സംഘടനാതിരഞ്ഞെടുപ്പു നടപടികളിലേക്ക്‌ കടന്നതോടെ ബി.ജെ.പി.യിലെ സമവാക്യങ്ങൾ മാറുന്നു. സംസ്ഥാന പ്രസിഡന്റ് കെ.സുരേന്ദ്രനെതിരേ വാളോങ്ങിനിന്ന ശോഭാ സുരേന്ദ്രൻ വിഭാഗം സുരേന്ദ്രനോട് അടുക്കുന്നതായാണ് വിവരം. അല്പകാലമായി അകൽച്ചയിലായിരുന്ന മുൻ കേന്ദ്രമന്ത്രി വി.മുരളീധരനും കെ.സുരേന്ദ്രനും പൂർണമായി വഴിപിരിയുകയും ചെയ്തു. സംസ്ഥാന പ്രസിഡന്റ് സ്ഥാനത്തേക്ക് വീണ്ടുമെത്താൻ വി.മുരളീധരൻ നീക്കം നടത്തുന്നതായി സുരേന്ദ്രൻ പക്ഷത്തിനു സംശയമുണ്ട്. സുരേന്ദ്രൻവിരുദ്ധ പക്ഷത്ത് നിലയുറപ്പിച്ചിരുന്ന ശോഭയുടെ പിന്മാറ്റം പി.കെ.കൃഷ്ണദാസ് പക്ഷത്തിനും ക്ഷീണമാണ്.

എം.ടി.രമേശിനെ സംസ്ഥാന പ്രസിഡന്റായി ഉയർത്തിക്കാട്ടിയാണ് പി.കെ.കൃഷ്ണദാസ് വിഭാഗം മുന്നോട്ടുപോകുന്നത്. കഴിഞ്ഞ സംഘടനാതിരഞ്ഞെടുപ്പിൽ ഈ പക്ഷത്തെ നേതാക്കൾ എം.ടി.രമേശിന്റെയും എ.എൻ.രാധാകൃഷ്ണന്റെയും പേരുകൾ കേന്ദ്രനേതാക്കൾക്കു മുന്നിൽ െവച്ചിരുന്നു. ഇത്തവണ അവർ എം.ടി.രമേശ് എന്ന ഒറ്റപ്പേരിലേക്കെത്തി എന്നതാണ് പ്രത്യേകത. ഇവർക്ക് ആർ.എസ്.എസിന്റെ പിന്തുണയുണ്ടെന്നാണ് അറിയുന്നത്.

ഗ്രൂപ്പ് മാനേജർമാരെച്ചൊല്ലി സുരേന്ദ്രൻ പക്ഷത്ത് വേറെയും വിള്ളലുണ്ട്. പാലക്കാട്ട് തിരഞ്ഞെടുപ്പ് പ്രവർത്തനം നടത്തിയ പി.രഘുനാഥ്, നാരായണൻ നമ്പൂതിരി എന്നിവർക്കെതിരേ സുരേന്ദ്രൻ പക്ഷത്തുനിന്നുതന്നെ പരാതി വന്നിട്ടുണ്ടെന്നാണ് വിവരം. സന്ദീപ് വാരിയർ പാർട്ടിവിടാൻ കാരണം ഗ്രൂപ്പ് മാനേജർമാരുടെ ചില നീക്കങ്ങളാണെന്ന് പാലക്കാട് ജില്ലയിൽനിന്ന് പരാതി പോയിക്കഴിഞ്ഞു. സന്ദീപ് വാരിയർക്ക് കസേര നിഷേധിച്ചത് ഒരു ഗ്രൂപ്പ് മാനേജരാണെന്നാണ് പരാതിക്കാർ പറയുന്നത്.

വി.മുരളീധരൻ, കെ.സുരേന്ദ്രൻ എന്നിവർക്കൊപ്പം നിൽക്കുന്ന, രണ്ടാംനിര നേതാക്കളായ സി.കൃഷ്ണകുമാർ, പി.സുധീർ, പി.രഘുനാഥ്, വി.വി.രാജേഷ്, എ.നാഗേഷ്, സി.ശിവൻകുട്ടി, നാരായണൻ നമ്പൂതിരി തുടങ്ങിയവരും വിവിധ ജില്ലാ പ്രസിഡന്റുമാരും ഇനി ഇവരിൽ ആർക്കൊപ്പം നിൽക്കുമെന്നത് സംഘടനാ തിരഞ്ഞെടുപ്പിൽ നിർണായകമാകും.

ഫാ. ഹാപ്പി ജേക്കബ്ബ്

എല്ലാ സൃഷ്ടികളെയും സന്തോഷിപ്പിക്കുവാനും, വീണ്ടെടുക്കുവാനും ത്യാഗമായ ദൈവപുത്രന്റെ വരവേൽപ്പിന്റെ ദിനങ്ങൾ അടുത്ത് വന്നുവല്ലോ. ആഘോഷങ്ങളിൽ അല്ല ഒരുക്കവും സമർപ്പണവും ആണ് ഈ ദിനങ്ങളിലെ വിശേഷം. താരതമ്യേന ഒന്നാം കാര്യമാണ് ഈ കാലഘട്ടം ആഗ്രഹിക്കുന്നത്. ആഘോഷിക്കുവാനും, സന്തോഷിക്കുവാനും വ്യാപാര താത്‌പര്യങ്ങളും എല്ലാം ഈ കാലത്തിൽ പ്രസ്തുതമാണെങ്കിലും അതിന് കാരണമായ ത്യാഗത്തിന്റെ ചില ചിന്തകൾ ഇവിടെ കുറിക്കട്ടെ.

1. നമ്മുടെ പാപം നീക്കാൻ അവൻ സ്വയം ബലിയായി.

ദൈവ സൃഷ്ടികളുടെ പാപജീവിതത്തിൽ നിന്നും വീണ്ടെടുപ്പിന്റെ അനുഭവത്തിലേയ്ക്ക് നേടുവാൻ ന്യായപ്രമാണം, അരുളപ്പാടുകൾ, പ്രവാചകന്മാർ, ബാധകൾ, ദൈവകോപം കാലാകാലങ്ങളിലൂടെ കടന്നുപോയി. എന്നാൽ വീണ്ടെടുപ്പിനും പാപ മോചനത്തിനും ദൈവസുതൻ സ്വയം യാഗമാകുന്നു. മനുഷ്യൻ അനുഭവിക്കുന്ന സർവ്വ പാപങ്ങളും ദോഷങ്ങളും വിട്ടൊഴിഞ്ഞ് ദൈവസാന്നിധ്യം അനുഭവിപ്പാനും നിത്യജീവിതത്തിലേക്ക് ചേർക്കുവാനും ആയാണ് ഈ ത്യാഗം അവൻ നിർവഹിച്ചത്. “സർവ്വജനത്തിനും ഉണ്ടാകുവാനുള്ള മഹാ സന്തോഷം” ഇതാണ് . അല്ലാതെ നാം കരുതുന്നതുപോലെ വിരുന്നും സമ്മാനവും അല്ല. അതൊക്കെ വെറും പ്രതീകം മാത്രം. ആഘോഷങ്ങൾക്കിടയിലും ഈ ത്യാഗം തിരിച്ചറിഞ്ഞാൽ ക്രിസ്തുമസ് ദിനങ്ങൾക്ക് ശോഭയേറും.

2. പിതാവിൻറെ ഇഷ്ടത്തിന് വിധേയമായി ദൈവസുതൻ ബലിയായി

ഈ സംഭവം ഒരു അവതാര പിറവിയുടെ അനുഭവം ആയിട്ടല്ല ലോകാരംഭം മുതലുള്ള രക്ഷാകര പദ്ധതിയുടെ ഭാഗത്തിന്റെ നിവർത്തീകരണം കൂടിയാണ്. അതിനാൽ ജനത്തിന്റെ അർത്ഥം തിരയുമ്പോൾ കുരിശു മരണവും അടക്കവും, പുനരുത്ഥാനവും ചേർന്ന് ത്യാഗത്തിന്റെയും വിജയത്തിൻറെയും ജീവന്റെയും അനുഭവങ്ങൾ ചേർന്ന് ചിന്തിക്കേണ്ടി വരുന്നത്. പുൽക്കൂട്ടിൽ പിറന്ന ഉണ്ണിയേശുവും ജനനസമയത്ത് അനുഭവിച്ച ഇല്ലായ്മകളും വല്ലായ്മകളും പാലായനങ്ങളും മരണത്തിന്റെ കാസായുടെ മുൻ അനുഭവങ്ങൾ ആയി നമുക്ക് മനസ്സിലാക്കാം. (മത്തായി 1: 21, ലൂക്കോസ് 1 : 32 ) ഈ വേദഭാഗങ്ങൾ വായിക്കുമ്പോൾ ദൈവീക പദ്ധതിയുടെ ഭാഗവും, അനുസരണവും വിധേയത്വവും ജീവൻ തന്നെ ത്യാഗമായി സമർപ്പിക്കുന്നതും നമുക്ക് മനസ്സിലാകും. ക്രിസ്തുമസ് കാരൾ ഗാനങ്ങളിലെ വരികളും, ആശംസ വാചകങ്ങളും പ്രതീക്ഷയും പ്രത്യാശയും സ്നേഹവും കരുതലും പകരുന്നുവെങ്കിൽ അത് അർത്ഥമാക്കുന്നത് ഈ ത്യാഗത്തിന്റെ അർത്ഥം ആണ്.

3 . അവൻ ത്യാഗമായത് നമ്മെ വിശുദ്ധരാക്കുവാൻ വേണ്ടിയാണ് ‘

സ്വന്തം കൈപ്പണിയായതും, ജീവശ്വാസം ഉൾക്കൊള്ളുന്നതുമായ മനുഷ്യൻ അനുസരണക്കേടും പാപവും നിമിത്തം ദൈവ സംസർഗ്ഗത്തിൽ നിന്ന് അകന്ന് പോയപ്പോൾ വീണ്ടെടുക്കുവാനും തിരികെ ദൈവീകരാക്കുവാനും അവൻ ത്യാഗമായി. കുരിശു മരണത്തിൽ “സകലവും നിവർത്തിയായി ” എന്ന് അവൻ മൊഴിഞ്ഞപ്പോൾ ഈ രക്ഷണ്യ പ്രക്രിയയുടെ പൂർത്തീകരണമാണ് പ്രഖ്യാപിച്ചത്. ‘വിശുദ്ധി ‘ എന്ന പദം ക്ഷണികവും ശിപ്രവുമല്ല. ഇത് അനുദിനം വളരേണ്ട അനുഭവം ആണ്. ഡിസംബർ മാസം, ക്രിസ്തുമസ് മാസം മാത്രമല്ല ലഭിച്ച ദൈവിക ദാനം നമ്മളിലൂടെ വളരണം. നമ്മുടെ ജീവിതത്തിലൂടെ അനേകരിലേക്ക് ഇത് എത്തപ്പെടണം. മാലാഖമാരുടെ വൃന്ദങ്ങൾ സ്വർഗ്ഗോനതികളിൽ ആർത്ത് സ്തുതിച്ച ദൈവ സന്തോഷം സർവ്വ ജനതയിലേക്കും എത്തിക്കുവാൻ നമുക്ക് ശ്രമിക്കാം ; മറ്റെന്തിനേക്കാളും ഉപരി നമ്മുടെ ജീവിതത്തിലൂടെ . വി. ലൂക്കോസ് 2 :10 – 11, മാലാഖ അവരോട് ; നിങ്ങൾ ഭയപ്പെടേണ്ട സർവ്വ ജനത്തിനും ഉണ്ടാക്കുവാനിരിക്കുന്ന മഹാ സന്തോഷം നിങ്ങളെ അറിയിക്കുന്നു. മശിഹാ എന്ന കർത്താവ് ദാവീദിന്റെ നഗരത്തിൽ നിങ്ങൾക്കായി ജാതം ചെയ്തിരിക്കുന്നു.

സ്നേഹത്തോടെ
ഹാപ്പി അച്ചൻ.

റവ. ഫാ. ഹാപ്പി ജേക്കബ്ബ് : മലയാളം യുകെ ന്യൂസിന്റെ സ്പിരിച്വൽ വിഭാഗത്തിൽ പ്രസിദ്ധീകരിച്ച നിരവധി ലേഖനങ്ങളിലൂടെ ലോകമെങ്ങുമുള്ള വായനക്കാരുടെ ഹൃദയത്തിലേയ്ക്ക് ദൈവപരിപാലനയുടെ നെയ്ത്തിരികൾ തെളിയിച്ച അനുഗ്രഹീത എഴുത്തുകാരൻ . യോർക്ക്‌ഷെയറിലെ ഹാരോഗേറ്റിൽ താമസിക്കുന്ന അച്ചൻ സെന്റ് തോമസ് ഇന്ത്യൻ ഓർത്തഡോക്സ് ചർച്ച് ലിവർപൂളിൻെറ വികാരിയാണ്. 2022 -ലെ സ്പിരിച്വൽ റൈറ്ററിനുള്ള മലയാളം യുകെ ന്യൂസിന്റെ അവാർഡ് ജേതാവാണ് .

Mobile # 0044 7863 562907

ഷാനോ എം കുമരൻ

“എന്റെ പ്രസാദേ ഇതൊന്നു ഫിൽ ചെയ്യുവാൻ കൂടെടാ. ചുമ്മാ കറങ്ങി നടക്കാതെ. കൗൺസിലിങ് ഹാളിനു മുന്നിൽ വിന്യസിച്ചിരിക്കുന്ന രെജിസ്റ്ററേഷൻ കൗണ്ടറിൽ ഇരുന്നു തല പുകഞ്ഞ ജോർജ് ചേട്ടൻ അത് വഴി കടന്നു പോയ പ്രസാദിനോടായി പറഞ്ഞു.
എന്നാ ജോർജ് ചേട്ടായീ ചെയ്യണ്ടേ. പറഞ്ഞോ.
എന്തെങ്കിലും ഉത്തരവാദിത്വപ്പെട്ട കാര്യങ്ങൾ ആരും ഏല്പിക്കാത്തതിനാൽ വെറുതെ വോളന്റീർ ബാഡ്‌ജും നെഞ്ചിൽ കുത്തി ഒന്ന് ഷൈൻ ചെയ്യാൻ പ്രത്യേകിച്ച് പണിയൊന്നുമില്ലാതെ കറങ്ങി നടന്ന പ്രസാദിനു ജോർജ് ചേട്ടന്റെ വിളി വലിയ അനുഗ്രഹമായി ഭവിച്ചെന്നു വേണം പറയുവാൻ. അല്ലെങ്കിലതൊരു മര്യാദയില്ലാത്ത വിവരണമായിപോകും. പ്രസാദ് ഒരു കസേര വലിച്ചിട്ടിരുന്നു അന്നവിടെ എത്തിച്ചേർന്നിരിയ്ക്കുന്ന ആളുകളുടെ രെജിസ്ട്രേഷൻ പൂർത്തിയാക്കുവാൻ വേണ്ടുന്നതെല്ലാം ചെയ്‌തതിനാൽ ജോർജ് ചേട്ടൻ പ്രസന്ന ചിത്തനായി കാണപ്പെട്ടു എന്നതും ശ്രദ്ധേയമായ ഒന്നാണ്.

പ്രിയമുള്ളവരേ എല്ലാവർക്കും ഹൃദയപൂർവ്വം സ്വാഗതം. പ്രൊഫെസ്സർ സച്ചിദാനന്ദൻ മൈക്ക് കയ്യിലെടുത്തു സ്വയം പരിചയപെടുത്തികൊണ്ടു സദസ്സിനെ അഭിസംബോധന ചെയ്തു.
എനിക്കറിയാം എല്ലാവരും ഒരു പാട് തിരക്കുകൾ മാറ്റി വച്ചിട്ടാണ് ഇന്നിവിടെ ഒത്തു ചേർന്നിരിയ്ക്കുന്നതെന്ന്. എത്ര തന്നെ തിരക്കുകൾ ഉണ്ടെങ്കിലും ആണും പെണ്ണും ഒന്ന് ചേർന്ന് തുടക്കം കുറിയ്ക്കുന്ന വിവാഹജീവിതമെന്ന മഹാ യാത്രയ്ക്കുള്ള മുന്നൊരുക്കമായി ഇന്ന് തുടങ്ങി മൂന്നാം നാളിൽ തീരുന്ന ത്രിദിന പഠന പദ്ധതി വളരെയേറെ അനിവാര്യമാണെന്ന വസ്തുത ഇവിടെ എത്തുന്നതിനു മുന്നേ തന്നെ നിങ്ങളെല്ലാവരും മനസ്സിലാക്കിയിട്ടുള്ളതാണെന്നതിനാൽ ഇങ്ങനെയൊരു പാഠ്യപദ്ധതിയുടെ പ്രാധാന്യത്തെ പറ്റി സുദീർഘമായ വിവരണത്തിന്റെ ആവശ്യമുണ്ടെന്നു കരുതുന്നില്ല … എങ്കിലും ചില കാര്യങ്ങൾ പറയാതെ തരമില്ലാത്തതിനാൽ …….. പ്രൊഫസ്സർ സച്ചിദാനന്ദൻ നവ ദമ്പതികളാകുവാൻ ഒരുങ്ങിയിറങ്ങിയ യുവ ജനതയെ നോക്കി സംസാരിച്ചു തുടങ്ങി.

വിവാഹജീവിതത്തിനു മുന്നോടിയായി ഇണകളാകുവാൻ പോകുന്ന യുവത്വങ്ങൾ കൈവരിക്കേണ്ടതും നിശ്ചയമായും മനസ്സിലാക്കിയിരിക്കേണ്ടതുമായ ചില അവശ്യ ധാരണകളെക്കുറിച്ചുള്ള പഠനമാണവിടെ നടക്കുന്ന പരിപാടി. പ്രൊഫസ്സർ സച്ചിദാനന്ദൻ അവിടെയുള്ള ഇണക്കുരുവികളെ എഴുന്നേൽപ്പിച്ചു നിറുത്തി മറ്റുള്ളവർക്കായി പരിചയപ്പെടുത്തി.
അതിങ്ങനെ. ആ എന്താണ് അങ്ങേയറ്റത്തിരിയ്ക്കുന്ന നീല ചുരിദാർ ധരിച്ച ആ സുന്ദരിയുടെ പേര് …? ആ ഒന്നെഴുന്നേൽക്കു….. അതെ നിങ്ങൾ തന്നെ റെഡ് ബോർഡർ ലൈനുള്ള ചുരിദാർ ആണ് ഞാൻ ഉദ്ദേശിച്ചത്….. നിങ്ങളല്ല നിങ്ങൾ പ്ലെയിൻ ബ്ലൂ അല്ലെ? സദസ്സിൽ ചിരിയുടെ രവമുയർന്നു നിലയിൽ ചുവന്ന വരകളുള്ള സുന്ദരി ലജ്‌ജാ വിവശതയാൽ നമ്രശിരസ്കയായി സദസ്സിൽ എണീറ്റ് നിന്നു. ” നിങ്ങളെ ഒന്ന് പരിചയപെടുത്തിക്കെ …..ആ സ്വയം പരിചയപെടുത്തുന്നതിനൊപ്പം പങ്കാളിയാവാൻ പോകുന്ന ആളെകൂടി ഞങ്ങൾക്ക് മുന്നിൽ അവതരിപ്പിക്കണം കേട്ടോ ……ഇത് എല്ലാവരും ചെയ്യേണ്ടതാണെന്നോർമ്മിപ്പിക്കുന്നു …..”

ആ പെൺകുട്ടി അവളെ നാണത്തോടെ പരിചയപ്പെടുത്തി.
എന്റെ പേര് സരിക ഇവിടെ അടുത്ത് തന്നെയാണ് വീട്
” സരിക എന്ത് ചെയ്യുന്നു. “? സദസ്സിൽ നിന്നാരോ ചോദ്യമെറിഞ്ഞു.
” ഞാൻ ഞാനൊരു പ്രൈവറ്റ് ബാങ്കിൽ ക്ലാർക്ക് ആയിട്ട് ജോലി ചെയ്യുവാ. അപ്പോൾ സദസ്സിന്റെ മറു ഭാഗത്തു നിന്നും സുന്ദരകുട്ടപ്പനായ ഒരു വിദ്വാൻ എഴുന്നേറ്റു നിന്നു
” യെസ് “ പ്രൊഫസർ അയാളെ നോക്കി ചോദിച്ചു.
ഞാൻ വിനീത്. ഞാനാണ് സരികയെ വിവാഹം കഴിക്കുവാൻ പോകുന്നത്.
സദസ്സിലെ കൂട്ടച്ചിരികൾക്കും അടക്കം പറച്ചിലുകൾക്കുമൊടുവിൽ ചുണ്ടിൽ തികട്ടിവന്ന ചിരിയെ കൈ തലങ്ങളാൽ മറച്ചു വച്ചു പ്രൊഫസർ പറഞ്ഞു. ഓക്കേ ഓക്കേ സരിക ഭാഗ്യവതിയാണ്. തന്നെ ചോദ്യം ചോദിച്ചു ഒരുപാടു ബുദ്ധി മുട്ടിക്കാതെയിരിക്കാനാണ് മിസ്റ്റർ വിനീത് എഴുനേറ്റു നിന്ന് സ്വയം പരിചയപെടുത്തിയത്. അതെന്തായാലും ശ്ലാഘനീയമാണ്. നല്ലൊരു കുടുംബജീവിതം ആശംസിക്കുന്നു ഇരുന്നോളു രണ്ടാളും. തന്നെ നാണം കെടുത്തിയതിൽ ഒരു സുന്ദര പിണക്കത്തിൽ കണ്ണേറു കൊണ്ട് വിനീതിനെ കാടാക്ഷിച്ചു കൊണ്ട് സരികയും ഗംഭീരഭാവത്തിൽ വിനീതും അതാതു ഇരിപ്പിടങ്ങളിൽ ഇരുന്നു. അങ്ങനെ ഓരോരുത്തരായി പരിചയപെടുത്തൽ തുടർന്നു.

ഞാൻ പയസ്സ് ഇരിഞ്ഞാലകുടയാണ് ഫുൾ നെയിം പയസ്സ് ജോസെപ്പ്. അപ്പനപ്പാപ്പാന്മാരായിട്ടു മ്മക്ക് റബ്ബറിന്റെ ഡീൽ ആണ്. ദാ അവിടെ ആ ഡെസ്കിന്മേൽ കൈ കുത്തിരിക്കണേ ടാവാണ്‌ മ്മ്‌ടെ പെണ്ണ്. പേര് ജെസ്സി. പയസ്സിന്റെ മലവെള്ളപ്പാച്ചിൽ പോലെയുള്ള തൃശൂർ സ്ലാങ്ങിൽ ജെസ്സി എണീറ്റ് നിന്ന് വിളിച്ചു പറഞ്ഞു. ഞാനാണ് ജെസ്സി.
ഈ റബ്ബറിന്റ ഡീൽ ന്ന് വെച്ചാ ന്താണത്‌ തോട്ടം ആണോ?
അടക്കി പിടിച്ച ചിരിയിൽ പ്രൊഫെസ്സർ തൃശൂർ സ്ലാങ്ങിൽ ചോദിച്ചു.
ഹേ മൂപ്പർക്ക് റബ്ബർ കടയാണ് ടൗണില്. തോട്ടം ന്റപ്പനാണ്
മറുപടി പറഞ്ഞത് ജെസ്സി ആണ്.
രണ്ടാൾക്കും റബ്ബർ പോലെ ചാടി ചാടി നിൽക്കുന്ന ഒരു ഭീകര ലൈഫ് ആശീർവദിച്ചു പ്രൊഫസ്സർ. അവനിച്ഛിരെ ജാഡയാനല്ലോടാവേ. ആരൊക്കെയോ അടക്കം പറഞ്ഞു.
റബ്ബർ കടയല്ലേ കാശിനെന്താ പഞ്ഞം. ജാടയിടാവല്ലോ!
അതാരാ അവിടെ പതുങ്ങിയിരിക്കുന്നെ.
കർത്താവെ എന്നോട് ചോദിക്കല്ലേ ഒന്നും എന്ന് വിചാരിച്ചു പമ്മിയിരുന്ന ജീനയെ പ്രൊഫെസ്സർ കണ്ടു പിടിച്ചു.
എന്റെ പേരേ ജീനെന്നാണെ. ഞാൻ വൈക്കത്തിനടുത്തുന്നാ വരുന്നേ. അപ്പച്ചന് തേയിലേടെ ബിസിനെസ്സ് ആണ്. കട്ടപ്പനെന്നു തേയിലയെടുത്തു വൈക്കത്തു കൊണ്ടോയി വിൽക്കും.
എല്ലാവരുമൊന്നു പകച്ചു. എന്തൊക്കെയാണ് ഈ കൊച്ചു പറയുന്നേ? വർത്താനം കേട്ടിട്ട് കല്യാണ പ്രായമായതായി തോന്നുന്നില്ല.
ഒരു നിമിഷം ആലോചിച്ചു നിന്നിട്ടു പ്രൊഫസർ ആൺകൂട്ടത്തിന് നേർക്കു തിരിഞ്ഞു ചോദിച്ചു. ആരാ ഈ കുട്ടിയുടെ ചെക്കൻ?
അപ്പുറത്തു നിന്നും ഒരു പയ്യൻ എഴുന്നേറ്റു. ആഹാ ഇയാളാണോ? ഇയാളെ എനിക്കറിയാല്ലോ ! നമ്മൾ ….നമ്മൾ എവിടെയോ മീറ്റ് ചെയ്തിട്ടുണ്ടല്ലോ. …?

ഓർമ്മയെ രാകിയെടുക്കുന്ന പോലെ പ്രൊഫസർ തല ചൊരിഞ്ഞു കണ്ണട ഊരി കർചീഫ് കൊണ്ട് തുടച്ചു വീണ്ടും മൂക്കിൻ തുമ്പിൽ ചേർത്ത് വച്ചു.
സാർ ഞാൻ ബിനീഷ് ടൗണിൽ എ വൺ കാർ കെയർ വർക്ക് ഷോപ്. അതെന്റെയാ. സാറിന്റെ വണ്ടി അവിടെ സെർവിസിന് തരാറുണ്ട്.
“ഓഹ് ഓഹ് …പിടി കിട്ടി പിടി കിട്ടി. അതെ ബിനീഷേ പെൺകൊച്ചു അപ്പന്റെ തേയിലകച്ചോടത്തെപറ്റിയാണ് സദാ ചിന്ത. ഇന്നിവിടെ ബിനീഷ് കൂടെയുണ്ടെന്ന് പോലും ചിന്തയിലേയില്ല. ഒരു അപ്പൻ സ്നേഹിയാണ് അത് കൊണ്ട് തേയിലയുടെ ഷെയർ ഒന്നും കിട്ടുമെന്ന് തോന്നുന്നില്ല. നാട്ടുകാരുടെ വണ്ടികൾ എന്നും കേടായി തന്റെയടുത്തു തന്നെ വരാൻ പ്രാർത്ഥിച്ചോ. എല്ലാവരോടൊപ്പം പ്രൊഫസ്സറും ഒപ്പം ബിനീഷും ചിരിച്ചപ്പോൾ കൈലേസുകൊണ്ടു മുഖത്തെ വിയർപ്പു തുള്ളികൾ ധിറുതിയിൽ തുടയ്ക്കുകയായിരുന്നു ജീന.
അടുത്തതായി പരിചയപ്പെടുത്തിയത് ഒരു ലണ്ടൻ മലയാളിയെയാണ് പേര് സ്റ്റീഫൻ. സ്റ്റീഫൻ കൊമ്പത്ത്
ഏതു കൊമ്പാണ് പുളികൊമ്പാണോ ആശാനേ.
ആരുടെയോ ആ കമെന്റ് അത്ര വലിയ കോമഡി ആയി സ്റ്റീഫൻ കൊമ്പത്തിനു രസിച്ചില്ല എന്ന് അയാളുടെ മുഖത്ത് നിന്നും വായിച്ചെടുക്കാമായിരുന്നു.

ഇടവേളകളിൽ എല്ലാവരും ക്യാന്റീനിലും പുറത്തുള്ള മരച്ചുവട്ടിലും മറ്റുള്ള ഇടങ്ങളിലുമായി താന്താങ്ങൾക്കു വിധിക്കപെടുവാൻ പോകുന്ന ഇണകളോടൊത്തു കിന്നരിക്കുന്നതിൽ ശ്രദ്ധ പതിപ്പിച്ചു.
സ്റ്റീഫൻ കൊമ്പത്തിനു പഞ്ചാര പെരുമാറ്റങ്ങൾ ഇഷ്ടമില്ലാത്തതിനാലാവണം അയ്യാൾ പ്രതിശ്രുത വധുവായ സൂസന്റെ അടുത്ത് അല്പമാത്രം കുടുംബ വിശേഷങ്ങൾ പങ്കു വച്ചിട്ട് സിഗരറ്റു പാക്കറ്റുമായി മതില്കെട്ടിന് അപ്പുറത്തേക്ക് പോയി. ആ വിശാലമായ മതില്കെട്ടിനകത്തു അനുവദിച്ചു കിട്ടിയ നേരത്തിനുള്ളിൽ ഒട്ടു മിക്ക വനിതാ രത്നങ്ങളും അവരവരുടെ പുരുഷ കേസരികളോടൊത്തു ഭാവി പരിപാടികൾ ചർച്ച ചെയ്തു. സ്വിറ്റസർ ലാൻഡ് തുടങ്ങി ഊട്ടി കൂർഗ് വരെയുള്ള തേനൂറുന്ന മധുവിധു രാവുകളെയും പ്രജാക്ഷേമ തല്പരരായിട്ടുള്ളവർ ആൺ പെൺ വക ഭേദങ്ങളുടെ കണക്കുകൾ നിരത്തി അടുത്ത തലമുറകളെപ്പറ്റി വരെയും ആ ഉദ്യാനത്തിൽ ചർച്ചകൾ നടത്തി. ചിലതെല്ലാം അതീവ രഹസ്യ സ്വഭാവത്തോടെയും മറ്റു ചിലതാവട്ടെ രഹസ്യങ്ങളുടെ മറകളേതുമില്ലാതെ തുറന്നിട്ട ജന വാതിലുകൾക്കുള്ളിൽ കയറിയിറങ്ങുന്ന കാറ്റിനെപോലെ നൈർമല്യമുള്ളതും സുതാര്യവുമായിരുന്നു.

ആരുടെയോ നിലവിളി കേട്ടാണ് എല്ലാവരും അവിടേയ്ക്കു ഓടി ചെന്നത്. അവിടെയതാ ആരോ ഒരാളുടെ കഴുത്തിൽ കുത്തി പിടിച്ചു മതിലിൽ മേലേക്ക് ചാരി നിറുത്തി അമക്കുകയാണ് നമ്മുടെ ലണ്ടൻ കാരൻ സ്റ്റീഫൻ. എന്തൊക്കെയോ തെറി വാക്കുകൾ ഉപയോഗിക്കുന്നുമുണ്ട്. ജോർജ് ചേട്ടനും പ്രസാദും മറ്റുള്ള ആളുകളെല്ലാവരും ഓടിയെത്തി. അവർ സ്റ്റീഫന്റെ ബലിഷ്ഠ കരങ്ങളിൽ നിന്നും മറ്റെയാളെ രക്ഷപെടുത്തി. എന്താ എന്താ പ്രശ്നം ? ജോർജ് ചേട്ടൻ സ്റ്റീഫനോട് ചോദിച്ചു. സ്റ്റീഫനെ പോലെ തന്നെ അവിടെ വിവാഹജീവിതത്തിനെ കുറിച്ചുള്ള പഠനത്തിനെത്തിയതായിരുന്നു സ്റ്റീഫന്റെ കരവലയത്തിൽ നിന്നും രക്ഷപെട്ട രാജേന്ദ്രൻ. ആളുകൾ സ്റ്റീഫനോടും രാജേന്ദ്രനോടും മാറി മാറി ചോദിച്ചു എന്താണ് പ്രശ്നമെന്ന്. കഴുത്തു തിരുമ്മി കൊണ്ടിരുന്ന രാജേന്ദ്രന് ഒന്നും പറയുവാൻ കഴിയുന്നുണ്ടായിരുന്നില്ല. ബഹളം കേട്ടിട്ട് അതിനു നടുവിൽ സ്റ്റീഫൻ ആണെന്നറിഞ്ഞു സൂസൻ അവിടേക്കു വന്നു. അവൾ സ്റ്റീഫനെ നോക്കി ചോദിച്ചു. എന്താണ് സ്റ്റീഫൻ എന്തിനാ ഈ ബഹളമൊക്കെ?

എരിയുന്ന കണ്ണുകളോടെ സ്റ്റീഫൻ രാജേന്ദ്രന് നേർക്കു വിരൽ ചൂണ്ടു സൂസനോട് ചോദിച്ചു. നീ ഇവനെ അറിയുമോ ? സ്റ്റീഫൻ ചൂണ്ടിയ വിരലിനെ പിന്തുടർന്ന സൂസന്റെ കണ്ണുകൾ എത്തി നിന്നത് രാജേന്ദ്രന്റെ മുഖത്തായിരുന്നു. അയാളെ കണ്ടതും സൂസൻ ഞെട്ടിപ്പോയി. അവളുടെ ഞെട്ടൽ മുഖത്ത് പ്രകടമായിരുന്നു. സൂസൻ ചോദിച്ചത് കേട്ടില്ലേ ഇയാളെ നീ അറിയുമോ ? സ്റ്റീഫന്റെ പരുക്കൻ ശബ്ദത്തിന്റെ അധികാര ഭാവത്തെ എതിർക്കുവാൻ സൂസന് നിവൃത്തിയില്ലായിരുന്നു. അറിയാം എന്ന് തല താഴ്ത്തി അതിലുപരി പതിഞ്ഞ ശബ്ദത്തിൽ അവൾ പറഞ്ഞു നിറുത്തിയതും അയാളുടെ കരതലം അവളുടെ കവിളിൽ പതിഞ്ഞിരുന്നു. ഇത് നിനക്കല്ല ഞാൻ കഷ്ടപെട്ടുണ്ടാക്കിയ എന്റെ ലൈഫ് തുലയ്ക്കാൻ നോക്കിയ നിന്റെ തന്തയ്ക്കുള്ളതാ. ശേഷമയാൾ രാജേന്ദ്രനോടായ് ക്ഷമിക്കണം. പെട്ടെന്ന് എനിക്ക് എന്നെ നിയന്ത്രിക്കാനായില്ല. നിങ്ങൾ നിങ്ങളെന്റെ ജീവിതം കാത്തു. രാജേന്ദ്രന്റെ ചുമലിൽ കൈ വച്ച് കൊണ്ട് അത്രയും പറഞ്ഞിട്ട് സ്റ്റീഫൻ ധിറുതിയിൽ ആർക്കും മുഖം കൊടുക്കാതെ കാർ സ്റ്റാർട്ട് ചെയ്തു ഓടിച്ചു പോയി. തരിച്ചു നിൽക്കുന്ന സൂസന്റെ മുഖത്ത് നോക്കി ഒന്നും ചോദിക്കുവാൻ ആർക്കും തോന്നിയില്ല. കാര്യങ്ങൾ ഏതാണ്ടെല്ലാം അവർക്കു തിരിഞ്ഞിരുന്നു.

സൂസൻ ചുറ്റിനും കൂടി നിൽക്കുന്ന സമൂഹത്തെ മുഖാമുഖം നോക്കുവാൻ സാധിക്കാതെ തന്റെ ബാഗുമെടുത്തു ഒരു ടാക്സിയിൽ കയറി എവിടേക്കോ പോയി.

കാര്യമറിയാതെ ശിഖ വല്ലാതെ വിഷമിച്ചു എന്തിനാണ് രാജേട്ടനെ അയാൾ ദ്രോഹിച്ചതും പിന്നെ മാപ്പ് പറഞ്ഞതും ?
രാജേന്ദ്രന്റെ മറ്റൊരു സുഹൃത്തിന്റെ കാമുകി ആയിരുന്നു സൂസൻ. ഒരാളുടെ മാത്രമല്ല പല സുഹൃത്തുക്കളുടെയും കാമുകി ആയിരുന്നു അവൾ പണത്തിനോട് മാത്രം ആത്‌മ ബന്ധം പുലർത്തിയിരുന്ന സൂസന് കിടക്ക വിരിപ്പുകളുടെ വർണ്ണ വരകളെ നനയിയ്ക്കുന്ന തന്റെ വിയർപ്പു തുള്ളികൾ ബാങ്ക് അക്കൗണ്ടുകൾക്കു മേനി കൂട്ടുവാനുള്ള മാന്ത്രിക ശക്തിയുള്ള ഒരു മാർഗമായിരിന്നു. സൂസന്റെ ഭൂതകാലമെല്ലാം നന്നായി അറിഞ്ഞു വച്ചിരുന്ന രാജേന്ദ്രന് സ്റ്റീഫനെ കണ്ടപ്പോൾ അയ്യാൾ ചതിക്കപ്പെടാതെയിരിക്കുവാൻ തനിക്കെന്തെങ്കിലും ചെയ്യണമെന്ന് ആഗ്രഹിച്ചു. രാവിലത്തെ ക്ലാസ്സിൽ പ്രൊഫസർ സച്ചിദാനന്ദൻ എല്ലാവരെയും പരസ്പരം പരിചയപ്പെടുത്തിയപ്പോൾ മുതൽ സ്റ്റീഫനെ ഈ ചതി കുഴിയിൽ നിന്നും രക്ഷിക്കണം എന്ന മനോസംഘടനം രാജേന്ദ്രന്റെയുള്ളിൽ ഉടലെടുത്തിരുന്നു. ഞാനായിട്ട് ഒന്നും പറയേണ്ടതില്ല എന്ന് പലവുരു തീരുമാനം എടുത്തുവെങ്കിലും സ്റ്റീഫനെ ദുരിതത്തിലാകുവാൻ രാജേന്ദ്രന് തോന്നിയില്ല . സ്റ്റീഫന് രാജേന്ദ്രനെന്ന ബാല്യകാല സഹപാഠിയെ ഓർമ്മ വന്നില്ലെങ്കിലും മതിലിൽ കൈ ഊന്നി നിന്ന് സിഗരറ്റു വലിയ്ക്കുന്ന സ്റ്റീഫനോട് രാജേന്ദ്രൻ ചോദിച്ചു . സ്റ്റീഫന് ഈ കല്യാണം തന്നെ വേണമായിരുന്നോ എന്ന്.
സ്റ്റീഫനോട് കാര്യം വ്യക്തമാക്കിയെങ്കിലും തിരിച്ചുണ്ടായ പ്രതികരണം ബാല്യകാല സൗഹൃദ സ്മരണകളെ ഓർമ്മപെടുത്താനുള്ള ഉദ്യമത്തിൽ നിന്നും രാജേന്ദ്രൻ പിന്തിരിഞ്ഞിരുന്നു. കല്യാണ തേൻ നുകരുവാൻ എത്തിയ ഇണക്കുരുവികളതാ പോകുന്നു തേൻകൂടോന്നൊരുക്കാതെ. ക്ലാസ്സിന്റെ ഒരു ഗുണം ചില കൂട്ടർക്ക് അങ്ങനെ ഭവിച്ചു. ചീഞ്ഞു പോയൊരു പഴമാ കൂടയിൽ വീഴാതെ കാത്തു രക്ഷിച്ചൊരാ നൻപൻ രാജേന്ദ്രനും സ്തുതി.

ശരീരശാസ്ത്രങ്ങളുടെ ഉൾകരുത്തുകൾ മനഃപാഠമാക്കിയ ആ ലേഡി ഡോക്ടറുടെ വാക്ചാതുര്യം ഇണയരയന്നങ്ങളുടെ കൂട്ടത്തെ ലജ്‌ജാ വിവശരാക്കിയെങ്കിലും തരുണീമണികൾ മാത്രമെന്തോ നമ്ര ശിരസ്‌കകളായി കുമ്പിട്ടിരുന്നു. വിജ്ഞാന കുഞ്ജികളായ നിങ്ങൾക്കൂഹിക്കാവുന്നതാണല്ലോ സന്ദർഭം. അങ്ങനെയുള്ള നിരവധിയായ അറിവുകൾ അവിടെ പ്രതിപാദിക്കപ്പെട്ടു. വിവാഹമെന്ന മനോഹരമായ ഉടമ്പടിയെകുറിച്ചു പ്രൊഫസർ ഊന്നിയൂന്നി പറഞ്ഞപ്പോൾ വിവാഹമോചനമെന്ന ദുരിതത്തെകുറിച്ചു വിശദീകരിച്ച വക്കീൽ സുഹാസചന്ദ്രൻ പലർക്കുമൊരു രസം കൊല്ലിയായി.

ഇടവേളകളിൽ ദാമ്പത്യമെന്ന യുവ മിഥുനങ്ങൾക്ക് ഇടയിൽ ദാമ്പത്യമെന്ന അതിരാത്രത്തെക്കുറിച്ചുള്ള പദ്ധതികൾ നിരവധിയായി ചർച്ച ചെയ്യപ്പെട്ടു. നാലാൾ കൂടുന്നിടത്തെ നാണം നാന്മറയ്ക്കുള്ളിൽ വിച്ഛേദനം ചെയ്യപ്പെട്ടു.
അതെ സമയം ആ ഇടത്തിൽ മറ്റൊരു കോണിലായി മറ്റൊരു സംഗതി. നോക്കാം അതെന്തെന്നു.
ഉന്മേഷ് ഏട്ടാ, ദിവ്യയുടെ കാതരമായ വിളിയിൽ ഉന്മേഷിന്റെ സർവ്വകോശങ്ങളും തളിരണിഞ്ഞു. എന്തോ ദിവ്യമോളെ, ഉന്മേഷ് തരളിത ചിത്തനായി വിളികേട്ടു. അടുത്ത ക്ലാസ് തുടങ്ങാൻ ഇനിയും അരമണിക്കൂർ കൂടിയുണ്ട് ഒന്ന് വരാമോ എന്റെയടുത്തേക്കു. ദിവ്യ ലോലമായി മൊഴിഞ്ഞു.

എവിടെയാ മോളു നില്കുന്നെ. പറന്നെത്താൻ തിടുക്കമായി ഉന്മേഷിനു.
ഞാൻ നില്കുവല്ല ഏട്ടാ ഇരിക്കുവാ. ഇവിടെ കാന്റീനിനടുത്തുള്ള പനിനീർ ചാമ്പയുടെ തറയിൽ.
ഓ തമാശക്കാരി യു ഫണ്ണി ഗേൾ. ഫോൺ കട്ട് ചെയ്യും മുന്നേ ഉന്മേഷ് ദിവ്യയ്ക്കരുകിൽ പറന്നെത്തി.
അയ്യോ ഇതെന്താ ഞാൻ രാവിലെ തന്ന ഡയറി മിൽക്ക് ഇത് വരെ കഴിച്ചില്ലേ മോളു? ദിവ്യയുടെ കയ്യിലെ ഡയറി മിൽക്ക് കണ്ട ഉന്മേഷ് പരിഭവത്തോടെ ചോദിച്ചു.
അത്…… അത് ഏട്ടാ ഞാൻ കഴിക്കാൻ തുടങ്ങുവായിരുന്നു അപ്പോഴാ സജി മോൻ പറഞ്ഞത് അധികം മധുരം കഴിച്ചാൽ ഒരുപാട് വണ്ണം വയ്ക്കുമെന്ന് അതാ കഴിയ്ക്കാഞ്ഞത്.
സജിമോനോ ആരാത് ? വേവലാതിയോടെ ഉന്മേഷ് ചോദിച്ചു.
സജിമോനെ ഇങ്ങോട്ടു വായോ. ഒളിച്ചിരിയ്ക്കാതെ ഉൻമേഷേട്ടന് സജിമോനെ കാണണം.
അരുമയായി ദിവ്യ വിളിച്ചത് കേട്ട് ചാമ്പ മരത്തിനപ്പുറത്തിരുന്ന ഒരു യുവാവ് നമ്രശിരസ്കനായി അവിടേക്കെത്തി. ആരാ ഇത് ഇവനേതാ ദിവ്യമോളെ? ഉന്മേഷ് ഏതാണ്ട് കരച്ചിലിന്റെ വക്കോളമെത്തി.
അതെ ഏട്ടാ ഞാനും സജിമോനും ഒന്നിച്ചു പഠിച്ചതാ ചെറുപ്പം മുതലേ. അന്ന് തൊട്ടേ ഞങ്ങൾ ലൈനാണ് സജിമോൻ ഞാനെന്നു വച്ചാൽ മരിയ്ക്കും. ഞാനും.
എന്താ ദിവ്യമോളെ ഈ പറയുന്നേ. എന്റെ ചങ്കു തകരുന്നുണ്ട് കേട്ടോ. ഉന്മേഷ് ചാമ്പ മരത്തറയിൽ ഇരുന്നു. ഏങ്ങിയേങ്ങി കരഞ്ഞു തുടങ്ങി. ദിവ്യ എഴുന്നേറ്റു അയാളുടെ അടുത്തെത്തി തലകുനിച്ചു കരയുന്ന അയാളുടെ മുഖം പിടിച്ചുയർത്തി വിതുമ്പുന്ന കണ്ണുകൾ സ്വന്തം കൈ കൊണ്ട് തുടച്ചു കൊടുത്തു. ഉൻമേഷേട്ടാ ഏട്ടൻ ഇങ്ങനെ സില്ലിയാവല്ലേ. ഏട്ടൻ കരഞ്ഞാൽ പിന്നെയാരാ ഞങ്ങൾക്കൊരു സപ്പോർട്ട്.

അവൾ അയാളോട് മൃദുവായി ചോദിച്ചു. സപ്പോർട്ടോ …?? അയ്യോ എല്ലാം പോയല്ലോ എന്റെ ഗുരുവായൂരപ്പാ. ഉന്മേഷ് കരച്ചിലിന്റെ ആക്കം കൂട്ടി. ദിവ്യമോളുടെ കണ്ണുകളും ഈറനായി ഒപ്പം സജിമോനും കണ്ണുകൾ തുടച്ചു.
ഉന്മേഷ് ഏട്ടാ, ഏട്ടൻ വേണം ഞങ്ങളുടെ കല്ല്യാണം നടത്തി തരുവാൻ.

എന്നോടെന്തേ നേരത്തെ പറയാതിരുന്നേ നമ്മൾ ഹണിമൂണും നമുക്കുണ്ടാകാൻ പോണ കുട്ടികളുടെ പേര് വരെ തീരുമാനിച്ചതല്ലേ ! എല്ലാം എല്ലാം നമ്മൾ സെറ്റ് ചെയ്തതല്ലേ! ഇങ്ങോട്ടു വരുന്നതിനു മുന്നേ എങ്കിലും പറയായിരുന്നില്ലേ എന്നോട് … വീട്ടിൽ ചെന്ന് ഞാനെന്തോ പറയുമോ അയ്യോ എനിക്കറിയാൻ വയ്യേ ….ഉന്മേഷ് കരച്ചിൽ തുടർന്നു. ഉൻമേഷേട്ടാ നിറുത്തുന്നുണ്ടോ ഈ കരച്ചിൽ. ദിവ്യ അല്പം ഉച്ചത്തിൽ പറഞ്ഞു. സ്വിച്ച് ഇട്ടതു പോലെ ഉന്മേഷ് കരച്ചിൽ നിറുത്തി. ഉൻമേഷേട്ടാ പറയുന്നത് കേട്ടെ ഒന്ന് . ഞാനും സജിമോനും കുഞ്ഞുനാള് മുതലേ ഇഷ്ടത്തിലാ …. ആര് വിചാരിച്ചാലും ഞങ്ങളെ പിരിക്കാൻ പറ്റില്ല. സജിമോൻ എന്റെ സെയിം ഏജ് ആണ്. സൊ അവനു മച്യുരിറ്റി ആയിട്ടില്ല്യാ അത്കൊണ്ടാണ് എന്നെക്കാൾ

പ്രായമുള്ള ഉൻമേട്ടനെ കൊണ്ട് എന്നെ കെട്ടിക്കാൻ അച്ഛനുമമ്മയും തീരുമാനിച്ചു. സജിമോനെ കല്യാണം കഴിച്ചാൽ വീട്ടിൽ കയറ്റത്തില്ലന്ന് അവര് പറഞ്ഞു അതോണ്ടാ നേരത്തെ പറയാൻ ധൈര്യം കിട്ടാഞ്ഞത്.
അച്ഛനുമമ്മയും പറഞ്ഞത് ശെരിയല്ല ദിവ്യമോളെ. മച്യുരിറ്റി ഇല്ലാത്ത ആളെ കെട്ടിയാലെങ്ങിനേയാ ശെരിയാവുക. ഞാനല്ലേ ശെരിക്കും മാച്ച് ആവുന്നേ എനിക്കെന്താ ഒരു കുറവ് ? ബാങ്കില് ജോലിയും കാറും വീടും ഒക്കെയില്ലേ …? ഉന്മേഷ് വീണ്ടും കരയാൻ തുടങ്ങി.

ഉന്മേഷ് ഏട്ടാ കരച്ചില് നിറൂത്ത്. ഏട്ടൻ എന്നെ കെട്ടിയാലും ഫസ്റ്റ് നെറ്റിന് മുന്നേ ഞാൻ സജിമോന്റെ കൂടെ ഒളിച്ചോടും. അതിലും നല്ലതല്ലേ ഇപ്പോ പറയണത്. ഏട്ടൻ എന്റെ അമ്മയ്ക്ക് പിറന്ന എന്റെ സ്വന്തം ഏട്ടനായിട്ടു മുന്നിൽ നിന്ന് ഞങ്ങളുടെ കല്യാണം നടത്തി തരണമെന്നാണ് എന്റെ ആഗ്രഹം.
അത് കൂടെ കേട്ടപ്പോൾ ഉന്മേഷിന്റെ ബാക്കിയുണ്ടായിരുന്ന കിളികൾ കൂടി പറന്നു
പോയി. കല്യാണവും ഞാൻ നടത്താണോ അയ്യോ എനിക്ക് വയ്യായെ . ഉന്മേഷ് വീണ്ടും നിലവിളിക്കാൻ തുടങ്ങി. അത് കേട്ട് കൊണ്ട് ഓടികൂടിയവരുടെ കൂടെ പ്രൊഫെസ്സർ സച്ചിദാനന്ദനും ഡോക്ടർ പ്രകാശ് , ഡോക്ടര് കുസുമവദന , വക്കീൽ സുഹാസചന്ദ്രനും എല്ലാമുണ്ടായിരുന്നു.

എന്താ എന്ത് പറ്റി .? എല്ലാവരും കൂട്ടം കൂടി നിന്ന് ആരാഞ്ഞു. സംഗതി അറിഞ്ഞ പ്രൊഫെസ്സറും വക്കീലും എല്ലാം പറഞ്ഞു ഇവർ കല്യാണം കഴിക്കാതിരിക്കുന്നതാണുത്തമം ഉന്മേഷിന്റെയും ഇവരുടെയും നന്മയ്ക്കു അതാണുത്തമം. എന്തെല്ലാം വയ്യാ വേലികളാണ് ഇവിടെയെത്തുന്നത് സത്യത്തിൽ കല്യാണം കഴിയ്ക്കാൻ പോകുന്നവർക്കല്ല മക്കളെ ശെരിയാം വണ്ണം മനസ്സിലാക്കിയെടുക്കാൻ മാതാപിതാക്കൾക്കാണ് സ്റ്റഡി ക്ലാസ് നൽകേണ്ടത് എന്ന് തോന്നുന്നു. എന്തായാലും അവരുടെ കല്ല്യാണം നടത്തി കൊടുക്കുവാനൊന്നും ഉന്മേഷ് മെനക്കെട്ടില്ല. മറിച്ചു കല്യാണമേ വേണ്ട എന്നൊരു ഉഗ്ര ശപഥമയാളെടുത്തു .
രണ്ടു നാള് കൊണ്ട് മറ്റെല്ലാവരും പഠനമെല്ലാം വിജയകരമായി പൂർത്തീകരിച്ചു കൊണ്ട് നല്ലൊരു പങ്കാളിയാകാൻ തയ്യാറെടുത്തു കഴിഞ്ഞിരുന്നു. ചിലർക്കെങ്കിലും വഴിത്തിരിവുകൾ സമ്മാനിച്ച് കൊണ്ട് ആ മനോഹരമായ ഇടം അങ്ങനെ തുടരുന്നു.
എങ്കിലും ഇണക്കുരുവികളെ നിങ്ങളോടായി ….. ഒന്ന് നില്ക്കു …. ഇവിടേയ്ക്ക് വരും മുന്നേ ഒന്ന് ചിന്തിക്കൂ……സ്വായത്തമാക്കൂ വിശാലമായ ഈ ഭൂഖണ്ഡത്തിലുടനീളം വ്യാപാരിച്ചു വിഹരിക്കുന്ന അറിവുകൾ. വിശ്വ വിഖ്യാതരായ മാതാപിതാക്കളെ, നിങ്ങളോടായി ഒരേയൊരു വാക്ക്.
സ്നേഹിക്കു നിങ്ങൾ നിങ്ങളുടെ പൊൻമക്കളെ.
അറിയുവാൻ തുനിയു നിങ്ങളവരെ. ഓർക്കുക നിങ്ങൾ. അവർ മരപ്പാവകളല്ല.
നിങ്ങൾ മാറും കാലാന്തരങ്ങളെ.
കാലയവനികയ്ക്കുള്ളിൽ ഒരു തിരിയായി എരിയും
മുൻപേ ….

ഷാനോ എം കുമരൻ: കോട്ടയം ജില്ലയിൽ പെരുവ സ്വദേശിയാണ്. സാഹിത്യ രംഗത്ത് ഷാനോയുടെ സംഭാവനകൾ നിരവധിയാണ്. യുകെയിൽ ഒരു സ്വകാര്യ സ്ഥാപനത്തിൽ ജോലി ചെയ്യുന്നു. കുടുംബം : ഭാര്യ കീർത്തി എൻഎച്ച്എസ് ഹോസ്പിറ്റലിൽ നേഴ്സ് ആയി ജോലി ചെയ്യുന്നു. മകൾ വേദശങ്കരി രണ്ടാം വർഷ വിദ്യാർത്ഥിനി.

ശ്രീനാരായണ ഗുരുവിന്റെ സന്ദേശം ഇന്ന് ഏറെ പ്രസക്തമെന്ന് ഫ്രാന്‍സിസ് മാര്‍പാപ്പ. ഗുരു ലോകത്തിന് നല്‍കിയത് എല്ലാവരും മനുഷ്യ കുടുംബത്തിലെ അംഗങ്ങളാണെന്ന സന്ദേശമാണെന്നും അസഹിഷ്ണുതയും വിദ്വേഷവും വര്‍ധിച്ചു വരുന്ന കാലത്ത് ഗുരുവിന്റെ സന്ദേശം ഏറെ പ്രസക്തമാണെന്നും മാര്‍പാപ്പ കൂട്ടിച്ചേര്‍ത്തു.

വത്തിക്കാനില്‍ ശിവഗിരി മഠം സംഘടിപ്പിക്കുന്ന സര്‍വമത സമ്മേളനത്തിലുള്ള ആശിര്‍വാദ പ്രഭാഷണത്തിലാണ് മാര്‍പാപ്പ പരാമര്‍ശം. മാനവ സ്നേഹത്തിന്റെ ആത്മീയ കേന്ദ്രമായ വത്തിക്കാനില്‍ ശ്രീനാരായണ ഗുരുവിന്റെ സ്മരണയില്‍ ഇന്ന് നടക്കുന്ന സര്‍വ്വമത സമ്മേളനത്തിലും ലോക പാര്‍ലമെന്റിലും ഫ്രാന്‍സിസ് മാര്‍പാപ്പ പങ്കെടുക്കും.

ഇറ്റലി, ബെഹ്‌റിന്‍, ഇന്‍ഡോനേഷ്യ, അയര്‍ലന്‍ഡ്, യുഎഇ, ഇംഗ്ലണ്ട്, അമേരിക്ക തുടങ്ങി പതിനഞ്ചില്‍ പരം രാജ്യങ്ങളില്‍ നിന്നുള്ള വിവിധ മത പ്രതിനിധികള്‍ സമ്മേളനത്തില്‍ പങ്കെടുക്കുന്നുണ്ട്. കര്‍ദിനാള്‍ ലസാറസ് യു ഹ്യൂങ്‌സിക്ക് സമ്മേളനം ഉദ്ഘാടനം ചെയ്തു. സ്വാമി സച്ചിദാനന്ദയുടെ അധ്യക്ഷത വഹിച്ചു.

ഗുരുദേവന്‍ രചിച്ച ദൈവ ദശകം പ്രാര്‍ത്ഥന ഇറ്റാലിയന്‍ ഭാഷയില്‍ മൊഴിമാറ്റം ചെയ്ത് ആലപിച്ചാണ് സമ്മേളനം ആരംഭിക്കുന്നത്. ശ്രീനാരായണ ദര്‍ശനവും ലോക സമാധാനവും എന്ന വിഷയത്തെ അധികരിച്ച് സ്വാമി സച്ചിദാനന്ദ പ്രഭാഷണം നടത്തി.

കൊടുവള്ളിയിൽ സ്കൂട്ടറിൽ സഞ്ചരിക്കുകയായിരുന്ന ജ്വല്ലറി ഉടമയെ കാറിലെത്തിയ സംഘം ഇടിച്ചു വീഴ്ത്തി രണ്ട് കിലോയോളം സ്വർണം കവർന്ന സംഭവത്തിൽ വഴിത്തിരിവ്. കവര്‍ച്ചയുടെ മുഖ്യ സൂത്രധാരൻ കടയുടമയുടെ സുഹൃത്തായ രമേശ് ഉൾപ്പടെ 5 പേരെ അറസ്റ്റ് ചെയ്തു. രമേശ്‌, വിപിൻ, ഹരീഷ്, ലതീഷ്, വിമല്‍ എന്നിവരാണ് അറസ്റ്റിലായത്.

ആക്രമിക്കപ്പെട്ട കൊടുവള്ളി സ്വദേശി ബൈജുവിന്‍റെ കടയുടെ സമീപത്ത് തന്നെ ആഭരണ നിര്‍മാണ കട നടത്തുന്ന രമേശ് ആണ് ക്വട്ടേഷൻ നൽകിയതെന്ന് പോലീസ് പറഞ്ഞു. സാമ്പത്തിക ലാഭം ലക്ഷ്യമിട്ടാണ് കവർച്ച. ഇവരിൽ നിന്ന് 1.3 കിലോ സ്വര്‍ണ്ണം പോലീസ് പിടിച്ചെടുത്തു. രമേശൻ ഇവര്‍ക്ക് ക്വട്ടേഷൻ കൊടുത്ത തുകയായ 12 ലക്ഷം രൂപയും പിടികൂടി.

കവര്‍ച്ചയ്ക്കുശേഷം സംശയം തോന്നാതിരിക്കാൻ ആക്രമിക്കപ്പെട്ട ബൈജുവിനെ രമേശ് കണ്ട് സംസാരിച്ചിരുന്നുവെന്നും വളരെ ആസൂത്രിതമായാണ് കവര്‍ച്ച നടപ്പാക്കിയത്.

കഴിഞ്ഞ ബുധനാഴ്ചയാണ് ബൈജുവിനെ കാറിൽ എത്തിയ സംഘം പിന്നിൽ നിന്നും ഇടിച്ചിട്ടത്. ശേഷം കത്തി കാട്ടി ഭീഷണിപ്പെടുത്തുകയും ബാഗിൽ സൂക്ഷിച്ച രണ്ട് കിലോയോളം സ്വർണവുമായി കടന്നു കളയുകയായിരുന്നു.

സിസിടിവികളും മൊബൈൽ ഫോണുകളും കേന്ദ്രീകരിച്ച് നടത്തിയ അന്വേഷണത്തിലാണ് പ്രതികളെ കസ്റ്റഡിയിലെടുത്തത്. രമേശ്‌, വിപിൻ, ഹരീഷ്, ലതീഷ്, വിമൽ എന്നിവരെ തൃശ്ശൂർ, പാലക്കാട് ഭാഗങ്ങളിൽ നിന്നുമാണ് പ്രത്യേക അന്വേഷണ സംഘം കസ്റ്റഡിയിലെടുത്തത്.

കൊടുവള്ളിയിൽ സ്കൂട്ടറിൽ സഞ്ചരിക്കുകയായിരുന്ന ജ്വല്ലറി ഉടമയെ കാറിലെത്തിയ സംഘം ഇടിച്ചു വീഴ്ത്തി രണ്ട് കിലോയോളം സ്വർണം കവർന്ന സംഭവത്തിൽ വഴിത്തിരിവ്. കവര്‍ച്ചയുടെ മുഖ്യ സൂത്രധാരൻ കടയുടമയുടെ സുഹൃത്തായ രമേശ് ഉൾപ്പടെ 5 പേരെ അറസ്റ്റ് ചെയ്തു. രമേശ്‌, വിപിൻ, ഹരീഷ്, ലതീഷ്, വിമല്‍ എന്നിവരാണ് അറസ്റ്റിലായത്.

ആക്രമിക്കപ്പെട്ട കൊടുവള്ളി സ്വദേശി ബൈജുവിന്‍റെ കടയുടെ സമീപത്ത് തന്നെ ആഭരണ നിര്‍മാണ കട നടത്തുന്ന രമേശ് ആണ് ക്വട്ടേഷൻ നൽകിയതെന്ന് പോലീസ് പറഞ്ഞു. സാമ്പത്തിക ലാഭം ലക്ഷ്യമിട്ടാണ് കവർച്ച. ഇവരിൽ നിന്ന് 1.3 കിലോ സ്വര്‍ണ്ണം പോലീസ് പിടിച്ചെടുത്തു. രമേശൻ ഇവര്‍ക്ക് ക്വട്ടേഷൻ കൊടുത്ത തുകയായ 12 ലക്ഷം രൂപയും പിടികൂടി.

കവര്‍ച്ചയ്ക്കുശേഷം സംശയം തോന്നാതിരിക്കാൻ ആക്രമിക്കപ്പെട്ട ബൈജുവിനെ രമേശ് കണ്ട് സംസാരിച്ചിരുന്നുവെന്നും വളരെ ആസൂത്രിതമായാണ് കവര്‍ച്ച നടപ്പാക്കിയത്.

കഴിഞ്ഞ ബുധനാഴ്ചയാണ് ബൈജുവിനെ കാറിൽ എത്തിയ സംഘം പിന്നിൽ നിന്നും ഇടിച്ചിട്ടത്. ശേഷം കത്തി കാട്ടി ഭീഷണിപ്പെടുത്തുകയും ബാഗിൽ സൂക്ഷിച്ച രണ്ട് കിലോയോളം സ്വർണവുമായി കടന്നു കളയുകയായിരുന്നു.

സിസിടിവികളും മൊബൈൽ ഫോണുകളും കേന്ദ്രീകരിച്ച് നടത്തിയ അന്വേഷണത്തിലാണ് പ്രതികളെ കസ്റ്റഡിയിലെടുത്തത്. രമേശ്‌, വിപിൻ, ഹരീഷ്, ലതീഷ്, വിമൽ എന്നിവരെ തൃശ്ശൂർ, പാലക്കാട് ഭാഗങ്ങളിൽ നിന്നുമാണ് പ്രത്യേക അന്വേഷണ സംഘം കസ്റ്റഡിയിലെടുത്തത്.

ടോം ജോസ് തടിയംപാട്

ബ്രിട്ടീഷ് പാർലിമെന്റ് ഇന്ന് ചരിത്രപരമായ ഒരു നിയമം പാസ്സാക്കി ഒരാളെ മരിക്കാൻ സഹായിക്കുന്നത് കുറ്റകരമല്ലാതെ ആക്കുന്നതായിരുന്നു ആ നിയമം, എല്ലാ എം പി മാർക്കും പാർട്ടി വിപ്പ് നൽകാതെ അവർക്കു സ്വമേധയ വോട്ട് ചെയ്യാൻ തീരുമാനിക്കാമായിരുന്നു അതിന്റെ അടിസ്ഥാനത്തിൽ 275 വോട്ടിനെതിരെ 300 വോട്ടുകൾക്കാണ് ബില്ല് പാസായത് പാർലമെൻറിൽ നടന്ന 5 മണിക്കൂർ ചർച്ചക്ക് ശേഷമാണ് ബിൽ പാസായത് ഈ ബിൽ പാസ്സാകുമ്പോൾ ഓർക്കേണ്ട ഒരു പേരാണ് Dr Jack Kevorkian

താൻ പഠിച്ച വൈദ്യ ശാസ്ത്രം കൊണ്ട് രക്ഷിക്കാൻ കഴിയാതെ മാരകരോഗം ബാധിച്ചു ജീവിതം നരകതുല്യമായി മുൻപോട്ടു കൊണ്ടുപോകുന്നവരെ അവരുടെ മരണത്തിന്റെ ദൂരം കുറച്ചുകൊണ്ട് അവരെ നിത്യതയിൽ പ്രവേശിപ്പിക്കാൻ സഹായിക്കുക എന്നതായിരുന്നു ഡോക്ടർ ഡെത്ത് ചെയ്ത പ്രവർത്തി അതിനു അദ്ദേഹം നീണ്ടകാലം ജയിൽ വാസം അനുഭവിക്കേണ്ടിവന്നു .

തുർക്കിയിൽ നിന്നും അമേരിക്കയിൽ കുടിയേറിയതാണു Dr Jack Kevorkian ന്റെ കുടുംബം ,ചെറുപ്പത്തിൽ പിതാവ് പള്ളിയിൽ വേദപാഠം പഠിക്കാൻ അയച്ചെങ്കിലും തുർക്കിയിൽ നടന്ന അർമേനിയൻ കൂട്ടക്കൊല എന്തുകൊണ്ട് ദൈവം ഉണ്ടെങ്കിൽ തടഞ്ഞില്ല എന്ന ചോദ്യ൦ അദ്ദേഹത്തെ നിരീശ്വരവാദിയാക്കി ജാക്ക് കെവോർക്കിയന്റെ ജനനം മെയ് 26, 1928, അമേരിക്കയിലെ പോണ്ടിയാക്, മിഷിഗൺ,ആയിരുന്നു .-1952-ൽ മിഷിഗൺ യൂണിവേഴ്സിറ്റി മെഡിക്കൽ സ്കൂളിൽ നിന്ന് ബിരുദം നേടി തൻ്റെ പ്രൊഫഷണൽ പരിശീലനത്തിൻ്റെ തുടക്കത്തിൽ, കെവോർക്കിയൻ മെഡിക്കൽ മുഖ്യധാരയിൽ നിന്ന് അകന്നു.

ഒരു പാത്തോളജി റസിഡൻ്റ് എന്ന നിലയിൽ, വധശിക്ഷയ്ക്ക് വിധിക്കപ്പെട്ട തടവുകാരെ വധിക്കാൻ നിശ്ചയിച്ച മണിക്കൂറിൽ മെഡിക്കൽ പരീക്ഷണങ്ങൾ നടത്താനും തുടർന്ന് അവർക്ക് മാരകമായ കുത്തിവയ്പ്പുകൾ നൽകാനും അദ്ദേഹം ശ്രമിച്ചു, ഇത് അദ്ദേഹത്തിന് “ഡോ. മരണം എന്ന പേരു ലഭിക്കാൻ കാരണമായി പിന്നീട് അദ്ദേഹം ആത്മഹത്യാ ക്ലിനിക്കുകൾ സ്ഥാപിക്കാൻ വാദിച്ചു. അതിനു അദ്ദേഹം മുൻപോട്ടു വച്ച വാദം “”മരിക്കുക എന്നത് കുറ്റകരമല്ല “” എന്നതായിരുന്നു .

1960 കളിലും 70 കളിലും അദ്ദേഹം മിഷിഗണിലെയും തെക്കൻ കാലിഫോർണിയയിലെയും ആശുപത്രികളിൽ സ്റ്റാഫ് പാത്തോളജിസ്റ്റായി ജോലി ചെയ്തു; പിന്നീട് 1982-ൽ അദ്ദേഹം വൈദ്യ പരിശീലനത്തിൽ നിന്ന് വിരമിക്കുകയും തൻ്റെ ദൗത്യത്തിനായി മുഴുവൻ സമയവും നീക്കിവയ്ക്കുകയും ചെയ്തു: മാരകരോഗം ബാധിച്ച രോഗികളെ അവരുടെ ജീവിതം അവസാനിപ്പിക്കാൻ സഹായിക്കുക.എന്നതായിരുന്നു അദ്ദേഹത്തിന്റെ പ്രവർത്തന മണ്ഡലം Janet Adkins എന്ന മറവിരോഗം ബാധിച്ച 54 വയസുകാരി ഇംഗ്ലീഷ് ടീച്ചർ ആയിരുന്നു ഡോക്ടർ ഡെത്തിന്റെ ആദ്യ ഇര 1990 അവർ Dr Jack Kevorkian ന്റെ സഹായത്തോടെ മരണം വരിച്ചു. പിന്നീട് 100 ൽ അധികം മാരക രോഗം ബാധിച്ച രോഗികളെ തൻ്റെ മെർസിട്രോൺ മെഷീന്റെ സഹായത്താൽ ആത്മഹത്യ ചെയ്യാൻ പ്രാപ്‌തമാക്കിയതോടെയാണ് കെവോർക്കിയൻ അന്താരാഷ്ട്ര ശ്രദ്ധ നേടിയത്.

70-കാരനായ ഹ്യൂ ഗേലിൻ്റെ മരണത്തിൽ കെവോർക്കിയൻ്റെ പങ്കിന് മറുപടിയായി, മിഷിഗൺ ഒരു ബിൽ പാസാക്കി, ഒരു വ്യക്തിക്ക് ആത്മഹത്യ ചെയ്യാനോ ശാരീരികമായി സഹായിക്കാനോ ഉള്ള മാർഗങ്ങൾ ബോധപൂർവ്വം നൽകുന്നത് കുറ്റകരമാക്കുന്നു എന്നതായിരുന്നു നിയമം പിന്നീട് . 1993 ഫെബ്രുവരിയിൽ നെതർലാൻഡിൽ നിയമവിധേയമാക്കിയ ഡോക്ടറുടെ സഹായത്തോടെയുള്ള ആത്മഹത്യയെ അമേരിക്കൻ മെഡിക്കൽ സ്ഥാപനം ഏറെക്കുറെ എതിർത്തിരുന്നു. അത്തരം പ്രവർത്തനങ്ങൾ വൈദ്യശാസ്ത്രത്തിൻ്റെ ഏറ്റവും അടിസ്ഥാന തത്വത്തെ ലംഘിക്കുന്നുവെന്ന് പല ഡോക്ടർമാരും വിശ്വസിച്ചു.

അപരിചിതരുടെ മരണത്തിൽ സഹായിച്ചതിന് കെവോർക്കിയനെ മെഡിക്കൽ നൈതിക വിദഗ്ധർ വിമർശിക്കുകയും സ്വന്തം ആശയങ്ങൾ പ്രോത്സാഹിപ്പിക്കുന്നതിനായി പരസ്യം തേടുകയും ചെയ്ത. Dr Jack Kevorkian പ്രവൃത്തികളെ മെഡിക്കൽ സമൂഹം അപലപിച്ചതു . അന്താരാഷ്ട്ര ശ്രദ്ധ നേടി. തൻ്റെ എതിരാളികളെ എതിർത്ത്, കെവോർക്കിയൻ തൻ്റെ മുന്നിലുള്ള രോഗിയുടെ ക്ഷേമമല്ലാതെ മറ്റൊന്നിലും താൻ ശ്രദ്ധിച്ചിട്ടില്ലെന്നും മിക്ക അമേരിക്കൻ ഡോക്ടർമാരും അവരുടെ കഷ്ടപ്പാടുകളോട് പ്രതികരിക്കാതെ രോഗികളെ കഷ്ട്ടപ്പെടുത്തിയെന്നും അദ്ദേഹം അവകാശപ്പെട്ടു.

1993 നവംബറിലും ഡിസംബറിലും കെവോർക്കിയൻ ആത്മഹത്യയിൽ സഹായിക്കുന്നതിന് എതിരായ സംസ്ഥാന നിയമം ലംഘിച്ചുവെന്നാരോപിച്ച് രണ്ട് ജയിൽ ശിക്ഷ അനുഭവിച്ചു. “ഈ അധാർമിക നിയമത്തെ പ്രതിരോധിക്കാൻ തൻ്റെ ആദ്യ ജയിൽ ശിക്ഷയ്ക്കിടെ പട്ടിണി കിടന്ന് മരിക്കുമെന്ന് അദ്ദേഹം ഭീഷണിപ്പെടുത്തി. തുടർന്ന് ജയിൽ മോചിതനായി. എന്നിരുന്നാലും, നവംബറിൽ കെവോർക്കിയൻ അലി ഖലീലിയുടെ ആത്മഹത്യയിൽ പങ്കെടുത്തു, സഹായിച്ചു എന്നതുകൊണ്ട് അദ്ദേഹത്തെ രണ്ടാം തവണയും ജയിലിലടച്ചു. രണ്ടാമത്തെ നിരാഹാര സമരം അദ്ദേഹത്തെ തളർത്തുകയുംചെയ്തു, ഇനി ഒരു വ്യക്തികളുടെ മരണത്തിൽ താൻ പങ്കെടുക്കില്ലെന്ന് വാഗ്ദാനം ചെയ്ത ശേഷം 1993 ഡിസംബർ 17 ന് ജയിലിൽ നിന്ന് മോചിതനായി. ആത്മഹത്യാ സഹായത്തിനെതിരായ മിഷിഗണിലെ നിയമം ഭരണഘടനാ വിരുദ്ധമാണെന്ന് ഡിസംബർ 18-ന് വെയ്ൻ കൗണ്ടി സർക്യൂട്ട് കോടതി ജഡ്ജി വിധിച്ചു, എന്നാൽ കെവോർക്കിയൻ താമസിച്ചിരുന്ന അയൽരാജ്യമായ ഓക്ക്‌ലാൻഡ് കൗണ്ടിയിൽ ഈ വിധി ബാധകമല്ലയിരുന്നു.

1998 നവംബറിൽ, 60 മിനിറ്റ് എന്ന വാർത്താ പരിപാടിയിൽ കേവോർക്കിയൻ മാരക രോഗം ബാധിച്ച ഒരു രോഗിക്ക് മാരകമായ കുത്തിവയ്പ്പ് നൽകുന്നതിൻ്റെ ദൃശ്യങ്ങൾ സംപ്രേക്ഷണം ചെയ്‌ത് നിയമലംഘനമായി പരിഗണിച്ചു അദ്ദേഹത്തെ 10-25 വർഷം തടവിന് ശിക്ഷിക്കുകയും ചെയ്തു. 2007-ൽ, എട്ട് വർഷത്തിലധികം ശിക്ഷ അനുഭവിച്ചതിന് ശേഷം, നല്ല പെരുമാറ്റത്തിന് പരോളിൽ പുറത്തിറങ്ങി. അടുത്ത വർഷം യുഎസ് കോൺഗ്രസിലേക്ക് മത്സരിച്ചു അദ്ദേഹം പരാജയപ്പെട്ടു.

മരണം , 2011, ജൂൺ 3 നു റോയൽ ഓക്ക്, മിഷിഗൺ ഹോസ്പിറ്റലിൽ വച്ച് Dr Jack Kevorkian മരിച്ചു. അദ്ദേഹം മരിച്ചതിനു മുൻപ് അമേരിക്കയിൽ പല സ്റ്റേറ്റിലും euthanasia ക്ലിനിക്കൾ വന്നെങ്കിലും അതിനെതിരെ വലിയ വിമർശനങ്ങളും ഉയർന്നിരുന്നു 1900 മുതൽ euthanasia ക്ലിനിക്കുകളെപറ്റിയുള്ള ലേഖനങ്ങൾ പുറത്തു വന്നെങ്കിലും ഈ കാലഘട്ടത്തിലാണ് ഇത്തരം ചിന്തകൾ കൂടുതൽ ആളുകളിൽ എത്തപ്പെട്ടത് .

പ്രിയപ്പെട്ടവരെ ഇന്നാണ്. സ്കോട്ട് ലാൻഡിലെ ഉത്സവരാവ് ……ഇന്ന് വൈകുന്നേരം 4 മണി മുതൽ ലീവിംഗ്സ്റ്റൺ അർമാഡൈൽ അക്കാദമിയിൽ വച്ച് നടക്കുന്ന യുസ്മ അവാർഡ് നിശയിൽ ഒട്ടേറെ പ്രമുഖർ പങ്കെടുക്കുന്നു.

ഗിരിശൃംഗങ്ങളുടെ മാതക ഭംഗി ഒരു ചിപ്പിക്കുളില്‍ എന്ന പോലെ ഒളിഞ്ഞു കിടക്കുന്ന സ്കോട്ട് ലാൻഡ് . കുന്നിനു വെള്ളി അരഞ്ഞാണം കെട്ടി എന്ന പോലെ ഒഴുകുന്ന പാലരുവികള്‍,തണുപ്പിന്റെ ആവാരം പുതച്ചുറങ്ങുന്ന , മഞ്ഞണിഞ്ഞ് ശിശിര പട്ടുടുത്ത് ഒരു ഗന്ധര്‍വ സുന്ദരിയെ പോലെ മനോഹരിയായ, യുകെയുടെ വടക്കൻ മലയോര മേഖലയായ സ്കോട്ടീഷ് ഭൂമികയിൽ ഉണർവ്വും ഉന്മേഷവുമായി മലയാളത്തിൻ്റെ എവർഗ്രീൻ റൊമാൻ്റിക് ഹീറോ, മഞ്ഞിൽ വിരിഞ്ഞ പൂക്കളിലൂടെ മലയാളി മനസ്സിൽ ചിരകാല പ്രതിഷ്ഠ നേടിയ മലയാളത്തിൻ്റെ നിത്യഹരിത പ്രണയ നായകനായ ശങ്കർ. ഇന്ത്യൻ കോൺസുൽ ശ്രീ ആസാദ് സിംങ് ,മാർട്ടിൻ ഡേ മുൻ എം പി കൗൺ സിലർ ലിൻഡ ഖെന്ന,,സിബിൽ ബാരി എന്നിവരെ കൂടാതെ കലാ സാംസ്കാരിക മത രാഷ്രീയ രംഗത്തെ ഒട്ടേറെ വിശിഷ്ട വ്യക്തിത്വങ്ങൾ യുസ്മ അവാർഡ് നിശയിൽ പങ്കെടുക്കുന്നു. കൂടാതെ, സ്റ്റേജ് നിറഞ്ഞ് നിൽക്കുന്ന എൽഇഡി സ്ക്രീൻ… കണ്ണഞ്ചിപ്പിക്കുന്ന ലൈറ്റിംഗ് സംവിധാനങ്ങൾ… സാങ്കേതിക വിദ്യയോടെയുള്ള ശബ്ദ നിയന്ത്രണം… ലൈവ് ടെലികാസ്റ്റിംഗ്… പരിചയ സമ്പന്നരായ ടെക്നീഷ്യൻമാരുടെ പ്രവർത്തനം… ഇന്ന് നവംബർ 30 ശനിയാഴ്ച ലിവിംഗ്സ്റ്റൺ അർമാഡൈൽ അക്കാഡമിയിൽ വച്ച് നടക്കുന്ന യുസ്മ അവാർഡ് നൈറ്റിനും യുസ്മ നാഷണൽ കലാമേളയ്ക്കും കൊഴുപ്പേകും.

സ്കോട്ലാൻ്റ് മലയാളികളെ ഒരു കുടക്കീഴിൽ കൊണ്ടുവരാൻ ജന്മ്മമെടുത്ത യുസ്മ (United Scotland Malayalee Association) യുടെ നാഷണൽ കലാമേളയാണ് മലായാളം യുകെ അവാർഡ് നൈറ്റിനോടൊപ്പം നടക്കുന്നത്. സ്കോട്ലാൻ്റിലെ ചെറുതും വലുതുമായ ഒരു ഡമ്പനിലേറെ അസ്സോസിയേഷനുകളിലെ മത്സരാർത്ഥികൾ യുസ്മ നാഷണൽ കലാമേളയിൽ മാറ്റുരയ്ക്കും. നാഷണൽ കലാമേള മത്സരത്തിൽ വിജയികളാകുന്നവർക്ക് ഇന്ന് വൈകുന്നേരം 4 മണി മുതൽ ആരംഭിയ്ക്കുന്ന യുസ്മ അവാർഡ് നൈറ്റിൽ നിറഞ്ഞ സദസ്സിന് മുമ്പാകെ നമ്മാനങ്ങൾ നൽകപ്പെടും.

ഇന്ന്, നവംബർ 30 രാവിലെ 11 മണിക്ക് ലിവിംഗ്സ്റ്റൺ അർമാഡൈൽ അക്കാദമിയിൽ യുസ്മ നാഷണൽ കലാമേള ആരംഭിക്കും. നാല് സ്റ്റേജ്കളിലായിട്ടായിരിക്കും മത്സരങ്ങൾ നടക്കുന്നത്. വൈകുന്നേരം 3 മണിയോടെ മത്സരങ്ങൾ അവസാനിക്കും. 4 മണിക്ക് യുസ്മ അവാർഡ് നൈറ്റ് ആരംഭിക്കും. വൈകിട്ട് 10.00മണിയോടെ അവാർഡ് നൈറ്റ് ആഘോഷങ്ങൾ അവസാനിക്കും.

സ്കോട് ലാൻഡിലെ മലയാളി സമൂഹത്തിന്റെ വളർച്ചയുടെ നാൾവഴികളിൽ മറ്റൊരു തിലകക്കുറി ചാർത്തി കൊണ്ട്, മാധ്യമ രംഗത്ത് യൂറോപ്പിൽ മുൻനിരയിലെത്തിയ മലയാളം യുകെ ന്യൂസ് മീഡിയാ പാർട്ണറായി ചേർന്നുകൊണ്ട് ഐഡിയലിസ്റ്റിക്ക് ഫിനാൻഷ്യൻസ് ലിമിറ്റഡിൻ്റെ സഹകരണത്തോടെ സ്കോട്ലാൻ്റിലെ യുസ്മയുടെ നേത്രത്വത്തിൽ സ്കോട്ലാൻഡിലെ ഒരു ഡസനിലേറെ മലയാളി സംഘടനകൾ ചേർന്ന് നടത്തുന്ന യുസ്മ അവാർഡ് നിശയിലേയ്ക്കും യുസ്മ നാഷണൽ കലാമേളയിലേക്കും ലിവിംഗ്സ്റ്റൺ അർമാഡൈൽ അക്കാദമിയിൽ വച്ചു നടക്കുന്ന ഈ കലാമാമാങ്കം നേരിൽ കണ്ടാസ്വദിക്കാൻ എല്ലാ മലയാളി സുഹൃത്തുക്കളെയും ഹാർദ്ദവമായി സ്വാഗതം ചെയ്യുന്നു.

യുസ്മ അവാർഡ് നൈറ്റും യുസ്മ നാഷണൽ കലാമേളയും നടക്കുന്ന സ്ഥലത്തിൻ്റെ അഡ്രസ്സ് :

Armadale Academy
Bath gate
Livingston
EH48 3LX
Scotland.

അറബിക്കടലില്‍നിന്ന് ഇന്ത്യന്‍-ശ്രീലങ്കന്‍ നാവികസേനകള്‍ചേര്‍ന്ന് നടത്തിയ സംയുക്ത പരിശോധനയില്‍ ശ്രീലങ്കന്‍ബോട്ടില്‍ കടത്തുകയായിരുന്ന 500 കിലോ രാസലഹരി പിടികൂടി. ശ്രീലങ്കന്‍ പതാകയുള്ള രണ്ടു മീന്‍പിടിത്ത ബോട്ടുകളില്‍നിന്നാണ് 75 കോടിയോളം വിപണിവിലയുള്ള ക്രിസ്റ്റല്‍മെത്ത് പിടികൂടിയത്. രണ്ടുബോട്ടുകളും ഇതിലുണ്ടായിരുന്ന ഒന്‍പതു ജീവനക്കാരെയും തുടര്‍ നിയമനടപടിക്കായി ശ്രീലങ്കന്‍ നാവികസേനയ്ക്ക് കൈമാറി. ശ്രീലങ്കന്‍ പതാകയുള്ള മീന്‍പിടിത്തബോട്ടുകള്‍ മയക്കുമരുന്ന് കടത്താന്‍ സാധ്യതയുള്ളതായി ശ്രീലങ്കന്‍ നാവികസേന അറിയിക്കുകയായിരുന്നു.

ദക്ഷിണനാവിക ആസ്ഥാനത്തെ കപ്പലിന്റെയും രണ്ട് വിമാനങ്ങളുടെയും സഹായത്തോടെയാണ് രാസലഹരിയും ബോട്ടിലുണ്ടായിരുന്ന ഒന്‍പത് പേരെയും നാവികസേന പിടികൂടിയത്. ലോങ് റെയ്ഞ്ച് മാരിടൈം പട്രോള്‍ എയര്‍ക്രാഫ്റ്റിന്റെയും റിമോട്ട് പൈലറ്റഡ് എയര്‍ക്രാഫ്റ്റിന്റെയും സഹായത്തോടെയാണ് ബോട്ടുകളെ നിരീക്ഷിച്ചത്. ഗുരുഗ്രാമിലെ ഇന്‍ഫര്‍മേഷന്‍ ഫ്യൂഷന്‍ സെന്റര്‍ പ്രവര്‍ത്തനങ്ങള്‍ ഏകോപിപ്പിച്ചു.

പ്രാദേശിക സമുദ്രവെല്ലുവിളികളെ അഭിമുഖീകരിക്കാനും ഇന്ത്യന്‍മഹാസമുദ്ര മേഖലയിലെ സുരക്ഷ ഉറപ്പാക്കാനും ഇരുനാവികസേനകളുടെയും യോജിച്ച പ്രവര്‍ത്തനത്തിന് അടിവരയിടുന്നതാണ് മയക്കുമരുന്ന് പിടികൂടിയ സംഭവമെന്ന് ദക്ഷിണമേഖലാ നാവിക ആസ്ഥാനം അറിയിച്ചു.

മഞ്ഞുമ്മല്‍ ബോയ്‌സ് സിനിമയ്ക്കായി നിര്‍മ്മാതാക്കള്‍ സ്വന്തം കയ്യില്‍ നിന്ന് ഒരു രൂപ പോലും എടുത്തിട്ടില്ലെന്ന് പോലീസിന്റെ കണ്ടെത്തല്‍. നടന്‍ സൗബിന്‍ ഷാഹിര്‍ അടക്കമുള്ള പറവ ഫിലിംസ് ഉടമകള്‍ക്കെതിരായ വഞ്ചന കേസിലാണ് കണ്ടെത്തല്‍. നിരവധിപേർ ചേർന്ന് 28 കോടി രൂപ പറവ ഫിലിംസിന്റെ അക്കൗണ്ടില്‍ നിക്ഷേപിച്ചെങ്കിലും ആകെ സിനിമയ്ക്ക് ചെലവായത് 19കോടിക്ക് താഴെയെന്നും പോലീസ് റിപ്പോര്‍ട്ടില്‍ പറയുന്നു. പറവ ഫിലിംസിന്റെ ബാങ്ക് അക്കൗണ്ടുകള്‍ പരിശോധിച്ച ശേഷമാണ് മഞ്ഞുമ്മല്‍ ബോയ്‌സിന്റെ നിര്‍മ്മാണത്തിന് സൗബിനും പറവ ഫിലിംസിന്റെ മറ്റ് ഉടമകളും ഒരു രൂപ പോലും ചെലവഴിച്ചിട്ടില്ലെന്ന് പോലീസ് കണ്ടെത്തിയത്. പലരില്‍ നിന്നായി 28 കോടി രൂപയാണ് പറവയുടെ അക്കൗണ്ടിലേക്ക് എത്തിയത്. പക്ഷെ സിനിമയ്ക്കായി ചിലവായത് 19 കോടിക്ക് താഴെയാണ്. സിനിമ നിര്‍മ്മാണത്തിന്റെ ജി.എസ്.ടിയില്‍ നിന്നാണ് പോലീസ് ഇക്കാര്യം കണ്ടെത്തിയത്.

ഡ്രീം ബിഗ് ഫിലിംസ് ഉടമ സുജിത്തിനെതിരെയും പോലീസ് റിപ്പോര്‍ട്ടില്‍ പരാമര്‍ശമുണ്ട്. സിനിമയുടെ റിലീസിന്റെ സമയത്ത് പ്രതിസന്ധിയുണ്ടായപ്പോള്‍ സുജിത്ത് 11 കോടി രൂപ കൈമാറിയതായും റിപ്പോര്‍ട്ടില്‍ പറയുന്നു. സിനിമയുടെ ആദ്യത്തെ മുടക്കുമുതലായ 7 കോടി നല്‍കിയത് സിറാജ് ഹമീദ് എന്ന വ്യക്തിയാണ്. സിനിമയുടെ 40 ശതമാനം ലാഭവിഹിതം നല്‍കാമെന്ന കരാറാണ് ഉണ്ടായിരുന്നത്. ആ കരാര്‍ പിന്നീട് പാലിച്ചില്ല. ഇതാണ് പിന്നീട് പോലീസ് കേസാവുകയായിരുന്നു.

ചിത്രത്തിന്റെ നിര്‍മാതാക്കളായ പറവ ഫിലിംസുമായി ബന്ധപ്പെട്ടവര്‍ ലാഭവിഹിതമോ മുടക്കുമുതലോ നല്‍കാതെ ചതിച്ചെന്നായിരുന്നു സിറാജിന്റെ ആരോപണം. തുടര്‍ന്നുള്ള അന്വേഷണത്തില്‍ ഗുരുതരമായ സാമ്പത്തിക തട്ടിപ്പ് നടത്തിയെന്നായിരുന്നു പോലീസ് കണ്ടെത്തിയത്. ഈ റിപ്പോര്‍ട്ട് പോലീസ് ഹൈക്കോടതിയില്‍ സമര്‍പ്പിച്ചു. പോലീസ് റിപ്പോര്‍ട്ടിന്റെ പശ്ചാത്തലാണ് ആദായനികുതി വകുപ്പിന്റെയും ഇ.ഡിയുടെയും അന്വേഷണമുണ്ടായത്. ഇതിന്റെ ഭാഗമായി പറവ ഫിലിംസിന്റെ ഓഫീസിലും സൗബിന്‍ ഉള്‍പ്പടെയുള്ളവരുടെ വീട്ടിലൂം റെയ്ഡ് നടന്നിരുന്നു.