കാഞ്ഞങ്ങാട്: മുംബൈ വിമാനത്താവളത്തിലെ ആ രാത്രി ഇമിഗ്രേഷൻ കൗണ്ടറിൽ നിന്നു കേട്ട വാക്കുകൾ ശ്രീനിവാസന്റെ സ്വപ്നങ്ങൾ തകർത്തെറിഞ്ഞു. പാസ്പോർട്ടിലേക്കും തന്റെ മുഖത്തേക്കും മാറിമാറി നോക്കിയ ഉദ്യോഗസ്ഥൻ ഒടുവിൽ “വിദേശത്തേക്ക് യാത്ര സാധ്യമല്ലെന്ന് പറഞ്ഞ് പാസ്പോർട്ട് പിടിച്ചുവെച്ചു നോട്ടീസ് നൽകി പുറത്തേക്ക് വിട്ടു. ദുബായിൽ ജോലി ചെയ്ത് കടങ്ങൾ വീട്ടാനും ഭാര്യയെയും രണ്ടുമക്കളെയും പ്രായമായ അമ്മയെയും നോക്കാനുമെന്ന ആഗ്രഹങ്ങളുമായി ജനുവരി 15-ന് മുംബൈയിലെത്തിയ കാഞ്ഞങ്ങാട് അരയി സ്വദേശി കൊളത്തിങ്കാൽ ഹൗസിലെ ശ്രീനിവാസൻ അന്ന് പകച്ചുനിന്നു.

പോലീസ് വെരിഫിക്കേഷനിലെ അശ്രദ്ധയാണ് ദുരന്തത്തിന് കാരണമായത്. ഒരു കിലോമീറ്റർ അകലെയായി താമസിക്കുന്ന തരംബയിൽ ഹൗസിലെ മറ്റൊരു ശ്രീനിവാസന്റെ പേരിലുള്ള സ്ഥലത്തർക്ക കേസ് തെറ്റിദ്ധാരണയായി ഇദ്ദേഹത്തിന്റെ വിലാസത്തിൽ റിപ്പോർട്ട് ചെയ്തതാണെന്ന് പിന്നീട് വ്യക്തമായി. ഇരുവരുടെയും അച്ഛന്റെ പേര് കുഞ്ഞിക്കണ്ണൻ എന്നതും ആശയക്കുഴപ്പത്തിന് ഇടയാക്കി. ഇതോടെ വിമാനടിക്കറ്റിനായി ചെലവഴിച്ച 27,000 രൂപ നഷ്ടമായി. ഹൊസ്ദുർഗ് പോലീസ് സ്റ്റേഷനിലെത്തി പരിശോധനാ റിപ്പോർട്ട് തിരുത്തിച്ചയച്ച് വീണ്ടും പാസ്പോർട്ട് ഓഫീസിൽ എത്തി രേഖകൾ ശരിയാക്കിയ ശേഷമാണ് ശ്രീനിവാസൻ ആശ്വാസം വീണ്ടെടുത്തത്.

എന്നാൽ പരീക്ഷണം അവിടെ അവസാനിച്ചില്ല. 20,000 രൂപ കൂടി നൽകി വീണ്ടും ടിക്കറ്റ് എടുത്ത് ഫെബ്രുവരി 20-ന് കണ്ണൂർ വിമാനത്താവളം വഴി യാത്ര തിരിക്കാൻ എത്തിയപ്പോഴും ഇമിഗ്രേഷൻ ക്ലിയറിങ്ങിനിടെ പാസ്പോർട്ട് വീണ്ടും തടഞ്ഞു. നേരത്തെ തിരുത്തിയ വിവരങ്ങൾ പാസ്പോർട്ട് ഓഫീസിന്റെ കമ്പ്യൂട്ടർ സംവിധാനത്തിൽ പുതുക്കാത്തതാണെന്നാണ് ലഭിച്ച വിശദീകരണം. കണ്ണീരോടെ വീട്ടിലേക്ക് മടങ്ങേണ്ടി വന്ന ശ്രീനിവാസൻ മാർച്ച് ഏഴിന് വിസാ കാലാവധി അവസാനിക്കുന്നതിനുമുമ്പ് ദുബായിലെത്താനാകുമോ എന്ന ആശങ്കയിലാണ്.

കോട്ടയം: കേരളത്തിലെ നിയമസഭാ തെരഞ്ഞെടുപ്പിൽ ശക്തമായ സാന്നിധ്യം ഉറപ്പാക്കാൻ ബിജെപി തന്ത്രങ്ങൾ വേഗത്തിലാക്കി. കേന്ദ്രമന്ത്രി ജോർജ് കുര്യൻ കാഞ്ഞിരപ്പള്ളിയിൽ പാർട്ടി സ്ഥാനാർഥിയാകുമെന്ന് സൂചന. ബിജെപി പ്രതീക്ഷയോടെ കാണുന്ന മണ്ഡലങ്ങളിൽ ഒന്നായ കാഞ്ഞിരപ്പള്ളിയിൽ കേന്ദ്രീകരിക്കാൻ കേന്ദ്ര നേതൃത്വത്തിന്റെ നിർദേശവും അദ്ദേഹത്തിന് ലഭിച്ചിട്ടുണ്ട്. ഇതോടൊപ്പം മാർച്ച് ആറിന് കൊച്ചിയിൽ എത്തുന്ന പ്രധാനമന്ത്രി നരേന്ദ്ര മോദി എൻഡിഎയുടെ പ്രകടന പത്രിക പുറത്തിറക്കി തെരഞ്ഞെടുപ്പ് പ്രചാരണത്തിന് ഔദ്യോഗിക തുടക്കം കുറിക്കുമെന്നാണ് വിവരം. മതമേലധ്യക്ഷന്മാരുമായുള്ള കൂടിക്കാഴ്ചയും അന്നത്തെ പരിപാടികളിൽ ഉൾപ്പെടും.

ഇതിനിടെ തൃശ്ശൂരിൽ പത്മജ വേണുഗോപാലും പാലക്കാട്ട് ശോഭാ സുരേന്ദ്രനും മത്സരിക്കുമെന്ന സൂചനകൾ ശക്തമാണ്. എ ഗ്രേഡ് മണ്ഡലങ്ങളായി പാർട്ടി കണക്കാക്കുന്ന തൃശ്ശൂരും പാലക്കാട്ടും ഹെവി വെയ്റ്റ് സ്ഥാനാർത്ഥികളെ ഇറക്കാനാണ് തീരുമാനം. കഴിഞ്ഞ തവണ കോൺഗ്രസ് സ്ഥാനാർത്ഥിയായി 946 വോട്ടുകൾക്ക് പരാജയപ്പെട്ട പത്മജ, ഇത്തവണ ബിജെപി ടിക്കറ്റിൽ തൃശ്ശൂരിൽ അങ്കം കുറിക്കാനൊരുങ്ങുന്നു. “പാർട്ടി ആവശ്യപ്പെട്ടാൽ സന്തോഷത്തോടെ മത്സരിക്കും” എന്നായിരുന്നു പത്മജയുടെ പ്രതികരണം.

തൃശ്ശൂരിൽ സുരേഷ് ഗോപിയുടെ പിന്തുണയും മുൻ പാർലമെന്റ് തിരഞ്ഞെടുപ്പിൽ നേടിയ മേൽക്കൈയും ബിജെപിക്ക് ആത്മവിശ്വാസം നൽകുന്നു. തദ്ദേശ തിരഞ്ഞെടുപ്പിൽ പ്രതീക്ഷിച്ച മുന്നേറ്റം നേടാനായില്ലെങ്കിലും പത്മജയുടെ വരവോടെ സാഹചര്യം മാറുമെന്നാണ് പാർട്ടി വിലയിരുത്തൽ. പാലക്കാട് മണ്ഡലത്തിൽ 2016-ൽ 40,000-ത്തിലധികം വോട്ടുകൾ നേടിയ ശോഭാ സുരേന്ദ്രനെ വീണ്ടും രംഗത്തിറക്കുന്നത് ശക്തമായ പോരാട്ടത്തിന് വഴിയൊരുക്കുമെന്ന പ്രതീക്ഷയും നേതൃത്വത്തിനുണ്ട്. വിഭാഗീയതയെന്ന വെല്ലുവിളി നിലനിൽക്കുന്നുവെങ്കിലും നിർണായക പോരാട്ടത്തിന് ബിജെപി സജ്ജമാകുകയാണ്.

തിരുവനന്തപുരം: വയനാട് മുണ്ടക്കൈ-ചൂരൽമല ഉരുൾപൊട്ടൽ ദുരിതബാധിതർക്കായി നിർമ്മിച്ച ടൗൺഷിപ്പിലെ ആദ്യഘട്ട വീടുകളുടെ ഉദ്ഘാടനം മാർച്ച് ഒന്നിലേക്ക് മാറ്റി. മുൻപ് ഫെബ്രുവരി 25-ന് വൈകിട്ട് നാല് മണിക്ക് മുഖ്യമന്ത്രി പിണറായി വിജയൻ ഗുണഭോക്താക്കൾക്ക് വീടുകൾ കൈമാറുമെന്നായിരുന്നു അറിയിപ്പ്. പൊതുഅഭിപ്രായം പരിഗണിച്ച് അവധി ദിവസമായ ഞായറാഴ്ച വൈകുന്നേരം മൂന്ന് മണിക്ക് ഉദ്ഘാടനം നടത്താനാണ് പുതിയ തീരുമാനം.

ദുരന്തത്തിൽ പൂർണമായും വീട് നഷ്ടമായ ഫേസ് ഒന്നിൽ ഉൾപ്പെട്ട 178 കുടുംബങ്ങൾക്കാണ് ആദ്യഘട്ടത്തിൽ വീടുകൾ അനുവദിക്കുന്നത്. ഉദ്ഘാടനച്ചടങ്ങിനിടെ ഗുണഭോക്താക്കൾക്ക് വീടുകളുടെ പട്ടയവും വിതരണം ചെയ്യും. തിരഞ്ഞെടുപ്പ് പ്രഖ്യാപനത്തിന് മുമ്പായി പദ്ധതി പൂർത്തിയാക്കാനായിരുന്നു സർക്കാരിന്റെ ശ്രമമെന്ന് ബന്ധപ്പെട്ടവർ അറിയിച്ചു.

കല്പറ്റയിലെ എൽസ്റ്റൺ എസ്റ്റേറ്റിൽ അഞ്ചു സോണുകളിലായി ആകെ 410 വീടുകളാണ് ടൗൺഷിപ്പിൽ നിർമിക്കുന്നത്. കഴിഞ്ഞ വർഷം മാർച്ച് 27-ന് മുഖ്യമന്ത്രി തറക്കല്ലിട്ട പദ്ധതി വേഗത്തിൽ പുരോഗമിച്ചുവരികയാണ്. ആദ്യഘട്ടത്തിൽ സോൺ ഒന്നിൽ 115 വീടുകളും, സോൺ മൂന്നിൽ 30 വീടുകളും, സോൺ നാലിൽ 33 വീടുകളും കൈമാറാൻ തയ്യാറായി; ഇതിനായുള്ള നറുക്കെടുപ്പും ഇതിനകം പൂർത്തിയാക്കിയിട്ടുണ്ട്.

കോട്ടയം കറുകച്ചാൽ പുന്നവേലി സ്വദേശിയായ ബിബിൻ തോമസ് (34) അവധിക്കായി നാട്ടിലെത്തിയ സമയത്ത് ഹൃദയാഘാതത്തെ തുടർന്ന് അന്തരിച്ചു. ജർമനിയിലെ ബെർലിൻ നഗരത്തിൽ സ്വകാര്യ റസ്റ്റോറന്റിൽ ജോലി ചെയ്തിരുന്ന ബിബിൻ, ഒരു മാസം മുൻപ് ജനിച്ച ഇളയ മകളെ കാണാനാണ് നാട്ടിലെത്തിയത്. കഴിഞ്ഞ ദിവസം വൈകിട്ട് 6.30ഓടെ മാമൂട്ടിലുള്ള ഭാര്യവീട്ടിൽ വച്ച് കുഴഞ്ഞു വീഴുകയിരുന്നു . ഉടൻ സമീപത്തെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ഹൃദയാഘാതമാണ് മരണകാരണമെന്നാണ് പ്രാഥമിക നിഗമനം.

ഒൻപത് മാസം മുൻപാണ് ബിബിൻ ജോലി ലഭിച്ച് ജർമനിയിലേയ്ക്ക് പോയത്. കുഞ്ഞ് ജനിച്ച സന്തോഷത്തിൽ ഒരു മാസത്തെ അവധി എടുത്ത് ഭാര്യ റീനയെയും മൂത്ത മകൻ റേബൽ (6)നെയും നവജാത ശിശുവിനെയും കാണാനെത്തുകയായിരുന്നു. അവധി അവസാനിച്ച് അടുത്ത ഞായറാഴ്ച മടക്കയാത്ര നിശ്ചയിച്ചിരിക്കെ ഉണ്ടായ അപ്രതീക്ഷിത വിയോഗം കുടുംബത്തെയും നാട്ടുകാരെയും ആഴത്തിലുള്ള ദുഃഖത്തിലാഴ്ത്തി. ഇളയ മകളെ കാണുകയും കുടുംബത്തോടൊപ്പം സമയം ചെലവഴിക്കുകയും ചെയ്ത സന്തോഷ നിമിഷങ്ങൾക്കിടയിലായിരുന്നു ദുരന്തം.

നെടുംകുന്നം പുന്നവേലി ഇഞ്ചപ്പാറക്കൽ തോമസ് ജോൺ–അന്നമ്മ തോമസ് ദമ്പതികളുടെ ഇളയ മകനാണ് ബിബിൻ. ബോബിൻ തോമസ് ഏക സഹോദരൻ. സംസ്കാരം ചൊവ്വാഴ്ച രാവിലെ 11ന് വീട്ടിലെ ശുശ്രൂഷകൾക്ക് ശേഷം പുന്നവേലി ലിറ്റിൽ ഫ്ലവർ സീറോ മലബാർ ചർച്ചിൽ നടക്കും. അപ്രതീക്ഷിത വേർപാടിന്റെ വേദനയിലാണ് ബന്ധുക്കളും സുഹൃത്തുക്കളും നാട്ടുകാരും.

ആര്യനാട് ∙ രണ്ടര വയസ്സുകാരി ചികിത്സപ്പിഴവിനെ തുടർന്ന് മരിച്ചതായി പരാതി. വെള്ളനാട് പുനലാൽ ചക്കിപ്പാറ ഷാനിമ മൻസിലിൽ സിദ്ദീഖ്–ഫാസില ദമ്പതികളുടെ മകൾ ഐഷ ഫാത്തിമയാണ് മരിച്ചത്. സംഭവത്തിൽ ആര്യനാട് പൊലീസ് കേസെടുത്തു. കാട്ടാക്കടയിലെ സ്വകാര്യ ആശുപത്രിയിലെ ചികിത്സയിലാണ് വീഴ്ചയുണ്ടായതെന്ന് രക്ഷിതാക്കൾ ആരോപിച്ചു.

18 ന് കുട്ടിക്ക് ശ്വാസ തടസ്സവും കൺപോളയിലെ തടിപ്പും അനുഭവപ്പെട്ടതിനെ തുടർന്ന് ആര്യനാട് ഗവ. ആശുപത്രിയിൽ ചികിത്സ തേടി. ശിശുരോഗ വിദഗ്ധനെ കാണിക്കാനായി 19ന് കാട്ടാക്കടയിലെ സ്വകാര്യ ആശുപത്രിയിൽ എത്തിച്ചപ്പോൾ വസ്ത്രങ്ങളാൽ ഉണ്ടായ അലർജിയാണെന്നായിരുന്നു ഡോക്ടറുടെ നിഗമനം. തുടർന്ന് കണ്ണാശുപത്രിയിൽ കാണിക്കാനെന്ന നിർദേശപ്രകാരം 20ന് സ്വകാര്യ കണ്ണാശുപത്രിയിലും ചികിത്സ തേടി. ഇന്നലെ ഉച്ചയ്ക്ക് 11ഓടെ വീട്ടിൽ വച്ച് കുഞ്ഞിന് വീണ്ടും അസ്വസ്ഥത അനുഭവപ്പെട്ടതോടെ കാട്ടാക്കടയിലെ സ്വകാര്യ ആശുപത്രിയിൽ എത്തിച്ചെങ്കിലും ശിശുരോഗ വിദഗ്ധൻ അവധിയിലായിരുന്നു; മറ്റൊരു ഡോക്ടറാണ് പരിശോധിച്ചത്.

ഓക്സിജൻ നൽകിയശേഷം കുട്ടിക്ക് രണ്ട് കുത്തിവയ്പുകൾ നൽകിയതോടെ ഹൃദയമിടിപ്പ് കൂടുകയും ആരോഗ്യനില വഷളാകുകയും ചെയ്തതായി ബന്ധുക്കൾ പറയുന്നു. തുടർന്ന് ആശുപത്രിയിലെ രണ്ട് ഡോക്ടർമാരും സിദ്ദീഖിന്റെ മാതാവ് ജുനൈദാ ബീവിയും ചേർന്ന് ആംബുലൻസിൽ കുട്ടിയെ മറ്റൊരു സ്വകാര്യ ആശുപത്രിയിലെ കാഷ്വൽറ്റിയിൽ എത്തിച്ചെങ്കിലും രക്ഷിക്കാനായില്ല. ഇരട്ടക്കുട്ടികളിലൊരാളായ ഐഷയ്ക്ക് ജീവൻരക്ഷാ മരുന്നുകളാണ് നൽകിയതെന്നും ആരോഗ്യനില മോശമായതിനെ തുടർന്നാണ് മറ്റൊരു ആശുപത്രിയിലേക്ക് മാറ്റാൻ നിർദേശിച്ചതെന്നും ബന്ധപ്പെട്ട ആശുപത്രി അധികൃതർ വ്യക്തമാക്കി. പൊലീസ് സിദ്ദീഖിന്റെ മൊഴിയെടുത്ത് അന്വേഷണം ആരംഭിച്ചിട്ടുണ്ട്.

തിരുവനന്തപുരം: ചെങ്കോട്ടുകോണം തുണ്ടത്തിൽ പ്രവർത്തിക്കുന്ന ട്രിവാൻഡ്രം സ്കോട്ടിഷ് സ്കൂളിൽ ഉണ്ടായ തീപിടിത്തത്തിൽ മൂന്ന് സ്കൂൾ ബസുകൾ പൂർണമായും കത്തിനശിച്ചു. സ്കൂൾ ഗ്രൗണ്ടിൽ പാർക്ക് ചെയ്തിരുന്ന ബസുകളിലാണ് പുലർച്ചെ മൂന്ന് മണിയോടെയുണ്ടായ തീപിടിത്തം. ഒരു ബസ് ഭാഗികമായും തീപിടിത്തത്തിൽ കേടുപാടുകൾക്ക് വിധേയമായി.

തീ ആളിക്കത്തുന്നത് ശ്രദ്ധയിൽപ്പെട്ട നാട്ടുകാരാണ് ഫയർഫോഴ്സിനെ വിവരം അറിയിച്ചത്. തുടർന്ന് സ്ഥലത്തെത്തിയ അഗ്നിശമന സേന തീയണച്ചു. സംഭവസമയത്ത് സ്കൂൾ പരിസരത്ത് ഒരു സുരക്ഷാ ജീവനക്കാരൻ മാത്രമാണ് ഉണ്ടായിരുന്നതെന്ന് വിവരം.

തീപിടിത്തത്തിന് കാരണമായ സാഹചര്യങ്ങൾ ഇതുവരെ വ്യക്തമായിട്ടില്ല. സിസിടിവി ദൃശ്യങ്ങൾ ഉൾപ്പെടെ പരിശോധിച്ച് പൊലീസ് അന്വേഷണം ആരംഭിച്ചിട്ടുണ്ട്.

ഈസ്റ്റ് ആംഗ്ലിയയിലെ പ്രമുഖ മലയാളി സംഘടനയായ ഹേവർഹിൽ മലയാളി അസോസിയേഷൻ (HMA) സംഘടിപ്പിച്ച അഖില യുകെ ബാഡ്മിന്റൺ ടൂർണമെന്റ് ലിന്റൺ വില്ലേജ് ഹാളിൽ വിജയകരമായി പൂർത്തിയായി . യുകെയിലെ വിവിധ ഭാഗങ്ങളിൽ നിന്ന് എത്തിയ 28 തെരഞ്ഞെടുത്ത ടീമുകൾ ഈ ആവേശകരമായ കായികമേളയിൽ പങ്കെടുത്തു.

രാവിലെ 9 മണിക്ക് ആരംഭിച്ച മത്സരങ്ങൾ വൈകുന്നേരം 4 മണിയോടെ സമാപിച്ചു. ദിനം മുഴുവൻ നീണ്ടുനിന്ന മത്സരങ്ങളിൽ മികച്ച കായികമികവും സൗഹൃദപരമായ മത്സരാത്മകതയും നിറഞ്ഞുനിന്നു. പങ്കെടുത്ത എല്ലാ ടീമുകളും മികച്ച പ്രകടനം കാഴ്ചവെച്ചതായി സംഘാടകർ അറിയിച്ചു.

വിജയികൾ
ഒന്നാം സ്ഥാനം – മാത്യൂസ് റോയ് & ബെസ്റ്റിൻ ജോസഫ് (നോട്ടിംഗ്ഹാം)
ഫസ്റ്റ് റണ്ണർ അപ്പ് – ജെർമി കുര്യൻ ജോർജ് (ബർമിംഗ്ഹാം) & കിൻലി ബിക്കു (ഹണ്ടിംഗ്ടൺ)
സെക്കൻഡ് റണ്ണർ അപ്പ് – ഏബി ജോസ് & നിതിൻ ജോസ് (സ്റ്റ്രാറ്റ്ഫോർഡ്, ലണ്ടൻ)
വിജയികളായ ടീമുകൾക്ക് ട്രോഫികളും ക്യാഷ് അവാർഡുകളും സമ്മാനിച്ചു.
യുകെയുടെ വിവിധ ഭാഗങ്ങളിൽ നിന്ന് എത്തിയ എല്ലാ പങ്കാളികൾക്കും HMA ഹൃദയപൂർവ്വം നന്ദി അറിയിച്ചു. സമൂഹ ഐക്യവും ആരോഗ്യകരമായ കായിക മത്സരാത്മകതയും വളർത്തുകയാണ് ടൂർണമെന്റിന്റെ പ്രധാന ലക്ഷ്യമെന്ന് സംഘാടകർ വ്യക്തമാക്കി.

പരിപാടിയുടെ സംഘാടകർ

ശ്രീ. റിജു സാമുവൽ
റോസിൻ ജോർജ്
ശ്രീ. ജെറിൽ ജോൺ
ശ്രീ. സിജോ ജോർജ്
ശ്രീ. സാൻ ജോസഫ്
ശ്രീ. പ്രവീൺ ജോസ്
വിഷ്ണു മോഹൻ

സന്നദ്ധ പ്രവർത്തകർ

പ്രിൻസ് ജേക്കബ്, സൈജു ജോസഫ് എബ്രഹാം ലൂക്കോസ്, അനീവ്, ഉജ്ജ്വൽ, , ക്രിസ്റ്റിൻ, സിൻസൺ, ജോസ് എന്നിവർ ഉൾപ്പെടെയുള്ള സന്നദ്ധ പ്രവർത്തകരുടെ സേവനവും ടൂർണമെന്റിന്റെ വിജയത്തിന് വലിയ കരുത്തായി.

സ്പോൺസർമാരുടെയും സമൂഹാംഗങ്ങളുടെയും പിന്തുണയ്ക്ക് HMA നന്ദി രേഖപ്പെടുത്തി. ഭാവിയിലും ഇത്തരത്തിലുള്ള കായിക–സാംസ്കാരിക പരിപാടികൾ സംഘടിപ്പിക്കുമെന്ന് ഭാരവാഹികൾ അറിയിച്ചു.

ആലപ്പുഴ വണ്ടാനം മെഡിക്കൽ കോളേജിൽ രോഗിയുടെ വയറ്റിൽ കത്രിക കുടുങ്ങിയ സംഭവത്തിൽ ഡോ. ജെ ഷാഹിദയെ പ്രതിചേർക്കാൻ പൊലീസ് തീരുമാനമെടുത്തു. ശസ്ത്രക്രിയ നിർവഹിച്ചത് ഡോ. ഷാഹിദയാണെന്ന് അന്വേഷണത്തിൽ വ്യക്തമായി.

ഡോ. ഉഷ ജോസഫിന്റെ ചികിത്സാരേഖകൾ പൊലീസ് ശേഖരിച്ചപ്പോൾ ശസ്ത്രക്രിയ സംഘത്തിൽ ഒൻപത് പേർ ഉണ്ടായിരുന്നുവെന്ന് കണ്ടെത്തി. ഇവരുടെ മൊഴി രേഖപ്പെടുത്തുന്നതിനൊപ്പം അന്വേഷണത്തിന് മെഡിക്കൽ ബോർഡ് രൂപീകരിക്കാൻ ഡിഎംഒയ്ക്ക് അപേക്ഷ നൽകും.

ശസ്ത്രക്രിയയിലൂടെ പുറത്തെടുത്ത ഏഴ് സെന്റിമീറ്റർ നീളമുള്ള കത്രിക ശാസ്ത്രീയ പരിശോധനയ്ക്ക് അയക്കും. കത്രികയുടെ കാലപ്പഴക്കം നിർണായകമാണെന്ന് വിലയിരുത്തുമ്പോൾ, ഉഷയുടെ ആരോഗ്യനില നിലവിൽ തൃപ്തികരമായി തുടരുന്നു; സ്വകാര്യ ആശുപത്രിയിലെ ഐസിയുവിൽ നിരീക്ഷണത്തിലാണ്.

തിരുവനന്തപുരം: സംസ്ഥാനത്തെ സ്പെഷ്യൽ ഇൻറൻസീവ് റിവിഷൻ (എസ്ഐആർ) നടപടികളുടെ ഭാഗമായി കേരളത്തിലെ അന്തിമ വോട്ടർ പട്ടിക പ്രസിദ്ധീകരിച്ചു. 2.69 കോടി വോട്ടർമാരാണ് പട്ടികയിൽ ഉൾപ്പെട്ടിരിക്കുന്നത്. പരിശോധനകളുടെ അടിസ്ഥാനത്തിൽ കൃത്യമായി 8,97,211 പേർ പട്ടികയിൽ നിന്ന് പുറത്തായതായി അധികൃതർ അറിയിച്ചു. അതേസമയം, നിയമസഭാ തെരഞ്ഞെടുപ്പിനുള്ള നാമനിർദേശ പത്രിക സമർപ്പിക്കുന്ന അവസാന ദിവസം വരെ വോട്ടർ പട്ടികയിൽ പേര് ചേർക്കാൻ അവസരമുണ്ടെന്ന് തെരഞ്ഞെടുപ്പ് കമ്മീഷൻ വ്യക്തമാക്കി.

വോട്ടർ പട്ടികയിൽ പേരുണ്ടോ എന്ന് അറിയാൻ [https://electoralsearch.eci.gov.in/](https://electoralsearch.eci.gov.in/) എന്ന വെബ്‌സൈറ്റിൽ വോട്ടർ ഐഡി നമ്പർ, പേര്, ബന്ധുവിന്റെ പേര്, ജനന തീയതി/വയസ്, മൊബൈൽ നമ്പർ തുടങ്ങിയ വിവരങ്ങൾ ഉപയോഗിച്ച് പരിശോധിക്കാം. കൂടാതെ മുഖ്യ തെരഞ്ഞെടുപ്പ് ഓഫീസറുടെ ഔദ്യോഗിക വെബ്‌സൈറ്റായ [https://www.ceo.kerala.gov.in/](https://www.ceo.kerala.gov.in/) ൽ നൽകിയിരിക്കുന്ന “Kerala SIR Final Electoral Roll 2026” ലിങ്ക് വഴിയോ [https://voters.eci.gov.in/download](https://voters.eci.gov.in/download) eroll?stateCode=511 എന്ന പോർട്ടൽ വഴിയോ ബൂത്ത് തല വോട്ടർ പട്ടിക പരിശോധിക്കാനും സൗകര്യമുണ്ട്.

ഇതിനിടെ, വോട്ടർ പട്ടിക പരിഷ്‌കരണ നടപടികൾ രാജ്യവ്യാപകമായി നടപ്പിലാക്കാൻ കേന്ദ്ര തെരഞ്ഞെടുപ്പ് കമ്മീഷൻ തീരുമാനിച്ചിട്ടുണ്ട്. വിവിധ സംസ്ഥാനങ്ങളിലെയും കേന്ദ്രഭരണ പ്രദേശങ്ങളിലെയും തെരഞ്ഞെടുപ്പ് ഓഫീസർമാർക്ക് ആവശ്യമായ തയ്യാറെടുപ്പുകൾ പൂർത്തിയാക്കാൻ നിർദ്ദേശം നൽകി. ഏപ്രിൽ മാസത്തോടെ 22 ഇടങ്ങളിൽ പദ്ധതിയുടെ പ്രവർത്തനങ്ങൾ ആരംഭിക്കാനാണ് തീരുമാനം. തെരഞ്ഞെടുപ്പ് പ്രക്രിയ കൂടുതൽ കാര്യക്ഷമവും സുതാര്യവുമാക്കുന്നതിന്റെ ഭാഗമായാണ് ഈ നടപടിയെന്ന് കമ്മീഷൻ വ്യക്തമാക്കുന്നു.

ബിനോയ് എം. ജെ.

സ്വപ്നങ്ങൾ എന്നും മധുരിക്കുന്നവയാണ്. നമ്മുടെ മനസ്സ് സദാ ജോലി ചെയ്തു കൊണ്ടിരിക്കുന്നു. മനസ്സ് വെറുതെ ഇരിക്കുന്നില്ല. വെറുതെ ഇരിക്കേണ്ട ആവശ്യവുമില്ല. ഭാവാത്മകമായ സ്വപ്നങ്ങൾ ജീവിതത്തിന് മാറ്റു കൂട്ടുന്നു. അതേസമയം നിഷേധമായ സ്വപ്നങ്ങൾ അത്ര മധുരിക്കുന്നില്ല. അവ ഒരു ശാപം പോലെ നമ്മുടെ മനസ്സിനെ വരിഞ്ഞു മുറുക്കുന്നു. ജീവിതത്തെ കുറിച്ചുള്ള നിഷേധാത്മകമായ സംഗതികൾ എല്ലാം സ്വപ്നങ്ങൾ തന്നെയാണ്. അവ യാഥാർത്ഥ്യങ്ങൾ ആണെന്ന് നാം പറയുന്നു പക്ഷേ വാസ്തവത്തിൽ അത് അങ്ങനെയല്ല. ദുഃഖവും നിരാശയും ഉത്കണ്ഠയുമെല്ലാം മനസ്സിന്റെ സൃഷ്ടികൾ തന്നെ. അവ മനസ്സിന്റെ സൃഷ്ടിയാണെങ്കിൽ അവ സ്വപ്നവുമാണെന്ന് സമ്മതിക്കേണ്ടി

വരും. നമ്മുടെ ജീവിതം തന്നെ മനസ്സിന്റെ സൃഷ്ടിയാണ്. എല്ലാം മായാജാലങ്ങൾ. നാം യാഥാർത്ഥ്യങ്ങൾ എന്ന മുദ്രയടിച്ചിട്ടുള്ള സംഗതികൾ ഒന്നും തന്നെ യാഥാർത്ഥ്യങ്ങൾ അല്ല. അപമാനവും പണനഷ്ടവും ക്ലേശങ്ങളും എല്ലാം മനസ്സിന്റെ സൃഷ്ടികൾ മാത്രം. ഇതുപോലെ ഭാവാത്കമായ സ്വപ്നങ്ങളും മനസ്സ് നെയ്തു കൂട്ടാറുണ്ട്. വിജയവും ഐശ്വര്യവും സന്തോഷവും എല്ലാം മനസ്സിന്റെ സ്വപ്നങ്ങൾ മാത്രം. ഈ കാണുന്ന ജഗത്തും മനസ്സിന്റെ സ്വപ്നം തന്നെയാണ്. ജീവിതം ഒരു സ്വപ്നാടനമാണ്. ഈ വീക്ഷണ കോണത്തിനിടെ നോക്കുമ്പോൾ ജീവിതം അത്യന്തം മധുരമാണെന്ന് കാണാം. നിഷേധാത്മകസ്വപ്നങ്ങൾ വരാതിരുന്നാൽ ഈ ഭൂമി സ്വർഗ്ഗം പോലെ അനുഭവപ്പെടും. നാം നിഷേധാത്മക ചിന്തയെ

യാഥാർത്ഥ്യങ്ങൾ എന്ന് വിളിക്കാതിരുന്നാൽ അവ വളരെ വേഗം തിരോഭവിച്ചു കൊള്ളും. അവയെ നാം യാഥാർത്ഥ്യങ്ങൾ എന്ന് വിളിച്ചാൽ അവ ഒരുകാലത്തും നമ്മെ വിട്ടുപിരിയുകയില്ല. നാം ഈ കാണുന്നവയൊന്നും യാഥാർത്ഥ്യമല്ല. അവ ഘനീഭവിച്ച സ്വപ്നങ്ങൾ മാത്രമാണ്. നാം ജീവിതത്തിൽ പ്രേമത്തോടെ നോക്കിക്കാണുന്നത് ഒന്നും യാഥാർത്ഥ്യങ്ങൾ അല്ല. എല്ലാം സ്വപ്നാടനങ്ങളാണ്. ഇപ്രകാരം ഒരു സ്വപ്നാടനത്തിലൂടെ കടന്നുപോകുന്നത് ഒരു നല്ല കാര്യമല്ലേ? അത് അത്യുത്തമം തന്നെ.

ഇങ്ങനെ നോക്കുമ്പോൾ ജീവിതത്തിൽ നിന്നും ക്ലേശങ്ങൾ കൊഴിഞ്ഞു പോകുന്നു. മാറാത്തതായി യാതൊന്നുമില്ല. മനസ്സിനെ ട്യൂൺ ചെയ്യുന്നതിനൊപ്പം അവ മാറി മറിഞ്ഞുകൊള്ളും. ഈ ജഗദ് നമ്മുടെ മനസ്സിന്റെ നിയന്ത്രണത്തിലാണ് കിടക്കുന്നത്. മനസ്സ് മാറുന്നതിനൊപ്പം അവയും മാറിമറിഞ്ഞു കൊള്ളും. മനസ്സിനെ നിയന്ത്രിക്കുന്ന നിങ്ങൾ തന്നെയാണ് സാക്ഷാൽ ഈശ്വരൻ. ഈശ്വരൻ മാത്രമേ യാഥാർഥ്യമായിട്ടുള്ളൂ. അതാണ് പരമമായ യാഥാർത്ഥ്യം! ബാക്കിയുള്ളവയെല്ലാം മനസ്സിന്റെ സൃഷ്ടികൾ. വാസ്തവത്തിൽ ഇങ്ങനെ ഒരു ജഗത് അവിടെയില്ല. അത് മനസ്സിന്റെ സൃഷ്ടി മാത്രം. ഇപ്രകാരം മനസ്സിനെ നിയന്ത്രിച്ചുകൊണ്ട് ഇപ്രബഞ്ചത്തെ മുഴുവൻ നമ്മുടെ വരുതിയിൽ നിർത്തുവാൻ നമുക്ക് കഴിയും. പിന്നീട് അങ്ങോട്ട് ക്ലേശങ്ങൾ ഇല്ല, പരാജയങ്ങൾ ഇല്ല, അധമ വികാരങ്ങൾ ഇല്ല. അനന്തമായ ആസ്വാദനം മാത്രം. സ്വപ്നങ്ങൾ

എന്തിനു വേണ്ടി ഉണ്ടാകുന്നു. അത് നമുക്ക് ആസ്വദിക്കാൻ വേണ്ടി ആണെന്ന് പറയുന്നതിൽ തെറ്റുണ്ടെന്ന് തോന്നുന്നില്ല. സ്വപ്നങ്ങളെ പിടിച്ച് യാഥാർത്ഥ്യങ്ങൾ ആക്കിയാൽ നമ്മുടെ ജീവിതത്തിൽ നിന്നും ആസ്വാദനം തിരോഭവിക്കുന്നു. പിന്നീട് അവിടെ മുറുമ്മലുംപല്ല് കടിയുമേ ഉണ്ടാവൂ. ബാഹ്യപ്രപഞ്ചം യാഥാർത്ഥ്യമാണെന്നുള്ള പശ്ചാത്യരുടെ വാദം സർവ്വനാശത്തിലേ അവസാനിക്കൂ. ഈ കാണുന്നതെല്ലാം യാഥാർത്ഥ്യമാണെങ്കിൽ പിന്നെ എവിടെയാണ് ശാന്തിക്ക് സ്ഥാനം? അതോടൊപ്പം ഇവയെല്ലാം തന്നെ നമ്മുടെ നിയന്ത്രണത്തിൽ നിന്ന് വിട്ടു പോകുന്നു. ഒടുവിൽ മനുഷ്യൻ ഒരു പുഴുവായി അധ:പ്പതിക്കുന്നു. മനുഷ്യൻ നേരിടുന്ന മിക്കവാറും എല്ലാ പ്രശ്നങ്ങളുടെയും കാരണം തെറ്റായ ഈ കാഴ്ചപ്പാടാണ്. അതിനാൽ ജീവിതം

ആസ്വദിക്കണമെന്ന് ആഗ്രഹമുള്ളവർ സ്വയം തിരുത്തട്ടെ! ജീവിതത്തിൽ വിജയിക്കണമെന്ന് ആഗ്രഹമുള്ളവർ സ്വയം തിരുത്തട്ടെ! ദൃഢ നിശ്ചയത്തോടുകൂടി പരിശ്രമിച്ചാൽ ഈ ജഗത്ത് മുഴുവൻ നമ്മുടെ വരുതിയിൽ നിൽക്കും. ഇതിനെ സർവ്വാധിപത്യം എന്ന് തത്വചിന്തയിൽ വിളിക്കുന്നു. സർവ്വാധിപത്യത്തിലേക്ക് വരുന്ന ഒരാൾ ഈശ്വരനുമായി താദാത്മ്യം പ്രാപിക്കുന്നു. അയാൾ ഈശ്വരനായിക്കഴിഞ്ഞു. ഇതാകുന്നു പരമമായ ആദർശം.

ബിനോയ് എം.ജെ.
30 വർഷങ്ങളായി തത്വചിന്ത പഠിക്കുകയും 20 വർഷങ്ങളായി സാധന ചെയ്യുകയും ചെയ്യുന്നു . 28-മത്തെ വയസ്സിൽ ഔപചാരിക വിദ്യാഭ്യാസം ഉപേക്ഷിച്ചു. മാതാ അമൃതാനന്ദമയിയുടെയും സദ്ഗുരു ജഗ്ഗി വാസുദേവൻെറയും ശിഷ്യനാണ്.

ഫോൺ നമ്പർ: 917034106120