കണ്ണൂർ: കേരളത്തിന്റെ മലബാർ തീരപ്രദേശം കേന്ദ്രീകരിച്ച് മീൻപിടിത്ത ബോട്ടുകൾ വഴി വൻതോതിൽ ലഹരിമരുന്നും സ്വർണവും കടത്തുന്നതായി കേന്ദ്ര രഹസ്യാന്വേഷണ വിഭാഗത്തിന്റെ റിപ്പോർട്ട്. കോടിക്കണക്കിന് രൂപയുടെ ഹെറോയിനും മെത്താംഫെറ്റമിനുമാണ് കടൽമാർഗം കടത്തുന്നത്. മലബാർ തീരത്തുനിന്ന് ശ്രീലങ്കയിലേക്ക് ലഹരിമരുന്ന് എത്തിക്കുകയും പകരമായി സ്വർണം കേരളത്തിലേക്ക് കടത്തുകയുമാണ് സംഘങ്ങളുടെ രീതിയെന്നാണ് റിപ്പോർട്ടിൽ പറയുന്നത്. കേരളത്തിന് പുറമെ തമിഴ്നാട്ടിലെ തൂത്തുക്കുടി, വേദാരണ്യം, രാമേശ്വരം, കന്യാകുമാരി തീരങ്ങളും കടത്തിന്റെ പ്രധാന ഇടനാഴികളായി ഉപയോഗിക്കുന്നുണ്ടെന്നാണ് വിവരം.

മയക്കുമരുന്ന് കടത്താൻ മത്സ്യബന്ധന ബോട്ടുകളിൽ പ്രത്യേക രഹസ്യ അറകൾ നിർമിക്കുന്നതായും വലിയ മത്സ്യങ്ങളുടെ വയറിനുള്ളിലും ഐസ് പെട്ടികളിലും ലഹരിവസ്തുക്കൾ ഒളിപ്പിക്കുന്നതായും റിപ്പോർട്ടിലുണ്ട്. പ്ലാസ്റ്റിക് കവറുകളിൽ പൊതിഞ്ഞ് മത്സ്യങ്ങൾക്കിടയിലും ഐസിനുള്ളിലും സൂക്ഷിക്കുന്നതിനാൽ പരിശോധനയിൽ കണ്ടെത്തുക പ്രയാസമാണ്. മീനിന്റെ ഗന്ധം ലഹരിമരുന്നിന്റെ സാന്നിധ്യം തിരിച്ചറിയുന്നതിന് തടസ്സമാകുമെന്നും അന്വേഷണ വിഭാഗം വിലയിരുത്തുന്നു. ഇത്തരത്തിൽ കടത്തുന്ന ലഹരിവസ്തുക്കൾ അന്താരാഷ്ട്ര മയക്കുമരുന്ന് ശൃംഖലകളുമായി ബന്ധപ്പെട്ടതാണെന്നാണ് സൂചന.

ലഹരിക്കടത്തിനെതിരേ ‘ഓപ്പറേഷൻ തൂഫാൻ’ ശക്തമാക്കിയതിനു പിന്നാലെയാണ് കടൽമാർഗമുള്ള കടത്ത് വർധിച്ചതെന്നാണ് അന്വേഷണ ഏജൻസികളുടെ വിലയിരുത്തൽ. ശ്രീലങ്കയിൽനിന്ന് തമിഴ്നാട് തീരത്തേക്ക് മീൻപിടിത്ത ബോട്ടുകൾ വഴി സ്വർണം കടത്തിയ സംഭവങ്ങൾ നേരത്തെയും അന്വേഷണ ഏജൻസികൾ കണ്ടെത്തിയിട്ടുണ്ട്. ഒക്ടോബർ 16, 17 തീയതികളിൽ നാഗപട്ടണത്ത് നടത്തിയ പരിശോധനയിൽ 137 കിലോ ക്രിസ്റ്റൽ മെത്താംഫെറ്റമിൻ പിടിച്ചെടുത്തതും കടൽമാർഗമുള്ള ലഹരിക്കടത്തിന്റെ വ്യാപ്തി വ്യക്തമാക്കുന്നു. രഹസ്യാന്വേഷണ റിപ്പോർട്ടിലെ വിവരങ്ങൾ സംസ്ഥാന രഹസ്യാന്വേഷണ വിഭാഗത്തിനും കൈമാറിയിട്ടുണ്ട്. കടൽമാർഗമുള്ള ലഹരിയുടെയും സ്വർണത്തിന്റെയും കടത്ത് തടയാൻ തീരദേശ നിരീക്ഷണം ശക്തമാക്കേണ്ടതിന്റെ ആവശ്യകതയും ഇതോടെ ഉയരുകയാണ്.

കോഴിക്കോട്: ഓൺലൈൻ ബൈക്ക് ടാക്സിയിൽ യാത്ര ചെയ്യുന്നതിനിടെ ഇരുപതുകാരിയോട് ലൈംഗികാതിക്രമം നടത്തിയെന്ന പരാതിയിൽ ഡ്രൈവർ അറസ്റ്റിൽ. കോഴിക്കോട് മാങ്കാവ് സ്വദേശിയായ മുല്ലശ്ശേരി വീട്ടിൽ കെ.ടി. ജഗദീഷിനെയാണ് (49) മെഡിക്കൽ കോളേജ് പോലീസ് അറസ്റ്റ് ചെയ്തത്. നവംബർ നാലിന് ബുധനാഴ്ച ഉച്ചയോടെയായിരുന്നു സംഭവം. അരയിടത്തുപാലത്തുനിന്ന് കോട്ടൂളിയിലേക്ക് പോകുന്നതിനായി യുവതി ഓൺലൈൻ സംവിധാനത്തിലൂടെ ബൈക്ക് ടാക്സി ബുക്ക് ചെയ്യുകയായിരുന്നു.

യാത്രയ്ക്കിടെ ഡ്രൈവർ പലതവണ മോശമായി പെരുമാറുകയും ശരീരത്തിൽ അനുചിതമായി സ്പർശിക്കാൻ ശ്രമിക്കുകയും ചെയ്തെന്നാണ് യുവതിയുടെ പരാതി. സംഭവത്തെത്തുടർന്ന് യുവതി പോലീസിനെ സമീപിക്കുകയായിരുന്നു. പരാതിയുടെ അടിസ്ഥാനത്തിൽ മെഡിക്കൽ കോളേജ് പോലീസ് കേസെടുത്ത് അന്വേഷണം നടത്തി പ്രതിയെ അറസ്റ്റ് ചെയ്തു. നവംബർ ആറിന് വെള്ളിയാഴ്ചയാണ് അറസ്റ്റ് രേഖപ്പെടുത്തിയതെന്ന് മാധ്യമങ്ങൾ റിപ്പോർട്ട് ചെയ്തു. സംഭവത്തിൽ കൂടുതൽ അന്വേഷണം നടന്നുവരികയാണ്.

അതിനിടെ, ബൈക്ക് ടാക്സി യാത്രക്കാരുടെ സുരക്ഷയെക്കുറിച്ചുള്ള ആശങ്കകളും ഉയരുന്നുണ്ട്. സമാനമായ പരാതികളെ തുടർന്ന് ഈ വർഷം മേയിൽ തിരുവനന്തപുരത്തും ബൈക്ക് ടാക്സി ഡ്രൈവർക്കെതിരെ പോലീസ് കേസെടുത്തിരുന്നു. യാത്രക്കാരുടെ സൗകര്യത്തിനും സുരക്ഷയ്ക്കും പ്രാധാന്യം നൽകുന്നതിനൊപ്പം ഓൺലൈൻ ടാക്സി സേവനങ്ങളിൽ ഡ്രൈവർമാരുടെ പശ്ചാത്തല പരിശോധനയും സുരക്ഷാ സംവിധാനങ്ങളും ശക്തമാക്കണമെന്ന ആവശ്യവും ഇത്തരം സംഭവങ്ങൾ വീണ്ടും ഉയർത്തുന്നു .

ക്യാൻസർ ബാധിച്ച് ചികിത്സയിൽ കഴിയുന്ന കരിങ്കുന്നം സ്വദേശി ചൂരക്കാട്ട് ജോമോൻ ജോർജിന്റെ ചികിത്സാ സഹായത്തിനായി ഇടുക്കി ചാരിറ്റി ഗ്രൂപ്പ് യു.കെ. നടത്തിയ ധനസമാഹരണം അവസാനിച്ചു. ചാരിറ്റിയിലൂടെ 1,410 പൗണ്ട് (1,73,475 രൂപ) ലഭിച്ചതായി ഭാരവാഹികൾ അറിയിച്ചു. തൊടുപുഴ–കരിങ്കുന്നം പ്രദേശത്ത് ആംബുലൻസ് ഓടിച്ച് കുടുംബം പുലർത്തിയിരുന്ന ജോമോന്റെ ദുരിതാവസ്ഥ അറിഞ്ഞാണ് സഹായമെത്തിക്കാൻ ചാരിറ്റി ഗ്രൂപ്പ് മുന്നിട്ടിറങ്ങിയത്. സഹായിച്ച എല്ലാവർക്കും ഭാരവാഹികൾ നന്ദി അറിയിച്ചു. ലഭിച്ച തുകയുടെ ബാങ്ക് സ്റ്റേറ്റ്മെന്റിന്റെ സംഗ്രഹം പ്രസിദ്ധീകരിച്ചിട്ടുണ്ട്. സംഭാവന നൽകിയവർക്ക് ബാങ്കിന്റെ പൂർണ സ്റ്റേറ്റ്മെന്റ് വാട്സാപ്പിലൂടെ അയച്ചുനൽകും.

നിലവിൽ തിരുവനന്തപുരത്ത് ചികിത്സയിൽ കഴിയുന്ന ജോമോൻ, സഹായത്തുകയുടെ ചെക്ക് കരിങ്കുന്നം ലൈവ് ഉടമ ജെയിംസിനെ ഏൽപ്പിക്കണമെന്നാണ് അറിയിച്ചിരിക്കുന്നത്. ഇതനുസരിച്ച് മാഞ്ചസ്റ്ററിൽ താമസിക്കുന്ന കരിങ്കുന്നം സ്വദേശിയും ഇടുക്കി ചാരിറ്റി ഗ്രൂപ്പിന്റെ അഭ്യുദയകാംക്ഷിയുമായ ഷോയി ചെറിയാൻ ചെക്ക് ജെയിംസിന് കൈമാറും. ജോമോന്റെ രോഗവിവരം ഗ്രൂപ്പിനെ അറിയിച്ചത് സ്വിന്റണിൽ താമസിക്കുന്ന കരിങ്കുന്നം സ്വദേശി പ്രിൻസ് മാത്യു ഏലംന്താനത്താണ്. അദ്ദേഹത്തിനും ഭാരവാഹികൾ നന്ദി അറിയിച്ചു.

കേരളത്തിൽനിന്ന് യു.കെയിലേക്ക് കുടിയേറിയ, ജീവിതത്തിലെ കഷ്ടപ്പാടുകളും ബുദ്ധിമുട്ടുകളും നേരിട്ട് അറിഞ്ഞവരുടെ കൂട്ടായ്മയാണ് ഇടുക്കി ചാരിറ്റി ഗ്രൂപ്പ് യു.കെ. ജാതി, മത, വർഗ, വർണ, ദേശ വ്യത്യാസങ്ങളില്ലാതെ കേരളത്തിലും യു.കെയിലുമായി നടത്തിയ ജീവകാരുണ്യ പ്രവർത്തനങ്ങളിലൂടെ ഇതുവരെ ഏകദേശം 1.84 കോടി രൂപയുടെ സഹായം നൽകാൻ കഴിഞ്ഞതായി ഗ്രൂപ്പ് അറിയിച്ചു. ലണ്ടനിലെ ഒരു കാരവൻ പാർക്കിൽ കടുത്ത പ്രതിസന്ധിയിലായിരുന്ന കുടുംബത്തിന് 31 ലക്ഷം രൂപ സമാഹരിച്ച് നൽകിയതാണ് ഗ്രൂപ്പിന്റെ ഏറ്റവും വലിയ സഹായപ്രവർത്തനങ്ങളിലൊന്ന്. സാബു ഫിലിപ്പ് (07708181997), ടോം ജോസ് തടിയംപാട് (07859060320), സജി തോമസ് (07803276626) എന്നിവരാണ് ഗ്രൂപ്പിന് നേതൃത്വം നൽകുന്നത്. തമ്പി ജോസാണ് രക്ഷാധികാരി.

അമേരിക്കയിലെ ഏറ്റവും ജനസംഖ്യയുള്ള രണ്ടാമത്തെ നഗരമായ ലോസ് ആഞ്ചലസിന്റെ പുതിയ മേയറായി തിരഞ്ഞെടുക്കപ്പെട്ട നിത്യ രാമന് കേരളവുമായി അടുത്ത ബന്ധം. നിലവിലെ മേയർ കാരൻ ബാസിനെ പരാജയപ്പെടുത്തിയാണ് 45-കാരിയായ നിത്യ അധികാരത്തിലെത്തിയത്. ഇന്ത്യൻ വംശജർ അമേരിക്കൻ രാഷ്ട്രീയത്തിൽ ശ്രദ്ധേയമായ നേട്ടങ്ങൾ കൈവരിക്കുന്നതിനിടെയാണ് നിത്യയുടെ വിജയവും ശ്രദ്ധ നേടുന്നത്. ഡെമോക്രാറ്റിക് സോഷ്യലിസ്റ്റ്സ് ഓഫ് അമേരിക്ക (DSA) അംഗം കൂടിയാണ് അവർ.

കേരളത്തിൽ ജനിച്ച നിത്യയുടെ ബാല്യകാലം തിരുവനന്തപുരം, തൃശൂർ എന്നീ നഗരങ്ങളിലായാണ് ചെലവഴിച്ചത്. പിതാവ് വെങ്കിട്ടരാമന്റെ സ്വദേശം തിരുവനന്തപുരവും മാതാവ് സുധയുടെ സ്വദേശം തൃശൂരുമാണ്. പിതാവ് കെൽട്രോണിലും മാതാവ് ഇന്ത്യൻ ഓവർസീസ് ബാങ്കിലും ജോലി ചെയ്തിരുന്നു. മികച്ച അവസരങ്ങൾ തേടി നിത്യയ്ക്ക് ആറു വയസ്സുള്ളപ്പോൾ കുടുംബം അമേരിക്കയിലേക്ക് കുടിയേറി.

അമേരിക്കയിലേക്ക് താമസം മാറിയെങ്കിലും സാമൂഹിക പ്രവർത്തനങ്ങളോടുള്ള താൽപര്യം നിത്യ കൈവിട്ടില്ല. ഇന്ത്യയിലെ വിവിധ നഗരങ്ങളിലും അവർ സജീവമായ പൗരപ്രവർത്തനങ്ങൾക്ക് നേതൃത്വം നൽകിയിട്ടുണ്ട്. നഗരങ്ങളിലെ അടിസ്ഥാന സൗകര്യങ്ങൾ, പൊതുജനങ്ങളുടെ ജീവിതസാഹചര്യങ്ങൾ തുടങ്ങിയ വിഷയങ്ങളിൽ ഇടപെട്ട് ശ്രദ്ധ നേടിയ നിത്യയുടെ രാഷ്ട്രീയ യാത്രയാണ് ഇപ്പോൾ ലോസ് ആഞ്ചലസ് മേയർ പദവിയിലെത്തിയിരിക്കുന്നത്.

കൊച്ചി: നെടുമ്പാശ്ശേരി വാഹനാപകട കേസിൽ ഒന്നാം പ്രതി സുഹൈൽ സജീവിനെ ഒഴികെ മറ്റ് മൂന്ന് പ്രതികൾക്കും കോടതി ജാമ്യം അനുവദിച്ചു. ശക്തമായ വാദപ്രതിവാദങ്ങൾക്കൊടുവിലാണ് കോടതിയുടെ നടപടി. കേസിൽ പ്രതികളായ മൂന്ന് പേർക്കും ജാമ്യം ലഭിച്ചതോടെ സുഹൈൽ സജീവ് മാത്രമാണ് നിലവിൽ ജുഡീഷ്യൽ കസ്റ്റഡിയിൽ തുടരുന്നത്.

സുഹൈൽ സജീവിനെ നവംബർ 16ന് മോചിപ്പിക്കാമെന്നും കോടതി ഉത്തരവിട്ടു. അതിനുമുമ്പ് കേസിലെ അന്വേഷണം പൂർത്തിയാക്കണമെന്ന് പ്രോസിക്യൂഷനോട് കോടതി നിർദേശിച്ചു. അന്വേഷണ നടപടികൾ സമയബന്ധിതമായി പൂർത്തിയാക്കണമെന്ന നിർദേശത്തോടെയാണ് കോടതിയുടെ ഉത്തരവ്.

കേസിൽ ഒന്നാം പ്രതിയായ സുഹൈൽ സജീവിന്റെ ജാമ്യവുമായി ബന്ധപ്പെട്ട തുടർനടപടികളും അന്വേഷണ പുരോഗതിയും ഇനി നിർണായകമാകും.

ബർമിംഗ്ഹാം: യുകെയിലെ ബർമിംഗ്ഹാമിലുള്ള ഹോളിഡേ ഇൻ ഹോട്ടലിൽ 2026 ഒക്ടോബർ 31-ന് ലയൺസ് ക്ലബ് കൊച്ചി യൂറോപ്പിന്റെ ഗ്രാൻഡ് ഇൻസ്റ്റലേഷൻ ചടങ്ങ് പ്രൗഢഗംഭീരമായി നടന്നു.

ലയൺസ് ഡിസ്ട്രിക്ട് ഗവർണർ ലയൺ വി. എസ്. ജയേഷ് ചടങ്ങ് ഉദ്ഘാടനം ചെയ്തു. ഇൻസ്റ്റലേഷൻ ചടങ്ങിന് ലയൺ വി. അമർനാഥ് നേതൃത്വം നൽകി. റീജിയൻ ചെയർപേഴ്സൺ ലയൺ സോണി എബ്രഹാം മുഖ്യാതിഥിയായി പങ്കെടുത്ത് പുതിയ ഭാരവാഹികളെയും അംഗങ്ങളെയും ഇൻഡക്റ്റ് ചെയ്തു.

ലയൺസ് ക്ലബ് കൊച്ചി യൂറോപ്പിന്റെ പ്രസിഡന്റായി ലയൺ ഷോയ് കുര്യാക്കോസ് ചുമതലയേറ്റു. സെക്രട്ടറി ലയൺ ജിതേഷ് നായരും, ട്രഷററായി ലയൺ ജിബുവും സ്ഥാനമേറ്റു.

ചടങ്ങിൽ ലയൺസ് ക്ലബ് കോതമംഗലം മദർ ക്ലബ്ബിന്റെ പ്രസിഡന്റ് ലയൺ സജി കെ. മാത്യു, സെക്രട്ടറി ലയൺ സോണി കുര്യാക്കോസ് എന്നിവരും പങ്കെടുത്തു.

യൂറോപ്പിലെ മലയാളി സമൂഹത്തിന്റെ സാമൂഹിക സേവന രംഗത്തെ ഒരു പുതിയ സംരംഭമാണ് ലയൺസ് ക്ലബ് കൊച്ചി യൂറോപ്പ്. വരും നാളുകളിൽ വിവിധ ചാരിറ്റി പ്രവർത്തനങ്ങളിലൂടെയും സാമൂഹിക സേവനങ്ങളിലൂടെയും കൂടുതൽ സജീവമായി മുന്നോട്ടുപോകുമെന്ന് ഭാരവാഹികൾ അറിയിച്ചു.

തുടർന്ന് നടന്ന സൗഹൃദ സംഗമത്തിൽ ഹോൺചർച്ച് ക്ലബ്ബിലെ ലയൺ പോൾ കോര ക്ലബ്ബിന്റെ പ്രവർത്തനങ്ങളെക്കുറിച്ചും ലയൺസ് പ്രസ്ഥാനത്തിന്റെ സേവന ലക്ഷ്യങ്ങളെക്കുറിച്ചും വിശദീകരിച്ചു.

നിരവധി അംഗങ്ങളുടെ സാന്നിധ്യത്തിൽ നടന്ന ചടങ്ങ് വിജയകരമായി സമാപിച്ചു.

ഇന്ത്യൻ സിനിമാ ചരിത്രത്തിലെ ഏറ്റവും ചെലവേറിയ ചിത്രമെന്ന വിശേഷണവുമായി ‘രാമായണ: റൈസ് ഓഫ് എ ലെജൻഡ്’ ലോകമെമ്പാടുമുള്ള തിയറ്ററുകളിലെത്തി. ഏകദേശം 500 ദശലക്ഷം ഡോളർ (4,500 കോടിയിലേറെ രൂപ) ചെലവിട്ട് രണ്ടു ഭാഗങ്ങളായി ഒരുക്കുന്ന ചിത്രത്തിന്റെ ആദ്യ ഭാഗമാണ് ഇപ്പോൾ റിലീസ് ചെയ്തത്. നിതേഷ് തിവാരി സംവിധാനം ചെയ്യുന്ന ചിത്രത്തിൽ രൺബീർ കപൂറാണ് ശ്രീരാമനായി എത്തുന്നത്. സീതയായി സായ് പല്ലവിയും രാവണനായി യഷും വേഷമിടുന്നു. ഹോളിവുഡിലെ പ്രമുഖ വിഷ്വൽ ഇഫക്ട്സ് വിദഗ്ധരുടെ സാങ്കേതിക മികവിനൊപ്പം എ.ആർ. റഹ്മാനും ഹാൻസ് സിമ്മറും ചേർന്നാണ് സംഗീതം ഒരുക്കിയിരിക്കുന്നത്.

വമ്പൻ ദൃശ്യവിസ്മയത്തിന് പ്രശംസ ലഭിക്കുന്നുണ്ടെങ്കിലും ചിത്രത്തിന് നിരൂപകർക്കിടയിൽ സമ്മിശ്ര പ്രതികരണമാണ്. ചിലർ ചിത്രത്തിന്റെ ദൃശ്യഭംഗിയെയും താരങ്ങളുടെ പ്രകടനത്തെയും അഭിനന്ദിച്ചപ്പോൾ മറ്റുചിലർ കഥയുടെ ആഴക്കുറവും ആക്ഷൻ രംഗങ്ങളും കമ്പ്യൂട്ടർ ഗ്രാഫിക്സും വിമർശിച്ചു. ഇംഗ്ലീഷ് പതിപ്പിൽ താരങ്ങളുടെ ചുണ്ടുകളുടെ ചലനം കൃത്രിമബുദ്ധി ഉപയോഗിച്ച് ക്രമീകരിച്ചതും വിമർശനത്തിന് ഇടയാക്കിയിട്ടുണ്ട്. ചിത്രത്തിന്റെ രണ്ടാം ഭാഗം അടുത്ത വർഷം പുറത്തിറങ്ങും.

1987-ൽ രാമാനന്ദ് സാഗർ ഒരുക്കിയ ടെലിവിഷൻ പരമ്പര സൃഷ്ടിച്ച വലിയ ജനപ്രീതിയും പുതിയ ചിത്രത്തിന് മുന്നിലുള്ള പ്രധാന വെല്ലുവിളിയാണ്. അന്ന് ഞായറാഴ്ചകളിൽ രാമായണം കാണാൻ തെരുവുകളും കടകളും വരെ നിശ്ചലമായിരുന്നുവെന്നത് പരമ്പരയുടെ സ്വാധീനത്തിന്റെ തെളിവാണ്. അതേസമയം, മതവികാരങ്ങളും രാഷ്ട്രീയ സാഹചര്യങ്ങളും ഏറെ പ്രാധാന്യമുള്ള ഇന്നത്തെ ഇന്ത്യയിൽ ഇതിഹാസത്തെ എങ്ങനെ അവതരിപ്പിക്കുന്നു എന്നതും ശ്രദ്ധേയമാണ്. ‘ആദിപുരുഷ്’ നേരിട്ട വിവാദങ്ങളുടെ പശ്ചാത്തലത്തിൽ പുതിയ ചിത്രത്തിന്റെ സ്വീകരണം എങ്ങനെയാകുമെന്ന ആകാംക്ഷയിലാണ് സിനിമാലോകം.

തിരുവനന്തപുരം ശ്രീകാര്യത്തെ പാങ്ങപ്പാറയിൽ പ്ലസ് വൺ വിദ്യാർഥി അഭിരാം കൊല്ലപ്പെട്ട കേസിൽ നിർണായക വിവരങ്ങൾ പുറത്ത്. കേസിലെ മൂന്നാം പ്രതിയായ ആനന്ദയുടെ സ്വകാര്യദൃശ്യങ്ങൾ പ്രചരിച്ചതാണ് കൊലപാതകത്തിന് പിന്നിലെ വൈരാഗ്യത്തിന് കാരണമെന്നാണ് പോലീസിന്റെ പ്രാഥമിക നിഗമനം. ഒന്നാം പ്രതിയായ 17-കാരന്റെ കാമുകിയായ ആനന്ദയുടെ സ്വകാര്യദൃശ്യങ്ങൾ പ്രചരിപ്പിച്ചത് അഭിരാമിന്റെ സുഹൃത്താണെന്ന് പ്രതികൾ വിശ്വസിച്ചിരുന്നു. അഭിരാമിന്റെ സഹായത്തോടെ ഈ സുഹൃത്തിനെ വിളിച്ചുവരുത്തി കൊലപ്പെടുത്താനായിരുന്നു ആദ്യ പദ്ധതി എന്നാണ് സുഹൃത്തുക്കൾ പോലീസിന് നൽകിയ മൊഴി.

എന്നാൽ, സ്വകാര്യദൃശ്യങ്ങൾ പ്രചരിച്ചതുമായി ബന്ധപ്പെട്ട വിവരങ്ങൾ അറിയാമായിരുന്ന അഭിരാമിനെയും കൊലപ്പെടുത്താൻ സംഘം പദ്ധതിയിട്ടിരുന്നതായാണ് പോലീസിന്റെ സംശയം. ഇതോടെ ഇരട്ടക്കൊലപാതകത്തിനാണ് പ്രതികൾ ആസൂത്രണം നടത്തിയതെന്ന നിഗമനത്തിലാണ് അന്വേഷണസംഘം. കേസിലെ പ്രതികളായ 17-കാരനെയും ആനന്ദയെയും കസ്റ്റഡിയിൽ വാങ്ങി ചോദ്യം ചെയ്യാനും പോലീസ് നീക്കം നടത്തുന്നുണ്ട്. രണ്ടാം പ്രതിയായ ഉമറിന്റെ കാമുകിയും നാലാം പ്രതിയുമായ ഐശ്വര്യയിൽനിന്നും കൂടുതൽ വിവരങ്ങൾ തേടിയിട്ടുണ്ട്.

അഭിരാമിന്റെ ഇൻസ്റ്റഗ്രാം അക്കൗണ്ടിൽനിന്ന് നിരവധി ചാറ്റുകൾ അപ്രത്യക്ഷമായതായി സൈബർ സെൽ കണ്ടെത്തി. ഇവ എങ്ങനെ നീക്കം ചെയ്തുവെന്നാണ് പോലീസ് പരിശോധിക്കുന്നത്. കൊലപാതകത്തിന് തലേദിവസം മറ്റൊരു സംഘം അഭിരാമിനെ തടഞ്ഞുനിർത്തി തർക്കിക്കുന്നതിന്റെ ദൃശ്യങ്ങളും പുറത്തുവന്നിട്ടുണ്ട്. വാട്‌സാപ്പ് ഗ്രൂപ്പുകളിൽ പ്രചരിച്ച ഈ ദൃശ്യങ്ങളിലുള്ളവരെ കണ്ടെത്താനുള്ള ശ്രമത്തിലാണ് പോലീസ്. കൊലപാതകത്തിലേക്ക് നയിച്ച കൂടുതൽ വിവരങ്ങൾ ലഭിക്കുമെന്ന പ്രതീക്ഷയിൽ അഭിരാമിന്റെ മൊബൈൽ ഫോണിനായും തിരച്ചിൽ തുടരുകയാണ്.cor

ഓച്ചിറയിൽ 16 വയസ്സുകാരിയെ ലൈംഗികമായി പീഡിപ്പിച്ച കേസിൽ അറസ്റ്റിലായ മതപ്രഭാഷകനും വ്ലോഗറുമായ മുഹമ്മദ് നിയാസിനെതിരെ (34) വീണ്ടും പരാതി. കൊല്ലം സ്വദേശിനിയായ യുവതിയാണ് സമാന രീതിയിൽ തനിക്ക് ദുരനുഭവമുണ്ടായെന്ന് ആരോപിച്ച് രംഗത്തെത്തിയത്. മതപ്രഭാഷകനും മോട്ടിവേഷൻ സ്പീക്കറുമായാണ് നിയാസിനെ പരിചയപ്പെട്ടതെന്നും പിന്നീട് ഫോൺ സംഭാഷണങ്ങളിലൂടെ ലൈംഗികച്ചുവയുള്ള പരാമർശങ്ങൾ നടത്തിയെന്നും യുവതി ആരോപിക്കുന്നു. വ്യക്തിപരമായ പ്രശ്നങ്ങൾ പരിഹരിക്കാമെന്ന് വാഗ്ദാനം ചെയ്ത് അടുപ്പം സ്ഥാപിച്ചശേഷമായിരുന്നു മോശമായ പെരുമാറ്റമെന്നും പരാതിയിലുണ്ട്. പുതിയ പരാതി പരിശോധിച്ചുവരികയാണെന്ന് പൊലീസ് അറിയിച്ചു.

അതേസമയം, പ്രായപൂർത്തിയാകാത്ത പെൺകുട്ടിയെ പീഡിപ്പിച്ച കേസിൽ അന്വേഷണസംഘത്തിന് നിർണായകമായ ഡിജിറ്റൽ തെളിവുകൾ ലഭിച്ചിട്ടുണ്ട്. പെൺകുട്ടിയുമായുള്ള ഫോൺ സംഭാഷണങ്ങളും ശബ്ദസന്ദേശങ്ങളും ഇതിൽ ഉൾപ്പെടുന്നു. 2025 ഒക്ടോബർ മുതൽ തിരുവനന്തപുരം സ്വദേശിയായ 65 വയസ്സുള്ള മുത്തശ്ശിയോടൊപ്പം എത്തിയ പെൺകുട്ടിയെ വിവിധ സ്ഥലങ്ങളിൽവച്ച് പീഡിപ്പിച്ചെന്നാണ് കേസ്. മുത്തശ്ശിയുടെ രോഗവും ബാധയും മാറ്റാമെന്ന് വിശ്വസിപ്പിച്ചാണ് പ്രതി പെൺകുട്ടിയെ സമീപിച്ചതെന്നാണ് പൊലീസ് പറയുന്നത്. ഓച്ചിറ മേമനയിലെ മതപഠനകേന്ദ്രത്തിലും പ്രതി വാടകയ്ക്ക് താമസിച്ചിരുന്ന വീട്ടിലും അതിക്രമം നടന്നതായി പരാതിയിലുണ്ട്. സംഭവത്തെക്കുറിച്ച് പുറത്തുപറയരുതെന്ന് പെൺകുട്ടിയോട് ആവശ്യപ്പെടുന്ന ഫോൺ സംഭാഷണങ്ങളും അന്വേഷണസംഘത്തിന് ലഭിച്ചിട്ടുണ്ട്.

കൂടുതൽ പെൺകുട്ടികൾക്ക് സമാനമായ അനുഭവങ്ങളുണ്ടായിട്ടുണ്ടോയെന്നും പൊലീസ് അന്വേഷിക്കുന്നുണ്ട്. പ്രതി നടത്തിയിരുന്ന മേമനയിലെ മതപഠനകേന്ദ്രത്തിൽ ഒൻപത് പെൺകുട്ടികളടക്കം 40 വിദ്യാർഥികളാണ് താമസിച്ച് പഠിച്ചിരുന്നത്. കുട്ടികൾക്ക് കൗൺസലിങ് നൽകുന്നതിനും മൊഴി രേഖപ്പെടുത്തുന്നതിനും പൊലീസ് നടപടി ആരംഭിച്ചു. ചൈൽഡ് വെൽഫെയർ കമ്മിറ്റി വിദ്യാർഥികളുടെ വിവരങ്ങൾ ശേഖരിച്ചിട്ടുണ്ട്. ഐസിഡിഎസ് സൂപ്പർവൈസർ, പഞ്ചായത്ത് ജാഗ്രതാ സമിതി, പൊലീസ് എന്നിവരുടെ നേതൃത്വത്തിൽ സ്ഥാപനം അടപ്പിച്ചിരുന്നു. സ്ഥാപനത്തിന്റെ പേരിൽ നടത്തിയ സാമ്പത്തിക ഇടപാടുകൾ, ഭൂമി വാങ്ങൽ തുടങ്ങിയ കാര്യങ്ങളിലും അന്വേഷണം പുരോഗമിക്കുകയാണ്. കരുനാഗപ്പള്ളി എസിപി ആർ. വിനോദ് കുമാറിന്റെ നേതൃത്വത്തിലുള്ള സംഘമാണ് കേസ് അന്വേഷിക്കുന്നത്.