ലിസ മാത്യു, മലയാളം യു കെ ന്യൂസ്‌ ടീം

അയർലണ്ട് :- അയർലൻഡിലെ പ്രശസ്ത മാർഷ്യൽ ആർട്ടിസ്റ്റും, ബോക്സിങ് താരവുമായ കോണർ മക്ഗ്രിഗർ കൊറോണ ബാധയുടെ നിർമ്മാർജനത്തിനായി ഒരു മില്യൻ പൗണ്ട് സംഭാവന ചെയ്തു. ഈ തുക ഉപയോഗിച്ച് അയർലൻഡിലെ ആശുപത്രികളിൽ ഉടനീളം അൻപതിനായിരം പി പി ഇ കിറ്റുകൾ വാങ്ങുന്നതിനു സാധിച്ചതായി അധികാരികൾ അറിയിച്ചു. ഇതോടൊപ്പം തന്നെ പല രീതിയിലും അദ്ദേഹം കൊറോണ നിർമാർജന പ്രവർത്തികളിൽ പങ്കാളിയാകുന്നുണ്ട്. തന്റെ ആരാധകരോട് സാമൂഹ്യ അകലം പാലിക്കുന്നതിന് അദ്ദേഹം വീഡിയോകളിലൂടെ ആവശ്യപ്പെട്ടിരുന്നു.

ആരോഗ്യ പ്രവർത്തകരുടെ സുരക്ഷയ്ക്കായി പി പി ഇ കിറ്റുകൾ വാങ്ങിക്കുന്നതിനായി തന്റെ സംഭാവന ഉപയോഗിക്കുന്നതായി അദ്ദേഹം പറഞ്ഞു. തന്റെ രാജ്യത്തെ ജനങ്ങളുടെ സുരക്ഷയ്ക്കായി എല്ലാ സഹായങ്ങളും അദ്ദേഹം വാഗ്ദാനം ചെയ്തു.

മുൻപ് രാജ്യത്ത് ലോക്ക് ഡൗൺ വേണമെന്ന് കർശനമായ ആവശ്യം അദ്ദേഹം ഉയർത്തിയിരുന്നു. എല്ലാവരും ഒരുമിച്ച് നേരിടേണ്ട സാഹചര്യമാണെന്നും, തങ്ങളാൽ ആവുന്നത് എല്ലാവരും പ്രവർത്തിക്കണമെന്നും അദ്ദേഹം ആവശ്യപ്പെട്ടിരുന്നു. അദ്ദേഹത്തിന്റെ പ്രവർത്തികൾ വളരെ മാതൃകാ ജനകമാണ്.