ട്വന്റി20യിൽ നിന്ന് രാജിവച്ചതിന് പിന്നാലെ ഉയർന്ന ആരോപണങ്ങൾ തള്ളി സംവിധായകനും രാഷ്ട്രീയ പ്രവർത്തകനുമായ അഖിൽ മാരാർ രംഗത്ത്. സ്ഥാനമാനങ്ങളോ പദവികളോ ആവശ്യപ്പെട്ടാണ് താൻ രാഷ്ട്രീയ പ്രവർത്തനം നടത്തുന്നതെന്ന പ്രചാരണം അടിസ്ഥാനരഹിതമാണെന്ന് അഖിൽ വ്യക്തമാക്കി. അത്തരം ലക്ഷ്യങ്ങളായിരുന്നുവെങ്കിൽ വർഷങ്ങളായി കോൺഗ്രസിൽ തുടരാമായിരുന്നുവെന്നും അദ്ദേഹം പറഞ്ഞു.
ട്വന്റി20യിൽ പ്രവർത്തിക്കുന്നതിനിടെ പാർട്ടിക്കുള്ളിൽ അഭിപ്രായ സ്വാതന്ത്ര്യവും പ്രവർത്തന സ്വാതന്ത്ര്യവും ഇല്ലെന്ന തോന്നലാണ് രാജിയിലേക്ക് നയിച്ചതെന്നും അഖിൽ മാരാർ പറഞ്ഞു. പാർട്ടിയുടെ നയങ്ങളോടും പ്രവർത്തന രീതികളോടും ഉണ്ടായ അഭിപ്രായ വ്യത്യാസങ്ങളാണ് വേർപിരിയലിന് കാരണമായതെന്നും അദ്ദേഹം വിശദീകരിച്ചു.
അതേസമയം, രാഷ്ട്രീയത്തിൽ തുടരാൻ പദവികളും സാമ്പത്തിക സഹായവും ആവശ്യപ്പെട്ടെന്ന തരത്തിലുള്ള ആരോപണങ്ങളും ശബ്ദരേഖകളും പുറത്തുവന്നിരുന്നു. ഇതിന് മറുപടിയായി, വ്യക്തിപരമായ താൽപര്യങ്ങൾക്കല്ല മറിച്ച് തന്റെ രാഷ്ട്രീയ നിലപാടുകളുടെ അടിസ്ഥാനത്തിലാണ് തീരുമാനങ്ങൾ എടുത്തതെന്ന് അഖിൽ മാരാർ ആവർത്തിച്ചു. വിവാദങ്ങൾക്ക് പിന്നാലെ അദ്ദേഹത്തിന്റെ രാഷ്ട്രീയ ഭാവിയെക്കുറിച്ചുള്ള ചർച്ചകളും സജീവമായിരിക്കുകയാണ്.
Leave a Reply