ന്യൂസ് ഡെസ്ക്, മലയാളം യുകെ
ബ്രിട്ടനിൽ വിദേശ പൗരന്മാർക്ക് സാമൂഹിക ഭവന (സോഷ്യൽ ഹൗസിങ്) സൗകര്യം നിഷേധിക്കാനുള്ള കൺസർവേറ്റീവ് പാർട്ടിയുടെ പുതിയ നിർദേശം കടുത്ത രാഷ്ട്രീയ വിവാദത്തിന് വഴിവെച്ചു. ബ്രിട്ടീഷ് പൗരന്മാർക്കും ഐറിഷ് പൗരന്മാർക്കും സ്ഥിരതാമസ പദവിയുള്ള ചില വിഭാഗങ്ങൾക്കും മാത്രം സാമൂഹിക ഭവനങ്ങൾക്ക് അർഹത നൽകണമെന്നാണ് നിർദേശം. ഇതിലൂടെ ഏകദേശം 2.3 ലക്ഷം വീടുകൾ ബ്രിട്ടീഷ് കുടുംബങ്ങൾക്ക് ലഭ്യമാക്കാനാകുമെന്നും സാമൂഹിക ഭവനങ്ങൾക്കായുള്ള ദീർഘമായ കാത്തിരിപ്പ് പട്ടിക കുറയ്ക്കാനാകുമെന്നും പാർട്ടി അവകാശപ്പെടുന്നു.
എന്നാൽ ഈ നിർദേശത്തിനെതിരെ ഭവനാവകാശ സംഘടനകളും മനുഷ്യാവകാശ പ്രവർത്തകരും രംഗത്തെത്തി. നിലവിൽ സാമൂഹിക ഭവനങ്ങളിൽ താമസിക്കുന്ന വിദേശ പൗരന്മാരുടെ വാടക കരാറുകൾ അവസാനിപ്പിക്കാനുള്ള സാധ്യത പോലും ആയിരക്കണക്കിന് കുടുംബങ്ങളെ അനിശ്ചിതത്വത്തിലാക്കുമെന്നും അവർ ചൂണ്ടിക്കാട്ടുന്നു. രാജ്യത്ത് വർഷങ്ങളായി ജോലി ചെയ്യുകയും നികുതി അടയ്ക്കുകയും ചെയ്യുന്ന കുടിയേറ്റ കുടുംബങ്ങൾ, ആരോഗ്യ – പരിചരണ മേഖലകളിലെ ജീവനക്കാർ, കുറഞ്ഞ വരുമാനക്കാരായ തൊഴിലാളികൾ എന്നിവരെയും ഈ നീക്കം പ്രതികൂലമായി ബാധിക്കുമെന്നാണ് വിമർശനം. ഭവനരഹിതരുടെ എണ്ണം വർധിക്കാനും പ്രാദേശിക ഭരണകൂടങ്ങൾക്ക് കൂടുതൽ സാമ്പത്തികഭാരം ഉണ്ടാകാനും സാധ്യതയുണ്ടെന്ന് വിദഗ്ധർ മുന്നറിയിപ്പ് നൽകി.
ലേബർ പാർട്ടി ഉൾപ്പെടെയുള്ള പ്രതിപക്ഷ കക്ഷികൾ ഈ നിർദേശത്തെ “വിഭജനമുണ്ടാക്കുന്ന രാഷ്ട്രീയം” എന്നാണ് വിശേഷിപ്പിച്ചത്. രാജ്യത്തെ ഭവന പ്രതിസന്ധിയുടെ പ്രധാന കാരണം സാമൂഹിക ഭവനങ്ങളുടെ അപര്യാപ്തതയും വർഷങ്ങളായുള്ള നിർമ്മാണക്കുറവുമാണെന്നും വിദേശികളെ ലക്ഷ്യമിടുന്നത് യഥാർഥ പ്രശ്നങ്ങളിൽ നിന്ന് ശ്രദ്ധ തിരിക്കാനുള്ള ശ്രമമാണെന്നും അവർ ആരോപിച്ചു. കൂടുതൽ സാമൂഹിക ഭവനങ്ങൾ നിർമിക്കുകയും കുറഞ്ഞ വരുമാനക്കാരായ കുടുംബങ്ങൾക്ക് പിന്തുണ വർധിപ്പിക്കുകയും ചെയ്യുന്നതാണ് ദീർഘകാല പരിഹാരമെന്ന് ഭവനരംഗത്തെ സംഘടനകളും അഭിപ്രായപ്പെട്ടു.
Leave a Reply