ്രാമങ്ങളിലെ ഏറ്റവും അപകടകാരികളായ മോഷ്ടാക്കളുടെ കൂട്ടമാണിതെന്നാണ് പോലീസ് പറയുന്നത്.

വീടിന്റെ അടുക്കളഭാഗം കേന്ദ്രീകരിച്ചാണ് ഇവര്‍ മോഷണത്തിനു നീക്കം നടത്തുന്നത്. താരതമ്യേന ഉറപ്പുകുറഞ്ഞ വാതിലുകളാവും അടുക്കള ഭാഗത്ത് സ്ഥാപിച്ചിട്ടുള്ളത്.അതുകൊണ്ട് ഇതു തകര്‍ക്കാന്‍ എളുപ്പത്തില്‍ കഴിയുന്നതിനാലാണ് ഈ ഭാഗം തിരഞ്ഞെടുക്കുന്നതെന്നാണ് പോലീസ് പറയുന്നത്. മറ്റൊരു വഴി കുട്ടികളുടെ കരച്ചില്‍ പോലുള്ള ശബ്ദം ഉണ്ടാക്കിയോ ടാപ്പ് തുറന്നുവിട്ടോ വീട്ടുകാരെ പുറത്തേക്കിറക്കുന്നതാണ്. അങ്ങനെ പുറത്തിറങ്ങുന്നവരെ ആക്രമിച്ച് വീടിനകത്തേക്ക് കയറി മോഷണം നടത്തും. ചിലപ്പോള്‍ ആയുധം കാട്ടി ഭീഷണിപ്പെടുത്തിയും സ്വര്‍ണവും പണവും ഇവര്‍ കൈക്കലാക്കാറുണ്ട്.സ്ത്രീകളുടെ ശരീരത്തിലെ ആഭരണം മുറിച്ചെടുക്കാന്‍ പ്രത്യേക കത്രികയും ഇവര്‍ക്കുണ്ട്.

കുറുവാ സംഘത്തില്‍പ്പെട്ട മൂന്നുപേരെ 2021ല്‍ പോലീസ് അറസ്റ്റ് ചെയ്തിരുന്നു. 2010ല് മലപ്പുറത്തുനിന്നും മൂന്നുപേരടങ്ങുന്ന സംഘത്തെയും 2008 ല്‍ പാലക്കാട് നിന്നും 10 അംഗ സംഘത്തെയും അറസ്റ്റ് ചെയ്തു. പക്ഷേ ജാമ്യത്തില്‍വിട്ട ഇവരെ പിന്നീട് പിടികൂടാന്‍ പോലീസിന് കഴിഞ്ഞില്ല. കവര്‍ച്ചയ്ക്ക് ശേഷം തമിഴ്‌നാട്ടിലെ തിരുട്ട്ഗ്രാമങ്ങളില്‍ താമസിക്കുന്നതാണ് ഇവരുടെ രീതി.

ആലപ്പുഴയുടെ വടക്കന്‍ മേഖലകളില്‍ രണ്ടാഴ്ചയോളമായി മുഖംമൂടി സംഘം വിലസുകയാണ്. പത്തിലേറെ വീടുകളില്‍ കള്ളന്‍ കയറി. രണ്ടാഴ്ച്ചക്കിടെ മണ്ണഞ്ചേരിയിലെ നാല് വീടുകളിലാണ് മോഷണം നടന്നത്. കായംകുളത്തും കരിയിലകുളങ്ങരയിലും കുറുവാ സംഘത്തിന്റേതെന്ന് സംശയിക്കുന്ന ദൃശ്യങ്ങള്‍ ലഭിച്ചിട്ടുണ്ട്.ചൊവ്വാഴ്ച മാത്രം കയറിയത് മൂന്ന് വീടുകളിലാണ്. കോമളപുരം നായ്ക്കാംവെളി അജയകുമാറിന്റെ അയല്‍വാസി മരിച്ചതിനെ തുടര്‍ന്ന് ഈ ഭാഗത്ത് രാത്രി നാട്ടുകാരുടെ സാന്നിധ്യം ഉണ്ടായിരുന്നിട്ടും മോഷ്ടാക്കള്‍ കയറി.

മണ്ണഞ്ചേരിയില്‍ രണ്ടു വീടുകളില്‍ വീടിന്റെ അടുക്കളവാതില്‍ തകര്‍ത്ത് അകത്തുകടന്ന സംഘം ഉറങ്ങുകയായിരുന്ന വീട്ടമ്മമാരുടെ താലിമാലകള്‍ കവര്‍ന്നു. ഒരാളുടെ മൂന്നരപ്പവന്‍ സ്വര്‍ണം നഷ്ടമായി. ഒരാളുടെ മാല മുക്കുപണ്ടമായിരുന്നതിനാല്‍ വലിയ നഷ്ടം ഒഴിവായി. രണ്ടു വീടുകളില്‍ മോഷണശ്രമവും നടന്നു.ഏതാനും മണിക്കൂറുകളുടെ വ്യത്യാസത്തില്‍ അടുത്തടുത്ത പ്രദേശങ്ങളിലായിരുന്നു മോഷ്ടാക്കളുടെ വിളയാട്ടം.

പൊലീസും ഡോഗ് സ്‌ക്വാഡും ഫോറന്‍സിക് വിദഗ്ധരുമെല്ലാം സ്ഥലത്തെത്തി പരിശോധന നടത്തിയെങ്കിലും സൂചനകളൊന്നും ലഭിച്ചില്ല. മോഷ്ടാക്കളുടെ നിരവധി സിസിടിവി ദൃശ്യങ്ങള്‍ പോലീസ് ശേഖരിച്ചിട്ടുണ്ട്. നിലവില്‍ ആലപ്പുഴ ഡിവൈഎസ്പി എംആര്‍ മധുബാബുവിന്റെ നേതൃത്വത്തില്‍ ഏഴംഗ സംഘമാണ് സംഭവം അന്വേഷിക്കുന്നത്. തമിഴ്‌നാട്ടിലേക്കും അന്വേഷണം വ്യാപിപ്പിച്ചിട്ടുണ്ട്. റെസിഡന്‍ഷ്യല്‍ അസോസിയേഷനുകളുടെയും സംഘടനകളുടെയുമെല്ലാം സഹായത്തോടെ പൊലീസ് രാത്രികാല പട്രോളിംഗ് ശക്തമാക്കി.

അടുക്കള വാതില്‍ പൊളിച്ച് അകത്തു കടക്കല്‍, വസ്ത്രധാരണം, സ്ത്രീകളുടെ മാത്രം മാല പൊട്ടിക്കല്‍ തുടങ്ങിയ മോഷണ രീതികളിലൂടെ ഇത് കുറുവാ സംഘമാണെന്ന് തോന്നുമെങ്കിലും ആലപ്പുഴയിലേത് കുറുവാ സംഘത്തെ അനുകരിക്കുന്ന പ്രാദേശിക കള്ളന്‍മാരാകാനുള്ള സാധ്യതയും പോലീസ് തള്ളികളയുന്നില്ല. നാട്ടുകാര്‍ക്കുപോലും സംശയമുണ്ടാക്കുന്ന വഴികളുള്ള ഉള്‍പ്രദേശം കവര്‍ച്ചയ്ക്കു തിരഞ്ഞെടുത്തതാണ് സംശയത്തിനുള്ള പ്രധാന കാരണം. പുറത്തുനിന്നുവരുന്നവരാണെങ്കില്‍ പെട്ടെന്ന് എങ്ങനെ രക്ഷപ്പെട്ടുവെന്ന ചോദ്യവും ഉയരുന്നുണ്ട്.

തമിഴ്‌നാടുകാരാണെങ്കിലും കേരള തമിഴ്‌നാട് അതിര്‍ത്തിയും കമ്പം, ബോഡിനായ്ക്കന്നൂര്‍, കോയമ്പത്തൂര്‍, മധുര, തഞ്ചാവൂര്‍ എന്നിവയുമൊക്കെ ഇവരുടെ താവളങ്ങളാണ്.ആദ്യം പാലക്കാടും പിന്നെ കോഴിക്കോടുമായി കേരളത്തില്‍ പലയിടത്തും നേരത്തെയും ഈ സംഘം മോഷണം നടത്തിയിട്ടുണ്ട്. സാമ്പത്തിക വ്യത്യാസമില്ലാതെ സ്ത്രീകള്‍ സ്വര്‍ണാഭരണങ്ങള്‍ ധരിക്കുന്നതുകൊണ്ടാണ് കേരളം ഇവര്‍ തിരഞ്ഞെടുക്കുന്നതെന്നാണ് പോലീസ് പറയുന്നത്.

നിലവിലെ സാഹചര്യത്തില്‍ ഭയം വേണ്ട ജാഗ്രത മതിയെന്നാണ് പോലീസ് പറയുന്നത്. രാത്രിയില്‍ അടുക്കള വാതില്‍ അടച്ചെന്നും ഉറപ്പാക്കണം,അസമയത്ത് എന്തെങ്കിലും തരത്തിലുള്ള ശബ്ദം കേട്ടാല്‍ തനിച്ച് വാതില്‍ തുറന്ന്പുറത്തിറങ്ങരുത്,ഈ വിവരം പോലീസിനെ അറിയിക്കണം. വീടിന്റെ പരിസരങ്ങളില്‍ വേണ്ടത്ര വെളിച്ചം ഉണ്ടെന്നും ഉറപ്പാക്കണം എന്നിവയാണ് പോലീസ് നല്‍കുന്ന മുന്നറിയിപ്പ്.

പ്രായപൂര്‍ത്തിയാകാത്ത വിദ്യാര്‍ഥിനിയെ പീഡിപ്പിക്കാന്‍ ശ്രമിച്ച കേസില്‍ കായിക അധ്യാപകന്‍ അറസ്റ്റില്‍. മാന്നാര്‍ കുട്ടംപേരൂര്‍ എസ്എന്‍ സദനം വീട്ടില്‍ എസ് സുരേഷ് കുമാറിനെ( 43)യാണ് പോക്‌സോ വകുപ്പ് പ്രകാരം മാന്നാര്‍ പൊലീസ് അറസ്റ്റ് ചെയ്തത്. താല്‍ക്കാലിക കായിക അധ്യാപകനായി ജോലി ചെയ്യുകയായിരുന്നു ഇയാള്‍.

കായിക പരിശീലനം നല്‍കുന്നതിനിടെ സ്‌കൂളില്‍ വെച്ച് അധ്യാപകന്‍ വിദ്യാര്‍ഥിനിയെ പീഡിപ്പിക്കാന്‍ ശ്രമിച്ചുവെന്നാണ് പരാതി. വിദ്യാര്‍ത്ഥിനി സംഭവം വീട്ടിലറിയിച്ചതിനെ തുടര്‍ന്ന് രക്ഷകര്‍ത്താക്കള്‍ മാന്നാര്‍ പൊലീസില്‍ പരാതി നല്‍കി. കേസെടുത്തതോടെ സുരേഷ് കുമാര്‍ ഒളിവില്‍ പോയി. ഒരാഴ്ചയായി പലയിടങ്ങളിലായി ഒളിവില്‍ കഴിഞ്ഞു. മാന്നാര്‍ പൊലീസ് ഇന്‍സ്‌പെക്ടര്‍ എ അനീഷിന്റെ നേതൃത്വത്തില്‍ നടത്തിയ അന്വേഷണത്തിലാണ് പിടികൂടിയത്.

മാന്നാര്‍ എസ് ഐ അഭിരാം സി എസ്, വനിത എഎസ്‌ഐ സ്വര്‍ണ്ണ രേഖ, സീനിയര്‍ സിവില്‍ പൊലീസ് ഓഫീസര്‍ അജിത്ത് കുമാര്‍, സിവില്‍ പൊലീസ് ഓഫീസര്‍മാരായ ഹരിപ്രസാദ്, വിഷ്ണു എന്നിവര്‍ ചേര്‍ന്നാണ് സുരേഷിനെ പിടികൂടിയത്. പ്രതി ഇത്തരത്തില്‍ മറ്റ് വിദ്യാര്‍ഥികളോടും മോശമായി പെരുമാറിയിട്ടുണ്ടെന്നാണ് അന്വേഷണത്തില്‍ വ്യക്തമായതെന്ന് പൊലീസ് പറഞ്ഞു.

സുഹൃത്തിന്‍റെ വീട്ടിലേക്ക് പോയ യുവാവിനെ സദാചാര പോലീസ് ചമഞ്ഞ് മർദിച്ച സംഭവത്തില്‍ നാല് പേർ പിടിയില്‍.

ആക്രമത്തില്‍ ഗുരുതരമായി പരിക്കേറ്റ ഇയാളെ ആശുപത്രിയില്‍ പ്രവേശിപ്പിച്ചു. വെള്ളിയാഴ്ച പുലർച്ച 1.30 ഓടെ കളിപ്പാൻകുളം മല്ലിയിടത്തായിരുന്നു സംഭവം. വഴിയില്‍ തടഞ്ഞ് നിർത്തിയായിരുന്നു ആക്രമണം.

പരാതിയില്‍ കന്യാകുളങ്ങര സ്വദേശിയായ അമലിനെ (20) റോഡരികില്‍ മദ്യപിച്ചുകൊണ്ടിരുന്ന കളിപ്പാൻകുളം സൂര്യവിളാകത്ത് വീട്ടില്‍ സജീവ് കുമാർ (37), സഹോദരൻ ശരത്ത് (38), ശ്രീകാര്യം പാങ്ങപ്പാറ അഞ്ജലിഭവനില്‍ അഭിലാഷ് (34), നെടുങ്കാട് അഞ്ജുഭവനില്‍ രാജേഷ് (49) എന്നിവരാണ് പോലീസിന്റെ പിടിയിലായത്.

സുഹൃത്തിന്റെ വീട്ടിലേക്ക് പോകുകയായിരുന്ന യുവാവിനെ തടഞ്ഞുനിർത്തി പുലർച്ചയുള്ള സഞ്ചാരത്തെ ചോദ്യം ചെയ്ത ശേഷം യുവാവിനെ സംഘം ക്രൂരമായി മർദിക്കുകയുമായിരുന്നു. സംഭവത്തില്‍ മാതാപിതാക്കളുടെ പരാതിയിലാണ് അറസ്റ്റ്. കോടതിയില്‍ ഹാജരാക്കിയ നാലുപേരെയും റിമാൻഡ് ചെയ്തു.

മണിപ്പൂര്‍ കലാപം വീണ്ടും കൈവിട്ടു പോകുന്ന സാഹചര്യത്തില്‍ പ്രശ്‌നത്തില്‍ അടിയന്തര ഇടപെടലിനൊരുങ്ങി കേന്ദ്ര സര്‍ക്കാര്‍. മണിപ്പൂര്‍ അക്രമങ്ങളുടെ പശ്ചാത്തലത്തില്‍ മഹാരാഷ്ട്രയിലെ തിരഞ്ഞെടുപ്പ് റാലികള്‍ റദ്ദാക്കി കേന്ദ്ര ആഭ്യന്തര മന്ത്രി അമിത് ഷാ മുംബൈയില്‍ നിന്നും ഡല്‍ഹിയിലേക്ക് മടങ്ങി.

മണിപ്പൂര്‍ വീണ്ടും കത്തുന്ന സാഹചര്യത്തില്‍ വടക്ക് കിഴക്കന്‍ സംസ്ഥാനങ്ങളിലെ സ്ഥിതിഗതികള്‍ പരിശോധിക്കാന്‍ അമിത് ഷാ അടിയന്തിര യോഗം വിളിച്ചിട്ടുണ്ടെന്നാണ് റിപ്പോര്‍ട്ടുകള്‍. കേന്ദ്ര സേനകളുടെ ഉന്നത ഉദ്യോഗസ്ഥര്‍ ഉടന്‍ മണിപ്പൂര്‍ സന്ദര്‍ശിക്കും.

സിആര്‍പിഎഫ് ഡയറക്ടര്‍ ഉള്‍പ്പെടെയുള്ള ഉന്നത ഉദ്യോഗസ്ഥര്‍ സംസ്ഥാനത്ത് എത്തും. ജിരിബാമില്‍ നിന്നും തട്ടിക്കൊണ്ടുപോയ സ്ത്രീകളും കുട്ടികളും ഉള്‍പ്പെടെയുള്ള ആറ് പേരും കൊല്ലപ്പെട്ടന്ന വാര്‍ത്തകള്‍ക്ക് പിന്നാലെയാണ് മണിപ്പൂരിലെ സ്ഥിതി വീണ്ടും വഷളായത്.

ജിരിബാമില്‍ ക്രൈസ്തവ ദേവാലയങ്ങള്‍ക്ക് നേരെ വ്യാപക ആക്രമണമുണ്ടായി. അഞ്ച് പള്ളികള്‍ക്കും ആറ് വീടുകള്‍ക്കും തീയിട്ടു. ഐസിഐ ചര്‍ച്ച്, സാല്‍വേഷന്‍ ആര്‍മി പള്ളി, ഇഎഫ്‌സിഐ പള്ളി തുടങ്ങിയ ആരാധനാലയങ്ങള്‍ക്ക് നേരെയാണ് ആക്രമണമുണ്ടായത്.

കഴിഞ്ഞ തിങ്കളാഴ്ച പത്ത് കുക്കികളെ സുരക്ഷാ സേന കൊലപ്പെടുത്തിയതിനെ തുടര്‍ന്നുണ്ടായ അക്രമത്തില്‍ കുട്ടികളും സ്ത്രീകളും ഉള്‍പ്പെടെ ആറ് പേരെ കാണാതായിരുന്നു. കഴിഞ്ഞയാഴ്ച സംസ്ഥാനത്തെ ജിരിബാം ജില്ലയില്‍ കുക്കി ആദിവാസി വിഭാഗത്തില്‍പ്പെട്ട 31 കാരിയായ സ്ത്രീയെ ജീവനോടെ ചുട്ടു കൊന്നിരുന്നു. പിന്നാലെയായിരുന്നു മുഖ്യമന്ത്രിയുള്‍പ്പെടെയുള്ളവരുടെ വസതികള്‍ക്ക് നേരെ ആക്രമണം ഉണ്ടായത്.

നേരത്തേ രണ്ട് മന്ത്രിമാരുടെയും മൂന്ന് എംഎല്‍എമാരുടെയും വീടുകളിലേക്ക് പ്രതിഷേധക്കാര്‍ ഇരച്ചു കയറി. തുടര്‍ന്ന് ഇംഫാല്‍ വെസ്റ്റ് ഭരണകൂടം ജില്ലയില്‍ അനിശ്ചിത കാലത്തേക്ക് നിരോധന ഉത്തരവുകള്‍ പുറപ്പെടുവിച്ചിരുന്നു. ഇംഫാല്‍ വെസ്റ്റ്, ഈസ്റ്റ്, ബിഷ്ണുപൂര്‍, തൗബാല്‍, കാക്ചിങ്, കാങ്‌പോക്പി, ചുരാചന്ദ്പൂര്‍ എന്നിവിടങ്ങളില്‍ രണ്ട് ദിവസത്തേക്ക് ഇന്റര്‍നെറ്റും മൊബൈല്‍ ഡേറ്റ സേവനങ്ങളും അധികൃതര്‍ നിര്‍ത്തി വച്ചിരിക്കുകയാണ്.

അതിനിടെ മണിപ്പൂര്‍ വിഷയത്തില്‍ 24 മണിക്കൂറിനകം നടപടിയെടുത്തില്ലെങ്കില്‍ സര്‍ക്കാറും അധികൃതരും പ്രതിഷേധച്ചൂട് അറിയുമെന്ന് മെയ്‌തേയ് സംഘടനയായ കോര്‍ഡിനേഷന്‍ കമ്മിറ്റി ഓഫ് മണിപ്പൂര്‍ ഇന്റെഗ്രിറ്റി കേന്ദ്ര സര്‍ക്കാരിന് മുന്നറിയിപ്പ് നല്‍കി.

അതേസമയം മണിപ്പൂരില്‍ പരിഹാരം കാണുന്നതില്‍ കേന്ദ്ര സര്‍ക്കാര്‍ സമ്പൂര്‍ണ പരാജയമാണെന്ന വിമര്‍ശനം ശക്തമാക്കുകയാണ് കോണ്‍ഗ്രസ്. ബിജെപി രാഷ്ട്രീയ താല്‍പര്യത്തോടെ മനപ്പൂര്‍വം മണിപ്പൂര്‍ കത്തിക്കുകയാണെന്നും കലാപത്തില്‍ തങ്ങളെ ഉപേക്ഷിച്ച മോഡിയോട് മണിപ്പൂരിലെ ജനങ്ങള്‍ പൊറുക്കില്ലെന്നും പ്രസിഡന്റ് മല്ലികാര്‍ജുന്‍ ഖാര്‍ഗെ പറഞ്ഞു. പ്രധാനമന്ത്രി ഉടന്‍ മണിപ്പൂരിലെത്തണമെന്ന് രാഹുല്‍ ഗാന്ധി ആവര്‍ത്തിച്ചു.

ഷാനോ എം കുമരൻ

ലിറ്റിൽ ഫ്ലവർ നഴ്സിംഗ് ഹോമിലെ മുപ്പത്തിരണ്ടാം നമ്പർ മുറിയിലെ അന്തേവാസി പീറ്റർ വിനോദിന്റെ വിളി കേട്ട് മെല്ലെ തല ചെരിച്ചു നോക്കി. ഓഹോ നീയോ എന്നൊരു ചോദ്യവും. സൂര്യൻ വൈകി അസ്തമിക്കുന്ന ദിവസങ്ങളിൽ ഒന്ന്. പീറ്റർ എന്തിനാണാവോ അകലേക്ക് നോക്കി നിന്നത്? ഒരു കാര്യവുമില്ലെങ്കിലും വിനോദ് വെറുതെ ആലോചിച്ചു.
പീറ്റർ നീ കേട്ടോ ഞാൻ വിളിച്ചത്. എന്താണ് നീ ചിന്തിക്കുന്നത്.
ഞാൻ ചിന്തയിലാണെന്നു നിനക്കെങ്ങനെ മനസ്സിലായി? പരുക്കനെങ്കിലും ഒട്ടും ബലമില്ലാത്ത ശബ്ദത്തിൽ പീറ്റർ തിരിച്ചു ചോദിച്ചു.
അത് നിന്റെ മുഖം കണ്ടാൽ അറിയില്ലേ പീറ്റർ നീ കാര്യമായെന്തോ ചിന്തയിലാണെന്ന്.
വിനോദിന്റെ മറുപടി പീറ്ററിനെ ചെറുതായൊന്നു ചിരിപ്പിച്ചു. പീറ്റർ പറഞ്ഞു. അല്ലെങ്കിലും നിങ്ങൾ ഇന്ത്യൻസിനു ഒരു പ്രത്യേക സിദ്ധിയാണ് മുഖം നോക്കി ഉള്ളിലിരുപ്പ് കണ്ടു പിടിക്കുക എന്നത്. ഞാൻ ഓർക്കുന്നു നിന്റെ നാട്ടിൽ കൈ വെള്ള നോക്കി ഭാവി പ്രവചിച്ചിരുന്നു ദൈവ ദൂതന്മാരെപോലെ ചിലർ. ഞങ്ങൾ നിങ്ങളുടെ നാട്ടിൽ നിങ്ങളെ നിരന്തരം കൊള്ളയടിച്ചിരുന്ന ആ മുഷിഞ്ഞ കാലഘട്ടം അന്ന് ഞാൻ എന്റെ ഡാഡിന്റെ കൂടെ അവിടെയുണ്ട് ഞാൻ ജനിച്ചത് നിന്റെ നാട്ടിലാണ് നിനക്കറിയാമോ അത് ?
തെല്ലൊരു അത്ഭുതത്തോടെ വിനോദ് ചോദിച്ചു. ശെരിയാണോ പീറ്റർ നീ ഇപ്പറഞ്ഞത് നീ ജനിച്ചത് എന്റെ നാട്ടിലെന്നോ? എവിടെയാണ് ശെരിയായ സ്ഥലം ഓർമ്മയുണ്ടോ നിനക്കവിടം.

ഓർമയോ! നല്ല കാര്യമായി. നീയെല്ലാം പറഞ്ഞു വച്ചിരിക്കുന്നത് എനിക്ക് അൽഷിമേഴ്‌സ് ആണെന്നല്ലേ പിന്നെ എങ്ങനെയാണ് എനിക്ക് ഓർമ്മയുണ്ടാകുക. എന്തായാലും ഒരു മറവി രോഗിയോടു ‘ഓർമ്മയുണ്ടോ’ എന്നുള്ള ചോദ്യമായിരിക്കും ഏറ്റവും വലിയ തമാശ. പീറ്റർ ബലമില്ലാതെ നിറുത്താതെ ചിരിച്ചു.
പീറ്ററിന്റെ മാനസികാവസ്ഥയെപ്പറ്റി സന്ദേഹം തോന്നിയെങ്കിലും നിയമാവലികളും നിർദേശിത നിബന്ധനകളും അനുസരിച്ചു മാത്രമേ ജോലി ചെയ്യുവാൻ പാടുള്ളു എന്ന കർശന നിർദേശം വിനോദെന്ന വയോജന പാലകനെ കൂടുതലൊന്നും ചിന്തിക്കുവാൻ പ്രേരിപ്പിച്ചില്ല. അവൻ പറഞ്ഞു. വെറുതെ ഇരു ഭംഗിക്ക് വേണ്ടി അല്ലെങ്കിൽ ആ വയസ്സന്റെ സന്തോഷം കാണുന്നതിന് വേണ്ടി. എനിക്കറിയാം പീറ്റർ നിന്റെ ഓർമ്മകൾക്ക് കുഴപ്പമൊന്നുമില്ലെന്നു. പറയൂ പ്രിയ സുഹൃത്തേ ഇന്ത്യയിൽ എവിടെയാണ് നീ ജനിച്ചത്. എന്റെ നാട്ടിലാണോ കേരളത്തിൽ ?

ഏതാനും നിമിഷങ്ങൾ ആലോചിച്ചു നിന്നതിനു ശേഷം പീറ്റർ പറഞ്ഞു. അറിയില്ല ശെരിയായ സ്ഥലം ഏതാണെന്ന്. ബട്ട് ഒന്നറിയാം, അവിടെ ഞാൻ ജനിച്ച വീടിനടുത്തു ഒരു വലിയ പള്ളിയുണ്ടായിരുന്നു. ഇരുണ്ട ചായം പൂശിയ വലിയ ചുറ്റു വേലികളുള്ള പള്ളി മുന്നിൽ വലിയ കൽവിളക്കുകൾ ഉണ്ടായിരുന്നു.
ആവൊ ആർക്കറിയാമതു വിനോദ് ഉള്ളിൽ പറഞ്ഞു. എത്രയെത്ര പള്ളികൾ അമ്പലങ്ങൾ. സായിപ്പിന് ചിലപ്പോൾ പള്ളിയോ അമ്പലമോ മാറിപ്പോയേക്കാം ഏയ് അങ്ങനെ വരുമോ ? പുള്ളിക്ക് പക്ഷെ കൽവിളക്കു ഓർമയുണ്ട്.

നിങ്ങൾ ഞങ്ങളിൽ നിന്നും സ്വാതന്ത്ര്യം നേടിയപ്പോൾ അല്ല നിങ്ങൾ ഞങ്ങളെ അവിടെ നിന്നോടിച്ചപ്പോൾ അന്ന് പോന്നതാ അവിടുന്ന് പിന്നെ പോയിട്ടേയില്ല.
അതൊക്കെ പോട്ടെ പീറ്റർ നീ എന്നോട് പറയുവാൻ ആഗ്രഹിക്കുന്നോ ഞാൻ ഈ മുറിയിലേക്ക് കടന്നു വന്നപ്പോൾ നീയെന്തിനെകുറിച്ചായിരുന്നു ചിന്തിച്ചു കൊണ്ടിരുന്നതെന്നു, ആരെക്കുറിച്ചായിരുന്നു എന്ന് ?. നിനക്ക് പറയുവാൻ കഴിയുമെങ്കിൽ ഞാൻ നിന്നെ കേൾക്കാം പീറ്റർ. ആ വൃദ്ധന്റെ കൈയിൽ പിടിച്ചു കൊണ്ട് വിനോദ് പറഞ്ഞു.

ഒന്ന് നെടുവീർപ്പിട്ടതിനു ശേഷം പീറ്റർ ഇടതു കരം മെല്ലെയുയർത്തി ദൂരെ അസ്തമസൂര്യനിലേക്കു ചൂണ്ടി. നീ കാണുന്നുണ്ടോ ആ ഇളം ചുവപ്പു രാശി എന്ത് ഭംഗിയാണ്. ആ നിറത്തിന് എന്തൊരു ആകർഷണമാണ്. ആ വെള്ള കലർന്ന ഇളം ചുവപ്പു നിറം അതുപോലെ തന്നെ ആകർഷണവും വശ്യവും ആയിരുന്നു. എന്റെ കാത്തലീൻ എന്റെ പ്രിയപ്പെട്ടവൾ. വല്ലാത്തൊരു സൗന്ദര്യമായിരുന്നു അവൾക്ക്.
ആഹാ വരട്ടെ ഇങ്ങോട്ടു കള്ള കിഴവാ. നിന്റെ ചൂടുകാലത്തെ ചുറ്റികളികൾ എനിക്കറിയാം നീയൊരു കാളകൂറ്റനായിരുന്നു അല്ലെ! വിനോദ് അയാളെ ഒന്ന് ചൊറിഞ്ഞു.
അല്ല നിനക്ക് തെറ്റി. ഞാനൊരു മെഴുത്ത കാട്ടുകുതിരയായിരുന്നു. നിന്റെ പ്രായത്തിൽ ഞാൻ എല്ലായിടത്തും മദിച്ചു നടന്നിരുന്നു. നിനക്കറിയുമോ എനിക്ക് എട്ടു കാമുകിമാരുണ്ടായിരുന്നു. എന്റെ രേതസ്സ് മുഴുവനും ഊറ്റികുടിച്ച ആ എട്ടു ഹെയ്നകൾ. അവരാരും പക്ഷെ എന്റെ കിടപ്പറ കണ്ടിരുന്നില്ല. അത് എന്റെ കാത്തലീൻ മാത്രമായിരുന്നു കണ്ടത്. എന്റെ നാലു മക്കളെ പെറ്റു വളർത്തിയവൾ. വെള്ളയിൽ അലിഞ്ഞു ചേർന്ന ചെമ്മാനത്തിന്റെ നിറമുള്ളവൾ. ലാവണ്ടർ പൂക്കളുടെ വശ്യ സുഗന്ധമുള്ളവൾ. അവൾ മാത്രമായിരുന്നു എന്നെ തോല്പിച്ചത് സ്നേഹം കൊണ്ട്. . ആ എന്റെ പ്രിയപ്പെട്ടവൾ …പീറ്ററിന്റെ കണ്ണുകൾ നിറഞ്ഞിരുന്നു.
പക്ഷെ പീറ്റർ, നിന്റെ ഫയലുകളിൽ നിന്റെ അവകാശിയായി നിന്റെ വൈഫ് ഒരു റോസ് മേരിയുടെ പേരാണല്ലോ ഉള്ളത്. കാത്തലിനു റോസ്‌മേരി എന്നൊരു അപരനാമമുണ്ടായിരുന്നോ. വിനോദ് ചോദിച്ചു.
ഓ റോസ്‌മേരി പിശാചിന്റെ സന്തതി . അവളാണെന്റെ ജീവിതം തുലച്ചു കളഞ്ഞത്. പീറ്ററിന്റെ മുഖം ദേഷ്യത്താൽ ചുവന്നിരുന്നു. എന്റെ കാത്ത് എന്റെ കാത്ത്. അവളെ എനിക്ക് നഷ്ടമാക്കിയവളാണ് റോസ്‌മേരി. കാത്തലിന്റെ സഹോദരി. എന്റെ കാത്ത് മരിച്ചു പോയി! അല്ല, അവൾ.. അവൾ ആ ചെകുത്താന്റെ സന്തതി അവളെന്റെ പ്രിയപ്പെട്ടവളെ കൊന്നു കളഞ്ഞു.

അരിശം വഴിമാറി പീറ്റർ വിതുമ്പി തുടങ്ങി.
എന്ത് ? ഏതെങ്കിലും സഹോദരിക്ക് അങ്ങനെ ചെയ്യുവാൻ കഴിയുമോ.? എല്ലാം നിന്റെ തോന്നലാണ് പീറ്റർ വരൂ ഞാൻ നിനക്കൊരു മനോഹരമായ ചായയുണ്ടാക്കാം. ഒരു കടുപ്പമേറിയ സുന്ദരമായ ചായ നിനക്കൊരുണർവ്വ് നൽകുമെന്ന് തീർച്ചയാണ്.
വിനോദ് പീറ്ററിനെ അല്പം ശാന്തമാക്കുവാൻ ശ്രമിച്ചു.
എന്റെ പ്രിയപെട്ടവളുടെ ഓർമ്മ മതി എനിക്ക് ശാന്തമാവാൻ അവളുടെ ഓർമയോളം വരില്ല ഒരു ചായയും . നീ പറഞ്ഞത് ശരിയാണ് ഒരു സഹോദരിക്ക് അങ്ങനെ കഴിയില്ലായിരിക്കാം. പക്ഷെ റോസ്മേരി എന്ന പിശാചിന് കഴിയും എന്റെ കാത്തലിന്റെ അമ്മയുടെ ജാര സന്തതിക്ക് എന്റെ ഭാരിച്ച സമ്പത്ത്, അതിൽ ഒട്ടും അനുരക്തയായിരുന്നില്ല എന്റെ കാത്ത്. വിദ്യാസമ്പന്നയായ അവളുടെ ടീച്ചറുദ്യോഗം മതിയായിരുന്നു അവൾക്കു സന്തോഷത്തോടെ കഴിയുവാൻ. പക്ഷെ ഒരു കഴിവുമില്ലാതെ തോന്ന്യാസം ജീവിച്ച റോസ്‌മേരി കണക്കു കൂട്ടിയത് സംഭവിച്ചു. എന്റെ സ്വത്തു വഹകളുടെ അവകാശിയാവുക. അതിനവൾ വിരിച്ച വലയിൽ ഞാൻ വീണു. ഏങ്ങി കരയുന്നുണ്ടായിരുന്നു ആ കിഴവൻ. ഞാൻ, ഞാൻ കാരണമാണ് എന്റെ കാത്ത് എന്റെ നശിച്ച അഭിനിവേശം അവളുടെ തുടുത്ത മേനിയഴക് അതെന്നെ ഒരു രാത്രി ചതിച്ചു കളഞ്ഞു. അവളെ ഭോഗിച്ച അന്ന് മുതൽ അവളെന്നെ ബ്ലാക്‌മെയ്ൽ ചെയ്തു തുടങ്ങി. മെല്ലെ അവൾ എന്നെ രോഗിയാക്കി. മറവികാരനാക്കി മരുന്നുകൾക്കടിമയാക്കി. എന്നിലുള്ള വിശ്വാസം എന്റെ കാത്തലീന് നഷ്ടമായി. വിശ്വാസവഞ്ചന അവളെ പാടെ തകർത്തു. വിഷാദരോഗിയായ അവൾ കാലത്തിനു കീഴടങ്ങി. ഹോ എത്ര മുടിഞ്ഞതാണീ പെൺ ശരീരത്തിന്റെ നിമ്ന്നോന്നതങ്ങൾ. അതിൽ വിരാജിക്കുന്നവർ എത്രയോ വിഡ്ഢികൾ. ത്ഫൂ… അവൻ, അവനു അത് തന്നെ വരണം. അല്ലെങ്കിൽ അവനു ഈ ദുഷ്ടയെ തന്നെ എനിക്കെതിരെ നിൽക്കുവാൻ തെരെഞ്ഞെടുക്കണമായിരുന്നുവോ “?

പീറ്റർ മെല്ല കസേരയുടെ കൈയിൽ തന്റെ ഭാരം ചേർത്ത് വച്ച് അല്ലെങ്കിൽ വിവശനായി അയാൾ നിലത്തു വീഴുമായിരുന്നു. എന്ത് പറയണം എന്നറിയാതെ വിനോദ് പകച്ചു നിന്ന് പോയി. നാളിതു വരെ മറവി രോഗിയെന്ന് താൻ വിശ്വസിച്ച അല്ലെങ്കിൽ അങ്ങനെ എഴുതി വയ്പ്പിച്ചു തന്നെയടക്കം വിശ്വസിപ്പിച്ച ചതിയുടെ വംശപരമ്പര. ഈ കിഴവൻ എത്ര തെളിവായിട്ടാണ് തന്റെ ജീവിത കഥകൾ ഓർത്തു പറഞ്ഞത് അതും കാലങ്ങൾക്കു മുന്നെയുള്ളവ. ആരുടെ കാര്യമാണ് പീറ്റർ നീ പറയുന്നത് ആരാണ് ഈ ‘അവൻ ‘ ? വിരോധമില്ലെങ്കിൽ പറയൂ. എനിക്കതറിയുവാൻ ആഗ്രഹമുണ്ട്.
ഹാ ഒന്നാന്തരം പ്രയോഗം വിരോധമില്ലെങ്കിൽ എന്ന്. അങ്ങനെ പറഞ്ഞാൽ ഞാൻ എല്ലാം തുറന്നു പറഞ്ഞേക്കും എന്ന് നീ കരുതി. അല്ലേടാ ചെറുപ്പക്കാരൻ വിഡ്ഢി. എങ്കിൽ നീ കേട്ടോ നീ എന്നെ കേൾക്കുവാൻ തയ്യാറല്ലെങ്കിൽ കൂടെ ഞാൻ നിന്നെ പിടിച്ചു നിറുത്തി എല്ലാം പറയും. ആരെങ്കിലും……ആരെങ്കിലുമൊക്കെ … ചുരുങ്ങിയ പക്ഷം നീയെങ്കിലും അറിയണം. ഞാൻ.. എനിക്ക് ….എന്റെ ബോധം മറഞ്ഞിട്ടില്ല എന്ന പരമാർത്ഥം. ആ കിഴവൻ നിന്ന് കിതച്ചു.
വിനോദ് ജഗ്ഗിൽ നിന്നും അല്പം വെള്ളം ഒരു ഗ്ലാസ്സിലേക്കു പകർന്നു പീറ്ററിന്‌ നേർക്ക് നീട്ടി. അയാൾ അത് വാങ്ങി. ഓഹ് താങ്ക് യു യങ് ജെന്റിൽമാൻ . നിനക്കറിയാം സാഹചര്യങ്ങൾ കൈകാര്യം ചെയ്യുവാൻ എന്ന് പറഞ്ഞിട്ട് മെല്ലെ രണ്ടിറക്കു വെള്ളം അകത്താക്കി.
അവൻ റോസ്‌മേരിയുടെ കാമുകൻ റയാൻ ജോൺ ലീ
മികച്ച കലാകാരനാണവൻ. സാക്‌സൊഫോണിൽ അവന്റെ വിരലുകൾ മന്ത്രികവലയം തീർക്കുമ്പോൾ എത്രയെത്ര കമിതാക്കളാണ് ആ വലയത്തിനുള്ളിൽ പെട്ട് നിൽക്കുന്നത് എന്ന് നിനക്കറിയാമോ.? ഞാനും ഹൃദയഹാരിയായ ആ പ്രകടനം ആസ്വദിച്ച് നിന്നിട്ടുണ്ട്. നീലക്കണ്ണുകളുള്ള പിച്ചക്കാരനാണവൻ ദരിദ്രവാസിയായ നാറി. പീറ്റർ വീണ്ടും അല്പം വെള്ളം നുണഞ്ഞു. ഒരു പൊതി കന്നാബിസ്സിനോ ഒരു പാക്കറ്റ് സിഗാറിനോ വകയില്ലാത്ത തെണ്ടിയായ കലാകാരൻ വിയർക്കാതെ പണക്കാരനാവാൻ കണ്ട മാർഗ്ഗം. എന്റെ ഭാരിച്ച സ്വത്തു വകകൾ അവളെ വച്ച് കൈക്കലാക്കുക . അവൻ ജയിച്ചു അവളും. എന്നെയീ വൃദ്ധസദനത്തിലാക്കി എന്റെ സമ്പത്തെല്ലാം എഴുതി വാങ്ങി അവൾ. ദുഷ്ട. ഇനിയും മിച്ചമുള്ളതു കൈക്കലാക്കാൻ അവൾ കണ്ട ഉപായം എന്റെ ഭാര്യയുടെ സ്ഥാനം ഞാൻ ചത്താൽ അവൾക്ക്. പീറ്റർ വെള്ളത്തിന്റെ ഗ്ലാസ് ചുണ്ടോടു ചേർത്തു അയാളുടെ അധരങ്ങൾ വിറച്ചു കൈകളും. വിനോദ് അയാൾക്കു സൗകര്യമായി കുടിക്കുവാൻ ഗ്ലാസിൽ മെല്ലെ താങ്ങി കൊടുത്തു. ഒപ്പം ആരാഞ്ഞു. അയാൾ ഇപ്പോഴും റോസ്‌മേരിയുടെ കൂടെയുണ്ടോ ??

ആ ചോദ്യം കേട്ട് ബലമില്ലാതെ പീറ്റർ പൊട്ടിച്ചിരിച്ചു. ഉണ്ടാകും തീർച്ചയായും ഉണ്ടാകും. അല്ലാതെ എവിടെ പോകുവാനാണ് ആ തെണ്ടി. അവനു പണം വേണം. പക്ഷെ നിനക്ക് അറിയുമോ അവനു അഞ്ചിന്റെ കാശ് കിട്ടില്ല. വീണ്ടും പീറ്റർ ഒരു നിർവൃതിയെന്ന വണ്ണം ചിരിച്ചു. എന്റെ കാശും അവന്റെ ദാരിദ്ര്യവും മാത്രമേ അവൻ കണ്ടു കാണുകയുള്ളു. റോസ്‌മേരിയെന്ന മഹാ വഞ്ചകിയുടെ വെളുത്ത തൊലിയ്ക്കുള്ളിലെ ക്രൂരതയുടെ നിറമവൻ കണ്ടിട്ടുണ്ടാവില്ല. ഇല്ല തീർച്ചയായും അവനതു തിരിച്ചറിഞ്ഞിട്ടുണ്ടാവില്ല. ഉണ്ടായിരുന്നെങ്കിൽ അവൻ ഈ ക്രൂരതയ്ക്ക് ചുക്കാൻ പിടിക്കുകയില്ലായിരുന്നു. അവൾ അവനെ അടിമയാക്കി വച്ചിട്ടുണ്ടാകാം. എന്റെ സമ്പത്തു കൊണ്ട് വേറെയേതെങ്കിലും പണ കുറ്റികളുടെ രേതസ്സ് ഊറ്റികുടിക്കുകയായിരിക്കുമവൾ . അവനോ അവന്റെ ഉദാത്തമായ സാക്‌സൊഫോൺ വായിൽ വച്ച് കൈകൾ കൊണ്ട് ഞെക്കി പൊട്ടിക്കുന്നുണ്ടാവും അവളുടെ പിച്ചയും വാങ്ങി. ….ഹ…ഹ…ഹാ ഇത്തവണ പീറ്റർ ചിരിച്ചത് അല്പം ഉച്ചത്തിലും കടുപ്പത്തിലുമായിരുന്നു. ആ ചിരിയിലൊരു പകയും പകവീട്ടലുമെല്ലാം ഒളിഞ്ഞു കിടക്കുന്നില്ലേ എന്ന് വിനോദ് സംശയിക്കാതിരുന്നില്ല.

എവിടെ നീ ഓഫർ ചെയ്ത മനോഹരമായ ചായ?
പീറ്ററിന്റെ ചോദ്യം വിനോദിനെ ചിന്തയിൽ നിന്നുണർത്തി

ഒരു ചായയ്‌ക്കായി കിച്ചനിലേക്കു നടക്കുമ്പോൾ വിനോദ് ഓർത്തു ഒരു പക്ഷെ ഭാവനയാകാം നല്ലവണ്ണം വട്ടു മൂക്കുമ്പോൾ ചിലപ്പോൾ കഥാകാരന്മ്മാരും കവികളുമെല്ലാം ജന്മമെടുത്തു കൂടെന്നില്ല. ആവോ ആർക്കറിയാം അല്ലെങ്കിലും അറിഞ്ഞിട്ടെന്തിന് ? ഒരാവേശത്തിനു പറയുകേം ചെയ്തു. ചായ എങ്ങനെയാണാവോ മനോഹരമാക്കുക.

ഷാനോ എം കുമരൻ: കോട്ടയം ജില്ലയിൽ പെരുവ സ്വദേശിയാണ്. സാഹിത്യ രംഗത്ത് ഷാനോയുടെ സംഭാവനകൾ നിരവധിയാണ്. യുകെയിൽ ഒരു സ്വകാര്യ സ്ഥാപനത്തിൽ ജോലി ചെയ്യുന്നു. കുടുംബം : ഭാര്യ കീർത്തി എൻഎച്ച്എസ് ഹോസ്പിറ്റലിൽ നേഴ്സ് ആയി ജോലി ചെയ്യുന്നു. മകൾ വേദശങ്കരി രണ്ടാം വർഷ വിദ്യാർത്ഥിനി.