ഫാ.ബിജു കുന്നയ്ക്കാട്ട്, പിആര്‍ഒ
വാല്‍സിംഹാം: യുകെയിലെമ്പാടുമുള്ള മലയാളി ക്രൈസ്തവരും മാതൃഭക്തരും വാല്‍സിംഹാം പുണ്യജനനിയുടെ തിരുനടയില്‍ നാളെ ഒത്തുകൂടുമ്പോള്‍ നിരവധി പ്രത്യേകതകള്‍ കൊണ്ട് വ്യത്യസ്തമാകും ഈ വര്‍ഷത്തെ വാല്‍സിംഹാം തിരുനാള്‍. 2016 ഒക്ടോബര്‍ 9-ാം തിയതിയാണ് രൂപതാ ഉദ്ഘാടനവും മെത്രാന്‍ മാര്‍ ജോസഫ് സ്രാമ്പിക്കലിന്റെ സ്ഥാനാരോഹണ ചടങ്ങുകളും നടന്നതെങ്കിലും രൂപത പ്രഖ്യാപിച്ചുകൊണ്ട് വത്തിക്കാന്‍ പുറത്തിറക്കിയ ആദ്യ ഔദ്യോഗിക പ്രഖ്യാപനം (ബൂളാ) ഉണ്ടായത് ജൂലൈ 16-ാം തിയതിയാണ്.
തിരുസഭയില്‍ ആഘോഷിക്കപ്പെടുന്ന മാതാവിന്റെ ഒരു പ്രധാന തിരുനാളായ കര്‍മ്മലമാതാവിന്റെ തിരുനാള്‍ ഈ വര്‍ഷം ജൂലൈ 16-ാം തിയതിയാണ് വരുന്നത്. ഗ്രേറ്റ് ബ്രിട്ടന്‍ രൂപത സ്ഥാപിതമായതിനു ശേഷം രൂപതാ നേതൃത്വതം ഏറ്റെടുത്തു നടത്തുന്ന ആദ്യ വാല്‍സിംഹാം തിരുനാള്‍ എന്ന പ്രത്യേകതയും ഈ വര്‍ഷമുണ്ട്. കഴിഞ്ഞ 10 വര്‍ഷങ്ങളായി ഈസ്റ്റ് ആംഗ്ലിയ രൂപതയുടെ നേതൃത്വത്തിലാണ് ഇത് നടന്നു വന്നിരുന്നത്. ഗ്രേറ്റ് ബ്രിട്ടന്‍ രൂപതയ്ക്ക് സ്വന്തമായി മെത്രാനെ ലഭിച്ചതിനാല്‍ ഈ വര്‍ഷം ഇതാദ്യമായാണ് കേരളത്തില്‍ നിന്നൊരു സന്ദര്‍ശക മെത്രാന്റെ സാന്നിധ്യമില്ലാതെ തിരുനാള്‍ നടക്കുന്നത്.
കഴിഞ്ഞ 10 വര്‍ഷത്തേക്കാളേറെയായി ഏറ്റവും കൂടുതല്‍ ആളുകള്‍ എത്തുമെന്ന് വിവരം ലഭിച്ചിരിക്കുന്നതും ഈ വര്‍ഷമാണ്. അറുപതിനു മുകളില്‍ കോച്ചുകളിലും നിരവധിയായ സ്വകാര്യ വാഹനങ്ങളിലും ഈ വര്‍ഷം സന്ദര്‍ശകരെത്തും. മാര്‍ സ്രാമ്പിക്കല്‍ മുഖ്യകാര്‍മികനായി അര്‍പ്പിക്കുന്ന ദിവ്യബലിയില്‍ 30ലേറെ വൈദികരുടെ സാന്നിധ്യമുണ്ടാകുന്നതും വാല്‍സിംഹാമില്‍ ആദ്യമായിരിക്കും. മുന്‍വര്‍ഷങ്ങളിലേതിനേക്കാള്‍ അതിവിപുലമായ ഭക്ഷണ സൗകര്യങ്ങളാണ് സംഘാടക സമിതി ഈ വര്‍ഷം ഒരുക്കിയിരിക്കുന്നത്. ഏഴായിരിത്തിലധികെ പ്രതീക്ഷിക്കപ്പെടുന്ന ഭക്തജനങ്ങളെ സ്വീകരിക്കുന്ന തിരുനാളിന് 7 കുടുംബങ്ങളാണ് ഇത്തവണ പ്രസുദേന്തിമാരാകുന്നത് എന്നതാണ് മറ്റൊരു വലിയ സവിശേഷത. രൂപതാ ക്വയര്‍ മാസ്റ്റര്‍ ഫാ.സെബാസ്റ്റ്യന്‍ ചാമക്കാലായുടെ നേതൃത്വത്തിലുള്ള ഗായകസംഘവും തിരുക്കര്‍മ്മങ്ങള്‍ക്കിടയില്‍ ഗാനങ്ങളാലപിക്കാന്‍ ഒരുങ്ങിക്കഴിഞ്ഞു.
ഇങ്ങനെ ഒട്ടനവധി പ്രത്യേകതകളുമായി ഈ വര്‍ഷം വാല്‍സിംഹാം തിരുനാളിന് ഒത്തുചേരുന്ന എല്ലാവര്‍ക്കും രൂപതാ കുടുംബത്തോട് ചേര്‍ന്ന് ഒരു ജനമായി പരി.മറിയത്തിന്റെ മാധ്യസ്ഥം പ്രാര്‍ത്ഥിക്കാനും ദൈവാനുഗ്രഹം സമൃദ്ധമായി നേടാനും ഇടയാകട്ടെയെന്ന് ആശംസിക്കുന്നു പ്രാര്‍ത്ഥിക്കുന്നു.
ഫാ.ബിജു കുന്നയ്ക്കാട്ട്, പിആര്‍ഒ
വാല്‍സിംഹാം: കാത്തുകാത്തിരുന്ന ദിവസത്തിലേക്ക് ഇനി ഒരു പകലിന്റെ ദൂരം മാത്രം. യുകെയുടെ വിവിധ ഭാഗങ്ങളില്‍ നിന്നും സമീപരാജ്യങ്ങളില്‍ നിന്നും മലയാളി ക്രൈസ്തവര്‍ ഒരുമിച്ചു കൂടുന്ന പ്രസിദ്ധമായ വാല്‍സിംഹാം തീര്‍ത്ഥാടനത്തിനുള്ള ഒരുക്കങ്ങളെല്ലാം പൂര്‍ത്തിയായിക്കഴിഞ്ഞു. തിരുനാളില്‍ പ്രസുദേന്തിമാരാല്‍ നേതൃത്വം നല്‍കുന്ന സഡ്ബറി കമ്യൂണിറ്റിയും മറ്റ് വിവിധ കമ്മിറ്റികളും രക്ഷാധികാരി മാര്‍ ജോസഫ് സ്രാമ്പിക്കലിന്റെയും ജനറല്‍ കണ്‍വീനര്‍ റവ ഫാ.ടെറിന്‍ മുള്ളക്കരയുടെയും നേതൃത്വത്തില്‍ തയ്യാറായിക്കഴിഞ്ഞു. നാളെ രാവിലെ 9 മണിക്ക് ഫാ.സോജി ഓലിക്കലും സെഹിയോന്‍ മിനിസ്ട്രീസും നേതൃത്വം നല്‍കുന്ന മരിയന്‍ ധ്യാനചിന്തകളോടെ ആരംഭിക്കുന്ന ശുശ്രൂഷകള്‍ ഉച്ച കഴിഞ്ഞ് 3.30ന് ഗ്രേറ്റ് ബ്രിട്ടന്‍ രൂപതാധ്യക്ഷന്‍ മാര്‍ ജോസഫ് സ്രാമ്പിക്കല്‍ മുഖ്യകാര്‍മികനാകുന്ന ദിവ്യബലിയോടെയാണ് സമാപിക്കുന്നത്.
വിവിധ സ്ഥലങ്ങളില്‍ നിന്ന് തീര്‍ത്ഥാടകരായി എത്തുന്ന വൈദികരുടെയും വിശ്വാസികളുടെയും ശ്രദ്ധയിലേക്ക് ചില സുപ്രധാന കാര്യങ്ങള്‍ സംഘാടക സമിതി ഓര്‍മിപ്പിക്കുന്നു. തീര്‍ത്ഥാടനത്തില്‍ പങ്കെടുക്കുന്ന വൈദികല്‍ അവരവരുടെ കുര്‍ബാനക്കുപ്പായം കൊണ്ടുവരാന്‍ ശ്രദ്ധിക്കേണ്ടതാണ്. കോച്ചുകളില്‍ വരുന്നവര്‍ പ്രദക്ഷിണത്തിന് ഉപയോഗിക്കേണ്ട മുത്തുക്കുടകള്‍ പൊന്‍ വെള്ളിക്കുരിശുകള്‍, മെഗാഫോണുകള്‍, ബാനറുകള്‍, കൊടിതോരണങ്ങ മുതലായവ കരുതേണ്ടതാണ്. വി.കുര്‍ബാനയില്‍ സജിവമായി പങ്കു ചേരാന്‍ അതാത് സമൂഹങ്ങളില്‍ നിന്നും കുര്‍ബാന പുസ്തകവും കൊണ്ടുവരാന്‍ ശ്രദ്ധിക്കേണ്ടതാണ്. തിരുക്കര്‍മ്മങ്ങളുടെ സമയക്രമീകരണങ്ങള്‍, വാല്‍സിംഹാമിലേക്ക് വരാനും തിരിച്ചു പോകാനുമുള്ള റൂട്ടുകളുടെ ക്രമീകരണങ്ങള്‍ അടങ്ങിയ മാപ്പുകള്‍ തുടങ്ങിയവ ചുവടെ ചേര്‍ത്തിരിക്കുന്നു. ഈ അനുഗ്രഹീത ദിനത്തിലേക്ക് വാല്‍സിംഹാം മാതാവിന്റെ തിരുസന്നിധിയിലേക്കും എല്ലാ ക്രൈസ്തവ വിശ്വാസികളെയും പ്രാര്‍ത്ഥനാപൂര്‍വം സ്വാഗതം ചെയ്യുന്നു.
ബാബു ജോസഫ്
റവ. ഫാ സോജി ഓലിക്കല്‍ നേതൃത്വം നല്‍കുന്ന സെഹിയോന്‍ യൂറോപ്പ് ടീന്‍സ് ഫോര്‍ കിങ്ഡം ടീം ജൂലൈ 31 മുതല്‍ ഓഗസ്റ്റ് 4 വരെ പതിമൂന്ന് വയസ്സു മുതലുള്ള കുട്ടികള്‍ക്കായി അവധിക്കാല ധ്യാനം സ്‌കൂള്‍ ഓഫ് ഇവാഞ്ചലൈസേഷന്‍ ലിവര്‍പൂളില്‍ വച്ച് നടത്തുന്നു. യേശുവിനെ ഏക രക്ഷകനായി ഹൃദയത്തില്‍ സ്വീകരിക്കുക വഴി കുടുംബത്തിലും സമൂഹത്തിലും എങ്ങനെ ദൈവമക്കളായിത്തീരാം എന്ന് പരിചയപ്പെടുത്തുന്ന, യൂറോപ്പിലും ലോകത്തിലെ വിവിധ രാജ്യങ്ങളിലുമായി നവ സുവിശേഷ വത്ക്കരണരംഗത്ത് ശക്തമായ ദൈവികാനുഭവ വേദിയായി മാറിക്കൊണ്ട് ആയിരക്കണക്കിന് കുട്ടികളില്‍ പരിശുദ്ധാത്മ കൃപയാല്‍ ദൈവാശ്രയബോധം വളര്‍ത്തി മുന്നേറുന്ന സ്‌കൂള്‍ ഓഫ് ഇവാഞ്ചലൈസേഷന്‍ എന്ന ഈ അനുഗ്രഹീത ശുശ്രൂഷയിലേക്കു WWW.sehionuk.org എന്ന വെബ്സൈറ്റില്‍ നേരിട്ട് രജിസ്റ്റര്‍ ചെയ്യാം.
സ്‌കൂള്‍ ഓഫ് ഇവാഞ്ചലൈസേഷനെക്കുറിച്ചുള്ള പ്രോമോ വീഡിയോ കാണാം.
അഡ്രസ്സ്
CROSBY HALL EDUCATIONAL TRUST
LITTLE ACRE
LIVERPOOL
L31 , ENGLAND.
കൂടുതല്‍ വിവരങ്ങള്‍ക്ക്
തോമസ് ജോസഫ് 07877508926
മേരി ജോര്‍ജ് 07453276896
ഫാ. ബിജു കുന്നയ്ക്കാട്ട് പി.ആര്‍.ഒ
വാല്‍സിംഹാം: ഈ വര്‍ഷത്തെ വാല്‍സിംഹാം തിരുനാള്‍ ഈ ഞായറാഴ്ച (16 ജൂലൈ) നടക്കുമ്പോള്‍ മാതൃഭക്തരുടെ ചുണ്ടുകള്‍ക്ക് ഇമ്പമേകാന്‍ അതിമനോഹരമായ പ്രാര്‍ത്ഥനാഗാനം. ”അമ്മേ കന്യകയേ, അമലോത്ഭവയേ ഇംഗ്ലണ്ടിന്‍ നസ്രത്താം വാല്‍സിംഹാമിന്‍ മാതാവേ” എന്നു തുടങ്ങുന്ന മനോഹരഗാനം അണിയിച്ചൊരുക്കിയിരിക്കുന്നത് ഷൈജ ഷാജി (രചന), സോണി ജോണി (സംഗീതം), ജോഷി തോട്ടക്കര (ഓര്‍ക്കസ്ട്രേഷന്‍), വില്‍സണ്‍ പിറവം (ഗായകന്‍), ഫാ. ടെറിന്‍ മുല്ലക്കര (നിര്‍മ്മാണം) എന്നിവര്‍ ചേര്‍ന്നാണ്.
വാല്‍സിംഹാം മാതാവിന്റെ തിരുസ്വരൂപത്തില്‍ ദൃശ്യമാകുന്ന കാര്യങ്ങള്‍ വര്‍ണിച്ചും ഹൃദയത്തിലുള്ള മാതൃഭക്തിയും സ്നേഹവും പ്രാര്‍ത്ഥനാ രൂപത്തിലാക്കി മാറ്റിയുമാണ് ഷൈജ ഷാജി രചന നിര്‍വ്വഹിച്ചിരിക്കുന്നത്. ഭക്തി ചൈതന്യം തുളുമ്പി നില്‍ക്കുന്ന സംഗീതവും അനുവാചകരെ പ്രാര്‍ത്ഥനാ ചൈതന്യത്തിലേയ്ക്കുണര്‍ത്തുന്ന പശ്ചാത്തല സംഗീതവും വില്‍സണ്‍ പിറവത്തിന്റെ ഭാവാത്മകവും ശ്രുതിമധുരവുമായ ആലാപനവും ഈ ഗാനത്തെ പ്രത്യേകതയുള്ളതാക്കി മാറ്റുന്നു.
വാല്‍സിംഹാം തിരുനാള്‍ ദിനത്തില്‍ പ്രാര്‍ത്ഥനകളിലും പിന്നീട് മറ്റ് കൂട്ടായ്മ പ്രാര്‍ത്ഥനകളിലും പാടി പ്രാര്‍ത്ഥിക്കാന്‍ ഉപകരിക്കുന്ന രീതിയിലാണ് ഈ ഗാനം തയ്യാറാക്കിയിരിക്കുന്നതെന്ന് തിരുനാള്‍ സംഘടാക സമിതി കണ്‍വീനര്‍ റവ. ഫാ. ടെറിന്‍ മുല്ലക്കര അറിയിച്ചു. മനോഹരമായ ദൃശ്യാവിഷ്‌ക്കാരം ചേര്‍ന്ന ഗാനത്തിന്റെ വീഡിയോ കാണാം, ചുവടെ.
അപ്പച്ചന്‍ കണ്ണഞ്ചിറ
വാല്‍സിങ്ങാം: പരിശുദ്ധ അമ്മ ഗബ്രിയേല്‍ മാലാഖയിലൂടെ മംഗള വാര്‍ത്ത ശ്രവിച്ച ‘ഭവനം’ യുകെയിലേക്ക് അത്ഭുതകരമായി പകര്‍ത്തി സൃഷ്ടിക്കപ്പെട്ടു എന്ന് വിശ്വസിക്കുന്ന പ്രമുഖ മരിയന്‍ പുണ്യ കേന്ദ്രവും യുകെയിലെ ‘നസ്രത്ത്’ എന്നറിയപ്പെടുകയും ചെയ്യുന്ന വാല്‍സിങ്ങാമില്‍ ഗ്രേറ്റ് ബ്രിട്ടണ്‍ സീറോ മലബാര്‍ രൂപതയുടെ സ്ഥാപനത്തിന് ശേഷം സംഘടിപ്പിക്കുന്ന പ്രഥമ തീര്‍ത്ഥാടനത്തില്‍ ഭാഗഭാക്കാകുവാന്‍ വെസ്റ്റ്മിന്‍സ്റ്റര്‍ ചാപ്ലൈന്‍സിയുടെ കീഴിലുള്ള മരിയന്‍ ഭക്തരും. ദേശീയതലത്തില്‍ മാതൃഭക്തര്‍ ഒത്തുകൂടുന്ന മരിയന്‍ പ്രഘോഷണ ദിന ആഘോഷത്തില്‍ വെസ്റ്റ്മിന്‍സ്റ്റര്‍ അതിരൂപതയുടെ പരിധിയില്‍ ഫാ.സെബാസ്റ്റ്യന്‍ ചാമക്കാലയുടെ ചാപ്ലൈന്‍സിയുടെ കീഴിലുള്ള മലയാളം കുര്‍ബ്ബാന കേന്ദ്രങ്ങളിലെ മാതൃഭക്തര്‍ 6 കോച്ചുകളിലും നിരവധി കാറുകളിലുമായി മാതൃ സന്നിധിയില്‍ എത്തി തീര്‍ത്ഥാടനത്തില്‍ പങ്കാളികളാവും.
യുകെയില്‍ രൂപതയുടെ സ്ഥാപനത്തിലൂടെ കൈവന്ന അജപാലന ശ്രേഷ്ഠ പങ്കാളിത്തം കൊണ്ടും വന്‍ മാതൃഭക്തജന പങ്കാളിത്തം കൊണ്ടും ആത്മീയ ഉത്സവ പകിട്ടുകൊണ്ടും പ്രമുഖ മരിയന്‍ പുണ്യ കേന്ദ്രത്തില്‍ സഡ്ഡ്ബറി കാത്തലിക് കമ്മ്യൂണിറ്റി കൂട്ടായ്മ ഏറ്റെടുത്ത് നടത്തുന്ന വാല്‍സിങ്ങാം മഹാ തീര്‍ത്ഥാടനം മലയാളി മരിയന്‍ ചരിത്ര താളില്‍ ആത്മീയ നവ ചരിത്രം കുറിക്കും.
ഈസ്റ്റ് ആംഗ്ലിയായിലെ കാനന്‍ ഫാ.മാത്യു ജോര്‍ജ്ജ് വണ്ടാലക്കുന്നേല്‍ പത്തു വര്‍ഷങ്ങള്‍ക്കു മുമ്പേ മലയാളി മാതൃഭക്തര്‍ക്കായി രൂപം കൊടുത്തു നേതൃത്വം നല്‍കി ആതിഥേയരായ ഈസ്റ്റ് ആംഗ്ലിയായിലെ മരിയന്‍ ഭക്തരെ മുന്നിട്ടിറക്കി ആരംഭിച്ച വാല്‍സിങ്ങാം തീര്‍ത്ഥാടനം ക്രമേണ യുകെയിലെ മുഴുവന്‍ മാതൃഭക്തരും ഹൃദയത്തില്‍ ഏറ്റെടുക്കുകയും ആയിരങ്ങളുടെ സംഗമ വേദിയും അഭയ കേന്ദ്രവും ആയി മാറുകയുമായിരുന്നു.
ഈസ്റ്റ് ആംഗ്ലിയായിലെ സീറോ മലബാര്‍ ചാപ്ലയിന്‍ ഫാ.ടെറിന്‍ മുല്ലക്കരയുടെ നേതൃത്വത്തില്‍ ഏറ്റവും മികച്ച സംഘാടകത്വം പുറത്തെടുക്കുവാനുള്ള ഈ വര്‍ഷത്തെ സഡ്ബറിയിലെ പ്രാര്‍ത്ഥനാ നിരതരായ ഏഴു കുടുംബങ്ങളുടെ കൂട്ടായ ശ്രമം അവരുടെ തീക്ഷ്ണമായ മരിയന്‍ ഭക്തിയില്‍ തീര്‍ത്ഥാടകര്‍ക്കായി വാല്‍സിങ്ങാമില്‍ അനുഗ്രഹങ്ങളുടെ വിളനിലം തീര്‍ക്കും.
കത്തോലിക്കരുടെ അധീനതയിലുള്ള വാല്‍സിങ്ങാം സ്ലിപ്പര്‍ ചാപ്പലില്‍ ജൂലൈ 16 നു ഞായറാഴ്ച രാവിലെ ഒമ്പതു മണിക്ക് ആരംഭിക്കുന്ന തീര്‍ത്ഥാടന ശുശ്രുഷകളില്‍ യുകെയിലെ അനുഗ്രഹീത വചന പ്രഘോഷകനായ സോജി ഓലിക്കല്‍ അച്ചന്‍ നടത്തുന്ന മരിയന്‍ പ്രഘോഷണം ആത്മീയ നിറവ് പകരും. പതിനൊന്നര മുതല്‍ രണ്ടു മണി വരെ കുട്ടികളെ അടിമ വെക്കുന്നതിനും ഭക്ഷണത്തിനുമായുള്ള ഇടവേള ആയിരിക്കും. തുടര്‍ന്ന് നടക്കുന്ന മരിയന്‍ റാലിയില്‍ മാതൃഭക്തി ഗീതങ്ങളാല്‍ മുഖരിതമായ അന്തരീക്ഷത്തില്‍ പരിശുദ്ധ ജപമാലയും സമര്‍പ്പിച്ച് ‘ആവേ മരിയാ’ സ്തുതിപ്പുകളുമായി വര്‍ണ്ണാഭമായ മുത്തുക്കുടകളുടെയും വാദ്യ മേളങ്ങളുടെയും അകമ്പടിയോടെ നടത്തുന്ന തീര്‍ത്ഥാടനം മരിയ പ്രഘോഷണ സന്നിധേയത്തേ മാതൃ ഭക്തിസാന്ദ്രമാക്കും.
തീര്‍ത്ഥാടനത്തില്‍ മുഖ്യ കാര്‍മ്മികനും സംഘാടകനുമായി സീറോ മലബാര്‍ സഭയുടെ യുകെയിലെ അജപാലക ശ്രേഷ്ഠന്‍ മാര്‍ ജോസഫ് സ്രാമ്പിക്കല്‍ പിതാവിന്റെ അനുഗ്രഹീത സാന്നിദ്ധ്യം ഈ മരിയോത്സവത്തിനു ആത്മീയശോഭ പകരും. ആഘോഷമായ തിരുന്നാള്‍ സമൂഹബലിയില്‍ സഹ കാര്‍മ്മികത്വം വഹിക്കുവാനായി യുകെയുടെ നാനാഭാഗങ്ങളില്‍ നിന്നായി അജപാലന ശുശ്രുഷ ചെയ്യുന്ന മുഴുവന്‍ വൈദികരുടെയും നീണ്ടനിര തന്നെ ഉണ്ടാവും.
പരിശുദ്ധ മാതാവിന്റെ മദ്ധ്യസ്ഥതയില്‍ അനുഗ്രഹങ്ങളും ഉദ്ദിഷ്ട കാര്യ സാധ്യതയും പ്രാപിക്കുവാന്‍ ഏറ്റവും അനുഗ്രഹീതമായ മരിയന്‍ പുണ്യ കേന്ദ്രത്തില്‍ സംഘടിപ്പിക്കുന്ന തീര്‍ത്ഥാടനത്തിലേക്ക് വെസ്റ്റ്മിന്‍സ്റ്റര്‍ അതിരൂപതയിലെ സ്റ്റീവനേജ്, വെംബ്ലി, എഡ്മണ്ടന്‍, എന്‍ഫീല്‍ഡ്, വാറ്റ്ഫോര്‍ഡ്, ഹെയ്സ് അടക്കമുള്ള വിവിധ കേന്ദ്രങ്ങളില്‍ നിന്നായി കോച്ചുകളിലും കാറുകളിലുമായി നിരവധി മാതൃ ഭക്തര്‍ മരിയോത്സവത്തില്‍ പങ്കു ചേരും. വെസ്റ്റ്മിന്‍സ്റ്റര്‍ അതിരൂപതയിലെ സീറോ മലബാര്‍ ചാപ്ലയിന്‍ കൂടിയായ ഫാ.സെബാസ്‌ററ്യന്‍ ചാമക്കാലയാണ് ആഘോഷമായ തീര്‍ത്ഥാടന സമൂഹ ബലിയില്‍ ഗാന ശുശ്രുഷ നയിക്കുക.
സഖറിയ പുത്തന്‍കളം
ചെല്‍ട്ടണ്‍ഹാം: 16-ാമത് യു.കെ.കെ.സി.എ കണ്‍വെന്‍ഷന്റെ പ്രൗഡഗംഭീരമായ റാലി മത്സരത്തില്‍ എ കാറ്റഗറിയില്‍ ഗ്ലോസ്റ്റര്‍, ബി കാറ്റഗറിയില്‍ ബര്‍മിങ്ങ്ഹാം ജേതാക്കള്‍ ആയി. പതിവിന് വിപരീതമായി ഇത്തവണ എല്ലാ യൂണിറ്റുകളും അത്യന്തം വീറും വാശിയോടെയാണ് റാലി മത്സരത്തില്‍ പങ്കെടുത്തത്. പ്രതീക്ഷിച്ചതിനെക്കാളും ഒരു മണിക്കൂര്‍ വൈകി റാലി മത്സരം അവസാനിച്ചത് റാലിയിലെ അംഗങ്ങളുടെ സജീവ പങ്കാളിത്തവും അംഗങ്ങളുടെ സജീവമായ പ്രവര്‍ത്തനവും കണ്വെന്ഷന് റാലിയെ മനോഹരമാക്കി. എ കാറ്റഗറിയില്‍ ഗ്ലോസ്റ്റര്‍ ഒന്നാംസ്ഥാനവും ഈസ്റ്റ് ആംഗ്ലിയ രണ്ടാം സ്ഥാനം, മൂന്നാം സ്ഥാനം കെറ്ററിംഗ് കരസ്ഥമാക്കി.
ബി കാറ്റഗറിയില്‍ ഒന്നാം സ്ഥാനം സ്റ്റോക്ക് – ഓണ്‍ – ട്രെന്‍ഡ്, രണ്ടാം സ്ഥാനം സ്റ്റീവനേജ്, മൂന്നാം സ്ഥാനം നോര്‍ത്ത് വെസ്റ്റ് ലണ്ടന്‍ കരസ്ഥമാക്കി. ഏറ്റവും വലിയ ഗ്രൂപ്പായ ബി കാറ്റഗറിയില്‍ ഒന്നാം സ്ഥാനം ബര്‍മിങ്ങ്ഹാം രണ്ടാം സ്ഥാനം മാഞ്ചസ്റ്റര്‍, മൂന്നാം സ്ഥാനം ലിവര്‍പൂള്‍ നേടി.
ഒരു ഇടവേളയ്ക്ക് ശേഷം പൂര്‍ണ പ്രതാപത്തോടെ റാലിയില്‍ മികച്ച പ്രകടനം കാഴ്ചവെച്ച മാഞ്ചസ്റ്റര്‍ യൂണിറ്റ് ജനപ്രിയ പ്രശംസ നേടിയെടുത്തു. വിഗന്‍ യൂണിറ്റിന്റെ റാലിക്ക് മുക്തകണ്ഠ പ്രശംസ നേടി. ഫാ. മാത്യൂ കട്ടിയാങ്കല്‍, ഫാ. എബ്രഹാം പറമ്പേട്ട്, എബ്രഹാം നടുവത്തറ എന്നിവരായിരുന്നു വിധി നിര്‍ണയ കമ്മിറ്റിയില്‍ ഉണ്ടായിരുന്നത്.
കെറ്ററിംഗ്: 16-ാമത് യു.കെ.കെ.സി.എ കണ്‍വെന്‍ഷനോടനുബന്ധിച്ച് ”സഭ – സമുദായ സ്നേഹം ആത്മാവില്‍ അഗ്‌നിയായി ക്നാനായ ജനത” എന്ന വിഷയത്തിലടിസ്ഥാനമാക്കി നടത്തപ്പെട്ട ഉപന്യാസ മത്സരത്തില്‍ മെഡ്വെ യൂണിറ്റിലെ മാത്യു പുളിക്കതൊട്ടിയില്‍ ഒന്നാം സ്ഥാനം നേടി. രണ്ടാം സ്ഥാനം സ്റ്റോക്ക് ഓണ്‍ ട്രെന്‍ഡ് യൂണിറ്റിലെ സരിത ജിന്‍സും മൂന്നാം സ്ഥാനം ലിവര്‍പൂള്‍ യൂണിറ്റിലെ എബ്രഹാം നമ്പാനത്തേലും അര്‍ഹരായി. സമ്മാനങ്ങള്‍ യു.കെ.കെ.സി.എ അവാര്‍ഡ് നൈറ്റില്‍ സമ്മാനിക്കും.
ഫാ. ബിജു കുന്നയ്ക്കാട്ട് പി.ആര്‍.ഒ
വാല്‍സിംഹാം: പതിനാറ് വര്‍ഷങ്ങള്‍ക്ക് മുമ്പ് ഈസ്റ്റ് ആംഗ്ലിയ രൂപതയില്‍ വൈദിക സേവനത്തിനും പഠനത്തിനുമായി വന്ന ഫാ. മാത്യു ജോര്‍ജ് വണ്ടാലക്കുന്നേലിന്റെ മനസില്‍ ദൈവം നല്‍കിയ ഉള്‍ക്കാഴ്ചയുടെ വിത്ത്, മുളച്ച് വളര്‍ന്ന് വടവൃക്ഷമായതിന്റെ ധന്യതയിലാണ് യു.കെ.മലയാളികള്‍. കേരളത്തില്‍ മാതൃഭക്തി പലരീതിയില്‍ പരിശീലിച്ചുവന്ന ക്രൈസ്തവര്‍ യുകെയിലേയ്ക്ക് കുടിയേറിയപ്പോള്‍ ഈ മാതൃഭക്തിയും മാതൃവാത്സല്യവും നഷ്ടമാകാതിരിക്കാന്‍ പരി. മാതാവു തന്നെ മാത്യു അച്ചനിലൂടെ പ്രവര്‍ത്തിക്കുകയായിരുന്നുവെന്ന് വിശ്വസിക്കുകയാണ് ബ്രിട്ടനിലെത്തിയ മലയാളികള്‍. ഇതു ദൈവ പരിപാലനയില്‍ പിറന്ന ആശയമായിരുന്നു എന്നതിന്റെ തെളിവാണ് ആദ്യവര്‍ഷം ഏതാനും കുടുംബങ്ങള്‍ മാത്രം വന്നുചേര്‍ന്ന ഈ തീര്‍ത്ഥാടനത്തിന് ഇപ്പോള്‍ എല്ലാവര്‍ഷവും ഏഴായിരത്തിലേറെ പേര്‍ സംബന്ധിക്കാനെത്തുന്നത്.
കഴിഞ്ഞ പതിനാറ് വര്‍ഷത്തിലേറെയായി ഈസ്റ്റ് ആംഗ്ലിയ രൂപതയിലെ വിവിധ ദേവാലയങ്ങളില്‍ സേവനം ബഹു. മാത്യു ജോര്‍ജ് അച്ചന്‍ കോട്ടയം ജില്ലയില്‍, പാലാ രൂപതയില്‍പ്പെട്ട പൂവത്തോട് ഇടവകയില്‍ വണ്ടാലക്കുന്നേല്‍ ജോസഫ് ജോര്‍ജ് – മേരി ജോര്‍ജ് ദമ്പതികളുടെ ഒന്‍പത് മക്കളില്‍ ആറാമനായി ജനിച്ചു. ഈസ്റ്റ് ആംഗ്ലിയ രൂപതയിലെ അദ്ദേഹത്തിന്റെ വിശിഷ്ട സേവനങ്ങളെ മാനിച്ച് 2016-ല്‍ രൂപത അദ്ദേഹത്തെ കാനന്‍ പദവിയിലേയ്ക്കുയര്‍ത്തി. രൂപതയുടെ ഔദ്യോഗിക ഭരണ നിര്‍വ്വഹണത്തില്‍ രൂപതാ മെത്രാന്റെ ഉപദേശകരായി വര്‍ത്തിക്കുന്നവരാണ് കാനന്‍ പദവിയിലുള്ളവര്‍.
2016-ല്‍ ഗ്രേറ്റ് ബ്രിട്ടണ്‍ സീറോ മലബാര്‍ രൂപതാ ഔദ്യോഗികമായി സ്ഥാപിതമാകുന്നതുവരെ ഈസ്റ്റ് ആംഗ്ലിയ രൂപതയിലെ സീറോ മലബാര്‍ വിശ്വാസികളുടെ ആത്മീയ പിതാവായും അദ്ദേഹം വര്‍ത്തിച്ചിരുന്നു. ഇത്തവണ രൂപതാധ്യക്ഷനൊപ്പം വാല്‍സിംഹാമിലെ അള്‍ത്താരയില്‍ വണ്ടാലക്കുന്നേലച്ചനും സഹകാര്‍മ്മികനായി പങ്കുചേരും. വരും നാളുകളിലും അനേകായിരങ്ങള്‍ക്ക് ആശ്വാസവും സന്തോഷവും പകരുന്ന രീതിയില്‍ ദൈവജനനിയുടെ കൃപകള്‍ ഇടതടവില്ലാതെ വര്‍ഷിക്കുന്ന അനുഗ്രഹവേദിയായി ഈ തീര്‍ത്ഥാടനം മാറട്ടെയെന്ന് വണ്ടാലക്കുന്നേലച്ചന്‍ ആശംസിക്കുന്നു. ‘ഞാന്‍ നട്ടു, അപ്പോളോസ് നനച്ചു, എന്നാല്‍ ദൈവമാണ് വളര്‍ത്തിയത്. (1 കോറിന്തോസ് 3: 6) എന്ന തിരുവചനം പോലെ വണ്ടാലക്കുന്നേലച്ചന്‍ നട്ട് ഈസ്റ്റ് ആംഗ്ലിയ രൂപത നനച്ച് ദൈവം വടവൃക്ഷമായി വളര്‍ത്തിയ ഈ വാല്‍സിംഹാം തീര്‍ത്ഥാടനത്തിലേയ്ക്ക എല്ലാവരെയും സ്നേഹപൂര്വ്വം സ്വാഗതം ചെയ്യുന്നു.
ഫാ. ബിജു കുന്നയ്ക്കാട്ട് പി.ആര്‍.ഒ
പ്രസ്റ്റണ്‍: ഒക്ടോബറില്‍ നടക്കാനിരിക്കുന്ന ‘ഗ്രേറ്റ് ബ്രിട്ടണ്‍ അഭിഷേകാഗ്‌നി’ കണ്വെന്ഷന് നേതൃത്വം നല്‍കുന്ന രൂപതാ ഭാരവാഹികളുടെയും വോളണ്ടിയേഴ്സിന്റെയും പരിശീലനത്തിനും ആത്മീയ ഒരുക്കത്തിനുമായി സംഘടിപ്പിച്ചിരിക്കുന്ന രണ്ടാംഘട്ട റീജിയണല്‍ കണ്വെന്ഷന് ഇന്ന് ഉച്ചകഴിഞ്ഞ് പ്രസ്റ്റണ്‍ സെന്റ് അല്‍ഫോന്‍സാ കത്തീഡ്രല്‍ ദേവാലയത്തില്‍ വച്ച് നടക്കും. വൈകിട്ട് 5.30 മുതല്‍ 9.30 വരെ നടക്കുന്ന കണ്‍വെന്‍ഷനില്‍, അറിയപ്പെടുന്ന ദൈവശാസ്ത്ര പണ്ഡിതനും പ്രഭാഷകനുമായ റവ. ഫാ. അരുണ്‍ കലമറ്റം (റോം) ദിവ്യബലിയര്‍പ്പിക്കുകയും ക്ലാസ് നയിക്കുകയും ചെയ്യും.
പ്രസ്റ്റണ്‍ റീജിയണു കീഴിലുള്ള എല്ലാ വി. കുര്‍ബാന കേന്ദ്രങ്ങളില്‍ നിന്നും ഭാരവാഹികളായും വോളണ്ടിയേഴ്സായും തെരഞ്ഞെടുക്കപ്പെട്ടവര്‍ക്കും ദൈവവചന പഠനത്തിലും വിശ്വാസ സത്യങ്ങളിലും ആഴപ്പെടാന്‍ താല്‍പര്യമുള്ളവര്‍ക്കും ഈ കണ്‍വെന്‍ഷനില്‍ സംബന്ധിക്കാവുന്നതാണ്. ഒരുക്കങ്ങള്‍ പൂര്‍ത്തിയായതായി റീജിയന്‍ ഇന്‍ ചാര്‍ജ് റവ. ഡോ. മാത്യു പിണക്കാട്ട് അറിയിച്ചു.
പള്ളിയുടെ അഡ്രസ്സ് : St. Alphonsa Cathedral, St. Ignatious Square, Preston PR1 1TT
അപ്പച്ചന്‍ കണ്ണഞ്ചിറ
ലണ്ടന്‍: ബ്രോംലി സിറോ മലബാര്‍ മാസ്സ് സെന്ററില്‍ ഭാരത അപ്പസ്‌തോലന്‍ വിശുദ്ധ തോമാശ്ലീഹായുടെയും വിശുദ്ധരായ അല്‍ഫോന്‍സാമ്മ,ചാവറ കുര്യാക്കോസ് ഏലിയാസച്ചന്‍, എവുപ്രാസ്യമ്മ എന്നിവരുടെയും സംയുക്ത തിരുന്നാള്‍ ജൂലൈ 15 ശനിയാഴ്ച്ച ഭക്ത്യാദരപൂര്‍വ്വം ആഘോഷിക്കുന്നു. ബ്രോംലി സെയിന്റ് ജോസഫ് കാത്തലിക് ചര്‍ച്ചില്‍ വെച്ച് ശനിയാഴ്ച രാവിലെ 11 മണിക്ക് അഭിവന്ദ്യ ജോസഫ് സ്രാമ്പിക്കല്‍ പിതാവിന് ഉജ്ജ്വല സ്വീകരണം അരുളുകയും തുടര്‍ന്ന് കൊടിയേറ്റോടുകൂടി തിരുന്നാളിന് ഔദ്യോഗികമായ തുടക്കവുമാകും.
പ്രസുദേന്തി വാഴ്ച്ചക്കു ശേഷം ആഘോഷമായ തിരുന്നാള്‍ സമൂഹ കുര്‍ബ്ബാനയും തുടര്‍ന്ന് ലദീഞ്ഞും പ്രത്യേകം തയ്യാറാക്കിയ തിരുന്നാള്‍ പന്തലിലേക്ക് പ്രദക്ഷിണവും നടക്കും. തിരുക്കര്‍മ്മങ്ങള്‍ക്കു സ്രാമ്പിക്കല്‍ പിതാവ് മുഖ്യ കാര്‍മ്മികത്വം വഹിക്കും. മാത്യു കറ്റിയാങ്കല്‍ അച്ചനും (ക്നാനായ ചാപ്ലിന്‍, ലണ്ടന്‍), സാജു മുല്ലശ്ശേരി അച്ചനും (SDB) സഹകാര്‍മ്മികത്വം വഹിക്കുന്നതാണ്. പ്രദക്ഷിണത്തിനു ശേഷം പള്ളി ഹാളില്‍ സ്നേഹവിരുന്നും സംഘാടകര്‍ ഒരുക്കിയിട്ടുണ്ട്.
തിരുന്നാള്‍ ശുശ്രുഷകള്‍ക്കു ശേഷം ബ്രോംലിയിലെ യുവജനങ്ങള്‍ ഒരുക്കുന്ന വൈവിദ്ധ്യമാര്‍ന്ന കലാപരിപാടികളും അരങ്ങേറും. തിരുനാളിനുള്ള ഒരുക്കങ്ങള്‍ പൂര്‍ത്തിയായതായി കമ്മറ്റി ഭാരവാഹികള്‍ അറിയിച്ചു.
തിരുനാളില്‍ പങ്കെടുത്ത് വിശുദ്ധരുടെ മാദ്ധ്യസ്ഥം വഴി അനുഗ്രഹം പ്രാപിക്കുന്നതിനായി എല്ലാ വിശ്വാസികളെയും ബ്രോംലി സെന്റ് ജോസഫ് ദേവാലയത്തിലേക്ക് ചാപ്ലിന്‍ സാജു പിണക്കാട്ട് അച്ചനും (കപ്പൂച്ചിന്‍) പാരീഷ് കമ്മിറ്റിയും സ്നേഹപൂര്വ്വം ക്ഷണിച്ചു കൊള്ളുന്നു.
പള്ളിയോടു ചേര്‍ന്നുള്ള അപ്പര്‍ പാര്‍ക്ക് റോഡിലും ഹോംഫീല്‍ഡ് റോഡിലും സൗജന്യമായ പാര്‍ക്കിംഗ് സൗകര്യം ഉണ്ടായിരിക്കുന്നതാണ്.
കൂടുതല്‍ വിവരങ്ങള്‍ക്ക് ട്രസ്റ്റീസ്: സജി-07548865522, ബിന്ദു – 07913596897.
