ന്യൂസ് ഡെസ്ക്, മലയാളം യുകെ
ലണ്ടൻ: ജൂതരെയും മുസ്ലിംകളെയും വിഷം നൽകി കൊല്ലുന്നതിനെക്കുറിച്ച് ചർച്ച ചെയ്യുകയും കുടിയേറ്റക്കാരെയും ന്യൂനപക്ഷ വിഭാഗങ്ങളെയും കൊലപ്പെടുത്തണമെന്ന് ആഹ്വാനം ചെയ്യുകയും ചെയ്ത ഇംഗ്ലണ്ടിലെ തീവ്ര വലതുപക്ഷ പ്രവർത്തകന് അഞ്ച് വർഷവും മൂന്ന് മാസവും തടവുശിക്ഷ. സ്റ്റാഫോർഡിൽ നിന്നുള്ള നാലു കുട്ടികളുടെ പിതാവായ ഇവാൻ ജെന്നിങ്സ് (46) ആണ് ലെസ്റ്റർ ക്രൗൺ കോടതിയിൽ ശിക്ഷിക്കപ്പെട്ടത്. ശിക്ഷയ്ക്ക് പുറമെ അഞ്ച് വർഷം നീണ്ട ലൈസൻസ് വ്യവസ്ഥയും കോടതി ഏർപ്പെടുത്തി.
2024 ഓഗസ്റ്റ് 15 മുതൽ നവംബർ 14 വരെ ടെലഗ്രാമിലെ തീവ്ര വലതുപക്ഷ ഗ്രൂപ്പുകളിൽ കൊലപാതകത്തിന് ആഹ്വാനം ചെയ്തതിനും ഭീകരവാദ പ്രസിദ്ധീകരണം പ്രചരിപ്പിച്ചതിനും ജെന്നിങ്സ് കുറ്റം സമ്മതിച്ചിരുന്നു. നോർവേയിലെ കൂട്ടക്കൊലയാളിയായ ആൻഡേഴ്സ് ബ്രീവിക്കിന്റെ മാനിഫെസ്റ്റോയും ഇയാൾ പ്രചരിപ്പിച്ചു. ടെലഗ്രാമിലെ കുറഞ്ഞത് ഏഴ് തീവ്ര വലതുപക്ഷ ഗ്രൂപ്പുകളിൽ ഇയാൾ സജീവമായിരുന്നെന്ന് പ്രോസിക്യൂഷൻ കോടതിയെ അറിയിച്ചു. കുടിയേറ്റക്കാരെ ലക്ഷ്യമിട്ട് ബോട്ടുമായി ബന്ധപ്പെട്ട പദ്ധതികളെക്കുറിച്ചും ഇയാൾ ചർച്ച നടത്തിയിരുന്നു.
മാഞ്ചസ്റ്ററിൽ പാകിസ്ഥാൻ സ്വാതന്ത്ര്യദിനാഘോഷം നടന്ന പരിപാടിയെ ലക്ഷ്യമാക്കി “പ്രവർത്തനം തുടങ്ങണം” എന്ന തരത്തിലുള്ള സന്ദേശങ്ങളും ജെന്നിങ്സ് പങ്കുവച്ചിരുന്നു. ന്യൂസീലൻഡിലെ ക്രൈസ്റ്റ്ചർച്ച് പള്ളികളിൽ നടന്ന ഭീകരാക്രമണത്തിൽ കൊല്ലപ്പെട്ട 51 പേരെ പരാമർശിച്ച് “കൂടുതൽ വലിയ ആഘാതം” വേണമെന്നും ഇയാൾ പറഞ്ഞതായി കോടതി കണ്ടെത്തി. ജൂതർക്കോ മുസ്ലിംകൾക്കോ ഭക്ഷണത്തിൽ വിഷം കലർത്തുന്നതിനെക്കുറിച്ചും ഇയാൾ ഉൾപ്പെട്ട ചെറിയ ഗ്രൂപ്പിൽ ചർച്ച നടന്നിരുന്നു. ജെന്നിങ്സിന് “ആഴത്തിൽ വേരൂന്നിയ വെറുപ്പും വംശീയ ചിന്താഗതിയും” ഉണ്ടായിരുന്നെന്ന് ശിക്ഷ വിധിച്ച ജഡ്ജി ലോക്ക്ഹാർട്ട് കെ.സി. പറഞ്ഞു.
Leave a Reply