കോട്ടയം മേമ്മുറി കാശാംക്കാട്ടിൽ വീട്ടിൽ സംഗീതസംവിധായകനും ഗായകനും സംഗീതാധ്യാപകനുമായ കെ.ജി. കൃഷ്ണ (കൃഷ്ണൻകുട്ടി) അന്തരിച്ചു. 85 വയസ്സായിരുന്നു. ഹൃദയാഘാതത്തെ തുടർന്നായിരുന്നു അന്ത്യം. ഭക്തിഗാന–കാസറ്റ് സംഗീതരംഗത്ത് നാല് പതിറ്റാണ്ടിലേറെ സജീവമായിരുന്ന അദ്ദേഹം ദീർഘകാലം കരുനാഗപ്പള്ളി കിഴക്കേ തേവലക്കര ഗവ. യു.പി. സ്കൂളിലും ചവറ സൗത്ത് ഗവ. യു.പി. സ്കൂളിലും സംഗീതാധ്യാപകനായി സേവനമനുഷ്ഠിച്ചു. സംഗീതത്തെ ജീവിതവ്രതമായി സ്വീകരിച്ച അദ്ദേഹം ശാസ്ത്രീയ സംഗീതത്തിന്റെ അടിത്തറയിൽ നിരവധി തലമുറകൾക്ക് സംഗീതപഠനവും പകർന്നു നൽകി.
1980-കളുടെ മധ്യത്തിൽ കാസറ്റ് സംഗീതരംഗത്ത് സജീവമായ കെ.ജി. കൃഷ്ണ 85-ലധികം കാസറ്റുകളിലായി 900-ത്തിലധികം ഗാനങ്ങൾക്ക് ഈണം പകർന്നു. നിരവധി ഗാനങ്ങൾ സ്വയം ആലപിക്കുകയും ചെയ്തു. ഗായത്രി കാസറ്റ്സ്, പ്രതീക്ഷ കാസറ്റ്സ് ഉൾപ്പെടെയുള്ള പ്രമുഖ സ്ഥാപനങ്ങൾക്കായി ഭക്തിഗാനങ്ങളും സംഗീത ആൽബങ്ങളും ഒരുക്കി. എസ്. ജാനകി, കെ.എസ്. ചിത്ര, സുജാത, ജി. വേണുഗോപാൽ, എം.ജി. ശ്രീകുമാർ, കെസ്റ്റർ, മധു ബാലകൃഷ്ണൻ, കെ.ജെ. മാർക്കോസ്, ഉണ്ണിമേനോൻ, റീന മുരളി, ലേഖാ നായർ, മനോ, സ്വർണലത, പി. ഉണ്ണികൃഷ്ണൻ തുടങ്ങി പ്രമുഖ ഗായകർ അദ്ദേഹത്തിന്റെ സംഗീതസംവിധാനത്തിൽ ഗാനങ്ങൾ ആലപിച്ചിട്ടുണ്ട്. വയലാർ ശരത്ചന്ദ്രവർമ ഉൾപ്പെടെയുള്ള പ്രശസ്ത ഗാനരചയിതാക്കളുമായി അടുത്ത സഹകരണം പുലർത്തിയ അദ്ദേഹം നിരവധി ശ്രദ്ധേയ ഗാനങ്ങൾ സംഗീതലോകത്തിന് സമ്മാനിച്ചു.
2001-ൽ പുറത്തിറങ്ങിയ ‘ദക്ഷിണ’ എന്ന കാസറ്റിനായി എസ്. ജാനകിയെ കൊണ്ട് ഗാനങ്ങൾ ആലപിപ്പിക്കാനായതിനെ തന്റെ സംഗീതജീവിതത്തിലെ ഏറ്റവും വലിയ ഭാഗ്യങ്ങളിലൊന്നായാണ് അദ്ദേഹം വിശേഷിപ്പിച്ചിരുന്നത്. ബാല്യത്തിൽ അമ്മ പാടിയിരുന്ന ജാനകിഗാനങ്ങളിലൂടെയാണ് ആ മഹാഗായികയോടുള്ള ആരാധന വളർന്നതെന്നും അദ്ദേഹം പല അഭിമുഖങ്ങളിലും പറഞ്ഞിരുന്നു. “എന്റെ ജീവിതം മുഴുവൻ സംഗീതമായിരുന്നു; എന്നെ പുനർനിർമിച്ചത് സംഗീതമാണ്” എന്ന അദ്ദേഹത്തിന്റെ വാക്കുകൾ സംഗീതത്തോടുള്ള ആത്മസമർപ്പണത്തിന്റെ തെളിവായി നിലനിൽക്കുന്നു. ഭാര്യ: ഗീത. മക്കൾ: ശ്രുതി കൃഷ്ണ, സൂരജ് കൃഷ്ണ, സംഗീത് കൃഷ്ണ. ശവസംസ്കാരച്ചടങ്ങുകൾ ഇന്ന് (ചൊവ്വാഴ്ച) വൈകുന്നേരം 3 മണിക്ക് മേമ്മുറിയിലെ വസതിയിൽ നടക്കും.
കെ.ജി. കൃഷ്ണയുടെ നിര്യാണത്തിൽ മലയാളം യുകെ ന്യൂസിന്റെ അനുശോചനം ബന്ധുക്കളെയും സുഹൃത്തുക്കളെയും അറിയിക്കുന്നു.
Leave a Reply