ന്യൂസ് ഡെസ്ക്, മലയാളം യുകെ
ബ്രിട്ടനിലെ ലൂട്ടണിലുള്ള കിങ്സ്വേ റെക്രിയേഷൻ ഗ്രൗണ്ടിൽ 17 വയസ്സുകാരൻ കുത്തേറ്റ് മരിച്ച സംഭവത്തിൽ 16 വയസ്സുകാരനെ പൊലീസ് കൊലക്കുറ്റം ചുമത്തി അറസ്റ്റ് ചെയ്തു. വെള്ളിയാഴ്ച വൈകുന്നേരം പാർക്കിൽ വലിയ കത്തികളുമായി യുവാക്കൾ സംഘർഷത്തിലേർപ്പെട്ടതായി വിവരം ലഭിച്ചതിനെ തുടർന്നാണ് പൊലീസ് സ്ഥലത്തെത്തിയത്. ഗുരുതരമായി പരിക്കേറ്റ കൗമാരക്കാരനെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.
ആദ്യഘട്ടത്തിൽ 16, 17 വയസ്സുള്ള രണ്ട് യുവാക്കളെ അക്രമസംഭവവുമായി ബന്ധപ്പെട്ട് കസ്റ്റഡിയിലെടുത്തിരുന്നെങ്കിലും പിന്നീട് ഇരുവരെയും കൊലപാതകക്കേസിൽ വീണ്ടും അറസ്റ്റ് ചെയ്തു. ഇതിൽ 16കാരനെതിരെ ഔദ്യോഗികമായി കൊലക്കുറ്റം ചുമത്തിയതായി ബെഡ്ഫോർഡ്ഷയർ പൊലീസ് അറിയിച്ചു. കേസുമായി ബന്ധപ്പെട്ട് മൂന്ന് 17കാരന്മാരെയും പൊലീസ് അറസ്റ്റ് ചെയ്തിട്ടുണ്ട്.
സംഭവത്തെക്കുറിച്ച് കൂടുതൽ വിവരങ്ങൾ കൈവശമുള്ളവർ മുന്നോട്ടുവരണമെന്ന് അന്വേഷണ ഉദ്യോഗസ്ഥർ അഭ്യർഥിച്ചു. സംഭവത്തിന്റെ ദൃശ്യങ്ങൾ സാമൂഹിക മാധ്യമങ്ങളിൽ പ്രചരിപ്പിക്കരുതെന്നും അത് മരിച്ച യുവാവിന്റെ കുടുംബത്തെ കൂടുതൽ വേദനിപ്പിക്കുമെന്നും പൊലീസ് മുന്നറിയിപ്പ് നൽകി. പ്രദേശത്ത് സുരക്ഷ ശക്തമാക്കിയതായും അന്വേഷണം പുരോഗമിക്കുകയാണെന്നും അധികൃതർ അറിയിച്ചു.
Leave a Reply