ന്യൂസ് ഡെസ്ക് മലയാളം യുകെ ന്യൂസ്

സമരത്തിന് ശേഷം ഇന്ന് ട്രെയിൻ സർവീസുകൾ പുനരാരംഭിക്കുമെങ്കിലും സാധാരണ രീതിയിൽ ഓടി തുടങ്ങാൻ സമയമെടുത്തേക്കും എന്ന് റിപ്പോർട്ടുകൾ . പല ട്രെയിനുകളും ഉച്ചയ്ക്ക് മുമ്പ് ഓടി തുടങ്ങില്ലെന്നാണ് പുറത്തുവരുന്ന വിവരങ്ങൾ സൂചിപ്പിക്കുന്നത്. ഇന്ന് യാത്രയ്ക്കായി ട്രെയിനിനെ ആശ്രയിക്കുന്നവർക്ക് ഒട്ടേറെ ബുദ്ധിമുട്ടുകൾ ഇത് കാരണം അഭിമുഖീകരിക്കേണ്ടതായി വന്നേക്കാം.

70 ശതമാനം സർവീസുകളും പ്രവർത്തിക്കുമെന്നാണ് നെറ്റ് വർക്ക് റെയിൽ അറിയിച്ചിരിക്കുന്നത്. എന്നാൽ ട്രെയിന്റെ സമയക്രമം പരിശോധിക്കണമെന്ന മുന്നറിയിപ്പും അവർ നൽകിയിട്ടുണ്ട്. രാവിലെ 7 .15 മുതൽ ചില സേവനങ്ങൾ പുന:സ്ഥാപിക്കാൻ തുടങ്ങുമെന്നാണ് സ്കോട്ട് റെയിൽ അറിയിച്ചിരിക്കുന്നത്. എന്നാൽ ഇന്ന് മുഴുവൻ തടസ്സമുണ്ടാകാനുള്ള സാധ്യതയും അവർ അറിയിച്ചിട്ടുണ്ട്.

പണപെരുപ്പത്തിനും ജീവിത ചിലവ് വർദ്ധനവിനും ആനുപാതികമായി ശമ്പള വർദ്ധനവിനായി യുകെയിലുടനീളമുള്ള റെയിൽവേ ജീവനക്കാരുടെ സമരം ജനജീവിതത്തെ സാരമായി ബാധിച്ചിരുന്നു. 14 ട്രെയിൻ കമ്പനികളിലെ ആയിരക്കണക്കിന് ജീവനക്കാർ സമരമുഖത്ത് ഇറങ്ങിയത് ട്രെയിൻ ഗതാഗതം താറുമാറാക്കിയിരുന്നു. ക്രിസ്മസിനു മുന്നോടിയായി സമരങ്ങളുടെ പരമ്പര തന്നെയായിരുന്നു രാജ്യത്ത് അരങ്ങേറിയത്.

ന്യൂസ് ഡെസ്ക് മലയാളം യുകെ ന്യൂസ്

അടുത്തവർഷം മുതൽ കോവിഡ് സംബന്ധമായ എല്ലാ വിവരങ്ങളും പ്രസിദ്ധീകരിക്കുന്നത് രാജ്യത്ത് അവസാനിപ്പിക്കുമെന്ന് റിപ്പോർട്ടുകൾ . മൂന്നുവർഷത്തിന് ശേഷമാണ് യുകെ ഹെൽത്ത് സെക്യൂരിറ്റി ഏജൻസി ഈ തീരുമാനം കൈകൊണ്ടിരിക്കുന്നത്. വൈറസിനൊപ്പം ജീവിക്കുക എന്ന നയത്തിന്റെ ഭാഗമായാണ് പ്രസ്തുത തീരുമാനം കൈകൊണ്ടിരിക്കുന്നത്.

അടുത്തവർഷം ജനുവരി മാസം മുതൽ വൈറസ് ബാധിതരുടെ വിവരങ്ങൾ, കോവിഡ് ബാധിച്ച് ആശുപത്രിയിലായവരുടെ എണ്ണം , മരണനിരക്ക് എന്നിവ സംബന്ധിച്ച വിവരങ്ങളാണ് പരസ്യമാക്കേണ്ട എന്ന തീരുമാനം എടുത്തിരിക്കുന്നത്. ഫലപ്രദമായ രീതിയിൽ വാക്സിനുകളും മറ്റു ചികിത്സാരീതികളും കൊണ്ട് രാജ്യം സാധാരണ നില കൈവരിച്ചതിനാൽ ഇനി കോവിഡ് സംബന്ധമായ വിവരങ്ങൾ പുറത്തുവിടുന്നതിൽ അർത്ഥമില്ലെന്ന് ചീഫ് ഡേറ്റാ സയന്റിസ്റ്റ് ഡോ. നിക്ക് വാട്ട് കിൻസ് പറഞ്ഞു. രോഗബാധിതരായ വ്യക്തിയിൽ നിന്ന് രോഗം മറ്റുള്ളവർക്ക് എത്രമാത്രം പകരും എന്നതിനെ സൂചിപ്പിക്കുന്ന ആർ- നിരക്കും ഇനി പരസ്യപ്പെടുത്തുന്നില്ല.

രാജ്യത്ത് കോവിഡ് ബാധ സ്ഥിരീകരിച്ചിട്ട് മൂന്ന് വർഷത്തോളമായി. വിവരങ്ങൾ പൊതുവായി പ്രസിദ്ധീകരിക്കുന്നില്ലെങ്കിലും ഡേറ്റ അവലോകനവും നിരീക്ഷണവും വീണ്ടും ഉണ്ടാകും. കോവിഡിന്റെ പുതിയ വകഭേദങ്ങൾ ഉടലെടുക്കാനുള്ള സാധ്യത നിലനിൽക്കുന്നത് കൊണ്ട് തുടർനിരീക്ഷണം വളരെ പ്രധാനപ്പെട്ടതാണെന്ന് ആരോഗ്യവിദഗ്ധർ അഭിപ്രായപ്പെട്ടു.

ന്യൂസ് ഡെസ്ക് മലയാളം യുകെ ന്യൂസ്

ലണ്ടൻ: ഇംഗ്ലണ്ടിൽ കുറ്റകൃത്യങ്ങൾ വർദ്ധിക്കുന്നതായി റിപ്പോർട്ട്‌. 2021 ഒക്‌ടോബറിനും 2022 ജൂണിനുമിടയിൽ കത്തി പോലുള്ള മാരകായുധങ്ങൾ ഉപയോഗിച്ചുള്ള 49,991 കേസുകൾ രജിസ്റ്റർ ചെയ്തിട്ടുണ്ടെന്ന് ഓഫീസ് ഫോർ നാഷണൽ സ്റ്റാറ്റിസ്റ്റിക്‌സ് പുറത്തുവിട്ട ക്രൈം ഡേറ്റാ പറയുന്നു. അതായത് ദൈന്യദിനം രാജ്യത്ത് 136 അക്രമസംഭവങ്ങൾ നടക്കുന്നുണ്ടെന്ന് ചുരുക്കം. മുൻ വർഷങ്ങളിലേക്കാൾ കുറ്റകൃത്യങ്ങൾ അനുദിനം വർധിക്കുകയാണെന്നും ജനസംഖ്യയ്ക്ക് ആനുപാതികമായി കേസുകൾ രജിസ്റ്റർ ചെയുന്നുണ്ട് എന്നും അധികൃതർ പറയുന്നു.

ഈ കാലയളവിൽ ഇംഗ്ലണ്ടിലും വെയിൽസിലും റിപ്പോർട്ട്‌ ചെയ്ത 679 കൊലപാതകങ്ങളിൽ 38 ശതമാനവും കത്തിപോലുള്ളവ ഉപയോഗിച്ചുള്ളതായിരുന്നു. ഈ വർഷം ജൂണിനും നവംബറിനുമിടയിൽ രജിസ്റ്റർ ചെയ്ത 6,843 കേസുകളിൽ 1973 ലധികവും മരണം സംഭവിച്ചതായിരുന്നു. സെൻട്രൽ ബറോ ഓഫ് വെസ്റ്റ്മിൻസ്റ്ററിലാണ് ഏറ്റവും കൂടുതൽ കേസുകൾ റിപ്പോർട്ട്‌ ചെയ്യുന്നത്. അതേസമയം ബ്രോംലി, കിംഗ്സ്റ്റൺ, റിച്ച്മണ്ട് എന്നിവിടങ്ങളിൽ കേസുകൾ വളരെ കുറവാണ്.

മറ്റ് പ്രദേശങ്ങളിലും കേസുകൾക്ക് കുറവൊന്നുമില്ല. കെൻസിംഗ്ടണിലും ചെൽസിയിലും 89ഉം, സൗത്ത്വാർക്കിൽ 273, ഗ്രീൻവിച്ചിൽ 113, ഇസ്ലിംഗ്ടണിൽ 120 എന്നിങ്ങനെയാണ് സമീപകാലയളവിൽ രേഖപ്പെടുത്തിയ കേസുകൾ. എന്നാൽ ഓഗസ്റ്റ് മാസമാണ് ഏറ്റവും കൂടുതൽ ദാരുണ സംഭവങ്ങൾ റിപ്പോർട്ട്‌ ചെയ്തത്. 1,125 കേസുകൾ വന്നത് അധികൃതരെ തന്നെ ഞെട്ടിച്ചിരിക്കുകയാണ്. ലണ്ടനിൽ അരങ്ങേറുന്ന ദാരുണമായ സംഭവങ്ങളിൽ പകുതിയിലധികവും ക്വട്ടേഷൻ സംഘങ്ങളുമായി ബന്ധപ്പെട്ടുള്ളതാണെന്നാണ് മേയർ സാദിഖ് ഖാൻ പറയുന്നത്

നോർത്ത് വെയിൽസ്‌: ക്രിസ്മസ് ദിനത്തിൽ യുകെ മലയാളികൾക്ക് വേദനയായി അങ്കമാലി കരയാമ്പറമ്പ് കാളാംപറമ്പിൽ ജീജോ ജോസിന്റെ (46) മരണം. ജീവിത പ്രതീക്ഷയോടും ജീവന്റെ നിലനിൽപ്പും പ്രതീക്ഷിച്ച് യു കെ യിൽ എത്തി നാല് മാസം തികയും മുമ്പ് ആണ് മരണത്തിന്റെ രംഗപ്രവേശം. മാഞ്ചസ്റ്ററിനടുത്തു ഡൻബിഗ് ഷെയർ, ബോഡാൽവിടാൻ കമ്മ്യുണിറ്റിയിൽ ഗ്ലാൻ ഗ്ലാഡ്‌ ഹോസ്പിറ്റലിൽ വെച്ചാണ് മരണം സംഭവിച്ചത്.

ജീജോ നാട്ടിൽ വെച്ച് തന്നെ ക്യാൻസർ രോഗത്തിൽ ചികിത്സയിലായിരുന്നെങ്കിലും രോഗം നിയന്ത്രണവിധേയം എന്ന് കരുതിയിരുന്നു. നോർത്ത് വെയിൽസിൽ സീനിയർ കെയർ ആയി കഴിഞ്ഞ വര്ഷം എത്തിയ തന്റെ ഭാര്യ നിഷയും  മൂന്നു മക്കളുമായി ജീവിതം പടുത്തുയർത്തുവാനായി നാല് മാസങ്ങൾക്ക് മുൻപ് യുകെയിൽ എത്തിച്ചേർന്നത്.

കാളാംപറമ്പിൽ വർക്കി ജോസ്, ജെസ്സി ജോസ് എന്നി ദമ്പതികളുടെ മകനാണ് പരേതനായ സിജോ ജോസ്. സുജ, റോബിൻ എന്നിവർ സഹോദരങ്ങളും. ഭാര്യ നിഷ ജീജോ. ജോഷ്വാ (13) ജൊഹാൻ (9)ജ്യുവൽ മറിയ (7) എന്നിവർ മക്കളാണ്.

മൃതദേഹം നാട്ടിൽ കൊണ്ടുപോയി അന്ത്യോപചാര ശുശ്രുഷകൾ നടത്തുവാനാണ് കുടുംബാംഗങ്ങളുടെ ആഗ്രഹം. പ്രാദേശിക മലയാളി അസോസിയേഷനും ബന്ധു മിത്രാദികളും കൂട്ടുകാരും  കുടുംബത്തിന് ആശ്വാസമായി ഒപ്പം ഉണ്ട്.

ജീജോ ജോസിന്റെ അകാല വേർപാടിൽ മലയാളം യുകെ ആദരാഞ്ജലികൾ അർപ്പിക്കുന്നതിനൊപ്പം ദുഃഖിതരായ ബന്ധുമിത്രാദികളുടെ ദുഃഖത്തിൽ പങ്കുചേരുകയും ചെയ്യുന്നു.

ന്യൂസ് ഡെസ്ക് മലയാളം യുകെ ന്യൂസ്

ലണ്ടൻ: യാത്രക്കാരന്റെ ലാപ്ടോപ്പിന് തീപിടിച്ചതിനെ തുടർന്ന് 127 പേരുമായി പോയ ജെറ്റ് ബ്ലൂ വിമാനം അടിയന്തിരമായി നിലത്തിറക്കി. ശനിയാഴ്ച വൈകുന്നേരം ന്യൂയോർക്കിലെ ജെഎഫ്‌കെ ഇന്റർനാഷണൽ എയർപോർട്ടിലായിരുന്നു സംഭവം.

തീപ്പിടിത്തത്തിൽ എഴ് യാത്രക്കാർക്ക് കൈക്ക് പൊള്ളലേൽക്കുകയും കുറച്ച് പേർക്ക് പുക ശ്വസിക്കാൻ ബുദ്ധിമുട്ട് നേരിടുകയും ചെയ്തു. അപകടകരമായ സാഹചര്യത്തിൽ നിന്നും രക്ഷപ്പെട്ടതിന്റെ ഞെട്ടലിൽ നിന്നും യാത്രക്കാർ ഇതുവരെ പുറത്ത് വന്നിട്ടില്ല. ലാപ്ടോപ്പിന് തീപിടിച്ചത് ശ്രദ്ധയിൽ പെട്ടതിനെ തുടർന്ന് യാത്രക്കാർ നടത്തിയ സമയോചിതമായ ഇടപെലിനെ തുടർന്നാണ് വൻ ദുരന്തം ഒഴിവായത്.

അടിയന്തര രക്ഷാ സംവിധാനം ഉപയോഗിച്ച് 67 പേരെ ആദ്യം ജീവനക്കാർ ഒഴിപ്പിച്ചു. ബാക്കി 60 പേരെ സാധാരണഗതിയിൽ പുറത്തെത്തിച്ചെന്നും എയർപോർട്ട് അതോറിറ്റി അറിയിച്ചു. അപകടത്തെ തുടർന്ന് ജെറ്റ് ബ്ലൂ അധികൃതർ വിശദീകരണവുമായി രംഗത്ത് വന്നിട്ടുണ്ട്. സുരക്ഷയാണ് തങ്ങളുടെ പ്രഥമ പരിഗണനയെന്നും, സംഭവത്തെ കുറിച്ച് വിശദമായ അന്വേഷണം നടത്തുകയാണെന്നും അധികൃതർ പറഞ്ഞു.

ന്യൂസ് ഡെസ്ക് മലയാളം യുകെ ന്യൂസ്

കാബൂൾ : അഫ്ഗാനിസ്ഥാനിൽ താലിബാൻ വിലക്കിയതിനെ തുടർന്ന് അഞ്ച് പ്രമുഖ സർക്കാരിതര സംഘടനകൾ (എൻ‌ജി‌ഒകൾ) സേവനം താൽക്കാലികമായി നിർത്തിവച്ചു. വനിതാ ജീവനക്കാരില്ലാതെ ജോലി തുടരാൻ കഴിയില്ലെന്ന് കെയർ ഇന്റർനാഷണൽ, നോർവീജിയൻ റെഫ്യൂജി കൗൺസിൽ (എൻആർസി), സേവ് ദി ചിൽഡ്രൻ എന്നിവർ പറഞ്ഞു. ഇന്റർനാഷണൽ റെസ്ക്യൂ കമ്മിറ്റിയും സേവനങ്ങൾ താൽക്കാലികമായി നിർത്തിവച്ചു. അതേസമയം മിക്ക സേവനങ്ങളും നിർത്തുകയാണെന്ന് ഇസ്ലാമിക് റിലീഫ് പറഞ്ഞു.

അഫ്ഗാനിസ്ഥാനിലെ ഭരണകക്ഷിയായ താലിബാൻ സ്ത്രീകളുടെ അവകാശങ്ങൾ അടിച്ചമർത്തുന്നത് തുടരുകയാണ്. സ്ത്രീകൾക്ക് സർവകലാശാലയിൽ പ്രവേശനം വിലക്കിയതിന് തൊട്ടുപിന്നാലെയാണ് എൻജിഒകൾക്കെതിരെ വിലക്ക് വന്നത്. ഹിജാബ് ധരിക്കാതെ ഡ്രസ് കോഡുകൾ ലംഘിച്ച് സ്ത്രീകൾ ജോലി ചെയ്യുന്നതായി താലിബാൻ സാമ്പത്തിക മന്ത്രാലയ വക്താവ് അബ്ദുൽ റഹ്മാൻ ഹബീബ് ആരോപിച്ചു. അതേസമയം, സ്ത്രീകളെ അവരുടെ ജോലി ചെയ്യാൻ അനുവദിക്കണമെന്ന് ആവശ്യപ്പെട്ട് നിരവധി ഗ്രൂപ്പുകൾ രംഗത്തെത്തി.

ദരിദ്ര കുടുംബങ്ങൾക്ക് ഉപജീവനമാർഗവും വിദ്യാഭ്യാസവും ചില ആരോഗ്യ സംരക്ഷണ പദ്ധതികളും ഉൾപ്പെടെയുള്ളവ നിർത്തിവയ്ക്കാനുള്ള തീരുമാനം ബുദ്ധിമുട്ടേറിയതാണെന്ന് ഇസ്ലാമിക് റിലീഫ് പറഞ്ഞു. സ്ത്രീ എൻജിഒ പ്രവർത്തകർക്ക് ഏർപ്പെടുത്തിയിരിക്കുന്ന വിലക്ക് ഉടൻ പിൻവലിക്കണമെന്ന് ഇസ്ലാമിക് റിലീഫ് അഫ്ഗാൻ അധികൃതരോട് ആവശ്യപ്പെട്ടു.

ന്യൂസ് ഡെസ്ക് മലയാളം യുകെ ന്യൂസ്

ലണ്ടൻ: ക്രിസ്മസ് രാത്രിയിൽ ലിവർപൂളിൽ പോലീസ് വാഹനം ഇടിച്ചുണ്ടായ അപകടത്തിൽ മരിച്ച സ്ത്രീയെ തിരിച്ചറിഞ്ഞു. റേച്ചൽ ലൂയിസ് മൂർ എന്ന ഇരുപത്തിരണ്ടുകാരിയാണ് മരണപ്പെട്ടത്. ദാരുണമായ സംഭവമാണ് നടന്നതെന്നും, റേച്ചൽ അപകടസ്ഥലത്ത് തന്നെ മരണപ്പെട്ടെന്നുമാണ് മെർസിസൈഡ് പോലീസ് പറയുന്നത്.

റേച്ചൽ എല്ലാവർക്കും പ്രിയപ്പെട്ടവൾ ആയിരുന്നെന്നും, അവളെ അടുത്തറിഞ്ഞവർ ഒരിക്കലും മറക്കില്ലെന്നും കുടുംബം പറഞ്ഞു. കുറ്റവാളികളെ എത്രയും പെട്ടെന്ന് നിയമത്തിനു മുന്നിൽ കൊണ്ടുവരണമെന്നും, മുഖം നോക്കാതെയുള്ള നടപടി സ്വീകരിക്കണമെന്നുമാണ് കുടുംബം ആവശ്യപ്പെടുന്നത്. സംഭവത്തെ കുറിച്ച് കൂടുതലായി എന്തെങ്കിലും വിവരം കൈവശമുള്ളവർ പോലീസുമായി ബന്ധപ്പെടണമെന്നും അധികൃതർ പറഞ്ഞു.

പോലീസിനെ കൂടാതെ സ്വതന്ത്ര ഏജൻസിയായ ഐഒപിസിയും അന്വേഷണം നടത്തുന്നുണ്ടെന്നും ഡിറ്റക്ടീവ് സർജന്റ് കുർട്ട് ടിംപ്സൺ പറഞ്ഞു. അപകടത്തിന്റെ സിസിടിവി ദൃശ്യങ്ങൾ പോലീസ് ശേഖരിച്ചിട്ടുണ്ട്. ഗ്രേറ്റർ മാഞ്ചസ്റ്ററിലെ ഓൾഡ്ഹാമിൽ 53 കാരിയായ സ്ത്രീ പോലീസ് വാഹനമിടിച്ചു മരണപ്പെട്ടിരുന്നു. അതിന് തൊട്ടുപിന്നാലെയാണ് ദാരുണമായ ഈ സംഭവം.

എബ്രഹാം മാർ സ്‌റ്റെഫാനോസ് മെത്രാപ്പോലീത്താ

കർത്താവിൽ സ്നേഹിതരെ
ഒരു ക്രിസ്തുമസ് കാലം കൂടി വന്നിരിക്കുന്നു. എല്ലാവർക്കും ക്രിസ്തുമസിന്റെയും പുതുവത്സരത്തിന്റെയും ആശംസകൾ നേരുന്നു.നമ്മുടെ ജീവിത സാഹചര്യങ്ങളെ കർത്താവിന്റെ മനുഷ്യാവതര സംഭവങ്ങളുമായി ചേർത്ത് ചിന്തിക്കുകയും അതിലൂടെ ആശ്വാസവും പ്രത്യാശയും നേടുകയെന്നത് അനുഗ്രഹകരമായ ഒരു അനുശീലനമാണ്. അപ്പനേയും അമ്മയേയും നാടിനെയും പിരിഞ്ഞുള്ള യാത്ര അബ്രഹാമിൽ നാം കാണുന്നു. അത് ഒരുവിശ്വാസത്തിന്റെ യാത്രയാണ്. ചെല്ലുന്ന ഇടത്ത് ദൈവം സർവ്വതും ഒരുക്കും എന്നുള്ള ഉറപ്പിന്റെ നേരാണ് ആ യാത്രയുടെ ശക്തി. അപരിചിത ദേശത്ത് നമ്മുക്കു വേണ്ടി ആരോ പ്രവർത്തിക്കുന്നുണ്ടെന്ന ബോധം ഒരു തിരിച്ചറിവാണ്. നമ്മുടെ കഴിവിന്റയോ മേന്മയുടെയോ പ്രതിഫലമായിട്ടല്ല   ജീവിതം നമ്മൾക്ക് നൽകുന്ന അനുഭവങ്ങൾ.

ദൈവം മനുഷ്യനായി നമ്മുടെ ഇടയിൽ പാർത്തതിന്റെ ഈ സദ് വാർത്താ കാലത്ത് ഒരു വേദപുസ്തക ഭാഗം കൂടി ഓർമ്മിപ്പിക്കുന്നു. ഹേരോദാരാജാവിന്റെ മരണം വരെ ജോസഫ് കുടുംബവുമായി മിസ്രയീമിൽ പ്രവാസികളായി കഴിഞ്ഞു (മത്താ. 2.15). യേശു കടന്നുപോകാത്ത മാനുഷിക പ്രതിസന്ധികളില്ല. തന്റെ മനുഷ്യ പരമ്പരയിൽ മോശയേ പോലെയുള്ള മഹാരഥൻമാർ അനുഭവിച്ച പ്രവാസ ജീവിതത്തിന്റെയും മരു പ്രയാണത്തിന്റെയും കനൽ വഴികളിലൂടെയാണ് ജോസഫ് അമ്മ മറിയത്തോടും കുഞ്ഞിനോടുമൊപ്പം മിസ്രേമിൽ പാർത്തത്. മൂന്നു മൂന്നര വർഷക്കാലം യേശു കുഞ്ഞു മോശയുടെ വഴിയിൽ പ്രവാസിയായിരുന്നു. അപരിചിതത്ത്വം മതിലായ, സ്വന്തംഭാഷയ്ക്ക് യാതൊരർത്ഥവുമില്ലാത്ത, പ്രാണസ്നേഹിതർ വഴി കാട്ടാനില്ലാത്ത , ഇനിയെന്ത് എന്ന ചോദ്യം മാത്രം എപ്പോഴും ഉയരുന്ന പ്രവാസത്തിന്റെ പെരും കാലം. പക്ഷേ ആ കഠിന കാലവും നമ്മൾ അതിജീവിക്കും. മോശയെ പോലെ രാജകുമാരൻമാരും രാജകുമാരിമാരുമായി നമ്മൾ ജീവിക്കും. അതാണ് ചരിത്രം. പക്ഷേ പലപ്പോഴും നമ്മുടെ ആദ്യ പ്രതിസന്ധികളുടെ നാളുകകളെയും കൂട്ടായി നിന്നവരെയും ചിലപ്പൊഴൊക്കെ നമ്മൾ മറക്കും. ഈ ക്രിസ്മസ് കാലം ഓർമ്മയുടേതാകട്ടെ . പൈതൽ പ്രായം മുതൽ ഈ പ്രവാസത്തിലും നമ്മേ നടക്കാൻ പ്രാപ്താനാക്കിയ ദൈവത്തേ ഓർക്കാം. നമ്മുടെ മനുഷ്യത്ത്വത്തിന്റ മാതൃകയും മൂശയുമായ മാതാപിതാക്കളെ ഓർക്കാം. ബലം നല്കിയ സൗഹൃദങ്ങളെ ഓർക്കാം. ഓർമയുടെ ഉതിർന്നു പോകാത്ത സ്നേഹത്തിൽ യേശു രക്ഷകന്റെ മനുഷ്യാവതര സ്മരണ തലമുറകൾക്ക് കൈമാറാം.

സ്നേഹ സുസ്മരണകളോടെ

എബ്രഹാം മാർ സ്‌റ്റെഫാനോസ് മെത്രാപ്പോലീത്താ

ന്യൂസ് ഡെസ്ക് മലയാളം യുകെ ന്യൂസ്

ലണ്ടൻ:അന്തരിച്ച പെഡോഫിൽ ഫിനാൻഷ്യർ ജെഫറി എപ്‌സ്റ്റൈനുമായുള്ള ബന്ധത്തെ ചുറ്റിപ്പറ്റിയുള്ള അഴിമതിയുടെ പശ്ചാത്തലത്തിൽ ആൻഡ്രൂ രാജകുമാരനെ രാജകുടുംബത്തിൽ നിന്ന് പുറത്താക്കി. ഇതേ തുടർന്ന് കൊട്ടാരവുമായുള്ള ഔദ്യോഗിക ബന്ധങ്ങൾ നിലച്ചതായും വാർത്തകൾ പുറത്ത് വരുന്നുണ്ട്.

രാജാവിന്റെ തീരുമാനത്തെ തുടർന്ന് കത്തിടപാടുകൾക്ക് പോലും രാജകുടുംബത്തിന്റെ വിലാസം ആൻഡ്രൂ രാജകുമാരന് ഇനി ഉപയോഗിക്കാൻ കഴിയില്ല. മൂന്നു വർഷം മുൻപാണ് ജോലിയിൽ നിന്ന് അദ്ദേഹം വിരമിച്ചത്. ഗ്രനേഡിയർ ഗാർഡ്‌സിന്റെ കേണലായ ഡ്യൂക്കിന്റെ പകരക്കാരനായി കോൺസോർട്ട് കാമില രാജ്ഞിയെ പ്രഖ്യാപിച്ചതിന് പിന്നാലെയാണ് നടപടി വന്നിരിക്കുന്നത്.

2017 ൽ പിതാവ് എഡിൻബെർഗ് ഡ്യുക്കിൽ നിന്നാണ് ആൻഡ്രൂ രാജകുമാരന് ഗ്രനേഡിയർ ഗാർഡിന്റെ കേണൽ സ്ഥാനം ലഭിച്ചത്. 2019 ൽ അദ്ദേഹം ബിബിസിയ്ക്ക് നൽകിയ അഭിമുഖത്തെ തുടർന്നുണ്ടായ വിവാദത്തിൽ ഔദ്യോഗിക ചുമതലകളിൽ നിന്ന് ഒഴിയാൻ രാജ്ഞി നിർബന്ധിച്ചിരുന്നു. എന്നാൽ പിന്നീട് പലവിധ വിവാദങ്ങൾ ഉയർന്നിരുന്നെങ്കിലും അതെല്ലാം അവഗണിച്ചുകൊണ്ട് സമവായത്തിൽ മുൻപോട്ട് കൊണ്ടുപോകാൻ അദ്ദേഹം ശ്രമിച്ചിരുന്നു. അതേസമയം രാജകുമാരൻ നാളെ കുടുംബത്തിലെ ക്രിസ്മസ് വിരുന്നിന്റെ ഭാഗമായി സാൻഡ്രിംഗ്ഹാമിൽ ചാൾസ് രാജാവിനോപ്പം ഒത്തുകൂടുമെന്ന് മാധ്യമങ്ങൾ റിപ്പോർട്ട്‌ ചെയ്യുന്നുണ്ട്.

ന്യൂസ് ഡെസ്ക് മലയാളം യുകെ ന്യൂസ്

യു കെ :- വർണ്ണശബളമായ ലൈറ്റുകളുടെയും, ക്രിസ്മസ് അലങ്കാരങ്ങളുടെയും പശ്ചാത്തലത്തിൽ, തന്റെ അമ്മ എലിസബത്ത് രാജ്ഞിക്ക് പ്രണാമം അർപ്പിച്ച് ചാൾസ് രാജാവ് തന്റെ ക്രിസ്മസ് ദിന സന്ദേശം സെന്റ് ജോർജ് ചാപ്പലിൽ റെക്കോർഡ് ചെയ്തു. വിൻഡ്സർ കാസ്റ്റിലിലെ സെന്റ് ജോർജ്ജ് ചാപ്പലിൽ രാജ്ഞിയുടെ മൃതദേഹം അടക്കിയ സ്ഥലത്തിനടുത്ത് നിന്നാണ് ചാൾസ് രാജാവ് തന്റെ പ്രസംഗം റെക്കോർഡ് ചെയ്തത്. ക്രിസ്മസ് ദിനത്തിൽ ഉച്ചകഴിഞ്ഞ് 3 മണിക്ക് സംപ്രേക്ഷണം ചെയ്യുന്ന സന്ദേശത്തിൽ അദ്ദേഹം എലിസബത്ത് രാജ്ഞിയെ സ്മരിക്കുമെന്ന് ജനങ്ങൾ പ്രതീക്ഷിക്കുന്നു. മുൻകൂട്ടി റെക്കോർഡ് ചെയ്ത പ്രസംഗ സമയത്ത് എടുത്ത ചിത്രത്തിൽ രാജാവ് കടും നിറത്തിലുള്ള നീല സ്യൂട്ട് ധരിച്ചിരിക്കുന്നതായാണ് ചിത്രീകരിച്ചിരിക്കുന്നത്. എലിസബത്ത് രാജ്ഞിയുടെ അതേ പാതയിൽ വളരെ മനോഹരമായി വസ്ത്രം ധരിക്കണമെന്ന ആശയത്തെ ചാൾസ് രാജാവും പിന്തുടരുന്നുവെന്നാണ് ഇതിൽ നിന്നും വ്യക്തമാകുന്നത്.

സാധാരണയായി എലിസബത്ത് രാജ്ഞി ബെക്കിങ്ഹാം കൊട്ടാരത്തിലെ തന്റെ ഇരിപ്പിടത്തിൽ ഇരുന്നു കൊണ്ടായിരുന്നു ക്രിസ്മസ് സന്ദേശം നൽകിയിരുന്നത്. എന്നാൽ ചാൾസ് രാജാവ് ഇത്തവണ മുഴുവൻ സമയവും നിന്നുകൊണ്ടാണ് പ്രസംഗം നൽകുന്നത്. 74കാരനായ പുതിയ രാജാവ് എന്താണ് പറയുന്നതെന്ന് കേൾക്കാനുള്ള ആകാംക്ഷയിലാണ് ജനങ്ങൾ. രാജാവിന്റെ പിന്നിൽ കാണുവാൻ സാധിക്കുന്ന ക്രിസ്മസ് ട്രീയിൽ പ്രകൃതിദത്ത ഉൽപ്പന്നങ്ങളായ പൈൻ കോണുകളും മറ്റുമാണ് അലങ്കരിക്കാൻ ഉപയോഗിച്ചിരിക്കുന്നത്. ഇത് രാജാവ് മുന്നോട്ടുവെക്കുന്ന പുതിയ മാർഗ്ഗദർശത്തെയാണ് വെളിവാക്കുന്നത്.

തന്റെ അമ്മയുടെ മാർഗ്ഗം പിന്തുടരുന്നതോടൊപ്പം തന്റേതായ ചില കയ്യൊപ്പുകളും പതിപ്പിക്കുന്നതിനാണ് രാജാവ് ശ്രമിക്കുന്നതെന്ന് സെന്റ് ജോർജ് ചാപ്പലിലെ അദ്ദേഹത്തിന്റെ പ്രസംഗത്തിലൂടെ വെളിവാകുന്നുണ്ടെന്ന് കൊട്ടാരത്തിന്റെ അടുത്ത വൃത്തങ്ങളിൽ ഒരാൾ വ്യക്തമാക്കി. ഹാരിയും മേഗനും ചേർന്ന് പുറത്തിറക്കിയ നെറ്റ്ഫ്ലിക്സ് സീരീസ് അവസാനിക്കുന്നതിന് രണ്ട് ദിവസം മുൻപാണ് രാജാവ് തന്റെ പ്രസംഗം റെക്കോർഡ് ചെയ്തതെന്നാണ് റിപ്പോർട്ടുകൾ വ്യക്തമാക്കുന്നത്. പ്രസംഗത്തെ സംബന്ധിക്കുന്ന കൂടുതൽ വിവരങ്ങൾ ഒന്നും തന്നെ കൊട്ടാരം അധികൃതർ പുറത്തുവിട്ടിട്ടില്ല.