ന്യൂസ് ഡെസ്ക്, മലയാളം യുകെ
ലണ്ടൻ: ബ്രിട്ടനിൽ 2026 ലെ വേനൽക്കാലം ഇതുവരെ രേഖപ്പെടുത്തിയതിൽ ഏറ്റവും ചൂടേറിയ വേനലായി മാറുമെന്ന് റിപ്പോർട്ട്. കഴിഞ്ഞ വർഷം തകർന്ന റെക്കോർഡാണ് ഒരു വർഷത്തിനകം വീണ്ടും മറികടക്കാൻ പോകുന്നത്. 2000 ത്തിനുശേഷമാണ് യുകെയിലെ ഏറ്റവും ചൂടേറിയ അഞ്ച് വേനലുകളും രേഖപ്പെടുത്തിയിരിക്കുന്നത്. 2025ൽ മുൻ റെക്കോർഡ് 0.34 ഡിഗ്രി സെൽഷ്യസ് വ്യത്യാസത്തിലാണ് തകർന്നത്.
കാലാവസ്ഥാ വ്യതിയാനമാണ് ചൂട് റെക്കോർഡുകൾ ഇത്ര വേഗത്തിൽ മാറുന്നതിന് പ്രധാന കാരണമെന്ന് ശാസ്ത്രജ്ഞർ ചൂണ്ടിക്കാട്ടുന്നു. ലോകത്തിലെ ഏറ്റവും വേഗത്തിൽ ചൂടുപിടിക്കുന്ന ഭൂഖണ്ഡമായ യൂറോപ്പിന്റെ പടിഞ്ഞാറൻ അറ്റത്താണ് യുകെ സ്ഥിതി ചെയ്യുന്നത്. സമുദ്രത്തേക്കാൾ കര വേഗത്തിൽ ചൂടാകുന്നതും ആർട്ടിക് മേഖലയുടെ അതിവേഗ ചൂടുപിടിത്തവും കാലാവസ്ഥാ വ്യതിയാനത്തെ തുടർന്നുണ്ടാകുന്ന തീവ്രമായ ഉഷ്ണതരംഗങ്ങളും ബ്രിട്ടനിലെ വേനൽച്ചൂട് വർധിക്കാൻ കാരണമാകുന്നു.
എല്ലാ വർഷവും യുകെയിൽ ചൂടിന്റെ റെക്കോർഡ് തകരുമെന്ന് ഇതിന് അർഥമില്ലെന്നും വിദഗ്ധർ പറയുന്നു. തണുപ്പേറിയ വേനലുകളും ചൂടേറിയ വേനലുകളും തുടർന്നും ഉണ്ടാകും. എന്നാൽ ഒരിക്കൽ അപൂർവമായിരുന്ന അതിതീവ്ര ചൂട് ഇപ്പോൾ കൂടുതൽ വേഗത്തിൽ പുതിയ റെക്കോർഡുകൾ സൃഷ്ടിക്കുന്ന സ്ഥിതിയിലേക്കാണ് മാറുന്നതെന്ന് കാലാവസ്ഥാ വിദഗ്ധർ മുന്നറിയിപ്പ് നൽകുന്നു. വരും വർഷങ്ങളിൽ ഇത്തരം ചൂടേറിയ വേനലുകൾ എത്രത്തോളം പതിവാകുമെന്നും താപനില എത്രമാത്രം ഉയരുമെന്നുമാണ് ഇനി ഉയരുന്ന പ്രധാന ആശങ്ക.
Leave a Reply