പ്ലഗ്ഗിൽ കുത്തിയിട്ടു ചാർജ് ചെയ്തുകൊണ്ട് മൊബൈൽ ഫോണ് ഉപയോഗിക്കുന്നതിനിടെ, സ്മാർട്ഫോണ് പൊട്ടിത്തെറിച്ച് കൗമാരക്കാരി കൊല്ലപ്പെട്ടു. കിഴക്കൻ ഒഡീഷയിലെ ഖേരകാനിയിൽ ഉമ ഒറം എന്ന പതിനെട്ടുകാരിയാണ് മരിച്ചത്.
ചാർജ് ചെയ്തുകൊണ്ട് സുഹൃത്തിനോട് ഫോണിൽ സംസാരിക്കുന്നതിനിടെയിലായിരുന്നു അപകടം. കൈ, നെഞ്ച്, കാല് ഭാഗങ്ങളിൽ മാരകമായി പരിക്കേറ്റ പെണ്കുട്ടിയെ ഉടൻ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. ഫോണിന്റെ ബാറ്ററി പൊട്ടിത്തെറിച്ചതാണ് അപകടത്തിന് കാരണമായത്.
ഫോണിലെ ചാർജ് തീർന്നതിനെ തുടർന്നാണ് പ്ലഗ്ഗിൽ കുത്തിയിട്ടു ഫോണ് ഉപയോഗിച്ചതെന്ന് ഉമയുടെ സഹോദരൻ പറഞ്ഞു. പെണ്കുട്ടിയുടെ കൈയിലുണ്ടായിരുന്നത് വ്യാജ ഫോണാണെന്ന് സംശയിക്കുന്നു.
Girl, 18, is killed when her smartphone EXPLODES while she was talking on it in India https://t.co/XJgYqboAoL
— Daily Mail Online (@MailOnline) March 19, 2018
ഫാ. ബിജു കുന്നയ്ക്കാട്ട് പി.ആര്.ഒ
പ്രസ്റ്റണ്: ഗ്രേറ്റ് ബ്രിട്ടണ് സീറോ മലബാര് രൂപതയെക്കുറിച്ച് ദൈവത്തിന് വ്യക്തമായ പദ്ധതികളുണ്ടെന്നും ആ പദ്ധതികളോട് വി. യൗസേപ്പിനെപ്പോലെ സഹകരിക്കാന് സഭാ മക്കളെല്ലാവരും തയ്യാറാകണമെന്നും രൂപതാധ്യക്ഷന് മാര് ജോസഫ് സ്രാമ്പിക്കല്. വി. യൗസേപ്പിതാവിന്റെ മരണത്തിരുനാള് ദിവസമായ ഇന്നലെ പ്രസ്റ്റണ് സെന്റ് അല്ഫോന്സാ കത്തീഡ്രല് ദേവാലയത്തില് ഒത്തുകൂടിയ വിശ്വാസ സമൂഹത്തോട് ദിവ്യബലി മദ്ധ്യേ സംസാരിക്കുകയായിരുന്നു അദ്ദേഹം. ഗ്രേറ്റ് ബ്രിട്ടണ് രൂപതയില് വരുന്ന ഒരു വര്ഷത്തേക്ക് തിരുക്കര്മ്മങ്ങള്ക്ക് ഉപയോഗിക്കാനുള്ള മൂറോന് (വി. തൈലം) കൂദാശയ്ക്കും വൈദിക വിശ്വാസ പ്രതിനിധികളുടെ സമ്മേളനത്തിനുമായാണ് ഇന്നലെ വിശ്വാസ സമൂഹം പ്രസ്റ്റണ് കത്തീഡ്രലില് ഒത്തുകൂടിയത്.
രാവിലെ ദിവ്യബലിക്കു മുമ്പായി കത്തീഡ്രല് വികാരി റവ. ഡോ. മാത്യൂ ചൂരപൊയ്കയില് എല്ലാവര്ക്കും സ്വാഗതമാശംസിച്ചു. ദിവ്യബലിമധ്യേ പ്രധാന കാര്മ്മികനായിരുന്ന മാര് ജോസഫ് സ്രാമ്പിക്കല് മൂറോന് കൂദാശ കര്മ്മം നടത്തി. കാത്തോലിക്കാ തിരുസഭയുടെ പാരമ്പര്യമനുസരിച്ച് ഓരോ രൂപതയുടെയും മെത്രാനാണ് ഈ കൂദാശ കര്മ്മം നിര്വ്വഹിക്കേണ്ടത്. മനുഷ്യത്വത്തെ അഭിഷേകം ചെയ്യുന്ന ദൈവത്വത്തിന്റെ സാന്നിധ്യമാണ് ഈ വി. തൈലത്തില് സഭാ മക്കള് അനുഭവിക്കുന്നതെന്ന് വചനസന്ദേശത്തില് ബിഷപ്പ് അനുസ്മരിച്ചു. ദൈവം തിരുമനസാകുന്നങ്കില് ഈ അഭിഷേക തൈലത്താല് നിരവധി കുഞ്ഞുങ്ങളും പുതിയ ദേവാലയങ്ങളും അഭിഷേകം ചെയ്യപ്പെടാന് ഇടയാകട്ടെയെന്നും അദ്ദേഹം പ്രത്യാശ പ്രകടിപ്പിച്ചു.
വി. കുര്ബാനയുടെ സമാപനത്തില് വി. യൗസേപ്പിതാവിനോടുള്ള തിരുനാള് ലദീഞ്ഞു പ്രാര്ത്ഥന നടന്നു. കത്തീഡ്രല് ദേവാലയത്തില് ഇന്നലെ പ്രതിഷ്ഠിച്ച, ഭാരതത്തിലെ പ്രഥമ രക്തസാക്ഷിണിയായ വാഴ്ത്തപ്പെട്ട സി. റാണി മരിയായുടെ തിരുശേഷിപ്പും വി. യൗസേപ്പിതാവിന്റെ തിരുസ്വരൂപവും ധൂപാര്ച്ചന നടത്തി. തിരുക്കര്മ്മങ്ങളുടെ സമാപനത്തില് സഭാ സമൂഹത്തെ പ്രതിനിധീകരിച്ച് പ്രോട്ടോ സിഞ്ചെല്ലൂസ് (മുഖ്യ വികാരി ജനറല്) റവ. ഡോ. തോമസ് പാറയടിയില് എം.എസ്.ടി അഭിവന്ദ്യ പിതാവിന് തിരുനാള് മംഗളങ്ങള് നേര്ന്നു സംസാരിച്ചു.
ഉച്ചകഴിഞ്ഞു നടന്ന വൈദിക സമ്മേളനത്തില് രൂപതയുടെ വളര്ച്ചയിലെ പ്രധാന നാഴികക്കല്ലായ മിഷന്/ പാരിഷ് സെന്ററുകളെക്കുറിച്ചുള്ള ആശയാവിഷ്കാരം നടത്തി. പാസ്റ്ററല് കോ – ഓര്ഡിനേറ്റര് റവ. ഫാ. ടോണി പഴയകളം സിഎസ്ടിയാണ് ഇത് അവതരിപ്പിച്ചത്. വൈദിക സമിതിയുടെ മുമ്പില് നടന്ന അവതരണത്തിനും ചര്ച്ചകള്ക്കും ശേഷം ഇത് വൈദിക – അല്മായ സംയുക്ത പ്രതിനിധി അംഗങ്ങളുടെ മുമ്പിലും അവതരിപ്പിക്കപ്പെട്ടു. ഭാവിയില് പ്രാവര്ത്തികമാക്കാനുദ്ദേശിക്കുന്ന മിഷന്/പാരിഷ് ആശയപ്രകാരം ഇപ്പോഴുള്ള 173 വി. കുര്ബാന സെന്ററുകള് 61 സീറോ മലബാര് മിഷന് സെന്ററുകളും ഉള്പ്പെടെ രൂപതയുടെ 76 മിഷന് സെന്ററുകളായി പുനഃക്രമീകരിക്കപ്പെട്ടു. 2018 ഡിസംബര് 2ന് ഔദ്യോഗികമായി നിലവില് വരുന്ന ഈ സംവിധാനത്തെക്കുറിച്ച് വിശദമായി പഠിക്കാനും ആവശ്യമായ ക്രമീകരണങ്ങള് ചെയ്യുവാനും വരുന്ന ഒന്പത് മാസത്തെ സാവകാശമുണ്ടായിരിക്കുമെന്ന് രൂപതാധ്യക്ഷന് അറിയിച്ചു.
ഭാരതത്തിനു പുറത്തുള്ള മറ്റു സീറോ മലബാര് രൂപതകളില് വളരെ വിജയപ്രദമായും വിശ്വാസികള്ക്കു സഹായകരമായും രൂപീകരിച്ചിട്ടുള്ള ഇത്തരം മിഷന് വി. കുര്ബാന കേന്ദ്രങ്ങള് ഗ്രേറ്റ് ബ്രിട്ടണ് സീറോ മലബാര് വിശ്വാസ സമൂഹത്തിനും ഏറെ പ്രയോജനകരമാകുമെന്ന് മാര് സ്രാമ്പിക്കല് പ്രത്യാശ പ്രകടിപ്പിച്ചു. ഓരോ മിഷന്/പാരിഷ് കേന്ദ്രങ്ങള്ക്കും നേതൃത്വം നല്കുന്ന വൈദികരെയും മാര് സ്രാമ്പിക്കല് നിയമിച്ചു.
തിരുക്കര്മ്മങ്ങള്ക്ക് മാര് സ്രാമ്പിക്കലിനോടൊപ്പം വികാരി ജനറാള്മാരായ റവ. ഡോ. തോമസ് പാറയടിയില് എംഎസ്ടി, റവ. സജിമോന് മലയില് പുത്തന്പുരയില്, റവ. മാത്യൂ ചൂരപൊയ്കയില്, രൂപതാ ചാന്സലര് റവ. ഡോ. മാത്യു പിണക്കാട്ട്, പാസ്റ്ററല് കോ ഓര്ഡിനേറ്റര് റവ. ഫാ. ടോണി പഴയകളം സിഎസ്ടി, സെക്രട്ടറി റവ. ഫാ. ഫാന്സ്വാ പത്തില് തുടങ്ങിയവരും രൂപതയുടെ വിവിധ വി. കുര്ബാന കേന്ദ്രങ്ങളില് ശുശ്രൂഷ ചെയ്യുന്ന വൈദികര്, ഡീക്കന്മാര്, സിസ്റ്റേഴ്സ്, വൈദിക വിദ്യാര്ത്ഥികള്, ഓരോ വി. കുര്ബാന സെന്ററുകളില് നിന്നുമുള്ള കൈക്കാരന്മാര്, കമ്മിറ്റിയംഗങ്ങള്, മതാധ്യാപകര്, വിവിധ സംഘടനാ പ്രതിനിധികള് തുടങ്ങിയവര് സാക്ഷ്യം വഹിച്ചു. രൂപതാ ഗായകസംഘത്തിനു നേതൃത്വം നല്കുന്ന റവ. ഫാ. സെബാസ്റ്റ്യന് ചാമക്കാലയുടെ നേതൃത്വത്തിലുള്ള ഗായകസംഘം തിരുക്കര്മ്മങ്ങളെ ഭക്തിസാന്ദ്രമാക്കി.
നാലുവയസുകാരിയെ പീഡിപ്പിച്ച പ്രതി അറസ്റ്റിൽ. മലപ്പുറം വാഴക്കാടിലാണ് നാലു വയസുകാരിയെ പീഡിപ്പിച്ച അരീക്കോട് വിളയില്ചാലില് ഉണ്ണിയെ നാട്ടുകാര് ഒാടിച്ചിട്ടു പിടികൂടി പൊലീസില് ഏല്പിപ്പിച്ചത്. കല്ല്യാണ വീട്ടിലെ കുളിമുറിയില് കയറിയാണ് നാലു വയസുകാരിയെ പ്രതി പീഡനത്തിന് ഇരയാക്കിയത്. കരച്ചില് കേട്ടെത്തിയ കുട്ടിയുടെ അമ്മയാണ് രക്ഷപ്പെടുത്തിയത്. പിടികൂടാനുളള ശ്രമത്തിനിടെ അമ്മയെ തട്ടിവീഴ്ത്തി പ്രതി ഒാടി രക്ഷപ്പെടുകയായിരുന്നു.
തിരുവനന്തപുരം പോത്തന്കോടുള്ള ആയുര്വേദ ആശുപത്രിയില് ചികിത്സയ്ക്കെത്തിയ വിദേശ വനിതയുടെ തിരോധാനത്തിന് ഒരാഴ്ച തികഞ്ഞിട്ടും കണ്ടെത്താനാകാതെ പൊലീസ്. വിഷാദ രോഗത്തിന്റെ ചികിത്സയ്ക്കായാണ് കഴിഞ്ഞ മാസം 21ന് അയർലന്റുകാരിയായ ലിഗ സ്ക്രോമെനും സഹോദരി ലിൽസിയും പോത്തൻകോട് അരുവിക്കരകോണത്തുള്ള ആശുപത്രിയിലെത്തുന്നത്. ഫോണും പാസ്പോർട്ടുമെല്ലാം ഉപേക്ഷിച്ച് ഒരു ഓട്ടോയിൽ കയറി കോവളത്തുപോയ ലിഗയെ കുറിച്ച് പിന്നീട് ഒരു അറിവുമില്ലെന്നാണ് സഹോദരിയുടെ പരാതി. ലിഗയെ എത്രയും പെട്ടെന്ന് കണ്ടെത്താനുള്ള നടപടി സ്വീകരിക്കണമെന്നാവശ്യപ്പെട്ട് മുഖ്യമന്ത്രിക്കും എംബസിയ്ക്കും ബന്ധുകൾ പരാതി നൽകിയിരുന്നു. എന്നാൽ ഇതുകൊണ്ടൊന്നും പ്രയോജനം ലഭിക്കാത്തതിനെ തുടർന്ന് ലിഗയെ കണ്ടെത്താൻ ശ്രമിക്കുന്നവർക്ക് ഒരു ലക്ഷം രൂപ പാരിതോഷികം പ്രഖ്യാപിച്ചിരിക്കുകയാണ് ബന്ധുക്കൾ.
അതേസമയം, അന്വേഷണം ഊർജ്ജിതമായി നടക്കുന്നുണ്ടെന്നാണ് പൊലീസ് പറയുന്നത്. കഴിഞ്ഞ ദിവസം ഓച്ചിറയിൽ വച്ച് ലിഗയെ ചിലർ കണ്ടെന്നുള്ള വിവരം ലഭിച്ചതിനെ തുടർന്ന് പോത്തൻകോട് എസ്.ഐയും സംഘവും അവിടെ എത്തി തിരച്ചിൽ നടത്തിയെങ്കിലും കണ്ടെത്താൻ കഴിഞ്ഞില്ല. നീല നിറത്തിലുള്ള ടീ ഷർട്ടും കറുത്ത ലെഗിൻസുമാണ് കാണാതാകുമ്പോൾ ലിഗ ധരിച്ചിരുന്നത്. ഇവരെക്കുറിച്ച് എന്തെങ്കിലും വിവരം ലഭിക്കുന്നവർ 0471 – 2716100 , 9497980148 എന്നീ ഫോൺ നമ്പരുകളിൽ ബന്ധപ്പെടണമെന്ന് പോത്തൻകോട് പൊലീസ് അറിയിച്ചു. മുമ്പ് വർക്കലയിൽ വച്ചും ലിഗയെ കാണാതായി പരാതിയുണ്ടായിരുന്നു. അന്ന് നടത്തിയ അന്വേഷണത്തിനൊടിൽ യുവതിയെ ബീച്ചിൽ നിന്ന് കണ്ടെത്തുകയായിരുന്നു
ദുരൂഹ സാഹചര്യത്തില് കാണാതായ മലേഷ്യന് എയര്ലൈന്സ് വിമാനം എംഎച്ച്370യുടെ അവശിഷ്ടങ്ങള് കണ്ടെത്തിയെന്ന് അവകാശപ്പെട്ട് വിമാനാപകടങ്ങളേക്കുറിച്ച് സ്വതന്ത്രാന്വേഷണം നടത്തുന്നയാള്. ഓസ്ട്രേലിയന് സ്വദേശിയായ അമച്വര് ക്രാഷ് ഇന്വസെ്റ്റിഗേറ്റര് പീറ്റര് മക്മഹോന് ആണ് അവകാശവാദവുമായി രംഗത്തെത്തിയിരിക്കുന്നത്. ഗൂഗിള് എര്ത്ത് ഉപയോഗിച്ച് നടത്തിയ അന്വേഷണത്തില് വിമാനത്തിന്റെ അവശിഷ്ടങ്ങള് താന് കണ്ടെത്തിയെന്ന് 64 കാരനായ മക്മഹോന് വ്യക്തമാക്കുന്നു. മെക്കാനിക്കല് എന്ജിനിയറായി ജോലി ചെയ്യുന്ന മക്മഹോന് കഴിഞ്ഞ 25 വര്ഷമായി ക്രാഷ് ഇന്വസ്റ്റിഗേഷന് മേഖലയില് പ്രവര്ത്തിച്ചു വരികയാണ്.
ഗൂഗിള് മാപ്പും നാസ ചിത്രങ്ങളും ഉപയോഗിച്ച് നടത്തിയ അന്വേഷണത്തില് മൗറിഷ്യസിന് സമീപത്തായുള്ള റൗണ്ട് ഐലന്ഡ് എന്ന ചെറുദ്വീപിന് 10 മൈല് അകലെ വിമാനത്തിന്റെ അവശിഷ്ടങ്ങള് ഒഴുകി നടക്കുന്നത് കണ്ടെത്തിയെന്നാണ് ഇയാള് പറയുന്നത്. നേരത്തെ നടത്തിയ തെരച്ചിലില് ഈ പ്രദേശം ഉള്പ്പെട്ടിരുന്നില്ല. വിമാനത്തിന്റെ വാലിന്റെ ഭാഗങ്ങളും ചിറകും സമുദ്ര നിരപ്പില് കാണാമെന്ന് മക്മഹോന് അവകാശപ്പെടുന്നു. തന്റെ കണ്ടെത്തലുകള് തെരച്ചില് പ്രവര്ത്തനങ്ങള്ക്ക് നേതൃത്വം നല്കുന്ന ഓസ്ട്രേലിയന് ട്രാന്സ്പോര്ട്ട് ആന്റ് സേഫ്റ്റി ബ്യൂറോയ്ക്ക് കൈമാറിയതായും അവര് വിമാനത്തിന്റെ അവശിഷ്ടങ്ങള് കണ്ടെത്തിയെന്ന വാര്ത്ത സ്ഥിരീകരിച്ചതായും മക്മഹോന് പറയുന്നു.
എന്നാല് വിമാനത്തിനായി ഇന്ത്യന് മഹാസമുദ്രത്തില് തെരച്ചില് നടത്തുന്ന പ്രദേശത്തു തന്നെ ശ്രദ്ധകേന്ദ്രീകരിക്കാനാണ് അമേരിക്കന് ഉദ്യോഗസ്ഥര് അവരോട് ആവശ്യപ്പെട്ടിരിക്കുന്നതെന്നാണ് ഡെയ്ലി സ്റ്റാര് റിപ്പോര്ട്ട് ചെയ്യുന്നത്. തെരച്ചിലിന് മേല്നോട്ടം വഹിക്കാന് നാല് അമേരിക്കക്കാരാണ് ഇപ്പോള് ഓസ്ട്രേലിയയിലുള്ളത്. അധികൃതര്ക്ക് വിമാനം കണ്ടെത്തിയ വിവരം പുറത്തു വിടാന് താല്പര്യമില്ല. വിമാനത്തിലാകമാനം ബുള്ളറ്റുകള് തറഞ്ഞുകയറിയ പാടുകളാണുള്ളത്. അത് മറ്റൊരു അന്വേഷണത്തിലേക്ക് വഴിതുറക്കുമെന്നതിനാല് ഇത് സംബന്ധിച്ച കാര്യങ്ങള് പൊതുജനങ്ങളില് നിന്ന് മറച്ചുവെക്കാനാണ് അമേരിക്കന് ഉദ്യോഗസ്ഥര് എത്തിയതെന്ന് മക്മഹോന് ആരോപിക്കുന്നു.
2014 മാര്ച്ച് 8നാണ് ക്വലാലംപൂരില് നിന്ന് 239 യാത്രക്കാരുമായി ബീജിംഗിലേക്ക് പുറപ്പെട്ട മലേഷ്യന് എയര്ലൈന്സ് വിമാനം എംഎച്ച്370 കാണാതാവുന്നത്. മാസങ്ങള് നീണ്ട തിരച്ചിലിനു ശേഷവും വിമാനത്തെക്കുറിച്ച് യാതൊരു വിവരങ്ങളും ലഭ്യമായില്ല. ഓസ്ട്രേലിയ, ചൈന, മലേഷ്യ എന്നീ രാജ്യങ്ങള് സംയുക്തമായി നടത്തിയ തെരച്ചില് കഴിഞ്ഞ വര്ഷം ജനുവരിയോടെ അവസാനിപ്പിച്ചിരുന്നു. ഉള്ക്കടലില് നടത്തിയ തെരച്ചിലിന് ഏതാണ്ട് 115 മില്ല്യണ് പൗണ്ടാണ് ചെലവഴിച്ചത്. വിമാനത്തിന്റെ തിരോധാനത്തിന് പിന്നിലുള്ള കാരണങ്ങള് ഇപ്പോഴും അവ്യക്തമാണ്.
ബ്രിട്ടീഷ് കോടതി മുറികളില് ജഡ്ജുമാര് അഭിഭാഷകരെ ഭീഷണിപ്പെടുത്തുന്നതായി ക്വീന്സ് കൗണ്സിലര്മാര്. ജഡ്ജുമാരുടെ ഭീഷണി ബാരിസ്റ്റേഴ്സിനെ അങ്ങേയറ്റം അപമാനിക്കുന്നതായി പരാതികള് ലഭിച്ചിട്ടുണ്ടെന്ന് ക്വീന്സ് കോണ്സലര് പ്രൊഫസര് ജോ ഡെലാഹോണ്ടി പറയുന്നു. തങ്ങളുടെ മുന്നിലെത്തുന്ന അഭിഭാഷകരെ അപമാനിക്കുകയും, മോശം ഭാഷയില് വിമര്ശിക്കുകയും, ശത്രുതയോടെ സമീപിക്കുകയും, ഭീഷണിപ്പെടുത്തുകയും ചെയ്യുന്ന ചില ജഡ്ജിമാര് തങ്ങളുടെ പദവിയെ ദുരുപയോഗം ചെയ്യുകയാണെന്ന് ഇവര് ആരോപിക്കുന്നു. ജുഡീഷ്യല് കോണ്ഡക്ട് ഇന്വെസ്റ്റിഗേഷന് ഓഫീസ് എന്ന വാച്ച്ഡോഗിന് ജഡ്ജുമാരുടെ ഇത്തരം പെരുമാറ്റവുമായി ബന്ധപ്പെട്ട് പരാതി നല്കാന് പോലും അഭിഭാഷകര്ക്ക് ഭയമാണെന്ന് മുതിര്ന്ന അഭിഭാഷകയായ ഇവര് വെളിപ്പെടുത്തുന്നു.
എന്നാല് കേസില് മാത്രം കേന്ദ്രീകരിക്കുന്നതിനായി കോടതികള് നടത്തുന്ന ഇടപെടലുകളെയല്ല താന് വിമര്ശിക്കുന്നതെന്നും അവര് പറഞ്ഞു. ജോലിസ്ഥലത്തുണ്ടാകുന്ന ഭീഷണിപ്പെടുത്തലുകളേക്കുറിച്ച് അകാസ് (അഡൈ്വസറി, കണ്സിലിയേഷന് ആന്ഡ് ആര്ബിട്രേഷന് സര്വീസ്) വ്യാഖ്യാനിച്ചിരിക്കുന്നതിനു തുല്യമായ പെരുമാറ്റം ചില ജഡ്ജുമാരുടെ ഭാഗത്തു നിന്ന് അഭിഭാഷകര്ക്ക് നേരിടേണ്ടതായി വരുന്നുവെന്ന് ബാര് റിപ്പോര്ട്ട് ചെയ്തിട്ടുണ്ട്. അവയേക്കുറിച്ചാണ് പരാമര്ശിച്ചതെന്നും അവര് വെളിപ്പെടുത്തി. കോടതി മുറിയില് ജഡ്ജുമാരുടെ ഭീഷണിക്കിരയാവുന്ന അഭിഭാഷകര്ക്ക് ഉണ്ടാകുന്ന അനുഭവം ലൈംഗീക പീഡനത്തിനിരയായ ഒരാളുടേതു പോലെയാണ്. ഊര്ജം നഷ്ടപ്പെട്ട് നിശബ്ദനായിട്ടായിരിക്കും അയാള് പിന്നീട് കാണപ്പെടുകയെന്ന് ഫാമിലി ലോ ബാരിസ്റ്റര് ലൂസി റീഡ് പറയുന്നു.
വര്ദ്ധിച്ച മാനസിക സമ്മര്ദ്ദവും പിരിമുറക്കവുമാവാം ജഡ്ജുമാരുടെ ഇത്തരം സ്വഭാവങ്ങള്ക്ക് കാരണമെന്ന് കഴിഞ്ഞ വര്ഷം തന്റെ ബ്ലോഗിലെഴുതിയ കുറിപ്പില് ലൂസി റീഡ് പറയുന്നു. വളരെ ബുദ്ധിമുട്ടേറിയ ജോലിയാണ് ജഡ്ജുമാര് നിറവേറ്റുന്നത്. അവരും മനുഷ്യര് തന്നെയാണ്. പക്ഷേ ഈ കാരണങ്ങള്ക്കൊന്നും ഇത്തരം പെരുമാറ്റങ്ങളെ ന്യായീകരിക്കാന് കഴിയില്ലെന്നും റീഡ് കുറിപ്പില് പറയുന്നു. ഇത്തരം പെരുമാറ്റങ്ങളുടെ അനന്തരഫലങ്ങളെക്കുറിച്ചാണ് ഞാന് ചിന്തിക്കുന്നത്. എന്താണ് പറയുന്നതെന്നോ അത് എങ്ങനെയാണ് തങ്ങളുടെ മുന്നിലെത്തുന്ന അഭിഭാഷകരെ ബാധിക്കുന്നതെന്നോ മിക്ക ജഡ്ജുമാര്ക്കും അറിവില്ലെന്നും റീഡ് കൂട്ടിച്ചേര്ത്തു. ജഡ്ജുമാര് അധിക ജോലിമൂലം തളര്ന്നിരിക്കുകയാണെന്നും അതുകൊണ്ടു തന്നെ തെറ്റുകള് വരാനുള്ള സാധ്യതകളേറെയാണെന്നും ഹൈക്കോടതി ഫാമിലി ഡിവിഷന് തലവന് സര് ജെയിംസ് മുന്ബൈ കഴിഞ്ഞ ആഴ്ച്ച് പ്രസ്താവനയില് പറഞ്ഞിരുന്നു.
ഓണ്ലൈന് മാധ്യമങ്ങള്ക്ക് നിയന്ത്രണം ഏര്പ്പെടുത്താന് കേന്ദ്ര സര്ക്കാര് തീരുമാനം. പുതിയ നിയമം ഇതിനു വേണ്ടി രൂപീകരിക്കാനാണ് കേന്ദ്ര സര്ക്കാരിന്റെ പദ്ധതി. കേന്ദ്ര വാര്ത്താവിനമയ മന്ത്രി സ്മൃതി ഇറാനിയാണ് പുതിയ നിയമം നിര്മ്മിക്കുന്നതിനെക്കുറിച്ച് കേന്ദ്രം ആലോചിക്കുന്ന കാര്യത്തെക്കുറിച്ച് വെളിപ്പെടുത്തിയത്.
ഓണ്ലൈന് മാധ്യമങ്ങളുടെ വാര്ത്തകള് നിയന്ത്രിക്കുന്നതിന് ആവശ്യമായ ചട്ടങ്ങളും നിയമങ്ങളും രൂപീകരിക്കാന് ആലോചിക്കുന്നതായി സ്മൃതി ഇറാനി പറഞ്ഞു. നിലവിലെ സംവിധാനത്തിലൂടെ ഡിജിറ്റല് മാധ്യമങ്ങളിലെ വാര്ത്തകള്ക്ക് ആവശ്യമായ നിയന്ത്രണം നടപ്പാക്കുന്നതിനു സാധിക്കുന്നില്ലെന്നാണ് സ്മൃതി ഇറാനിയുടെ അഭിപ്രായം.
കേന്ദ്ര സര്ക്കാരിന്റെ പരിഗണനയിലുള്ള വിഷയത്തില് എന്തു തരം നിയമാണ് രൂപീകരിക്കാന് ഉദ്ദേശിക്കുന്നതിനെക്കുറിച്ച് സ്മൃതി ഇറാനി കൂടുതല് തുറന്നു പറയാന് തയ്യാറായില്ല.
ന്യൂഡല്ഹി: മൂന്ന് സേനാവിഭാഗങ്ങളെയും ഒരു കമാന്ഡിന് കീഴിലാക്കാനുള്ള നീക്കങ്ങള് ആരംഭിച്ച് കേന്ദ്രപ്രതിരോധ മന്ത്രാലയം. സൈനിക കമാന്ഡ് നിയമത്തില് ഭേദഗതി വരുത്തി മൂന്ന് കമാന്ഡിനേയും ഒന്നിപ്പിക്കാനാണ് കേന്ദ്രം ശ്രമിക്കുന്നത്. നിലവില് ഓരോ സൈനിക വിഭാഗത്തിനും വ്യത്യസ്ത ചട്ടങ്ങളാണ് ഉള്ളത്. ഈ ചട്ടങ്ങളാണ് സൈനിക വിഭാഗത്തിന്റെ പ്രവര്ത്തനങ്ങളെ ഏകോപിപ്പിക്കുന്നത്. എന്നാല് പുതിയ കമാന്ഡ് നിലവില് വരുന്നതോടെ ഈ നിയമത്തില് മാറ്റം വരും.
മുന്ന് സേനാംഗങ്ങള്ക്കും ഒന്നിച്ച് പ്രവര്ത്തിക്കാനും സൈനിക നടപടികളില് പങ്കെടുക്കാനും സാധിക്കുന്ന തരത്തിലാവും പുതിയ ഭേദഗതി. ഇത്തരത്തില് ഒരേ നിയമത്തിന് കീഴില് പ്രവര്ത്തിക്കുന്ന വ്യത്യസ്ത സൈനിക വിഭാഗങ്ങള് ഉള്പ്പെട്ട മൂന്ന് കമാന്ഡുകളാണ് വരാന് പോകുന്നത്. ഇവ ഇന്റഗ്രേറ്റഡ് തീയറ്റര് കമാന്ഡുകളെന്നാണ് അറിയപ്പെടുന്നത്. ഇത്തരം സൈനിക കമാന്ഡുകള് നിരവധി രാജ്യങ്ങളില് ഇപ്പോള് നിലവിലുണ്ട്. അയല്രാജ്യമായ ചൈനയ്ക്ക് അഞ്ച് ഇന്റഗ്രേറ്റഡ് തീയറ്റര് കമാന്ഡുകളാണ് ഉള്ളത്.
2001 മുതല് ആന്ഡമാനില് ഇത്തരമൊരു സൈനിക സംവിധാനം നിലനില്ക്കുന്നുണ്ടെങ്കിലും സൈനിക വിഭാഗങ്ങളുടെ വ്യത്യസ്ത നിയമങ്ങള് കമാന്റിന്റെ പ്രവര്ത്തനത്തെ സാരമായി ബാധിച്ചിരുന്നു. പുതിയ ഭേദഗതി ഈ പ്രശ്നം പരിഹരിക്കുമെന്നാണ് കരുതുന്നത്. ചീഫ് ഓഫ് ഡിഫന്സ് സ്റ്റാഫ് എന്നാകും കമാന്ഡിന്റെ തലവന് അറിയപ്പെടുക. ഇനി മുതല് സൈനികരുടെ പരിശീലനം, സേനാ കേന്ദ്രങ്ങളുടെയും താവളങ്ങളുടെയും പൂര്ണ നിയന്ത്രണം, സൈനിക നടപടികളുടെ ആസൂത്രണം, അവയുടെ നടത്തിപ്പ് എന്നിവ തീയറ്റര് കമാന്ഡിന് കീഴിലാകും.
മക്കയിലെ ആരാധനാലയവും താജ്മഹലുമുള്പ്പെടെയുള്ള പള്ളികളെയും സ്മാരകങ്ങളെയും ഹിന്ദുക്ഷേത്രങ്ങളാക്കി മാറ്റി ഹിന്ദു മഹാസഭയുടെ കലന്ഡര്. ഹിന്ദു മഹാസഭയുടെ അലിഗഡ് യൂണിറ്റ് പുറത്തിറക്കിയ കലന്ഡറിലാണ് രാജ്യത്തെ പ്രധാനപ്പെട്ട മുസ്ലീം ആരാധനാലയങ്ങള് ഹിന്ദുക്ഷേത്രങ്ങളാക്കി ചിത്രീകരിക്കപ്പെട്ടിരിക്കുന്നത്. ഞായറാഴ്ച്ചയാണ് കലണ്ടര് പുറത്തിറക്കിയത്.
മക്കയിലെ ആരാധനാലയത്തിന് മക്കേശ്വര് മഹാദേവ മന്ദിര് എന്നാണ് പേരിട്ടിരിക്കുന്നത്. താജ്മഹല് തേജോമഹാലയ ശിവക്ഷേത്രവും മധ്യപ്രദേശിലെ കമല് മൗലാ മസ്ജിദ് ഭോജ്ശാലയായും മാറിയിരിക്കുന്നു. കാശിയിലെ ഗ്യാന്വാപി പള്ളിയെ ‘വിശ്വനാഥ ക്ഷേത്രം’ എന്നാണ് വിശേഷിപ്പിച്ചിട്ടുള്ളത്. മെഹ്റൗളിയിലെ കുത്തബ് മിനാര് കലണ്ടറില് ‘വിഷ്ണു സ്തംഭ’വും ജൗന്പൂരിലെ അട്ടലാ പള്ളി ‘അത്ല ദേവി ക്ഷേത്ര’വുമാണ്. അയോധ്യയിലെ തകര്ക്കപ്പെട്ട ബാബരി മസ്ജിദ് ‘രാമജന്മഭൂമി’ എന്ന പേരിലാണ് കലന്ഡറില് ചിത്രീകരിച്ചിരിക്കുന്നത്.
പണ്ട് ഭാരതത്തെ കൊള്ളയടിച്ച വിദേശശക്തികള് ഹിന്ദു ആരാധനാലയങ്ങള് തട്ടിയെടുക്കുകയും അവയുടെ പേരുകള് മാറ്റി പള്ളികളാക്കുകയുമായിരുന്നു. കലന്ഡറില് പറയുന്ന യഥാര്ത്ഥ പേരുകളിലേക്ക് അവയെ തിരികെ കൊണ്ടുവരണമെന്നും ഹിന്ദുക്കള്ക്ക് തിരിച്ചു നല്കണമെന്നും ഹിന്ദു മഹാസഭയുടെ ദേശീയ സെക്രട്ടറി പൂജ ശകുന് പാണ്ഡേ പറഞ്ഞു. ഈ രാഷ്ട്രത്തെ ഒരു ഹിന്ദുരാഷ്ട്രമാക്കി മാറ്റാന് തങ്ങള് തീരുമാനം എടുത്തിട്ടുണ്ടെന്നും അവര് വ്യക്തമാക്കി.
ഡെറാഡൂണ്: അര്ബുദ ബാധയുണ്ടെന്ന് തെറ്റിധരിച്ച് യുവതിയുടെ സ്തനം നീക്കം ചെയ്ത ആശുപത്രി അധികൃതര് 18 ലക്ഷം രൂപ നഷ്ടപരിഹാരം നല്കാന് ഉപഭോക്തൃ കോടതി വിധി. 2003ല് ആഹൂജാസ് പത്തോളജി സെന്ററിലാണ് ചികിത്സാ പിഴവ് റിപ്പോര്ട്ട് ചെയ്തത്. സ്തനത്തിലുണ്ടായ വേദനയെ തുടര്ന്ന് ചികിത്സ തേടിയെത്തിയ യുവതിക്ക് അര്ബുദമാണെന്ന് ഡോക്ടര്മാര് സ്ഥിരീകരിക്കുകയായിരുന്നു.
ഇടത് സ്തനം ഉടന് നീക്കം ചെയ്യണമെന്ന് യുവതിയെ പരിശോധിച്ച ഡോക്ടര്മാര് വ്യക്തമാക്കി. തുടര്ന്ന് സ്തനം നീക്കം ചെയ്തുകൊണ്ടുള്ള ശസ്ത്രക്രിയയും നടന്നു. എന്നാല് ഇതിനു ശേഷമാണ് യുവതിക്ക് അര്ബുദം ഉണ്ടായിരുന്നില്ലെന്ന് മനസ്സിലാവുന്നത്. ഗുരുതരമായ ചികിത്സാ പിഴവിനെതിരെ യുവതിയും കുടുംബവും കോടതിയെ സമീപിക്കുകയായിരുന്നു.
വര്ഷങ്ങള് നീണ്ട വിചാരണയ്ക്കൊടുവിലാണ് കോടതി വിധിയുണ്ടായിരിക്കുന്നത്. ശസ്ത്രക്രിയയ്ക്കു ശേഷം യുവതിയും കുടുംബവും അനുഭവിച്ച ശാരീരിക മാനസിക സംഘര്ഷങ്ങളും കണിക്കിലെടുത്താണ് 18 ലക്ഷം രൂപ നഷ്ടപരിഹാരം നല്കാന് കോടതി വിധിയുണ്ടായിരിക്കുന്നത്.
