ബിബിന്‍ അബ്രഹാം 

ഈ വരുന്ന ജൂൺ 17 , ശനിയാഴ്ച രാവിലെ 10 മണി മുതൽ വൈകുന്നേരം 4 മണി വരെ യുകെയിലുള്ള മലയാളി സോഷ്യൽ വർക്കേഴ്‌സിന്റെ -UKMSW (United Kingdom Malayalee Social Workers) ഫോറത്തിന്റെ രണ്ടാം വാർഷിക സമ്മേളനം മിഡിൽസെക്സിലുള്ള ബ്രൂണൽ യൂണിവേഴ്സിറ്റിയിലുള്ള വച്ച് നടത്തുവാൻ തീരുമാനിച്ച വിവരം യു.കെയിലുള്ള എല്ലാ മലയാളി കുടുംബങ്ങളെയും സ്നേഹപൂർവ്വം അറിയിച്ചു കൊള്ളുന്നു.

ഇത്തവണത്തെ വാർഷിക സമ്മേളനത്തിന്റെ പ്രത്യേകത ബ്രൂണൽ യൂണിവേഴ്‌സിറ്റിയും UKMSW ഫോറവും സംയുക്തമായിട്ടാണ് വാർഷികസമ്മേളനം നടത്തുന്നത്. ബ്രൂണൽ യൂണിവേഴ്‌സിറ്റി ഇത് വരെയുള്ള ഫോറത്തിന്റെ പ്രവർത്തനങ്ങളെ അഭിനന്ദിക്കുകയും വാർഷിക സമ്മേളനത്തിൽ പങ്കാളിയാകുവാൻ സന്നദ്ധത പ്രകടിപ്പിക്കുകയും ചെയ്തു. യൂണിവേഴ്‌സിറ്റിയുടെ എല്ലാ സൗകര്യങ്ങളും ഈ കോൺഫറൻസ് നടത്തിപ്പിനായി സൗജന്യമായി നൽകാമെന്നും ഉറപ്പ് നൽകി.
രണ്ടു സെക്ഷനുകളായി നടത്തപ്പെടുന്ന കോൺഫറൻസിൽ ആദ്യത്തെ സെക്ഷൻ ഇവിടെയുള്ള മലയാളികളുമായി ബന്ധപ്പെട്ടതും എന്നാൽ ഈ രാജ്യത്തിന്റെ സംസ്കാരവുമായി ബന്ധപ്പെട്ട വിഷയവുമായിരിക്കും ശിൽപ്പശാലയിൽ അവതരിക്കപ്പെടുന്നത്. യൂണിവേഴ്‌സിറ്റിയിൽ അവസാന വർഷം പഠിക്കുന്ന സോഷ്യൽ വർക്ക് സ്റ്റുഡന്റ്സും മോർണിംഗ് സെക്ഷനിൽ പങ്കെടുക്കുവാൻ തീരുമാനിച്ചിട്ടുണ്ട്. 

യു.കെയിൽ GCSC കഴിഞ്ഞ മലയാളി കുട്ടികൾക്ക് ആർക്കെങ്കിലും സോഷ്യൽ വർക്ക് പ്രൊഫഷനിലേക്ക് കടക്കുവാൻ ആഗ്രഹിക്കുന്നുണ്ടെങ്കിൽ ആദ്യം ബന്ധപ്പെടുന്ന 15 കുട്ടികൾക്ക് കോൺഫറൻസിൽ പങ്കെടുക്കുന്നതിനുള്ള അവസരം ഉണ്ടായിരിക്കുന്നതാണ്. മോർണിംഗ് സെക്ഷനിൽ പങ്കെടുക്കുന്നവർക്ക് അവരുടെ രജിസ്‌ട്രേഷൻ പുതുക്കുന്നതിന് സഹായിക്കുന്ന Continous Professional Development (CPD) തെളിവായുള്ള സർട്ടിഫിക്കേറ്റ് കൊടുക്കുന്നതായിരിക്കും.
ഉച്ചക്ക് ശേഷം നടത്തുന്ന സെക്ഷനിൽ വാർഷിക റിപ്പോർട്ട് അവതരിപ്പിക്കുകയും പുതിയ വർഷത്തേക്കുള്ള ഭരണാധികാരികളെ തിരഞ്ഞെടുക്കുന്നതുമായിരിക്കും. ഇത് വരെയുള്ള ഫോറത്തിന്റെ പ്രവർത്തനങ്ങളെ വിലയിരുത്തുമ്പോൾ ഒത്തിരി അഭിമാനത്തിന് വകയുണ്ട്. ശക്തമായ ഭരണഘടന, വെബ്സൈറ്റ്, കമ്പനി ആയിട്ടുള്ള രൂപീകരണം, എന്നാൽ ഇതിനേക്കാളേറെ എടുത്തു പറയത്തക്ക നേട്ടം കാഴ്ച വച്ചത് റിസോഴ്‌സ് ടീമിന്റെ പ്രവർത്തനമാണ്. റിസോഴ്സ് ടീമിന്റെ ഇന്റർവ്യൂ പരിശീലനം വഴി 8 മലയാളി സോഷ്യൽ വർക്കേഴ്‌സിന് സ്ഥിരം ജോലി ലഭിച്ചു. അവരുടെ സാക്ഷ്യം വെബ്സൈറ്റ് സന്ദർശിച്ചാൽ നിങ്ങൾക്ക് നേരിട്ട് കാണുവാൻ സാധിക്കുന്നതാണ്.

ഫോറത്തിന്റെ പ്രധാന ലക്ഷ്യങ്ങൾ:

1 യുകെയിലെ പോലെ ഇന്ത്യയിലും സോഷ്യൽ വർക്ക് ഒരു പ്രൊഫഷനായി അംഗീകരിക്കാൻ ഇന്ത്യൻ സർക്കാരിൽ സമ്മർദ്ദം ചെലുത്തുക.
2 2000ന്മേൽ യുകെയിൽ ജോലി ചെയ്യുന്ന സോഷ്യൽ വർക്കേഴ്‌സിനെ ഈ ഫോറത്തിന്റെ കിഴിൽ കൊണ്ടു വരികയും ജോലി സ്ഥലത്തു അവർക്ക് എന്തെങ്കിലും പ്രശ്നങ്ങൾ ഉണ്ടാവുകയാണെങ്കിൽ പറ്റുന്ന വിധത്തിൽ സഹായിക്കുകയും കൂട്ടായ രീതിയിൽ വേണ്ട നിർദ്ദേശങ്ങൾ നൽകുകയും ചെയ്യും.
3 യുകെയിൽ Malayalee SW വർക്ക് ചെയ്യുന്ന പ്രധാനപ്പെട്ട മേഖലകളായ Children, Adult, Mental Health ,Hospital , Learning Disabilities , Adoption and Fostering , Paliative Care , Safeguarding and DOLS മേഖലകളാണ്. ഈ തനത് മേഖലകളിൽ നൈപുണ്യം നേടിയവർക്ക് മറ്റ് മേഖലകളിൽ വർക്ക് ചെയ്യുന്നവർക്ക് ഉപകാരപ്രദമായ രീതിയിൽ ശിൽപ്പശാലകൾ ഇടയ്ക്കു സംഘടിപ്പിക്കുക, സ്‌കൈപ്പ് പോലെയുള്ള ഇന്റർനെറ്റ് സാധ്യതകൾ ഉപയോഗിച്ച് കോൺഫറൻസ് സംഘടിപ്പിക്കുക.
4 ഇവിടെയുള്ള മലയാളി കുടുംബങ്ങളെ ബാധിക്കുന്ന നിയമങ്ങളെ കുറിച്ച് ബോധവത്ക്കരണം നടത്തുക.
5 ഇവിടെയുള്ള മത സംഘടനകൾ, അസോസിയേഷനുകൾ തുടങ്ങിയ സംഘടനകൾക്ക് Childrens Safeguarding – മായി ബന്ധപ്പെട്ട ക്ളാസുകൾ കൊടുക്കുക.

യു.കെയിൽ സോഷ്യൽ വർക്കറായി ജോലി ചെയ്യുന്ന എല്ലാവരെയും ഈ വാർഷിക സമ്മേളനത്തിലേക്ക് സ്വാഗതം ചെയ്യുന്നു ഇതുവരെയും ഈ മലയാളി സോഷ്യൽ വർക്ക് ഫോറത്തിൽ അംഗ്വതമെടുക്കാത്തവർ എത്രയും പെട്ടന്ന് വെബ് സൈറ്റ് സന്ദർശിച്ച് മെമ്പര്‍ഷിപ്പ് ആപ്ലിക്കേഷന്‍ ഫോറം പൂരിപ്പിച്ചു ഈ ഫോറത്തിന്റെ ഭാഗമാകാൻ ശ്രമിക്കുക.

അതോടൊപ്പം തന്നെ നിങ്ങള്‍ക്ക് പരിചയമുള്ള HCPC രജിസ്‌ട്രേഷന്‍ ഉള്ള സോഷ്യല്‍വര്‍ക്കേഴ്‌സിനെ ഈ വിവരം അറിയിക്കാന്‍ പരിശ്രമിക്കുക.

കൂടുതല്‍ വിവരങ്ങള്‍ക്ക് വേണ്ടി താഴെ പേര് ചേര്‍ത്തിരിക്കുന്ന മാനേജ്‌മെന്റ് കമ്മറ്റി അംഗങ്ങളുമായി ബന്ധപ്പെടുക:

ജെയിംസ്‌കുട്ടി ജോസ് (ചെയര്‍ പേഴ്‌സണ്‍) ഫോണ്‍ ; 07951182979
ടോമി സെബാസ്റ്റിയന്‍ – (റിസോഴ്‌സ് ടീം)- 07766655697
സിബി തോമസ് (മെമ്പര്‍ഷിപ്പ് കോര്‍ഡിനേറ്റര്‍) 07988996412

ജോജി തോമസ്

വളരെ അപ്രതീക്ഷിതവും സമർത്ഥവുമായ ഒരു നീക്കത്തിലൂടെയാണ് ബ്രിട്ടീഷ് പ്രധാനമന്ത്രി തെരേസ മേയ് ജൂണ്‍ ആറിന് രാജ്യത്ത് പൊതുതെരഞ്ഞെടുപ്പ് നടത്തുവാനുള്ള തീരുമാനം പ്രഖ്യാപിച്ചത്. അടുത്തകാലം വരെ പൊതുതെരഞ്ഞെടുപ്പിനുള്ള സാധ്യതകളെ തള്ളിക്കളഞ്ഞിരുന്ന തെരേസാ മേയ് പ്രതിപക്ഷം ദുര്‍ബലമായ സാഹചര്യത്തെ മുതലെടുത്ത് വീണ്ടുമൊരു ടേം കൂടി അധികാരത്തിലെത്താനുള്ള ശ്രമത്തിലാണ്. ബ്രെക്‌സിറ്റും സ്വതന്ത്ര സ്‌കോട്ലന്‍ഡ് വാദവും ഉള്‍പ്പെടെയുള്ള വെല്ലുവിളികള്‍ ഉയരുന്നതിനിടയിലാണ് ബ്രിട്ടന്‍ വീണ്ടുമൊരു പൊതുതെരഞ്ഞെടുപ്പിലേയ്ക്ക് പോകുന്നത്. രാജ്യം ഇന്ന് നേരിടുന്ന വെല്ലുവിളികളെ നേരിടാന്‍ സുസ്ഥിരമായ ഒരു ഗവണ്‍മെന്റിന്റെ അനിവാര്യതയാണ് പൊതുതെരഞ്ഞെടുപ്പിനുള്ള കാരണമായി തെരേസാ മേയ് ചൂണ്ടിക്കാണിക്കുന്നത്. പക്ഷേ അനിവാര്യതയിലുപരിയായി ദുര്‍ബലമായ പ്രതിപക്ഷം നല്‍കുന്ന അനുകൂലമായ രാഷ്ട്രീയ കാലാവസ്ഥയെ മുതലെടുക്കുവാനുള്ള രാഷ്ട്രീയ കൗശലമാണ് ബ്രിട്ടനെ അനവസരത്തിലുള്ള ഒരു പൊതുതെരഞ്ഞെടുപ്പിലേയ്ക്കും അതുവഴിയുള്ള അനാവശ്യ ചിലവുകളിലേയ്ക്കും തള്ളിവിട്ടത്. കാരണം ഗവണ്‍മെന്റിന്റെ സുസ്ഥിതരക്കോ തീരുമാനങ്ങള്‍ എടുക്കുവാനുള്ള ശേഷിക്കോ യാതൊരുവിധ ഭീഷണിയും ഇല്ലാതിരുന്ന ഒരു സാഹചര്യത്തിലാണ് ബ്രിട്ടന്‍ വീണ്ടുമൊരു പൊതുതെരഞ്ഞെടുപ്പിനെ നേരിടുന്നത്.

ബ്രിട്ടനില്‍ മൊത്തം 650 പാര്‍ലമെന്റ് മണ്ഡലങ്ങളും നാലരക്കോടി വോട്ടര്‍മാരുമാണ് ഉള്ളത്. ബ്രിട്ടന്റെ ചരിത്രത്തില്‍ ആദ്യമായി ഹൗസ് ഓഫ് കോമണ്‍സിലേയ്ക്കുള്ള പൊതുതെരഞ്ഞെടുപ്പ് നടക്കുന്നത് 1802ലാണ്. ജനാധിപത്യ ലോകത്തില്‍ സ്ത്രീ പുരുഷ സമത്വത്തോടെ വോട്ടവകാശം വിനിയോഗിക്കുന്നതിനുള്ള അവകാശം ലഭിച്ചതിനു ശേഷമുള്ള ആദ്യ ഇലക്ഷന്‍ ബ്രിട്ടനില്‍ നടക്കുന്നത് 1929-ലാണ്. 1918ന് മുമ്പ് പൊതു തെരഞ്ഞെടുപ്പ് ഒരു ദിവസം കൊണ്ട് തീരുമായിരുന്നില്ല. മറിച്ച് ആഴ്ചകള്‍ നീണ്ടുനില്‍ക്കുന്ന പ്രക്രിയ ആയിരുന്നു. 2015ല്‍ ആണ് ഇതിനുമുമ്പ് ബ്രിട്ടണില്‍ പൊതുതെരഞ്ഞെടുപ്പ് നടക്കുന്നത്. നിലവിലുള്ള പാര്‍ലമെന്റിന് അടുത്ത മൂന്ന് വര്‍ഷം കൂടി കാലാവധി ഉണ്ടായിരുന്നു.

സാമ്പത്തിക വളര്‍ച്ചയ്ക്ക് കണ്‍സര്‍വേറ്റീവുകള്‍ അധികാരത്തില്‍ വരുന്നതാണ് നല്ലതെന്ന് കരുതപ്പെടുന്നുണ്ടെങ്കിലും ബ്രിട്ടണിലെ സാമാന്യ ജനത്തിന് പ്രത്യേകിച്ച് മധ്യവര്‍ഗത്തിനും കുറഞ്ഞ വരുമാനക്കാര്‍ക്കും നേട്ടം ലേബര്‍ ഗവണ്‍മെന്റാണ്. കണ്‍സര്‍വേറ്റീവുകളുടെ പല നയങ്ങളും സാധാരണ ജനങ്ങളുടെ ജീവിതഭാരം വര്‍ധിപ്പിക്കുന്നതും സമ്പന്ന വര്‍ഗ്ഗത്തിന് അനുകൂലവുമാണ്. ബ്രെക്സിറ്റിനോടനുബന്ധിച്ചുണ്ടാകുന്ന സാമ്പത്തിക ബാധ്യത സാധാരണക്കാരന്റെ മേല്‍ അടിച്ചേല്‍പ്പിക്കുന്നതു മൂലമുണ്ടാകുന്ന ജനരോഷം 2010-ല്‍ നേരിടുന്നതിനേക്കാള്‍ നല്ലത് രണ്ട് വര്‍ഷം കൂടി കഴിഞ്ഞതിനുശേഷം 2022-ല്‍ അഭിമുഖീകരിക്കുന്നതാണെന്ന കണക്കു കൂട്ടലാണ് രണ്ടുവര്‍ഷം മാത്രം കഴിഞ്ഞ പാര്‍ലമെന്റ് പിരിച്ചുവിടാന്‍ തെരേസാ മേയെ പ്രേരിപ്പിച്ചത്. പക്ഷേ ഒരു അനാവശ്യ തെരഞ്ഞെടുപ്പ് തങ്ങളുടെ മേല്‍ അടിച്ചേല്‍പ്പിച്ചതിനോട് ബ്രിട്ടീഷ് വോട്ടര്‍മാര്‍ പ്രതികരിക്കാന്‍ സാധ്യതയുള്ളത് കണ്‍സര്‍വേറ്റീവുകള്‍ക്ക് ഭീഷണിയാണ്.

രാഷ്ട്രീയ കാലാവസ്ഥ മൊത്തത്തില്‍ കണ്‍സര്‍വേറ്റീവ് പാര്‍ട്ടിക്ക് അനുകൂലമാണെന്നാണ് വിലയിരുത്തപ്പെടുന്നത്. ലേബര്‍ പാര്‍ട്ടിയുടെ മേല്‍ വലിയൊരു ആധിപത്യം സ്ഥാപിക്കാന്‍ ഇപ്പോള്‍ ഉള്ളതില്‍ കൂടുതല്‍ അവസരങ്ങള്‍ ഭാവിയില്‍ ലഭിക്കുകയില്ലെന്നാണ് തെരേസാ മേയുടെയും കണ്‍സര്‍വേറ്റീവ് ക്യാമ്പുകളുടെയും ധാരണ.

ലേബര്‍ പാര്‍ട്ടി നേതാവ് ജെര്‍മി കോര്‍ബിന്റെ നേതൃത്വം ദുര്‍ബലമാണെന്നും 2020-ല്‍ ഈ സാഹചര്യം ആയിരിക്കുകയില്ലെന്നുമുള്ള ഭീതിയും കണ്‍സര്‍വേറ്റീവുകളെ അനവസരത്തിലുള്ള ഒരു പൊതുതെരഞ്ഞെടുപ്പിന് പ്രേരിപ്പിച്ചു. ലിബറല്‍ ഡെമോക്രാറ്റുകള്‍ കഴിഞ്ഞ ലോക്കല്‍ ഇലക്ഷനോടുകൂടി തങ്ങളുടെ നില മെച്ചപ്പെടുത്താന്‍ ആരംഭിച്ചിട്ടുണ്ട്. അവരുടെ സ്ഥിതി മെച്ചപ്പെടുത്തുന്നതിനുമുമ്പ് ഒരു തെരഞ്ഞെടുപ്പാണ് നല്ലതെന്ന് തെരേസ മേയ് കരുതുന്നു. ബ്രെക്സിറ്റിന്റെ വക്താവാകുകയും യൂറോപ്യന്‍ യൂണിയനില്‍ നിന്ന് പൂര്‍ണമായും പിന്‍വാങ്ങണമെന്ന് വാദിക്കുന്നവരുടെ നേതൃത്വം തെരേസ മേയ് ഏറ്റെടുക്കുകയും ചെയ്തതോടെ തീവ്രചിന്താഗതിക്കാരായ യു.കെ.ഐ.പി. പാര്‍ട്ടിക്ക് ബ്രിട്ടീഷ് രാഷ്ട്രീയത്തില്‍ സ്ഥാനമില്ലാതായി. ഒരു പാര്‍ലമെന്റ് അംഗത്തെ മാത്രം വിജയിപ്പിക്കാനായ സ്‌കോട്ലന്‍ഡിലും സ്ഥിതി മെച്ചപ്പെടുത്താനാവുമെന്ന് കണ്‍സര്‍വേറ്റീവുകള്‍ കരുതുന്നു.

അടിച്ചേല്‍പിക്കപ്പെട്ട ഒരു തെരഞ്ഞെടുപ്പാണെങ്കിലും പൊതുതെരഞ്ഞെടുപ്പിന് പ്രമുഖ പാര്‍ട്ടികളെല്ലാം സ്വാഗതം ചെയ്യുകയാണ്. കാരണം പൊതുതെരഞ്ഞെടുപ്പിനെ എതിര്‍ത്താല്‍ അത് പരാജയഭീതി കൊണ്ടാണെന്ന് വ്യാഖ്യാനിക്കപ്പെടുമെന്ന് പ്രതിപക്ഷ പാര്‍ട്ടികള്‍ കരുതുന്നു. എന്തായാലും ബ്രിട്ടനിലെ സാധാരണ ജനങ്ങളുടെ പ്രശ്നങ്ങളിലേയ്ക്ക് തെരഞ്ഞെടുപ്പു വിഷയങ്ങള്‍ കടന്നുവരുകയാണെങ്കില്‍ കഴിഞ്ഞ ഏഴ് വര്‍ഷമായി അധികാരത്തിലിരിക്കുന്ന കണ്‍സര്‍വേറ്റീവുകള്‍ പലതിനും ഉത്തരം കണ്ടെത്താന്‍ വിഷമിക്കും.

വേക്ക് ഫീൽഡിൽ താമസിക്കുന്ന ജോജി തോമസ് മലയാളം യുകെ ന്യൂസ് ടീം മെമ്പറും ആനുകാലിക സംഭവങ്ങൾ സൂക്ഷ്മമായി വിലയിരുത്തുന്ന സാമൂഹിക നിരീക്ഷകനുമാണ്. മാസാവസാനങ്ങളിൽ പ്രസിദ്ധീകരിക്കുന്ന മാസാന്ത്യാവലോകനം എന്ന ഈ പംക്തി കൈകാര്യം ചെയ്യുന്നത് ജോജി തോമസാണ്.

കഴിഞ്ഞ ദിവസം അന്തരിച്ച തമിഴ് നടന്‍ വിനു ചക്രവര്‍ത്തിയെ മലയാളികള്‍ അറിയും .ഒരുപാട് മലയാളം സിനിമകളില്‍ അദ്ദേഹം അഭിനയിച്ചിട്ടുണ്ട് .എന്നാല്‍ തെന്നിന്ത്യൻ ചലച്ചിത്ര രംഗത്തെ മാദകറാണിയായിരുന്ന സിൽക്ക് സ്മിതയെ സിനിമയുക്ക് പരിചയപെടുത്തിയത് വിനു ചക്രവര്‍ത്തി ആണെന്ന്   പലര്‍ക്കും അറിയില്ല .

വിജയമാല എന്ന ആന്ധ്രക്കാരി സില്‍ക്ക് എന്ന മാദകറാണിയായത് വിനു ചക്രവര്‍ത്തിയുടെ രചനയില്‍ കെ വിജയന്‍ സംവിധാനം ചെയ്ത വണ്ടിചക്രം എന്ന ചിത്രത്തിലൂടെയാണ്. താനും സില്‍ക്കും തമ്മിലുള്ള ബന്ധം പലപ്പോഴും ചോദ്യം ചെയ്യപ്പെട്ടിട്ടുണ്ടെന്ന് വിനു ചക്രവര്‍ത്തി ഒരിക്കല്‍ ഒരു തമിഴ് ചാനലിന് നല്‍കിയ അഭിമുഖത്തില്‍ പറഞ്ഞിരുന്നു.

വണ്ടിചക്രം എന്ന ചിത്രത്തിനായി ഒരു നടിയെ വേണം എന്ന് പറഞ്ഞ് നിര്‍മാതാവ് തിരുപ്പൂര്‍ മണി എന്നെ സമീപിച്ചു. ചിത്രത്തില്‍ അഭിനയിക്കാന്‍ ഒരുപാട് പെണ്‍കുട്ടികള്‍ എത്തിയിരുന്നു. അതിനിടയിലാണ് അതീവ വശ്യതയുള്ള കണ്ണുകള്‍ക്കുടമയായ ഒരു പെണ്‍കുട്ടി എന്റെ ശ്രദ്ധയില്‍പ്പെടുന്നത്. അടുത്ത് വിളിച്ച് പേര് ചോദിച്ചപ്പോള്‍ അവള്‍ പറഞ്ഞു. ‘സര്‍ എന്റെ പേര് വിജയമാല. ആന്ധ്രയില്‍ നിന്നാണ് വരുന്നത്. സിനിമയില്‍ അഭിനയിക്കണമെന്നുണ്ട്.

വീടുകളില്‍ ജോലിക്ക് പോയി കൊണ്ടിരിക്കുകയാണ്. നാട്ടില്‍ അത്യാവശ്യം ഡാന്‍സ് ചെയ്യാറുണ്ട്’. കുഴപ്പമില്ല എന്ന് തോന്നിയപ്പോള്‍ അവളെ ക്യാമറ ടെസ്റ്റിന് പരിഗണിച്ചു. ക്യാമറയ്ക്ക് മുന്‍പിലെത്തിയപ്പോള്‍ അവളുടെ കണ്ണുകളിലെ ഭാവം മാറി. ഒരു പ്രത്യേക ശരീരഭാഷയായിരുന്നു അവളുടേത്. ഞങ്ങള്‍ അവളെ തിരഞ്ഞെടുത്തു 22 ദിവസമാണ് അവളെ വച്ച് ചിത്രീകരിച്ചത്.

നിങ്ങള്‍ എല്ലാവരും പറയുന്നതുപോലെ സില്‍ക്ക് എന്നല്ല, അവളുടെ പേര് സിലുക്ക് എന്നാണ്. അവള്‍ പിന്നീട് ശ്രദ്ധിക്കപ്പെട്ടു. കമലഹാസനും രജനികാന്തിനുമൊപ്പമെല്ലാം സിനിമകള്‍ ചെയ്തു. തെന്നിന്ത്യയിലെ മാദകറാണിയായി. അതിന് ശേഷം സിലുക്കും ഞാനും തമ്മില്‍ ബന്ധമുണ്ടായിരുന്നില്ല. അവളുടെ കണ്ണുകള്‍ ചാരായം പോലെ ലഹരി നിറഞ്ഞതാണെന്ന് പലരും പറയുന്നത് കേട്ടിട്ടുണ്ട്. മരണത്തിനു ശേഷവും അവളെ ആരും വെറുതെ വിട്ടില്ല. അവളുടെ ജഡത്തില്‍ അടിവസ്ത്രമിട്ട് പലരും ചിത്രങ്ങളിറക്കി, കോടികള്‍ നേടി. ഈ സിനിമകള്‍ക്കെതിരെ കേസ് കൊടുക്കണമെന്ന് പലരും എന്നോട് പറഞ്ഞിട്ടുണ്ട്.

സിലുക്ക് മരിച്ചപ്പോഴും എല്ലാവര്‍ക്കും അറിയേണ്ടത് ഞങ്ങള്‍ തമ്മിലുള്ള ബന്ധത്തെക്കുറിച്ചാണ്. അവള്‍ ആത്മഹത്യ ചെയ്തു എന്ന വാര്‍ത്ത ഞാന്‍ അറിഞ്ഞത് സിംഗപ്പൂരില്‍ വച്ചാണ്. അവിടെ വച്ച് ഒരാള്‍ എന്നോട് ചോദിച്ചു സിലുക്കിനെയും എന്നെയും ഒരു മുറിയ്ക്കുള്ളില്‍ പൂട്ടിയിട്ടാല്‍ എന്താണ് സംഭവിക്കുന്നതെന്ന്. ഞാന്‍ അയാളോട് പറഞ്ഞു. ‘നിങ്ങളുടെ കണ്ണില്‍ ഞാന്‍ ഒരു പുരുഷനും അവളൊരു സ്ത്രീയും മാത്രം. എന്നാല്‍ എനിക്ക് അവള്‍ മകളെപ്പോലെയായിരുന്നു. മാതാപിതാക്കളുടെ സ്നേഹവും സുരക്ഷിതത്വവുമില്ലാതെ വളര്‍ന്നതുകൊണ്ടാണ് സിലുക്കിന് ഇങ്ങനെ ആകേണ്ടി വന്നത്. അവള്‍ മറ്റുള്ളവര്‍ക്ക് വേണ്ടി ജീവിച്ചു. അവസാനം എല്ലാവരും അവളെ ചൂഷണം ചെയ്തു. തള്ളിപ്പറഞ്ഞു. ഈ നിരാശയില്‍ അവള്‍ ജീവിതമൊടുക്കി. അടുത്ത ജന്‍മം ഉണ്ടെങ്കില്‍ എനിക്കവളുടെ അച്ഛനായാല്‍ മതി’. സിംഗപ്പൂരിലെ വിമാനത്താവളത്തില്‍ ഞാന്‍ ഈ പറയുന്നത് ഒരു കൂറ്റന്‍ സ്‌ക്രീനില്‍ കാണിച്ചിരുന്നു. എല്ലാവരും അന്ന് കയ്യടിച്ചു. ഞാന്‍ അവളുടെ അധ്യാപകനായിരുന്നു. ഒരുപാട് കാര്യങ്ങള്‍ പറഞ്ഞുകൊടുത്തിരുന്നു. എന്നാല്‍ ജീവിതം അവളെക്കൊണ്ട് അതിനപ്പുറം പലതും ചെയ്യിച്ചു- വിനു ചക്രവര്‍ത്തി ആ അഭിമുഖത്തില്‍ പറഞ്ഞു.

Read more.. ഇവനെയും കൊല്ലട്ടെ..? വേണ്ട ഇവൻ നിങ്ങളുടെ മകനാണ് !!!കാമുകനുമായി ചേർന്ന് ഭർത്താവിനെയും, മകളെയും കൊന്നു, മനഃസാക്ഷി മരവിച്ചുപോകും ഈ ആരും കൊലപാതകത്തിന്റെ കഥകേട്ടാൽ ?

ഓണ്‍ലൈന്‍ മദ്യവില്‍പന എന്ന ആശയവുമായി വീണ്ടും രംഗത്തുവന്നിരിക്കുകയാണ് നടനും സംവിധായകനുമായ ജോയ് മാത്യു. ഓണ്‍ലൈന്‍ മദ്യവില്‍പനയെ അനുകൂലിച്ച് പോലീസ് സര്‍ക്കാരിന് റിപ്പോര്‍ട്ട് നല്‍കിയതിനെ കുറിച്ചുള്ള മാതൃഭൂമി വാര്‍ത്തയെ അധികരിച്ചാണ് ജോയ് മാത്യു ഫെയ്സ്ബുക്കില്‍ പോസ്റ്റിട്ടത്. ഓണ്‍ലൈന്‍ വഴി മദ്യം വില്‍ക്കുന്ന കാര്യം സര്‍ക്കാര്‍ ഗൗരവമായി പരിഗണിക്കണമെന്ന് ജോയ് മാത്യു നേരത്തെ മറ്റൊരു പോസ്റ്റില്‍ ആവശ്യപ്പെട്ടിരുന്നു.

ഒരാളോട് പ്രണയം തോന്നുക, അവരോടൊത്ത് ജീവിതം ആരംഭിക്കുക, ഒരു തീരുമാനം എടുക്കുമ്പോള്‍ ഇയാള്‍ ജീവിതകാലം മുഴുവന്‍ ഉണ്ടാകുമോ, വിശ്വസിക്കാമോ എന്നെല്ലാം ആശങ്കകളുണ്ടാകുക സ്വാഭാവികം. പുരുഷന്‍മാരുടെ കാര്യത്തില്‍ ചില ലക്ഷണങ്ങള്‍ കണക്കിലെടുത്താല്‍ അയാള്‍ ജീവിതകാലം മുഴുവന്‍ ഉണ്ടാകുമോ എന്നു തിരിച്ചറിയാനാകും.

1. നിങ്ങള്‍ പരിചയപ്പെട്ട് ഏറെ നാള്‍ കഴിഞ്ഞ ശേഷവും നിങ്ങള്‍ക്ക് ആദ്യം നല്‍കിയിരുന്ന പരിഗണനയില്‍ കുറവുണ്ടാവാതിരിക്കുക. നിങ്ങള്‍ക്ക് വേണ്ടി സമയം കണ്ടെത്തുക, നിങ്ങളെ സര്‍പ്രൈസ് ചെയ്യിപ്പിക്കുക, ഇതെല്ലാം കുറേ നാളുകള്‍ക്ക് ശേഷവും തുടരുന്നുണ്ടെങ്കില്‍ അയാള്‍ നിങ്ങള്‍ക്കൊപ്പം ജീവിതകാലം മുഴുവന്‍ ഉണ്ടാകുമെന്ന് ഉറപ്പിക്കാം. പരിചയപ്പെട്ട് പ്രണയത്തിലായ ശേഷം ഈ പരിഗണനയില്‍ കുറവുണ്ടെങ്കില്‍ അത്തരം വ്യക്തികളെ സൂക്ഷിക്കുകയും വേണം.

2. നിങ്ങളെ ആകര്‍ഷിക്കാന്‍ വേണ്ടിയുള്ള ശ്രമങ്ങള്‍ തുടരുക. നിങ്ങള്‍ കൂടെയുണ്ടെന്ന് വച്ച് ഇനി എന്തുമാകാം എന്ന ധാരണ അവര്‍ക്ക് ഉണ്ടാകില്ല. അവര്‍ നിങ്ങളെ ആകര്‍ഷിക്കാന്‍ വീണ്ടും വീണ്ടും ശ്രമിച്ചുകൊണ്ടിരിക്കും. നല്ല വസ്ത്രധാരണം നടത്തുന്നതെല്ലാം ഇവയില്‍ പെടും. ഈ ശ്രമങ്ങള്‍ തുടരുന്ന ഒരാളെ നിങ്ങള്‍ക്ക് വിശ്വസിക്കാം. അയാള്‍ നിങ്ങള്‍ക്കൊപ്പം ജീവിതകാലം മുഴുവന്‍ ഉണ്ടാകും.

3. സ്വന്തം കാര്യം മാത്രം നോക്കാതെ നിങ്ങളെ കൂടി പരിഗണിക്കുക. രണ്ടു പേരും തുല്യരാണെന്ന് തിരിച്ചറിഞ്ഞ് അതനുസരിച്ച് പെരുമാറുക. അവരുടെ സമയത്തിനും സൗകര്യത്തിനും വേണ്ടി മാത്രം നിങ്ങളെ ഉപയോഗിക്കാതാരിക്കുക. ജീവിതകാലം മുഴുവന്‍ കൂടെ ഉണ്ടാകണം എന്ന് ആഗ്രഹിക്കുന്ന വ്യക്തിയെ തിരഞ്ഞെടുക്കുമ്പോള്‍ ഇക്കാര്യങ്ങള്‍ കൂടി ശ്രദ്ധിക്കാം

4. തര്‍ക്കമുണ്ടായാല്‍ ഒത്തു തീര്‍പ്പിന് മുന്‍കൈ എടുക്കുന്ന ആളാണെങ്കില്‍ അയാളെ വിശ്വസിക്കാം. നിങ്ങള്‍ക്കിടയിലുള്ള തര്‍ക്കങ്ങള്‍ പരിഹരിക്കാന്‍ അയാള്‍ ആദ്യം മുന്നിട്ടിറങ്ങുകയാണെങ്കില്‍ അതിനര്‍ത്ഥം ആള്‍ക്ക് ഈഗോ കുറവാണ് എന്നതാണ്. തെറ്റ് ചെയ്താൽ അത് ഏറ്റുപറയുകയും നിങ്ങളുടെ തെറ്റുകള്‍ ക്ഷമിക്കുകയുമാണ് ഒരു പുരുഷന്‍ എന്നതിനൊപ്പം ഒരു വ്യക്തിയില്‍ നിന്ന് പോലും നിങ്ങള്‍ക്ക് പ്രതീക്ഷിക്കാവുന്ന ഏറ്റവും നല്ല ഗുണം.

5. നിങ്ങളുടെ സുഹൃത്തുക്കളെയും കുടുംബാംഗങ്ങളെയും ബഹുമാനിക്കുന്ന അവരോട് നന്നായി ഇടപഴകുന്ന ആളെയും നിങ്ങള്‍ക്ക് വിശ്വസിക്കാം. അവര്‍ നിങ്ങളെ അടുത്തറിയാന്‍ ശ്രമിക്കുന്നു എന്നതാണ് ഇക്കാര്യങ്ങള്‍ സൂചിപ്പിക്കുന്നത്. നിങ്ങളെ അടുത്തറിയാന്‍ ശ്രമിക്കുന്ന ഒരാള്‍ അത് ചെയ്യുന്നത് നിങ്ങളോടുള്ള താല്‍പ്പര്യം മൂലമാണ്. അതായത് ഈ ലക്ഷണവും അയാള്‍ നിങ്ങള്‍ക്കൊപ്പം ജീവിതകാലം മുഴുവന്‍ ഉണ്ടാകുമെന്നതിന്‍റെ സൂചനയായി കാണാം.

6. സ്വന്തം പ്രശ്നങ്ങളെക്കുറിച്ച് സംസാരിക്കാന്‍ ഇവര്‍ക്ക് മടിയുണ്ടാകില്ല. അത്തരം പ്രശ്നങ്ങളില്‍ നിങ്ങളുടെ അഭിപ്രായവും ഉപദേശവും അവര്‍ തേടും.

അന്തരിച്ച ഗായിക രാധിക തിലകും ഗായിക സുജാതയും അടുത്ത ബന്ധുക്കള്‍ ആണെന്ന് സിനിമയില്‍ തന്നെ അധികം ആര്‍ക്കും അറിയില്ല . രാധിക തിലക് സുജാതയുടെ അമ്മയുടെ സഹോദരി പുത്രിയാണ്.രാധികയുടെ ആകസ്മിക മരണം തന്റെ ജീവിതത്തില്‍ ഉണ്ടാക്കിയ വേദനയെ കുറിച്ചു തുറന്നു പറയുകയാണ്‌ സുജാത .

റെക്കോര്‍ഡിംഗില്ലാത്ത വൈകുന്നേരങ്ങളില്‍ ഒരു മണിക്കൂര്‍ നീളുന്ന നടത്തം പതിവാണ്. മദ്രാസിലെ വീടിന്റെ ടെറസിലൂടെയുള്ള നടത്തത്തിനിടയില്‍, സ്ഥിരമായി ഫോണില്‍ വിളിക്കുന്ന ഒരാളുണ്ട്. രാധികാതിലക്. അമ്മയുടെ അനിയത്തിയുടെ മകളാണെങ്കിലും എനിക്കവള്‍ സ്വന്തം അനിയത്തിക്കുട്ടിയായിരുന്നു. പലപ്പോഴും മുക്കാല്‍ മണിക്കൂറോളം ആ സംസാരം നീളും. കുടുംബവും സംഗീതവുമൊക്കെ ആ ചര്‍ച്ചയിലേക്ക് കടന്നുവരും.

കുട്ടിക്കാലം മുതല്‍ എന്റെ പിന്നാലെയുണ്ടാവുമായിരുന്നു രാധിക. സംഗീതത്തോടും പാട്ടിനോടും ഭയങ്കര താല്‍പ്പര്യമായിരുന്നു. ഒരു ചേച്ചി എന്നതിലുപരി എന്നിലെ ഗായികയോടായിരുന്നു ഇഷ്ടം. ആരാധനയോടെയാണ് എന്നെ കണ്ടത്. എനിക്കു പിന്നാലെ രാധികയും സിനിമയിലെത്തി. കേരളത്തിലേക്ക് വന്നാല്‍ ഞാനും ശ്വേതയും രാധികയുടെ തൃപ്പൂണിത്തുറയിലെ വീട്ടില്‍ താമസിച്ചിട്ടേ മടങ്ങുകയുള്ളൂ. ഞങ്ങളൊന്നിച്ച് പാട്ടുപാടിയും തമാശകള്‍ പറഞ്ഞും സമയം പോകുന്നതറിയില്ല. ശ്വേതയുടെ വിവാഹം എറണാകുളത്ത് വച്ച് നടത്താനാണ് തീരുമാനിച്ചത്. അതിന്റെ എല്ലാ ഒരുക്കങ്ങളും നടത്തിയത് രാധികയും ഭര്‍ത്താവ് സുരേഷുമായിരുന്നു എന്ന് സുജാത പറയുന്നു .

ഇടക്കാലത്ത് അസുഖം വന്നപ്പോഴും എന്നോട് ഒന്നും അവള്‍  പറഞ്ഞില്ല. ആരും വിഷമിക്കുന്നത് രാധികയ്ക്കിഷ്ടമല്ല. പോസിറ്റീവ് ആയ കാര്യങ്ങളേ സംസാരിക്കാറുള്ളൂ. എപ്പോഴും സ്മാര്‍ട്ടായിരുന്നു. രാധികയും കുടുംബവും പിന്നീട് പനമ്പിള്ളി നഗറിലേക്ക് താമസം മാറി. അതിന് തൊട്ടുമുകളിലായിരുന്നു ശ്വേതയുടെ ഭര്‍ത്താവിന്റെ ഫ്‌ളാറ്റ്. ഞങ്ങള്‍ അവിടെ താമസിക്കാന്‍ വരുമ്പോള്‍ ഭക്ഷണമുണ്ടാക്കരുതെന്ന് രാധികയ്ക്ക് നിര്‍ബന്ധമാണ്. രാവിലെയും ഉച്ചയ്ക്കും രാത്രിയിലുമുള്ള ഭക്ഷണം അവളുണ്ടാക്കിവയ്ക്കും. മരിക്കുന്നതിന്റെ രണ്ടുദിവസം മുമ്പുവരെ ഞങ്ങളൊന്നിച്ചുണ്ടായിരുന്നു.

അന്നും എന്നോട് അവള്‍  പറഞ്ഞു, ‘എനിക്ക് പാട്ടിലേക്ക് തിരിച്ചുവരണം ചേച്ചീ’ എന്ന് .എറണാകുളത്തുനിന്ന് മദ്രാസിലേക്ക് വന്നതിന്റെ രണ്ടാംദിവസമാണ് പനി കൂടിയ വിവരമറിഞ്ഞത്. പിന്നീട് കേട്ടത് മരണവാര്‍ത്തയായിരുന്നു. ഒരടി കിട്ടിയതുപോലെയായി എനിക്ക്. എന്റെ അനിയത്തി വിടപറഞ്ഞിട്ട് സെപ്റ്റംബര്‍ 20ന് രണ്ടുവര്‍ഷം തികയുകയാണ്.തിരിച്ചുവരണമെന്ന അവളുടെ ആഗ്രഹം സാധിക്കാതെ പോയതാണ് എന്റെ ജീവിതത്തിലെ ഏറ്റവും വലിയ സങ്കടം. ഇപ്പോഴും വൈകിട്ട് ടെറസിലൂടെ നടക്കുമ്പോള്‍ വല്ലാതെ മിസ് ചെയ്യാറുണ്ട് രാധികയെ…സുജാത പറഞ്ഞു നിര്‍ത്തുന്നു .

പെണ്‍പിളൈ ഒരുമയെ അതിക്ഷേപിച്ച മന്ത്രി എം എം മണി രാജിവെക്കണമെന്ന് ആം ആദ്മി പാര്‍ട്ടി.
പെണ്‍പിളൈ ഒരുമൈ എന്ന സ്ത്രീകളുടെ സമരപ്രസ്ഥാനത്തെ ഹീനമായ ഭാഷയില്‍ അധിക്ഷേപിച്ച മന്ത്രിക്കെതിരെ ക്രിമിനല്‍ കേസെടുക്കണമെന്നും ആംആദ്മി പാര്‍ട്ടി ആവശ്യപ്പെട്ടു.

എംഎം മണി സര്‍ക്കാരിന്റെ മരണമണിയാണെന്ന് ഝനങ്ങള്‍ തിരിച്ചറിഞ്ഞിട്ടുണ്ട്. തൊഴിലാളികളുടെ അവകാശങ്ങള്‍ക്ക് വേണ്ടി മുഖ്യധാര രാഷ്ട്ടീയക്കാരോടും ട്രേഡ് യൂണിയനുകളോടും മാനേജ്‌മെന്റിനോടും പടപൊരുതി ലോകചരിത്രത്തില്‍ ഇടം പിടിച്ച പെണ്‍പിളൈ ഒരുമയെ അപമാനിക്കുന്ന മണി നിലകൊള്ളുന്നത് ഈ നാട്ടിലെ ദരിദ്രര്‍ക്കോ ആദിവാസികള്‍ക്കോ കര്‍ഷകര്‍ക്കോ പാവപ്പെട്ടര്‍ക്കോ വേണ്ടി അല്ല. കൈയ്യേറ്റക്കാരും എസ്‌റ്റേറ്റ് മുതലാളിമാരും റിസോര്‍ട്ട് ഖനന മാഫിയയുമാണ് മന്ത്രിയുടെ മുന്‍ഗണനയില്‍. പരസ്യമായി ഇത്തരം നിലപാടുകള്‍ എടുക്കുന്ന ഒരു മന്ത്രിയെ മന്ത്രിസഭയില്‍ ഉള്‍പ്പെടുത്തിക്കൊണ്ട് എങ്ങനെയാണ് ജനാധിപത്യം സംരക്ഷിക്കാന്‍ കഴിയുന്നതെന്നും ആം ആദ്മി പാര്‍ട്ടി ചോദിച്ചു.

ശ്രീരാം വെങ്കിട്ടരാമന്‍ എന്ന സത്യസന്ധനായ ഉദ്യോഗസ്ഥന്‍ കയ്യേറ്റമൊഴിപ്പിക്കാന്‍ നടത്തുന്ന പ്രവര്‍ത്തനങ്ങള്‍ തടസ്സപ്പെടുത്തുക വഴി സത്യപ്രതിജ്ഞ ലംഘനം നടത്തിയ എംഎം മണി ഒരു നിമിഷം പോലും മന്ത്രി സ്ഥാനത്തിരിക്കാന്‍ യോഗ്യനല്ലെന്നും കയ്യേറ്റക്കാരെ സംരക്ഷിക്കാന്‍ വര്‍ഗീയ വികാരം ഇളക്കി വിടാന്‍ ശ്രമിച്ച മണിക്കെതിരെ കേസെടുക്കണമെന്നും അവര്‍ വ്യക്തമാക്കി.

സിഡ്‌നി: ഓസ്‌ട്രേലിയയില്‍ 1300 കിലോമീറ്ററിലേറെ ദൂരം ഒറ്റക്ക് കാറോടിച്ച 12കാരന്‍ പിടിയില്‍. രാജ്യത്തിന്റെ മൂന്നിലൊന്ന് ദൂരം ഒറ്റക്ക് ഡ്രൈവ് ചെയ്ത ശേഷമാണ് ഇവന്‍ പിടിയിലായത്. ന്യൂസൗത്ത് വെയില്‍സിന് അടുത്തുള്ള ബ്രോക്കണ്‍ ഹില്ലില്‍ വെച്ചാണ് കുട്ടിയെ പോലീസ് കണ്ടെത്തിയത്. പോര്‍ട്ട് മക്ക്വയറിന് അടുത്തുള്ള കെന്‍ഡാലില്‍ നിന്നാണ് ഇവന്‍ യാത്ര ആരംഭിച്ചത്. ന്യൂസൗത്ത് വെയില്‍സ് ഏകദേശം മുഴുവനായും ഇവന്‍ കറങ്ങിയെന്നാണ് കരുതുന്നത്. പെര്‍ത്തിലേക്ക് പോകുന്നതിനിടെയാണ് ഇവന്‍ പിടിയിലായതെന്ന് പോലീസ് പ്രസ്താവനയില്‍ പറഞ്ഞത്.

ശനിയാഴ്ച രാവിലെ 11 മണിയോടെയാണ് ലോക്കല്‍ ഹൈവേ പട്രോള്‍ ഓഫീസര്‍മാര്‍ ഇവന്റെ കാര്‍ പരിശോധനയ്ക്കായി തടഞ്ഞത്. കാറിന്റെ ബമ്പര്‍ പൊളിഞ്ഞ് വഴിയിലൂടെ ഉരഞ്ഞു നീങ്ങുന്നത് ശ്രദ്ധയില്‍പ്പട്ടതോടെയാണ് പോലീസ് വാഹനം തടഞ്ഞത്. അറസ്റ്റ് ചെയ്ത കുട്ടിയെ പിന്നീട് ബ്രോക്കണ്‍ ഹില്‍ പോലീസ് സ്‌റ്റേഷനിലേക്ക് മാറ്റി. അന്വേഷണം നടന്നു വരികയാണെന്ന് പോലീസ് പറഞ്ഞു. കെന്‍ഡാലില്‍ നിന്ന് പെര്‍ത്തിലേക്ക് കാറില്‍ 40 മണിക്കൂറോളം യാത്രയുണ്ട്. ഓസ്‌ട്രേലിയയിലെ ഏറ്റവും ബുദ്ധിമുട്ടേറിയ മരുഭൂമിയിലൂടെയാണ് ഈ യാത്ര.

നള്ളാര്‍ബോര്‍ പ്ലെയിന്‍ എന്ന കുപ്രസിദ്ധമായ മരുഭൂമിയാണ് ഇത്. ഈ മരുഭൂമി കടക്കുന്നതിനായി ആറ് ദിവസമെങ്കിലും ഉപയോഗിക്കണമെന്നാണ് യാത്രക്കാരോട് രാജ്യത്തിന്റെ ഔദ്യോഗിക ടൂറിസം വെബ്‌സൈറ്റ് ആവശ്യപ്പെടുന്നത്. കിലോമീറ്ററുകളോളം മരുഭൂമി മാത്രമുള്ള ഈ പ്രദേശത്തെ യാത്രക്ക് അധിക ഇന്ധനവും ഭക്ഷണവു കരുതണമെന്ന ഉപദേശവും യാത്രക്കാര്‍ക്ക് നല്‍കാറുണ്ട്.

തൃശൂര്‍: എതിര്‍പ്പുകള്‍ വകവെക്കാതെ ആതിരപ്പള്ളിയിലെ അണക്കെട്ട് നിര്‍മാണത്തെ അനുകൂലിച്ച് കെഎസ്ഇബി. ജലവൈദ്യുത പദ്ധതിയുടെ അനിവാര്യത വിവരിച്ച് ഹ്രസ്വചിത്രവുമായാണ് കെഎസ്ഇബി രംഗത്തെത്തിയിരിക്കുന്നത്. സാധ്യമായ ജലവൈദ്യുത പദ്ധതികളില്‍ ആദ്യം പരിഗണിക്കേണ്ടത് ആതിരപ്പിള്ളി പദ്ധതിയാണെന്ന് ചൂണ്ടിക്കാണിച്ചാണ് ഡോക്യുമെന്ററി ആരംഭിക്കുന്നത്. പ്രതിഷേധങ്ങളേയും വിമര്‍ശനങ്ങളെയും പാടെ തള്ളിക്കളയുന്ന ഹ്രസ്വചിത്രത്തില്‍ പദ്ധതികളുടെ നേട്ടങ്ങളാണ് എടുത്തുപറയുന്നത്.

പദ്ധതിമൂലം നശിക്കുന്ന വനം വളരെ ചെറിയ ഭാഗമേ ഉള്ളുവെന്നും അതിനാല്‍ തന്നെ അണക്കെട്ട് മൂലം മൃഗങ്ങള്‍ക്കും പ്രകൃതിക്കും ഗുണമേ ചെയ്യുകയുള്ളുവെന്നാണ് ഹ്രസ്വചിത്രത്തിലൂടെ കെഎസ്ഇബി വാദിക്കുന്നത്. അതിരപ്പിള്ളി വെള്ളച്ചാട്ടം നിലനിര്‍ത്തിക്കൊണ്ട് തന്നെയായിരിക്കും പദ്ധതിയുടെ പൂര്‍ത്തീകരണമെന്നും ഒരു ആദിവാസി കുടുംബത്തെ പോലും ഒഴിപ്പിക്കില്ലെന്നുമാണ് വിശദീകരണം. 104.4 ഹെക്ടര്‍ വനഭൂമിയാണ് പദ്ധതിയ്ക്ക് ആവശ്യമായി വേണ്ടത്. കേരളത്തിന്റെ പുരോഗമനത്തിന് ആതിരപ്പിള്ളി ജലവൈദ്യുതി പദ്ധതിയുടെ സംഭാവന വളരെ വലുതായിരിക്കുമെന്നാണ് കെഎസ്ഇബിയുടെ വാഗ്ദാനം.

തൃശൂര്‍ പൂരത്തോട് അനുബന്ധിച്ച് നടത്തുന്ന എക്സിബിഷനില്‍ ഹ്രസ്വചിത്രത്തിന്റെ പ്രദര്‍ശനം നടത്തും. പ്രാരംഭ ചര്‍ച്ചകള്‍ നടന്നപ്പോള്‍ തന്നെ അതിരപ്പിള്ളി ജലവൈദ്യുത പദ്ധതിക്കെതിരെ വന്‍ പ്രതിഷേധം ഉയര്‍ന്നുവന്നു. എതിര്‍പ്പുമായി സര്‍ക്കാരിന്റെ ഭാഗമായ സിപിഐ പോലും പരസ്യമായി രംഗത്തെത്തിയിരുന്നു. എന്നാല്‍ എതിര്‍പ്പുകളെല്ലാം ചര്‍ച്ചകളിലൂടെ പരിഹരിച്ച് അതിരപ്പിള്ളി പദ്ധതി നടപ്പാക്കുമെന്നായിരുന്നു മന്ത്രി എംഎം മണി ഇത് സംബന്ധിച്ച് പറഞ്ഞത്.