ഇംഗ്ലണ്ടിന്റെ ഹൃദയഭൂമിയായ സ്റ്റോക്ക്-ഓൺ-ട്രെൻ്റിൽ, നോർത്ത്വുഡ് സ്റ്റേഡിയത്തിന്റെ മൈതാനം, ഇടവകാ ആഘോഷങ്ങളുടെ പരിമിതികൾ ഭേദിച്ച് വടം പിടിച്ചത് ഇരുപതു ടീമുകൾ, ഏക മനസ്സോടെ ഒന്നായി എത്തിയത് സഭ മെൻസ് ഫോറം മുഴുവനും. മിശിഹായുടെ സാക്ഷികളായി വിവിധ ഇടവകകളെ ഒരുമിപ്പിച്ചുകൊണ്ട്, സഭയുടെ അജഗണമായി , സ്നേഹത്തിന്റെ മഹത്തായ സാക്ഷ്യമായി OLPH മെൻസ് ഫോറം മാറി.
“സഹോദരർ ഏകമനസ്സായി ഒന്നിച്ചിരിക്കുന്നത് എത്ര വിശിഷ്ടവും സന്തോഷപ്രദവുമാണ് ” സങ്കീർത്തനം 133:1
ഇംഗ്ലണ്ടിൻ്റെ മഞ്ഞും മഴയും ശീലിച്ച ഈ ഭൂമിയിൽ ക്രിസ്തുവിൽ ഒന്നിക്കപ്പെട്ട ഒരു ജനതയ്ക്ക് ദൂരം ഒരിക്കലും മതിലുകളല്ല. പ്രാർത്ഥനാഗാനത്തോടെ രാവിലെ 10:30-ന് വടംവലി മാമാങ്കത്തിന് ഉജ്ജ്വല തുടക്കം. സ്റ്റോക്ക്-ഓൺ-ട്രെന്റ് ഡെപ്യൂട്ടി ലോർഡ് മേയർ കൗൺസിലർ ക്രിസ് റോബിൻസണും, ഡെപ്യൂട്ടി ലേഡി മേയറസ് ജോയ് റോബിൻസണും, ബർച്ചസ് ഹെഡ് ആൻഡ് നോർത്ത്വുഡ് കൗൺസിലർ ലൂക്ക് ഷെന്റണും, ചാമ്പ്യൻഷിപ്പ് ഔദ്യോഗികമായി ഉദ്ഘാടനം ചെയ്തു.
ഉദ്ഘാടന സമ്മേളനത്തിൽ റവ. ഫാ. ജോർജ് എട്ടുപാറയിൽ, റവ. ഫാ. ബാബു ജോൺ ചിരിയൻകണ്ടത്തിൽ
റവ. ഫാ. പ്രാചിൽ പണ്ടാരപ്പറമ്പിൽ, മിസ്റ്റർ ജഗ്ഗി ജോസഫ്, ഇൻഫിനിറ്റി മോർട്ട്ഗേജ് ലിമിറ്റഡ്, OLPH മെൻസ് ഫോറം പ്രസിഡൻ്റ് സിറിൾ മഞ്ഞൂരാൻ, ടഗ് ഓഫ് വാർ കോഓർഡിനേറ്റർ മിസ്റ്റർ. സുദീപ് എബ്രഹാം, ബെന്നി പാലട്ടി, OLPH മെൻസ് ഫോറം കോർ കമ്മിറ്റി അംഗങ്ങൾ, വുമൺസ് ഫോറം പ്രസിഡണ്ട്, കൈകാരന്മാർ എന്നിവർ സന്നിഹിതരായിരുന്നു.
ഗ്രേറ്റ് ബ്രിട്ടൻ രൂപതയിലെ 20 ഇടവകകളെ പ്രതിനിധീകരിച്ച് വർണശോഭയാർന്ന കൊടികളുമായി അണിനിരന്ന 20 പൊന്നോമനകൾ വർണ്ണവസ്ത്രങ്ങൾ അണിഞ്ഞ് ഇടവക ടീം അംഗങ്ങൾ, ഉദ്ഘാടനച്ചടങ്ങിന്റെ ഭാഗമായി നടന്ന ടീമുകളുടെ പരേഡും, നിഥ സിജു, നിഷ മാർട്ടിൻ എന്നിവർ ചേർന്ന് അവതരിപ്പിച്ച ഫ്യൂഷൻ ഡാൻസും, ഉദ്ഘാടന ചടങ്ങിന് ഒരു ആഘോഷ പ്രഭ നൽകി.
ഉദ്ഘാടനത്തിന് പിന്നാലെ മൈതാനത്ത് ആവേശത്തിന്റെ തീപ്പൊരി പടർന്നു. ഇരുപതു ടീമുകൾ വടം പിടിക്കാനും, ഒന്നിക്കാനും ആർപ്പുവിളികൾ ഒന്നിച്ചുയർന്നപ്പോൾ, ഓരോ റൗണ്ടും ആവേശോജ്ജ്വലമായ പ്രകടനങ്ങളായി മാറി.
ആവേശകരമായ പോരാട്ടത്തിനൊടുവിൽ, സ്റ്റോക്ക് ഓൺ ട്രെന്റിലെ OLPH ഇടവക പള്ളിയുടെ ടീമായ, സ്റ്റോക്ക് ലയൺസ് ഒന്നാം സ്ഥാനവും 2000 പൗണ്ടും മെൻസ് ഫോറം ട്രോഫിയും കരസ്ഥമാക്കി.
സെന്റ് ഫ്രാൻസിസ് അസീസി മിഷന്റെ വോർസെസ്റ്റർ തെമ്മാഡീസ് രണ്ടാം സ്ഥാനത്തിന് അർഹരായി, 1000 പൗണ്ടും ട്രോഫിയുമാണ് അവർക്ക് ലഭിച്ചത്.
മൂന്നാം സ്ഥാനം സെന്റ് മേരീസ് ഹെർഫോർഡ് (സെന്റ് മേരീസ് മിഷൻ, ഗ്ലോസ്റ്റർ) 500 പൗണ്ടും ട്രോഫിയും നേടിയപ്പോൾ, നാലാം സ്ഥാനത്തെത്തിയ ക്രിസ്ത്യൻ ബ്രദേഴ്സ് ഓൾഡ്ഹാം (ഹോളി ഫാമിലി മിഷൻ, മാഞ്ചസ്റ്റർ) 250 പൗണ്ടും മെൻസ് ഫോറം ട്രോഫിയും സ്വന്തമാക്കി.
ഒരു ചരിത്രമുഹൂർത്തത്തിന്റെ പ്രൗഢിയും ആവേശവും ഉൾക്കൊണ്ട് പൊതുസമ്മേളനം, സമ്മാനദാനം, റാഫിൾ സമ്മാനങ്ങളുടെ വിതരണം എന്നിവയോടെ സമാപനച്ചടങ്ങിന് തിരിതെളിഞ്ഞു.
ഇന്ത്യൻ കോൺസൽ ജനറൽ ഡോ. വെങ്കടാചലം മുരുകൻ ഐ.എഫ്.എസ്, ഗ്രേറ്റ് ബ്രിട്ടൻ രൂപതയെ നയിക്കുന്ന സ്നേഹനിധിയായ ഇടയൻ മാർ ജോസഫ് സ്രാമ്പിക്കൽ പിതാവ്, ചാൻസലർ റവ. ഡോ. മാത്യു പിണക്കാട്ട് എന്നിവർ വേദിയിൽ ആദരണീയമായ സാന്നിധ്യമായി. റോയൽ കോളേജ് ഓഫ് നഴ്സിങ് പ്രസിഡന്റ് ബിജോയ് സെബാസ്റ്റ്യന്റെ സാന്നിധ്യം ആ ചടങ്ങിന് കൂടുതൽ അഭിമാനം പകർന്നു.
ഏറ്റവും കൂടുതൽ ഇടവകാംഗങ്ങളുമായി എത്തുന്ന ടീമിനുള്ള പ്രത്യേക സമ്മാനം ലഭിച്ചത് റവ. ഫാ. ബാബു ജോൺ ചിരിയൻകണ്ടത്തിൽ അച്ചന്റെ നേതൃത്വത്തിൽ എത്തിയ സെക്രഡ് ഹാർട്ട് മിഷൻ, കിങ്സ്ലിൻ & ബോസ്റ്റൺനാണ്. രണ്ടാം സ്ഥാനം റവ. ഫാ. പ്രാചിൽ പണ്ടാരപ്പറമ്പിൽ അച്ചന്റെ നേതൃത്വത്തിൽ എത്തിയ കാഡിഫ് സെന്റ് തോമസ് മിഷൻ നേടി.
വടംവലിയുടെ ആവേശത്തിനിടയിൽ കലാപ്രതിഭകൾക്ക് വേദിയൊരുക്കിയ സംഗീതവിരുന്നും, കാണികളുടെ കാതുകളെയും മനസുകളെയും ഒരുപോലെ ആവേശഭരിതമാക്കിയ തത്സമയ കമന്ററിയും, ലോകത്തിന്റെ ഏത് കോണിലിരുന്നും പരിപാടിയുടെ സ്പന്ദനം അനുഭവിക്കാനാകുന്ന ലൈവ് വീഡിയോ സംപ്രേഷണവും ചേർന്നപ്പോൾ, യുകെയുടെ ഒരു അറ്റത്ത് അരങ്ങേറിയ വടംവലി മഹാമേള ലോകമെമ്പാടുമുള്ള പ്രവാസി മലയാളി സമൂഹങ്ങളുടെ ഹൃദയങ്ങളിലേക്ക് നേരിട്ട് എത്തിച്ചേർന്നു.
സമാപനച്ചടങ്ങിന്റെ പ്രധാന ആകർഷണങ്ങളിലൊന്നായിജയ്മോൾ സുദീപ് & ടീം അവതരിപ്പിച്ച മാർഗംകളിയും, ജോർജിയ ആന്റോ & ടീം അവതരിപ്പിച്ച നൃത്താവിഷ്കാരവും.
ടഗ് ഓഫ് വാർ കോർഡിനേറ്റർ സുദീപ് അബ്രഹാമിന്റെ സ്വാഗതഭാഷണത്തോടെ ആരംഭിച്ച സമാപനച്ചടങ്ങിൽ ഇന്ത്യൻ കോൺസൽ ജനറൽ ഡോ. വെങ്കടാചലം മുരുകൻ IFS, ഗ്രേറ്റ് ബ്രിട്ടൺ സീറോ മലബാർ രൂപതാ മെത്രാൻ അഭിവന്ദ്യ മാർ ജോസഫ് സ്രാമ്പിക്കൽ പിതാവ്, റോയൽ കോളേജ് ഓഫ് നഴ്സിങ് പ്രസിഡന്റ് ബിജോയ് സെബാസ്റ്റ്യൻ, ഗ്രേറ്റ് ബ്രിട്ടൺ രൂപതാ ചാൻസലർ റവ. ഡോ. മാത്യു പിണക്കാട്ട്, ഇടവകയുടെ നാഥനായ റവ. ഫാ. ജോർജ് എട്ടുപാറയിൽ, OLPH മെൻസ് ഫോറം പ്രസിഡൻ്റ് സിറിൾ മഞ്ഞൂരാൻ എന്നിവർ വിശിഷ്ടാതിഥികളായി പങ്കെടുത്ത് ആശംസാസന്ദേശങ്ങൾ നൽകി.
ഗ്രേറ്റ് ബ്രിട്ടൻ രൂപതയുടെ ചാൻസലർ റവ. ഡോ. മാത്യു പിണക്കാട്ട് നാലാം സ്ഥാനം നേടിയ ക്രിസ്ത്യൻ ബ്രദേഴ്സ് ഓൾഡ്ഹാം ടീമിന് ട്രോഫി സമ്മാനിച്ചു. റോയൽ കോളേജ് ഓഫ് നഴ്സിങ് പ്രസിഡന്റ് ബിജോയ് സെബാസ്റ്റ്യൻ മൂന്നാം സ്ഥാനം നേടിയ സെന്റ് മേരീസ് ഹെർഫോർഡ് സ്ഥാനക്കാർക്കുള്ള ട്രോഫി വിതരണം നിർവഹിച്ചു. ഫൈനലിൽ റണ്ണേഴ്സ്അപ്പായും ചാമ്പ്യൻമാരായും തിരഞ്ഞെടുക്കപ്പെട്ട ടീമുകൾക്കുള്ള ട്രോഫികൾ ഇന്ത്യൻ കോൺസൽ ജനറൽ ഡോ. വെങ്കടാചലം മുരുകൻ IFS, ഗ്രേറ്റ് ബ്രിട്ടൻ സീറോ മലബാർ രൂപതാ മെത്രാൻ അഭിവന്ദ്യ മാർ ജോസഫ് സ്രാമ്പിക്കൽ എന്നിവർ ചേർന്ന് സമ്മാനിച്ചു.
ടൂർണമെന്റിന്റെ ക്യാഷ് അവാർഡുകൾ ഇൻഫിനിറ്റി മോർഗേജ് ലിമിറ്റഡിന്റെയും ഈസ്റ്റ്മാൻ സോളിസിറ്റേഴ്സ് & നോട്ടറിയുടെയും പ്രതിനിധികൾ വിതരണം ചെയ്തു.
OLPH മെൻസ് ഫോറം ജനറൽ സെക്രട്ടറി ഷിന്റോ വർഗീസ് നന്ദി രേഖപ്പെടുത്തിയതോടെ ആവേശഭരിതമായ സമാപനച്ചടങ്ങിന് തിരശ്ശീല വീണു.
Leave a Reply