ന്യൂസ് ഡെസ്ക് മലയാളം യുകെ

ഇന്ത്യയിലെ ജനങ്ങൾക്ക് ഇപ്പോൾ ഭാഗിക സ്വാതന്ത്ര്യം മാത്രമേ ഉള്ളൂ എന്ന വിവാദ പരാമർശവുമായി അമേരിക്കൻ ആസ്ഥാനമായി പ്രവർത്തിക്കുന്ന ഫ്രീഡം ഹൗസ് റിപ്പോർട്ട് പുറത്തുവിട്ടു . ഇന്ത്യയുടെ സ്റ്റാറ്റസ് ഫ്രീ കൺട്രിക്ക് പകരം പാർഷ്യലി ഫ്രീ എന്നാണ് റിപ്പോർട്ടിൽ രേഖപ്പെടുത്തിയിരിക്കുന്നത് . ആഗോള രാഷ്ട്രീയ അവകാശങ്ങളും സ്വാതന്ത്ര്യവും സംബന്ധിച്ച വാർഷിക റിപ്പോർട്ടിലാണ് ഈ പരാമർശം ഉൾപ്പെടുത്തിയിരിക്കുന്നത്. 2014 – ൽ പ്രധാനമന്ത്രി നരേന്ദ്രമോദി അധികാരമേറ്റതിനുശേഷം ഇന്ത്യയിൽ പൗരസ്വാതന്ത്ര്യം കുറഞ്ഞുവെന്ന് റിപ്പോർട്ടിൽ ചൂണ്ടിക്കാണിക്കുന്നു.

റിപ്പോർട്ടിലെ പരാമർശങ്ങളെ കുറിച്ച് ഇന്ത്യയുടെ ഭാഗത്തുനിന്നും ഔദ്യോഗിക പ്രതികരണങ്ങൾ ഒന്നും തന്നെ ഉണ്ടായിട്ടില്ല. രാഷ്ട്രീയ സ്വാതന്ത്ര്യത്തെയും മനുഷ്യാവകാശങ്ങളെയും കുറിച്ച് ഗവേഷണം നടത്തുന്ന ഒരു നോൺ പ്രോഫിറ്റ് ഓർഗനൈസേഷൻ ആണ് ഫ്രീഡം ഹൗസ്. രാഷ്ട്രീയ സ്വാതന്ത്ര്യത്തിന്റെ കാര്യത്തിൽ ഇന്ത്യയുടെ പതനം ലോക ജനാധിപത്യ നിലവാരത്തെ കൂടുതൽ ദോഷകരമായി ബാധിക്കുമെന്ന് റിപ്പോർട്ടിൽ ചൂണ്ടിക്കാണിക്കുന്നു. പൗരത്വഭേദഗതി നിയമത്തിനെതിരെ ഉൾപ്പെടെയുള്ള സമരങ്ങളെ അടിച്ചമർത്തിയത് ഇന്ത്യയുടെ റേറ്റിംഗിൽ ഇടിവ് വരുവാൻ കാരണമായതായി ചൂണ്ടിക്കാണിക്കപ്പെടുന്നു. കർഷകസമരത്തോട് ഇന്ത്യൻ ഗവൺമെൻറ് സ്വീകരിച്ച സമീപനവും ആഗോളതലത്തിൽ വൻ ചർച്ചയായിരുന്നു. കോവിഡ് – 19 പ്രതിരോധത്തിന്റെ ഭാഗമായി മുന്നറിയിപ്പില്ലാതെ ഏർപ്പെടുത്തിയ ലോക്ക്ഡൗൺ ഇന്ത്യയിലെ പൗരാവകാശത്തെ കൂടുതൽ വഷളാക്കിയതായി റിപ്പോർട്ടിൽ പറയുന്നു. ലോക്ക് ഡൗൺ മൂലം ദശലക്ഷക്കണക്കിന് കുടിയേറ്റ തൊഴിലാളികൾ ഇന്ത്യയിലെ വിവിധ നഗരങ്ങളിൽ കുടുങ്ങി പോയിരുന്നു . പലർക്കും നൂറുകണക്കിന് മൈലുകൾ സ്വദേശത്തേക്ക് എത്താനായി നടക്കേണ്ടതായി വന്നു. ഇതിന്റെ ഫലമായി പലരുടെയും ജീവൻ നഷ്ടമായത് ആഗോളതലത്തിൽ വൻ വാർത്താ പ്രാധാന്യം നേടിയിരുന്നു.

ന്യൂസ് ഡെസ്ക് മലയാളം യുകെ

ബക്കിംഗ്ഹാം: കൊട്ടാരം ഉദ്യോഗസ്ഥരെ മേഗൻ ഭീഷണിപ്പെടുത്തിയെന്ന കേസിൽ അന്വേഷണം ഉണ്ടാകുമെന്ന് ബക്കിംഗ്ഹാം കൊട്ടാരം. രാജകീയ പദവിയിൽ ഇരിക്കുമ്പോഴാണ് മേഗന് നേരെ പരാതി ഉയർന്നത്. തനിക്കെതിരായ ആരോപണത്തിൽ മേഗൻ ദുഃഖിതയാണെന്ന് അവളുടെ വക്താവ് അറിയിച്ചു. “ഭീഷണിപ്പെടുത്തലോ ഉപദ്രവമോ സഹിക്കില്ല” എന്ന് കൊട്ടാരം പറഞ്ഞു. ഹാരിയും മേഗനും കെൻസിംഗ്ടൺ കൊട്ടാരത്തിൽ താമസിക്കുന്നതിനിടെയാണ് 2018 ഒക്ടോബറിൽ പരാതി ഉയരുന്നത്. സ്റ്റാഫ് അംഗത്തിൽ നിന്ന് ചോർന്ന ഇമെയിലിൽ രണ്ട് സ്വകാര്യ സഹായികളെ മേഗൻ വീട്ടിൽ നിന്ന് പുറത്താക്കിയതായി ആരോപിക്കുന്നു. ടൈംസ് ദിനപത്രമാണ് ഇത് പുറത്തുവിട്ടത്. മൂന്നാമത്തെ സ്റ്റാഫ് അംഗത്തെ മേഗൻ ഭീഷണിപ്പെടുത്തിയതായും പറയുന്നു.

കൊട്ടാരം ഉദ്യോഗസ്ഥരെ നിയമിക്കുന്നതിന്റെ ഉത്തരവാദിത്തമുള്ള ബക്കിംഗ്ഹാം കൊട്ടാരം പ്രസ്താവനയിൽ ഇപ്രകാരം പറഞ്ഞു “മേഗനെതിരെ മുൻ സ്റ്റാഫുകൾ നടത്തിയ അവകാശവാദങ്ങളെത്തുടർന്ന് ഞങ്ങൾക്ക് വളരെയധികം ആശങ്കയുണ്ട്. അതനുസരിച്ച്, ഞങ്ങളുടെ എച്ച്ആർ ടീം പത്രലേഖനത്തിൽ പറഞ്ഞിരിക്കുന്ന സാഹചര്യങ്ങൾ പരിശോധിക്കും. അക്കാലത്ത് ഉൾപ്പെട്ടിരിക്കുന്ന സ്റ്റാഫ് അംഗങ്ങളെ, വീട്ടിൽ നിന്ന് പുറത്തുപോയവരെയടക്കം അവശ്യമെങ്കിൽ തിരികെ വിളിക്കും. ഇന്നലെ പ്രഖ്യാപിച്ച അന്വേഷണം, ബക്കിംഗ്ഹാം കൊട്ടാരം ഇക്കാര്യത്തെ ഗൗരവമായി കാണുന്നുവെന്നതിന്റെ വ്യക്തമായ സൂചനയാണ്.

മാർച്ച് 7 ഞായറാഴ്ച വൈകുന്നേരം യുഎസിലെ സിബിഎസിൽ സംപ്രേഷണം ചെയ്യുന്ന ഓപ്ര വിൻഫ്രെയുമായുള്ള മേഗന്റെയും ഹാരി രാജകുമാരന്റെയും ടിവി അഭിമുഖത്തിന് മുന്നോടിയാണിത്. യുകെയിൽ, മാർച്ച് 8 തിങ്കളാഴ്ച 21:00 ജിഎംടിയിൽ അഭിമുഖം ഐടിവിയിൽ പ്രദർശിപ്പിക്കും. രാജകീയ പദവി, വിവാഹം, മാതൃത്വം എന്നീ നിലകളിലേക്ക് ചുവടുവെക്കുന്നതിനെക്കുറിച്ചും പൊതുജന സമ്മർദ്ദത്തിൽ ജീവിതം എങ്ങനെ കൈകാര്യം ചെയ്യുന്നുവെന്നതിനെക്കുറിച്ചും അഭിമുഖം നടത്തുമെന്ന് സിബിഎസ് അറിയിച്ചു. ഹാരിയും അഭിമുഖത്തിൽ പങ്കെടുക്കും. കഴിഞ്ഞ വർഷം യുഎസിലേക്കുള്ള അവരുടെ നീക്കത്തെക്കുറിച്ചും ഭാവി പദ്ധതികളെക്കുറിച്ചും ദമ്പതികൾ സംസാരിക്കും.

ന്യൂസ് ഡെസ്ക് മലയാളം യുകെ

യു എസ്‌ :- കോവിഡ് 19 വാക്‌സിൻ എടുത്ത സ്ത്രീകളിൽ സ്തനങ്ങളിൽ ചെറിയതോതിലുള്ള മുഴകൾ ഉണ്ടാകുന്നതായി യുഎസ് ഡോക്ടർമാരുടെ റിപ്പോർട്ട്. വാക്സിൻ എടുത്ത ശേഷം ഉടൻ തന്നെ മമ്മോഗ്രാം ചെയ്യുന്ന സ്ത്രീകളിൽ ഇത്തരത്തിലുള്ള മുഴകൾ കാണുന്നുണ്ട്. ഇത് ബ്രെസ്റ്റ് ക്യാൻസറിനെ സംബന്ധിച്ച് അനാവശ്യ ഭീതികൾ ജനങ്ങളിൽ ഉണ്ടാക്കുന്നതായും റിപ്പോർട്ടുകളുണ്ട്. അതിനാൽ തന്നെ വാക്സിൻ ലഭ്യമായ ശേഷം നാല് ആഴ്ചയ്ക്ക് ശേഷം മാത്രമേ ഇത്തരം ടെസ്റ്റുകൾ ചെയ്യാവൂ എന്ന് ഡോക്ടർമാർ നിഷ്കർഷിക്കുന്നു. ബോസ്റ്റണിലെ ഫിസിഷ്യനായ ഡോക്ടർ ഡെവൺ ക്വാഷ കോവിഡ് വാക്‌സിൻ എടുത്ത ശേഷമുള്ള തന്റെ ചെക്ക് അപ്പിൽ മുഴ ദൃശ്യമായതായി സാക്ഷ്യപ്പെടുത്തുന്നുണ്ട്. വാക്സിൻ എടുത്ത ശേഷം ഒരാഴ്ചക്കുള്ളിൽ ആണ് താൻ ടെസ്റ്റ് ചെയ്തതെന്ന് അവർ പറയുന്നു. ആറാഴ്ചയ്ക്കുശേഷം വീണ്ടുമൊരു അൾട്രാസൗണ്ട് ചെയ്യാനാണ് തന്റെ തീരുമാനം എന്ന് അവർ മാധ്യമങ്ങളോട് പറഞ്ഞു.

ഈ വാർത്ത ജനങ്ങളിൽ ഭീതി പരത്തുന്നതായി ഡോക്ടർമാർ പറയുന്നു. ഇതിനെപ്പറ്റി വ്യക്തമായ അന്വേഷണങ്ങൾ നടക്കുകയാണെന്ന് മസാച്യുസെറ്റ്സ് ജനറൽ ഡിപ്പാർട്ട്മെന്റ് ഓഫ് റേഡിയോളജി തലവൻ ഡോക്ടർ കോനി ലേമാൻ സി എൻ എന്നിനോട് പറഞ്ഞു. ഇതുസംബന്ധിച്ച് അനാവശ്യമായ ഭീതിയുടെ ആവശ്യം വേണ്ടെന്ന് അദ്ദേഹം ഉറപ്പു നൽകി.

ഇത്തരം കേസുകൾ ആശുപത്രിയിൽ എത്തിയാൽ ഉടൻ തന്നെ ബയോപ്സി ചെയ്യാനുള്ള നിർദ്ദേശങ്ങൾ ഡോക്ടർമാർക്ക് നൽകിയിട്ടുണ്ട്. വാക്സിൻ എടുത്ത ശേഷം നാലാഴ്ചയോ ആറാഴ്ചയ്ക്കോ ശേഷം കൃത്യമായ ടെസ്റ്റുകൾ നടത്തണം എന്ന് ജനങ്ങൾക്ക് നിർദേശങ്ങൾ നൽകിയിട്ടുണ്ട്.

ന്യൂസ് ഡെസ്ക് മലയാളം യുകെ

ലണ്ടൻ : കോവിഡ് ഏൽപ്പിച്ച സാമ്പത്തിക ആഘാതത്തിൽ നിന്ന് സമ്പദ്‌വ്യവസ്ഥയെ കരകയറ്റാനുള്ള വഴി തുറന്ന് ചാൻസലർ റിഷി സുനക്കിന്റെ നിർണായക ബജറ്റ്. ഫർ‌ലോ സ്കീം സെപ്റ്റംബർ അവസാനം വരെ നീട്ടുമെന്ന് സുനക് അറിയിച്ചു. ഈ പദ്ധതി ദശലക്ഷക്കണക്കിന് ആളുകളെ “വെല്ലുവിളി നിറഞ്ഞ മാസങ്ങളിലൂടെ കടന്നുപോകാൻ” സഹായിക്കുമെന്ന് അദ്ദേഹം വ്യക്തമാക്കി. ഫർലോ ചെയ്യപ്പെട്ട ജീവനക്കാർക്ക് ശമ്പളത്തിന്റെ 80 ശതമാനം വരെ സർക്കാർ നൽകും. ജൂലൈ മാസം മുതൽ സർക്കാർ 70 ശതമാനം നൽകുമ്പോൾ തൊഴിലുടമകൾ 10 ശതമാനം കൂടി നൽകേണ്ടി വരും. ഓഗസ്റ്റിൽ ഇത് 20 ശതമാനമായി വർധിപ്പിക്കും. അപ്പോൾ സർക്കാർ വിഹിതം 60 ശതമാനം ആവും. “ഞങ്ങളുടെ കോവിഡ് പിന്തുണാ പദ്ധതികൾ ദശലക്ഷക്കണക്കിന് ആളുകളുടെ ജീവിതമാർഗമാണ്, യുകെയിലുടനീളമുള്ള ജോലികളും വരുമാനവും സംരക്ഷിക്കപ്പെടുന്നുണ്ട്. ” ബജറ്റിന് മുന്നോടിയായി ചാൻസലർ പറഞ്ഞു. ഓഫീസ് ഫോർ ബജറ്റ് റെസ്പോൺസിബിലിറ്റി (ഒബിആർ) പ്രവചന പ്രകാരം 2022 മധ്യത്തോടെ സമ്പദ്‌വ്യവസ്ഥ കോവിഡിന് മുമ്പുള്ള അവസ്ഥയിലേക്ക് തിരിച്ചുവരുമെന്നാണ്. തൊഴിലില്ലായ്മ ഇപ്പോൾ 6.5 ശതമാനമായി ഉയരുമെന്ന് പ്രതീക്ഷിക്കുന്നെങ്കിലും ആശങ്കയില്ല. 2020 ജൂലൈയിൽ ഇത് 11.9 ശതമാനം ആയിരുന്നു. സ്വയം തൊഴിൽ ചെയ്യുന്നവർക്കുള്ള പിന്തുണയും സെപ്റ്റംബർ വരെ തുടരുമെന്ന് സുനക് അറിയിച്ചു. തൊഴിലുടമകൾക്കുള്ള അപ്രന്റിസ് ഗ്രാന്റ് 3000 പൗണ്ട് ആക്കി ഉയർത്തി. 2026 വരെ ആദായനികുതി പരിധി മരവിപ്പിക്കുകയാണെന്നും 2023 മുതൽ കോർപ്പറേഷൻ നികുതി വർധിപ്പിക്കുകയാണെന്നും സുനക് പ്രഖ്യാപിച്ചു. യൂണിവേഴ്സൽ ക്രെഡിറ്റിൽ 20 പൗണ്ട് ടോപ് അപ് ആറുമാസത്തേക്ക് കൂടി നിലനിൽക്കും.

ഹോസ്പിറ്റാലിറ്റി – ടൂറിസം മേഖലകൾക്കുള്ള വാറ്റ് ഇളവിന്റെ കാലാവധിയും നീട്ടിയിട്ടുണ്ട്. വർഷങ്ങളായി രാജ്യത്തിന്റെ ഗതി നിശ്ചയിക്കുന്ന നിർണായക ബജറ്റിൽ ഇത്തവണ 407 ബില്യൺ പൗണ്ടിന്റെ പൊതുചെലവാണ് ഉൾകൊള്ളിച്ചിരിക്കുന്നത്. ബിസിനസുകൾക്കുള്ള ‘റീസ്റ്റാർട്ട്‌ ഗ്രാന്റുകൾ’ക്കായി 5 ബില്ല്യൺ ഫണ്ട്, 25,000 മുതൽ 10 മില്യൺ പൗണ്ട് വരെയുള്ള ബിസിനസുകൾക്കായി പുതിയ റിക്കവറി ലോൺ സ്‌കീം എന്നിവയും ചില്ലറ വ്യാപാരികൾക്ക് ഏപ്രിൽ മുതൽ ഒരു സൈറ്റിന് 6,000 പൗണ്ട് വരെയും ലഭിക്കും. 500,000 പൗണ്ട് വരെ വിലയുള്ള വീടുകൾക്ക് സ്റ്റാമ്പ് ഡ്യൂട്ടി അവധി ജൂൺ വരെ നീട്ടി. പിന്നീട് ഘട്ടംഘട്ടമായി തുടരും. ഭവന വിൽപ്പന വർദ്ധിപ്പിക്കുന്നതിനായി 5 ശതമാനം നിക്ഷേപമുള്ളവർക്കുള്ള മോർട്ട്ഗേജ് ഗ്യാരണ്ടി സ്കീമും ബജറ്റിൽ ഉൾപ്പെടുത്തിയിട്ടുണ്ട്. ആദായനികുതിയോ വാറ്റോ ദേശീയ ഇൻഷുറൻസോ ഉയരുന്നില്ല. മദ്യ ഡ്യൂട്ടിയും ഇന്ധന തീരുവയും മരവിപ്പിച്ചു.

അടുത്ത പ്രതിസന്ധി വരുമ്പോൾ നമുക്ക് വീണ്ടും പ്രവർത്തിക്കാൻ കഴിയണമെന്ന ആഹ്വാനമാണ് ചാൻസലർ മുന്നോട്ട് വച്ചത്. കോൺടാക്റ്റ്ലെസ് പേയ്മെന്റ് പരിധി 45 പൗണ്ടിൽ നിന്ന് 100 പൗണ്ട് ആയി ഉയർത്തുന്നതിലൂടെ ആളുകളെ ഷോപ്പിംഗിലേക്ക് തിരികെ കൊണ്ടുവരുവാനാണ് പദ്ധതിയിടുന്നത്. കോർപ്പറേഷൻ നികുതി 2023 ൽ 19 ശതമാനത്തിൽ നിന്ന് 25 ശതമാനമായി ഉയർത്തും. പ്രധാനമന്ത്രി ബോറിസ് ജോൺസൻ മുന്നോട്ട് വച്ച ലോക്ക്ഡൗൺ നടപടികളുടെ ലഘൂകരണത്തിന് ഈ ബജറ്റ് സഹായകമായേക്കും. പ്രതിസന്ധിയിൽ കഴിയുന്ന ജനതയ്ക്ക് ആശ്വാസം നൽകുക എന്ന ലക്ഷ്യത്തോടെയാണ് ചാൻസലർ ഇത്തവണയും ബജറ്റ് അവതരിപ്പിക്കുന്നത്.

ന്യൂസ് ഡെസ്ക് മലയാളം യുകെ

സോളിഹൾ : അവർക്ക് ഇനി മറ്റു വഴികളില്ല. തങ്ങളുടെ കുട്ടികളെ പിരിഞ്ഞിരുന്നേ മതിയാവൂ. രോഗാവസ്ഥയിലും മക്കളെ പിരിയുന്ന മനോവേദന കൂടി സഹിക്കേണ്ടി വരികയാണ് സോളിഹൾ സ്വദേശിയായ ആദം ഗ്രേവ്‌ലിയും (38) ഓസ്‌ട്രേലിയൻ സ്വദേശിയായ ഭാര്യ കെയ്‌റ്റ്‌ലും (39). ടെർമിനൽ കാൻസർ ബാധിതരായ ഇരുവരും ചികിത്സയ്ക്കായി കുട്ടികളെ പിരിയേണ്ട അവസ്ഥയിലാണ്. ഇരുവർക്കും സ്റ്റേജ് 4 ക്യാൻസർ ആണ്. കെയ്റ്റ്‌ലിന് കുടലിലാണ് ക്യാൻസർ. ഫെബ്രുവരി 4 നാണ് ആദം സ്റ്റേജ് 4 പാൻക്രിയാറ്റിക് ക്യാൻസർ ബാധിതനാണെന്ന് കണ്ടെത്തിയത്. രണ്ട് വയസുള്ള തിയയും നാല് മാസം മാത്രം പ്രായമുള്ള ഫിയണും ഇനി കഴിയേണ്ടത് മാതാപിതാക്കളുടെ സാമീപ്യം ഇല്ലാതെയാണ്. അതാണ് ഏറ്റവും ദുഃഖകരമായ അവസ്ഥ.

ആദം ഒരു ഗ്രാഫിക് ഡിസൈനറാണ്. സോളിഹളിൽ ജനിച്ചെങ്കിലും വളർന്നത് സർറേയിലെ ഫാർൺഹാമിലാണ്. ഒരു യാത്രക്കിടയിൽ 2009ലാണ് ഓൺലൈൻ ഡേറ്റിംഗിലൂടെ കെയ്റ്റിനെ കണ്ടുമുട്ടുന്നത്. ലാൻഡ്സ്കേപ്പ് ആർക്കിടെക്റ്റ് ആയ കെയ്റ്റ് വെസ്റ്റേൺ ഓസ്‌ട്രേലിയയിലാണ് വളർന്നത്. 2014 ഡിസംബർ 7 ന് പെർത്ത് ടൗൺഹാളിൽ വച്ച് ഇരുവരും വിവാഹിതരായി. കെയ്റ്റ്‌ലിന്റെ ക്യാൻസർ ഇപ്പോൾ കരളിലേക്കും വ്യാപിച്ചിട്ടുണ്ട്. 2020 ഒക്ടോബർ 14 ന് അവൾ തന്റെ രണ്ടാമത്തെ കുട്ടിയായ ഫിയറിന് ജന്മം നൽകി. ശേഷം കഠിനമായ വയറുവേദന അനുഭവപെട്ടു. പിന്നീട് അത് വൻകുടലിൽ മുഴയായി രൂപപ്പെട്ടു.

കെയ്റ്റ്‌ലിന്റെ ട്യൂമർ നീക്കം ചെയ്തു. ഇപ്പോൾ അവളുടെ കരളിലേക്ക് പടർന്ന ക്യാൻസറിനെ ഇല്ലാതാക്കാനുള്ള കീമോതെറാപ്പി നടന്നുവരികയാണ്. ഇവയെല്ലാം ഫിയൻ ജനിച്ച് ആദ്യത്തെ നാല് ആഴ്ചയ്ക്കുള്ളിൽ ആരംഭിച്ചു. ദമ്പതികൾ അവരുടെ പ്രതിവാര കീമോതെറാപ്പി സെഷനുകൾക്കായി ഒരുമിച്ച് യാത്രചെയ്യുന്നു. ഒപ്പം കുടുംബജീവിതം നിലനിർത്താൻ സുഹൃത്തുക്കളുടെയും ബന്ധുക്കളുടെയും സഹായത്തെ ആശ്രയിക്കുന്നുമുണ്ട്. ചികിത്സയുടെ ഭാഗമായി ഏപ്രിൽ വരെ അവരെ സന്ദർശിക്കാൻ കഴിയില്ല. ചികിത്സയിലൂടെ കടന്നുപോകുമ്പോൾ കുടുംബത്തെ സഹായിക്കാനായി ഒരു ധനസമാഹരണം ആരംഭിച്ചിട്ടുണ്ട്.

ന്യൂസ് ഡെസ്ക് മലയാളം യുകെ

യുകെയിലെ 8 ദശലക്ഷം ജനങ്ങൾ താമസിക്കുന്നത് സമീപപ്രദേശങ്ങളിൽ ഒരു കോവിഡ് കേസ് പോലും ഇല്ലാതെയാണെന്ന റിപ്പോർട്ടുകൾ പുറത്തു വന്നു. ലോക്ക്ഡൗൺ നിയന്ത്രണങ്ങളാലും യുദ്ധകാലാടിസ്ഥാനത്തിൽ പ്രതിരോധ കുത്തിവെയ്പ്പ് നൽകിയും ആണ് കൊറോണവൈറസ് വ്യാപനവും മരണനിരക്കും പിടിച്ചുനിർത്താൻ രാജ്യത്തിന് സാധ്യമായത്. ആരോഗ്യ വകുപ്പിൻറെ കണക്കുകൾ പ്രകാരം 6792 അയൽ പ്രദേശങ്ങളിൽ 1065 പ്രദേശങ്ങളിലും അതായത് 15 ശതമാനം സ്ഥലങ്ങളിലും മൂന്നിൽ താഴെ കോവിഡ് കേസുകളെ രേഖപ്പെടുത്തിയിട്ടുള്ളൂ. ഫെബ്രുവരി 24 വരെയുള്ള കണക്കുകൾ പ്രകാരം ആണ് ഇത്. കോവിഡ് കേസുകൾ താരതമ്യേന കുറയുന്നതിൻെറ പശ്ചാത്തലത്തിൽ ലോക്ഡൗൺ നിയന്ത്രണങ്ങൾ ഇളവ് ചെയ്യണമെന്ന ആവശ്യം എംപിമാർ ഉന്നയിച്ചിട്ടുണ്ട്. നിയന്ത്രണങ്ങളിൽ ഇളവ് വരുത്തുന്നതിന് പ്രധാനമന്ത്രി നിശ്ചയിച്ചിരിക്കുന്ന സമയപരിധി ജൂൺ 21 ആണ്.

ഇതിനിടെ തുടർച്ചയായി ബ്രിട്ടനിലെ കോവിഡ് കേസുകൾ ഇന്നലെയും കുറഞ്ഞതിൻെറ സന്തോഷത്തിലാണ് രാജ്യം. ഇന്നലെ 343 കോവിഡ് മരണങ്ങളാണ് ഔദ്യോഗികമായി റിപ്പോർട്ട് ചെയ്യപ്പെട്ടത്. പുതിയതായി 6391 പേർക്കാണ് രാജ്യത്ത് വൈറസ് ബാധിച്ചതായി ഔദ്യോഗിക കണക്കുകൾ സൂചിപ്പിക്കുന്നു. ആരോഗ്യ വകുപ്പിൻറെ കണക്കുകൾപ്രകാരം വൈറസ് ബാധ ആഴ്ചയിൽ നാലിലൊന്നായി കുറഞ്ഞിട്ടുണ്ട്. അതേസമയം മരണനിരക്കിൽ രേഖപ്പെടുത്തിയിരിക്കുന്ന കുറവ് 37 ശതമാനമാണ്. ജനങ്ങൾക്ക് വൈറസിൽ നിന്ന് സ്വാതന്ത്ര്യം ലഭ്യമാകുന്ന കാലം അടുത്തു തന്നെ ഉണ്ടാകുമെന്ന് ആരോഗ്യ സെക്രട്ടറി മാറ്റ് ഹാൻകോക്ക് പറഞ്ഞു. കൊറോണ വൈറസിനെ നിയന്ത്രണത്തിലാക്കാനുള്ള എല്ലാ നടപടികളുമായി മുന്നോട്ടു പോകാൻ അദ്ദേഹം ജനങ്ങളോട് അഭ്യർത്ഥിച്ചു.

എന്നാൽ വൈറസിനെതിരെ രാജ്യം ഗണ്യമായ നേട്ടം കൈവരിച്ചെങ്കിലും ജാഗ്രതപാലിക്കണമെന്ന് ആരോഗ്യപ്രവർത്തകർ അഭിപ്രായപ്പെട്ടു. ജനിതകമാറ്റം വന്ന കൂടുതൽ അപകടകാരിയായ വൈറസുകളുടെ വ്യാപനത്തെ മുൻനിർത്തിയാണ് ഈ മുന്നറിയിപ്പ്. ജനിതകമാറ്റം വന്ന ബ്രസീലിയൻ കൊറോണ വൈറസിൻെറ 6 കേസുകൾ ഇംഗ്ലണ്ടിലും സ്കോട്ട്‌ലൻഡിലും കണ്ടെത്തിയ വാർത്ത രാജ്യത്ത് ആശങ്ക പടർത്തിയിരുന്നു

ന്യൂസ് ഡെസ്ക് മലയാളം യുകെ

പൂർണ്ണമായും പ്രവർത്തന സജ്ജമായ യുകെയുടെ രണ്ട് കപ്പലുകളാണ് ഇന്ത്യയിലെ കപ്പലുകളുടെ ശവപ്പറമ്പ് എന്നറിയപ്പെടുന്ന സ്ഥലത്ത് പൊളിക്കാൻ കാത്തുകിടക്കുന്നത്. ഉപയോഗശൂന്യമായ കപ്പലുകൾ പ്രകൃതിക്ക് ഏറ്റവും ദോഷകരമായ മാലിന്യങ്ങളിൽ പെടുന്നവയാണ്. എന്നാൽ ലേലം വിളിച്ച് ഉടമസ്ഥർ വാങ്ങി ആറു മാസങ്ങൾക്കുള്ളിൽ തന്നെ ഇരട്ടി വിലയ്ക്ക് രണ്ടാമത് വാങ്ങി പൊളിക്കാൻ എത്തിച്ചിരിക്കുകയാണ് ഈ കപ്പലുകൾ. ഉപയോഗശൂന്യമായ വസ്തുക്കൾ / അഥവാ ആക്രിസാധനങ്ങൾ എന്നിവയുടെ പട്ടികയിൽ ഈ കപ്പലുകളെയും ഉൾപ്പെടുത്താം. പ്രശസ്തമായ ഒരു ഇംഗ്ലീഷ് മാധ്യമം നടത്തിയ അന്വേഷണത്തിൽ ഇത്തരത്തിൽ ഉപയോഗശൂന്യമായ പതിമൂന്നോളം കപ്പലുകൾ ഇന്ത്യ, ബംഗ്ലാദേശ്, പാകിസ്ഥാൻ എന്നിവിടങ്ങളിൽ പൊളിക്കാനായി എത്തിച്ചിട്ടുണ്ട്.

ക്രൂയിസ് ആൻഡ് മാരിടൈം വോയജസിന്റെ ഉടമസ്ഥതയിൽ കഴിഞ്ഞ നവംബറിലാണ് മാർക്കോപോളോ, മഗല്ലൻ എന്നീ കപ്പലുകളുടെ കച്ചവടം നടന്നത്. 1960 ൽ നിർമ്മിക്കപ്പെട്ട മാർക്കോ പോളോ ലോകത്തിലെ ഇപ്പോൾ അവശേഷിക്കുന്ന ഏറ്റവും പഴക്കമുള്ള ഓഷ്യൻ ക്രൂയിസർ ആണ്. അലാങ്ങിൽ നിന്ന് ഇന്ത്യയിലേക്ക് നടത്തിയതാണ് അവസാന യാത്ര. യുകെയിൽ നടത്തിയ കച്ചവടത്തിൽ നിന്നും കൈമറിഞ്ഞു ഒടുവിൽ ആക്രി വിലയ്ക്ക് വാങ്ങിയത് നാല് മില്യൺ പൗണ്ടിന് ആണ്. ഹൈസീസ് ലിമിറ്റഡ് ഡയറക്ടർ അഗർവാൾ ” ദുബായിൽ നിന്നും കപ്പൽ വാങ്ങിയവർ പിന്നീട് സ്വീകരിക്കാൻ വിസമ്മതിക്കുകയായിരുന്നു” എന്ന് സമ്മതിക്കുന്നുണ്ട്. ഒടുവിൽ ഒരു ഹോട്ടൽ ആയി രൂപമാറ്റം നടത്തി ഉപയോഗിക്കാം എന്ന തീരുമാനത്തിൽ എത്തിയെങ്കിലും അതും നടപ്പായില്ല. ഒടുവിൽ കപ്പൽ ഇന്ത്യയിലേക്ക് എത്തുകയായിരുന്നു. സമാനമായ കഥയാണ് മഗല്ലന്റെതും, 2021 ഗ്രാൻഡ് നാഷണലിന് ലിവർപൂളിൽ ഹോട്ടൽ ആയി ഉപയോഗിക്കാനിരുന്ന കപ്പലാണ് ഇത്.

തൊണ്ണൂറോളം കപ്പലുകളാണ് വർഷത്തിൽ പൊളിച്ചു പണിയുകയും റീസൈക്കിൾ ചെയ്യപ്പെടുകയും ചെയ്യുന്നത്,ലോകത്തിലെ 70% പഴയ കപ്പലുകളും എത്തിപ്പെടുന്നത് ഇന്ത്യൻ, ബംഗ്ലാദേശ്, പാകിസ്ഥാൻ തീരങ്ങളിലാണ്. ഇവയുണ്ടാക്കുന്ന അപകടങ്ങൾ ചെറുതൊന്നുമല്ല. ഗ്യാസ് പൊട്ടിത്തെറികൾ, ആസ്ബറ്റോസ് പോലെയുള്ള വിഷലിപ്തമായ വസ്തുക്കളുമായി അധികസമയം ഇടപെടുന്നത് ജോലിക്കാരുടെ ആരോഗ്യത്തെ പ്രതികൂലമായി ബാധിക്കുന്നുണ്ടെന്ന് കണ്ടെത്തിയിരുന്നു. പ്രകൃതിക്ക് വരുത്തിവെക്കുന്ന ദോഷങ്ങൾ ഇതിലുമേറെയാണ്. ആസ്ബറ്റോസ് ഹെവി മെറ്റലുകൾ ലെഡ് പോലെയുള്ള വസ്തുക്കൾ അങ്ങേയറ്റം അപകടം നിറഞ്ഞതാണ്. ഓയിലുകൾ പെട്രോൾ പോലെയുള്ള അവശിഷ്ടങ്ങൾ കരയിലേക്ക് പമ്പ് ചെയ്യപ്പെടുന്നു. യുകെയിലെ മാലിന്യങ്ങൾ വികസ്വര രാജ്യങ്ങളിലേക്ക് കയറ്റി അയയ്ക്കുന്നതിന്റെ പ്രതിഷേധം പുകയാൻ ഇതൊരു കാരണമായേക്കാം.

ന്യൂസ് ഡെസ്ക് മലയാളം യുകെ

യുകെയിലെ ആദ്യകാല കോവിഡ് വ്യാപനത്തെ കുറിച്ച് ഞെട്ടിക്കുന്ന പഠന റിപ്പോർട്ട് പുറത്തു വന്നു. ഇതുപ്രകാരം 10 -ൽ 4 പേർക്കും കോവിഡ് പിടിപെട്ടിരിക്കുന്നത് ആശുപത്രികളിൽ നിന്നാണ്. ആശുപത്രികളിലെ സുരക്ഷാ മുൻകരുതലുകളെ കുറിച്ച് വൻ ചർച്ചയ്ക്കാണ് ഗവേഷണ റിപ്പോർട്ട് വഴിമരുന്നിട്ടിരിക്കുന്നത്. പബ്ലിക് ഹെൽത്ത് ഇംഗ്ലണ്ടിൻെറയും ലണ്ടൻ സ്കൂൾ ഓഫ് ഹൈജീൻ ആൻഡ് ട്രോപ്പിക്കൽ മെഡിസിൻെറയും സംയുക്ത വിശകലനത്തിലാണ് രാജ്യത്തെ ഞെട്ടിച്ച കണക്കുകൾ പുറത്തുവന്നിരിക്കുന്നത്. ആശുപത്രിയിൽ പ്രവേശിപ്പിച്ചതിന് ശേഷം മൂന്നു ദിവസത്തിനുള്ളിലോ ഡിസ്ചാർജ് ചെയ്ത് 14 ദിവസത്തിനുള്ളിലോ കോവിഡ് പോസിറ്റീവ് ആയത് 40.5 ശതമാനം പേർക്കാണ്.

കൊറോണ വൈറസിൻെറ വ്യാപനത്തിൻെറ തുടക്കത്തിൽ പല കെയർ ഹോം അന്തേവാസികളെയും കോവിഡ് ബാധിച്ചത് അറിയാതെ ഡിസ്ചാർജ് ചെയ്തത് സ്ഥിതി ഗുരുതരമാക്കി എന്ന ആക്ഷേപവും ശക്തമാണ്. മതിയായ കോവിഡ് പരിശോധന സംവിധാനങ്ങളുടെ അഭാവം ഇതിന് കാരണമായി എന്ന് ചൂണ്ടിക്കാണിക്കപ്പെടുന്നു. ആശുപത്രികളിലുണ്ടായ അണുബാധയുടെ മൂലകാരണം സമൂഹത്തിൽ വർദ്ധിച്ചുവരുന്ന കേസുകളാണെന്നാണ് എൻഎച്ച്എസ് ദേശീയ മെഡിക്കൽ ഡയറക്ടർ പ്രൊഫസർ സ്റ്റീഫൻ പവിസ് അഭിപ്രായപ്പെട്ടത്.

കൊറോണ വൈറസ് വ്യാപനത്തിൻ്റെ തുടക്കം മുതൽ തന്നെ മതിയായ സുരക്ഷാ മാനദണ്ഡങ്ങൾ ഇല്ലാതെ ജോലി ചെയ്യേണ്ടി വരുന്ന നേഴ്സുമാർ ഉൾപ്പെടെയുള്ള ആരോഗ്യ പ്രവർത്തകരുടെ ദയനീയാവസ്ഥ വാർത്തകളിൽ ഇടംപിടിച്ചിരുന്നു. മതിയായ സുരക്ഷാ മാനദണ്ഡങ്ങൾ പാലിക്കുന്നില്ല എന്ന കാരണത്താൽ 10 ദശലക്ഷത്തിലധികം ഹൈ ഗ്രേഡ് മാസ്ക്കുകളാണ് എൻഎച്ച്എസ് പിൻവലിച്ചത്. സമാന സാഹചര്യത്തിൽ ചില കൈയ്യുറകളുടെ വിതരണവും ഉപയോഗവും നിർത്തിവെയ്ക്കപ്പെട്ടിട്ടുണ്ട്. വിതരണം ചെയ്തിരുന്ന പല സുരക്ഷാ ഉപകരണങ്ങളും മതിയായ വൈറസ് പരിരക്ഷ നൽകിയിരുന്നില്ല എന്ന വാർത്ത വൻ പ്രതിഷേധമാണ് യുകെയിൽ സൃഷ്ടിച്ചിരിക്കുന്നത്.

ന്യൂസ് ഡെസ്ക് മലയാളം യുകെ

ഇംഗ്ലണ്ടിലെ ദരിദ്രരായ വിദ്യാർത്ഥികൾ അതിസമ്പന്നരായ വിദ്യാർത്ഥികളെക്കാൾ മൂന്ന് എ-ലെവൽ ഗ്രേഡുകൾക്ക് വരെ പിന്നിലാണെന്ന് പഠനം സൂചിപ്പിക്കുന്നു. താഴ്ന്ന ജിസി‌എസ്‌ഇ ഗ്രേഡുകൾ കാരണം 16 മുതൽ 19 വയസിനിടെയിലുള്ള വിദ്യാർത്ഥികളുടെ യോഗ്യതയും കുറയുകയാണെന്ന് എഡ്യൂക്കേഷൻ പോളിസി ഇൻസ്റ്റിറ്റ്യൂട്ട് അറിയിച്ചു. ചില പ്രദേശങ്ങളിൽ ദരിദ്രരായ വിദ്യാർത്ഥികൾ അഞ്ച് ഗ്രേഡുകൾ വരെ പിന്നിലായിരുന്നു. ദരിദ്ര കുടുംബങ്ങളിൽ നിന്നുള്ള വിദ്യാർത്ഥികൾ എ ലെവൽ കോഴ്സുകൾ ആരംഭിക്കുന്നത് തന്നെ സമ്പന്നർക്ക് പിന്നിൽ നിന്നുകൊണ്ടാണ്. ഇത് തുടരുന്നത് അവരെ വീണ്ടും പിന്നിലേക്ക് പോകുന്നതിനുള്ള കാരണമാകുമെന്നും ഇപിഐ കൂട്ടിച്ചേർത്തു. നോവ്‌സ്ലി ഓൺ മെർസീസൈഡ്, നോർത്ത് സോമർസെറ്റ്, സ്റ്റോക്ക്ടൺ-ഓൺ-ടൈസ് തുടങ്ങിയ പ്രദേശങ്ങളിൽ വിദ്യാർത്ഥികൾ 5 എ ലെവൽ ഗ്രേഡുൾക്ക് പിന്നിലായിരുന്നു.

സെക്കൻഡറി സ്കൂളിന്റെ അവസാനത്തിനും 19 വയസ്സിനും ഇടയിലുള്ള യോഗ്യതകളും ഗ്രേഡുകളും അടിസ്ഥാനമാക്കി, വിദ്യാർത്ഥികളുടെ അവസാന ആറുവർഷത്തെ സൗജന്യ സ്കൂൾ ഭക്ഷണ നിലയും ഇപിഐ പരിശോധിച്ചു. 2017 നും 2019 നും ഇടയിലുള്ള പോരായ്മ പരിഹരിക്കുന്നതിൽ യാതൊരു പുരോഗതിയും ഉണ്ടായിട്ടില്ലെന്നും സമൂഹത്തിലെ ദരിദ്രരെ കൂടുതൽ കഠിനമായി ബാധിച്ച പകർച്ചവ്യാധിയുടെ ആഘാതം മൂലം ഇത് വഷളാകാൻ സാധ്യതയുണ്ടെന്നും ഗവേഷകർ പറയുന്നു. എന്നാൽ കോളേജ് വിദ്യാർത്ഥികളെ സഹായിക്കുന്നതിനായി 2020-21ൽ 530 മില്യൺ പൗണ്ട് നൽകിയെന്നാണ് വിദ്യാഭ്യാസ വകുപ്പിന്റെ വാദം.

സമൂഹത്തിൽ പിന്നാക്കം നിൽക്കുന്ന 16 മുതൽ 19 വയസ്സ് വരെ പ്രായമുള്ള വിദ്യാർത്ഥികൾക്ക് അധിക ധനസഹായം ഉറപ്പാക്കേണ്ടത് അത്യാവശ്യമാണ്. കോവിഡ് മൂലമുണ്ടായ പഠനനഷ്ടങ്ങൾ പരിഹരിക്കുന്നതിനായി നീക്കിവെച്ച തുക അടിയന്തിരമായി ലഭ്യമാക്കണം. ദരിദ്ര വിദ്യാർത്ഥികളെ സഹായിക്കുന്നതിനായി സ്കൂളുകൾക്ക് അധിക പണം നൽകുന്ന വിദ്യാർത്ഥി പ്രീമിയം 16 വയസ്സിന് മുകളിലേക്ക് നീട്ടണമെന്ന് അസോസിയേഷൻ ഓഫ് കോളേജുകളുടെ ചീഫ് എക്സിക്യൂട്ടീവ് ഡേവിഡ് ഹ്യൂസ് ആവശ്യപ്പെട്ടിട്ടുണ്ട്.

ന്യൂസ് ഡെസ്ക് മലയാളം യുകെ

കൊറോണ വൈറസ് ലോകത്ത് പടർന്നുപിടിച്ച് ഒരുവർഷം തികഞ്ഞപ്പോൾ തന്നെ പ്രതിരോധ വാക്സിൻ വികസിപ്പിക്കാൻ സാധിച്ചതിൻെറ ആത്മവിശ്വാസത്തിലാണ് ശാസ്ത്രലോകം. കൊവിഡ് വാക്സിൻ ഒരു ഡോസ് കുത്തിവെയ്പ്പ് ലഭിച്ചതു മൂലം ഹോസ്പിറ്റലുകളിൽ അഡ്മിറ്റ് ആകുന്നവരുടെ എണ്ണം ഗണ്യമായി കുറയ്ക്കാൻ സാധിച്ചതായുള്ള റിപ്പോർട്ടുകൾ പുറത്തുവന്നു. പ്രതിരോധകുത്തിവെയ്പ്പുകൾ കാരണം 80 വയസ്സിനു മുകളിൽ പ്രായമുള്ളവരിൽ ഗുരുതര രോഗസാധ്യത 80 ശതമാനമായി കുറഞ്ഞതായി പബ്ലിക് ഹെൽത്ത് ഇംഗ്ലണ്ട് നടത്തിയ അവലോകനത്തിൽ കണ്ടെത്തി. ഒരു ഡോസ് കൊണ്ടുതന്നെ പ്രതിരോധശേഷി ശരീരത്തിന് ലഭ്യമാകുമെങ്കിലും മികച്ച സംരക്ഷണത്തിന് രണ്ടു ഡോസ് പ്രതിരോധകുത്തിവെയ്പ്പ് ആവശ്യമാണെന്നാണ് ശാസ്ത്രജ്ഞരുടെ അഭിപ്രായം.

ലോകത്ത് തന്നെ ആദ്യം പൊതുജനങ്ങൾക്ക് വാക്സിൻ വിതരണം നടത്തിയ രാജ്യമാണ് യുകെ. ലോക്ക്ഡൗൺ നിയന്ത്രണങ്ങളാലും പ്രതിരോധകുത്തിവെയ്പ്പുകൾ യുദ്ധകാലാടിസ്ഥാനത്തിൽ നൽകിയും രോഗവ്യാപനതോതും മരണനിരക്കും പിടിച്ചുനിർത്താൻ രാജ്യത്തിനായി. എല്ലാ ദുഷ്പ്രചാരണങ്ങളുടെയും മുനയൊടിച്ചു കൊണ്ട് 20 ദശലക്ഷത്തിലധികം ജനങ്ങൾക്ക് ഇതുവരെ പ്രതിരോധകുത്തിവെയ്പ്പ് രാജ്യത്തിന് നൽകാനായി. ഇന്നലെ കൊറോണ വൈറസ് ബാധിച്ച് 104 പേരാണ് യുകെയിൽ മരണമടഞ്ഞത്. 5455 പുതിയ കേസുകളാണ് രാജ്യത്ത് റിപ്പോർട്ട് ചെയ്യപ്പെട്ടത്.