ന്യൂസ് ഡെസ്ക്, മലയാളം യുകെ
ലണ്ടന്റെ വടക്കുപടിഞ്ഞാറൻ ഭാഗമായ കെന്റൺ പ്രദേശത്തെ കെന്റൺ യുണൈറ്റഡ് സിനഗോഗ് ലക്ഷ്യമാക്കി നടന്ന തീവെപ്പ് അക്രമവുമായി ബന്ധപ്പെട്ട് 17 വയസ്സുകാരനെയും 19 വയസ്സുകാരനെയും പൊലീസ് അറസ്റ്റ് ചെയ്തു. ഞായറാഴ്ച അർദ്ധരാത്രിയോടെ ഷാഫ്റ്റ്സ്ബറി അവന്യൂവിലുള്ള സിനഗോഗിന്റെ ജനാലയിലൂടെ പെട്രോൾ നിറച്ച കുപ്പി എറിഞ്ഞതായി മെട്രോപൊളിറ്റൻ പൊലീസ് അറിയിച്ചു. തീപിടിത്തം പെട്ടെന്ന് നിയന്ത്രണ വിധേയമാക്കിയതിനാൽ വലിയ ദുരന്തം ഒഴിവായെങ്കിലും കെട്ടിടത്തിന് ചെറിയ നാശനഷ്ടങ്ങൾ സംഭവിച്ചു. സംഭവം നടക്കുമ്പോൾ സിനഗോഗിൽ ആരും ഇല്ലാത്തതിനാൽ പരിക്കുകളൊന്നും റിപ്പോർട്ട് ചെയ്തിട്ടില്ല. സ്ഥലത്ത് സുരക്ഷാ പരിശോധന ശക്തമാക്കിയതായും സമീപ പ്രദേശങ്ങളിൽ പൊലീസ് നിരീക്ഷണം വർധിപ്പിച്ചതായും അറിയിച്ചിട്ടുണ്ട്.
കഴിഞ്ഞ ഏതാനും ആഴ്ചകളായി ലണ്ടനിൽ യഹൂദ ബന്ധമുള്ള സ്ഥാപനങ്ങളെ ലക്ഷ്യമിട്ട് നടന്ന ആറു സംഭവങ്ങളുമായി ബന്ധപ്പെട്ട് ആകെ 15 പേരെ അറസ്റ്റ് ചെയ്തിട്ടുണ്ടെന്ന് ഡെപ്യൂട്ടി കമ്മീഷണർ മാറ്റ് ജൂക്സ് പറഞ്ഞു. ഗോൾഡേഴ്സ് ഗ്രീൻ മേഖലയിലെ നാല് യഹൂദ ആംബുലൻസുകൾ കത്തിക്കാൻ ശ്രമിച്ചതും ഫിഞ്ച്ലി പ്രദേശത്തെ ഒരു സിനഗോഗിനുനേരെയുള്ള ആക്രമണവും ഇതിൽ ഉൾപ്പെടുന്നു. ഈ സംഭവങ്ങൾ എല്ലാം തമ്മിൽ ബന്ധമുണ്ടോയെന്ന് പൊലീസ് വിശദമായി പരിശോധിച്ചു കൊണ്ടിരിക്കുകയാണ്. യഹൂദ സമൂഹത്തിൽ ആശങ്ക ഉയർന്നിരിക്കുന്ന സാഹചര്യത്തിൽ സുരക്ഷാ ക്രമീകരണങ്ങൾ കൂടുതൽ ശക്തമാക്കുകയും സമൂഹ നേതാക്കളുമായി പൊലീസ് ഇടയ്ക്കിടെ കൂടിക്കാഴ്ച നടത്തുകയും ചെയ്യുന്നതായും റിപ്പോർട്ടുണ്ട്.
ഇത്തരം ആക്രമണങ്ങൾക്ക് പിന്നിൽ ഇറാൻ പിന്തുണയുള്ള സംഘങ്ങളുമായി ബന്ധമുണ്ടാകാമെന്ന സംശയത്തിലാണ് അന്വേഷണം പുരോഗമിക്കുന്നത്. ഹരകത് അഷാബ് അൽ യമീൻ അൽ ഇസ്ലാമിയ എന്ന സംഘം പല ആക്രമണങ്ങളും ഏറ്റെടുത്തിട്ടുണ്ടെന്നും പൊലീസ് വ്യക്തമാക്കി. കുറഞ്ഞ പണം വാഗ്ദാനം ചെയ്ത് ആളുകളെ ഇത്തരം ആക്രമണങ്ങൾക്ക് പ്രേരിപ്പിക്കുന്ന രീതിയാണെന്ന സൂചനയും അന്വേഷണത്തിൽ ലഭിച്ചിട്ടുണ്ടെന്ന് അധികൃതർ പറയുന്നു. യൂറോപ്പിലുടനീളം സമാന രീതിയിലുള്ള ആക്രമണങ്ങൾ വർധിച്ചുവരുന്ന പശ്ചാത്തലത്തിൽ ഇത് ഗൗരവത്തോടെ കാണേണ്ട വിഷയമാണെന്നും സുരക്ഷാ ഏജൻസികൾ മുന്നറിയിപ്പ് നൽകി.
Leave a Reply