ന്യൂസ് ഡെസ്ക്, മലയാളം യുകെ
ബ്രിട്ടനിൽ പുകവലി നിയന്ത്രണത്തിൽ ചരിത്രപരമായ മാറ്റത്തിന് വഴിയൊരുക്കി “ടൊബാക്കോ ആൻഡ് വെയ്പ്സ് ബിൽ” പാർലമെന്റിന്റെ ഇരുസഭകളും അംഗീകരിച്ചു. 2009 ജനുവരി 1ന് ശേഷം ജനിച്ചവർക്ക് ജീവിതകാലം മുഴുവൻ സിഗരറ്റ് വാങ്ങുന്നതിന് വിലക്ക് ഏർപ്പെടുത്തുക എന്നതാണ് നിയമത്തിന്റെ മുഖ്യവിശേഷത. ഇതിലൂടെ ഭാവിയിൽ പുതിയ തലമുറയിൽ പുകവലി പതിവ് തന്നെ ഇല്ലാതാക്കുക എന്നതാണ് സർക്കാരിന്റെ ദീർഘകാല ലക്ഷ്യം. നിയമം പ്രാബല്യത്തിൽ വരാൻ രാജകീയ അംഗീകാരം ലഭിക്കേണ്ടതുണ്ട്.
പുകവലി ബ്രിട്ടനിൽ തടയാനാകുന്ന മരണങ്ങളുടെ പ്രധാന കാരണങ്ങളിലൊന്നായി തുടരുന്നതിനാൽ ആരോഗ്യരംഗത്ത് വലിയ മാറ്റം ഉണ്ടാക്കാനാണ് ഈ നടപടി ലക്ഷ്യമിടുന്നത്. പുതിയ നിയമ പ്രകാരം വെയ്പിംഗ് ഉപയോഗത്തിലും കർശന നിയന്ത്രണങ്ങൾ വരും. കുട്ടികളുള്ള വാഹനങ്ങൾ, കളിസ്ഥലങ്ങൾ, സ്കൂളുകൾ, ആശുപത്രികൾ എന്നിവിടങ്ങളിൽ വെയ്പിംഗ് നിരോധിക്കപ്പെടും. അതേസമയം പുകവലി ഉപേക്ഷിക്കാൻ ശ്രമിക്കുന്നവരെ സഹായിക്കുന്നതിനായി ആശുപത്രികളുടെ പുറത്ത് ചില സാഹചര്യങ്ങളിൽ വെയ്പിംഗ് അനുവദിക്കുന്നതിനും സർക്കാർ പദ്ധതിയിടുന്നു.
പബ്ബുകളുടെ പുറംമേഖലകൾ, കടൽത്തീരങ്ങൾ, മറ്റു തുറന്ന ഇടങ്ങൾ, സ്വകാര്യ സ്ഥലങ്ങൾ എന്നിവയിൽ ഈ നിയന്ത്രണങ്ങൾ ബാധകമല്ലെന്നതും നിയമത്തിന്റെ ഭാഗമാണ്. വീടുകളിൽ പുകവലിക്കാനും വെയ്പിംഗിനും വിലക്കില്ല. ആരോഗ്യസംരക്ഷണ സംവിധാനത്തിനുള്ള സമ്മർദ്ദം കുറയ്ക്കാനും ജനങ്ങളുടെ ആരോഗ്യനില മെച്ചപ്പെടുത്താനും ഈ നിയമം സഹായിക്കുമെന്ന് ബ്രിട്ടീഷ് സർക്കാർ വ്യക്തമാക്കുന്നു. വ്യാപാര മേഖലയിൽ ചില ആശങ്കകൾ ഉയർന്നിട്ടുണ്ടെങ്കിലും, ജനാരോഗ്യം മുൻനിർത്തിയുള്ള നിർണായക ഇടപെടലാണ് ഈ നീക്കം എന്നാണ് വിലയിരുത്തപ്പെടുന്നത്.
Leave a Reply