രാജ്യത്തെ തൊഴില്ദാതാക്കള് ഉയര്ന്ന ഉദ്യോഗസ്ഥ സ്ഥാനങ്ങളിലുള്ളവരുടെയും സാധാരണ ജീവനക്കാരുടെയും വേതനത്തിലെ അന്തരം ബോധ്യപ്പെടുത്തണമെന്ന് നിയമം. ഇന്ന് പാര്ലമെന്റില് അവതരിപ്പിക്കുന്ന നിയമത്തിലാണ് ഈ വ്യവസ്ഥ ഉള്പ്പെടുത്തിയിരിക്കുന്നത്. 250 ജീവനക്കാരില് ഏറെയുള്ള കമ്പനികളുടെ ഡയറക്ടര്മാര് ഈ വ്യത്യാസം വെളിപ്പെടുത്തേണ്ടി വരുമെന്ന് ബിസിനസ് സെക്രട്ടറി ഗ്രെഗ് ക്ലാര്ക്ക് അറിയിച്ചു. പേയ് റേഷ്യോ എന്നാണ് ഇത് അറിയപ്പെടുന്നത്. ബ്രിട്ടനിലെ ബിസിനിസുകളില് നിലവിലള്ള വേതന അസമത്വത്തെ ഇല്ലാതാക്കാന് ഈ നിയമത്തിന് സാധിക്കില്ലെന്ന് ലേബറും യൂണിയനുകളും വിമര്ശനമുയര്ത്തിയിട്ടുണ്ട്.
എക്സിക്യൂട്ടീവ് വേതന നിരക്കുകളില് കമ്പനി ഓഹരിയുടമകള് നേരത്തേ തന്നെ വിമര്ശനമുന്നയിച്ചിരുന്നു. ചില കമ്പനി മേധാവികള്ക്ക് അമിത ശമ്പളം നല്കുന്നതിനെതിരെ അവര് രംഗത്തെത്തുകയും ചെയ്തിട്ടുണ്ട്. പുതിയ നിയമം പേയ് റേഷ്യോ വെളിപ്പെടുത്തുന്നതിനു പുറമേ ഓഹരി നിരക്കുകളിലുണ്ടാകുന്ന വര്ദ്ധനവ് എക്സിക്യൂട്ടീ വ് വേതനത്തില് എന്തെങ്കിലും മാറ്റമുണ്ടാക്കുന്നുണ്ടോ എന്ന കാര്യവും പരിശോധിക്കും. പാര്ലമെന്റിന്റെ അംഗീകാരം കിട്ടുന്ന മുറയ്ക്ക് കമ്പനികള് തങ്ങളുടെ പേയ് റേഷ്യോ 2020 മുതല് വെളിപ്പെടുത്തിത്തുടങ്ങണം.
യുകെയിലെ വന്കിട ബിസിനസുകള് ശരിയായി പ്രവര്ത്തിക്കുന്നുണ്ടെങ്കിലും വേതനങ്ങള് തമ്മിലുള്ള അന്തരത്തില് ജീവനക്കാര്ക്കും ഓഹരിയുടമകള്ക്കുമുള്ള പ്രതിഷേധം കാണാതിരിക്കാനാകില്ലെന്ന് ബിസിനസ് സെക്രട്ടറി പറഞ്ഞു. മേലധികാരികള്ക്ക് കമ്പനിയുടെ പ്രകനത്തിനു മേല് ശമ്പളം നല്കുന്നത് പലപ്പോഴും പ്രതിഷേധങ്ങള്ക്ക് കാരണമാകാറുണ്ട്. പെര്സിമ്മണ്, ബിപി തുടങ്ങിയ സ്ഥാപനങ്ങളിലെ ഉന്നത ഉദ്യോഗസ്ഥര്ക്ക് വന് ശമ്പളം നല്കിയതിലുണ്ടായ പ്രതിഷേധങ്ങള് കണക്കിലെടുത്താണ് പുതിയ നടപടി. ഷെല്, ലോയ്ഡ്സ്, ആസ്ട്രസെനെക, പ്ലേടെക്, വില്യം ഹില്, ജിവിസി, ഇന്മര്സാറ്റ് തുടങ്ങിയ കമ്പനികളിലും ഇത്തരം കലാപങ്ങള് റിപ്പോര്ട്ട് ചെയ്തിരുന്നു.
മുന് വര്ഷങ്ങളില് നിന്ന് വ്യത്യസ്തമായി ഒട്ടേറെ പുതുമകളുമായാണ് ഇത്തവണ ആനന്ദ് ടിവി അവാര്ഡ് നൈറ്റ് ബര്മിംഗ്ഹാമില് എത്തുന്നത്. മോഹന്ലാലിന് പുറമേ ബിജു മേനോന്, സുരാജ് വെഞ്ഞാറമൂട് തുടങ്ങിയ പ്രഗത്ഭ നടന്മാര് കുടുംബസമേതം അവാര്ഡ് നൈറ്റ് വേദിയില് എത്തിച്ചേരുന്നു എന്നതിന് പുറമേ മുന്പ് ഉണ്ടായിരുന്നതില് കൂടിയ വന് താരനിര ഇത്തവണ ബര്മിംഗ്ഹാമില് എത്തിച്ചേരും. കൂടാതെ ഏറ്റവും മികച്ച ലൈറ്റ് സൗകര്യം ദുബായില് നിന്നും എത്തിച്ച് ഗംഭീരമായ കലാവിരുന്നാണ് അവാര്ഡ് നൈറ്റിനൊപ്പം ഒരുക്കുന്നത്. മലയാളത്തിലെ ഒട്ടേറെ മികച്ച നടിമാര് ഒന്നിച്ച് അണിനിരക്കുന്ന നൃത്ത നൃത്ത്യങ്ങളാണ് മറ്റൊരു പ്രധാന സവിശേഷത.
ഓസ്ട്രേലിയയില് പുരോഗമിക്കുന്ന ഷൂട്ടിംഗിനു ശേഷം മോഹന്ലാലും ഭാര്യ സുചിത്രയും മക്കളും, ബിജു മേനോനും സംയുക്താ വര്മ്മയും മകനും, സുരാജ് വെഞ്ഞാറമൂടും ഭാര്യ സുപ്രിയയും മക്കളും ആണ് അവാര്ഡ് നൈറ്റിലേക്ക് ഇരട്ടി മധുരവുമായി എത്തുന്നത്. അവാര്ഡ് നൈറ്റിന് തലേദിവസമാണ് ലാലും കുടുംബവും എത്തുക. എ ആര് റഹ്മാന് ഷോ ഉള്പ്പടെയുള്ള ഷോകള്ക്ക് ലൈറ്റിംഗ് നല്കുന്ന ഹാരോള്ഡ് ആണ് ലൈറ്റ് കൈകാര്യം ചെയ്യുന്നതിനായി ദുബായില് നിന്ന് എത്തുന്നത്. കഴിഞ്ഞ ദിവസം യുകെയിലെത്തിയ നടി പാര്വ്വതിക്കു പിന്നാലെ നാളെ മുതല്ക്കു മറ്റു താരങ്ങളും എത്തിച്ചേരും. 
താരങ്ങളും ടെക്നീഷ്യന്മാരും ഉള്പ്പടെ 50 അംഗ ടീം ആണ് നാട്ടില് നിന്ന് എത്തുന്നത്. ഈയാഴ്ചയിലെ വിവിധ ദിവസങ്ങളിലായി ബര്മിങാം എയര്പോര്ട്ടില് എത്തിച്ചേരും. ബുധനാഴ്ചയോടെ മുഴുവന് സംഘവും ബര്മിങാമിലെത്തി പരിശീലനം തുടങ്ങുമെന്നാണ് റിപ്പോര്ട്ട്. മോഹന്ലാലിന്റെ ഗാനാലാപനം പ്രത്യേക ശ്രദ്ധ ആകര്ഷിച്ചേക്കും. മോഹന്ലാലിന്റെ ഗാനത്തിന് ബാക്ക് അപ്പ് നല്കുന്നതിനായി സ്റ്റീഫന് ദേവസിയും തിങ്കളാഴ്ച എത്തിച്ചേരും. അനുശ്രീ, മിയ, ആര്യ, അര്ച്ചന, പാര്വ്വതി തുടങ്ങി മലയാളത്തിന്റെ ഇപ്പോഴത്തെ മുന്നിരനായികമാര് ഒരുമിച്ച് അണിനിരക്കുന്ന നൃത്തമാണ് മോഹന്ലാലിന് സമര്പ്പിക്കുന്നത്.
ബിര്മിങ്ഹാമിലെ ഹിപ്പോഡ്രോം ഓഡിറ്റോറിയത്തില് അടുത്ത ശനിയാഴ്ച നടക്കുന്ന താരനിശയില് മോഹന്ലാല്, ബിജു മേനോന്, സുരാജ വെഞ്ഞാറമൂട്, മനോജ് കെ ജയന്, വിജയ് യേശുദാസ്, കീ ബോര്ഡിലെ മാന്ത്രികന് സ്റ്റീഫന് ദേവസി, ബിജിപാല്, ദിലീഷ് പോത്തന്, പിഷാരടിയും ധര്മ്മജനും, പാഷാണം ഷാജി, അനുശ്രീ, മിയാ ജോര്ജ്ജ്, നിമിഷ സജയന്, ആര്യ, ഗായിക സിത്താര ഉള്പ്പടെ 50തില്പരം സിനിമ താരങ്ങളാണ് താര വിസ്മയം തീര്ക്കാന് എത്തുക. ബര്മിങ്ഹാമിലേക്കുള്ള താരനിരയുടെ വരവ് കാത്തിരിക്കുന്ന കേരളീയ സമൂഹം ഇതിനോടകം തന്നെ സീറ്റുകള് ഭൂരിഭാഗവും കയ്യടക്കി കഴിഞ്ഞു.
ആനന്ദ് ടിവിയുടെ മൂന്നാമത്തെ മെഗാഷോയില് മോഹന്ലാലിനെ കാണുവാന് മാത്രമല്ല, അദ്ദേഹത്തിന്റെ പാട്ടുകേള്ക്കാനുള്ള അവസരം കൂടി യുകെ മലയാളികള്ക്കു ലഭിക്കും. പ്രശസ്ത യുവ ഗായകന് വിജയ് യേശുദാസാണ് ഗാനമേളയ്ക്ക് നേതൃത്വം നല്കുക. മോഹന്ലാലിനൊപ്പം താരങ്ങളായ മനോജ് കെ ജയനും ബിജു മേനോനും മലയാളികളുടെ ഇഷ്ടഗാനങ്ങളുമായി സ്റ്റേജിലെത്തുമ്പോള് അത് ആസ്വദിക്കാനുള്ള അപൂര്വ്വ അവസരവും യുകെ മലയാളികള്ക്ക് കൈവരും. ഒപ്പം കേരളത്തില് ഇപ്പോള് ഹാസ്യ രാജാക്കന്മാരായി വാഴുന്ന സുരാജ് വെഞ്ഞാറമൂടും പിഷാരടിയും ധര്മ്മജനും, പാഷാണം ഷാജിയും ഉള്പ്പെടെയുള്ള സംഘത്തിലെ വെടിക്കെട്ട് ഐറ്റങ്ങളും ഉണ്ടാകും.
ഇങ്ങനെ താരങ്ങളുടെ നൃത്തം, പാട്ട്, കോമഡി സ്കിറ്റുകള് ഒപ്പം വമ്പന് ഡാന്സ് ഗ്രൂപ്പുകളുടെ ചടുലമായ നൃത്തചുവടുകളും ഒക്കെ ചേരുമ്പോള് മലയാളം ഇതുവരെ കണ്ടിട്ടില്ലാത്ത തകര്പ്പന് ആഘോഷരാവായി മൂന്നാമത്തെ ആനന്ദ് ടിവി അവാര്ഡ് നൈറ്റ് മാറും. ജ്യുവല് മേരിയാണ് പരിപാടിയുടെ അവതാരകയായി എത്തുക. മഴവില് മനോരമ ടിവി ഷോകളുടേയും ഏഷ്യാനെറ്റ് അവാര്ഡ് നിശയിലൂടെയും ജ്യൂവല് മേരി പ്രേക്ഷക ഹൃദയങ്ങളില് ഇടംപിടിച്ചിരുന്നു. മലയാളത്തനിമ നിറഞ്ഞ സ്വതസിദ്ധമായ ശൈലിയിലൂടെ യുകെ മലയാളി മനസ്സുകളേയും പ്രോഗ്രാമിലുടനീളം ജ്യുവല് മേരി കൈയിലെടുക്കും.
ബിര്മിങാമിലെ ന്യൂ സ്ട്രീറ്റ് സ്റ്റേഷനില് നിന്നും 5 മിനിറ്റ് നടപ്പുദൂരം മാത്രമാണ് ഹിപ്പോഡ്രോം ഓഡിറ്റോറിയത്തിലേക്കുള്ളത്. അതുപോലെ, മൂര് സ്ട്രീറ്റ് സ്റ്റേഷനില് ഇറങ്ങുന്നവര്ക്ക് 15 മിനിറ്റ് നടപ്പുദൂരത്തിലും ഓഡിറ്റോറിയത്തിലെത്താം. 20 മിനിറ്റ് വാഹന യാത്രാ അകലത്തിലാണ് ബിര്മിങാം എയര്പോര്ട്ട്. എം6 – എം5 മോട്ടോര് വേകളും ഓഡിറ്റോറിയത്തിനു സമീപംകൂടി കടന്നുപോകുന്നു. ഓഡിറ്റോറിയത്തിനു സമീപം വിപുലമായ പാര്ക്കിങ്ങ് സൗകര്യവും ഏര്പ്പെടുത്തിയിട്ടുണ്ട്. മുമ്പ് അറിയിച്ചതിനേക്കാള് കൂടുതല് താരങ്ങള് എത്തുമ്പോള് യുകെയിലെ ഏക മലയാളം ഫിലിം അവാര്ഡ് കാണുവാന് എല്ലാവര്ക്കും സീറ്റ് നല്കാന് കഴിയുന്നില്ലല്ലോ എന്നതാണ് ആനന്ദ് ടിവി പ്രവര്ത്തകരെ വിഷമിപ്പിക്കുന്നത്. കാരണം ഇവിടെ 2000 പേര്ക്ക് മാത്രമാണ് സീറ്റ്.
50 പൗണ്ടുമുതല് 20 പൗണ്ടുവരെ നിരക്കില് ടിക്കറ്റുകള് ലഭ്യമാണ്. വിവി.ഐ.പി സീറ്റുകളാണ് 50 പൗണ്ട് ടിക്കറ്റില് ഒരുക്കിയിട്ടുള്ളത്. 30-40 പൗണ്ടിനു മുന്നിര സീറ്റുകളും ലഭ്യമാകും. നാലംഗങ്ങള്ക്കായുള്ള ഫാമിലി ടിക്കറ്റുകള് സ്പെഷല് ഡിസ്കൗണ്ട് നിരക്കിലും ലഭിക്കും. സാധാരണ യുകെയില് നടക്കുന്ന മറ്റു ഷോകളേക്കാള് കുറഞ്ഞ നിരക്കിലാണ് ടിക്കറ്റ് വില്പന എന്നതും എടുത്തുപറയേണ്ട പ്രത്യേകത തന്നെ.
കാല് നൂറ്റാണ്ടിലേറെയായി മലയാളികളുടെ വിശ്വാസ്യത നേടിയെടുത്ത ഏഷ്യാനെറ്റ് യൂറോപ്പ് ഡയറക്ടറും ആനന്ദ് മീഡിയ എംഡിയും ആനന്ദ് ട്രാവല്സിന്റെ ഉടമ കൂടിയായ ശ്രീകുമാര് സദാനന്ദന് നേതൃത്വം നല്കുന്ന ആനന്ദ് ടിവി പ്രവര്ത്തകര് ബര്മിംഗ്ഹാം ഷോയുടെ അവസാനഘട്ട ഒരുക്കങ്ങള് നടത്തുമ്പോള് കഴിഞ്ഞ തവണത്തേക്കാള് കൂടുതല് സാങ്കേതിക മികവാര്ന്ന ദൃശ്യ അനുഭവം സമ്മാനിക്കാനുള്ള തീവ്ര ശ്രമത്തിലാണ്. മലയാളി സമൂഹം ഇതുവരെ നല്കികൊണ്ടിരിയ്ക്കുന്ന പ്രോത്സാഹനം ആണ് ഇത്രയും വമ്പന് താരനിരയെ തന്നെ പങ്കെടുപ്പിച്ചു കൊണ്ടുള്ള അവാര്ഡ് നിശ സംഘടിപ്പിക്കുന്നതെന്ന് ശ്രീകുമാര് സദാനന്ദന് പറഞ്ഞു.
ടിക്കറ്റ് ബുക്ക് ചെയ്യാന് ബന്ധപ്പെടുക – 02085866511, 079521903705
ഹാളിന്റെ വിലാസം
Birmingham Hippodrome
Hurst St, Southside B5 4TB
പ്രവാസി മലയാളികളുടെ എക്കാലത്തെയും ആശങ്കയാണ് അവിചാരിതമായി അന്യനാട്ടില് വച്ച് സംഭവിക്കുന്ന മരണവും തുടര്ന്നുണ്ടാകുന്ന വിഷമതകളും. ഇതില് ഏറ്റവും പ്രധാനമായ ഒന്ന് മരണമടയുന്ന ആളുടെ മൃതദേഹം നാട്ടിലെത്തിക്കുക എന്നതാണ്. ഈ ആശങ്കയ്ക്ക് ഒരു ശാശ്വത പരിഹാരം ഉണ്ടാക്കുന്നതിന് കേരള സര്ക്കാര് തുടക്കം കുറിച്ചപ്പോള് അതിന് കാരണമായത് ഇംഗ്ലണ്ടില് നിന്നുള്ള ലോക കേരള സഭ അംമായ രാജേഷ് കൃഷ്ണയുടെ നിരന്തര ഇടപെടല് ആണെന്നത് യുകെയിലെ മലയാളികള്ക്ക് ഒന്നടങ്കം അഭിമാനിക്കാവുന്ന കാര്യമാണ്. KSFE തുടങ്ങുന്ന പ്രവാസി ചിട്ടിയില് ചേരുന്നവര്ക്കാണ് ഈ ആനുകൂല്യം ലഭ്യമാവുക. പ്രവാസികള്ക്കായി ചിട്ടി എന്ന ആശയം ഒരുവര്ഷം മുന്പ് ധനമന്ത്രി തോമസ് ഐസക് മുന്നോട്ടുവച്ചപ്പോള്ത്തന്നെ ഇത് സംബന്ധിച്ച നിര്ദേശം രാജേഷ് അപേക്ഷയായി സമര്പ്പിച്ചിരുന്നു. പ്രഥമ ലോക കേരള സഭയില് രാജേഷ് മുന്നോട്ടുവച്ച കരട് നിര്ദേശങ്ങളില് ഏറ്റവും പ്രധാനപ്പെട്ടതും ഇതായിരുന്നു. ധനമന്ത്രി ഡോക്ടര് തോമസ് ഐസക് ഈ വിഷയത്തിലെടുത്ത പ്രത്യേക താല്പര്യവും അതിന് മുഖ്യമന്ത്രി നല്കിയ അനുമതിയുമാണ്, ചിട്ടിയുടെ തുടക്കത്തില് തന്നെ ഇത് പദ്ധതിയോട് ചേര്ക്കാന് സഹായകരമായത്.
UK യിലെയും യൂറോപ്പിലെയും ആകസ്മിക മരണങ്ങളും അതുകഴിഞ്ഞു മൃതദേഹം നാട്ടിലെത്തിക്കാനുള്ള ചിലവുകളും സാധാരണക്കാര്ക്ക് താങ്ങാവുന്നതിനപ്പുറമായിരുന്നു. ഈ ഘട്ടത്തിലെല്ലാം മരണപ്പെട്ടവരുടെ ആശ്രിതര്ക്ക് കൈത്താങ്ങായിരുന്നത് അതാതു പ്രദേശത്തെ സാമൂഹിക സംഘടനകള് ആയിരുന്നു. ആ സംഘടനകള്ക്കും പരിമിതികള് ഉണ്ടായിരുന്നു.
പ്രവാസി ചിട്ടിയിലേക്കുള്ള രജിസ്ട്രേഷന് നടപടികളുടെ ഉദ്ഘാടനം ജൂണ് 12ന് തിരുവനന്തപുരത്ത് മുഖ്യമന്ത്രി പിണറായി വിജയന് നിര്വഹിക്കും. ഒരുവശത്ത് സുരക്ഷിതവും ആദായകരവുമായ ഒരു നിക്ഷേപമാര്ഗം എന്ന നിലയിലും മറുവശത്ത് സംസ്ഥാനത്തിന്റെ വികസനത്തിനുള്ള മുതല്മുടക്കെന്ന രീതിയിലും ഇരട്ടപ്രാധാന്യത്തോടെയാണ് പ്രവാസി ചിട്ടി രൂപപ്പെടുത്തുന്നത്. കേരള ഫിനാന്ഷ്യല് എന്റര്പ്രൈസസ് (KSFE) യ്ക്കാണ് പദ്ധതിയുടെ നടത്തിപ്പുചുമതല. കിഫ്ബിയുടെയും (കേരള ഇന്ഫ്രാസ്ട്രക്ചര് ആന്ഡ് ഇന്വെസ്റ്റ്മെന്റ് ഫണ്ട് ബോര്ഡ്) നോര്ക്കയുടെയും സഹകരണവും പദ്ധതിക്കുണ്ട്.
വിദേശരാജ്യങ്ങളില് കഴിയുന്ന മലയാളികള്ക്കായിട്ടുള്ള പ്രവാസി ചിട്ടിക്ക് തുടക്കം യുഎഇയിലായിരിക്കും. പിന്നീട് മറ്റു ജിസിസി രാജ്യങ്ങള്, ക്ക് അടക്കമുള്ള യൂറോപ്യന് രാജ്യങ്ങള്, അമേരിക്ക എന്നിങ്ങനെ മുഴുവന് പ്രവാസി മലയാളികളിലേക്കും പദ്ധതി വ്യാപിപ്പിക്കുമെന്ന് ധനമന്ത്രി തോമസ് ഐസക് കഴിഞ്ഞദിവസം വ്യക്തമാക്കിയിരുന്നു. സംസ്ഥാനത്തെ ചിട്ടികള്ക്കില്ലാത്ത ചില പ്രത്യേകതകള് പ്രവാസി ചിട്ടിക്കുണ്ട് . പ്രവാസി ചിട്ടിക്ക് എല്ഐസിയുടെ ഇന്ഷുറന്സ് സുരക്ഷ ലഭ്യമാകും. ചിട്ടിയില് ചേരുന്ന ആരെങ്കിലും മരിച്ചാല് ബാക്കിവരുന്ന തവണകള് എല്ഐസി അടച്ചുതീര്ക്കും. ആനുകൂല്യങ്ങള് ബന്ധുക്കള്ക്ക് നല്കുകയും ചെയ്യും.
സ്റ്റേറ്റ് ഇന്ഷുറന്സിന്റെ പരിരക്ഷയും പ്രവാസി ചിട്ടിക്കുണ്ടാകും. പ്രവാസികള് പവര് ഓഫ് അറ്റോര്ണി വഴി ചുമതലപ്പെടുത്തിയാല് അവരുടെ പ്രതിനിധിയായി നാട്ടിലുള്ളവര്ക്കും കുറിയില് ചേരാം. അവര്ക്ക് ലേലം വിളിക്കാനും തടസ്സമില്ല.
ചിട്ടിയില് ചേരുന്നവരുടെ സെക്യൂരിറ്റി , ഫിക്സെഡ് ഡിപ്പോസിറ്റുകള്, ഫോര്മാന് കമീഷന്, ഫ്രീ ഫ്ലോട്ട് തുടങ്ങിയ തുകകള് കിഫ്ബി ബോണ്ടുകളില് നിക്ഷേപിക്കും. ഈ തുക സംസ്ഥാനത്തിന്റെ വിവിധ വികസനപദ്ധതികള്ക്കായി മുതല്മുടക്കും. ഇവയില് ഫോര്മാന് കമീഷന് ഒഴികെ ബാക്കിയെല്ലാം വട്ടമെത്തുമ്പോഴേക്കെങ്കിലും തിരിച്ചുകൊടുക്കേണ്ടവയാണ്. പക്ഷേ, അപ്പോഴേക്കും പുതിയ കുറികളുടെ വിഹിതം നിക്ഷേപത്തിനായി ലഭിക്കും .
ചിട്ടിനടത്തിപ്പ് പൂര്ണമായും ഓണ്ലൈനാണ്. ചിട്ടി രജിസ്ട്രേഷനും പണം അടയ്ക്കലും ലേലംവിളിയും പണം കൊടുക്കലുമെല്ലാം ഓണ്ലൈനായിരിക്കും. ഇതിനുള്ള സോഫ്റ്റ്വെയറും തയ്യാറാണെന്ന് ധനകാര്യമന്ത്രിയുടെ ഓഫീസ് അറിയിച്ചു.
പ്രവാസികളുടെ കൈയിലെ പണം സംസ്ഥാനവികസനത്തിന് ഉപയോഗിക്കുന്നില്ല എന്നത് ഏറെ കാലമായി ഉയരുന്ന വിമര്ശമാണ്. ചില ബോണ്ടുകളിലെ നിക്ഷേപവും വികസനപ്രവര്ത്തനങ്ങള്ക്ക് സംഭാവനയായി നല്കുന്ന പണവും മാത്രമായി ഈ വികസനപങ്കാളിത്തം ഒതുങ്ങിനില്ക്കുകയായിരുന്നു.
റയന് നൈനാന് ചില്ഡ്രന്സ് ചാരിറ്റി (http://www.rncc.org.uk) എന്ന കുട്ടികള്ക്കായുള്ള കാന്സര് ചാരിറ്റിയുടെ ധനശേഖരണാര്ദ്ധം ലണ്ടന്നില് തുടങ്ങി കേരളം വരെ നീളുന്ന റോഡ് ട്രിപ്പിന്റെ തയ്യാറെടുപ്പിലാണ് രാജേഷ് കൃഷ്ണ. ജൂണ് 30നാണ് യാത്രയുടെ ഫ്ലാഗ് ഓഫ്. ലണ്ടനില് സോളിസിറ്ററായ സന്ദീപ് പണിക്കരും യാത്രയില് ഉണ്ട്. കൂടുതല് വിവരങ്ങള് https://london2kerala.com/ എന്ന വെബ്സൈറ്റിലും https://www.facebook.com/london2kerala/ എന്ന ഫേസ്ബുക്ക് പേജിലും ലഭ്യമാണ്.
ടെസ്കോയും സെയിന്സ്ബറീസും വിറ്റഴിച്ച മീറ്റ് ഫ്രീ വെജിറ്റേറിയന് ഭക്ഷണ പദാര്ത്ഥങ്ങളില് മാംസ ശകലങ്ങള് കണ്ടെത്തിയെന്ന ആരോപണത്തില് അന്വേഷണം. ഫുഡ് സ്റ്റാന്ഡാര്ഡ് ഏജന്സി ഈ ആരോപണം അന്വേഷിക്കും. വെജിറ്റേറിയന് ഉല്പ്പന്നങ്ങളില് പോര്ക്ക്, ടര്ക്കി എന്നിവയുടെ മാംസത്തിന്റെ അംശമുണ്ടായിരുന്നു എന്നായിരുന്നു ആരോപണം ഉയര്ന്നത്. ഇത്തരമൊരു ആരോപണമുയരാനിടയായ സാഹചര്യങ്ങളാണ് പരിശോധനാ വിധേയമാക്കുന്നതെന്ന് എഫ്എസ്എ വക്താവ് അറിയിച്ചു. തെളിവുകള് ലഭിക്കുന്നതിനനുസരിച്ച് നടപടികള് സ്വീകരിക്കുമെന്നും അവര് പറഞ്ഞു..
സെയിന്സ്ബറീസ് വിറ്റഴിച്ച വെജിറ്റേറിയന് മീറ്റ്ബോള്സില് പോര്ക്കിന്റെ അംശം അടങ്ങിയിട്ടുണ്ടായിരുന്നുവെന്ന് ടെലഗ്രാഫ് നടത്തിയ ലബോറട്ടറി പരിശോധനയില് കണ്ടെത്തിയിരുന്നു. ടെസ്കോയുടെ വെജ് മാക്കറോണിയില് ടര്ക്കിയുടെ അംശമുണ്ടെന്നും വ്യക്തമായിരുന്നു. ഒരു ജര്മന് ഗവണ്മെന്റ് അംഗീകൃത ലബോറട്ടറിയിലാണ് ഇവ പരിശോധനയ്ക്ക് അയച്ചതെന്നും നിരവധി സാമ്പിളുകള് അയച്ചിരുന്നുവെന്നും ടെലഗ്രാഫ് അറിയിച്ചിരുന്നു. സെയിന്സ്ബറീസിന്റെ സ്വന്തം ബ്രാന്ഡായ മീറ്റ്ഫ്രീ മീറ്റ് ബോള്സിലും ടെസ്കോയുടെ വിക്കഡ് കിച്ചണ് ബിബിക്യു ബട്ടര്നട്ട് മാക് 385 ഗ്രാം റെഡിമീലിലുമാണ് നോണ്വെജ് ഡിഎന്എ സാന്നിധ്യം കണ്ടെത്തിയത്.
മാംസമോ മൃഗ ചര്മ്മമോ ഈ ഭക്ഷണ സാധനങ്ങളില് അടങ്ങിയിട്ടുണ്ടാകാമെന്നതിന്റെ തെളിവാണ് ഈ ഡിഎന്എ സാന്നിധ്യമെന്ന് ലബോറട്ടറി വ്യക്തമാക്കിയതായും പത്രം റിപ്പോര്ട്ട് ചെയ്യുന്നു. എന്നാല് തങ്ങള് നടത്തിയ പരിശോധനയില് ഇങ്ങനെയൊരു ഡിഎന്എ സാന്നിധ്യം പ്രകടമായില്ലെന്നാണ് സൂപ്പര്മാര്ക്കറ്റുകള് വിശദീകരിക്കുന്നത്.
ടോം ജോസ് തടിയംപാട്
ബ്രിട്ടനിലെ കെന്റില് താമസിക്കുന്ന കോട്ടയം ചുങ്കം സ്വദേശി അജിമോള് പ്രദീപ് മലയാളികള്ക്ക് മുഴുവന് അഭിമാനമായി മാറി. ബ്രിട്ടീഷ് സമൂഹത്തിനു വലിയ സംഭാവനകള് ചെയ്തവരെ ആദരിക്കുന്ന എലിസബത്ത് രാഞ്ജിയുടെ ഗാര്ഡന് പാര്ട്ടിയിലേക്ക് പ്രവേശനം ലഭിച്ചതിലൂടെയാണ് അജിമോള് ഈ നേട്ടം കൈവരിച്ചത്.
അജിമോള്ക്ക് ഗാര്ഡന് പാര്ട്ടിയിലേക്ക് പ്രവേശനം ലഭിച്ച വാര്ത്ത ഇംഗ്ലീഷ് പത്രങ്ങള് പ്രസിദ്ധീകരിച്ചു കഴിഞ്ഞു. ഏഷ്യന് വംശജര്ക്കിടയില് അവയവദാനത്തിന്റെ പ്രധാനൃം പ്രചരിപ്പിച്ചതിലൂടെ ഒട്ടേറെ ജീവന് രക്ഷിക്കാന് കഴിഞ്ഞതിനാലാണ് ഈ അംഗീകാരം ലഭിച്ചത്. വാര്ത്ത പത്രങ്ങളില് വന്നപ്പോള് മാത്രമാണ് അജിമോള് ഈ വിവരം അറിഞ്ഞത്. കിഡ്നി ദാനത്തിന്റെ പ്രധാനൃം ആളുകള് എത്തിക്കുന്നതിനുവേണ്ടി ഫാദര് ഡേവിസ് ചിറമേലിനെ യു.കെയില് കൊണ്ടുവന്നു മലയാളികളുടെ ഇടയില് പ്രചാരം നടത്താനും അജിമോള് മുന്കൈയെടുത്തിരുന്നു.
ചിറമേല് അച്ചന് യുകെയില് വന്നപ്പോള് അജിമോളുടെ വീട്ടില്പോയി അച്ഛന്റെ ഇന്റര്വ്യൂ നടത്തി ആ പ്രചരണങ്ങളെ സഹായിക്കാന് എനിക്കും കഴിഞ്ഞിരുന്നു. കൂടാതെ ലിവര്പൂളില് അക്കാളിന്റെ നേതൃത്വത്തില് നടന്ന നഴ്സസ് ഡേ പരിപാടിയിലും ഇടുക്കി സംഗമത്തിന്റെ പരിപാടിയിലും അജിമോള്ക്ക് സ്റ്റാള് വെച്ച് പ്രചരണം നടത്താന് അവസരം ഒരുക്കാന് സഹായിക്കാന് എനിക്കു കഴിഞ്ഞു എന്നതില് സന്തോഷമുണ്ട്.
അജിമോള് 2015ല് യുണിവേഴ്സിറ്റി ഓഫ് സാല്ഫോര്ഡില് നിന്നും Increasing organ donation the south east എന്ന വിഷയത്തില് PHD കരസ്ഥമാക്കിയിരുന്നു. അജിമോളുടെ പ്രവര്ത്തനം കൊണ്ട് അവയവങ്ങള് ദാനം ചെയ്യാനും സ്വികരിക്കാനും മടികാണിച്ചിരുന്ന മുസ്ലിം സമൂഹങ്ങള് ഉള്പ്പെടെയുള്ള ഏഷ്യന് സമൂഹത്തില് വലിയ മാറ്റം ഉണ്ടാക്കാന് കഴിഞ്ഞു. അജിമോളുടെ ഭര്ത്താവ് ചാക്കോ പ്രദീപ് എല്ലാപ്രവര്ത്തനങ്ങക്കും വലിയ പിന്തുണയാണ് നല്കുന്നത്, രണ്ടുകുട്ടികള് അടങ്ങുന്ന കുടുംബമാണ് ഇവരുടേത്. അജിമോള് പ്രദീപ് കോട്ടയം ചുങ്കം കാനാകുന്നേല് കുടുംബാഗംമാണ്.
ഇപ്പോള് ലണ്ടന് കിംഗ്സ് കോളേജ് ഹോസ്പിറ്റലില് ജോലി ചെയ്യുന്ന അജിമോള് നേരത്തെ മാഞ്ചസ്റ്ററിലാണ് താമസിച്ചിരുന്നതും ജോലി ചെയ്തിരുന്നതും. അജിമോളെ ലിവര്പൂള് മലയാളി അസോസിയേഷന് LIMAയുടെ ഓണാഘോഷ പരിപാടിയിലേക്ക് ക്ഷണിക്കുകയും വരാമെന്ന് അറിയിക്കുകയും ചെയ്തിട്ടുണ്ട്.
അജിമോളുടെ ഫേസ്ബുക്ക് പോസ്റ്റ്
Dear Family and Friends,
By the grace of God, Her Majesty our Queen has awarded me with British Empire Medal for the work in Organ Donation. Thank you all for the continuous support, guidance and prayers.
This honour is beyond imagination for a person like me, never dreamed about this recognition. One decade of volunteer work taught us, as a family many things and gave us lot of happiness even in the midst of difficulties.
I don’t know how the process work to enter into the honours list; but I am sure some of you out there have accepted me and played a vital role for me to get this. Please accept my sincere and heartfelt thanks for giving me this great honour.
Thank you all and please continue your prayers and support. Every life is precious and together we can save many more.
Love and prayers
Agimol and Fami-ly
നൂറുകണക്കിന് കുട്ടികള്ക്ക് മദ്യവും ലാഫിംഗ് ഗ്യാസും വിതരണം ചെയ്തതായി കണ്ടെത്തിയതിനെത്തുടര്ന്ന് ബര്മിംഗ്ഹാമിലെ ഷീഷ ബാര് അടച്ചുപൂട്ടി. ഗൂച്ച് സ്ട്രീറ്റ് നോര്ത്തിലെ ക്ലൗഡ് നയന് എന്ന ബാറിന്റെ ലൈസന്സാണ് ബര്മിംഗ്ഹാം സിറ്റി കൗണ്സില് റദ്ദാക്കിയത്. വെള്ളിയാഴ്ചയാണ് ഇതുസംബന്ധിച്ച പ്രഖ്യാപനമുണ്ടായത്. ലൈസന്സ് നിബന്ധനകള് ബാര് ലംഘിച്ചുവെന്നും ഉത്തരവാദിത്തത്തോടെ ബാര് നടത്തുമെന്നതില് ഉടമ മുഹമ്മദ് മാലിക്കിലുള്ള വിശ്വാസം നഷ്ടപ്പെട്ടതായും ലൈസന്സിംഗ് സബ് കമ്മിറ്റി വിലയിരുത്തി. കുട്ടികള്ക്ക് പ്രവേശനം പൂര്ണ്ണമായി നിഷേധിക്കാമെന്ന് ബാറുടമ അറിയിച്ചെങ്കിലും കൗണ്സില് തീരുമാനത്തില് ഉറച്ചു നില്ക്കുകയായിരുന്നു.
യുവാക്കളായ സഞ്ചാരികള്ക്കായി പകല് സമയ പാര്ട്ടികള് നടത്തിയതിന് 2017 ഏപ്രില് മുതല് നിരവധി കേസുകള് ഈ ബാറിനെതിരെ രജിസ്റ്റര് ചെയ്തിട്ടുണ്ട്. ഇവയുടെ അടിസ്ഥാനത്തില് 90 ദിവസത്തിനുള്ളില് ബാര് അടച്ചുപൂട്ടണമെന്ന് കോടതി കഴിഞ്ഞ മാസം ഉത്തരവിട്ടിരുന്നു. 9 വയസ് വരെ പ്രായമുള്ള കുട്ടികള്ക്ക് ലാഫിംഗ് ഗ്യാസ് നല്കിയെന്നാണ് കണ്ടെത്തിയത്. പ്രായപൂര്ത്തിയാകാത്ത കുട്ടികള്ക്ക് മദ്യവും ഈ ബാറില് നിന്ന് വിതരണം ചെയ്തിരുന്നു. ഫയര് സേഫ്റ്റി സംബന്ധിച്ചും ആശങ്കകള് ഉയര്ന്നിരുന്നു.
ബാറിന്റെ ലൈസന്സ് പിന്വലിക്കണമെന്ന് വെസ്റ്റ് മിഡ്ലാന്ഡ്സ് പോലീസും കൗണ്സിലിനോട് ആവശ്യപ്പെട്ടിരുന്നു. കഴിഞ്ഞ് 14 മാസങ്ങളായി ബാര് ലൈസന്സ് നിബന്ധനകള് തുടര്ച്ചയായി ലംഘിച്ചു വരികയായിരുന്നുവെന്നും കുട്ടികളുടെ സുരക്ഷയെ ബാധിക്കുന്ന വിധത്തിലായിരുന്നു പ്രവര്ത്തനമെന്നും പോലീസിന്റെ ലീഗല് പ്രതിനിധി മോളി ജോയ്സ് പറഞ്ഞു. ബാറുടമയാണ് ഇവയ്ക്ക് ഉത്തരവാദിയെന്നും പോലീസ് വ്യക്തമാക്കി.
എലിസബത്ത് രാജ്ഞിയുടെ ജന്മദിനാഘോഷത്തിന്റെ ഭാഗമായുള്ള കോള്ഡ്സ്ട്രീം ഗാര്ഡുകളുടെ പരേഡ് ഇത്തവണ ചരിത്രത്തിന്റെ ഭാഗമാകും. പരമ്പരാഗത വേഷത്തില് മാത്രം സൈനികര് പങ്കെടുക്കുന്ന ട്രൂപ്പിംഗ് ദി കളര് എന്നറിയപ്പെടുന്ന ഈ പരേഡില് ഇത്തവണ ഒരു സിഖ് വംശജന് ശ്രദ്ധ പിടിച്ചുപറ്റി. സിഖ് തലപ്പാവണിഞ്ഞുകൊണ്ടായിരുന്നു ഗാര്ഡ്സ്മാന് ചരണ്പ്രീത് സിങ് ലാള് പരേഡില് പങ്കെടുത്തത്. ഇന്നലെ നടന്ന പരേഡില് പങ്കെടുത്ത ആയിരത്തോളം സൈനികരില് ഈ പ്രത്യേകത മൂലം ചരണ്പ്രീത് സിങ് അതിഥികളുടെയും മാധ്യമങ്ങളുടെയും ശ്രദ്ധ പിടിച്ചു പറ്റി. ബ്രിട്ടീഷ് മാധ്യമങ്ങള് അതീവ പ്രാധാന്യത്തോടെയാണ് സിങ്ങിനെക്കുറിച്ചുള്ള വാര്ത്ത പ്രസിദ്ധീകരിച്ചത്.
ചരിത്രത്തില് ആദ്യമായാണ് ട്രൂപ്പിംഗ് ദി കളര് സെറിമണിയില് പരമ്പരാഗത സൈനിക വേഷത്തില് ധരിക്കുന്ന ഉയരമുള്ള ബെയര്സ്കിന് ക്യാപ്പില് നിന്ന് വ്യത്യസ്തമായി കറുത്ത നിറത്തിലുള്ള തലപ്പാവുമായി ഒരാള് പ്രത്യക്ഷപ്പെടുന്നത്. പഞ്ചാബില് ജനിച്ച് ബാല്യത്തില് തന്നെ ലെസ്റ്ററിലേക്ക് കുടിയേറിയ ചരണ്പ്രീത് തന്റെ പരേഡിലെ പങ്കാളിത്തം ചരിത്രത്തെ തിരുത്തിക്കുറിക്കുന്ന ഒന്നായി ജനങ്ങള് നോക്കിക്കാണുമെന്ന് പറഞ്ഞു. ഇതിലൂടെ സിഖ് വംശജര് മാത്രമല്ല, മറ്റു മതവിഭാഗങ്ങളില് നിന്നുള്ളവര്ക്കു കൂടി സൈന്യത്തില് ചേരാന് പ്രചോദനമുണ്ടാകുമെന്നും സിങ് കൂട്ടിച്ചേര്ത്തു.
രാജ്ഞിയുടെ ജന്മദിനത്തിന്റെ ഭാഗമായി നടന്ന ചടങ്ങുകള് വര്ണ്ണാഭമായിരുന്നു. വില്യം-മെഗാന് ദമ്പതികളും ചടങ്ങിനെത്തി. യുദ്ധത്തിന് തയ്യാറെടുക്കുന്നതിന്റെ ഭാഗമായാണ് നൂറ്റാണ്ടുകള്ക്ക് മുമ്പ് ട്രൂപ്പിംഗ് ദി കളര് പരേഡ് ആരംഭിച്ചത്. പതിനെട്ടാം നൂറ്റാണ്ട് വരെ ബ്രിട്ടീഷ് കൊട്ടാരങ്ങള്ക്കു മുന്നില് ദിവസവും ട്രൂപ്പിംഗ് ദി കളര് നടക്കുമായിരുന്നു. പിന്നീട് 1748 മുതലാണ് രാജ കുടുംബാംഗങ്ങളുടെ ജന്മദിനങ്ങള്ക്ക് മാത്രമായി ഈ ചടങ്ങ് പരിമിതപ്പെടുത്തിയത്.
ന്യൂസ് ഡെസ്ക്
ബ്രിട്ടണിൽ വീണ്ടും ഭൂചലനം അനുഭവപ്പെട്ടു. യോർക്ക് ഷയറിലും ലിങ്കൺ ഷയറിലും വീടുകൾ കുലുങ്ങി. ശനിയാഴ്ച രാത്രി 11.15 നാണ് ഭൂമികുലുക്കം ഉണ്ടായത്. റിക്ചർ സ്കെയിലിൽ 3.9 മാഗ് നിറ്റ്യൂഡാണ് രേഖപ്പെടുത്തിയത്. ബ്രിട്ടീഷ് ജിയോളജിക്കൽ സർവേ ഭൂചലനം സംബന്ധിച്ചുള്ള കൂടുതൽ വിവരങ്ങൾ ഉടൻ പുറത്തുവിടും. നാശനഷ്ങ്ങൾ ഉണ്ടായതായി റിപ്പോർട്ടില്ല. നിരവധി പേർ സോഷ്യൽ മീഡിയയിൽ ചലനം അനുഭവപ്പെട്ടതായി പോസ്റ്റ് ചെയ്തിട്ടുണ്ട്. ഈസ്റ്റ് യോർക്ക് ഷയറിലെ സ്പേൺ പോയിന്റ് കേന്ദ്രമാക്കിയാണ് ചലനം ഉണ്ടായത്. ക്ലീതോർപ്പ് സ്, ഹൾ എന്നീ സ്ഥലങ്ങളിൽ ഭൂമി കുലുക്കം അനുഭവപ്പെട്ടു.
ചരിത്രമുറങ്ങുന്ന കുറവിലങ്ങാടിന്റെ മണ്ണില് നിന്നും യുകെയിലേക്ക് കുടിയേറിയ കോഴാക്കാരുടെ 7-ാമത് സംഗമം ചെല്ട്ടന്ഹാമിലെ പ്രില്സ്ബെറി ഹാളില് വെച്ച് നടന്നു, വൈവിധ്യമാര്ന്ന കലാകായിക പ്രകടനങ്ങള് കൊണ്ടും നൃത്ത വിസ്മയം തീര്ത്തും രുചിക്കൂട്ടുകളുടെ നറുമണം തീര്ത്ത ഭക്ഷണ വിഭവങ്ങള് കൊണ്ടും കോഴാ സംഗമം വേറിട്ട അനുഭവമായി.
രാവിലെ 11 മണിക്ക് ആരംഭിച്ച സംഗമത്തിലേക്ക് ഷാജി തലച്ചിറ കോഴാ നിവാസികളെ സഹര്ഷം സ്വാഗതം ചെയ്തു. പ്രൗഢഗംഭീരമായ സംഗമത്തിന് ശ്രീമതി ലീലാമ്മ ഭദ്രദീപം കൊളുത്തി ഉദ്ഘാടനം ചെയ്തു. പുതുതലമുറയ്ക്കു കൂടി നാടിന്റെ നന്മയും ഐക്യവും മാഹാത്മ്യവും പകര്ന്നു നല്കാന് ഇത്തരം സംഗമങ്ങള് കൊണ്ട് കഴിയുമെന്നും തുടര്ന്നും കൂടുതല് കരുത്തോടും മികവോടും കൂടി മുന്നേറാന് കഴിയട്ടെയെന്നും ഉദ്ഘാടന പ്രസംഗത്തില് ആശംസകള് അറിയിച്ചുകൊണ്ട് ലീലാമ്മ സംസാരിച്ചു.
ഓര്മ്മകള് പുതുക്കുന്നതിനും സൗഹൃദങ്ങള് ദൃഢപ്പെടുത്തുന്നതിനുമുള്ള ഇത്തരം അവസരങ്ങള് തുടര്ന്നും ഉണ്ടാകട്ടെയെന്ന് ജോയി തരിപ്പേല് ആശംസിച്ചു. അന്നും ഇന്നും മാറ്റമില്ലാതെ തുടരുന്ന കോഴായുടെ പ്രകൃതിമനോഹാരിതയെക്കുറിച്ചും അതിന്റെ വശ്യസൗന്ദര്യത്തെക്കുറിച്ചും കോഴാക്കാരുടെ കലര്പ്പില്ലാത്ത സൗഹൃദക്കൂട്ടായ്മകളെക്കുറിച്ചും ജിന്സ് ഓര്മകളുടെ ഭാണ്ഡച്ചെപ്പില് നിന്നും പുറത്തെടുത്തു.
സംഗമത്തിന് ആശംസകള് അര്പ്പിച്ചുകൊണ്ട് ബിനീഷ്, സജിമോന്, സുരേഷ് വട്ടക്കാട്ടില്, ജെറി ഷാജി, ലിജോ, ബിബിന് എന്നിവര് സംസാരിച്ചു. ബാല്യകാല സ്മരണകള് എല്ലാവരും പരസ്പരം പങ്കിട്ടപ്പോള് ആ യുഗത്തിലേക്ക് നമ്മെ കൂട്ടിക്കൊണ്ടുപോകാന് സാധിച്ചു എന്ന് സംഗമത്തിന് എത്തിയവര്ക്ക് കൃതജ്ഞത അര്പ്പിച്ചുകൊണ്ട് ജിമ്മി പൂവാട്ടില് പറഞ്ഞു.
തുടര്ന്നു നടന്ന കലാമേളയില് റിനു ജിമ്മി, ഡെല്ന ഷാജി, ഡെല്റ്റ ഷാജി, സ്നേഹ ജോയി, അഞ്ജന സുരേഷ് എന്നിവര് അവതരിപ്പിച്ച നൃത്തം നയനാനന്ദകരമായി. കുട്ടികളിലും മുതിര്ന്നവരിലും അമ്പരപ്പും വിസ്മയവും തീര്ത്ത് സജിമോന് തങ്കപ്പന് അണിയിച്ചൊരുക്കിയ മാജിക് ഷോ സംഗമത്തിന് പത്തരമാറ്റിന്റെ തിളക്കമേകി. കലര്പ്പില്ലാത്ത രുചിക്കൂട്ടുകളുമായി പഴമയുടെ പാരമ്പര്യം വിളിച്ചോതുന്ന ഭക്ഷണ വിഭവങ്ങളുമായി കലവറയും ഒരുക്കിയിരുന്നു. പിന്നീട് നടന്ന കലാകായിക മത്സരങ്ങള്ക്ക് ജെറി ഷാജി സമ്മാനങ്ങള് വിതരണം ചെയ്തു.
പരിപാടികളുടെ മുഖ്യസ്പോണ്സേഴ്സ് ചെല്ട്ടന്ഹാമിലെ ഗ്രീന്സ് ഏഷ്യന് സ്റ്റോഴ്സ് ആയിരുന്നു. അടുത്ത വര്ഷത്തെ സംഗമം വിപുലമായ പരിപാടികളോടുകൂടി യോര്ക്ക് ഷയര് ഡെയില്സ് വെച്ച നടക്കുമെന്ന് സംഘാടകര് അറിയിച്ചു.
കാരൂര് സോമന്
കോഴിയെ തിന്നുന്ന കാര്യത്തില് ഞാന് മിടുക്കന് തന്നെയെന്നാണ് ഭാര്യയുടെ പക്ഷം. അവധിക്കു നാട്ടില് വരുമ്പോള് എന്തു വില കൊടുത്താലും നല്ല ചൊമചൊമാന്നുള്ള പൂവന്കോഴിയെ വാങ്ങി എണ്ണയില് പൊരിച്ചു കഴിക്കും. അമേരിക്കയിലെ കൊഴുത്തു തടിച്ച തണുത്തു മരവിച്ച വൈറ്റ് ലഗൂണ് കോഴിയെ തിന്നു മടുത്തു. അതിന് ഒരു ഗുണവുമില്ല, മണവുമില്ല. എന്നാല് നാടന് കോഴി അങ്ങനെയല്ല. കോഴിയെ തിന്നുന്നത് ഒരു കലയല്ല.
പ്രത്യേകിച്ച് നാട്ടിലെ ചുവന്ന പൂവന് കോഴികളെ. അവര് ഉച്ചത്തില് കൂവിക്കളയും. കോഴികളില് തന്നെ രണ്ടു വിഭാഗമുണ്ടത്രേ. ഒന്ന് കമ്യൂണിസം പ്രസംഗിച്ചു കളയും, മറ്റൊന്ന് സുവിശേഷവും. എന്തായാലും മുന്നിലെ പ്ലേറ്റിലെത്തിയാല് പിന്നെ മാര്ക്സ് എന്നോ എംഗല്സ് എന്നോ വല്ലതുമുണ്ടോ. കോഴിയെ പിടിക്കാനാണു സാറേ പാട് എന്ന് വേലക്കാരന് പയ്യന്റെ വാദം. എന്നാല് പക്ഷപാതിയല്ലാത്ത ഡ്രൈവര് നാണപ്പന് പറയും. അതിനൊക്കെ ഒരു നാ….ക്ക് ഉണ്ട് സാറേ. കോഴികളെ ആദ്യം വശീകരിക്കണം. കണ്ടിട്ടില്ലേ, പാര്ട്ടി സഖാക്കന്മാര് പുതിയ അംഗങ്ങളെ പാര്ട്ടിയില് ചേര്ക്കുന്നത്. അങ്ങനെ തന്നെ. പയ്യെ വലമുറുക്കണം. പിന്നെ വാളു കൈയില് കൊടുക്കണം. വെട്ടിക്കൊല്ലാന് പറയണം. തല്ലിക്കൊല്ലലിന്റെ ക്ലാസ്സ കഴിയുമ്പോഴേക്കും ഒന്നാന്തരമൊരു ചാവേര് റെഡി. പിന്നെ പ്ലേറ്റിലെത്താന് താമസം വേണ്ട. തൊലിയുരിയുന്നതാ സാറേ അതിലും പാട്.
വീണ്ടും വേലക്കാരന് പഹയന് വൈരുദ്ധ്യാത്മക ഭൗതികവാദം ഉയര്ത്തി.
തൊലിയുരിക്കണ്ട, താനേ ഉരിഞ്ഞോളും.
നാണപ്പന് സ്വരം താഴ്ത്തിപ്പറഞ്ഞു.
സാറേ കമ്യൂണിസ്റ്റു കോഴികള് സമയം നോക്കാതെ കിടന്നു കൂവുമെന്നേയുള്ളൂ. പത്തു പൈസയുടെ സ്വാഭാവിക വിവരമില്ല. പ്രായോഗിക പരിജ്ഞാനവുമില്ല. അതിനെ ഓടിച്ചിട്ടു പിടിക്കണ്ട. വെല്ലുവിളിച്ചാല് മതി. നമ്മുടെ കാല്ച്ചുവട്ടില്നിന്ന് ഗര്ജ്ജിച്ചോളും. ആ തക്കത്തിന് ദാ, ഇങ്ങനെ പിന്നിലൂടെ വന്ന് കഴുത്തിനു മുകളിലൂടെ കൊങ്ങായ്ക്ക് ഒറ്റ പിടി. ചവിട്ടി വലിച്ച് കൊരവളളി പൊട്ടിച്ചാല് പിന്നെ ഏതു സിദ്ധാന്തവും ദാ, ഇങ്ങനെ വായുവലിച്ച് കിടക്കും.
ചത്തുകഴിഞ്ഞാലും ചിലതുണ്ട്. വര്ഗസമരത്തിന്റെയും ട്വിയാന്മെന് സ്ക്വയറിന്റെ പ്രായോഗികവാദത്തിന്റെയുമൊക്കെ വക്താക്കളുടെ വേഷംകെട്ടി നടക്കുന്നവര്. കീഴടങ്ങിയാല് പിന്നെ വെയ്റ്റ് ചെയ്താല് മതി. ജനിച്ചു, ജീവിച്ചു, മരിച്ചു- എന്നിട്ട് എന്തു ചെയ്തു എന്നോര്ക്കുമ്പോള് തന്നെ അതിന്റെ തൊലി താനെ ഉരിഞ്ഞിറങ്ങും. കോഴിപ്പിടുത്തത്തിനു ഇങ്ങനെ ചില ട്രിക്കുകളുണ്ട്. കോഴികളുടെ രാഷ്ട്രീയമോ സാംസ്കാരികമോ ആയ പ്രശ്നങ്ങളെക്കുറിച്ച് ഞാന് അത്ര ബോധവാനായിരുന്നില്ല. കലാപങ്ങളുടെയും കലഹങ്ങളുടെയും സന്ധിയില്ലാ സമരം നയിക്കുന്ന കോഴികളെക്കുറിച്ച് ഒരുപാടു പറയാനുണ്ടെന്ന് നാണപ്പന് പറഞ്ഞപ്പോള് ഞാന് ഓര്ത്തത്, കോഴികളുടെ നിറവും വര്ഗ്ഗവിപ്ലവത്തിന്റെ നിറവും ഏതാണ്ട് ഒന്നിക്കേണ്ടിവന്നല്ലോ എന്നായിരുന്നു. ഈ ഉപരിപ്ലവമായ ചിന്ത നാണപ്പനുമായി പങ്കിടവേ അയാള് പറഞ്ഞു.
എന്റെ സാറേ, ഇതു പ്രവാസിയായതിന്റെ പ്രശ്നമാണ്. ഞങ്ങള് ലോക്കല് കമ്യൂണിസ്റ്റുകള് ഒരിക്കലും മുതലാളിത്ത ബൂര്ഷ്വകളായ പ്രവാസികളെ പരിഗണിക്കാറില്ല. അതുപണത്തിന്റെ കൊഴുപ്പുനിറഞ്ഞ ബ്രോയിലര് ചിക്കന് മാതിരിയാണ്. കഴുത്തുവെട്ടുമ്പോഴും അതിനു പിടിക്കാനല്ലാതെ അരുതേ എന്നു പറയാനറിയില്ല. അങ്ങനെയൊരു പ്രതിരോധം ഉയര്ത്തിയിരുന്നെങ്കില് ഞങ്ങളൊന്നു ഞെട്ടിയേനെ. കാര്യമൊക്കെ ശരി, നിങ്ങള് വിയര്ത്തു നേടിയ കാശുകൊണ്ട് രക്തസാക്ഷിമണ്ഡപം ഉയര്ത്തിയാണ് ഞങ്ങളിവിടെ ഭരിക്കുന്നത്. അത് കമ്യൂണിസ്റ്റ് ലെനിനിസത്തിന്റെ ആശയവാദമാണ്. എല്ലാ കോഴികളായ സഖാക്കളും അത് അനുസരിക്കാന് ബാധ്യസ്ഥരുമാണ്. അമൂല്യമായതെന്തോമാതിരി അതു നിങ്ങള് ചോദിക്കുന്നതും ഞങ്ങള് വാങ്ങിത്തരുന്നതും.
നാണപ്പന് തന്റെ കോഴിസിദ്ധാന്തത്തിന്റെ വേലിക്കെട്ടഴിച്ചു.
എനിക്കു രസം കയറി.
അങ്ങനെ നാണപ്പനുമൊന്നിച്ച് ഞങ്ങള് യഥാര്ത്ഥ ലക്ഷണമുള്ള ഒരു കോഴിയെ തിരക്കിയിറങ്ങി.
കവലയിലെ കോഴിക്കടയുടെ കാലു കൂട്ടിപ്പിടിപ്പിച്ച ബെഞ്ചില് ഞാനിരുന്നു. നാണപ്പന് ഇടയ്ക്ക് ബീഡി വലിച്ചു. ഞാന് നീട്ടിയ റോത്ത്മാന്സ് സിഗരറ്റ് അയാള് പുച്ഛത്തോടെ നിരസിച്ചു. പിന്നെ ചോദിച്ചു വാങ്ങി. കോഴിവെട്ടുകാരന് അന്ത്രപ്പന് സമ്മാനിച്ചു. അയാള് അത് രണ്ട് പുകയെടുത്തശേഷം കോഴിച്ചോരയില് മുക്കി കെടുത്തി പുറത്തേക്കെറിയുന്നതു കണ്ടു. വിമാനത്താവളത്തിനുള്ളിലെ ഡ്യൂട്ടി പെയ്ഡ് ഷോപ്പില്നിന്നു അറിഞ്ഞു വാങ്ങിയ സിഗരറ്റാണിത്. കൊള്ളാം, ജനങ്ങള് മാറിയിരിക്കുന്നു.
അത് കാലഘട്ടത്തിന്റെ പ്രശ്നമാണെന്നും, കമ്യൂണിസ്റ്റുകള് അതില് മാപ്പുസാക്ഷിയാണെന്നും നാണപ്പന് പറയവേ, കാലുകൂട്ടിക്കെട്ടിയ നാടന് കോഴികളെയും തൂക്കിപ്പിടിച്ച് ഒരു വിദ്വാന് കയറി വന്നു. എന്റെ പ്രിയപ്പെട്ട ലക്ഷണങ്ങളൊത്ത പൂവന്കോഴി. അവന് അങ്ങനെ കിരീടം വച്ച് ഗമയില് എന്നെ നോക്കി പുഞ്ചിരിക്കുന്നു. ഞാനും കണ്ണിമയ്ക്കാതെ നോക്കിയിരുന്നു. നൊടിയിടകൊണ്ട് ഞങ്ങള് വല്ലാതങ്ങ് അടുത്തു.
നാണപ്പന്റെ കമ്യൂണിസ്റ്റ് തിയറി ഓഫ് ചിക്കന് പ്രയോഗം പ്രാക്ടിക്കലായി ശരിയാണെന്ന് എനിക്കു തോന്നി. പോളണ്ടിലും റഷ്യയിലുമൊക്കെ ഇങ്ങനെയായിരുന്നുവോ കോഴിയെ പിടിച്ചിരുന്നതെന്നു എനിക്കു സംശയമാക്കൂ. അപ്പോള് നാണപ്പന് പറഞ്ഞു.
കോഴികള്ക്ക് വിവരമില്ലെന്ന് ആരാണ് പറഞ്ഞത്?
അത് എല്ലായ്പ്പോഴും ചിനയ്ക്കുന്നത് സിന്ദാബാദ് വിളികളാണ്.
ഒരു യഥാര്ത്ഥ കമ്യൂണിസ്റ്റ്കാരനും അങ്ങനെ തന്നെ.
വ്യക്തികളല്ല, പ്രസ്താനമാണ് വലുതെന്നു പറയുമ്പോഴും പാര്ട്ടി ഗ്രാമങ്ങളില് സിന്താബാദ് വിളിക്കാനാണ്, ആ വിളി കേള്ക്കാനാണ് ഞങ്ങള്ക്കിഷ്ടം. ഞങ്ങളോടു ചേര്ന്നു നില്ക്കുന്ന കോഴികള്ക്കു മാറാനൊക്കുമോ. കാരണമത് നാടന് കോഴിയാണ്. എല്ലാ പ്രാപ്പിടിയന്മാരോടും പോരാടി നേടിയ ജന്മമാണ് അതിന്റേത്. അല്ലാതെ ഫാമിനുള്ളിലെ ലൈറ്റ് വെട്ടത്തില് സേഫും സെക്യൂരിറ്റിയുമായി വിരിഞ്ഞിറിങ്ങി എണ്ണം തികച്ചതല്ല. ഒരു യഥാര്ത്ഥ കമ്യൂണിസ്റ്റുകാരനും കോഴിയും തമ്മില് എന്താണ് വ്യത്യാസം.
ശരിയാണ്, എന്താണ് വ്യത്യാസം – നാണപ്പന് പറയുന്നത് എത്ര കറക്ട്.
ഞാന് കമ്യൂണിസ്റ്റ് പൂവനെ സൂക്ഷിച്ചു നോക്കി.
എന്നെ നിന്റെ സ്വന്തമാക്കൂ എന്നു പറയുന്നതുപോലെ തോന്നി, അല്ല തോന്നിയതല്ല, ഞാനതു കേട്ടു. കോഴിപ്പൂവനെ ഞാന് സ്വന്തമാക്കി. ഇരട്ടി വില കൊടുക്കേണ്ടി വന്നു. നഷ്ടമില്ലെന്നു നാണപ്പന്.
കാശ് ഇത്തിരി കൊടുത്താലെന്താ, ഒരു കമ്യൂണിസ്റ്റ് കോഴിയെ തന്നെ കിട്ടിയില്ലേ……അത് സ്വന്തമായിക്കഴിഞ്ഞാല് വെട്ടിവീഴ്ത്തിക്കോണം. അവന് മറിച്ചു ചിന്തിക്കാന് ചാന്സ് കൊടുക്കരുത്.
നാണപ്പന്റെ വക ആശംസാ പ്രസംഗം
ഓ, ഇതു സാധാരണ കോഴിയല്ല, കമ്യൂണിസ്റ്റ് കോഴിയാണ്.
എന്റെ വയറ്റില്കിടന്നു പുളയാന് കമ്യൂണിസ്റ്റ് ചിക്കന് വെമ്പല് കൊണ്ടു.
ഭാര്യയ്ക്കാണെങ്കില് കോഴിപ്പൂടയൊന്നും പറിക്കാന് മെനക്കെടാന് കഴിയില്ല. ശീലവുമില്. കടയില്പോയി ഡ്രസ് ചെയ്യുന്നു എന്ന പേരില് കോഴിയുടെ ഡ്രസ് അഴിച്ചു വാങ്ങുകയാണല്ലോ പതിവ്. കോഴിക്കടയുടെ മുന്നില് ക്യൂ രൂപം കൊള്ളുന്നു. കൊല്ലാന് രണ്ടാമതൊരാളെ ഏല്പിക്കുന്നതാണ് ബുദ്ധി. പാപമെടുത്തു തലയില് വെയ്ക്കണ്ടല്ലോ……..
ക്യൂ മുന്നേറവേ….എല്ലാവരും എന്നേയും കൈയിലുള്ള കോഴിയേയും മാറിമാറി നോക്കുന്നു. കോഴിക്കടയില് കോഴിയുമായി വന്നതെന്തിനെന്ന ചോദ്യം എല്ലാ കണ്ണുകളിലും. കമ്യൂണിസ്റ്റു കോഴിയെ വില്ക്കാന് വന്നതായിരിക്കുമെന്ന് പലരും കരുതിക്കാണും. എന്റെ മുന്നിലുള്ള ക്യൂ ചെറുതായി വന്നു. ഒടുവില് എന്റെ ഊഴമെത്തി.
ഈ കോഴിയെകൊന്ന് നാടന് രീതിയില് പൂട പറിക്കണം.
ഞാന് ഒട്ടൊരു ഭവ്യതയോടെ ആവശ്യം അറിയിച്ചു.
കൂടെ കടക്കാരനും കോഴിയെ വാങ്ങാന് വന്നവര്ക്കുമായി ചെറിയൊരു വിശദീകരണവും നല്കി.
പൂടി പറിച്ചെടുക്കുന്ന കോഴിയുടെ ഇറച്ചിയും കടയില് തൊലിയുരിച്ചെറിയുന്ന കോഴിയുടെ ഇറച്ചിയും തമ്മില് വലിയ രുചിവ്യത്യാസമുണ്ട്. ഈ നാടന് രീതികള് മറക്കാതിരിക്കാനാണ് ഞാന് ഇടയ്ക്കിടെ അമേരിക്കയില്നിന്ന് ഇങ്ങോട്ടു വരുന്നതു തന്നെ.
അധികം വിശദീകരണം വേണ്ടെന്ന് നാണപ്പന് എന്നെ നോക്കി കണ്ണിറുക്കി. അവരുടെ കണ്ണില് സാമ്രാജ്യവിരുദ്ധവികാരം അലയടിക്കുന്നുണ്ടോ. അമേരിക്ക എന്നു കേട്ടപ്പോള് ഒരു തരിപ്പ്. കണ്ണുകളില് ചുവപ്പു പടരുന്നത്, അയാളുടെ കൈയിലിരിക്കുന്ന കൊലക്കത്തി എന്റെ നേരെ ഉയര്ന്നു താഴുന്നത് ഒക്കെ ഞാന് ഒരു നിമിഷം മുന്നിലൂടെ കണ്ടു.
ഞാന് പോക്കറ്റില് കൈയിട്ടു. പള പള മിന്നുന്ന നൂറിന്റെ നോട്ട് അയാള്ക്കായി ഞാന് പ്രദര്ശിപ്പിച്ചു കൊലച്ചിരിയില് വസന്തം വിരിയുന്ന മാജിക് ഞാന് കണ്ടു.
കടക്കാരന് കമ്യൂണിസ്റ്റ് കോഴിയെ വാങ്ങി.
കൊല്ലുന്നതിനുമുമ്പ് ചില ആചാരാനുഷ്ഠാനങ്ങള് ഉണ്ട്.
അക്കാര്യത്തില് ബ്രോയിലറിനും കമ്യൂണിസ്റ്റ് നാടന് കോഴിക്കുമൊക്കെ തുല്യമായ ആചാരങ്ങള്. സ്വാഭാവിക ചാകലാണെങ്കില് ബ്രോയിലറെ തൂക്കിയെടുത്തു കോര്പ്പറേഷന്റെ കൊട്ടയിലെറിയും. നാടനെ കുഴിച്ചിടും. ഇവിടെ അതല്ലല്ലോ കാര്യം.
കാശു കൊടുത്തു കൊല്ലിക്കയാണ്. അതായത് കരുതിക്കൂട്ടിയുള്ള കൊലപാതകം. അതും നല്ല സിദ്ധാന്തവും ആശയങ്ങളുമൊക്കെയുള്ള ചുവന്ന കമ്യൂണിസ്റ്റു കോഴിയെ. അപ്പോള് രസം കൂടും. കാശു കൊടുക്കുമ്പോള് രുചി കുറച്ചു മണിക്കൂറെങ്കിലും നാവില് നില്ക്കും. അതാണ് നാടന്റെ ടേസ്റ്റ്.
കൊല്ലും മുമ്പ് അന്ത്യാഭിലാഷം നിറവേറ്റുന്നതുപോലെ വെള്ളം കൊടുക്കുന്ന പതിവുണ്ടത്രേ. കാലിലെ കെട്ടഴിച്ച്, വെള്ളം നിറച്ച ചെറിയ പാത്രത്തിനു മുന്നില് കോഴിയെ പിടിച്ചു വയ്ക്കുകയും അവന് സര്വശഖ്തിയുംസംഭരിച്ച് ഒറ്റയോട്ടം. പിത്തം പിടിച്ചു ചീര്ത്ത വൈറ്റ് ലഗൂണുകളെ മാത്രം കണ്ടു പരിചരിച്ച കടക്കാരന് അങ്ങനെയൊരു കമ്യൂണിസ്റ്റു കുതറിയോടല് തീരെ പ്രതീക്ഷിച്ചില്ല. കടയുടെ പിന്നിലൂടെ ഇറങ്ങിയോടിയ കമ്യൂണിസ്റ്റു കോഴിക്കു പിന്നാലെ അവനും അവന്റെ പിന്നാലെ ഞാനും എന്റെ പിന്നാലെ ആശയ സംഘട്ടനങ്ങളുടെ നടുവേദനയുമായി നാണപ്പനും ഓടി.
കോഴിയെ വാങ്ങാന് വന്നവര്ക്കു സമയം പോകുന്നതിന്റെ അരിശം. ഒപ്പം കോഴി ഞങ്ങള് മൂന്നു വര്ഗവഞ്ചകരെ വെട്ടിച്ചോടുന്നതു കാണാനുള്ള രസവും. വഴിപോക്കരും കാഴ്ചകണ്ടു നിന്നു.
ബഹുരാഷ്ട്ര കുത്തകയോടുള്ള ഒരു ജീവന്മരണ പോരാട്ടത്തിന്റെ കാതല് എന്തു തന്നെയായാലും കാഴ്ചക്കാരേറി. പോരിനു മൂര്ച്ച കൂടി.
പാഞ്ഞു വന്ന് ബ്രേക്കിട്ടത് പാണ്ടിലോറി. നടുറോഡില് കിടന്നാണല്ലോ അഭ്യാസം. ഡ്രൈവറുടെ വക ആശയസമര സിദ്ധാന്തത്തിന്റെ പുതിയ വാക്ധോരണികള്. ഞങ്ങളുടെ ശ്രദ്ധ ഡ്രൈവറുടെ നേരെ തിരിഞ്ഞതും കമ്യൂണിസ്റ്റ് കോഴി സിനിമാ സ്റ്റൈലില് ലോറിയുടെ പിന്നിലേക്കു ചാടിക്കയറിയതും ഒരുമിച്ച്.
അറിഞ്ഞോ അറിയാതെയോ കമ്യൂണിസ്റ്റ് കോഴിയെയും കൊണ്ട് ലോറി ദൂരേയ്ക്കു മറയുന്നതാണ് പിന്നെ കണ്ടത്.
ഞാനും കടക്കാരനും മുഖത്തോടു മുഖം നോക്കി.
നാണപ്പന് പറഞ്ഞു.
അത് മാവോയിസ്റ്റുകളുടെ കരുതിക്കൂട്ടിയുള്ള ആക്രമണമാണ്.
ആ സഖാവിനെ അവര്ക്ക് വേണം.
Email : [email protected], www.karoorsoman.com
