പെനാർത്ത് (കാർഡിഫ് ): യുക്മ ദേശീയ കലാമേളയുടെ മുന്നോടിയായി ഒക്ടോബർ 10ന് കാർഡിഫിലെ പെനാർത്തിൽ വച്ച് നടത്തപ്പെട്ട യുക്മ വെയിൽസ് റീജിയൻ ആപ്റ്റസ് ലീഗൽ കലാമേള 2026ൽ ന്യൂപോർട്ട് കേരള കമ്മ്യൂണിറ്റി 181 പോയിന്റ് നേടി ചാമ്പ്യൻ പട്ടം നിലനിർത്തി. മെർത്ഥർ മലയാളി കൾച്ചറൽ അസോസിയേഷൻ രണ്ടാം സ്ഥാനം നേടിയപ്പോൾ മലയാളി വെൽഫെയർ അസോസിയേഷൻ ബാരി മൂന്നാം സ്ഥാനം നേടി. കലാതിലകം എൻ കെ സി യിലെ നിവേദ്യ മനീഷ് നായറും കലാപ്രതിഭ എം എം സി എ യിലെ ഗർഷോം നോബിളും കരസ്ഥമാക്കി. നാട്യമയൂരം ന്യൂപോർട്ടിലെ ദേവതീർത്ത രാജ് ഉം ദേവിപ്രഭ സുരേന്ദ്രനും ഒരുമിച്ചു പങ്കിട്ടു. ഭാഷാകേസരി മെർത്തറിലെ അലോന മേരി അനിലും കരസ്ഥമാക്കി.

രാവിലെ 9 മണിക്ക് തുടങ്ങിയ രെജിസ്ട്രേഷനു ശേഷം 10 മണിക്ക് തുടങ്ങിയ കലാമേള വൈകുന്നേരം 5 മണി വരെ തുടർച്ചയായി മൂന്ന് സ്റ്റേജുകളിൽ നൃത്തം, സംഗീതം, സാഹിത്യം, അഭിനയം തുടങ്ങിയവ അരങ്ങേറി. ഈ വർഷത്തെ കലാമേള സെന്റ് സൈറീസ് സ്കൂൾ, പെനാർത്തിൽ വച്ചാണ് നടത്തപ്പെട്ടത്. വെയിൽസ് റീജിയന്റെ നേതൃത്വത്തിൽ നടത്തപ്പെട്ട കലാമേളക്ക് ആതിഥേയത്വം നൽകിയത് കാർഡിഫ് മലയാളി അസോസിയേഷൻ ആണ്. ഈ വർഷത്തെ കലാമേളക്ക് അഞ്ചു മണിക്കൂർ യാത്ര ചെയ്തു നോർത്ത് വെയിൽസിലെ ലാൻഡ്ഡ്‌നോയിൽ നിന്നും കലയെ സ്നേഹിക്കുന്ന ഒരു നല്ല പറ്റം ആൾകാർ വെയിൽസിന്റെ തലസ്ഥാനമായ കാർഡിഫിലേക്ക് വന്നിരുന്നു.

കലാമേളയുടെ ഉത്‌ഘാടനം ഉച്ചക്ക് 12 മണിക്ക് വെയിൽസ് റീജിയൻ പ്രസിഡന്റ് ശ്രീ ജോഷി തോമസിന്റെ അധ്യക്ഷതയിൽ നടന്നു. മുഖ്യാതിഥിയായി യുക്മ ദേശിയ ട്രഷറർ ശ്രീ ഷീജോ വർഗീസ് സന്നിഹിതനായിരുന്നു. ഉത്‌ഘാടനം പെനാർത്ത് ടൗൺ മേയർ, കൗൺസിലർ ലോറ റോച്ചഫോട് നടത്തിയപ്പോൾ പ്രത്യേക അതിഥികളായി വന്നത് ബാരി സിറ്റി മേയർ കൗൺസിലർ ഷാൻ തോമസ്, യുക്മ ദേശീയ ജോയിന്റ് ട്രഷറർ ശ്രീ പീറ്റർ താണോലി, യുക്മ ദേശീയ ജോയിന്റ് സെക്രട്ടറി ശ്രീമതി റെയ്‌മോൾ നിധിരി, യുക്മ സൗത്ത് വെസ്റ്റ് റീജിയണൽ പ്രസിഡന്റ് ശ്രീ സുനിൽ ജോർജ് എന്നിവരാണ്. ഉൽഘാടന സമ്മേളനത്തിൽ യുക്മ ദേശീയ കമ്മിറ്റി അംഗം ശ്രീ ബെന്നി അഗസ്റ്റിൻ, റീജിയണൽ സെക്രട്ടറി ശ്രീമതി ഷൈലി തോമസ്, കലാമേള കോഓർഡിനേറ്റർ ശ്രീ ജോബി മാത്യു, റീജിയണൽ ട്രഷറർ റ്റോമ്പിൽ കണ്ണത്ത്, യുക്മ സാംസ്‌കാരിക വേദി ജനറൽ കൺവീനർ ശ്രീ ബിനോ ആന്റണി, ആതിഥേയത്വം വഹിച്ച കാർഡിഫ് മലയാളി അസോസിയേഷൻ പ്രസിഡന്റ് ശ്രീ ബിജു പോൾ, യുക്മ സൗത്ത് വെസ്റ്റ് റീജിയൻ സെക്രട്ടറി ശ്രീ ജോബി തോമസ്, സ്പോർട്സ് സെക്രട്ടറി സാജു സലിംകുട്ടി, റീജിയണൽ പി ആർ ഓ റിയോ ജോണി എന്നിവർ സന്നിഹിതരായിരുന്നു. സമ്മേളനത്തിൽ മുഖ്യ പ്രഭാഷണം ശ്രീ ഷീജോ വര്ഗീസ് നടത്തിയപ്പോൾ, മറ്റ് അതിഥികൾ ആശംസകൾ അർപ്പിച്ചു. സെക്രട്ടറി ഷൈലി തോമസ് സ്വാഗതവും , കലാമേള കോഓർഡിനേറ്റർ ശ്രീ ജോബി മാത്യു നന്ദിയും അർപ്പിച്ചു.

കലാമേളക്ക് കൂടുതൽ മാറ്റ് കൂട്ടുന്നതിന്റെ ഭാഗമായി യുക്മ ദേശീയ പ്രസിഡന്റ് അഡ്വ. എബി സെബാസ്റ്റ്യൻ കലാമേള നഗറിൽ വൈകുന്നേരം 4 മണിയോടെ എത്തി. സമാപന സമ്മേളനത്തിൽ മുഖ്യാതിഥികളായി അഡ്വ. എബി സെബാസ്റ്റ്യൻ, യുക്മ ദേശീയ ജോയിന്റ് സെക്രട്ടറിമാരായ ശ്രീ സണ്ണിമോൻ മത്തായി, ശ്രീമതി റെയ്‌മോൾ നിധിരി എന്നിവർ സന്നിഹിതരായിരുന്നു.

വെയിൽസിലെ മലയാളി സമൂഹത്തിന് ഒരുമയുടെയും കലാസ്നേഹത്തിന്റെയും ഉത്സവമായി മാറിയ റീജിയണൽ കലാമേള 2026-നെ വിജയിപ്പിക്കാൻ സഹായിച്ച എല്ലാ മലയാളി കുടുംബങ്ങളെയും സംഘാടകരായ യുക്മ വെയിൽസ് റീജിയൻ അഭിനന്ദിച്ചു. ഈ വർഷത്തെ യുക്മ വെയിൽസ് റീജിയൻ കലാമേളക്ക് സാമ്പത്തിക സഹായം തന്നിരുന്നത് ടൈറ്റിൽ സ്പോൺസർ ആയ അപ്റ്റസ് ലീഗൽ, മറ്റ് സ്പോൺസർമാരായ ലൈഫ് ലൈൻ പ്രൊട്ടക്ട്, യുക്മ ന്യൂസ്, ജെ എം പി സോഫ്റ്റ്‌വെയർ, ബെല്ലവിസ്റ്റ ഗ്രൂപ്പ്, ചിക്കിങ്സ് ന്യൂപോർട്, ജിയാ ട്രാവൽ & ഹോളിഡേയ്‌സ്, എൽ ടി സി ഗ്ലോബൽ ലിവർപൂൾ , മല്ലു ഷോപ്പ് കാർഡിഫ്, ഗ്രാബി ബ്രിഡ്ജ്ണ്ട് എന്നിവരാണ്. ഈ സ്പോൺസർമാരുടെ സഹായത്തിന് നന്ദി സൂചകമായി എല്ലാവർക്കും യുക്മ റീജിയണൽ കമ്മിറ്റി പ്രത്യേക ഉപകാരം നൽകി അഭിനന്ദനം അർപ്പിച്ചു.

കാനഡയിൽ താമസിക്കുന്ന ഇന്ത്യൻ വംശജനായ അഞ്ചുവയസ്സുകാരൻ അർജുൻ പ്രജാപതി വായിച്ചുതീർത്തത് 3,000-ത്തിലധികം പുസ്തകങ്ങൾ. വെറും 18 മാസം പ്രായമുള്ളപ്പോൾ തന്നെ വായന ആരംഭിച്ച അർജുന്റെ അസാധാരണ ബുദ്ധിശേഷിയും പഠനമികവും ലോകശ്രദ്ധ നേടുകയാണ്. ഗണിതം, ജ്യോതിശാസ്ത്രം, ജനിതകശാസ്ത്രം, മനുഷ്യശരീരത്തിന്റെ പ്രവർത്തനം, സൂക്ഷ്മജീവശാസ്ത്രം തുടങ്ങി നിരവധി വിഷയങ്ങളിലാണ് ഈ കൊച്ചുമിടുക്കന് താൽപര്യം. പ്രായത്തെ വെല്ലുന്ന അറിവും ജിജ്ഞാസയുമാണ് അർജുനെ മറ്റു കുട്ടികളിൽനിന്ന് വ്യത്യസ്തനാക്കുന്നത്.

2026 ജൂണിൽ നടത്തിയ സ്റ്റാൻഫഡ്–ബിനെ ഇന്റലിജൻസ് പരിശോധനയിൽ അർജുന് 141 ഐക്യു സ്കോർ ലഭിച്ചതായാണ് റിപ്പോർട്ട്. ഇതോടെ ഉയർന്ന ബുദ്ധിശേഷിയുള്ളവരുടെ സംഘടനകളായ മെൻസയിലും ഇന്റർടെലിലും അംഗത്വം നേടാനും അർജുന് സാധിച്ചു. ഗണിതത്തിലെ സങ്കീർണമായ ആശയങ്ങൾ മനസ്സിലാക്കുന്നതിനൊപ്പം സംഖ്യകളുടെ പാറ്റേണുകൾ തിരിച്ചറിയാനും അഞ്ചാം ക്ലാസ് നിലവാരത്തിലുള്ള ഗണിതവിഷയങ്ങൾ പഠിക്കാനും അർജുന് കഴിയുന്നു. ശാസ്ത്രലോകത്തെ പ്രമുഖരായ ആൽബർട്ട് ഐൻസ്റ്റീനും സർ ഐസക് ന്യൂട്ടനുമാണ് ഇഷ്ടശാസ്ത്രജ്ഞർ. അർജുന്റെ നേട്ടത്തിൽ കാനഡ പ്രധാനമന്ത്രി മാർക്ക് കാർണിയും ഒന്റാറിയോ പ്രീമിയർ ഡഗ് ഫോർഡും അഭിനന്ദനം അറിയിച്ചിട്ടുണ്ട്.

അർജുന്റെ പിതാവ് ഡോ. വിശാൽ പ്രജാപതി ക്ലിനിക്കൽ ഗവേഷകനും മാതാവ് മഹിത അഭിഭാഷകയുമാണ്. കുട്ടിയുടെ സ്വാഭാവികമായ ജിജ്ഞാസയെ പ്രോത്സാഹിപ്പിക്കുക എന്നതാണ് തങ്ങളുടെ വളർത്തൽരീതിയെന്ന് മാതാപിതാക്കൾ പറയുന്നു. പഠനത്തിന് അമിത സമ്മർദം നൽകുന്നതിനുപകരം താൽപര്യമുള്ള വിഷയങ്ങൾ സ്വയം കണ്ടെത്താനും പഠിക്കാനും അവസരം നൽകുകയാണ് ചെയ്യുന്നത്. വായനയിലും ശാസ്ത്രപഠനത്തിലും മികവ് പുലർത്തുന്ന അർജുൻ സഹോദരിക്കൊപ്പം കളിക്കാനും ചിത്രരചനയ്ക്കും സംഗീതം ആസ്വദിക്കാനും സമയം കണ്ടെത്തുന്നുണ്ട്. ഒക്ടോബർ 29ന് ഒന്റാറിയോ പ്രവിശ്യാ നിയമസഭയായ ക്വീൻസ് പാർക്കിൽ അർജുനെ പ്രത്യേകമായി ആദരിക്കാൻ ക്ഷണിച്ചിട്ടുണ്ടെന്നും റിപ്പോർട്ടുകൾ വ്യക്തമാക്കുന്നു.

തന്റേതെന്ന പേരിൽ സമൂഹമാധ്യമങ്ങളിൽ പ്രചരിക്കുന്ന എഐ നിർമിത വ്യാജ അശ്ലീല വീഡിയോയ്‌ക്കെതിരെ ശക്തമായ മുന്നറിയിപ്പുമായി നടി സുനൈന. തന്റെ മുഖം ആർട്ടിഫിഷ്യൽ ഇന്റലിജൻസ് സാങ്കേതികവിദ്യ ഉപയോഗിച്ച് മോർഫ് ചെയ്ത് അശ്ലീല ദൃശ്യങ്ങളുമായി കൂട്ടിച്ചേർത്ത വീഡിയോ പ്രചരിക്കുന്നതായി ശ്രദ്ധയിൽപ്പെട്ടെന്നും ഇത് കടുത്ത ഞെട്ടലും വെറുപ്പുമുണ്ടാക്കിയെന്നും താരം വ്യക്തമാക്കി. വീഡിയോയുടെ നിർമാണത്തെയും പ്രചാരണത്തെയും ശക്തമായി അപലപിച്ച സുനൈന, തന്റെ അനുമതിയില്ലാതെയാണ് ദൃശ്യങ്ങൾ സൃഷ്ടിച്ചതെന്നും ഇതുമായി ബന്ധപ്പെട്ട് പ്രചരിക്കുന്ന അവകാശവാദങ്ങൾ അടിസ്ഥാനരഹിതമാണെന്നും പറഞ്ഞു.

തന്റെ വ്യക്തിത്വത്തിന്റെയും സ്വകാര്യതയുടെയും അന്തസ്സിന്റെയും ഗുരുതരമായ ലംഘനമാണ് ഇത്തരം പ്രവൃത്തിയെന്ന് സുനൈന പ്രതികരിച്ചു. എഐ ഉപയോഗിച്ച് നിർമിച്ച വ്യാജ ദൃശ്യങ്ങൾ ലൈംഗികാതിക്രമത്തിന് തുല്യമാണെന്നും അപകീർത്തികരമാണെന്നും ചൂണ്ടിക്കാട്ടിയ താരം, 2000-ലെ ഇൻഫർമേഷൻ ടെക്നോളജി ആക്ട്, 2023-ലെ ഭാരതീയ ന്യായ സംഹിത എന്നിവയുൾപ്പെടെയുള്ള ഇന്ത്യൻ നിയമങ്ങൾ പ്രകാരം നടപടികൾ സ്വീകരിക്കുമെന്ന് മുന്നറിയിപ്പ് നൽകി. വീഡിയോ നിർമിച്ചവർക്കും അപ്‌ലോഡ് ചെയ്തവർക്കും പ്രചരിപ്പിച്ചവർക്കുമെതിരെ സിവിൽ, ക്രിമിനൽ നിയമനടപടികൾ സ്വീകരിക്കുമെന്നും എല്ലാ ഓൺലൈൻ പ്ലാറ്റ്‌ഫോമുകളിൽനിന്നും ദൃശ്യങ്ങൾ ഉടൻ നീക്കം ചെയ്യണമെന്നും ആവശ്യപ്പെട്ടു. വീഡിയോ ഷെയർ ചെയ്യുന്നതും റീപോസ്റ്റ് ചെയ്യുന്നതും ഉൾപ്പെടെയുള്ള പ്രവൃത്തികൾ ഉടൻ അവസാനിപ്പിക്കണമെന്നും താരം അഭ്യർഥിച്ചു.

ചലച്ചിത്രമേഖലയിൽ എഐ സാങ്കേതികവിദ്യ ദുരുപയോഗം ചെയ്ത് വ്യാജ ദൃശ്യങ്ങൾ സൃഷ്ടിക്കുന്നതിനെതിരെ താരങ്ങൾ രംഗത്തെത്തുന്ന സംഭവങ്ങൾ വർധിച്ചുവരികയാണ്. അടുത്തിടെ ജാൻവി കപൂറിന്റെയും ജൂനിയർ എൻടിആറിന്റെയും ചിത്രങ്ങൾ ഉപയോഗിച്ച് ‘ചുട്ടമല്ലെ’ ഗാനവുമായി ബന്ധപ്പെട്ട് വ്യാജ ദൃശ്യങ്ങൾ പ്രചരിപ്പിച്ചതിനെതിരെയും നിയമനടപടി സ്വീകരിക്കുമെന്ന മുന്നറിയിപ്പുണ്ടായിരുന്നു. രശ്മിക മന്ദാന, കീർത്തി സുരേഷ് തുടങ്ങിയ താരങ്ങളും സമാനമായ വിഷയങ്ങളിൽ പ്രതികരിച്ചിട്ടുണ്ട്. സിനിമകളിലൂടെയും വെബ് പരമ്പരകളിലൂടെയും ശ്രദ്ധ നേടിയ സുനൈനയുടെ പ്രതികരണം, വ്യക്തികളുടെ മുഖവും ശബ്ദവും അനുമതിയില്ലാതെ ഉപയോഗിച്ച് വ്യാജ ലൈംഗിക ദൃശ്യങ്ങൾ സൃഷ്ടിക്കുന്നതിന്റെ ഗൗരവം വീണ്ടും ചർച്ചയാക്കുകയാണ്.

‘സീൻ’ സിനിമയുടെ പ്രമോഷനുമായി ബന്ധപ്പെട്ട് ദുബായിൽ നടന്ന ചടങ്ങിൽ ധരിച്ച വസ്ത്രത്തിന്റെ പേരിൽ നടി നസ്രിയ നസീമിനെതിരെ സോഷ്യൽ മീഡിയയിൽ വിമർശനങ്ങൾ ഉയർന്നിരുന്നു. പച്ചനിറത്തിലുള്ള ഓഫ് ഷോൾഡർ വസ്ത്രം ധരിച്ചെത്തിയ താരത്തിന്റെ ലുക്ക് ഒരു വിഭാഗം അംഗീകരിച്ചില്ല. ശരീരം കൂടുതൽ കാണിക്കുന്ന തരത്തിലുള്ള വസ്ത്രം നസ്രിയയ്ക്ക് ചേരുന്നില്ലെന്നായിരുന്നു ചിലരുടെ വിമർശനം. ഇതിന് പിന്നാലെ പ്രമോഷൻ ചടങ്ങിൽ ധരിച്ച അതേ വസ്ത്രത്തിലുള്ള ഫോട്ടോഷൂട്ട് ചിത്രങ്ങൾ ഇൻസ്റ്റഗ്രാമിൽ പങ്കുവെച്ചാണ് നസ്രിയ പ്രതികരിച്ചത്.

നസ്രിയയുടെ പുതിയ ലുക്കിന് സിനിമാ മേഖലയിലെ നിരവധി പ്രമുഖർ പിന്തുണയുമായി എത്തി. നസ്ലിൻ, ജിത്തു മാധവൻ, ശ്രിന്ദ, അർച്ചന കവി, മീര നന്ദൻ, ആൻ അഗസ്റ്റിൻ, അനാർക്കലി നാസർ തുടങ്ങിയവർ താരത്തിന്റെ ലുക്കിനെ പ്രശംസിച്ചു. അതേസമയം, വസ്ത്രധാരണത്തിന്റെ പേരിൽ കടുത്ത വ്യക്തിപരമായ അധിക്ഷേപങ്ങളും സോഷ്യൽ മീഡിയയിൽ ഉയർന്നു. പൊതുവേദിയിൽ നസ്രിയയുടെ ഗ്ലാമറസ് ലുക്ക് അപൂർവമാണെന്നും അതിനോട് പൊരുത്തപ്പെടാൻ കഴിയുന്നില്ലെന്നും ചിലർ അഭിപ്രായപ്പെട്ടു. ധനുഷ് ചിത്രം ‘നയ്യാണ്ടി’യുമായി ബന്ധപ്പെട്ട പഴയ വിവാദവും ഇതിനിടെ വീണ്ടും ചർച്ചയായി.

12 വർഷത്തെ ഇടവേളയ്ക്കുശേഷം നസ്രിയ അഭിനയിക്കുന്ന തമിഴ് ചിത്രമാണ് ‘സീൻ’. ജിത്തു മാധവൻ സംവിധാനം ചെയ്യുന്ന ചിത്രത്തിൽ സൂര്യയാണ് നായകൻ. ദുബായിൽ നടന്ന പ്രമോഷൻ ചടങ്ങിൽ, താൻ വളർന്നതും പഠിച്ചതും ദുബായിലായതിനാൽ അവിടേക്ക് മടങ്ങിയെത്തുന്നത് സ്വന്തം വീട്ടിലെത്തുന്നതുപോലെയാണെന്ന് നസ്രിയ പറഞ്ഞു. ജിത്തു മാധവനൊപ്പം സിനിമ ചെയ്യാൻ കഴിഞ്ഞതിലുള്ള സന്തോഷവും സൂര്യയോടുള്ള ആരാധനയും താരം പങ്കുവെച്ചു. നവംബർ ആറിന് ചിത്രം തിയേറ്ററുകളിലെത്തുമെന്നും സിനിമ പ്രേക്ഷകർക്ക് ഏറെ ചിരി സമ്മാനിക്കുമെന്നും നസ്രിയ പ്രതീക്ഷ പ്രകടിപ്പിച്ചു.

കൊച്ചി: ചേരാനെല്ലൂർ വാഹനാപകടവുമായി ബന്ധപ്പെട്ട് എഫ്.ഐ.ആർ. തയ്യാറാക്കിയതിൽ വീഴ്ച വരുത്തിയ നാല് പോലീസ് ഉദ്യോഗസ്ഥരെ സസ്പെൻഡ് ചെയ്തു. സ്റ്റേഷൻ എസ്.എച്ച്.ഒ., എസ്.ഐ. എന്നിവരും രണ്ട് പോലീസ് ഉദ്യോഗസ്ഥരുമാണ് നടപടിക്ക് വിധേയരായത്. ആഭ്യന്തരമന്ത്രി രമേശ് ചെന്നിത്തലയാണ് നിയമസഭയിൽ ഇക്കാര്യം അറിയിച്ചത്. അപകടത്തിനിടയാക്കിയ കാർ ഓടിച്ച 17-കാരന്റെ ജാമ്യം റദ്ദാക്കാൻ കോടതിയെ സമീപിക്കുമെന്നും അദ്ദേഹം വ്യക്തമാക്കി.

അപകടവുമായി ബന്ധപ്പെട്ട് പോലീസിനെതിരെ ഗുരുതരമായ വിമർശനങ്ങൾ ഉയർന്നിരുന്നു. പ്രതിയെ സംരക്ഷിക്കുന്ന നിലപാടാണ് പോലീസ് സ്വീകരിച്ചതെന്ന ആരോപണവും ശക്തമായി. അപകടത്തിൽ കൊല്ലപ്പെട്ട ജയപാലകൃഷ്ണന്റെ മക്കളും ബന്ധുക്കളും പോലീസ് സ്റ്റേഷനിൽ പ്രതിഷേധിച്ചിരുന്നു. വിഷയം നിയമസഭയിൽ അടിയന്തര പ്രമേയത്തിനുള്ള നോട്ടീസായി എത്തിയതിനെത്തുടർന്ന് വീഴ്ച വരുത്തിയവർക്കെതിരെ നടപടിയുണ്ടാകുമെന്ന് മന്ത്രി ഉറപ്പുനൽകി. ജാമ്യം അനുവദിച്ച ജഡ്ജിക്കെതിരെ നിയമപരമായി സ്വീകരിക്കാവുന്ന എല്ലാ നടപടികളും പരിശോധിക്കുമെന്നും അദ്ദേഹം അറിയിച്ചു.

സംഭവത്തിന്റെ പശ്ചാത്തലത്തിൽ എ.ഡി.ജി.പി. പി. വിജയൻ ചേരാനെല്ലൂരിലെത്തി പോലീസ് സ്റ്റേഷനിലും മരിച്ച ജയപാലകൃഷ്ണന്റെ കുടുംബത്തിലും സന്ദർശനം നടത്തി. നീതിപൂർവമായ നടപടികൾ ഉറപ്പാക്കുമെന്നും പോലീസിന്റെ ഭാഗത്ത് വീഴ്ചയുണ്ടെന്ന് കണ്ടെത്തിയാൽ ബന്ധപ്പെട്ട ഉദ്യോഗസ്ഥർക്കെതിരെയും നടപടി സ്വീകരിക്കുമെന്നും അദ്ദേഹം വ്യക്തമാക്കി. തുടർന്ന് നാല് ഉദ്യോഗസ്ഥരെ സസ്പെൻഡ് ചെയ്തതായി മന്ത്രി സഭയെ അറിയിച്ചു. നടപടി ഭരണപക്ഷ അംഗങ്ങളുടെ കൈയടികളോടെയാണ് സഭയിൽ സ്വീകരിക്കപ്പെട്ടത്.

മലപ്പുറം: മദ്യപിച്ച് വാഹനമോടിക്കുന്നതിനെതിരെ സോഷ്യൽ മീഡിയയിൽ സ്റ്റേറ്റസ് പങ്കുവെച്ച് ഒരു മണിക്കൂറിനുള്ളിൽ അധ്യാപകൻ വാഹനാപകടത്തിൽ മരിച്ചു. മലപ്പുറം ഒതുക്കുങ്ങൽ കുഴിപ്പുറം പാലേമാട് സ്വദേശി ഷറഫുദ്ദീൻ (36) ആണ് മരിച്ചത്. ഒതുക്കുങ്ങലിൽ രാത്രി പത്തുമണിയോടെയായിരുന്നു അപകടം. ഷറഫുദ്ദീനും സുഹൃത്ത് ഹബീബും സഞ്ചരിച്ച സ്കൂട്ടറിൽ മദ്യലഹരിയിലായിരുന്ന യുവാവ് ഓടിച്ച കാർ ഇടിക്കുകയായിരുന്നു. ഉടൻ ആശുപത്രിയിലെത്തിച്ചെങ്കിലും ഷറഫുദ്ദീന്റെ ജീവൻ രക്ഷിക്കാനായില്ല.

പറപ്പൂർ സ്വദേശി അക്ബറലിയാണ് മദ്യലഹരിയിൽ അമിതവേഗത്തിൽ കാറോടിച്ചതെന്നാണ് റിപ്പോർട്ട്. അപകടത്തിന് പിന്നാലെ കാറിലുണ്ടായിരുന്ന മറ്റ് രണ്ടുപേർ ഓടി രക്ഷപ്പെട്ടു. സംഭവത്തിൽ അക്ബറലിയെ വേങ്ങര പൊലീസ് കസ്റ്റഡിയിലെടുത്തു. അപകടത്തിന്റെ സാഹചര്യങ്ങളും തുടർനടപടികളും സംബന്ധിച്ച വിവരങ്ങൾ പുറത്തുവരാനുണ്ട്.

വാഹനാപകടങ്ങളിൽ മദ്യപിച്ച് വാഹനമോടിക്കുന്നവരുടെ ഉത്തരവാദിത്തമില്ലായ്മയെക്കുറിച്ച് ഷറഫുദ്ദീൻ പങ്കുവെച്ച അവസാന സോഷ്യൽ മീഡിയ സ്റ്റേറ്റസും ശ്രദ്ധ നേടുകയാണ്. കേരളത്തിൽ ഒരു ദിവസം വാഹനാപകടങ്ങളിൽ 15 പേർ മരിക്കുന്നുണ്ടെന്നും അതിൽ പകുതിയിലേറെയും വെറും അപകടങ്ങളല്ല, കൊലപാതകങ്ങളാണെന്നും അദ്ദേഹം കുറിച്ചിരുന്നു. മദ്യപിച്ച് വാഹനമോടിച്ചാൽ അപകടമുണ്ടാകുമെന്ന് അറിഞ്ഞുകൊണ്ടുതന്നെ മറ്റുള്ളവരുടെ ജീവൻ അപകടത്തിലാക്കുന്നവർക്കെതിരെയുള്ള ശക്തമായ മുന്നറിയിപ്പായിരുന്നു ആ വാക്കുകൾ. അതേ ആശങ്ക പങ്കുവെച്ച് ഒരു മണിക്കൂറിനുള്ളിൽ അദ്ദേഹത്തിന്റെ ജീവൻ തന്നെ അപകടത്തിൽ പൊലിഞ്ഞത് നാടിനെ നടുക്കി.

ഇടുക്കി: അടിമാലിയിൽ ജ്യേഷ്ഠൻ കുത്തിക്കൊലപ്പെടുത്തിയതിനെ തുടർന്ന് 38കാരനായ അനിൽ മരിച്ചു. ശല്യാംപാറ സ്വദേശിയായ അനിലിന്റെ മൂത്ത സഹോദരൻ പ്രസാദിനെ സംഭവവുമായി ബന്ധപ്പെട്ട് പൊലീസ് കസ്റ്റഡിയിലെടുത്തു. മദ്യലഹരിയിലെത്തിയ പ്രസാദ് സഹോദരനുമായി തർക്കത്തിലേർപ്പെട്ടതിനെ തുടർന്നാണ് കൊലപാതകം നടന്നതെന്നാണ് വിവരം. അടുത്തടുത്ത വീടുകളിലായിരുന്നു ഇരുവരും താമസിച്ചിരുന്നത്. മോഷണക്കേസിൽ ജയിലിലായിരുന്ന പ്രസാദ് കഴിഞ്ഞ ദിവസമാണ് ജാമ്യത്തിലിറങ്ങിയത്.

ജാമ്യത്തിലിറങ്ങിയശേഷം മദ്യപിച്ചെത്തിയ പ്രസാദ് അനിലിന്റെ വീട്ടിലെത്തി രൂക്ഷമായ വാക്കുതർക്കത്തിലേർപ്പെട്ടു. തർക്കത്തിനിടെ വീട്ടിലുണ്ടായിരുന്ന കത്തിയെടുത്ത് അനിലിനെ കുത്തിപ്പരിക്കേൽപ്പിക്കുകയായിരുന്നു. ആക്രമണത്തിനുശേഷം ചോരയിൽ കുളിച്ച് കിടന്ന സഹോദരനെ അവഗണിച്ച് പ്രസാദ് വീട്ടിനുള്ളിലിരുന്ന് ടി.വി. കാണുകയായിരുന്നുവെന്നാണ് റിപ്പോർട്ട്. പ്രസാദ് സ്ഥിരമായി കഞ്ചാവ് ഉപയോഗിക്കുന്നയാളാണെന്ന് നാട്ടുകാർ ആരോപിക്കുന്നതായും റിപ്പോർട്ടിലുണ്ട്.

സംഭവസമയത്ത് അനിലിന്റെ ഭാര്യയും കുട്ടികളും ആശുപത്രിയിലായിരുന്നു. വീട്ടിൽ തിരിച്ചെത്തിയപ്പോഴാണ് അനിലിനെ രക്തത്തിൽ കുളിച്ചുകിടക്കുന്ന നിലയിൽ കണ്ടെത്തിയത്. ഉടൻതന്നെ നാട്ടുകാരുടെ സഹായത്തോടെ അടിമാലി താലൂക്ക് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. സംഭവത്തിൽ അടിമാലി പൊലീസ് കേസെടുത്ത് അന്വേഷണം ആരംഭിച്ചു. കസ്റ്റഡിയിലുള്ള പ്രസാദിനെ പൊലീസ് വിശദമായി ചോദ്യം ചെയ്തുവരികയാണ്.

റോം: കേരളത്തിൽ തുടക്കം കുറിച്ച കത്തോലിക്കാ അൽമായ യുവജന മുന്നേറ്റമായ ജീസസ് യൂത്തിന് വത്തിക്കാന്റെ സ്ഥിരാംഗീകാരം. പ്രസ്ഥാനത്തിന്റെ റൂബി ജൂബിലി ആഘോഷവേളയിൽ ലഭിച്ച ഈ അംഗീകാരം ആഗോളതലത്തിലുള്ള ജീസസ് യൂത്തിന്റെ വളർച്ചയിലെ സുപ്രധാന നാഴികക്കല്ലായി. അൽമായർ, കുടുംബം, ജീവൻ എന്നിവയ്ക്കായുള്ള വത്തിക്കാൻ ഡിക്കാസ്റ്ററിയാണ് ജീസസ് യൂത്തിനെ നിയമപരമായ വ്യക്തിത്വമുള്ള അന്താരാഷ്ട്ര വിശ്വാസി സംഘടനയായി ഔദ്യോഗികമായി സ്ഥിരീകരിച്ചത്. പ്രസ്ഥാനത്തിന്റെ പുതുക്കിയ ഭരണഘടനയ്ക്കും വത്തിക്കാൻ അന്തിമ അംഗീകാരം നൽകി.

2016 മേയ് 15-നാണ് ജീസസ് യൂത്തിന് ആദ്യമായി താൽക്കാലിക അംഗീകാരം ലഭിച്ചത്. അന്ന് അൽമായർക്കായുള്ള പൊന്തിഫിക്കൽ കൗൺസിൽ സംഘടനയുടെ നിയമാവലി പരീക്ഷണാടിസ്ഥാനത്തിൽ അംഗീകരിക്കുകയായിരുന്നു. പത്തുവർഷത്തെ പ്രവർത്തനങ്ങളും വളർച്ചയും വിലയിരുത്തിയ ശേഷമാണ് ഇപ്പോൾ സ്ഥിരാംഗീകാരം ലഭിച്ചിരിക്കുന്നത്. റോമിൽ നടക്കുന്ന ജീസസ് യൂത്തിന്റെ അന്താരാഷ്ട്ര സമ്മേളനമായ ‘ഗോ’യുടെ (GO) വേദിയിലാണ് ഔദ്യോഗിക ഉത്തരവ് കൈമാറിയത്. വത്തിക്കാൻ ഡിക്കാസ്റ്ററിയുടെ അസോസിയേറ്റ് സെക്രട്ടറിയും റോമിലെ സഹായമെത്രാനുമായ ഡോ. ദാരിയോ ഗർവാസി, ജീസസ് യൂത്ത് ഇന്റർനാഷണൽ കോ-ഓർഡിനേറ്റർ ഡോ. മിഥുൻ പോളിന് ഉത്തരവ് കൈമാറി. കണ്ണൂർ ബിഷപ്പും ജീസസ് യൂത്തിന്റെ സഭാകാര്യ ഉപദേഷ്ടാവുമായ ഡോ. അലക്സ് വടക്കുംതല ഉൾപ്പെടെയുള്ള പ്രമുഖരും ചടങ്ങിൽ സന്നിഹിതരായിരുന്നു.

1985-ൽ കേരളത്തിൽ യുവജനങ്ങളുടെ പ്രാർഥനാ കൂട്ടായ്മകളിലൂടെ ആരംഭിച്ച ജീസസ് യൂത്ത് ഇന്ന് ലോകമെമ്പാടുമുള്ള 53 രാജ്യങ്ങളിൽ സജീവ സാന്നിധ്യമാണ്. വിശ്വാസജീവിതം, പ്രാർഥന, സുവിശേഷ പ്രഘോഷണം, കൂട്ടായ്മ, സേവനപ്രവർത്തനങ്ങൾ എന്നിവയ്ക്ക് പ്രാധാന്യം നൽകുന്ന പ്രസ്ഥാനം ഭാഷയുടെയും സംസ്കാരത്തിന്റെയും അതിരുകൾ മറികടന്ന് വളരുകയായിരുന്നു. റോമിൽ നടന്ന അന്താരാഷ്ട്ര സമ്മേളനത്തിൽ 42 രാജ്യങ്ങളിൽ നിന്നുള്ള 1,110 പ്രതിനിധികൾ പങ്കെടുത്തതായി റിപ്പോർട്ടുകൾ വ്യക്തമാക്കുന്നു. സമ്മേളനത്തിന്റെ ഭാഗമായി ലെയോ പതിനാലാമൻ മാർപാപ്പയുമായി പ്രതിനിധികൾ കൂടിക്കാഴ്ച നടത്തുകയും അദ്ദേഹത്തിന്റെ ആശീർവാദം സ്വീകരിക്കുകയും ചെയ്തു. യുവജനങ്ങൾ സഭയുടെ സജീവ സാന്നിധ്യമാണെന്നും ക്രിസ്തുവിന്റെ സ്നേഹം മറ്റുള്ളവരിലേക്ക് എത്തിക്കുന്നതിൽ അവർക്ക് വലിയ പങ്കുണ്ടെന്നും മാർപാപ്പ ഓർമിപ്പിച്ചു.

2033-ലെ രക്ഷാകര മഹാജൂബിലിക്കും 2035-ലെ ജീസസ് യൂത്തിന്റെ സുവർണ ജൂബിലിക്കും ഒരുങ്ങുന്ന വേളയിൽ ലഭിച്ച സ്ഥിരാംഗീകാരം പ്രസ്ഥാനത്തിന് കൂടുതൽ ഊർജവും ഉത്തരവാദിത്വബോധവും പകരുന്നതാണെന്ന് അന്താരാഷ്ട്ര കോ-ഓർഡിനേറ്റർ ഡോ. മിഥുൻ പോൾ പറഞ്ഞു. നാല് പതിറ്റാണ്ടുകളായി കേരളത്തിൽനിന്ന് ലോകത്തിന്റെ വിവിധ ഭാഗങ്ങളിലേക്ക് വ്യാപിച്ച വിശ്വാസയാത്രയ്ക്ക് വത്തിക്കാന്റെ അംഗീകാരം പുതിയ ദിശാബോധം നൽകുമെന്നാണ് പ്രതീക്ഷ. യുവജനങ്ങളെയും കുടുംബങ്ങളെയും വിശ്വാസജീവിതത്തിലേക്ക് നയിക്കുന്നതിനൊപ്പം സുവിശേഷവൽക്കരണ പ്രവർത്തനങ്ങൾ കൂടുതൽ ശക്തിപ്പെടുത്താനും ഈ അംഗീകാരം സഹായകമാകും.

ടോം ജോസ് തടിയംപാട്

തൊടുപുഴ കരിങ്കുന്നം സ്വദേശി ജോമോൻ ജോർജ് ചൂരക്കാട്ടു വർഷങ്ങളായി തൊടുപുഴ പ്രദേശത്തു ആംബുലൻസ് ഓടിച്ചു അനേകം മനുഷ്യരുടെ ജീവൻ രക്ഷപ്പെടുത്തിയ ആളായിരുന്നു കൂടാതെ ഈ ജോലികൊണ്ടു കുടുംബം നടത്തി നന്നായി ജീവിച്ചിരുന്ന മനുഷ്യനായിരുന്നു , എന്നാൽ പെട്ടെന്ന് ശ്വാസകോശത്തിൽ ഉണ്ടായ ക്യൻസർ ആ കുടുംബത്തെ തളർത്തി ചികിൽസിക്കാൻ പണമില്ലാതെ വിഷമിക്കുകയാണ് ഈ കുടുംബം.. തിരുവനതപുരം R C C യിലും ശ്രീ ചിത്തിരയിലും ഇപ്പോൾ ചികിത്സയിലാണ്. ശ്വാസകോശ ഓപ്പറേഷനു 10 ലക്ഷം രൂപ വേണം എന്നാണ് ആശുപത്രി അധികൃതർ അറിയിച്ചിരിക്കുന്നത് നിങ്ങൾ ദയവായി സഹായിക്കണം .സ്വിന്റണിൽ താമസിക്കുന്ന കരിങ്കുന്നം സ്വദേശി പ്രിൻസ് മാത്യു ഏലംന്താനത്തു ആണ് ഞങ്ങളെ ജോമോന്റെ അവസ്ഥ അറിയിച്ചത് .
ജോമോന്റെ ഭാര്യയുടെ ഫോൺ നമ്പർ ഇതോടൊപ്പം പ്രസിദ്ധീകരിക്കുന്നു 00919656087583. .നിങ്ങളുടെ സഹായങ്ങൾ താഴെകാണുന്ന ഇടുക്കി ചാരിറ്റി ഗ്രൂപ്പ് യു കെ യുടെ അക്കൗണ്ടിൽ ദയവായി നൽകുക .
.
ഇടുക്കി ചാരിറ്റി ഗ്രൂപ്പ് യു കെ എന്നത് കേരളത്തിൽ നിന്നും യു കെയിൽ കുടിയേറിയ കഷ്ടപാടും ബുദ്ധിമുട്ടും അറിഞ്ഞവരുടെ ഒരു കൂട്ടായ്‌മയാണ്‌. ഞങ്ങൾ ‍ സൂതാരൃവും സതൃസന്തവുമായി ജാതി ,മത ,വർഗ ,വർണ്ണ, സ്ഥല ,കാല ഭേതമെന്യയെ കേരളത്തിലും, യു കെ യിലും , നടത്തിയ ചാരിറ്റി പ്രവർത്തനത്തിലൂടെ ഇതുവരെ ഏകദേശം ഒരു കോടി എൺപത്തിരണ്ടു ലക്ഷം രൂപ (18200000) നാട്ടിലും യു കെയിലുമുള്ള പാവപ്പെട്ട ആളുകൾക്ക് നൽകി സഹായിക്കാൻ കഴിഞ്ഞിട്ടുണ്ട് ഇതിൽ ഏറ്റവും വലിയ തുക ലണ്ടനിൽ കാരവൻ പാർക്കിൽ ആൽമഹത്യയല്ലാതെ മാർഗമില്ലാതെ കഴിഞ്ഞ ഒരു കുടുബത്തിനു 31 ലക്ഷം രൂപ പിരിച്ചു കൊടുക്കാൻ കഴിഞ്ഞതാണ് .

ഇടുക്കി ചാരിറ്റിക്കു നേതൃത്വ൦കൊടുക്കുന്നത് സാബു ഫിലിപ്പ് 07708181997 ടോം ജോസ് തടിയംപാട് 07859060320 സജി തോമസ്‌ 07803276626.. .എന്നിവരാണ് .ഞങ്ങളുടെ രക്ഷാധികാരി ബഹുമാനപ്പെട്ട തമ്പി ജോസാണ്‌ .
ദാരിദ്രൃം എന്തെന്നറിഞ്ഞവർക്കെ പാരിൽ പരക്ലേശവിവേകമുള്ളു.””,
ACCOUNT NAME , IDUKKI GROUP
ACCOUNT NO 50869805
SORT CODE 20-50.-82
BANK BARCLAYS.