കൊച്ചി: എറണാകുളം കാക്കനാട് ഇടച്ചിറയിലെ അപ്പാർട്ട്മെന്റിൽ സുഹൃത്തിനൊപ്പം എത്തിയ യുവാവിനെ മരിച്ചനിലയിൽ കണ്ടെത്തി. ആലുവ ചൂർണിക്കര പള്ളിക്കുന്നം മാടവന ബിജു ജോസഫിന്റെ മകൻ ബ്രൈറ്റ് ബിജു (22) ആണ് മരിച്ചത്. ശനിയാഴ്ച ഉച്ചയ്ക്ക് മൂന്നുമണിയോടെയാണ് ബ്രൈറ്റും ചെമ്പുമുക്ക് സ്വദേശിനിയായ സുഹൃത്തും അപ്പാർട്മെന്റിലെത്തിയത്. രാത്രി എട്ടുമണിയോടെ ബ്രൈറ്റ് മുറിയിൽ കുഴഞ്ഞുവീഴുകയായിരുന്നുവെന്നാണ് യുവതി പൊലീസിന് നൽകിയ മൊഴി.

തുടർന്ന് ബ്രൈറ്റിന്റെ സഹോദരനെ വിവരമറിയിക്കുകയും ഇരുവരും ചേർന്ന് യുവാവിനെ സ്വകാര്യ ആശുപത്രിയിലെത്തിക്കുകയും ചെയ്തെങ്കിലും ജീവൻ രക്ഷിക്കാനായില്ല. യുവതിയുടെ മൊഴി രേഖപ്പെടുത്തിയ ശേഷം പൊലീസ് അവരെ ബന്ധുക്കൾക്കൊപ്പം വിട്ടയച്ചു. അതേസമയം, ബ്രൈറ്റ് കുഴഞ്ഞുവീണ ഉടൻ ആശുപത്രിയിലെത്തിക്കുന്നതിനു പകരം സഹോദരൻ വരുന്നതുവരെ കാത്തുനിന്നുവെന്ന ആരോപണവുമായി ബന്ധുക്കൾ രംഗത്തെത്തിയിട്ടുണ്ട്. അപ്പാർട്മെന്റിൽ സെക്യൂരിറ്റി ജീവനക്കാരൻ ഉൾപ്പെടെ ഉണ്ടായിരുന്നിട്ടും ചികിത്സ വൈകിയെന്നാണ് ബന്ധുക്കളുടെ പരാതി.

പോസ്റ്റ്മോർട്ടത്തിലെ പ്രാഥമിക കണ്ടെത്തലുകൾ പ്രകാരം ഹൃദയാഘാതമാണ് മരണകാരണമെന്നാണ് പൊലീസിന്റെ സൂചന. സംഭവത്തിൽ കൂടുതൽ വിവരങ്ങൾ പൊലീസ് പരിശോധിച്ചുവരികയാണ്. ബ്രൈറ്റിന്റെ സംസ്കാരം ഇന്ന് രാവിലെ 10ന് അശോകപുരം സെന്റ് സെബാസ്റ്റ്യൻ പള്ളിയിൽ നടക്കും. മാതാവ് ടിൻസി. സഹോദരങ്ങൾ: ബ്രിസ്റ്റോ ബിജു, ബെനീറ്റ ബിജു.

തിരുവനന്തപുരം: എയ്ഡഡ്, സ്വാശ്രയ സ്വയംഭരണ കോളേജുകളിൽ പുതിയ സ്വാശ്രയ കോഴ്‌സുകൾ ആരംഭിക്കുന്നതിനും സീറ്റുകൾ വർധിപ്പിക്കുന്നതിനും സർക്കാരിന്റെ മുൻകൂർ അനുമതിയായ എൻഒസി (NOC) ഒഴിവാക്കിയ നടപടിയെ ന്യായീകരിച്ച് ഉന്നതവിദ്യാഭ്യാസ മന്ത്രി റോജി എം. ജോൺ. ഉന്നതവിദ്യാഭ്യാസ മേഖലയിൽ സമഗ്രമായ മാറ്റങ്ങൾ കൊണ്ടുവരുന്നതിന്റെ ഭാഗമായാണ് പുതിയ സർക്കുലർ പുറത്തിറക്കിയതെന്ന് മന്ത്രി വ്യക്തമാക്കി. കോഴ്‌സുകൾ ആരംഭിക്കുന്നതിനുള്ള അനാവശ്യ കാലതാമസം ഒഴിവാക്കുകയാണ് പ്രധാന ലക്ഷ്യം. കേരളത്തിൽ മാത്രം നിലനിൽക്കുന്ന എൻഒസി സമ്പ്രദായം ഒഴിവാക്കുന്നത് ഉന്നതവിദ്യാഭ്യാസ രംഗത്ത് വലിയ മുന്നേറ്റത്തിന് വഴിയൊരുക്കുമെന്നും അദ്ദേഹം പറഞ്ഞു.

സ്വയംഭരണ കോളേജുകൾക്ക് സർക്കാർ വാരിക്കോരി ഇളവുകൾ നൽകുകയാണെന്ന പ്രതിപക്ഷത്തിന്റെ ആരോപണം അടിസ്ഥാനരഹിതമാണെന്നും മന്ത്രി പ്രതികരിച്ചു. മികച്ച നിലവാരം പുലർത്തുന്ന സ്ഥാപനങ്ങൾക്കു മാത്രമാണ് സ്വയംഭരണ പദവി നൽകിയിട്ടുള്ളത്. പുതിയ പരിഷ്‌കരണം മെറിറ്റ്, സംവരണ തത്വങ്ങളെ ബാധിക്കില്ലെന്നും സർക്കാർ കോളേജുകളുടെ പ്രവർത്തനത്തെ പ്രതികൂലമായി ബാധിക്കില്ലെന്നും അദ്ദേഹം വ്യക്തമാക്കി. യുജിസി ചട്ടപ്രകാരം സ്വയംഭരണ കോളേജുകൾക്ക് കോഴ്‌സുകൾ ആരംഭിക്കാൻ സർക്കാരിന്റെയോ സർവകലാശാലയുടെയോ അനുമതി ആവശ്യമില്ലെങ്കിലും കേരളത്തിൽ സർവകലാശാലയുടെ പരിശോധനയും അനുമതിയും തുടരും. അതിനുശേഷം വീണ്ടും സർക്കാരിന്റെ എൻഒസി ആവശ്യപ്പെടേണ്ടതില്ലെന്നാണ് പുതിയ തീരുമാനം.

2014ലും 2021ലും നിയമസഭ പാസാക്കിയ സർവകലാശാലാ നിയമങ്ങളിലെ എൻഒസി സംബന്ധിച്ച വ്യവസ്ഥകളിൽ ഭേദഗതി വരുത്താനാണ് സർക്കാർ തീരുമാനിച്ചിരിക്കുന്നതെന്നും മന്ത്രി പറഞ്ഞു. അതേസമയം, ഈ ഇളവുകൾ വിദ്യാഭ്യാസ കച്ചവടത്തിന് വഴിയൊരുക്കുമെന്നാണ് പ്രതിപക്ഷത്തിന്റെ വിമർശനം. വർഷംതോറും പുതുക്കേണ്ടിയിരുന്ന അനുമതി ഇനി മൂന്ന് വർഷത്തിലൊരിക്കൽ പുതുക്കിയാൽ മതിയെന്ന തീരുമാനത്തെയും പ്രതിപക്ഷം ചോദ്യം ചെയ്യുന്നുണ്ട്. നടപടിക്കെതിരെ എസ്എഫ്ഐയും പ്രക്ഷോഭത്തിന് ഒരുങ്ങിയതോടെ ഉന്നതവിദ്യാഭ്യാസ മേഖലയിലെ പുതിയ പരിഷ്‌കരണങ്ങൾ രാഷ്ട്രീയ വിവാദത്തിന് വഴിവെച്ചിരിക്കുകയാണ്.

പാലക്കാട്: മുതലമട ഒന്നാം ലോക്കൽ കമ്മിറ്റി ഓഫിസിൽ പരസ്യമായി മദ്യപിച്ച സംഭവത്തിൽ ലോക്കൽ സെക്രട്ടറി ഉൾപ്പെടെ മൂന്ന് സിപിഎം നേതാക്കളെ ജില്ലാ കമ്മിറ്റി സസ്പെൻഡ് ചെയ്തു. ലോക്കൽ സെക്രട്ടറി ബ്രിജേഷ്, പാർട്ടി പ്രവർത്തകരായ റഷീദ്, സൂര്യപ്രകാശ് എന്നിവർക്കെതിരെയാണ് നടപടി. പാർട്ടി ഓഫിസിനുള്ളിൽ ബ്രിജേഷിന്റെ നേതൃത്വത്തിൽ മദ്യപിക്കുന്നതിന്റെ ദൃശ്യങ്ങൾ പുറത്തുവന്നതോടെയാണ് സംഭവം വിവാദമായത്. മദ്യപാനം ചോദ്യം ചെയ്യാനെത്തിയ പ്രവർത്തകരുമായി നേതാക്കൾ വാക്കുതർക്കത്തിലേർപ്പെടുകയും സംഭവം കൈയാങ്കളിയിലേക്ക് നീങ്ങുകയും ചെയ്തിരുന്നു.

മദ്യപാനം ചോദ്യം ചെയ്ത പ്രവർത്തകരെ ലോക്കൽ സെക്രട്ടറി ബ്രിജേഷ് പിടിച്ചുതള്ളുന്നതും പുറത്തുവന്ന ദൃശ്യങ്ങളിലുണ്ട്. കൊല്ലങ്കോട് ഏരിയ കമ്മിറ്റി അംഗം കെ. സിയാവുദ്ദീൻ, ലോക്കൽ കമ്മിറ്റി അംഗം കെ. വിനേഷ് എന്നിവരുൾപ്പെടെയുള്ളവർ സംഭവത്തിൽ ഇടപെടുന്നതും ദൃശ്യങ്ങളിൽ കാണാം. ചോദ്യം ചെയ്ത പ്രവർത്തകരോട് തന്റെ സ്വകാര്യ മുറിയാണെന്നും അവിടെ എന്തും ചെയ്യാമെന്നുമായിരുന്നു ബ്രിജേഷിന്റെ മറുപടിയെന്ന് റിപ്പോർട്ടുകൾ വ്യക്തമാക്കുന്നു. സംഭവത്തിൽ ബ്രിജേഷിനെതിരെ നടപടി ആവശ്യപ്പെട്ട് പാർട്ടി പ്രവർത്തകർ നേതൃത്വത്തിന് പരാതി നൽകിയിരുന്നു. സമൂഹമാധ്യമങ്ങളിൽ ദൃശ്യങ്ങൾ വ്യാപകമായി പ്രചരിച്ചതോടെ പാർട്ടിക്കുള്ളിലും പുറത്തും പ്രതിഷേധം ശക്തമായി.

വിവാദം രൂക്ഷമായതിനു പിന്നാലെ സിപിഎം പാലക്കാട് ജില്ലാ സെക്രട്ടറി ഇ.എൻ. ചെന്താമരാക്ഷന്റെ നേതൃത്വത്തിലാണ് മൂന്ന് പേർക്കുമെതിരെ അച്ചടക്ക നടപടി സ്വീകരിച്ചത്. പാർട്ടി ഓഫിസിനുള്ളിൽ നടന്ന സംഭവം പ്രാദേശിക തലത്തിൽ സിപിഎമ്മിന് വലിയ നാണക്കേടായിട്ടുണ്ട്. പാർട്ടി അച്ചടക്കവും പ്രവർത്തകരുടെ പെരുമാറ്റവും സംബന്ധിച്ച ചർച്ചകൾക്കും സംഭവം വഴിവെച്ചിരിക്കുകയാണ്.

കൊച്ചി: യുവനടിയുടെ ബന്ധുവിനെ പീഡിപ്പിച്ചെന്ന കേസിൽ പ്രതിയായ ഡോ. ജോൺസൺ കെ. വർഗീസിനെതിരെ പൊലീസ് ലുക്കൗട്ട് സർക്കുലർ പുറപ്പെടുവിച്ചു. കേസെടുത്തതിന് പിന്നാലെ ഒളിവിൽപോയ ഡോക്ടർ വിദേശത്തേക്ക് കടന്നതായാണ് പൊലീസിന്റെ സംശയം. ഇയാളെ കണ്ടെത്തുന്നതിനായി അന്വേഷണം ഊർജിതമാക്കിയിട്ടുണ്ട്. കൊച്ചിയിലെ സ്വകാര്യ ആശുപത്രിയിൽ ജോലി ചെയ്തിരുന്ന 41കാരനായ ഡോക്ടർക്കെതിരെ ഇൻഫോപാർക്ക് പൊലീസാണ് കേസെടുത്തത്. കുടുംബവുമായി പരിചയമുള്ള ഡോക്ടർ കഴിഞ്ഞ മാസം ഇൻഫോപാർക്കിന് സമീപമുള്ള ഹോട്ടലിൽവച്ച് മദ്യം നൽകി അബോധാവസ്ഥയിലാക്കിയ ശേഷം പീഡിപ്പിച്ചെന്നാണ് യുവനടിയുടെ ബന്ധുവായ സ്ത്രീയുടെ പരാതി.

അതിനിടെ, ഡോക്ടറുടെ മൊബൈൽ ഫോണിൽനിന്ന് ഏകദേശം 12 യുവതികളുടെ സ്വകാര്യ ദൃശ്യങ്ങൾ പൊലീസ് കണ്ടെത്തിയതായും റിപ്പോർട്ടുകളുണ്ട്. യുവതികൾക്കൊപ്പമുള്ള സ്വകാര്യ നിമിഷങ്ങൾ ഡോക്ടർ ഫോണിൽ പകർത്തി സൂക്ഷിച്ചിരുന്നതായാണ് പൊലീസിന്റെ കണ്ടെത്തൽ. ദൃശ്യങ്ങളിൽ ഉൾപ്പെട്ട യുവതികൾ പരാതിയുമായി മുന്നോട്ടുവന്നാൽ കൂടുതൽ കേസുകൾ രജിസ്റ്റർ ചെയ്യുമെന്നും പൊലീസ് വ്യക്തമാക്കിയിട്ടുണ്ട്. ദൃശ്യങ്ങൾ ഉപയോഗിച്ച് യുവതികളെ ബ്ലാക്ക്‌മെയിൽ ചെയ്തിട്ടുണ്ടോയെന്ന കാര്യവും അന്വേഷിക്കുന്നുണ്ട്.

യുവനടിയും സുഹൃത്തായ നടനും ഉൾപ്പെടെ 12 അംഗ സംഘം ഡോക്ടറെ ആക്രമിച്ച് മൊബൈൽ ഫോണുകളും സ്മാർട്ട് വാച്ചും ഇയർപോഡും ഉൾപ്പെടെ 3.25 ലക്ഷം രൂപയുടെ വസ്തുക്കൾ കവർന്നെന്ന പരാതിയിലാണ് സംഭവങ്ങളുടെ തുടക്കം. ബന്ധുവിന് ചികിത്സ നൽകാനെന്ന പേരിൽ പൊന്നുരുന്നിയിലെ ഫ്ലാറ്റിലേക്ക് വിളിച്ചുവരുത്തി മർദിച്ചെന്നായിരുന്നു ഡോക്ടറുടെ പരാതി. ഈ കേസിൽ നടിയടക്കം മൂന്നുപേരെ പൊലീസ് അറസ്റ്റ് ചെയ്തിരുന്നു. എന്നാൽ, ഡോക്ടർക്കെതിരെ പീഡനപരാതി ഉയർന്നതോടെ കേസിൽ പുതിയ വഴിത്തിരിവുണ്ടായി. ആക്രമണക്കേസിൽ അറസ്റ്റിലായവരുടെ ജാമ്യാപേക്ഷ എറണാകുളം ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതി തള്ളിയിരുന്നു. രണ്ട് കേസുകളിലും പൊലീസ് അന്വേഷണം തുടരുകയാണ്.

അനിൽ ഹരി

ലണ്ടൻ: ബ്രിട്ടനിലെ കെയർ മേഖലയിൽ മലയാളികളുടെ മികവിന് ദേശീയതലത്തിൽ വീണ്ടും അംഗീകാരം. നാഷണൽ കെയർ അവാർഡ്സ് 2026-ൽ മികച്ച ഡെപ്യൂട്ടി മാനേജർക്കുള്ള പുരസ്കാരം മലയാളിയായ ഗീതു ടെന്നിസൺ സ്വന്തമാക്കി. നവംബർ ആറിന് ലണ്ടനിലെ പാർക്ക് പ്ലാസ വെസ്റ്റ്മിൻസ്റ്റർ ബ്രിഡ്ജ് ഹോട്ടലിൽ നടന്ന പ്രൗഢഗംഭീരമായ പുരസ്കാരദാന ചടങ്ങിലാണ് ഗീതുവിനെ വിജയിയായി പ്രഖ്യാപിച്ചത്.

യുകെയിലെ വിവിധ കെയർ ഹോമുകളിലും അനുബന്ധ സ്ഥാപനങ്ങളിലുമായി സേവനമനുഷ്ഠിക്കുന്ന പ്രഗത്ഭരായ ഡെപ്യൂട്ടി മാനേജർമാരിൽനിന്ന് തിരഞ്ഞെടുക്കപ്പെട്ട പത്ത് പേരാണ് അന്തിമ പട്ടികയിൽ ഇടം നേടിയിരുന്നത്. നേതൃത്വപാടവം, സേവനമികവ്, പ്രവർത്തനക്ഷമത, കെയർ രംഗത്തെ അർപ്പണബോധം തുടങ്ങിയ മാനദണ്ഡങ്ങൾ പരിഗണിച്ചാണ് ഇവരിൽനിന്ന് ഗീതു ടെന്നിസണെ മികച്ച ഡെപ്യൂട്ടി മാനേജറായി തിരഞ്ഞെടുത്തത്.

ബ്രിട്ടനിലെ കെയർ മേഖലയിലെ ശ്രദ്ധേയമായ ദേശീയ പുരസ്കാരം

ബ്രിട്ടനിലെ കെയർ മേഖലയിൽ മികച്ച സേവനവും പ്രവർത്തനമികവും കാഴ്ചവയ്ക്കുന്ന വ്യക്തികളെയും സ്ഥാപനങ്ങളെയും ആദരിക്കുന്ന രാജ്യത്തെ പ്രമുഖ പുരസ്കാര വേദികളിലൊന്നാണ് നാഷണൽ കെയർ അവാർഡ്സ് (National Care Awards). നെക്സസ് മീഡിയ ഗ്രൂപ്പ് (Nexus Media Group) സംഘടിപ്പിക്കുന്ന ഈ പുരസ്കാരത്തിൽ മികച്ച കെയർ ഹോം മാനേജർ, ഡെപ്യൂട്ടി മാനേജർ, നഴ്സ്, കെയറർ, കെയർ ഹോം തുടങ്ങി വിവിധ വിഭാഗങ്ങളിലാണ് അംഗീകാരങ്ങൾ നൽകുന്നത്. പരിചരണരംഗത്തെ നേതൃത്വപാടവം, സേവനനിലവാരം, അർപ്പണബോധം, മികച്ച പ്രവർത്തനങ്ങൾ എന്നിവ വിലയിരുത്തിയാണ് പുരസ്കാര ജേതാക്കളെ തിരഞ്ഞെടുക്കുന്നത്. ബ്രിട്ടനിലെ കെയർ മേഖലയിൽ ഏറെ പ്രാധാന്യമുള്ള ഈ ദേശീയ വേദിയിൽ ഗീതു ടെന്നിസൺ നേടിയ അംഗീകാരം മലയാളി സമൂഹത്തിനും അഭിമാനകരമായി.

കഠിനാധ്വാനത്തിലൂടെ ദേശീയ അംഗീകാരത്തിലേക്ക്

ലേക്ക് ഡിസ്ട്രിക്ടിലെ കെൻഡലിലുള്ള കെൻഡൽ കെയർ ഹോമിൽ 2022 മുതൽ ഡെപ്യൂട്ടി മാനേജറായി സേവനമനുഷ്ഠിച്ചുവരികയാണ് ഗീതു ടെന്നിസൺ. കെയർ മേഖലയിലെ വർഷങ്ങളായുള്ള പ്രവർത്തനപരിചയവും ആത്മാർഥമായ സേവനവും മികച്ച നേതൃത്വപാടവവുമാണ് ഗീതുവിനെ ഈ അഭിമാനനേട്ടത്തിന് അർഹയാക്കിയത്.

2011-ൽ ടെന്നിസൺ കുരിയാക്കോസ് തോട്ടത്തിലിനെ വിവാഹം കഴിച്ച് യുകെയിലെത്തിയ ഗീതു, ഹെറോൺ ഹിൽ കെയർ ഹോമിലൂടെയാണ് ബ്രിട്ടനിലെ ഔദ്യോഗിക ജീവിതത്തിന് തുടക്കം കുറിച്ചത്. തുടർന്ന് കൗൺസിൽ കെയർ ഹോമുകളിൽ സൂപ്പർവൈസറായും നഴ്സായും സേവനമനുഷ്ഠിച്ചു. വിവിധ ഉത്തരവാദിത്തങ്ങൾ വിജയകരമായി നിർവഹിച്ചും സേവനരംഗത്ത് സ്വന്തം വ്യക്തിമുദ്ര പതിപ്പിച്ചുമാണ് ഡെപ്യൂട്ടി മാനേജർ പദവിയിലേക്ക് ഉയർന്നത്.

പ്രായമായവരുടെയും പരിചരണം ആവശ്യമുള്ളവരുടെയും ക്ഷേമം ഉറപ്പാക്കുന്നതിലും ജീവനക്കാരുടെ പ്രവർത്തനങ്ങൾ ഏകോപിപ്പിക്കുന്നതിലും മികച്ച പരിചരണസേവനങ്ങൾ ലഭ്യമാക്കുന്നതിലും ഡെപ്യൂട്ടി മാനേജർമാർ നിർണായക പങ്കാണ് വഹിക്കുന്നത്. ഈ മേഖലയിൽ ഗീതു പ്രകടിപ്പിച്ച പ്രവർത്തനമികവിനുള്ള അംഗീകാരമായി കൂടിയാണ് ദേശീയ പുരസ്കാരത്തെ വിലയിരുത്തുന്നത്.

 ബ്രിട്ടനിലെ മലയാളി സമൂഹത്തിന് അഭിമാനനേട്ടം

ഭർത്താവ് ടെന്നിസൺ കുരിയാക്കോസ് തോട്ടത്തിലിനും മക്കളായ സയറ, സെറീന, ടെസ, സ്റ്റീഫൻ എന്നിവർക്കുമൊപ്പമാണ് ഗീതുവിന്റെ കുടുംബജീവിതം.

ബ്രിട്ടനിലെ ആരോഗ്യപരിചരണ, സാമൂഹിക പരിചരണ മേഖലകളിൽ മലയാളികൾ നൽകുന്ന വിലപ്പെട്ട സംഭാവനകൾക്ക് മറ്റൊരു ഉദാഹരണമായി മാറിയിരിക്കുകയാണ് ഗീതുവിന്റെ വിജയം. വിവിധ രാജ്യങ്ങളിൽനിന്നും വ്യത്യസ്ത പശ്ചാത്തലങ്ങളിൽനിന്നുമുള്ള പ്രഗത്ഭരായ പ്രൊഫഷണലുകൾ മത്സരിച്ച ദേശീയ പുരസ്കാരവേദിയിൽ ഒരു മലയാളി വനിത മികച്ച ഡെപ്യൂട്ടി മാനേജറായി തിരഞ്ഞെടുക്കപ്പെട്ടത് യുകെയിലെ മലയാളി സമൂഹത്തിനാകെ അഭിമാനിക്കാവുന്ന നേട്ടമാണ്.

2011-ൽ യുകെയിലെത്തി കെയർ മേഖലയിലെ വിവിധ പദവികളിലൂടെ വളർന്ന് ദേശീയതലത്തിലുള്ള അംഗീകാരത്തിലേക്ക് എത്തിയ ഗീതുവിന്റെ വിജയഗാഥ, ഈ രംഗത്ത് പ്രവർത്തിക്കുന്ന നിരവധി മലയാളികൾക്കും പ്രചോദനമാണ്. വർഷങ്ങളായുള്ള കഠിനാധ്വാനത്തിനും തൊഴിലിനോടുള്ള ആത്മാർഥതയ്ക്കും അർപ്പണബോധത്തിനും ലഭിച്ച ഈ അംഗീകാരം ഗീതുവിന്റെ ഔദ്യോഗിക ജീവിതത്തിലെ സുപ്രധാന നാഴികക്കല്ലായി മാറിയിരിക്കുകയാണ്.

‘രാമായണം’ എന്ന ബ്രഹ്മാണ്ഡ ചിത്രത്തിൽ മണ്ഡോദരിയുടെ വേഷത്തിലെത്തി ശ്രദ്ധ നേടുകയാണ് തെന്നിന്ത്യൻ താരം കാജൽ അഗർവാൾ. സായി പല്ലവി സീതയായി എത്തുന്ന ചിത്രത്തിൽ, രാവണന്റെ പത്നിയായ മണ്ഡോദരിയുടെ വേഷത്തിലാണ് കാജൽ പ്രത്യക്ഷപ്പെടുന്നത്. പരിമിതമായ സ്ക്രീൻ സമയമേയുള്ളൂവെങ്കിലും തന്റെ സൗന്ദര്യവും വേഷപ്പകർച്ചയും കൊണ്ട് പ്രേക്ഷകരുടെ ശ്രദ്ധ നേടാൻ താരത്തിന് കഴിഞ്ഞു. സായി പല്ലവി, രാകുൽ പ്രീത് തുടങ്ങിയ താരങ്ങൾക്കൊപ്പം കാജലിന്റെ ലുക്കും സമൂഹമാധ്യമങ്ങളിൽ വലിയ ചർച്ചയായിരിക്കുകയാണ്. സീതയുടെ വേഷത്തിൽ കാജലിനെയും പരിഗണിക്കാമായിരുന്നുവെന്ന അഭിപ്രായങ്ങളും ആരാധകർ പങ്കുവയ്ക്കുന്നുണ്ട്.

ചിത്രത്തിലെ തന്റെ കഥാപാത്രത്തിന് ലഭിക്കുന്ന മികച്ച പ്രതികരണങ്ങളിൽ നന്ദി അറിയിച്ച് കാജൽ അഗർവാൾ സമൂഹമാധ്യമങ്ങളിൽ കുറിപ്പ് പങ്കുവച്ചു. ‘രാമായണം’ പോലൊരു മഹത്തായ സിനിമയുടെ ഭാഗമാകാൻ കഴിഞ്ഞത് വലിയ അഭിമാനവും സന്തോഷവുമാണെന്ന് താരം പറഞ്ഞു. കഥാപാത്രത്തിന് സ്ക്രീൻ സമയം കുറവാണെങ്കിലും ഇന്ത്യൻ സംസ്കാരത്തോടും ചരിത്രത്തോടും ആഴത്തിൽ ബന്ധപ്പെട്ടു നിൽക്കുന്ന ഒരു ഇതിഹാസത്തിന്റെ ഭാഗമാകാൻ കഴിഞ്ഞത് വലിയ അനുഭവമാണെന്നും കാജൽ വ്യക്തമാക്കി. സംവിധായകൻ നിതേഷ് തിവാരിക്കും നിർമാതാവ് നമിത് മൽഹോത്രയ്ക്കും താരം പ്രത്യേക നന്ദി അറിയിച്ചു.

യഷ്, രൺബീർ കപൂർ, സായി പല്ലവി, സണ്ണി ഡിയോൾ, രവി ദുബെ തുടങ്ങിയ പ്രമുഖ താരങ്ങൾക്കൊപ്പം പ്രവർത്തിക്കാൻ കഴിഞ്ഞതും സന്തോഷകരമായ അനുഭവമായിരുന്നുവെന്ന് കാജൽ കുറിച്ചു. രാകുൽ പ്രീത്, വിവേക് ഒബ്‌റോയ്, ആദിനാഥ് കോത്താരെ തുടങ്ങിയ സുഹൃത്തുക്കളോടൊപ്പമുള്ള നിമിഷങ്ങളും മറക്കാനാവാത്തതാണെന്ന് താരം പറഞ്ഞു. ഒരു സിനിമയുടെ മഹത്വം കഥാപാത്രത്തിന്റെ വലിപ്പത്തിലോ സ്ക്രീനിൽ ലഭിക്കുന്ന സമയത്തിലോ മാത്രം ഒതുങ്ങുന്നതല്ലെന്നും അതിന്റെ പിന്നിലെ കൂട്ടായ പരിശ്രമവും സമർപ്പണവുമാണ് പ്രധാനമെന്നും കാജൽ കൂട്ടിച്ചേർത്തു. ചിത്രത്തിന്റെ കോസ്റ്റ്യൂം വിഭാഗത്തിനും അസിസ്റ്റന്റ് ഡയറക്ടർമാർക്കും താരം പ്രത്യേകം അഭിനന്ദനവും നന്ദിയും അറിയിച്ചു.

വടകര: ക്രിസ്മസ് വിപണി ലക്ഷ്യമിട്ട് കേക്കുകളുടെയും മറ്റ് പലഹാരങ്ങളുടെയും നിർമാണം സജീവമാകുന്നതിനിടെ വടകരയിലെ ബേക്കറി നിർമാണശാലയിൽ ഗുരുതരമായ ശുചിത്വവീഴ്ച കണ്ടെത്തി. പുതിയ സ്റ്റാൻഡിലെ ന്യൂ ലവ്‌ലി ബേക്കറിയിൽ ആരോഗ്യവകുപ്പ് നടത്തിയ മിന്നൽ പരിശോധനയിലാണ് വൃത്തിഹീനമായ സാഹചര്യത്തിൽ കേക്കുകളും പലഹാരങ്ങളും നിർമിക്കുന്നതായി കണ്ടെത്തിയത്. വയറിളക്ക രോഗങ്ങൾ വ്യാപിക്കുന്ന സാഹചര്യത്തിൽ പൊതുജനാരോഗ്യത്തിന് ഭീഷണിയാകുന്ന രീതിയിൽ പ്രവർത്തിച്ച സ്ഥാപനത്തോട് താൽക്കാലികമായി അടച്ചുപൂട്ടാൻ ആരോഗ്യവിഭാഗം നിർദേശം നൽകി.

ആവശ്യമായ ലൈസൻസില്ലാതെയും തൊഴിലാളികൾക്ക് ഹെൽത്ത് കാർഡില്ലാതെയുമാണ് സ്ഥാപനം പ്രവർത്തിച്ചിരുന്നത്. പലഹാര നിർമാണത്തിന് ഉപയോഗിക്കുന്ന വെള്ളത്തിന്റെ ഗുണനിലവാര പരിശോധനയും നടത്തിയിരുന്നില്ല. നിരോധിത പ്ലാസ്റ്റിക് കവറുകളുടെ ഉപയോഗം, അപ്പക്കൂടിന് സമീപം കൊതുകുകൾ വളരാനുള്ള സാഹചര്യം, പഴക്കമേറിയതും വൃത്തിഹീനവുമായ അലൂമിനിയം പാത്രങ്ങളിൽ കേക്ക് നിർമിക്കൽ തുടങ്ങിയ വീഴ്ചകളും കണ്ടെത്തി. ഓർക്കാട്ടേരി സാമൂഹിക ആരോഗ്യകേന്ദ്രം ഹെൽത്ത് സൂപ്പർവൈസർ സുരേന്ദ്രൻ കല്ലേരി, ചോറോട് കുടുംബാരോഗ്യകേന്ദ്രം ഹെൽത്ത് ഇൻസ്പെക്ടർ എ.പി. സുനിൽ പള്ളിക്കര എന്നിവരുടെ നേതൃത്വത്തിലായിരുന്നു പരിശോധന. നിർദേശങ്ങൾ പാലിക്കാത്ത സ്ഥാപനങ്ങൾക്കെതിരെ കർശന നടപടി സ്വീകരിക്കുമെന്ന് ബ്ലോക്ക് മെഡിക്കൽ ഓഫിസർ ഡോ. കെ.ജി. ചെറിയാൻ അറിയിച്ചു.

അതേസമയം, വടകരയിൽ വിദ്യാർഥിക്ക് ഷിഗെല്ല രോഗബാധ സ്ഥിരീകരിച്ച സാഹചര്യത്തിൽ വയറിളക്ക രോഗങ്ങൾക്കെതിരെ ജാഗ്രത പാലിക്കണമെന്ന് ജില്ലാ മെഡിക്കൽ ഓഫിസർ മുന്നറിയിപ്പ് നൽകി. ക്രിസ്മസ് വിപണിയിൽ വിൽപ്പനയ്ക്കെത്തുന്ന കേക്കുകളും മറ്റ് ഭക്ഷ്യവസ്തുക്കളും വാങ്ങുമ്പോൾ ഗുണനിലവാരവും ശുചിത്വവും ഉറപ്പാക്കേണ്ടതിന്റെ ആവശ്യകതയും ഈ സംഭവം ചൂണ്ടിക്കാട്ടുന്നു. വെള്ളം നന്നായി തിളപ്പിച്ച് തണുപ്പിച്ചശേഷം മാത്രം കുടിക്കണം. തിളപ്പിച്ച വെള്ളത്തിൽ പച്ചവെള്ളം കലർത്തരുത്. പഴങ്ങളും പച്ചക്കറികളും നന്നായി കഴുകിയശേഷം മാത്രം ഉപയോഗിക്കണമെന്നും ആരോഗ്യവകുപ്പ് നിർദേശിച്ചു.

ന്യൂഡൽഹി: 1975ൽ രാജ്യത്ത് അടിയന്തരാവസ്ഥ പ്രഖ്യാപിച്ചത് വലിയ തെറ്റായിരുന്നുവെന്ന് മുൻ പ്രധാനമന്ത്രി ഇന്ദിരാ ഗാന്ധിയുടെ തീരുമാനത്തെക്കുറിച്ച് കോൺഗ്രസ് മുൻ അധ്യക്ഷ സോണിയ ഗാന്ധി. അടിയന്തരാവസ്ഥക്കാലത്ത് നടന്ന അതിക്രമങ്ങളുടെയും അധികാരദുർവിനിയോഗങ്ങളുടെയും വ്യാപ്തി വർധിപ്പിക്കുന്നതിൽ മകൻ സഞ്ജയ് ഗാന്ധിക്ക് വലിയ പങ്കുണ്ടായിരുന്നുവെന്നും അദ്ദേഹത്തെ നിയന്ത്രിച്ചിരുന്നെങ്കിൽ പല സംഭവങ്ങളും ഒഴിവാക്കാമായിരുന്നുവെന്നും സോണിയ വെളിപ്പെടുത്തി. തന്റെ ആത്മകഥയുടെ പ്രസിദ്ധീകരണത്തിന് മുന്നോടിയായി നൽകിയ അഭിമുഖത്തിലാണ് ഈ നിർണായക പരാമർശങ്ങൾ. അടിയന്തരാവസ്ഥ പ്രഖ്യാപിക്കാനുള്ള തീരുമാനത്തിൽ ഗാന്ധി കുടുംബത്തിനുള്ളിൽ തന്നെ അഭിപ്രായവ്യത്യാസങ്ങളുണ്ടായിരുന്നുവെന്നും അവർ വ്യക്തമാക്കി.

അടിയന്തരാവസ്ഥ പ്രഖ്യാപിക്കുന്നതിന് പിന്നിൽ അന്നത്തെ രാഷ്ട്രീയ സാഹചര്യങ്ങളും വലിയ സമ്മർദങ്ങളും ഉണ്ടായിരുന്നുവെന്നും സോണിയ വിശദീകരിച്ചു. അലഹബാദ് ഹൈക്കോടതി ഇന്ദിരാ ഗാന്ധിയുടെ റായ്ബറേലി ലോക്സഭാ തെരഞ്ഞെടുപ്പ് വിജയം അസാധുവാക്കിയതും രാജ്യത്തിന്റെ വിവിധ ഭാഗങ്ങളിൽ സർക്കാരിനെതിരെ ശക്തമായ പ്രതിഷേധങ്ങൾ ഉയർന്നതും പ്രതിസന്ധി രൂക്ഷമാക്കിയിരുന്നു. 1975 ജൂൺ 25നാണ് രാജ്യത്ത് അടിയന്തരാവസ്ഥ പ്രഖ്യാപിച്ചത്. ഈ കാലയളവിൽ പ്രതിപക്ഷ നേതാക്കൾ കൂട്ടത്തോടെ അറസ്റ്റിലായി. മാധ്യമസ്വാതന്ത്ര്യത്തിനും പൗരാവകാശങ്ങൾക്കും കടുത്ത നിയന്ത്രണങ്ങൾ ഏർപ്പെടുത്തി. നിർബന്ധിത വന്ധ്യംകരണവും ചേരികൾ ഒഴിപ്പിക്കലും ഉൾപ്പെടെയുള്ള നടപടികൾ വലിയ വിവാദങ്ങൾക്ക് വഴിവെച്ചു.

അടിയന്തരാവസ്ഥയുടെ എല്ലാ ഉത്തരവാദിത്തവും സഞ്ജയ് ഗാന്ധിയിൽ മാത്രം ചുമത്താനാകില്ലെന്നും ഇന്ദിരയുടെ ചില മുതിർന്ന സഹപ്രവർത്തകരും തീരുമാനത്തിനായി സമ്മർദം ചെലുത്തിയിരുന്നുവെന്നും സോണിയ മറ്റൊരു അഭിമുഖത്തിൽ വ്യക്തമാക്കി. അന്ന് നടന്ന സംഭവങ്ങളുടെ യഥാർഥ ഗൗരവം തനിക്ക് മനസ്സിലായത് അടിയന്തരാവസ്ഥ അവസാനിച്ചതിന് ശേഷമാണെന്നും അവർ പറഞ്ഞു. ജനാധിപത്യാവകാശങ്ങൾ തടയപ്പെട്ടതും കോടതിയെ സമീപിക്കാനുള്ള ഹേബിയസ് കോർപസ് അവകാശം നിർത്തിവെച്ചതും അവർ അംഗീകരിച്ചു. പിന്നീട് ഇന്ദിര തന്നെ അടിയന്തരാവസ്ഥക്കാലത്തെ അതിക്രമങ്ങളിൽ ഖേദം പ്രകടിപ്പിക്കുകയും മാപ്പ് പറയുകയും ചെയ്തുവെന്നും സോണിയ കൂട്ടിച്ചേർത്തു. 1977 ജനുവരിയിൽ തെരഞ്ഞെടുപ്പ് പ്രഖ്യാപിച്ച ഇന്ദിരയുടെ കോൺഗ്രസ് പാർട്ടി മാർച്ചിൽ നടന്ന തെരഞ്ഞെടുപ്പിൽ പരാജയപ്പെട്ടു. 1977 മാർച്ച് 21നാണ് അടിയന്തരാവസ്ഥ ഔദ്യോഗികമായി പിൻവലിച്ചത്. നവംബർ 10ന് പുറത്തിറങ്ങാനിരിക്കുന്ന Belonging: A Journey of Love എന്ന ആത്മകഥയിലാണ് സോണിയയുടെ ഈ ഓർമകളും വെളിപ്പെടുത്തലുകളും ഉൾപ്പെടുത്തിയിരിക്കുന്നത്.

ടോംജോസ് തടിയംപാട് , ജോസ് മാത്യു 

ഒരു ചരിത്രവിദ്യാർത്ഥി എന്ന നിലയിൽ വളരെക്കാലമായി കാണാൻ ആഗ്രഹിച്ചിരുന്ന ഒരു ചരിത്രസ്മാരകമായിരുന്നു സ്‌പെയിനിലെ കോർഡോബയിൽ സ്ഥിതി ചെയ്യുന്ന കോർഡോബ മോസ്‌ക് ആൻഡ് ക്രിസ്റ്റ്യൻ പള്ളി. ഇസ്ലാമിക കടന്നുകയറ്റം നടന്ന പ്രദേശങ്ങളിൽ എല്ലാം ക്രിസ്റ്റ്യൻ പള്ളികൾ പിടിച്ചെടുത്ത് മോസ്‌ക് ആക്കിയിരിക്കുന്നത് ലോകത്ത് എല്ലായിടത്തും നമുക്ക് കാണാം. അതിൽ ഏറ്റവും പഴയത് മുഹമ്മദ് ജനിക്കുന്നതിനു മുൻപ് പണികഴിപ്പിച്ച തുർക്കിയിലെ ഹാഗിയ സോഫിയ എന്ന പള്ളിയും പിന്നീട് മോസ്‌കാക്കി മാറ്റിയ സ്മാരകവുമാണ്. എന്നാൽ ഇതുപോലെ ക്രിസ്റ്റ്യൻ പള്ളി പിടിച്ചെടുത്ത് അതിമനോഹരമായ മോസ്‌ക് പണിയുകയും പിന്നീട് ക്രിസ്റ്റ്യൻ സൈന്യം തിരിച്ചുപിടിച്ച് കത്തീഡ്രൽ ആക്കി മാറ്റുകയും ചെയ്ത ചരിത്രമാണ് Mezquita Catedral de Cordoba എന്നറിയപ്പെടുന്ന ഈ പള്ളിക്കുള്ളത്.

AD 756 മുതൽ ആരംഭിച്ച സ്പെയിനിലേക്കുള്ള ഇസ്ലാമിന്റെ കടന്നുകയറ്റത്തിന് നേതൃത്വം കൊടുത്തത് സിറിയയിൽ നിന്നുള്ള ഉമയ്യദ് വംശമാണ്. ആ കാലത്ത് മുസ്ലിം, ക്രിസ്റ്റ്യൻ വിശ്വാസികൾ സഹകരിച്ച് കോർഡോബയിലെ സെന്റ് വിൻസെന്റ് പള്ളിയിൽ പ്രാർത്ഥിച്ചിരുന്നു. പിന്നീട് പള്ളി മുസ്ലിങ്ങൾ കൈവശപ്പെടുത്തുകയും (വാങ്ങിയെന്നും പറയുന്നു) 784-ൽ അക്കാലത്തെ ഏറ്റവും വലിയ മോസ്‌കിന്റെ നിർമ്മാണം ആരംഭിക്കുകയും ചെയ്തു. 23,400 ചതുരശ്ര മീറ്റർ വിസ്തീർണമുള്ള, 5.8 ഏക്കറോളം സ്ഥലത്ത് നിർമ്മിച്ച ഈ മോസ്‌കിൽ ഒരേസമയം 20,000 പേർക്ക് പ്രാർത്ഥന നിർവഹിക്കാൻ കഴിയുമായിരുന്നു. 987-ലാണ് മോസ്‌കിന്റെ പണി പൂർത്തീകരിച്ചത്.

ഈ മോസ്‌ക് നിർമ്മിക്കുന്ന സമയത്ത് സ്പെയിനിന്റെ ഭൂരിഭാഗവും കീഴടക്കിയ ഇസ്ലാം സൈന്യം ചെയ്ത മറ്റൊരു ക്രൂരത, ഏകദേശം 882 കിലോമീറ്റർ അകലെ സ്ഥിതി ചെയ്യുന്ന സാന്റിയാഗോ ഡി കമ്പോസ്റ്റീല കത്തീഡ്രലിൽ സ്ഥാപിച്ചിരുന്ന വലിയ ഓടുകൊണ്ടുണ്ടാക്കിയ മണി അഴിച്ചുകൊണ്ടുവന്ന് കാലുകൾ ഉണ്ടാക്കി മോസ്‌കിൽ സ്ഥാപിച്ചു എന്നതാണ്.

പിന്നീട് ഇസ്ലാമിക ഭരണകൂടത്തിലെ വിവിധ പ്രശ്നങ്ങളും ക്രിസ്റ്റ്യൻ സൈന്യത്തിന്റെ ശക്തമായ പ്രതിരോധവും കാരണം വിവിധ രാജവംശങ്ങൾ അധികാരം കയ്യാളിയിരുന്നു. അതിൽ ഏറ്റവും ക്രൂരമായി ഇസ്ലാമിക നിയമം കർക്കശമായി നടപ്പിലാക്കിയ രാജവംശമായിരുന്നു അൽമൊറാവിദ് രാജവംശം. ഇവർ മൊറോക്കോയിൽ നിന്നും ക്രിസ്റ്റ്യൻ സൈന്യത്തിനെതിരെ ഇസ്ലാമിക സൈന്യത്തെ സഹായിക്കാൻ വന്നവരായിരുന്നു.

1086-ൽ അൽമൊറാവിദുകൾ അധികാരം പിടിച്ചെടുക്കുകയും ക്രിസ്തുവിശ്വാസികളുടെ മേൽ വലിയ മതനികുതി (ജിസിയ) നടപ്പിലാക്കുകയും 25% ക്രിസ്റ്റ്യൻ സമൂഹത്തെ നിർബന്ധിച്ച് മതം മാറ്റുകയും ക്രിസ്റ്റ്യൻ പള്ളി പണിയുന്നതിനും വസ്ത്രധാരണത്തിനും നിയന്ത്രണങ്ങൾ അടിച്ചേൽപ്പിക്കുകയും ചെയ്തു. ഇതോടെ ഇസ്ലാമിക അടിമത്തത്തിനെതിരെ ഫെർഡിനന്റ് മൂന്നാമൻ രാജാവിന്റെ നേതൃത്വത്തിൽ ജനം സംഘടിക്കുകയും 1236-ൽ ഇസ്ലാമിക ഭരണകൂടത്തിന്റെ ആസ്ഥാനമായ കോർഡോബ പിടിച്ചെടുക്കുകയും ചെയ്തു. കോർഡോബ മോസ്‌ക് പള്ളിയാക്കി മാറ്റി. പള്ളിയിൽ സ്ഥാപിച്ചിരുന്ന പള്ളിമണി ഒരുക്കിയുണ്ടാക്കിയ കാലുകൾ പറിച്ചെടുത്ത് ഉരുക്കി പള്ളിമണിയാക്കി സാന്റിയാഗോ കത്തീഡ്രലിൽ സ്ഥാപിച്ചു.

1523-ൽ അധികാരത്തിൽ വന്ന ചാൾസ് അഞ്ചാമൻ രാജാവ് മോസ്‌കിന്റെ നടുഭാഗം പൊളിച്ച് അവിടെ നവോത്ഥാന ശൈലിയിൽ മനോഹരമായ ഒരു പള്ളി സ്ഥാപിച്ചു. ഇന്ന് ഈ പള്ളി ഇസ്ലാമിക, ക്രിസ്റ്റ്യൻ സംസ്കാരങ്ങളുടെയും ശിൽപ്പകലയുടെയും പ്രതീകമായി ലോകത്തുള്ള ചരിത്രകുതുകികളെ ആകർഷിച്ചുകൊണ്ട് നിലനിൽക്കുന്നു. 1984-ൽ UNESCO വേൾഡ് ഹെറിറ്റേജ് സൈറ്റായി കോർഡോബ കത്തീഡ്രലിനെ പ്രഖ്യാപിച്ചു. ഒരു വർഷം രണ്ട് മില്യൺ സന്ദർശകരാണ് ഈ മഹാസൗധം കാണാൻ ഇവിടെ എത്തുന്നത്. സ്പെയിനിൽ ഏറ്റവും കൂടുതൽ സന്ദർശകർ എത്തുന്ന സ്ഥലമാണ് ഇന്ന് കോർഡോബ മോസ്‌ക് കത്തീഡ്രൽ.

ഉമയ്യദ് ഭരണം നിലനിന്നിരുന്ന കാലത്ത് കോർഡോബയെ അറിയപ്പെട്ടിരുന്നത് അന്ദുലുസിയ എന്നായിരുന്നു. അക്കാലത്തെ സ്പെയിനിന്റെ സുവർണ്ണകാലഘട്ടം എന്നും അറിയപ്പെടുന്നു. ആ കാലഘട്ടത്തിൽ അവിടെയുണ്ടായിരുന്ന ലൈബ്രറിയിൽ 40,000 പുസ്തകങ്ങൾ ഉണ്ടായിരുന്നു എന്നാണ് പറയുന്നത്. സാംസ്കാരികമായും കലാപരമായും വളരെ ഉന്നതിയിലായിരുന്നു സ്പെയിൻ എന്നാണ് ചരിത്രം പറയുന്നത്.

സ്പെയിനിൽ ക്രിസ്റ്റ്യൻ ഭരണകൂടം നിലവിൽ വന്നതോടെ മുസ്ലിങ്ങളെയും യഹൂദരെയും നിർബന്ധിത മതപരിവർത്തനത്തിന് വിധേയമാക്കി. അല്ലാത്തവരെ മുഴുവൻ രാജ്യത്തുനിന്നും പുറത്താക്കി. എന്നാൽ ആ കാലത്ത് മതം മാറിയവർ രഹസ്യമായി അവരുടെ മതം വീട്ടിൽ പ്രാക്ടീസ് ചെയ്യുന്നു എന്ന് പറഞ്ഞ് അവരെ ശിക്ഷിക്കാൻ 1478-ൽ ആരംഭിച്ച സ്പാനിഷ് ഇൻക്വിസിഷൻ വളരെ ക്രൂരതകൾ നിറഞ്ഞതായിരുന്നു. ഇതിന്റെ പേരിൽ വിചാരണ ചെയ്ത് കത്തിച്ചുകൊന്നത് 30,000 ആളുകളെയാണ്. കൂടാതെ 1,50,000 പേരെ വിവിധ ശിക്ഷകൾക്കും വിധേയമാക്കിയെന്നാണ് പറയുന്നത്. ഇതിൽ ചരിത്രകാരന്മാർക്ക് വ്യത്യസ്ത അഭിപ്രായങ്ങളുണ്ട്. 1500 ആയപ്പോഴേക്കും ക്രിസ്റ്റ്യൻ അല്ലാത്തവരെയെല്ലാം സ്പെയിനിൽ നിന്നും നാടുകടത്തിയിരുന്നു.

കൊച്ചി: നടിയും സുഹൃത്തുക്കളും ചേർന്ന് മർദിച്ചെന്ന പരാതിയിൽ വാർത്തകളിൽ ഇടംപിടിച്ച ഡോ. ജോൺസൺ കെ. വർഗീസിന്റെ മൊബൈൽ ഫോണിൽ പന്ത്രണ്ടിലേറെ സ്ത്രീകളുടെ സ്വകാര്യ ദൃശ്യങ്ങൾ കണ്ടെത്തിയതായി പൊലീസ്. ദൃശ്യങ്ങൾ ഉപയോഗിച്ച് സ്ത്രീകളെ ഭീഷണിപ്പെടുത്തുകയോ ബ്ലാക്ക്‌മെയിൽ ചെയ്യുകയോ ചെയ്തിട്ടുണ്ടോയെന്നാണ് പൊലീസ് പരിശോധിക്കുന്നത്. നടിയുടെ ബന്ധുവിന് നേരെയുണ്ടായ ലൈംഗികാതിക്രമവുമായി ബന്ധപ്പെട്ട അന്വേഷണത്തിനിടെയാണ് ഫോണിലെ ദൃശ്യങ്ങൾ പുറത്തുവന്നത്. സംഭവത്തിൽ പരാതി നൽകിയതിനു പിന്നാലെ ഡോക്ടർ ഒളിവിൽ പോയതായാണ് പൊലീസിന്റെ നിഗമനം. ഇയാളെ കണ്ടെത്തുന്നതിനായി ലുക്കൗട്ട് സർക്കുലറും പുറപ്പെടുവിച്ചിട്ടുണ്ട്.

കുടുംബ ഡോക്ടറായ ജോൺസൺ സൗഹൃദം മുതലെടുത്ത് മദ്യം നൽകി അവശയാക്കിയ ശേഷം ഹോട്ടലിലെത്തിച്ച് പീഡിപ്പിച്ചെന്നാണ് നടിയുടെ ബന്ധുവിന്റെ പരാതി. ഒക്ടോബർ ആദ്യവാരത്തിലായിരുന്നു സംഭവം. തന്റെ സ്വകാര്യ ദൃശ്യങ്ങൾ ഡോക്ടർ പകർത്തിയിട്ടുണ്ടാകാമെന്ന ആശങ്കയിലാണ് പരാതി നൽകാൻ വൈകിയതെന്നും ബന്ധു മൊഴി നൽകിയിട്ടുണ്ട്. വിവരം അറിഞ്ഞ നടി സുഹൃത്തുക്കളുടെ സഹായത്തോടെ ഡോക്ടറെ ഫ്ലാറ്റിലേക്ക് വിളിച്ചുവരുത്തി ചോദ്യം ചെയ്യുകയും മർദിക്കുകയും ചെയ്തെന്നാണ് റിപ്പോർട്ട്. ഇതിനിടെ ഇയാളുടെ മൊബൈൽ ഫോണുകളും സംഘം കൈവശപ്പെടുത്തി. എന്നാൽ നടിയും സംഘവും പണം ആവശ്യപ്പെട്ടെന്ന ആരോപണത്തിന് ഡോക്ടർ നൽകിയ പരാതിയിലെ എഫ്ഐആറിൽ സ്ഥിരീകരണമില്ല.

ഡോക്ടറുടെ പരാതിയിൽ അറസ്റ്റിലായ നടിയെയും സുഹൃത്തുക്കളെയും കോടതി റിമാൻഡ് ചെയ്തിരുന്നു. പിന്നാലെയാണ് ബന്ധു പൊലീസിൽ പ്രത്യേക പരാതി നൽകിയത്. ഇതോടെ കേസ് ഇൻഫോപാർക്ക് പൊലീസ് ഏറ്റെടുക്കുകയായിരുന്നു. പിടിച്ചെടുത്ത ഫോൺ പൊലീസ് പരിശോധിച്ചപ്പോഴാണ് മറ്റ് സ്ത്രീകളുമായുള്ള സ്വകാര്യ ദൃശ്യങ്ങൾ കണ്ടെത്തിയത്. ഇവരിൽ ആരെങ്കിലും പരാതി നൽകുന്ന പക്ഷം തുടർനടപടികൾ സ്വീകരിക്കുമെന്ന് പൊലീസ് വൃത്തങ്ങൾ അറിയിച്ചു. അതേസമയം, അന്വേഷണം പ്രാരംഭ ഘട്ടത്തിലാണെന്നും പ്രതികൾക്ക് ജാമ്യം അനുവദിക്കുന്നത് അന്വേഷണത്തെ ബാധിക്കുമെന്നും പൊലീസ് കോടതിയെ അറിയിച്ചു. ഇതേത്തുടർന്ന് നടിയുടെയും സംഘത്തിന്റെയും ജാമ്യാപേക്ഷ എറണാകുളം ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതി തള്ളി.