ന്യൂസ് ഡെസ്ക്, മലയാളം യുകെ
ഇംഗ്ലണ്ടിൽ അതിശക്തമായ ചൂടിനിടെ വിവിധ ജലാശയങ്ങളിൽ നടന്ന അപകടങ്ങളിൽ മൂന്ന് കൗമാരക്കാർ മരിച്ചു. വെസ്റ്റ് യോർക്ക്ഷയറിലെ ഹാലിഫാക്സിൽ 13കാരനെ റിസർവോയറിൽ മുങ്ങിമരിച്ച നിലയിൽ കണ്ടെത്തി . വാർവിക്ഷയറിലെ കിംഗ്സ്ബറി വാട്ടർ പാർക്കിൽ 16കാരിയായ പെൺകുട്ടിയുടെയും സൗത്ത് യോർക്ക്ഷയറിലെ റോതർ വാലി പാർക്കിൽ മറ്റൊരു കൗമാരക്കാരന്റെയും മൃതദേഹങ്ങൾ വെള്ളത്തിൽ നിന്നാണ് കണ്ടെത്തിയത്. ഞായറാഴ്ച ലിങ്കണിന് സമീപമുള്ള തടാകത്തിൽ 15കാരൻ മരിച്ച സംഭവത്തിന് പിന്നാലെയാണ് പുതിയ ദുരന്തങ്ങൾ റിപ്പോർട്ട് ചെയ്തത്. എല്ലാ സംഭവങ്ങളിലും അന്വേഷണം പുരോഗമിക്കുകയാണെന്ന് പൊലീസ് അറിയിച്ചു.
ബാങ്ക് ഹോളിഡേ ദിനത്തിൽ ഇംഗ്ലണ്ടിലും വെയിൽസിലും ഉയർന്ന താപനില രേഖപ്പെടുത്തിയിരുന്നു. ചൂടിൽ നിന്നും ആശ്വാസം തേടി നിരവധി പേർ തടാകങ്ങളിലേക്കും റിസർവോയറുകളിലേക്കും എത്തിയ സാഹചര്യത്തിലാണ് അപകടങ്ങൾ ഉണ്ടായത്. എന്നാൽ പുറംതാപനില ഉയർന്നിരുന്നാലും ജലാശയങ്ങളിലെ വെള്ളം അതിശൈത്യമായിരിക്കുമെന്നും ഇത് “കോൾഡ് വാട്ടർ ഷോക്ക്” ഉണ്ടാക്കി അപകടത്തിലേക്ക് നയിക്കാമെന്നും റോയൽ ലൈഫ് സേവിംഗ് സൊസൈറ്റി മുന്നറിയിപ്പ് നൽകി.
കോർണ്വാളിൽ ബന്ധുക്കളെ രക്ഷിക്കാൻ കടലിൽ ഇറങ്ങിയ 60കാരനും തിങ്കളാഴ്ച മരിച്ചു. വെള്ളത്തിൽ അപകടം സംഭവിക്കുന്നവരെ രക്ഷിക്കാൻ ശ്രമിക്കുമ്പോൾ നേരിട്ട് ചാടരുതെന്നും പകരം അടിയന്തിര സഹായം വിളിക്കുകയും ഒഴുകിനിൽക്കാൻ സഹായിക്കുന്ന വസ്തുക്കൾ നൽകുകയും ചെയ്യണമെന്ന് രക്ഷാസംഘങ്ങൾ നിർദേശിച്ചു. തുറസ്സായ ജലാശയങ്ങളിലെ അപകടങ്ങളെക്കുറിച്ച് കൂടുതൽ ബോധവൽക്കരണം ആവശ്യമാണെന്നും അധികൃതർ പറഞ്ഞു.
Leave a Reply